لو إنت بتشجع تشيلسي أو علي الأقل متابع كويس أخبار الدوري الإنجليزي فإنت أكيد سمعت خبر إن خلاص (رومان إبراموفيتش Roman Abramovich) مالك نادي تشيلسي حيبيع النادي .. فيه ناس لما سمعت الخبر ده لطمت علي وشها وقعدت تصوت وقلبوها مناحة علي أساس إن خلاص لو (إبراموفيتش) مشي فتاني يوم النادي حيقع ومش بعيد ينزل درجة تانية .. أنا بس عايزكوا تستهدوا بالله وتفهموا إن مش حيفرق مين اللي حيشتري النادي من بعده .. لو حنعتبر نادي تشيلسي مجازاً شقة بيملكها (إبراموفيتش) وعايز يبيعها فهو حيبيع شقة متشطبة ألترا لوكس .. شقة في موقع ممتاز ضمن كبار الدوري الإنجليزي .. ثمن تشيلسي دلوقتي بالميت خالص يجيب 2 مليار جنيه إسترليني وساعتها (إبراموفيتش) حيكون من الزاهدين يعني وهو بيبيع والسعر ده حتي من غير الإستاد الجديد .. (إبراموفيتش) حول تشيلسي لنادي معدش يفرق مين الشخص أو المجموعة اللي حتملكه من بعده لإن أكيد وحتماً ولابد يكونوا معاهم مليارات مش ملايين.
خلاص يا جدعان متقلقوش .. تشيلسي شقة متشطبة وألف مين يتمني يشتريها .. إسم تشيلسي بقي من ذهب .. بقي Brand بقي ماركة مسجلة زيه زي Apple ولازم تكون فاهم إن الفضل في كل ده يرجع ل(إبراموفيتش) .. حتي لما إن شاء الله الإستاد الجديد بتاعهم يتبني سواء (إبراموفيتش) كان هو لسه مالك النادي أو لا فأنا رأيي إن الإستاد ده لازم يتسمي بإسمه .. حتي لو حصل وحد تاني إشتري النادي وبناه بفلوسه .. لازم تكونوا فاهمين إن الإستاد ده إتبني علي حس (إبراموفيتش) حتي لو مش هو اللي إسمه علي الفواتير.
صدقني لو قلتلك إن تشيلسي والعالم كله مش حيشوف مالك نادي زي (إبراموفيتش) .. رجل معندوش أي مشكلة إنه يدفع ملايين الدولارات بتوع الشرط الجزائي لمدير فني لمجرد إنه زهق منه وعايز يمشيه وكمان يمشي معاه أحسن حارس مرمي في العالم .. في حالة إنك بتهرش في شعرك بتحاول تفتكر أنا بتكلم عن مين فأنا قصدي علي (أنتونيو كونتي Antonio Conte) و (ثيبو كورتوا Thebaut Courtois) .. رجل معندوش مشكلة يجيب مدير فني ويتخانق معاه ويمشيه وبعد كده يتخانق معاه ويمشيه تاني وطبعاً الفزورة دي معروفه .. أيا كانت عيوب (إبراموفيتش) ويمكن أهمها إنه مبيصبرش علي حد فإنت متقدرش تنكر إن أي مشجع كرة يتمني إن حد زيه يبقي رئيس النادي اللي بيشجعه .. رجل أول ما بيشوف الحال بدأ يميل في فرقته تلاقيه إتدخل يسأل الشرط الجزائي بتاع المدير الفني اللي جايبينه كام .. يدفعه ويشوف مدير فني تاني يعدل الحال المايل ده .. رجل زي ده مشجعين نيوكاسل يونايتد بيحلموا به يبقي رئيس النادي بتاعهم .. مشجعين مانشستر يونايتد بيشوفوه ويبصوا علي (إيد وودوارد Ed Woodward) المدير التنفيذي بتاعهم ويضربوا كف علي كف .. مشجعي أرسنال قعدوا سنين يبصوا علي اللي بيحصل في تشيلسي ويبصوا علي (أرسين فينجر Arsene Wenger) اللي كان متبت في المنصب بإيديه وسنانه وبيحسبنوا في سرهم وفه اللي كانوا بيحسبنوا بصوت عالي حتي .. أحياناً (إبراموفيتش) بيقع في أخطاء كارثية زي لما إتخانق مع (كارلو أنشيلوتي Carlo Ancelotti) عشان يشتري (أندري تشفتشينكو Andre Shevchenko) .. هو بيبقي عارف إنه غلطان وتلاقيه يقولك عادي بفلوسي يا كلاب .. بإختصار (إبراموفيتش) رئيس نادي مش حيتكرر تاني بس خلاص تشيلسي وصل لمرحلة إنه مبقاش واقف عليه.
ده مكنش وضع تشيلسي سنة 2003 لما (إبراموفيتش) إشتراه .. عشان تفهم صح لازم تدرس الصفقة دي من وجهتين نظر مختلفين اللي هم وجهة نظر البايع ووجهة نظر المشتري .. وخلينا نبدأ من وجهة نظر البايع اللي هو نادي تشيلسي .. النادي كان عنده إمكانيات إنه يبقي حاجة كبيرة .. أحب بس أفكرك إن في الفترة من موسم 1996/1997 لحد موسم 1999/2000 الفرقة كسبت 5 بطولات اللي هم كأسين إنجلترا FA Cup وكأس League Cup وكأس الكؤوس الأوروبية اللي هي بتعادل الEuropa League دلوقتي وكأس السوبر الأوروبي .. مشجعين النادي وقتها كانوا عارفين إن ده أخرهم خصوصاً إن في الفترة اللي قبل كده كانت أيام سودا .. في الفترة من موسم 1975/1976 لحد موسم 1988/1989 يعني بتتكلم عن 14 موسم منهم 8 مواسم تشيلسي لعبهم في دوري الدرجة الثانية .. اللي أنا عايز أوصله ليك إن (إبراموفيتش) مانقذش تشيلسي .. النادي مكنش بيقع لما هو إشتراه .. بس النادي كان عارف إنه عمره ما حيبقي من كبار إنجلترا وده اللي (إبراموفيتش) حققه .. في أول أربع مواسم في الشكل الحالي من الPremier League أو الدوري الإنجليزي الممتاز تشيلسي حقق المراكز ال11 وبعد كده ال14 وبعده المركز ال11 موسمين ورا بعض.
لو حنتكلم من وجهة نظر المشتري اللي هو (إبراموفيتش) فهنا السياسة بتلعب دور إنت ممكن متكونش واخد بالك منه .. سنة 2003 اللي هي السنة اللي (إبراموفيتش) إشتري فيها تشيلسي هي نفس السنة اللي (فلاديمير بوتين Vladimir Putin) بقي هو الكل في الكل في روسيا .. في الفترة دي أي حد معاه فلوس في روسيا إترعب من اللي عمله (بوتين) في واحد إسمه (ميخائيل خودوركوفسكي Mikhail Khodorkovsky) وده كان ماسك أكبر شركة بترول في روسيا وقتها وكان إسمها يوكوس Yukos .. الرجل ده إشتري Yukos أيام فترة الإنفتاح اللي عاشتها روسيا في التسعينات لما كل شركات القطاع العام إتخصخصت وإتباعت لرجال أعمال و(ميخائيل خودوركوفسكي) كان مضيع فلوسه علي التبرعات اللي بيعملها للأحزاب الليبرالية الروسية .. (بوتين) طلب منه يبطل فرفض وكعقاب له إتسجن وشركته إتباعت لشركتي جازبروم Gazprom وروزنيفت Rosneft .. طبعاً (إبراموفيتش) شاف اللي حصل ل(ميخائيل خودوركوفسكي) وقال لنفسه أنا محتاج أطلع فلوسي بره روسيا وبعد دراسة إكتشف إن أنسب طريقة لتحقيق ده إنه يدفع 1.2 مليار دولار عشان يشتري نادي تشيلسي .. رجال الأعمال الروس القريبين من (بوتين) أو اللي بيتسمو أوليجاركس Oligarchs شافوا اللي عمله (إبراموفيتش) وقالوله يا إبن اللاعيبه وبدأوا يقلدوه وراحد ورا التاني .. (أليشير أوسمانوف Alisher Usmanov) وده رجل معاه فلوس من المحسوبين علي إنهم من صحاب (بوتين) إشتري حصة في نادي أرسنال سنة 2007 .. سنة 2010 واحد تاني إسمه (ميخائيل بروخوروف Mikhail Prokhorov) إشتري نادي نيويورك جيتز وده نادي بيلعب بيسبول بس في أميركا فمتستغربش لو الإسم معداش عليك قبل كده .. واحد تالت إسمه (ديميتري ريبولوفيف Dmitri Rybolovlev) إشتري نادي موناكو الفرنسي.
جري الشريط من 2003 لحد 2014 وحتلاقي إن الدنيا حالها إتقلب .. الكونجرس الأميريكي بقي بيعتبر الأوليجاركس Oligarchs دول كأنهم جواسيس في إيد (بوتين) وحتي العلاقات البريطانية الروسية بقت زي الزفت بعد محاولة إغتيال جاسوس روسي إسمه (سيرجي سكريبال Sergei Skripal) هربان في بريطانيا سنة 2017 .. بس رغم كل ده محدش من الأوليجاركس اللي إشتروا أندية في أوروبا وأميركا شايفين سبب يستدعي إنهم يسيبوا الBusiness ده وخلي بالك متخليش اللي بتسمعه في الأخبار يخدعك .. ناس كتير قرت خبر إن (أليشير أوسمانوف) باع حصة ال30% اللي كان بيملكها لأرسنال لشريكه رجل الأعمال الأميريكي (ستان كورنيكي Stan Kroenke) وقالوا بااااااس جبرت كده يا جدعان الأوليجاركس الروس بيتكرشوا من إنجلترا واحد ورا التاني .. بس الحقيقه مش كده .. سبب إن (أليشير أوسمانوف) باع هو إنه إتخنق من (ستان كورنيكي) اللي مكنش مخلي ليه أي رأي في إدارة النادي فقرر من زهقه يبيع حصته في أرسنال وفيه كلام إنه بيفكر يشتري حصة في نادي إيفرتون .. الناس وقعت في نفس الغلطة لما قرت خبر إن (ميخائيل بروخوروف) باع نادي نيويورك جيتز بس الحقيقة إنه باع 49% من أسهم النادي لواحد إسمه (جو تساي Joe Tsai) وده واحد من المؤسسين لشركة علي بابا Alibaba الصينية عشان ياخد الفلوس يروح يشتري بيها نادي بروكلين نيتس.
صحيح إن الحكومة البريطانية جمدت الفيزا بتاعته وإنها زي ما تكون بتعتبره مواطن درجة تانية بس كل ده ولا يفرق مع (إبراموفيتش) لإنه لو حيحسبها حيحسبها بالورقة والقلم .. دلوقتي في موسم 2016/2017 النادي أرباحه كانت 20 مليون دولار والأرباح دي جت من إن النادي بيعرف يبيع لاعيبته بسعر عالي فده عوض أوي المصاريف اللي بتتدفع علي إدارة النادي .. نادي تشيلسي لحد اللحظة اللي إنت بتقرأ فيها الكلام ده ديونه 936 مليون دولار وأغلب الفلوس دي (إبراموفيتش) دافعها من جيبه يعني النادي مديون ل(إبراموفيتش) شخصياً وإن كان الرقم ده ميجيش حاجة جنب ال140 مليون جنيه إسترليني اللي النادي كان مديون بيهم قبل ما (إبراموفيتش) يشتريه .. عشان كده الكلام إن لو (إبراموفيتش) حيبيع فهو مش حيبيع بمبلغ أقل من 2.5 مليار دولار.
الوضع دلوقتي إن لو (إبراموفيتش) مشي حيجي 10 غيره أغنيا زيه برده .. يمكن مش حيبقوا روس ممكن المالك الجديد يبقي صيني أو أميريكي أو خليجي أو حتي إنجليزي .. مش حتفرق .. أيا كان اللي حيشتري النادي حيبقي في نفس المستوي المادي بتاع (إبراموفيتش) والنادي مش حيقع .. لو إنت كنت متخيل إن بمجرد ما (إبراموفيتش) يمشي فكده خلاص تشيلسي وقع يبقي إنت سوري في الكلمة حافظ مش فاهم .. لو بكره الصبح قطر حبت تخش الدوري الإنجليزي أول حاجة حيعملوها حيرفعوا سماعة التليفون ويكلموا (إبراموفيتش) يسألوه عايز كام.
اللي إنت محتاج تفهمه إن أيا كان مين اللي حيشتري تشيلسي من (إبراموفيتش) فهو حيكون عارف إن النادي لسه مجابش أخره .. بمعني .. صحيح هم أنجح نادي في لندن .. هم النادي الوحيد من لندن اللي معاه 5 بطولات دوري إنجليزي و 5 بطولات FA Cup والوحيد اللي كسب بطولة Champions League .. مع كل موسم حتلاقيهم من المرشحين إنهم يكسبوا كل بطولة داخلين فيها .. السنة دي لوحدها هم المرشح رقم واحد إنه يكسب بطولة Europa League وبعد أداءهم لحد دلوقتي في الدوري تحت إيد (ماوريسيو ساري Mauricio Sarri) فهم وليفربول ومانشستر سيتي واحد فيهم اللي حياخد الدوري السنة دي .. المشكلة إن لما إن شاء الله إستاد الفراخ اللي هو نيو وايت هارت لاين New White Hart Lane بتاع نادي توتنهام يشتغل فساعتها إستاد ستامفورد بريدج Stamford Bridge بتاع نادي تشيلسي حيبقي رابع أكبر إستاد في لندن وحيبقي سابع أكبر إستاد بيتلعب فيه ماتشات الدوري الإنجليزي الممتاز .. يا راجل ده نادي أستون فيلا اللي بيلعب في Championship اللي إحنا بنسميه مجازاً دوري الدرجة الثانية إستادهم أكبر من Stamford Bridge .. أيا كان المالك الجديد حيبقي مين حتبقي أولولية بالنسبة له إنه يعمل إستاد جديد .. الفكرة مش مجرد إن إستاد أكبر يعني تذاكر أكتر .. الفكرة إن إستاد أكبر يعني مشجعين أكتر يعني بضاعة شايلة إسم النادي حتتباع أكتر .. خليني أديلك مثال .. وفق كلام مجلة Forbes الأميريكية فلما نادي أرسنال عزل من إستاد هايبوري Highbury لإستاد الإمارات من 10 سنين أرباحهم من بيع التذاكر و بيع التي-شيرتات و أي حاجة شايلة شعار النادي في الماتشات اللي بتتلعب علي أرضهم زادت من 43.84 مليون جنيه إسترليني في السنة ل100 مليون جنيه إسترليني في السنة .. ده السبب اللي خلي إدارة أرسنال تضحي ب(فينجر) لما إكتشفوا إن أعداد الجماهير اللي بتحضر الماتشات بدأت تقل في أخر أيامه .. هم إكتشفوا إن أرباح النادي عماله تقل جامد لإن جماهير أقل معناه تذاكر أقل و بضايع أقل بتتباع في الإستاد .. علي أقل تقدير لو تشيلسي بني إستاد جديد بيشيل 60,000 متفرج فإنت علي أقل تقدير خالص أرباحهم في السنة حتزيد بنسبة 50%.
فيه كلام علي إن (إبراموفيتش) رجع في كلامه و مش حيبيع خصوصاً بعد ما إتقال إنه رفض عرض ب2 مليار جنيه إسترليني قدمه رجل أعمال إنجليزي إسمه (جيمس راتكليف James Ratcliffe) اللي ماسك شركة البتروكيماويات العملاقة إينيوس Ineos .. مش كده و بس ..النادي قرر إنه يصرف 500 مليون جنيه إسترليني علي أعمال توسعة في الإستاد .. أخبار زي دي خلت الناس تسأل هو فيه إيه بالضبط؟ .. تقديري الشخصي إن (إبراموفيتش) مش عايز يبيع النادي كله هو عايز يبيع حصة منه .. حاجة كده زي اللي عملها الشيخ (منصور) مالك نادي مانشستر سيتي لما باع 13% من أسهم النادي لتكتل صيني إسمه CMC خصوصاً إنه رفض عرض من شركة أميريكية إسمها Silver Lakeبتملك حصة في شركة Tesla Motors و شركة Alibaba إنها تشتري حصة من أسهم النادي .. الكلام ده أنا شخصياً أقدر أستوعبه و أصدقه خصوصاً بعد الكلام إن (إبراموفيتش) قعد كتير مع واحد إسمه (جو رافيتش Joe Ravitch) ماسك بنك إستثماري إسمه Raine Group عشان يشتري حصة من النادي بعد ما الفكرة دخلت دماغه .. أو إن (إبراموفيتش) عايز يبيع فعلاً بس مستني يسمع رقم 2.5 أو 3 مليار جنيه إسترليني .. (إبراموفيتش) رجل مش ناقص فلوس .. ده رجل ثروته بتقدر ب9.3 مليار جنيه إسترليني و سنة 2007 دافع نفقة بس لمراته الأولانية اللي طلقها 150 مليون جنيه إسترليني .. أيا كان الأيام الجايه حتبقي أيام جميلة علي مشجعي تشيلسي .. فمش عايزكوا تقلقوا .. إفرحوا يا شوية نكديين إفرحوا.
المصادر:
- مقالة بعنوان You’ve not paid attention if you think Chelsea fall without Roman Abramovich, he’s made them golden يعني إنت تبقي فاتك كتير لو كنت متخيل إن تشيلسي حيقع من غير (رومان إبراموفيتش) الرجل ده خلي إسم النادي من ذهب .. نشرت في جريدة The Daily Mail البريطانية و ده لينك المقالة الأصلية:
http://www.dailymail.co.uk/sport/football/article-6103703/Youve-not-paid-attention-think-Chelsea-fall-without-Roman-Abramovich.html - مقالة بعنوان It’s time for Abramovich to sell Chelsea FC .. الوقت جه إن (إبراموفيتش) يبيع نادي تشيلسي .. نشرت في مجلة Bloomberg الأميريكية و ده لينك المقالة الأصلية:
https://www.bloomberg.com/opinion/articles/2018-08-28/abramovich-time-for-russian-billionaire-to-sell-chelsea-fc - مقالة بعنوان Roman Abramovich reportedly trying to sell minority stake at Chelsea .. (رومان إبراموفيتش) باين عليه بيحاول يبيع حصة صغيرة من نادي تشيلسي .. نشرت في جريدة The Telegraph البريطانية و ده لينك المقالة الأصلية:
https://www.telegraph.co.uk/football/2018/08/26/roman-abramovich-trying-sell-chelsea-2billion/
