تعالوا مع بعض نلعب فانتازي سوا .. كلنا بنحب اللعبة دي مع إنها بتحرق دمنا ما بين هبد الأقرع أو بلاش الأقرع دي عشان ميبقاش تنمر خليها فيلسوف الغبرة (بيب جوارديولا Pep Guardiola) وما بين خوازيق (يورجين كلوب Jurgen Klopp) بس معلش تعالوا نتسلي سوا .. تفتكر لو إنت مكان (هاري كاين Harry Kane) أحسنلك تكمل في توتنهام ولا تمشي؟ .. وقبل ما تتسرع وتجاوب حاول تفكر في الكلمتين اللي أنا حقولهم .. لاعيبه الكورة في الدنيا كلها نوعين .. نوع بيقولك أنا إبن النادي ومش حسيبه زي (فرانشيسكو توتي Francesco Totti) كده مثلاً ودي حاجة أنا بحترمها جداً ولو عليا كان نفسي أشوفه بيلعب في فرقة كبيرة في الدوري الإسباني أو الإنجليزي بس قدر الله وما شاء فعل .. النوع الثاني هو اللي بيجري ورا البطولات ومن أمثلة النوع ده واحد إسمه (ريو فيرديناند Rio Ferdinand).
(ريو فيرديناند) للي منكوا مواليد الألفينات وملحقتوش أيام الدوري الإنجليزي علي Show Time كان واحد من أحسن المدافعين اللي عدوا علي إنجلترا كلها ولو جيت تبص علي Career بتاعته الحقيقة إنت جايز تتعلم منه حاجات كتير أوي .. سنة 2001 (ريو فيرديناند) كان يعتبر أحسن مدافع ناشيء في إنجلترا كلها .. بيلعب في فرقة محترمة أوي إسمها ليدز يونايتد بتنافس علي بطولة الدوري ولعب في نص نهائي بطولة Champions League معاهم .. قلب الدفاع الأساسي لمنتخب بلده .. بس بعد ما كأس العالم 2002 اللي إتلعب في كوريا الجنوبية واليابان خلص لقي وكيل أعماله بيقوله مانشستر يونايتد مقدمين ليك Offer وعايزينك .. تاني .. في الوقت ده هو كان أساسي في فرقته اللي بتنافس علي بطولة الدوري وأساسي في منتخب بلده .. فعلياً هو معندوش أي مبرر إنه يقبل Offer بس هو طلب يقابل رئيس النادي وقتها (بيتر ريدسدايدل Peter Ridsdale) وقعد معاه في إجتماع أكتر من 6 ساعات عشان يجبره إنه يقبل يبيعه لمانشستر يونايتد .. السؤال دلوقتي إيه اللي يخليك تبقي مُصر أوي كده تروح مانشستر يونايتد يا (ريو فيرديناند)؟
الحقيقة مفيش إجابة أكتر من إنه قرر يجازف وياخد Risk وشوف وصل لإيه بعدها .. مع مانشستر يونايتد هو خد 6 بطولات دوري إنجليزي وبطولة Champions League في الوقت اللي ليدز يونايتد هبط درجه ثالثة وأديه لحد دلوقتي في دوري المظاليم أو دوري الدرجة الثانية ومش عارف يصعد لحد ما ربنا كرمه في موسم 2019-2020 .. وده اللي إنت تتعلمه من (ريو فيرديناند) .. خد الRisk .. ده بالضبط اللي عمله (واين روني Wayne Rooney) لما قرر يسيب إيفرتون ويروح مانشستر يونايتد .. مكنش فيه حد يقدر يضمن بنسبة 100% هل هو حيقدر يثبت نفسه أو لا .. إنت أساسي في إيفرتون وأساسي في منتخب بلدك إيه اللي يوديك نادي صحيح كبير بس يا عالم حتلعب فيه أساسي ولا حتقعد دكة .. نفس الكلام حصل مع (روبين فان بيرسي Robin Van Persie) لما قرر يسيب أرسنال اللي مش بس كان أساسي فيه ده كان كابتن الفرقة ويروح مانشستر يونايتد .. النقطة اللي يا إما حترفعك لسابع سما أو تخسفك لسابع أرض إنك تحسب الRisk كويس.
سواء (ريو فيرديناند) أو (واين روني) أو (روبين فان بيرسي) حسبوها صح .. هم قرروا يروحوا نادي كبير فشخ معاه فلوس كتير فشخ وماسك الفرقة رجل بيفهم فشخ .. إياك تقلل من الدور اللي لعبه وجود حد زي السير (أليكس فيرجسون Alex Ferguson) كمدير فني في إن ال3 لاعيبه يقرروا ياخدوا الRisk ويروحوا يلعبوا تحت إيده.
بعد الرغي الكتير اللي أنا حكيته ده تعالي نرجع تاني للسؤال بتاع (هاري كاين) .. تسيب توتنهام ولا تقعد؟ .. مهم تكون فاهم إنك بتتكلم عن لاعيب أساسي في فرقته .. أساسي في منتخب بلده .. عنده 26 سنة فلسه قدامه وقت يدي في الملاعب بس لحد دلوقتي مخدش بطولة عليها القيمة فلازم أسأل تاني .. يمشي ولا يقعد؟ .. مهم تكون فاهم برده إن الزمن دوار والدنيا دي جمعية ودايره .. كان فيه وقت لو إنت لاعيب كورة عايز تثبت نفسك فالأحسن ليك إنك تروح إيفيرتون أو ليدز يونايتد أو أرسنال أو حتي توتنهام بس لو حتتكلم عن دلوقتي (هاري كاين) حب يسيب توتنهام يروح فين؟
هو مستحيل يروح نادي في لندن فإستبعد تشيلسي ووش يعني مش حيروح أرسنال .. كده هو مقداموش غير ليفربول وهم مش عايزينه أو مانشستر يونايتد أو مانشستر سيتي .. السيتي عندهم إتنين مهاجمين أفشخ من بعض ففعلياً لو بكره الصبح (هاري كين) حب يسيب توتنهام ويروح نادي جوه إنجلترا هو معندوش حل غير مانشستر يونايتد اللي هو لو أنا مكان وكيل أعماله أقولك خليك مكانك أحسن .. خليني أبقي واضح وأجيبهالك علي بلاطة .. مانشستر يونايتد ملوش قومة دلوقتي .. الفرقة دي بالميت محتاجة 3 سنين عشان المشروع بتاع (أولي جونار سولشاير Ole Gunnar Solskjaer) يكمل ده لو هم أساساً سابوه يكمل المشروع بتاعه يعني.
شوف يا (هاري كاين) يا إبني اللي يقرر يروح مانشستر يونايتد دلوقتي ده لازم يبقي لاعيب زي (دانييل جيمس Daniel James) كده .. ده لاعيب لسه ورور عنده 22 سنة الموسم اللي فات كان بيلعب في فرقة إسمها سوانسزي بتلعب في دوري المظاليم فجأة جاله Offer من مانشستر يونايتد وجاله Offer تاني من ليدز يونايتد فطبيعي زيه زي أي بني أدم عاقل يمسك في الفرصة بإيديه وسنانه ويروح مانشستر وياخد الRisk بس فيه فرق بين الRisk بتاعته والRisk بتاعة (ريو فيرديناند) .. (ريو فيرديناند) راح مانشستر أيام ما كان ماسكاها إدارة مستقرة وماسك الفرقة مدير الفني من أنجح المدربين في العالم فلو هو معرفش يثبت نفسه فدي حتبقي مشكلته هو الشخصية وهو اللي يشيل ليلته .. بس (دانييل جيمس) وضعه مختلف .. هو راح مانشستر يونايتد في وقت الإدارة مش مستقرة … ماسكها مدير فني الله أعلم حيكمل لحد أخر الشهر ولا لا .. الوضع دلوقتي إنه لازم يقدر يثبت نفسه والناس تقول عليه (رايان جيجز Ryan Giggs) الجديد.
خليك فاكر يا (هاري كين) يا إبني إن أخد الRisk ده فن مش عن عن .. كلنا قلنا علي (رحيم ستيرلينج Raheem Sterling) إنه مش رجل لما ساب ليفربول عشان يروح السيتي .. هو كان لسه صغير عنده 20 سنة بس فكلنا تخيلنا إنه ساب ليفربول عشان الفلوس بس إحنا مشفناش اللي هو شافه .. مشوفناش إن الفرق بين السيتي وليفربول وقتها كان عمال يوسع وإن مركب ليفربول بتغرق وجه الوقت إنه ينط منها .. لما (إنجولو كانتي N’Golo Kante) ساب ليستر سيتي مع إنهم كانوا لسه واخدين الدوري هو شاف إن الفرقة دي خلاص كده جابت أخرها ومش حترجع تاني لمجدها عشان كده هو نط منها بمجرد ما جاله Offer من تشيلسي .. لكن إنت يا ولداه تروح فين؟ حتي لو حبيت تسيب الفراخ.
علي الناحية الثانية العمر بيجري .. لما يا (ريو فيردينان) قرر ياخد الRisk كان عنده 23 سنة .. (دانييل جيمس) عنده 22 سنة .. وعندك لاعيب زي (ترينت أليكساندر أرنولد Trent Alexander-Arnold) لسه عنده 20 سنة بس عشان بيلعب في النادي الصح في التوقيت الصح خد أغلي بطولة ممكن أي لاعيب كورة ياخدها اللي هي Champions League .. بعد كل الهري اللي أنا حكيته ده إنت لو مكان (هاري كاين) تمشي من توتنهام ولا تقعد؟ .. أندية الكورة حالها بيتشقلب أسرع من إنك تتخيل .. سنة 2011 لما إيه سي ميلان خدوا الدوري الإيطالي الناس قالت إن خلاص كده يا جدعان مُرعب أوروبا رجع وأديهم متنييلين بستين نيلة دلوقتي .. سنة 2013 لو كنت رجعت بالزمن قلت للناس اللي بتشجع مانشستر يونايتد إن دي اخر سنة تاخدوا فيها الدوري كنت إتشمت وعيلتي كلها إتشمت والحقيقة مين يلومهم .. إزاي تقول لنادي لسه واخد بطولة الدوري إن دي بداية النهاية؟ .. حيصدقها إزاي ويستوعبها إزاي؟
أنا لو مكان (هاري كاين) فعلياً مش حتفرق إذا كنت مشيت أو قعدت .. النادي الوحيد اللي ممكن يشتريني هو مانشستر يونايتد وحالياً لو تسألني أنا أقولك خليك في توتنهام بكرامتك يا إبن الناس .. عارف ومستني حد يقولي ههههههه إنت ناسي اللي حصل فيهم من بايرن ميونيخ ولا إيه يا كوتش .. ده (ماوريسيو بوتشتينو Mauricio Pochettino) أيامه بقت تتعد علي الصوابع .. لو إنت من أنصار الرأي ده فأنا معاك في نقطة وضدك في نقطة .. معاك إن فيه حاجة غلط في توتنهام وخد ماتش ال7-2 بتاع بايرن ميونيخ ده كمثال .. بتحصل إن فرقة الماتش يتسحب منها في الشوط الثاني .. بتحصل إن فرقة تنزل الشوط التاني تلاقي إن مهما حاولت تلعب أي هجمة ليهم بتضيع وأي هجمة عليهم بتيجي جون .. بس في نفس الوقت فرقة توتنهام في الماتش ده كانت تقيلة بما يكفي وفيها لاعيبه عندها خبرة كافية إنها تفرمل اللي بيحصل وتخلي الفرقة تقف علي رجلها .. ده محصلش .. إنك تخسر 7 علي أرضك ده عامل زي لما تلاقي نفسك بتكح وسخن .. ده مجرد عرض من أعراض دور برد حيرقدك في السرير فياريت تلحق نفسك بسرعة.
مشكلتي مع (بوتشتينو) إنه قالب علي نفس المود بتاع (جوزيه مورينيو Jose Mourinho) أيام ما كان في مانشستر يونايتد وعارف إن بتوع مانشستر بيبصولي دلوقتي وبيقولوا هو مش كفاية تقطيع فينا بقي يا كوتش .. بس صدقني أنا بقطع في فروة (بوتشتينو) دلوقتي .. مالك يا نجم النجوم ده مش منظر واحد لعب نهائي Champions League الموسم اللي فات .. تكسب متنرفز .. تخسر متنرفز .. تتعادل متنرفز .. إنت ماسك فرقة كبيرة يا نجم .. فرقة كبيرة إنها خلت لاعيب زي (كريستيان إريكسين Christian Eriksen) إتقدمله عروض من باريس سانجيرمان ويوفينتوس وريال مدريد ومانشستر يونايتد وبرده قعدوه في النادي مخلهوش يمشي .. عايز تفهم دماغ (بوتشتينو)؟ .. حقولك .. ده عامل زي شاب خاطب بنت وشغال شغلانة حلوة أوي وشقته شبه متشطبة بس برده مُصر إنه ميحددش معاد فرح .. ليه يا إبن الحلال؟ .. لما أجيب العربية الأول .. لا لما أشطب الشقة خالص الأول .. لا لما أشطب الشقة وأحوش فلوس تخلينا نعمل شهر عسل في ماليزيا الأول .. هو ده (بوتشتينو) .. هو لحد دلوقتي مش عايز يقتنع إن جه الوقت للفرقة إنها تسحب علي الرابع .. توتنهام مش محتاج حاجة عشان ينافس .. بس اللي محتاجه (بوتشتينو) إنه ياخد Break .. أنا لما بشوفه بحسه رجل إتفشخ في شغله ومحتاج أجازة يطفي دماغه عشان يرجع أحسن من الأول حتي لو ده كان معناه إنه يسيب توتنهام ويريح سنة في البيت.
فيه ناس بتحكم علي المدير الفني بهو خد كام بطولة .. أنا فاهم ده كويس بس في نفس الوقت فيه معيار تاني لازم تحطه في دماغك .. (بوتشتينو) هو اللي بني توتنهام الحديث .. هو (محمد علي باشا الكبير) بتاعهم .. المشكلة إن فيه شخصيات زي (دانييل ليفي Daniel Levy) رئيس النادي راسم نفسه قدام الناس إن أنا بحكمتي ورؤيتي اللي بنيت توتنهام بس ده مش حقيقي .. اللي ربي اللاعيبه الصغيرة وعلمها وحفظ اللاعيبه إزاي تلعب ورسم الخطط وتابع اللاعيبه بتاكل إيه وبتتمرن إزاي هو (بوتشتينو) .. ناس بتقول إن (بيب جوارديولا) خد بطولتين دوري ورا بعض بس (بوتشتينو) بني توتنهام بإيديه .. بني نادي بقي من أكبر وأقوي فرق إنجلترا وأوروبا وفوق ده كله بني أكبر وأنظف استاد في إنجلترا دلوقتي .. (بوتشتينو) ممكن ميكونش كسب بطولات مع توتنهام بس هو اللي بني توتنهام .. وعشان كده أنا مٌقدر جداً إنه تعب ذهنياً أكتر من جسدياً.
يمكن نصيحتي في الأخر لإدارة مانشستر يونايتد سيبوا (سولشاير) يشتغل .. إدوله فرصته يمكن يكون هو الحل لمشاكلكوا كلها .. نصيحتي ل(هاري كاين) خليك مكانك يا إبن الناس يمكن لو جالك Offer من ريال مدريد روح بس جوه إنجلترا مفيش مكان مناسب ليك أكتر من توتنهام .. وتفضل نصيحتي ل(بوتشتينو) خد أجازة .. سيب النادي وطفي دماغك .. صحتك بالدنيا يا ابن الناس.
المصادر:
- مقالة بعنوان Manchester United were once the destination for the world’s elite, but Old Trafford is no longer the theatre of dreams .. نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-7534969/MARTIN-SAMUEL-COLUMN-elite-Old-Trafford-no-longer-Theatre-Dreams.html - مقالة بعنوان Tuesday night’s capitulation does not happen at a healthy club where the manager and his players are one .. نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-7530615/The-time-coming-Mauricio-Pochettino-walk-away-Tottenham.html
