لينك التسجيل الصوتي للمقالة علي ساوند كلاود:
https://on.soundcloud.com/6g7eU
جيل الثمانينات اللي زي حالاتي يفتركوا أوي حالة الهوس اللي جاتلنا لما إتفرجنا علي فيلم Top Gun .. فورمة الساحل بتاعة (توم كروز Tom Cruise) .. النظارات الشمس الRay Pan .. أنا أفتكر إن أنا شخصياً بقي حلم حياتي بعد ما إتفرجت علي الفيلم إن نفسي أبقي طيار مقاتل عشان أعيش نفس الحياة بتاعتهم دي بس يمكن لإني كنت صغير وقتها فأنا وقعت في نفس الغلطة اللي كتير من الشباب الصغير دلوقتي بيقع فيها و هي إنه بيصدق الدعاية اللي بنشوفها في الأفلام الأمريكاني .. بإختصار شديد كل ده وهم .. عشان أنا مبحبش يبقي كلامي عام فخليني أخد قصة Top Gun و أركز عليها أوي في كلامي عشان تشوف بنفسك الفرق الرهيب بين اللي حصل في الحقيقة و بين الشو السيكسي أوي اللي الأمريكان بيعرضهولك في أفلامهم.
مبدأياً فيه شوية حاجات لازم تبدأ تفهمهم و يمكن أهم نقطة إن إذا كان في مصر الطيار المقاتل بيكون تابع لسلاح الجو المصري ففي أميركا عشان عندها أسطول حاملات طائرات فالطيارين المقاتلين مقسومين نصين: نص تبع القوات الجوية و نص تبع القوات البحرية .. الطيارين اللي تبع القوات البحرية هم الطيارين اللي بيشتغلوا علي حاملات الطائرات .. دول طيارين بيبقي ليهم طيارات مختلفة خالص عن الطيارات اللي بتشتغل في القوات الجوية و ليهم تدريب كمان مختلف شوية بحكم إن الطيارين دول بيطلعوا من علي متن حاملة طائرات مش من علي مطار .. ثاني حاجة و هي إن Top Gun أوي زي ما إتقالك في الفيلم هي حاجة شبه فصول التقوية في المدارس أو سنتر الطلبة بتاخد فيه دروس خصوصية بس قيادة القوات البحرية كانت بتسميها اسم غريب شوية اللي هو Strike Fighter Tactics Instructor Program أو SFTI بس فكك من الاسم خلينا هنا نسميه الاسم اللي إحنا متعودين عليه اللي هو Top Gun .. في المقالة دي ححاول أجاوب علي كذا سؤال:
- ليه القوات البحرية الأميريكية عملت مدرسة Top Gun أساساً؟
- إيه كانت مشكلة الطيارين المقاتلين الأمريكان اللي بسببها إتعملت مدرسة Top Gun؟
- إزاي مدرسة Top Gun بدأت تشتغل؟
- هل فكرة Top Gun نجحت و جابت نتيجة؟
خليني أبدأ بالسؤال الأول و هو بالصلاة علي النبي المدرسة دي إتعملت ليه و الحقيقة إن الإجابة بمنتهي البساطة هي بسبب إن الطيارين الأمريكان في حرب فييتنام كانوا فعلياً بيتداس علي وشهم .. الوضع كان كالأتي .. الطيارين الأمريكان اللي بيطيروا بأحدث الطيارات المقاتلة في العالم وقتها كانوا بيقعوا زي الدبان قصاد طيارين فييتناميين بيطيروا بطيارات طلعت علي المعاش في أغلب دول العالم و بيستخدموا تكتيكات حربية من أيام الحرب العالمية الثانية .. ده بالضبط زي ما كده الأهلي يبقي بيلاعب فرقة نبروه في كأس مصر و في ماتش الذهاب الأهلي يشيل 5-0 .. الوضع كان مأساوي لدرجة إن سنة 1968 وقت ما الحرب كانت مولعة قياده القوات البحرية وقفت أي طلعات جوية للطيارين بتوعها فوق فييتنام لحد ما يفهموا هو فيه إيه .. خليني برده أرجع أشبهلك اللي كان بيحصل بماتش الأهلي و نبروه ده .. زي ما الأهلي هو نادي القرن الأفريقي فالطيارين الأمريكان اللي كانوا تبع القوات البحرية اللي زي ما قلتلك شغلهم كله من علي حاملات الطائرات كانوا بيعتبروا نفسهم أحسن طيارين مقاتلين في العالم و الحقيقة إن الأرقام كانت واقفة في صفهم .. فيه حاجة اسمها Kill Ratio أو نسبة القتل و دي بإختصار الفرق بين عدد الطيارات اللي إنت بتوقعها مقارنة بالطيارات بتاعتك اللي بتقع .. في الحرب العالمية الثانية الKill Ratio بتاعة الطيارين الأمريكان كانت 14:1 يعني الطيارين الأمريكان كانوا بيوقعوا 14 طيارة معادية قصاد كل طيارة أميريكية بتقع .. في الحرب الكورية النسبة دي قلت شوية بقت 12:1 بس برده دي تعتبر نسبة محترمة جداً .. في حرب فييتنام النسبة دي إتخسف بيها الأرض بقت 2.5:1. فطبيعي إن الناس تسأل هو فيه إيه؟
مبقاش فيه حد مبيسفش علي الطيارين الأمريكان .. يمكن لو كان وقتها فيه Social Media لكنا شفنا كمية كوميكسات زي هو إيه يا جدعان هو الطيارين الأمريكان نسوا إزاي يوقعوا طيارات ولا إيه .. قيادة القوات البحرية كانت محتاجة تلاقي إجابة قبل ما تلاقي حل .. هم أساساً مكانوش فاهمين هو فيه إيه .. إيه سبب الإنهيار ده و لما إن شاء الله نفهم السبب حيبقي سهل نلاقي حلول .. في يوليو 1968 قائد القوات البحرية الأميريكية وقتها الأدميرال (توماس مورير Thomas Moorer) عين واحد اسمه (فرانك أولت Frank Ault) و ده كان طيار مقاتل عشان يحاول يلاقي إجابة عن السؤال هو إزاي لاعيبه نباروه قدروا إنهم يكسبوا أحسن لاعيبه في أفريقيا؟
هنا إنت مهم تفهم نقطة عن (فرانك أولت) .. ده رجل صريح لدرجة إنه ممكن يخليك تتخانق معاه بسبب صراحته الأوفر .. ده رجل لو إتعزم عند أهل خطيبته و أم خطيبته اللي حتبقي حماته عملت مثلاً مكرونة بشاميل بس مطلعتش حلوة ممكن و هو قاعد يقولها إيه القرف اللي إنتي عاملاه ده .. تخيل إن بني أدم بيحدف طوب من بقه زي ده بقي دوره يدور في كل صغيرة و كبيرة عشان يلاقي إجابة .. الرجل و الفريق بتاعه خدوا القوات البحرية من أولها لأخرها تنفيض .. هو سأل نفسه كذا سؤال .. هل الطيارين الأمريكان بيتحط قدامهم أحسن الطيارات اللي بتساعدهم؟ .. هل بيتحطلهم أحسن صواريخ جو-جو و البرامج اللي بتسهلهم إزاي يستخدموها؟ .. هل أطقم حاملات الطائرات مدربين بشكل كافي إنهم يساعدوا الطيارين ينفذوا شغلهم؟ .. يوم 1 يناير 1969 الرجل قدم التقرير بتاعه و اللي إتعرف باسم تقرير أولت Ault Report و اللي كانت الإجابة عن كل الأسئلة اللي هو سألها لنفسه بإنها لا لا لا لا لا لا من هنا لحد بعد بكره .. التقرير كان مفصل و طويل و إتحط فيه اسامي لواءات بالاسم بإنهم بيعملوا مصايب جوه الجيش .. التقرير حط 242 مصيبة لازم يتعالجوا بمنتهي السرعة و يمكن أهم و أخطر مصيبة هي إن المنهج اللي الطيار بيتعلمه في الكلية غلط و إحنا محتاجين نفرمط دماغ الطيارين بتوعنا و بسرعة.
ده حيوديني للسؤال اللي وراه .. هي كانت إيه مشكلة الطيارين الأمريكان؟ .. في الحرب الكورية فيه حد في القوات البحرية هبد الهبدة التمام بإن أكبر تهديد بيواجه الأسطول الأميريكي هو إن السوفييت يبعتوا قاذفة بتشيل قنبلة نووية عشان ترميها فوق الأسطول الأميريكي و هو في البحر .. قاذفة دي عبارة عن طيارة كبيرة شوية شايلة قنبلة نووية بترميها فوق هدف ما .. في رأي (زين الهابدين ابن حموده) اللي هبد الهبدة دي فالحل الوحيد عشان الطيارين الأمريكان يواجههوا الخطر ده هو إنهم ينسوا خالص مباديء الDogfighting أو الإشتباكات الجوية بين الطيارات المقاتلة زي اللي كنت مثلاً بتشوفها في فيلم Dunkirk و يركزوا أوي علي إزاي يحولوا الطيارات المقاتلة بتاعتهم لطيارات إعتراضية أو Interceptors بحيث إن الطيارات الأمريكاني يبقي عليها صواريخ جو-جو بعيدة المدي تقدر إنها توقع القاذفات السوفيتية دي من مسافات بعيدة تنين من قبل ما حتي عين الطيار السوفيتي تشوف الطيار الأمريكاني أو زي ما بتتسمي Beyond Visual Range أو BVR .. دي كانت الهبدة .. فيه System كامل إتحط عشان الهبدة دي.
القوات البحرية طلبت طيارة مخصوص عشان تنفع تبقي طيارة إعتراضية أو Interceptor و كانت الطيارة دي هي Phantom F-4II من تصنيع شركة ماكدونيل McDonnell ..دي طيارة إتحطلها صواريخ جو-جو مخصوص هي Sidwinder و Sparrow .. سنة 1960 لما الSystem ده بدأ يخش الخدمة الأمريكان بدأوا يقولوا إن خلاص يا جدعان عصر Dogfighting إنتهي و جه عصر التكنولوجيا و هي دي كانت المشكلة .. الطيارة Phantom F-4II كانت معقدة زيادة عن اللزوم .. دي نقطة .. النقطة الثانية هي إن بالصلاة علي النبي مش كل دول العالم عندها قاذفات و مش كلها عندها قنبلة نووية .. فإنت حطيت System كامل علي أساس إنك حتدخل حرب ضد حد معين .. طب إفرض دخلت حرب مع حد تاني.
أنظمه الرادار لوحدها بتاعة الطيارات دي كانت معقدة لدرجة إن الطيار لوحده مبقاش ينفع يشتغل عليها و بقي يركب معاه واحد وراه اسمه ضابط رادار الإعتراض أو Radar Intercept Officer أو RIO بحيث إن الطيار يركز بس علي إزاي يطير بالطيارة .. دي كانت مشكلة .. المشكلة الثانية إن اللي صمم الPhantom F-4II كان حاطط في إعتباره إن الطيارة دي حتوقع قاذفات روسية ماشيه علي مهلها من مسافات أبعد من مدي رؤية الطيارين الروس .. عشان كده هو حط زراير التحكم كلها تحت مستوي رؤية الطيار الأمريكاني .. يعني عشان أنا كطيار أمريكاني أضرب صاروخ بقيت مضطر أبص لتحت عشان أشوف الزراير و اللوح اللي علي التابلوه .. طبعاً الطيارين الأمريكان لما لقوا نفسهم في مواجهات جوية ضد طيارين فيتناميين بيطيروا بطيارات سريعة زحليقة زي MiG-17 و MiG-21 مبقاش عارف يبص لقدام عشان يعرف هي الطيارات المعادية دي فين ولا يبص لتحت عشان يشوف حيوقعها إزاي .. حط كل ده جنب بعضه و حتبدأ تفهم ليه الKill Ratio للطيارين الأمريكان في حرب فيتنام بقت 2.5:1.
التقرير بتاع (فرانك أولت) حط كذا خطوة عشان القوات البحرية يبدأ يتصلح حالها و كانت أهم خطوة إنهم لازم يعملوا مدرسة عشان تعلم الطيارين الأمريكان فن الDogfighting اللي محدش علمه ليهم في الكلية بسبب التوجه الجديد اللي كان ماشي في الجيش و هو هبداية الInterceptor دي .. الفكرة إن كان فيه لواءات كتير في الجيش إشتغلوا كتير أوي علي مشروع الInterceptor و كانوا مستعدين يعملوا أي حاجة عشان (فرانك أولت) يفشل أو علي الأقل محدش يقدمله أي مساعدة .. تقدر تقول إن (فرانك أولت) كان ماشي لوحده ضد مؤسسة كاملة و فعلاً بعد مناهدة كتير إتوافق علي إنشاء المدرسة دي بس عشان يصعبوا الدنيا عليه قالوله إحنا معندناش مكان فاضي إلا قاعدة جوية قديمة اسمها ميرامار في جنوب كاليفورنيا تقدر تشتغل منها اللي هي حاجة زي ما تديله مطار قديم في أسوان و تقوله روح يا حبيبي عك براحتك هناك.
(فرانك أولت) إختار طيار مقاتل اسمه (دانييل بيديرسون Daniel Pederson) عشان يبقي أول مدير لمدرسة Top Gun .. في الأول خالص (دانييل بيديرسون) مكنش عايز الشغلانة .. معلش إيه اللي يوديني أخر الدنيا عشان أمسك مدرسة محدش في الجيش عايزها تتعمل و معييش أي طقم مدرسين ولا مساعدين و الميزانية المحطوطة ليا يدوبك تكفي مرتبات الناس و حتي محدش فكر يديني طيارات عشان أدرب الطيارين بتوعي عليها .. بعد قعدة طويلة مع (فرانك أولت) غير رأيه .. كان قدامه شهرين بس عشان يأسس المدرسة و يا عيني الرجل إتفحت شغل .. بقي بيلف علي زمايله يستلف منهم أي حاجة هو محتاجها من كراسي لأقلام لكراسات لمراجع و حتي طيارات .. بس يمكن اللي خلاه متحمس أوي للمشروع إن محدش كان بيتدخل في شغله .. لواءات الجيش اللي كانوا ضد الفكرة إفتكروا إنهم لما رموه أخر الدنيا في ميارامار إنهم كده خلاص خلصوا من صداع (فرانك أولت) بس مكانوش متخيلين إن فيه خازوق جايلهم في السكة .. (دانييل بيديرسون) مكنش تحت إيده إلا كرافان سارقها من موقع إنشاء جنب القاعدة اللي هو فيها و تحت إيده 8 مساعدين: 4 طيارين و 4 مساعدين طيارين اللي هم RIO.
(دانييل بيديرسون) خد التقرير بتاع (فرانك أولت) و بدأ يطلع منه منهج و إشتغل علي نقطتين: أول نقطة إنه يجيب أخر Phantom F-4II بإنه بقي بيخليها تنفذ مناورات الشركة اللي صممتها قالت إنها مش حتستحملها .. النقطة الثانية إنه طلب تقارير المخابرات الأمريكية عن قدرات الطيارات السوفيتية MiG-17 و MiG-21 .. بإختصار شديد (دانييل بيديرسون) خد الطيارة Phantom F-4II و خلاها بدل ما هي Interceptor بقت طيارة تنفع تخش بيها Dogfighting و توقع طيارات .. في مارس 1969 كانت أول دفعة طيارين بتاخد كورس مدته شهر في المدرسة.
السؤال اللي كان بياكل رأس (دانييل بيديرسون) هو هل اللي إتعمل ده صح و حيجيب نتيجة؟ .. الرجل فضل صابر سنة كاملة لحد ما شاف بعنيه الإجابة .. يوم 28 مارس 1970 كانت فيه طيارتين Phantom F-4II بيحموا حاملة طائرات اسمها USS Constellation لما فجأة هجم عليها طيارتين MiG-21 .. الطيارتين الفانتوم واحدة منهم كان ببيطير بيها ملازم طيار (جيري بيولير Jerry Beaulier) و المساعد بتاعه (ستيف باركلي Steve Barkley) و الإتنين من خريجي مدرسة Top Gun بس الطيارة التانية لا .. المهم .. في مدرسة Top Gun بيتعلموا إن الطيار الأول اللي يشوف العدو يروح يجري وراه بغض النظر عن الرتبة عكس اللي بيتعلمه أي طيار في الجيش إن لو أنا طيار رتبتي ملازم أول و معايا طيار تاني رتبته نقيب و أنا اللي شفت العدو الأول فأنا لازم أبلغه و هو بحكم رتبته اللي يهاجم الأول و أنا وراه .. طبعاً أول ما (جيري بيولير) شاف الطيارتين الMiG-21 جري وراهم من غير ما حتي يستني الطيارة التانية اللي كان بيطير بيها طيار رتبته أعلي .. طبعاً الطيار التاني عمال يقوله يا حبيبي استني هو إنت مش شايف الدبورتين الزيادة اللي علي كتفي .. بس (جيري بيولير) ولا إهتم .. إشتباك جوي خرافي بين ال3 طيارات لحد ما (جيري بيولير) استغل غلطة عملها واحد من الإتنين طيارين الفيتناميين و ضربوا بصاروخين Sidewinder وقعه و الطيارة الثانية هربت .. لما (جيري بيولير) و (ستيف باركلي) هبطوا علي حاملة الطائرات بتاعتهم زمايلهم استقبلوهم استقبال الأبطال بس الأهم إن مدرسة Top Gun في ميارامار لما جالها الخبر كانت بترقص من الفرحة.
المصدر:
مقالة بعنوان Top Gun-Nine Things Hollywood Got Wrong About the U.S. Navy’s Fighter Weapons School نشرت في مجلة Military History Now و ده لينك المقالة الأصلية:
https://militaryhistorynow.com/2019/04/22/top-gun-nine-things-hollywood-never-told-you-about-the-u-s-navys-fighter-weapons-school/
