موضوعنا النهاردة عبارة عن سؤال إتسأل علي Website إسمه Quora وده موقع حضرتك بتخش تكتب أي سؤال إنت عايز تعرف إجابته وفيه ناس متخصصة في الموضوع هي اللي بتتولي إنها تجاوب علي سؤالك .. السؤال اللي حنتكلم عنه النهاردة كان إيه هي أسوأ هزيمة عسكرية في تاريخ البشر؟ .. الإجابة كانت اللي حصل للقوات البريطانية في معركة سوم The Battle of Somme واللي كانت معركة ضمن معارك كتير حصلت في الحرب العالمية الأولي والمعركة دي حصلت سنة 1916 .. البريطانيين نفسهم شايفين إن المعركة دي هي أسوأ هزيمة إتعرضولها في تاريخ بريطانيا العسكري كله .. وعلي فكرة اللي مصعب أوي الموضوع إن لحد دلوقتي فيه خناقة كبيرة بين المؤرخين العسكريين علي هل فعلاً معركة سوم كانت هزيمة ولا نصر للبريطانيين .. أو خلينا نقول إن فيه خناقة بين المؤرخين علي هل معركة سوم كانت هزيمة ولا نصر بس بخسائر فادحة؟
إنت بس محتاج نصنفرلك ذاكرتك ونشرحلك بسرعة كده هي الحرب العالمية الأولي دي كانت إيه؟ وبين مين؟ ومعركة سوم دي كانت إمتي؟ وفين من المعجنة اللي كانت بتحصل؟
الحرب العالمية الأولي كانت بين حاجتين: الحاجة الأولي هي الحلفاء ودول كانوا بريطانيا وفرنسا وروسيا وإيطاليا ضد الحاجة الثانية اللي هي القوي المركزية ودول كانوا ألمانيا والإمبراطورية النمساوية المجرية والإمبراطورية العثمانية .. المهم إن في يوليو 1916 كان الحلفاء خصوصاً بريطانيا وفرنسا شايفين إن جه الوقت إنهم يعملوا هجوم مشترك علي ألمانيا بحيث يعبروا نهر سوم وبكده تقدر تقول علي ألمانيا يا رحمن يا رحيم .. الألمان لإنهم زي ما يكونوا توقعوا إن ده حيحصل فهم قرروا يضربوا هم الأول .. الألمان شنوا هجوم واسع علي الفرنسيين في معركة مشهورة أوي اسمها معركة فردان Battle of Verdun اللي علي فكرة أحداثها حصلت يدوبك علي بعد 230 كيلومتر بس من معركة سوم .. الهجوم الألماني كان قوي جداً لدرجة إن الخسائر اللي كان بيتعرضلها الفرنسيين عدت كل توقعات المنطق وكان الوضع هو إن يا إما بريطانيا تتدخل بإنها تهاجم ألمانيا من سوم أو إن فرنسا حتقرر إنها تسلم وتطلع بره الحرب دي كلها.
البريطانيين عينوا واحد اسمه (دوجلاس هايج Douglas Haig) عشان يقود الهجوم علي الدفاعات الألمانية علي نهر سوم بحيث إنه يُجبر الألمان ينسحبوا من فردان ويخفف الضغط شوية علي الفرنسيين .. خطة الأخ (دوجلاس هايج) كانت سهلة ومنطقية خالص وكانت زي ما حقولك كده:
- أول خطوة إن لمدة أسبوع كامل المدفعية البريطانية تفضل تقصف الدفاعات الألمانية لحد ما القصف ده يدمر النقاط الحصينة كلها ويخفف شوية من التحصينات الدفاعية الألمانية.
- ثاني خطوة إن المشاة يبدأوا يهجموا علي شكل موجات وطبعاً ده بعد ما القصف المدفعي يقف خالص.
- أول ما الدفاعات الألمانية تبدأ تنهار يخش سلاح الخيالة عشان يُجبر الألمان علي الإنسحاب.
الخطة كانت من وجهة نظر (دوجلاس هايج) متخرش الميه وكان شايف إن جنوده حينفذوها بحذافيرها وإن الدفاعات الألمانية مش حتاخد في إيده أسبوع عشان تنهار .. المشكلة إن البريطانيين مكانوش عندهم فكرة واضحة أوي الدفاعات الألمانية معمولة إزاي وبالتالي مكانوش عارفين إن النقاط الحصينة الألمانية كانت عميقة شوية تحت الأرض وتقدر تستحمل أي نوع من القصف المدفعي .. لمدة أسبوع كامل البريطانيين أطلقوا علي الألمان 1.6 مليون دانة مدفع مكنش ليهم أي تلاتين لازمة ولا أثروا في حاجة .. أسبوع كامل الألمان مأنتخين تحت الأرض مستنيين القصف يخلص لإنهم كانوا متؤكدين إن بمجرد ما القصف يقف الهجوم البري حيحصل.
أول يوم للهجوم البري البريطاني كان كارثة بكل المقاييس .. البريطانيين مات ليهم 20,000 جندي وأُصيب 40,000 وبفكرك إن ده في أول يوم بس .. تفتكر (دوجلاس هايج) يقتنع إن خطته باظت وإن كده كفاية وإن مفيش أي داعي إنه يضحي بأرواح إضافية من جنوده؟ تبقي غلطان .. الرجل كان شايف إن خطته صح أوي بس محتاجه شوية وقت .. من 1 يوليو لحد 18 نوفمبر .. يعني الرجل عشان يقتنع إن خطته في إنه يخترق الدفاعات الألمانية اللي كانت مكملة لمسافة 35 كيلومتر غلط إحتاج 5 شهور كاملة.
لمدة 141 يوم و(دوجلاس هايج) مش شايف إن مفيش أي داعي إنه يوقف هجومه .. قوات من بريطانيا وكندا وأستراليا ونيوزيلاندا وفرنسا رمت نفسها علي الدفاعات الألمانية من غير أي تأثير .. كان مطلوب من القوات دي إنها تُجبر الألمان علي الإنسحاب مسافة 38.5 كيلومتر في حين إن الألمان منسحبوش غير لمسافة 10.5 كيلومتر بس .. خسائر الحلفاء مع نهاية المعركة كانت وصلت 140,000 قتيل و 650,000 جريح .. يعني (دوجلاس هايج) أشرف بنفسه علي موت 89,000 جندي من رجالته علي كل كيلو ونص متر يكسبه .. في حين إن الألمان خسائرهم كانت 160,000 قتيل و 305,000 جريح لكل كيلو ونص متر خسروه.
بعد كل ده تلاقي إن (دوجلاس هايج) كان بيعتبر نفسه طلع كسبان من المعركة دي .. المشكلة إن الرجل ده كان من أنصار فكر حروب الإستنزاف بس ده مش إستنزاف ده إستهبال .. مفيش أي نصر في الدنيا يبرر الخسائر دي كلها في الأرواح .. الحكومة في بريطانيا نفسها مقدرتش تعتبر نتائج معركة سوم إنها نصر ليها .. إزاي تبرر إن 420,000 شاب زي الورد يروحوا كده عشان خاطر 10.5 كيلومتر؟ البريطانيين نفسهم بقوا بيسموا الشباب اللي مات في الحرب دي علي إنه الجيل اللي ضاع Lost Generation .. جيل كامل من شباب في عمر 18 ل 22 سنة مات هدر وعشان إيه؟ 10.5 كيلومتر؟
رأيي الشخصي حول هل معركة سوم كانت فعلاً نصر ولا هزيمة للبريطانيين هو إن المعركة دي مينفعش تعتبرها غير هزيمة قاسية جداً لإن البريطانيين والحلفاء عموماً قبل ما يدخلوا المعركة دي كانوا حاطين لنفسهم هدف والهدف ده هم محققهوش وياريت الفشل في تحقيق الهدف ده مكنش معاه خسائر كبيرة لإن اللي الخسائر اللي تعرضت ليها القوات البريطانية في المعركة دي محصلتش قبل كده في التاريخ ومعتقدش إنها حتحصل تاني .
المصدر:
- مقالة بعنوان Quora Questions: The Worst Defeat in Military History نشرت في مجلة Newsweek الأميريكية وده لينك المقالة الأصلية:
http://www.newsweek.com/quora-question-worst-defeat-military-history-535027
