لينك التسجيل الصوتي علي ساوند كلاود:
https://on.soundcloud.com/yaVSe
العدوان الثلاثي علي مصر من الأحداث اللي حصلت في تاريخنا وإحنا شخصياً مش عارفين حصلت ليه؟ وخلصت إزاي؟ ولا مين كسب ولا مين خسر؟ .. اللي إتعلمناه في كتب التاريخ إن سنة 1956 بريطانيا وفرنسا وإسرائيل إتفقوا علينا وضربونا عشان كانوا منفسنيين من (جمال عبدالناصر) الله يرحمه .. الحقيقة إن العدوان الثلاثي علي مصر حاجة كبيرة أوي وليها نتايج سمّعت معانا لحد دلوقتي بس إحنا مش عارفين نتكلم عنه إزاي والنهاردة ححاول إني أغير ده عشان تستوعب قد إيه سنة 1956 كانت سنة مهمة أوي في تاريخنا كمصريين .. مهم أوي تكون فاهم حاجتين بخصوص العدوان الثلاثي:
- الحاجه الأولانية هي إنه حصل بعد ما الحرب العالمية الثانية خلصت .. طب إيه العلاقة؟ .. قبل سنة 1939 اللي هي السنة اللي بدأت فيها الحرب العالمية الثانية كان اللي بيحكم العالم هي قوي إستعمارية زي فرنسا وبريطانيا واليابان ودي دول كبيرة ليها مستعمرات حول العالم والحرب العالمية إتحاربت في المستعمرات دي .. لما الحرب خلصت العالم صحي الصبح علي إن القوي الإستعمارية القديمة معدش ليها وجود وحل محلها قوتين عظمتين جداد اللي هم أميركا والإتحاد السوفيتي .. لما العدوان الثلاثي حصل العالم شافه علي إنها صرخة نملة زي ما بنقول .. محاولة أخيرة للقوي الإستعمارية القديمة (اللي هي فرنسا وإنجلترا) إنها تقول للعالم فوقوا إحنا لسه موجودين ويتعملنا ألف حساب.
- الحاجه الثانية إن لحد العدوان الثلاثي ما حصل محدش كان واخد إسرائيل جد .. جيش الدفاع الإسرائيلي اللي معروف في العالم بإسم IDF ودي إختصار Israeli Defense Force بس جوه إسرائيل بيتسمي زحال Zahal كانت سمعته إنه جيش كسب حرب 1948 بالصدفة وبسبب سوء تنسيق وتدريب وتسليح الجيوش العربية بس لما العدوان الثلاثي خلص بدأت السمعة دي تتغير .. الأهم من كده إن العملية العسكرية اللي عملتها إسرائيل في شبه جزيرة سيناء هي هي بالكربون العملية اللي عملوها في نكسة يونيو 1967 بس نقول إيه كان ماسك المؤسسة العسكرية عندنا ناس مش بتتعلم من اللي حصل قبل كده.
إنجلترا وفرنسا وإسرائيل .. إيه اللي لم الشامي علي المغربي؟
صحيح العدوان الثلاثي حصل سنة 1956 بس بدايته كانت قبلها ب4 سنين لما يوم 23 يوليو 1952 حصل الإنقلاب العسكري اللي قام به شوية ضباط في القوات المسلحة المصرية إتعرفوا بإسم الضباط الأحرار للإطاحة بالملك (فاروق) الله يرحمه وبعد كده الإنقلاب قلب علي ثورة وبقت دي هي ثورة يوليو اللي صادف إنها يوم عيد ميلادي بالمناسبة .. سرقوا مصر يوم عيد ميلادي .. (عبدالناصر) بصفته رئيس مجلس قيادة الثورة ورئيس مصر وحاجات كتير كده كان حلم حياته إنه يبقي هو الرجل اللي وحد الدول العربية كلها مع بعضها بس هو كان عنده مشكلة الحقيقة .. عشان توحد ناس أساساً مش طايقين بعض وبينهم إختلافات صحيح مش دينية بس إنما كمان بينهم إختلافات ثقافية بعدد شعر راسك فإنت محتاج تشاورلهم علي حد تقولهم شايفين اللي هناك ده؟ أهو هو ده السبب في كل المشاكل والمصايب والالام اللي أنتو فيها .. الحد ده كان الإستعمار عموماً وإسرائيل خصوصاً.
يمكن (عبدالناصر) كان كذاب ويمكن كان صادق ويمكن كان فعلاً عايز يدمر إسرائيل أو فعلاً كان كل اللي بيفكر فيه هو السلطة وبس .. الله أعلم وهو الله يرحمه عند ربنا دلوقتي بس اللي أنا أقدر أقوله ليك إن من سنة 1952 لحد سنة 1955 ورأي الإسرائيليين في (عبدالناصر) إنه رجل فنجري بق بس الرأي ده إتغير لما مصر وقعت مع تشيكوسلوفاكيا صفقة الأسلحة التشيكية .. زمان دولة التشيك ودولة سلوفاكيا كانوا دولة واحدة وكانوا الإتنين تحت الإحتلال السوفيتي .. بص هي قصة طويلة بس مش وقتها دلوقتي .. المهم إن الإسرائيليين بقوا بيقولوا لنفسهم إذا كان زمان (عبدالناصر) كان بيزعق وخلاص فدلوقتي هو لسه بيزعق برده بس معاه سلاح فلازم ناخده جد.
اللي كان (عبدالناصر) بيفكر فيه هو إنه يعزل إسرائيل تجارياً عن العالم وبالتالي مع الوقت إسرائيل حتلاقي نفسها تحت ضغط إقتصادي ممكن يوصلها لمرحلة الإفلاس خصوصاً إن وقتها هي كانت دولة إمكانياتها محدودة .. الحقيقة معرفش هو كان قاصد فعلاً يعمل كده ولا جت معاه صدفه بس المهم إنه بدأ بإنه منع مرور السفن الإسرائيلية من مضيق تيران .. ده معناه إن ميناء إيلات الإسرائيلي علي خليج العقبة بقي فعلياً ملوش لازمة وميناء مهم زي ده لما يتقفل فكل يوم بيعدي بفلوس بتترمي علي الأرض .. كمان قفل المجال الجوي فوق مضيق تيران قصاد أي طيارة رايحه إسرائيل .. كده إسرائيل فعلياً مبقتش عارفه تطلع لا لأسيا ولا لأفريقيا .. كرد علي اللي بيعمله (عبدالناصر) قررت أميركا إنها توقف تمويل مشروع بناء السد العالي بس (عبدالناصر) رد علي الأمريكان بإنه أعلن تأميم قناة السويس يوم 27 يوليو 1956 وهنا اللي قالته بريطانيا وفرنسا مع بعض بصوت واحد هو الله وأنا مالي يا (لمبي).
الهسهس اللي بقي في دماغ بريطانيا وفرنسا إن (عبدالناصر) ده رجل مجنون وممكن لما تقفش معاه يمنع مرور السفن اللي شايله أعلام بريطانيا وفرنسا إنها تعدي من قناة السويس .. علي فكرة علاقة الإنجليز ب(عبدالناصر) كانت شبه دور البرد لما بيجيلك .. في الأول بتعطسلك شوية فبتقول عادي حاجة بسيطة مش مستاهله بس تجاهلك ليه بيخلي المشكلة تكبر لحد ما بتصحي الصبح تلاقي عندك إلتهاب رئوي .. سنة 1954 لما (عبدالناصر) إتفاوض مع الإنجليز علي إتفاقية الجلاء واللي بناء عليها خلال 20 شهر بس حيكون أخر عسكري بريطاني مشي من مصر .. الإنجليز وقتها شافوا الموضوع عادي يعني أصل معلش كان فيه مصايب تانية أهم من كده بكتير .. الحرب الباردة كانت مولعة .. الإتحاد السوفيتي عايز يسيطر علي أوروبا كلها .. الفرنسيين طالع عنيهم في فيتنام والفلبين ومفشوخين في الجزائر .. فوق ده كله الصداع النصفي اللي إسمه إسرائيل .. زود علي كده إن الإنجليز كانوا بيحاولوا يحموا وجودهم في اللي فاضل من مستعمراتهم في قبرص وكينيا وماليزيا .. إنجلترا نفسها كانت بتعدي في فترة صعبة أوي في تاريخها .. (وينستون تشرشل Winston Churchill) الرجل اللي كان ماسك البلد وقت الحرب العالمية الثانية طلع معاش سنة 1955 بعد ما بقي عنده 80 سنة وجه الوقت إنه يستريح واللي مسك وراه كان وزيرخارجيته (أنتوني إيدن Anthony Eden) .. ده بالضبط عامل زي لما (حسني مبارك) الله يرحمه تنحي وجابوا مكانه (عمر سليمان) الله يرحمه برده .. إنت محتاج حد من الحرس القديم يكون فاهم البكابورت فيه إيه عشان يكمل ورا الزعيم اللي مشي.
مشكلة (إيدن) إنه كان بني أدم فاكر نفسه حاجة وهو ولا حاجة .. المواجهة بينه وبين (عبدالناصر) كانت فعلاً لقاء السحاب .. هو كان أمور فكان شايف نفسه حبتين .. انك تشوف نفسك ده بيخلق جواك خُلق ضيق وعصبية علي الفاضي .. الغريب إنه صحيح كان وزير خارجية بريطانيا لأغلب فترات الحرب العالمية الثانية إلا إنك تحس إنه متعلمش أي حاجة .. الرجل مشافش العالم وهو بيتغير حوله .. مقدرش يستوعب إن خلاص مجد الإمبراطورية البريطانية إنتهي .. ده رجل لما (عبدالناصر) أعلن تأميم القناة كل اللي فكر فيه هو غزو عسكري لمصر .. هو تخيل إن لمجرد إن الصدفة يعني أخر عسكري بريطاني إنسحب من مصر في يوليو 1956 وشوف يا أخي تدابير ربنا ده يمشي مع قرار (عبدالناصر) تأميم القناة في نفس الشهر اللي هو يوليو 1956 برده فهو تخيل إن لا بقي ده (عبدالناصر) قاصدها وإنه كان عايز من أول ما تفاوض معانا عشان ننسحب من مصر إنه ياخد مننا قناة السويس .. حيث كده بقي يبقي مفيش غير حل واحد .. نغزو مصر.
(إيدن) كانت عاجباه دماغه لدرجة إنه مقدرش يشوف إحتمال تاني للأحداث .. إنت كنت عارف إن (عبدالناصر) عايز يبني السد العالي وكنت عارف إنك إنت وأميركا قدمتوله عرض مشترك ب70 مليون دولار وكنت برده عارف إن السوفييت هم كمان مقدمينله عرض وكنت عارف إنه محتاج فلوس ولما أمم القناة كل اللي إنت فكرت فيه إن اه يبقي أكيد قاصد وإن بقاله سنتين بيخطط إزاي ياخد مننا القناة .. المصيبة إن الإنجليز سحبوا العرض بتاعهم ووراهم الأمريكان يوم 19 يوليو 1956 .. يعني (عبدالناصر) أمم القناة بعدها بكام يوم .. كل ده مكنش كافي إنه يقنع الإنجليز إن (عبدالناصر) أمم القناة لمجرد إنه كان محتاج فلوسها.
الحل من وجهة نظر (إيدن) هو عملية عسكرية مشتركة هدفها إن ترجع تاني قناة السويس تحت سيطرة الإنجليز .. في نفس ذات الوقت بسبب إن الإسرائيليين بقوا بينزفوا فلوس وشايفين إن (عبدالناصر) عمال يشتري في سلاح فهو أكيد بيستعد إنه يعلن الحرب عليهم فكانوا هم كمان شغالين علي إزاي ينفذوا عملية عسكرية ضد مصر اللي هو الإسرائيليين كانوا بيفكروا يضربونا زي ما ضربونا في النكسة يوم 5 يونيو 1967 بس قبل ما ده يحصل ب11 سنة .. بالصدفة البحتة يوم 1 سبتمبر 1956 الملحق العسكري الإسرائيلي في باريس سمع خبر إن بريطانيا وفرنسا بيستعدوا إنهم يضربوا مصر فالحكومات الثلاثة بدأوا يتكلموا علي إن هو يجري حاجة لو الثلاثة إتفقوا علي (عبدالناصر) خصوصاً إن الثلاثة مصلحتهم واحدة .. فعلاً يوم 21 أكتوبر 1956 الإتفاق إتمضي بين الدول الثلاثة.
مبدأياً كده بسم الله الرحمن الرحيم إسرائيل هي اللي حتبدأ هجومها علي مصر يوم 29 أكتوبر .. بعدها بيوم القصف الجوي الإنجليزي-الفرنساوي حيبدأ بحيث الإتفاق إن لما يوم 3 نوفمبر يجي تكون القوات البريطانية والفرنسية سيطرت علي القناة بحجة إنهم عايزين يحموا القناة وإنهم يفصلوا الإشتباك بين مصر وإسرائيل بحيث تكون القوات الإسرائيلية وصلت علي بعد 15 كيلومتر من القناة .. صحيح ده معناه إن قدام الناس حيبان إن إسرائيل هي اللي وحشة وهي اللي بدأت بالضرب بس في نفس الوقت الحكومتين الفرنسية والإنجليزية كانوا عارفين إن الشارع في البلدين حيبقي ضد الحرب فلازم عشان الضغط السياسي الداخلي يخف شوية علي الحكومتين إن إسرائيل هي اللي تبدأ الضرب الأول .. عشان نية إسرائيل إنها تبدأ الضرب الأول متتعرفش فهم أجلوا قرار التعبئة العامة للإحتياط لحد يوم 26 أكتوبر والقرار لما طلع كان لفيلقين مشاة ميكانيكي بس ومطلعش في الإذاعة إنما القرار إتبعت في رسايل سرية بتتسلم بالإيد لقادة الفيلقين .. بعدها بيوم اللي هو يوم 27 أكتوبر وقبل 48 ساعة من بدأ ضرب النار راديو إسرائيل أعلن التعبئة العامة لقوات الإحتياط.
اللي حط خطة العمليات كان رئيس هيئة الأركان المشتركة (موشيه دايان Moshe Dayan) بحيث إنه كان عارف إن قدامه وقت قليل عشان يبدأ يتحرك بقواته من جوه إسرائيل ويدخل قطاع غزة ويجري جوه سيناء لحد ما يوصل لشرم الشيخ عشان يدوبك بعد ما ضرب النار يبدأ بكام يوم أميركا والإتحاد السوفيتي حيخلوا الأمم المتحدة تطلع قرار بوقف إطلاق النار .. ده معناه إن قبل ما قرار وقف إطلاق النار يطلع لازم تكون القوات الإسرائيلية وصلت لحد تيران وإستولت علي شرم الشيخ ووصلت لحد 15 كيلومتر من قناة السويس .. ده بالضبط إنك لما تكون عندك إمتحان بعد بكره وإنت مش مذاكر حاجة في المنهج وتقول لنفسك أنا حجري بسرعة ومش حنام عشان ألحق أخلص والتارجت بتاعي مش إني أجيب مقبول إنما أنا عايز أجيب إمتياز .. اللي هو يا إنت أهبل وعايش في اللالاند أو إن إنت حظك حيبقي نار والدكتور بتاع المادة يجيب إمتحان تافه .. الحقيقة إن الإحتمال الثاني هو اللي حصل.
إزاي الإسرائيليين في أسبوع كانوا وصلوا لحد قناة السويس؟
بعد الظهر يوم 29 أكتوبر فيه 4 قاذفات إسرائيلية P-51 Mustang ودي طيارات كانت بتخدم في القوات الجوية الأميريكية وقت الحرب العالمية الثانية طارت علي إرتفاع منخفض أوي عشان بالمراوح الأمامية بتاعتها تقطع كابلات التليفونات اللي كانت متركبه في سيناء .. شفت الحرب الأليكترونية علي قديمه كانت عامله إزاي؟ .. المهم إن لما ده حصل فبكده إنت بقي عندك 300,000 عسكري اللي هم الفرقة الثالثة مشاة من القوات المصرية والفرقة الثامنة مشاة من القوات الفلسطينية اللي المفروض إن مهتمتهم حماية سيناء بقوا مش فاهمين هو إيه اللي بيحصل؟ ولا عارفين إن الحرب قامت ولا بتوصلهم أي معلومات أو أوامر من القيادة المصرية .. هنا إنت مهم تفهم هي إيه كانت خطة (موشيه دايان) بالضبط؟ وكل شوية عينك تبقي علي الخريطة لإن الكلام مرتبط بيها:
- أول مرحلة في العمليات البرية إن مع غروب شمس يوم 29 أكتوبر الإسرائيليين حيرموا كتيبة المظلات الأولي التابعة للفيلق رقم 202 بطيارات C-47 Dakota خلف الخطوط المصرية عشان يسيطروا علي مضيق متلا وده واحد من 3 ممرات طبيعية وسط جبال سيناء لازم تعدي منها عشان توصل من قناة السويس لحد جوه سيناء .. سبب إن الإسرائيليين بعتوا كتيبة واحدة بس يعني بتتكلم عن 395 مقاتل هو إن وقتها مكنش عندهم طيارات C-47 Dakota تكفي إنه يرموا أكتر من كده .. ولإن طبعاً كتيبة واحدة مش كفاية فالخطة إن باقي الفيلق رقم 202 مظلات حيجري لحد مضيق متلا من منطقة الكونتيلا (اللي هي جنب مدينة القصيمة Kusseima عندك في الخريطة) بإستخدام طريق إسمه النخله بحيث إن الكتيبة الأولي مع باقي الفيلق 202 يقدروا يصدوا أي هجوم مضاد تقوم به القوات المصرية وكمان يقطعوا خطوط الإمداد اللي رايحه للقوات المصرية في سيناء.
- ثاني مرحلة من العمليات ودي بتحصل ليلة 29 أكتوبر لحد فجر يوم 30 أكتوبر إن فيلق مشاة من قوات الإحتياط حيتقدم من بلدة نيتزانيا الإسرائيلية لحد جوه سيناء ويقفوا عند مدينة القصيمة .. ورا الفيلق ده حتمشي فرقتين قوات خاصة بقيادة الكولونيل أول ودي رتبة بتعادل عميد إسمه (إفرام أدان Avraham Adan) ولما يوصلوا للقصيمة حيستنوا التعليمات اللي حتجيلهم يا إما يتقدموا لحد قناة السويس عن طريق إنهم يمشوا من وسط سيناء أو يمشوا بمحاذاة ساحل خليج العقبة وده اللي حيحدده هو إيه اللي وصلتله القوات الفرنسية والإنجليزية المشتركة.
بعد ظهر يوم 30 أكتوبر قائد القيادة العسكرية الجنوبية الإسرائيلية واللي المفروض إنه هو اللي ماسك العمليات علي الأرض الجنرال (عساف سيمخوني Assaf Simchoni) جاتله معلومة إن وحدة إستطلاع إسرائيلية من الفيلق 202 اللي بفكرك إنه قاعد في مضيق متلا لقت نفسها وصلت لمعبر جبلي صغير إسمه الضيقة من غير ما تواجه أي مقاومة مصرية .. ده معناه إن فيه قوات إسرائيلية عرفت توصل من القصيمة لحد ورا منطقة أبوعجيله اللي هي المنطقة اللي فيها أقوي دفاعات القوات المصرية .. يعني بتتكلم إن الأخ (عساف سيمخوني) إكتشف ثغرة تخليه يوصل من جوه سيناء لحد الإسماعيلية مستريح .. إن القيادة المصرية تسيب معبر الضيقة من غير حماية كانت غلطة لا تغتفر فمنطق (عساف سيمخوني) إن لو قواته عرفت تعدي من المعبر ده بحيث ينطوا من ورا الدفاعات المصرية في أبوعجيلة فهو يقدر يوصل للقناة في نص الوقت وبنص التكاليف اللي الخطة بتاعة (موشيه دايان) توقعتها.
بس (عساف سيمخوني) لقي إن عنده مشكلة كبيرة .. اللي إكتشف الغلطة دي وحدة إستطلاع صغيرة فهو محتاج فرقة قتالية مدرعة عشان يبعتها .. بس كل قواته كانت فعلياً مشتبكة مع القوات المصرية إلا فرقة مدرعة من الفيلق السابع مدرعات بقيادة الكولونيل (يوري بين أري Uri Ben Ari) من قوات الإحتياط محطوطة في بلدة نيتزانيا مستنيه أي أوامر بالتقدم لو حصل حاجة .. (عساف سيمخوني) من غير ما يرجع أو يستشير أو يبلغ (موشيه دايان) طلع قرار ل(يوري بين أري) إنه يمشي فرقته المدرعة اللي كانت الفرقة المدرعة الوحيدة اللي تحت إيد جيش الدفاع الإسرائيلي ويجري من نتزانيا بإتجاه القصيمة ويعدي من ممر الضيقة ويجري بإتجاه الإسماعيلية.
فجر يوم 31 أكتوبر كانت الفرقتين قوات خاصة بقيادة (إفرام أدان) جاتلهم الأوامر إنهم حيتقدموا من وسط سيناء بإتجاه أبوعجيلة .. المشكلة إن القيادة المصرية كان جالها خبر إن فيه وحدة إستطلاع إسرائيلي عدت من معبر الضيقة فكنا إلي حد ما مستعدين إن فيه حاجة حتحصل بس مكناش نعرف إن الإسرائيليين بقي ليهم فيلق مشاة وفرقتين قوات خاصة بقيادة (إفرام أدان) وكمان فرقة مدرعة بقيادة (يوري بين أري) جايين ناحية الإسماعيلية عن طريق معبر الضيقة .. بمجرد ما قوات (إفرام أدان) بقت علي بعد نص كيلومتر من معبر الضيقة إتفتحت عليهم نار جهنم ..كانت فيه وحدة مصرية بتحمي سد الرويفة ودي منطقة عالية علي الأرض وبدأو يصطادوا قوات (إفرام أدان) .. دبابات شيرمان Sherman الأميريكية اللي كانت تحت إيد قوات (إفرام أدان) قدرت تدمر الوحدة المصرية اللي بتحمي سد الرويفة وباقي قواته بقت بتتقدم بإتجاه أبوعجيلة .. كانت فيه قوة تدخل سريع مصرية في العريش جرت عشان تلحق اللي بيحصل في أبوعجيله بس هم كمان إتدمروا .. خلال ساعة من الإشتباكات كانت أغلب الدفاعات المصرية في أبوعجيله وقعت.
الوضع فعلياً بدأ يقلب علي إنه يبقي زي الزفت .. إحنا مع أول يوم للقصف الجوي الإنجليزي الفرنساوي كنا عارفين إنهم عايزين ينزلوا بقواتهم لقناة السويس .. وقتها كان منطقي إن القيادة بتاعتنا تسحب فيلق الدبابات الوحيد اللي كان حيلتنا وكان عبارة عن دبابات T-34 سوفيتية وسرية مدافع SU-100 وكتيبة مشاة ميكانيكي وتوديهم للإسماعيلية لحماية مدن القناة .. لما الإسرائيليين دخلوا أبوعجيلة ومبقاش فيه حاجة تمنعهم من التقدم ناحية الإسماعيلية فالقيادة العسكرية قامت تاني مرجعه فيلق الدبابات ده من جوه الإسماعيلية لسيناء .. الغلطة دي فعلياً هي اللي حسمت المعارك في سيناء لصالح إسرائيل.
الساعة خمسة مساء يوم 31 أكتوبر (موشيه دايان) جاله خبر باللي عمله (عساف سيمخوني) وكان حيطلع قرار بإنه يسحب تاني الفرقة المدرعة اللي من الفيلق السابع مدرعات بتاعة (يوري بين أري) بس كان وقتها خلاص الرجل وصل برجالته لورا الدفاعات المصرية في أبوعجيلة .. ساعتها الإسرائيليين مكنش قدامهم غير إن فرقة المدرعات بتاعة (يوري بين أري) تتحرك بإتجاه الإسماعيلية عشان تقابل فيلق دبابات T-34 المصري اللي جاي .. (يوري بين أري) وقف بقواته عند حتة إسمها جبل لبني علي بعد 22.5 كيلومتر غرب أبوعجيلة عشان يستني الهجوم المصري المضاد .. طبعاً غباء من القيادة بتاعتنا إنها تبعت فيلق مدرعات كامل في سيناء من غير أي غطاء جوي وبسبب ده سلاح الجو الإسرائيلي إصطاد الفيلق كله ودمره قبل حتي ما يوصل لجبل لبني .. (يوري بين أري) لما جاله الخبر إتقدم تاني لحد ما بقي علي بعد 15 كيلومتر بس من القناة.
في المرحلة دي من الحرب كانت القوات الإسرائيلية وصلت لمرحلة صعبة أوي من نقص الذخيرة وقطع الغيار .. القوات اللي كانت تحت إيد (إفرام أدان) اللي كانت عدت أبوعجيلة تقريباً بقت لا بتمشي بسبب إن أغلب دباباتهم عطلت ولا بتحارب لإن ذخيرتهم خلصت .. القوات بتاعة (يوري بين أري) بقت خايفة تتقدم وتخش الإسماعيلية لتلاقي نفسها في نفس المصير إن ذخيرتها خلصت ومعداتها من قلة الصيانة عطلت .. الوضع اللي زي الزفت ده أجبر (عساف سيمخوني) يوم 1 نوفمبر إنه يعمل الحاجة اللي كان نفسه ميتحطش في موقف إنه يلاقي نفسه مجبر يعملها وهي إنه بعت أخر فرقة مشاة إحتياطي اللي هي الفرقة العاشرة عشان يشن هجوم مباشر علي نقطة أم قطيف الحصينة لمجرد إنه محتاج يفتح سكة عشان يوصل إمدادت عاجلة لقواته في سيناء.
الهجوم الأول كان فاشل بكل ما تحمله الكلمة من معني .. ده خلي قائد الفرقة إنه يخلي كتيبتين من قواته في ليلة 1 نوفمبر يحاوطوا نقطة أم قطيف عشان يشن هجوم مع ساعات فجر يوم 2 نوفمبر بس الكتيبتين وسط الظلمة تاهوا في الصحراء .. الكتيبة الأولي وصلت أم قطيف فعلاً بس كان خلاص الصبح طلع فالمدفعية المصرية نسفتها والكتيبة الثانية كملت سكتها بعيد خالص عن أم قطيف .. طبعاً (عساف سيمخوني) معجبوش الوضع ويومها كان قائد الفرقة العاشرة دي إتشال وإتعين حد بداله .. تاني يوم إتعمل هجوم فاشل تاني مات فيه قائد الفرقة الجديد اللي كان لسه متعين قبلها بيوم .. اليوم الثالث القوات المصرية اللي فاضله اللي كانوا تقريباً يتعدوا علي الصوابع خافوا ليتحاصروا ومحدش يلحقهم فقرروا يتسللوا وسابوا الموقع للإسرائيليين بس ما بعد خساير الإسرائيليين وصلت لمرحلة إن الفرقة العاشرة إحتياط اللي هم باعتينها عشان تنقذ القوات الإسرائيلية في سيناء بقوا هم اللي محتاجين حد يلحقهم.
الوضع في قلب سيناء بقي زي الزفت بس ده ممنعش الإسرائيليين يكملوا في خطتهم عادي خالص .. يوم 1 نوفمبر مجموعة قتال إسرائيلية بتتكون الفيلق الأول مشاة والفيلق 27 مشاة ميكانيكي إحتياط من بقيادة الجنرال (حاييم لاسكوف Chaim Laskov) حيروحوا بإتجاه رفح وجنوب قطاع غزة بحيث يعدوا الدفاعات المصرية ومنها يمشوا بمحاذاة ساحل البحر المتوسط ناحية العريش اللي مقر القيادة المصرية في سيناء .. يوم 2 نوفمبر القوات دي دخلت العريش وفعلياً قطاع غزة كله بقي تحت إيد الإسرائيليين يوم 4 نوفمبر .. في نفس الوقت وحدات مظلات إسرائيلية حتكون وصلت شرم الشيخ بحيث إن علي يوم 5 نوفمبر بالكتير يكونوا سيطروا علي مضيق تيران .. العمليات من يوم 1 لحد يوم 5 نوفمبر هي فعلاً اللي مخلياني مستغرب أوي من خطة (موشيه دايان) وده اللي حشرحه دلوقتي.
نيجي بقي لسؤال المليون ريال .. هو مين كسب حرب العدوان الثلاثي؟
لما تيجي بالورقة والقلم تحكم علي الخطة بتاعة (موشيه دايان) تلاقي نفسك قدام يا بني أدم بيفهم أوي يا بني أدم بهيمة بس لحسن حظه واجه ناس بهايم أكتر منه (اللي هو إحنا) فهو بان قدام الناس علي إنه بيفهم بس ده مش حقيقي .. الرجل ده أول هدف راح عشان يضربه كان مضيق متلا اللي هو فعلياً أبعد نقطة عن إسرائيل .. تاني هدف رحتله كان إنك تفتح طريق وسط سيناء عشان قواتك تعدي منه للقناة وخليت أخر هدف تضربه هو أقرب نقطة ليك اللي هي قطاع غزة .. بلاش دي .. شرم الشيخ ومضيق تيران اللي هم أساساً الحاجة اللي الحرب دي كلها قامت عشانها إنت خليتهم أخر حاجة خالص تفكر توصلها .. اللي عمله (موشيه دايان) إنه فعلياً حل المسألة بالعكس يعني راح لمضيق متلا ورجع بظهره .. إنت ممكن تفكر في المنطق ده وتستغربه بس اللي خلاه يفكر فيه إن القوات المصرية رغم إن عدداً وتسليحاً كانت أقوي إلا إنها كانت متمركزة أوي في نقط تقاطع الطرق الممهدة جوه سيناء ودي نفس الفلسفة اللي القوات المصرية ماشية بيها لحد دلوقتي .. أمن الطرق الممهدة بكماين ثابتة وسيب الطرق الجبلية محدش يقرب منها .. (موشيه دايان) لما راح سيطر علي مضيق متلا كان عايز يخلي القيادة المصرية تفضل مستغربة ومش قادرة تتوقع هم الإسرائيليين عايزين إيه؟ وحيبعتوا قواتهم فين؟ .. بإختصار شديد (موشيه دايان) إتعامل مع القوات المصرية في سيناء بنفس منطق الجماعات الإرهابية المسلحة هناك دلوقتي.
رغم إن إسرائيل هاجمتنا بفيلقين بس منهم فيلق كامل قوات إحتياط في حين إن القوات المصرية في سيناء كانت فرقتين مشاة و 7 فيالق مشاة وفيلق دبابات وكتيبتين مشاة .. إلا إن علي الأرض القيادة العسكرية المصرية عملت غلطتين: الغلطة الأولانية إنهم ركزا تواجدهم في حتة واحدة اللي هي التقاطعات بتاعة الطرق الممهدة جوه سيناء قال يعني كده إحنا بقينا مسيطرين علي شبكة الطرق .. ده خلي القوات المصرية عامله زي الديناصور صحيح ضخم وقوي بس حركته تقيلة أوي في حين إن القوات الإسرائيلية كانت أخف وأسرع وهو ده اللي كانوا عايزينه إن لما عداد الوقت يقف لما الأمم المتحدة تطلع قرار وقف إطلاق النار تكون القوات الإسرائيلية وصلت لأبعد نقطة هم يقدروا يوصلوا ليها جوه سيناء .. الغلطة الثانية إن زي ما قلتلك الهجوم الإسرائيلي بدأ يوم 29 أكتوبر والضربات الجوية الإنجليزية-الفرنسية بدأت يوم 30 فعشان القيادة المصرية كانت متؤكدة إن أكيد الإنجليز والفرنساويين حيعملوا عملية إنزال بري علي القناة قاموا سحبوا فرقتين مشاة وفرقة الدبابات الوحيدة اللي كانت حيلتنا من سيناء وبعتوها للقناة .. يعني تقدر تقول إننا إدينا لإسرائيل سيناء في العدوان الثلاثي علي طبق من ماس.
علي الناحية التانية الدنيا ممشتش زبادي خلاط مع الإسرائيليين .. فكرة إن إعلان التعبئة العامة إتأخر أوي كده عمل حالة فوضي إنت لا تتخيلها .. فاكر قرار التعبئة اللي راح في السر لفيلقين المشاة الميكانيكي من قوات الإحتياط؟ كتير أوي من الدبابات والمجنزرات اللي كان المفروض تبقي علي الجبهة ملحقتش لا تتعمر ولا يتعملها الصيانة اللازمة وبالتالي لما الضرب إشتغل فيه منهم كتير عطل في النص .. لما التعبئة العامة بتُعلن فالمفروض إن فيه 13,000 عربية مملوكة لمدنيين بتتسحب للمجهود الحربي بس طبعاً لإن قرار التعبئة طلع قبل ضرب النار بيومين فالعربيات دي كلها محدش لحق يجمعها .. قوات الإحتياط اللي المفروض إنهم كانوا رأس الحربة في الهجوم الإسرائيلي علي سيناء وصلوا متأخر أوي لوحداتهم وفيه عساكر كتير وصلوا الجبهة لا عارفين هم حيخدموا في أنهي وحدات؟ ولا حتي كانوا عارفين هي مهماتهم إيه؟ .. رغم الفوضي دي كلها وإسرائيل تكسبنا برده فده يوريك حجم الفشل اللي كان مستشري في المؤسسة العسكرية المصرية ويخليك تقدر إن كان طبيعي الفشل ده يستمر لحد نكسة يونيو 1967 بس الأهم إنه يخليك تستوعب قد إيه المعجزة اللي اتحققت في حرب أكتوبر 1973 إن إزاي قدرنا نتخلص من الفشل ده كله.
عسكرياً مفيش حد عاقل ميقدرش يقول إن إسرائيل مكسبتش الحرب .. دول وصلوا لحد 15 كيلومتر من القناة وخدوا شرم الشيخ ودخلوا مقر القيادة العسكرية في العريش .. سواء بقي إنت في صف إنهم كسبوها لإنهم بيفهموا أو كسبوها لإننا إدينالهم سيناء عشان نحمي القناة فمش دي قضيتي .. طب أزيدك من الشعر بيت .. مش حتفرق إذا كانت إسرائيل كسبت الحرب عسكرياً أو لا .. في الحالتين مش حتفرق .. العدوان الثلاثي ده عامل زي إمتحان الإيلتس ILETS كده اللي هو إمتحان متقسم 4 أجزاء كل جزء من 9 والنتيجة النهائية إنك بتحسب Average بتاعك فلو إنت جايب 9 من 9 في جزء واحد بس من الإمتحان بس عكيت في الباقي ففي الأخر نتيجتك النهائية حتبقي زي الزفت .. الإسرائيليين إكتشفوا إنهم جابوا درجة حلوة أوي بس الفرنساويين والإنجليز إتخسف بدرجاتهم الأرض .. تاني .. مش حتفرق إذا كنت شايف إن إسرائيل كسبت الحرب أو خسرتها .. كله رايح علي رأي عم (ضياء) .. المشكلة إن سياسياً الحرب دي كانت فضيحة بجلاجل ليها ولبريطانيا وفرنسا .. ده فيه ناس رأيها إن لو الإنجليز والفرنساويين دخلوا الحرب دي عشان تفضل القناة مفتوحة فهي برده فرقعت في وشهم لإن (عبدالناصر) أمر بإغراق 47 سفينة في القناة لما الحرب قامت .. اللي حسم الحرب دي لصالحنا هو الحسابات السياسية الغلط .. أنا إتكلمت عسكرياً بما فيه الكفاية وجه الوقت نتكلم شوية سياسة.
من النادر أوي إن تحصل حاجة في الدنيا تخلي الأمريكان والسوفييت يتفقوا علي موقف .. العدوان الثلاثي خلي السوفييت والأمريكان ودي حاجة نادراً ما حصلت ضغطوا في مجلس الأمن عشان يصدروا قرار وقف إطلاق النار بس يمكن مبررات الإتنين إختلفت أوي .. السوفييت كانوا عارفين إن الغرب ماسك عليهم ذلة الطريقة اللي هم تعاملوا بيها مع ثورة المجر فما صدقوا تحصل مصيبة عملها الغرب عشان يقولوا شايفين الغرب بيعمل إيه .. شايفين الإنجليز والفرنسيين الإستعماريين ولاد ستين كلب .. الأمريكان علي الناحية الثانية مكنش عاجبهم إن الموضوع تم من ورا ظهرهم .. ده حقيقي علي فكرة .. الرئيس الأميريكي (دوايت أيزنهاور Dwight Eisenhower) كان متضايق أوي إن (إيدن) مستاذنوش يغزو مصر .. اللي فعلاً جاب أجل العدوان الثلاثي هو إن بسبب الجنيه الإسترليني قيمته إتهزت جامد بسبب الحرب وكان عشان الحكومة الإنجليزية تسنده محتاجين قرض من الحكومة الأميريكية فالأمريكان قالولهم توقفوا ضرب النار تاخدوا القرض متوقفوش ضرب نار مفيش قرض.
الحرب دي فعلياً شرخت الحكومة البريطانية نصين .. وقتها اللي كان بيحكم بريطانيا كان حزب المحافظين .. تخيل إن الحزب اللي بيشكل الوزارة إستقال منه إتنين وزراء إحتجاجا علي الحرب هم (إيدوارد بويل Edward Boyle) و (أنتوني ناتينج Anthony Nutting) وكان حينضملهم (أر إيه باتلر R.A. Butler) واللي كان ناس كتير شايفاه إنه هو اللي حيقود الحزب بعد (إيدن) بس هو فضل يكمل في الوزارة عشان يفرمل الحكومة وإلا لو هو مشي فكده كل المعارضين للحرب حيكونوا مشيوا .. يوم 19 نوفمبر بعد إنسحاب أخر عسكري بريطاني من مصر (إيدن) خد بعضه وسافر جامايكا وإدي لنفسه أجازة طويلة من غير ما يقول لحد وساب جواب علي مكتبه بتكليف (أر إيه باتلر) إنه يقود الحكومة مؤقتاً ويوم 9 يناير 1957 بعتلهم ورقة إستقالته.
بعد ضغط أميريكي إضطرت فرنسا وإنجلترا إنهم يقبلوا قرار وقف إطلاق النار وينسحبوا من قناة السويس وكمان إتبعتت قوات حفظ سلام تابعة للأمم المتحدة عشان تستلم المناطق في سيناء والقناة اللي إستولت عليها الدول الثلاثة .. بعدها بسنة حصل تمرد جوه القوات المسلحة الفرنسية أطاح بالجمهورية الرابعة وأُعلنت الجمهورية الخامسة برئاسة (شارل ديجول Charles de Gaulle).
المصادر:
- مقالة بعنوان How the Suez Crises Was as Win for Israel and a Major Defeat for Britain and France .. ليه أزمة السويس كانت نصر لإسرائيل بس هزيمة قاسية لبريطانيا وفرنسا .. نشرت في مجلة The National Interest وده لينك المقالة الأصلية:
http://://nationalinterest.org/blog/buzz/how-suez-crisis-was-win-israel-and-major-defeat-britain-and-france-33316 - مقالة بعنوان 1956: Suez and the End of Empire نشرت في جريدة The Guardian البريطانية وده لينك المقالة الأصلية:
http://www.theguardian.com/politics/2001/mar/14/past.education1
