فيه حاجة أنا مش فاهمها يمكن أنتوا تقدروا تفهموها وتفهموهالي .. إزاي 90% من الشركات الأميريكية اللي شغاله في الصين بتقول إن الشركات الصينية اللي بتنافسهم في السوق هناك سواء كانت قطاع عام أو خاص بتاخد دعم حكومي وإن السوق مش Fair خالص في الصين ورغم كده أقل من 10% من الشركات الأميريكية اللي شغاله في الصين بتفكر إنها تسيب السوق الصيني خالص؟ .. الوضع دلوقتي إن الشركات الأميريكية اللي شغاله في الصين مش فارق معاها إن بقي فيه خناقة تجارية بين بلدهم وبين الصين ومش فارق معاهم حرب التعريفات الجمركية اللي محدش عارف حترسي علي إيه .. الشركات دي شايفه إن الصين هي مستقبل البيزنس بتاعها وهي مش ناويه تمشي .. الكلام ده يمشي علي شركات شغاله في العربيات زي Tesla وشركات شغاله في الموبايلات زي Apple .. بناء علي كلام مجلس العلاقات التجارية الصينية الأميريكية US China Business Council أو USCBC ف68% من الشركات الأميريكية اللي بيتقال عليها Multinational بتعتبر الصين واحدة من أهم 5 دول في استراتيجيات البيزنس بتاعتها .. صحيح إن النسبة دي قلت عن ال78% اللي كانت قبل ما الحرب التجارية بين الصين وأميركا دلوقتي تحصل بس في نفس الوقت إنت بتتكلم عن إن 10% بس من الشركات الأميريكية غيرت رأيها وبقت مش بتعتبر الصين من ضمن أولويات البيزنس بتاعها .. أظن سؤال الأربعة وستين ألف ريال دلوقتي هو ليه؟ .. ليه الصين حلوة علي رأي (جابر الشرقاوي) في فيلم فول الصين العظيم؟
الفكرة كلها في الرخص .. أنا لو مكان شركة Apple مثلاً فأنا أرخصلي أروح أفتح مصنع في الصين عن إني أفتحه في أي حتة في العالم بما فيهم أميركا .. لو أنا مكان Apple وليا مصنع مثلاً بيصنع الساعات بتاعتي اللي هي Apple Watch في الصين فعشان الشركة تجيب الساعات دي من المصنع في الصين وتستوردها عشان تتباع في أميركا فهي بتدفع 25% من ثمن الساعة كتعريفة جمركية .. بس في نفس الوقت 78% من الشركات الأميريكية اللي شغاله في الصين شايفة إن 25% دول ولا حاجة لو قارنتها بإني فتحت المصنع بتاعي في أي بلد تانية .. متنساش إن حرب التعريفات الجمركية بين أميركا و الصين دي بدأت في 2015 .. في السنة دي 39% من الشركات الأميريكية اللي شغاله في الصين قالت إن التعريفات الجمركية دي قللت من نسبة أرباحهم .. سنة 2018 الرقم ده قل ل29% من الشركات .. سنة 2019 الرقم ده قل أكتر بقي 22% بس .. بلاش دي .. سنة 2015 اللي هي السنة اللي بدأت فيها الحرب التجارية بين أميركا والصين 85% من الشركات الأميريكية اللي شغالة في الصين قالت إن شغلها في الصين بيجيب فلوس حلوة رغم التعريفات الجمركية اللي إتضافت .. سنة 2016 النسبة زادت ل90% والسنة دي النسبة دي بقت 97% .. ده معناه إيه؟ .. معناه إن الشركات الأميريكية الكبيرة مش فارق معاها .. هي شافت موتات أكتر من دي بكتير ورغم التعريفات الجمركية والحرب التجارية وكل الهري بين أميركا والصين فهم لسه بيعملوا فلوس زي الفل .. بس الدنيا مش حتفضل ماشية معاهم زبادي خلاط كده كتير.
الشركات الأميريكية اللي ليها مصانع في الصين من 2015 لحد دلوقتي طلعت بضاعة لو جمعت هم كام فلوس حتلاقي نفسك بتتكلم عن 250 مليار دولار والشركات دي بتدفع عليهم 25% تعريفات جمركية .. بداية من 15 ديسمبر 2019 فيه شوية تعريفات جمركية جديدة حتضاف فده معناه إنك علي أخر السنة متوقع إن الرقم ده يوصل 300 مليار دولار لو زودت عليهم ال25% فإنت أكيد حتلاقي شركات بدأت تقول لنفسها ما يمكن جه الوقت إننا نقلل شوية من حجم شغلنا في الصين لإن الوضع كده بقي مش لطيف .. اه لحد دلوقتي الشركات اللي بتفكر تعمل كده مش كتير .. لحد دلوقتي 87% من الشركات الأميريكية اللي شغاله في الصين قاعدين مش ماشيين.
المصدر:
- مقالة بعنوان US Companies: China unfair, but we don’t really care .. نشرت في مجلة Forbes و ده لينك المقالة الأصلية:
https://www.forbes.com/sites/kenrapoza/2019/08/30/us-companies-china-unfair-but-we-dont-really-care/#1104699c4adf
