أزمة الصواريخ الكوبية .. لما العالم غني وداع يا دنيا وداع.

لينك التسجيل الصوتي للجزء الأول من المقالة علي Sound Cloud:
https://soundcloud.com/user-112011687-312727988/1a-3

لينك التسجيل الصوتي للجزء الثاني من للمقالة علي Sound Cloud:
https://soundcloud.com/user-112011687-312727988/dsptmog2invv

أحيانا كتير في تاريخ البني أدمين فيه كوارث بتحصل و ناس بتموت لمجرد إن فيه بني أدم سأل نفسه السؤال اللي (رمضان مبروك ابوالعالمين حموده) سأله لنفسه .. هو يجري حاجة لو عملت المصيبة دي؟ و النبي ما يجرا حاجة .. الكارثة اللي حتكلم عنها النهاردة هي أزمة الصواريخ الكوبية .. و البني أدم اللي سأل نفسه السؤال الوجودي ده كان رئيس الحزب الشيوعي السوفيتي أو اللي تقدر تقول عليه رئيس الإتحاد السوفيتي (نيكيتا خروشوف Nikita Khrushchev) .. الكلام ده كان في إبريل 1962 .. اللي حصل إن (خروشوف) كان قاعد بيتمشي علي شط فيلته اللي علي البحر الأسود .. قدامه علي الناحية الثانية من الشط كان ساحل تركيا .. قبلها بكام يوم المخابرات السوفيتية KGB سلمت تقرير ل(خروشوف) قالوله إن الأمريكان اللي كان رئيسهم وقتها إسمه (جون إف كينيدي John F. Kennedy) نشروا بطاريات صواريخ جوبيتر اللي بتقدر تشيل رؤوس نووية في تركيا .. بناء علي تقرير KGB اللي خلي (خروشوف) بطنه تقلب إن الصواريخ دي تقدر تضرب أي مدينة روسية خلال دقايق .. بما فيها العاصمة موسكو .. في لحظة صفا وجودي (خروشوف) سأل نفسه هو يجري حاجة لو انا عملت نفس الحركة بس في كوبا؟

مهم تفهم أوي المنطق ورا اللي عمله (خروشوف) لإن خلينا نكون صرحاء مع بعض إن الرجل كان له وجهة نظر برده .. دلوقتي الأمريكان حيتكشفوا الصواريخ .. هم مش عبط ولا هبل .. الفكرة إنهم لما يكتشفوها و بعد ما يزعقولهم شوية حيضطروا يقعدوا معاه عشان يتفاوضوا و في المفاوضات هو ممكن يطلب كذا حاجة .. ممكن يطلب إن في مقابل إنه يشيل صواريخه من كوبا الأمريكان ينسحبوا من غرب برلين لإن زي ما حكينا في مقالة الجسر الجوي لإنقاذ برلين فموقع برلين الجغرافي بيخليها جوه النص الشرقي من ألمانيا يعني نظرياً هي تحت إيده بس المدينة مقسومة نصين و النص الغربي تحت إيد الأمريكان .. ممكن يطلب إن في مقابل إنه يشيل صواريخه من كوبا فالأمريكان هم كمان يشيلوا صواريخهم من تركيا .. أيا كان اللي حيطلبه فالأكيد يعني إنه حيبقي طلب لازم يتنفذ و هو إن أميركا توعده إنها عمرها ما حتفكر تغزو كوبا دي تاني خالص أبدا ..اللعبة دي كلها معتمدة علي إن الأمريكان يعرفوا إن السوفييت نشروا صواريخهم في كوبا بعد ما الصواريخ تكون وصلت و إتركبت فعلاً .. لو الصواريخ إتلقطت قبل كده فالماتش خلص و الأمريكان كسبوا.

المرحلة الأولي .. السوفييت محتاجين يقنعوا الكوبيين الأول:

السوفييت بعتوا قائد سلاح الصواريخ بتاعهم علي إنه مهندس زراعي لكوبا عشان يقعد مع الإتنين اللي فعلياً بيحكموا البلد .. (فيديل كاسترو Fidel Castro) و (تشيه جيفارا Chi Guevara) .. العرض السوفيتي كان إنهم حينشروا صواريخ نووية متوسطة المدي في كوبا .. (كاسترو) وجهة نظره كانت مختلفة شوية .. أولاً كوبا مش محتاجة أسلحة نووية .. ثانياً لو الأمريكان عرفوا إن الصواريخ إتركبت فكل اللي حيفكروا فيه إن السوفييت بمجرد ما يركبوها حيضربوها عليهم لإن مش حيجي في بالهم إن السوفييت ركبوا الصواريخ دي لمجرد إنهم يجبروا الأمريكان يتفاوضوا معاهم علي إنهم يشيلوا صواريخهم من تركيا .. ثالثاً و ده الأهم يعني هو مش عايز يبان إنه عروسة ماريونيت في إيد السوفييت .. هو عايز يبان قدام العالم إنه حليف ليهم .. (كاسترو) خد (جيفارا) علي جنب عشان يتناقشوا يقبلوا ولا يرفضوا العرض السوفيتي .. يقال إن (جيفارا) كان خايف بس (كاسترو) قال لنفسه يعني هو إيه اللي حيحصل أسوأ من اللي إحنا فيه؟ .. الأمريكان حيغزونا تاني؟ .. ما هم جربوا أولاني و فشلوا .. (كاسترو) طلع لقائد سلاح الصواريخ السوفيتية و بلغه إنه موافق علي إن (خروشوف) ينشر صواريخه النووية في كوبا.

الإتفاق بين السوفييت و الكوبيين كان كالأتي .. إحنا قدام الناس حنقول إن عشان الأمريكان حاولوا يغزوكوا قبل كده في عملية خليج الخنازير وعشان انتوا حلفاء لينا فاحنا مش حنسيبكوا كده لوحدكوا انما حنديكوا شويه سلاح تدافعوا بيه عن نفسكوا و حنسلفكوا كمان شويه عساكر و ضباط من عندنا عشان ندربكوا عليه .. قدام الناس محدش حيعرف ان من ضمن السلاح اللي ان باعتينه حيبقي فيه صواريخ متوسطه المدي .. دورنا احنا اننا نخبي الصواريخ دي ضمن شحنه السلاح اللي حنبعتها ليكوا.

المرحلة الثانية .. إزاي تنقل فرح العمدة ده من روسيا لكوبا من غير ما تتكشف؟

العملية بدأت يوم 25 أغسطس من ميناء سيفيستابول Sevastapol الروسي بإباحار أول سفينة تجارية لكوبا بس جواها شايله حمولة الصواريخ متوسطة المدي .. دي كانت سفينة من وسط 85 سفينة .. العساكر السوفييت اللي حيروحوا كوبا إتبعتوا يا علي إنهم أطقم السفن التجارية أو علي إنهم سياح مسافرين يقضوا أجازة هناك .. في سبتمبر 1962 فرح العمدة وصل كوبا .. مش بس الصواريخ .. عندك 42,000 عسكري .. طيارات هليكوبتر حتلاقي .. قاذفات جوية موجود .. لانشات بحرية و ماله ..مدافع مضادة للطيارات مش حنقول لا .. طيارات مقاتلة قال يعني جت عليهم .. و طبعاً صواريخ متوسطة المدي قادرة علي إنها تشيل رؤوس نووية .. زي ما قلتلك (خروشوف) كان قايل للأمريكان إنه حيبعت لكوبا قوات و كان الإتفاق إن القوات دي لمجرد إن كوبا تعرف تدافع عن نفسها مش أكتر .. السؤال اللي تقريباً محدش في روسيا سأله لنفسه هو أنتوا إزاي أقنعتوا نفسكوا إنكوا تقدروا تنقلوا الناس و المعدات دي كلها لكوبا و إن الأمريكان مش حيكونوا حاطين مناخيرهم في العملية؟ .. إزاي أقنعتوا نفسكوا إن الأمريكان مش حيبقوا صاحيين و مش بيناموا الليل عشان يتطمنوا إن نوعية السلاح اللي أنتوا باعتينه لكوبا ده ميكونش فيه صواريخ بعيدة المدي؟ .. خلاص ثقتكوا في نفسكوا جامدة أوي للدرجة دي؟

الساعة 11:50 ظهر يوم 16 أكتوبر الرئيس الأميريكي (جون كينيدي) قابل ناس من وكالة المخابرات المركزية CIA و معاهم صور طيارات إستطلاع U-2 من فوق كوبا .. واحد من ضباط المخابرات شرحله إن من ضمن الصور لقوا إن السوفييت بعتوا لكوبا صواريخ متوسطة المدي ليها القدرة إنها تطير1700 كيلومتر .. ده معناه إن الصواريخ دي تقدر تضرب العاصمة الأميريكية واشنطن في أقل من 13 دقيقة .. (كينيدي) كان شوية و حيطلع صوت من مناخيره .. الرجل كان عنده مشكلتين .. أول مشكلة داخلية و هي إن إنتخابات التجديد النصفي للكونجرس قربت و المعارضة الجمهورية إستغلت حكاية إن السوفييت بعتوا قوات لكوبا عشان يوصفوا (كينيدي) قدام الأمريكان علي إنه رئيس ضعيف خلي السوفييت علي بعد خطوتين من السواحل الأميريكية فلو الإعلام و المعارضة شموا خبر إن الروس ضحكوا عليه و بعتوا صواريخ متوسطة المدي فكده تقريباً (كينيدي) خسر الإنتخابات الرئاسية الجايه كمان .. المشكلة الثانية دي غريبة شوية .. في مكالمة التليفون بينه و بين (خروشوف) اللي (خروشوف) حكاله فيها إيه بالضبط نوعية السلاح اللي روسيا حتبعتها لكوبا هو قاله إن لو حصل و عرفت أنكوا بعتوا صواريخ نووية لكوبا فعليا الطلاق لطربقها فوق دماغكوا و دماغ (كاسترو) .. (كينيدي) جاتله الشجاعة إنه يحلف علي الطلاق مش لسبب غير إنه عمره ما تخيل إن (خروشوف) حيكون بالغباء ده؟ .. هو عمره ما تخيل إن (خروشوف) حيسأل نفسه السؤال الوجودي بتاع هو يجري حاجة لو عملت المصيبة دي؟ و النبي ما يجرا حاجة.

لما (كينيدي) سأل ضباط المخابرات بتوعه إمتي الصواريخ دي حتبقي جاهزة كانت إجابتهم إن و الله لحد دلوقتي الرؤوس النووية نفسها لسه السوفييت مبعتوهاش كوبا بس بمجرد ما الرؤوس النووية دي توصل فالمهندسين السوفييت قدامهم ساعات يدوبك يركبوا الرؤوس النووية دي و الصواريخ تبقي جاهزة للإطلاق .. هنا المستشارين بتوع (كينيدي) إتقسموا نصين:

• وزير دفاعه (روبيرت ماكنمارا Robert McNamara) كانت وجهة نظره إن عشان نضرب الصواريخ دي بغارة جوية فإحنا لازم نعمل ده قبل ما الرؤوس النووية تتركب .. حلو .. بما إن لسه الرؤوس النووية متركبتش فإحنا قدامنا وقت إننا نتفاوض مع السوفييت.
• رؤساء قيادات الأركان بتاعة القوات المسلحة قالوا إن مش من مصلحتنا نستني لو حنضرب نضرب دلوقتي و ياريت كمان يا ريس توافق علي عملية غزو بري عشان نخلص من (كاسترو) ده بشكل نهائي الله يكرمك.

في نفس اليوم الساعة 6:30 بليل (كينيدي) طلب إجتماع كبير شوية حضره 14 بني أدم .. 9 من مجلس الأمن القومي و 5 من الخبراء اللي ممكن يكون رأيهم مفيد .. إجتماع بالشكل ده كان أول مرة يحصل و بعد كده الإجتماعات دي بقت أساسية و أي رئيس من بعد (كينيدي) بقي يطلبها و بقت تتسمي EXCOMM و دي إختصار Executive Committee of the National Security Council يعني اللجنة التنفيذية لمجس الأمن القومي .. المهم إن في الإجتماع ده الناس اللي حولين (كينيدي) كانوا مقسومين نصين:

• القيادة العسكرية قالت إن الغارات الجوية لوحدها مش حتجيب نتيجة .. لو دمرنا منصات الصواريخ السوفيتية فبسهولة أوي (خروشوف) حيبعت صواريخ تاني و تالت و رابع .. زود علي كده إن السوفييت بعتوا لكوبا طيارات قاذفة فممكن الطيارات دي تضرب ولاية فلوريدا القريبة أوي من كوبا كرد علي الغارات الجوية الأميريكية علي كوبا .. طب والحل؟ ..  أكتر من 100 غارة جوية ضد القوات السوفيتية في كوبا و بعد كده غزو بري .. علي فكرة .. الرأي ده كان عاجب أوي (روبيرت كينيدي Robert Kennedy) أخو (جون كوينيدي) و اللي كان ماسك منصب النائب العام.
• بقية الناس اللي حاضرين قالوا طب إفرض يا فالح مش كل بطاريات الصواريخ السوفيتية إتدمرت في الغارات .. إفرض فضل مهندس سوفيتي واحد شاف زمايله ماتوا فقرر ينتقم .. إفرض لو المهندس الوحيد اللي فاضل عمل فيها (ويل سميث Will Smith) في I’m Legend و فرقعنا كلنا معاه؟ .. حاجة كمان .. طب هو معلش العساكر اللي حيموتوا دول مش سوفييت؟ .. هو مش السوفييت حيعتبروا قتلنا ليهم كإنه إعلان حرب؟ .. طب هو حيحصل حاجة يعني لو إستنينا أو حتي لو سبنا الروس يبنوا بطاريات الصواريخ دي في كوبا؟ .. طب ما السوفييت عندهم صواريخ عابرة للقارات تقدر تضرب المدن بتاعتنا .. حتفرق أوي إذا كانوا ضربونا من كوبا ولا من روسيا؟

وسط الخناقة دي إتحطت 3 خطوات عشان الأزمة دي تعدي علي خير:

• الخطوة الأولي هي الحل الدبلوماسي إننا نتكلم مع السوفييت علي أمل إن النفوس تهدي و المياه ترجع لمجاريها و دي حتبقي مهمة وزارة الخارجية و من دلوقتي يبدأوا يحطوا سيناريوهات هو إحنا ممكن نقدم إيه للسوفييت عشان يشيلوا صواريخهم من كوبا؟ و نتكلم مع مين بالضبط يكون حنين و طلباته مش مبالغ فيها؟
• الخطوة الثانية هي فرض حصار بحري حول كوبا عشان نوصل لحاجتين .. الحاجة الأولانية هي إننا نمنع روسيا إنها توصل أي أسلحة إضافية لكوبا .. الحاجة الثانية إننا في مقابل رفع الحصار نطلب من السوفييت إنهم يشيلوا الصواريخ بتاعتهم  .. دي حتبقي وظيفة القوات البحرية و دورهم إنهم يبدأوا يحطوا خطة حنحاصر كوبا إزاي؟ و بكام سفينة؟ و إيه أنواعها؟
• الخطوة الثالثة هي إن القوات المسلحة تبدأ تشتغل علي خطط الغارات الجوية و الغزو البري .. إيه الأهداف اللي حيتم ضربها؟ .. الطيارات حتطلع منين؟ .. الغزو البري حيبدأ منين؟ و إمتي؟ و إزاي؟ .. الميزة اللي حتسهل الخطوة دي كتير هي إن سلاح مشاة البحرية US Marine Corps أو المارينز كان المفروض إن بكره اللي هو 17 أكتوبر الساعة 2 العصر حيبدأوا مناورة عسكرية مع 40 قطعة بحرية كأنهم بيتمرنوا علي غزو إفتراضي لكوبا .. القوات دي حتروح المناورة بتاعتها و هم ولا عندهم أي فكرة إن في أي وقت المناورة ممكن تبقي غزو بحق و حقيقي.

ده في الوقت اللي دماغ (كينيدي) كانت بتسرح في نقطة و هي ليه؟ .. ليه (خروشوف) يعمل كده؟ .. كل ده عشان انا نشرت صواريخ في تركيا؟ .. انا كان ممكن أسيبه يعمل اللي هو عايزه في كوبا لولا إني في مكالمتي في التليفون معاه حلفتله بالطلاق إن لو هو بعت أسلحة نووية لكوبا حطربق الدنيا فوق دماغه و دماغ كاسترو .. كان لازم يعني الجلالة تاخدني أوي .. أصل انا لو كبرت دماغي (خروشوف) حيعتبر ده ضعف مني و حيبدأ يبعت أسلحته النووية في كل حتة .. مصر تاخد .. سوريا تاخد .. و يبقي مهرجان النووي للجميع .. من يوم 16 أكتوبر لحد 18 أكتوبر و الأمريكان كل طرف شغال في الخطوات بتاعته .. الخارجية بتحاول تتكلم مع السوفييت .. القوات البحرية رايحه تفرض حصارها علي كوبا .. قيادة الأركان بتحط خطط الغزو لحد ما في يوم 19 أكتوبر الأمريكان إتحطوا قدام واقع جديد أسود .. الساعة 9:45 مساء يوم 19 أكتوبر المخابرات الأميريكية سلمت (كينيدي) تقرير قالت فيه إن طيارة إستطلاع U-2 صورت بطاريتين صواريخ سوفيتية خلاص بقوا جاهزين في كوبا .. مش بس كده .. CIA قالت إن السوفييت بقوا ناشرين كذا بطارية إطلاق صواريخ متوسطة المدي تقدر تضرب أي حتة جوه أميركا .. التقرير ده خلي قيادة القوات المسلحة الأميريكية في إيدها إنها تلوي دراع (كينيدي) .. الوقت بيجري و الكلام مش حيجيب نتيجة مع السوفييت .. إنها الحرب .. إنها إرادة الرب .. حتي لما (كينيدي) قالهم إنه لو ضرب كوبا فالسوفييت حيضربوا برلين و لو ده حصل فمش حيبقي فيه مفر من الحرب النووية بين السوفييت و الأمريكان بس فضلت قيادة القوات المسلحة مصره علي رأيها .. صواريخنا حتدمر الإتحاد السوفيتي قبل ما يلحقوا يدمرونا .. الحصار البحري ده للعيال التوتو .. إنما إحنا بنقلبها مسلسل تشيرنوبل.

المرحلة الثالثة .. السوفييت بيكتشفوا إنهم اتقفشوا.

يوم 22 أكتوبر الساعة 10 مساءاً المخابرات السوفيتية أو KGB بتسلم تقريرها ل(خروشوف) و الحقيقة إنه كان تقرير غريب جداً .. أعضاء الكونجرس فجأة إتطلب منهم يركبوا طيارات عسكرية و يطيروا علي العاصمة واشنطن .. فيه مناورة عسكرية كبيرة بتحصل قدام سواحل كوبا .. وزارة الدفاع الأميريكية قررت تجلي كل المدنيين اللي في قاعدة جوانتانامو و دي قاعدة عسكرية أميريكية جوه كوبا .. مش بس كده .. التليفيزيون الأميريكي أعلن إن الرئيس (كينيدي) حيطلع يقول بيان عاجل للأمة الساعة 2 صباح يوم 23 أكتوبر يعني بعد 4 ساعات من وقت ما (خروشوف) كان بيقرأ التقرير .. فوق ده كله إن التقرير قاله إن السفارة الأميريكية بلغت وزارة الخارجية السوفيتية إن نص خطاب (كينيدي) حيكون وصل ليهم الساعة 1 الصبح يعني قبل ساعة كاملة من بث الخطاب مباشر للناس .. (خروشوف) قرأ الكلام ده و مبقاش في دماغه غير فكرة واحدة .. أحيه يا أبو سوسو أحيه إحنا إتقفشنا .. هو طلب يعمل إجتماع عاجل لحاجة إسمها بريزيديوم Presidium أو الهيئة الرئاسية للحزب الشيوعي و تقدر تسميمهم مجلس الأمن القومي .. في الإجتماع ده (خروشوف) بلغهم إن إحنا إتقفشنا .. الأمريكان إكتشفوا إن إحنا بنحط صواريخ نووية في كوبا و ده معناه إن في أي لحظة الغزو الأميريكي لكوبا حيحصل .. في الإجتماع ده الناس بدأت تحط Options قدام (خروشوف):

• هو ممكن يعلن إتفاقية دفاع مشترك بين الإتحاد السوفيتي و كوبا .. ده معناه إن الضباط الكوبيين من حقهم إنهم يستخدموا الصواريخ النووية دي و هم اللي يضربوها علي أميركا في حالة إنهم إتعرضوا لغزو أميريكي.
• هو ممكن كمان يدي الضباط السوفييت بتوعه في كوبا الحق إنهم يستخدموا الصواريخ النووية قصيرة المدي و اللي مثلاً لو إتضربت علي الأسطول الأميريكي اللي جاي يغزو كوبا فهي ممكن تغرق الأسطول كله .. الحل ده إترفض من وزير الدفاع (روديون مولونوفسكي Rodion Malinovsky) و اللي وجهة نظره هو معلش يعني العساكر بتوعنا في كوبا يعرفوا إيه أو خبرتهم إيه عشان نحط في إيدهم مسئولية زي دي؟ .. هو يجري حاجة لو إستنينا نسمع كلام (كينيدي)؟ .. مش يمكن إحنا فاهمين غلط و إن لسه الأمريكان مقفشوناش؟ .. خلينا نستهدي بالله و نشوف الرجل حيقول إيه.

الساعة 1 صباح يوم 23 أكتوبر السوفييت إستلموا نص خطاب (كينيدي) قبل ما هو يطلع يقوله للناس بساعة ولما قروه السوفييت حطوا إيدهم علي قلبهم .. اه الأمريكان قفشونا بس لا الحرب مش حتقوم بكره الصبح .. خليني أفهمك براحة .. دلوقتي الصواريخ اللي السوفييت بعتوها لكوبا لسه متركبش عليها الرؤوس النووية بتاعتها .. حلو .. بس الرؤوس النووية دي محطوطة علي سفينة من ضمن 14 سفينة تجارية في طريقها من ميناء سيفيستابول الروسي لكوبا .. يادي النيلة .. بس خلي بالك .. الأمريكان ميعرفوش هي السفن دي فيها إيه .. هم شايفينها جاية و خلاص .. الأمريكان كانوا عايزين يفرضوا حصار بحري حول كوبا و (خروشوف) مكنش عايز يتحط في موقف إن سفينة روسية تتفتش علي إيد التمريكان و يلاقوا فيها أسلحة .. هو أمر السفن اللي شايله سلاح من ضمن 14 سفينة اللي رايحين كوبا إنهم يرجعوا تاني علي روسيا .. بقية السفن اللي شايلة أكل و شرب و بنزين خلاها تكمل طريقها عادي .. هو عايز الأمريكان يفتشوا السفن دي و عايز يشوف وشهم و هم مكسوفين من نفسهم لما يلاقوا السفن مفيهاش سلاح.

بس خلي بالك .. كان المفروض إن الحصار البحري الأميريكي لكوبا يبدأ يوم 23 أكتوبر بس (كينيدي) إضطر يأجل الحصار ده يوم عشان يخلي وزارة الخارجية بتاعته تقنع أكبر عدد ممكن من الدول إنها تقف في صف أميركا .. اليوم ده هو اللي (خروشوف) مسك فيه بإيديه و سنانه .. هو أمر السفينة اللي شايلة الرؤوس النووية لصواريخه في كوبا إنها تدوس بنزين و تسابق الزمن عشان توصل لسواحل كوبا قبل ما الحصار البحري يبدأ .. السفينة وصلت كوبا في أخر لحظة و نزلت حمولتها  .. (خروشوف) جاب جون في (كينيدي) في الدقيقة تسعين .. الصواريخ السوفيتية في كوبا بقت بتعض .. كل ده و الأمريكان مش داريين بحاجة .. الأمريكان ملقطوش السفينة دي و هي بتنزل حمولتها في كوبا .. الغواصات السوفيتية بقت بتحوم حول كوبا بره دايرة الحصار البحري الأميريكي جاهزين يضربوا الأسطول الأميريكي في حالة إن الحرب قامت .. هنا انت محتاج تفهم الأمريكان و الكوبيين إستعدوا إزاي للمواجهة اللي هم بقوا شايفينها جاية جاية:

• الأمريكان عشان يستعدوا للمصيبة دي عملوا كذا حاجة .. أول حاجة رفعوا حالة التأهب لقواتهم المسلحة للمرحلة ديفكون 3 و دي معناها إن بمجرد ما (كينيدي) يدي الأمر فالقاذفات الأميريكية و الصواريخ العابرة للقارات تقدر تضرب الإتحاد السوفيتي خلال 15 دقيقة .. حصلت تعبئة ل120,000 مقاتل و 600 طيارة في ولاية فلوريدا اللي هي أقرب جزء من أميركا لكوبا و القوات دي هي اللي حتبقي مسئولة عن الغزو البري .. بداية من يوم 23 أكتوبر الساعة خمسة العصر و الطيارات المقاتلة الأميريكيه بقت بتطير علي إرتفاعات واطية فوق كل حتة من كوبا .. الطيارات دي كان هدفها إنها مش بس تصور المنشأت العسكرية السوفيتية في كوبا إلا إنها كمان تخوف القوات الكوبية علي الأرض .. تخلي العساكر دايماً تسأل نفسها هي دي طيارات إستطلاع ولا طيارات قصف؟ .. يا تري حيضربونا ولا بيخوفونا و يمشوا؟ .. العامل النفسي كان مهم إن طلعات الطيران دي تهز الروح المعنوية للكوبيين.
• (كاسترو) أعلن التعبئة العامة للقوات المسلحة و ده خلي تحت إيده 300,000 مقاتل .. هو كلف أخوه (راؤول كاسترو Raul Castro) إنه ينشر قوات المدفعية بتاعته داير ما يدور حول قاعدة جوانتانامو .. و في حالة إن الغزو الـميريكي بدأ فمسئولية (تشي جيفارا) إنه يستعد لحرب إستنزاف.

المرحلة الرابعة .. القوات البحرية بتسأل الرئيس يطلع إيه الحصار البحري ده يا سي دوني؟

بعد ما (كينيدي) أخيراً مضي علي قرار فرض الحصار البحري علي كوبا الساعة 7 مساء يوم 23 أكتوبر فبالمرة كده سأل قائد القوات البحرية هو أنتوا ناويين بقي تفرضوا الحصار البحري ده علي كوبا إزاي؟ .. رد قائد القوات البحرية إن و الله هو شخصياً مش عارف يعني الحصار البحري ده حيتطبق إزاي بس لحد دلوقتي رجالته حيوقفوا أي سفينة عايزة تخش كوبا .. لو السفينة رفضت تقف فأقرب مدمرة ليها حتضرب نيران المدافع بتاعتها في الهواء كتحذير .. لو السفينة برده رفضت تقف فالمدمرة حتضرب نيران المدفعية بتاعتها علي أوضة المحركات بتاعة السفينة و حتبعت عناصر صاعقة بحرية بلانشات سريعة عشان يسيطروا علي السفينة .. (كينيدي) وشه بقي أصفر من الرعب بس قائد القوات البحريه تخيل إنه كده مبسوط بالكلام فقرر يسوق فيها .. لو القوات بتاعته لقطت غواصة سوفيتية فهم حيضربوها بحاجة إسمها قنابل الأعماق أو Practice Depth Charges و دي عباره عن براميل متعبية متفجرات و بتترمي في المياه و بتنفجر .. الإنفجارات دي بتبقي مدمرة لجسم الغواصة و بتجبر الطاقم بتاعها إنهم يطفوا علي السطح .. لو برميل منهم فرقع قريب زيادة عن اللزوم من جسم الغواصة فهي ممكن تتخرم.

أخيراً (كينيدي) إنفجر في وش قائد القوات البحرية بتاعته .. هو انت رايح تتعارك و خلاص .. مفيش ضرب نار علي السفن اللي شايلة العلم السوفيتي .. ده معناه إعلان حرب و انا و الكتب السماوية كلها  ما عايز أحارب .. (كينيدي) كلف وزير دفاعه (روبيرت ماكنمارا) إنه يفضل قاعد في أوضة عمليات القوات البحرية .. لو شافهم عايزين يضربوا نار إمنعهم .. الناس دي مجانين و ممكن تلبسنا في الحيط .. السؤال اللي كان فعلاً محير (كينيدي) هي السفن السوفيتية حتقبل تتفتش؟ .. هو طبعاً مكنش عارف إن (خروشوف) خلي سفنه اللي شايله أكل و شرب و بنزين بس اللي تكمل طريقها لكوبا و كان قاصد إنها تتفتش عشان الأمريكان يتفضحوا قدام الناس .. و طبعاً (كينيدي) مكنش يعرف إن خلاص السفينة اللي حتوصل الرؤوس النووية لكوبا وصلت خلاص ..  عشان نقطة هل السفن السوفيتية دي حترضي تتفتش ولا لا بالذات ممكن تبقي الشرارة اللي تولع الحرب العالمية الثالثة ف(كينيدي) كان محتاج يفهم هم السوفييت ناويين علي إيه؟

يوم 23 أكتوبر بالليل أخوه (روبيرت) راح زار في السر السفارة السوفيتية في واشنطن و قابل السفير و سأله سؤال واحد .. هو أنتوا بالصلاة علي النبي لما السفن بتاعتكوا توصل لمنطقة الحصار البحري حول كوبا حتقفوا عشان تتفتشوا ولا حتطنشونا ولا كأنكوا شايفين حاجة؟ .. السفير عشان لا كان عارف حاجة عن إن الرؤوس النووية وصلت خلاص كوبا ولا كان عنده أي معلومات من (خروشوف)  ولا كان عارف أي حاجة خالص فهو قرر يهبد .. أومال حيقول ل(روبيرت) إنه مش عارف؟ .. عمرك شفت سفير يقول إنه مش عارف؟ .. السفير قال ل(روبيرت) إن السفن بتاعتنا مش حتقف و مش حتتفتش و أي محاولة منكوا إنكوا تفتشوها حتعتبر إعلان حرب ضد الإتحاد السوفيتي.

المرحلة الخامسة .. (خروشوف) قال للأمريكان و الله كبرتوا الموضوع يا رجال.

يوم 24 أكتوبر الساعة 5:15 (خروشوف) إجتمع بالبريزيديوم و كان خلاص قرر من جواه إن مينفعش بأي حال من الأحوال تقوم حرب بين أميركا و بلده و في نفس الوقت هو محتاج يطلع منظره قدام الناس إنه كسبان و إن الأمريكان معلموش عليه .. في الإجتماع هو عرض عليهم إنه حيبعت ل(كينيدي) Offer بيقول إنه حيشيل الصواريخ بتاعته من كوبا قصاد إن أميركا تطلع تقول إنها مش حتغزو كوبا تاني خالص أبداً .. (خروشوف) لسبب ما محدش فاهمه الحقيقة قرر إنه يكتب الOffer ده مش في ورقة واحدة لا ده تقريباً كتب رسالة ماجستير و كمان كتبها بالروسي .. رسالة طويلة أوفر عن إزاي الكرامة السوفيتية أهم من أي حاجة و إن الثورة الشيوعية مش حتسمح للرأسمالية العالمية إنها تطفيها و إن التوسعية من التوسع و الإمبرالية من الأمبرة .. الرسالة دي إتبعتت للسفارة الأميريكية في موسكو  صباح يوم 25 أكتوبر و يا عيني مسئولين السفارة إحتاجوا يوم كامل عشان يترجموها و بعد كده تتبعت لواشنطن .. أطول 24 ساعة في تاريخ البني أدمين .. 24 ساعة حصلت فيهم كمية تطورات كانت في أي لحظة ممكن تقلب لحرب عالمية ثالثة و إحنا مستنيين جواب الزعيم (خروشوف) يترجم:

• الساعه 5 عصر يوم 25 أكتوبر حصلت خناقة مشهورة أوي في مجلس الأمن التابع للأمم المتحدة بين سفيري الإتحاد السوفيتي و أميركا .. في الخناقة دي سفير روسيا في مجلس الأمن فضل يحلف بأيمانات المسلمين إن بلده ملهاش دعوة و إن كلام أميركا إن السوفييت نشروا صواريخ نووية في كوبا ده كذب و إفتراء .. سفير أميركا سأل السفير السوفيتي هل انت قدام التليفيزيون و قدام الناس بتنكر قدامي إن بلدك حطت صواريخ نووية في كوبا؟ .. جاوب باه أو لا و أرجوك متستناش الترجمة انا عارف إنك فاهمني كويس .. السفير السوفيتي رد عليه إنه مش في محكمة أميريكية عشان يتكلم معاه بالأسلوب ده .. انا حستني رد حكومتي علي سؤالك .. سفير أميركا قاله طب و انت مستني خليني أفجائك .. السفير الأميريكي عرض علي الناس كلها صور طيارات الإستطلاع U-2 بأماكن بطاريات الصواريخ السوفيتية في كوبا.
• الساعة 7:26 صباح يوم 26 أكتوبر القوات البحرية الأميريكية بتفتش أول سفينة رايحة كوبا .. الأمريكان لعبوها صح الحقيقة .. هم نقوا سفينة عليها العلم اللبناني و الطاقم بتاعها يوناني اللي هو أكيد يعني مش شايلة سلاح بس الرسالة وصلت .. مفيش سفينة رايحة كوبا مش حتتفتش.
• الساعة 12 ظهر يوم 26 أكتوبر CIA بتسلم (كينيدي) تقرير زي الزفت .. طيارات القوات البحرية اللي قلتلك عمالة تطير علي إرتفاع منخفض فوق كل حتة من كوبا صورت بطارية صواريخ كروز سوفيتية شايلة رؤوس نووية .. ده معناه إن لو حصل و الأسطول الأميريكي اللي بيحاصر كوبا بدأ يضرب نار فالأسطول ده حيتضرب بصاروخ نووي.
• مساء يوم 26 أكتوبر (كاسترو) بعت جواب للأمم المتحدة بيحذر فيها إن لو الطيارات الأميريكية اللي عماله تطير فوق بلده دي موقفتش فهو حيكلف الدفاع الجوي بتاعه إنه يوقعها .. الطيارات دي تعتبر إنتهاك لسيادة بلده.

أخيراً صباح يوم 27 أكتوبر (كينيدي) بيستلم جواب (خروشوف) .. لسه حيقول هييييييه الحرب حتخلص خد علي قفاه علي طول .. فيه 4 حاجات حصلوا في اليوم الأسود ده .. ال4 حاجات حصلوا كلهم و (كينيدي) بيقرأ الOffer بتاع (خروشوف) .. اليوم ده مشهور جداً باسم السبت الأسود Black Saturday لإن الاربع حاجات اللي ححكي عنهم دلوقتي كان كل واحدة فيهم كافي جداً إن الحرب العالمية الثالثة تقوم بس ستر ربنا بس هو اللي نجدنا:

الحاجة الأولانية .. الساعة 12 صباح اليوم ده كانت فيه طيارة إستطلاع U-2 أميريكية طايرة فوق القطب الشمالي .. اللي حصل إن قبلها بيوم السوفييت فجروا قنبلة نووية تجريبية .. الحقيقة إن معاد التجربة دي كان متحدد قبل ما الأزمة دي تحصل و مكنش ينفع تتلغي .. المهم إن الأمريكان بعتوا طيارة دي عشان تاخد شوية قرايات يفهموا منها هي القنبلة اللي السوفييت فرقعوها دي قد إيه .. طبعاً الإنفجار النووي بيولد EMP أو Electromagnetic Pulse بتوقف شغل كل دواير الكهربا و بالتالي أجهزة الملاحة بتاعة الطيارة كانت بايظة .. عادي بتحصل .. الطيار بيتعلم إزاي يبص للنجوم و منها يعرف إتجاه الشمال و يستغل ده إنه يطير و هو راجع .. شوف يا أخي النصيب الأسود أهو في اليوم ده بالذات حصلت حاجة إسمها Northern Lights اللي هي الأضواء الخضراء اللي بتشوفها قريب من القطب الشمالي دي و دي تقريباً خلت شكل السماء مفيهوش ولا نجمة توحد ربنا يعرف الطيار يستفيد بيها .. الطيار فعلياً بقي طاير و هو مش عارف هو رايح فين و جاي منين .. اللي الباشمهندس مكنش يعرفه إنه بدل ما يطير شمال هو طار يمين .. بدل ما يروح أميركا راح علي روسيا .. هو مكنش عارف عشان الرادار بتاعه كان عطلان إن مقاتلات سوفيتية كانت بتحوم حوليه زي الدبان ما بيحوم حول الأكل العريان .. أنظمة الدفاع الجوي السوفيتية كلها صفرت .. لما إتلقط كل منصات إطلاق الصواريخ الباليستية العابرة للقارات جالها إنذار بإنها تستعد للإطلاق في حالة إن الطيارة اللي إتلقطت دي كانت شايلة رأس نووي و ضربته .. الساعة 2:25 الصبح الطيارة رجعت تاني أميركا بسبب إن الراديو بتاعه إشتغل و ملاح تابع لسلاح الجو فضل معاه يوجهه يرجع أميركا إزاي .. بعد ما الطيار هبط و إتحكاله اللي حصل كانت حتجيله أزمة قلبية لما عرف إنه بالخطأ طار فوق الإتحاد السوفيتي و السوفييت إفتكروه حيضربهم بالنووي و هم إستعدوا إنهم يضربوا أميركا بالنووي .. ساعتين و نص و السوفييت علي أعصابهم جاهزين يتكوا علي زرار الإطلاق.

الحاجة الثانية .. الساعة 9 صباح اليوم ده راديو موسكو طلع بيان غريب أوي قالوا فيه إن (خروشوف) بعت Offer للأمريكان عشان الأزمة تتحل بس راديو موسكو قال إن (خروشوف) عايز قصاد إنه يشيل صواريخه من كوبا إن الأمريكان يشيلوا صواريخهم من تركيا مش إن أميركا تتعهد بس إنها مش حتغزو كوبا .. البيان ده  خلي الأمريكان مش فاهمين حاجة .. ليه يتبعت أوفرين؟ .. ليه صيغة الأوفرين مختلفة خالص عن بعض؟ .. هل معني كده إن ممكن يكون حصل إنقلاب علي (خروشوف)؟ طب لو إتعمل عليه إنقلاب هل نستعد للحرب؟ .. نضرب إحنا الأول قبل ما هم يضربونا؟ .. انت لا تتخيل كم الزن علي الودان اللي المؤسسة العسكرية الأميريكية كانت بتزنه فوق ودن (كينيدي) عشان يضرب هو الأول.

الحاجة الثالثة .. الساعة 11:16 صباح نفس اليوم ده برده بطارية دفاع جوي سوفيتية في كوبا لقطت طيارة إستطلاع U-2 طايرة في الجو .. تحذير (كاسترو) إنه حيوقع أي طيارة أميريكية تنتهك المجال الجوي لبلده غير حاجات كتير .. دلوقتي الضباط السوفييت بقي من حقهم يضربوا نار علي الطيارات الأمريكاني .. طاقم بطارية الدفاع الجوي السوفيتية حاولوا يتصلوا بالقيادة بتاعتهم بس يقال إن الجنرال المسئول عنهم كان نايم .. الضابط المسئول عن البطارية إتصرف من دماغه و ضرب صاروخ أرض- جو وقع الطيارة .. لما (خروشوف) عرف كان حيشد في شعره .. مين المتخلف اللي أمر بإن الطيارة تضرب؟ .. انا قلتلكوا دافعوا عن نفسكوا مش أنكوا تشوفوا طيارة مفيهاش صواريخ و مش مسلحة تقوموا توقعوها .. لما (كينيدي) جاله الخبر فعلياً مكنش عارف يتصرف إزاي؟

الحاجة الرابعة .. لمدة يومين المدمرات الأميريكية اللي بتحاصر كوبا كانت بتلعب لعبة قط و فار مع غواصة سوفيتية P59 لحد ما في اليوم ده الساعه 6:30 مساءاً واحدة من المدمرات السونار بتاعها لقط الغواصة .. لمده 30 دقيقة وهم بيضربوها بالقنابل اليدوية علي أمل إن الغواصة القبطان بتاعها يقرر يبعد أو علي الأقل يطفوا علي السطح .. لما قبطان المدمرة زهق من المطاردة قال لرجالته إضربوهم بقنابل الأعماق .. كان المفروض إن قيادة القوات البحرية السوفيتية بعتت للغواصات بتاعتها إن إحتمال الأمريكان يستخدموا ضدكوا قنابل الـعماق و حتي لو ده حصل فعادي هو مش إعلان حرب ولا حاجة .. بس لإن الغواصة P59 بقالها يومين بتغطس و بتهرب من المدمرات الأميريكية فالقبطان بتاعها مجاتلوش فرصة إنه يستلم أو يبعت أي رسايل لاسلكي بينه و بين القيادة بتاعته .. في الوقت ده كمان كتر المطاردة و الغطس الكتير بوظ نظام التكييف في الغواصة و البطاريات الكهرباء فضيت فأغلب اللمض إتطفت .. يومين من الحر و العرق و المطاردات و الظلمة .. طاقم الغواصة كان فعلاً علي أعصابه .. مع أول إنفجار لقنبلة أعماق فقبطان الغواصة تخيل إن خلاص كده الحرب قامت و أمر طاقم الغواصة بتاعته إنهم يجهزوا طوربيد برأس نووي .. لو الغواصة وقعت فحتاخد معاها الأسطول الأميريكي كله.

عشان بس متوهش .. قبل ما (كينيدي) يقرأ الOffer بتاع (خروشوف) كان عرف إن طيارته إخترقت المجال الجوي السوفيتي بالغلط بس السوفييت إفتكروا إن الأمريكان بيستفزوهم .. و هو بيقرأ الOffer جاله خبر إن راديو موسكو أعلن إن فيه Offer تاني غير اللي في إيده .. و هو بيتخانق مع اللي حوليه يعملوا إيه جاله خبر إن السوفييت وقعوله طيارة إستطلاع .. وسط كل الهم ده لمدة يومين كانت الغواصة السوفيتية P59 بتلعب لعبة قط و فار مع الأسطول الأميريكي.

الساعة 7:30 مساء اليوم الغريب ده (كينيدي) و رجالته كانوا خلاص إتفقوا هم حيعملوا إيه .. (روبيرت) اللي هو أخو (كينيدي) حيروح يقابل السفير السوفيتي في واشنطن و حيديله جواب رسمي بيقول إن في مقابل إن روسيا تسحب صواريخها من كوبا فأميركا بتتعهد إن عمرها ما حتفكر إنها تغزو كوبا تاني .. لكن .. (روبيرت) حيسلم السفير جواب تاني كمان بإن أميركا حتسحب صواريخها من تركيا خلال 5 شهور .. (روبيرت) كان لازم يبقي صريح مع السفير .. قيادة القوات المسلحة الأميريكية عايزة تنتقم لإسقاط الطيارة U-2 فوق كوبا و في نفس الوقت هم مش عايزين يعلنوا قدام الناس إننا حنسحب صواريخ قصاد صواريخ لإن ساعتها حنبان إننا بنضحي بأمن أوروبا في مقابل إننا نحمي نفسنا .. لكن .. لو السوفييت قبلوا دلوقتي Offer الرسمي اللي هو الصواريخ في مقابل عدم غزو كوبا ففي السر و من غير ما حد يعرف أميركا حتشيل صواريخها من تركيا .. لو الإعلام شم خبر الOffer حيتلغي .. السفير خد Offer بتاع (روبيرت) و جري علي التليفون يبلغ (خروشوف).

الساعة  9:52 مساء اليوم اللي مش عايز يخلص ده قبطان الغواصة P52 كان ماشي في إجراءات إطلاق الطوربيد النووي .. بناء علي لوايح القوات البحرية السوفيتية فلازم إطلاق الصواريخ النووية يمشي بناء علي قاعدة Three-Men Rule اللي هي إن لازم القبطان و الضابط السياسي علي الغواصة و الضابط التنفيذي يوافقوا هم الثلاثة علي الإطلاق .. القبطان و الضابط السياسي كانوا موافقين بس الضابط التنفيذي للغواصة (فاسيلي أرشيبوف Vasili Arkhipov) قدر يقنع قبطان الغواصة بإنه يطلع للسطح الأول يقول للقيادة باللاسلكي إنه حيضرب .. أخيراً القبطان بيوافق و بيطلع للسطح و بيبعت لقيادته يبلغهم إنه حيضرب و كان ناقص إنهم يطلعوله صوت من مناخيرهم لما عرفوا هو كان ناوي يهبب إيه .. فجر يوم 28 أكتوبر بيوصل Offer بتاع (كينيدي) ل(خروشوف) .. البريزيديوم بيوافق .. صباح يوم 28 أكتوبر لك أن تتخيل إن موكب مسلح ماشي في شوارع موسكو فيه حد من وزارة الخارجية عشان يوصل البيان الرسمي لمبني الإذاعة و التليفيزيون لمجرد إن المرور ميعطلوش .. هم كانوا خايفين إن حادثة ملهاش أي معني زي اللي حصل مع الغواصة P53 يكون هو بداية الحرب النووية .. البيان إتذاع .. الصواريخ حتتشال من كوبا .. الأزمة عدت.

تفتكر إحنا إستفدنا إيه من القصة دي؟ .. حقولك اللي انا إستفدته و انت إبقي قولي رأيك في الكومنتات .. اللي انا إستفدته إن إحنا كبني أدمين فعلياً يعني عايشين بالستر .. ستر ربنا بس هو اللي معيشنا .. عندك واحد زي (خروشوف) و واحد زي (كينيدي) .. كل واحد من دول متخيل إن تحت إيده مؤسسات عشان يعرف يحكم و إزاي يدير أزمة زي دي بس هم الإتنين ناسيين نقطة .. الحرب كانت حتقوم لمجرد إن طيار الرادار بتاعه كان عطلان و مكنش عارف إنه بيطير فوق أرض العدو بس ربنا ستر .. الحرب كانت حتقوم لولا إن ضابط تنفيذي علي غواصة نووية إترجي القبطان بتاعه إنه يطلع السطح يبلغ القيادة .. ده إسمه ستر ربنا .. متتخيلش إنك لو إتحطيت في منصب سلطة إنك خلاص كده بقيت بتتحكم في مصاير الناس .. لا خالص .. العالم ده بكل اللي فيه ممكن ينتهي كله في لحظة لولا ستر ربنا .. أزمة الصواريخ الكوبية دي مثال صغير لكوارث كتير من تاريخ البشر حصلت بسبب إن بني ادم سأل نفسه هو يجري حاجة لو عملت المصيبة دي؟ و النبي ما يجرا حاجة.

مفيش حد طلع من الأزمة دي زي الأول .. (كاسترو) بسبب إنه كان عصبي و عايز القيامة تقوم فبعد الأزمة ما خلصت السوفييت مبقوش يثقوا فيه زي الأول .. صحيح إنه طلع من الأزمة هو سي السيد بتاع كوبا بس علي مستوي السياسة الخارجية كوبا مرجعتش مهمة زي زمان .. (كينيدي) إتفق مع (خروشوف) علي إنهم حيمضوا مع بعض إتفاق وقف التجارب النووية و كمان إتفقوا مع بعض علي فكرة الخط الساخن .. عارف انت التليفون الأحمر اللي بيخلي الرئيسين الأميريكي و السوفيتي يتصلوا بعض في أي وقت .. أهي دي كانت فكرة الإتنين.

إغتيال (كينيدي) غير حاجات كتير أوي جوه مؤسسات الحكم .. الناس مكنتش عارفه إن أزمة الصواريخ الكوبية عدت علي خير لما (روبيرت) راح زار السفير الروسي و عرض عليه إتنين Offer واحد قصاد الناس و التاني في السر .. بعد وفاة (كينيدي) الناس تخيلت إن أميركا علمت علي الإتحاد السوفيتي مع إن ده مكنش حقيقي .. الناس تخيلت إن اللي يمشي علي الإتحاد السوفيتي يمشي علي أي دولة تانية .. زي فيتنام مثلاً .. سنة 1964 بعد إغتيال (كينيدي) برده البريزيديوم قلش (خروشوف) بحجة إنه كسف وش الإتحاد السوفيتي قصاد أميركا .. (روبيرت كينيدي) هو كمان أغتيل .. كل الناس اللي كانت بتحاول تطفي نار العداوة بين السوفييت و الأمريكان يا إتقتلوا يا إتقلشوا .. الحرب الباردة كملت 32 سنة كمان .. 32 سنة و العالم عمال يغني وداع يا دنيا وداع لحد ما أخيراً سنة 1989 العالم غني سلملنا بقي علي التروماي مع إنهيار سور برلين .. دي حكاية ممكن نحكيها في وقت تاني.

المصادر:
فيديو بعنوان Cuban Missile Crises-The Failed Checkmate-Extra History Part 1 نشرت علي YouTube وده لينك الفيديو:
//www.youtube.com/watch?v=xqJBibhR07w
فيديو بعنوان Cuban Missile Crises-Eyeball for Eyeball-Extra History Part 2  نشرت علي YouTube وده لينك الفيديو:
http://w.youtube.com/watch?v=QQT4Dt82Kz0
فيديو بعنوان Cuban Missile Crises-Black Saturday-Extra History Part 3 نشر علي YouTube وده لينك الفيديو:
https://www.youtube.com/watch?v=-Ox9wIZeZYg