لما الألمان صحيوا الصبح علي خبر إن (أدم فايزهاوبت Adam Weishaupt) أستاذ القانون في الجامعة بالنهار و بالليل يبقي الأب الروحي لتنظيم الإيلوموناتي أو المتنورين Illuminati اللي بتخطط لثورة تشقلب كيان إقليم بافارايا يا عيني جاتلهم صدمة نفسية .. اه معلش إنت أساساً الجملة دي غالباً كسرت حاجات كتير من المعلومات اللي إنت عارفها و مقتنع جداً بإنها صح معلش .. مبدأياً كده إنسي كل اللي إنت تعرفه من فيلم Angels & Demons المبني علي رواية بنفس الإسم كتبها (دان براون Dan Brown) .. إحنا فعلياً أغلب معلوماتنا عن الكيان ده اللي هو Illuminati أو المتنورين كلها غلط .. و لإن الموضوع معقد حبتين و تفاصيله كتير فتعالي نبدأ باليوم اللي الألمان صحيوا فيه علي خبر إن (أدم) ده هو مؤسس Illuminati.
قبل اليوم ده لو كنت سألت أي مواطن عايش في إقليم بافاريا في ألمانيا تعرف إيه عن (أدم فايزهاوبت) فحتلاقيه بيقولك ده شخصية مملة جداً؟ .. (أدم) من مواليد سنة 1748 في مدينة إسمها أنجلوشتادت Inglostadt .. أبوه و أمه كانوا يهود بس سابوا اليهودية و إعتنقوا المسيحية الكاثوليكية و الإتنين ماتوا و هو صغير و ده خلاه يتربي علي إيد عمه .. عمه ده كان بني أدم Nerd أو دحيح بكل ما تحمله الكلمة من معني .. هو مبقاش في حياته هدف غير إن إبن أخوه يتعلم كويس و بداية تعليمه إنه دخله مدرسة الجيزويت .. بعد المدرسة إتعين أستاذ القانون في جامعة أنجلوشتادت .. إتجوز و بقي عنده أطفال .. في نظر المجتمع ف(أدم) ده شخص طبيعي بشكل مستفز .. بس ده اللي قدام الناس .. من و هو صغير و (أدم) إتعلم كويس أوي إزاي يحتفظ بأفكاره لنفسه خصوصاً لو إنت عايش في مجتمع مقفول و باني قفلته دي علي التدين .. فيه ناس لسه مش مستوعبه فخليني أشرحلك أكتر .. وقتها بافاريا كانت تحت المذهب الكاثوليكي و كانت الحكومة هناك واخده الدين كسلاح في إيدها إنها تقمع صوت أي حد يعترض .. أي حد يقول إن لازم يبقي فيه برلمان حر يحاسب الحكومة فيتقال عليه كافر عشان يا يتعدم يا يتحبس و الناس بتصدق إنه كافر فعلاً لإن إزاي متصدقش قسيس الكنيسة .. فاكر لما قلتلك إن عم (أدم) ده كان Nerd كبير؟ .. (أدم) من و هو صغير و هو بياكل الكتب اللي مكتبه عمه .. كل الكتب بتاعة عصر النهضة .. كتب الفلسفة و الفيزياء و المنطق .. في الأخر (أدم) بقي مقتنع بحاجة و هي إن الدولة الحديثة اللي عايزه تبقي قوية مينفعش تستخدم الدين كسلاح في إيدها عشان تمشي الشعب زي ما هي عايزه و من هنا إتولدت فكرة Illuminati.
مهم تكون فاهم نقطة و هي إن الأفكار زيها زي الكيكة .. هي بتبدأ بشوية دقيق و بيض و زيت .. مقادير بسيطة مش معقدة بس لما بتتحط مع بعضها و الناس تبدأ تزود التاتش بتاعتها ففي الأخر بتطلع كيكة ملهاش أي علاقة بالأساس اللي هي إتبنت عليه .. فكرة Illuminate أو المتنورين كده بالضبط .. المقادير اللي الفكرة دي إتبنت عليها هي محاولة الإجابة عن أسئلة زي إزاي تحكم دولة أوروبية حديثة؟ .. إزاي الدين ده حاجة قوية جداً كده؟ .. هو مكنش ضد الدين قد ما كان ضد الإستخدام الغلط له .. هو كان شايف إن الدولة القوية لازم تقوم علي حاجتين .. حرية الرأي و المساواة .. الدولة القوية مفيهاش فكرة إني عشان إتولدت لأسرة فقيرة أو أبويا و أمي ناس علي قد حالهم فيبقي كده أنا عمري ما حوصل إني أحقق حلمي و أبقي حاجة كبيرة .. سعي (أدم) إنه يلاقي إجابة عن السؤال بتاع إزاي؟ إزاي ينفذ أفكاره دي؟ خلاه يفكر فعلياً إنه ليه لا ينضم لتنظيم سري زي الماسونيين الأحرار Freemasons و اللي كان بدأ ينتشر بشكل كبير أوي في أوروبا وقتها؟ .. بس بشوية تدوير و قراية (أدم) قال لنفسه هو يعني أنا ناقص إيد ولا رجل؟ طب ما أعمل أنا تنظيم سري شبه الماسونيين الأحرار و يبقي بتاعي.
يوم 1 مايو 1776 بيتعمل أول إجتماع لتنظيم Illuminati .. الإجتماع إتعمل في غابة من غابات أنجلوشتادت و حضره 5 بني أدمين و الإجتماع ده إتعمل عشان يتفقوا علي نقطة هي الأعضاء الجدد للتنظيم حيتم إختيارهم علي أي أساس؟ .. هو تحسه إجتماع إتحاد الطلبة في الكليات .. الناس إتفقت إن الأعضاء الجديد لازم الأول يكونوا عايزين ينضموا .. لازم يبقوا من عيلة كبيرة و مسنودين و يستحسن لو يكونوا أغنياء و حاجة كمان لازم يبقوا تحت 30 سنة و الحكمة في كده إن الناس الكبيرة في السن خلاص بتبقي مقتنعة بأفكار معينة المجتمع زرعها في مخهم و مش بيبقوا قابلين أوي التغيير .. تحس إن (أدم فايزهاوبت) بني فكرته علي إزاي يساوي بين الأغنياء و الفقراء في الفرص و المسئوليات بس لما جت ساعة الجد لقي نفسه مش عايز حد فقير ينضمله مش لسبب غير إن الفقراء ملهومش أي لازمة غير إن الحكومة تقنعهم إن الفقراء يدخلون الجنة فياريت ترضوا بفرقكوا .. ده يوريك إن (أدم فايزهاوبت) ده أساساً شخص منافق و يوريك إزاي أفكار المجتمعات السرية دي مجرد هجص و حكاوي مسلية مش أكتر بس ما علينا دلوقتي .. خلينا نكمل القصة.
شوية و التنظيم بقي متقسم درجات .. هم قسموه 3 مستويات بس في البداية .. المستوي الأول هو المبتدئين Novices .. المستوي الثاني هو الحكماء أو مينيرفال Minervals و دي كلمة متاخدة من إسم (منيرفا Minerva) إلهة الحكمة عند الرومان و ده إسم البروفيسورة الطيوبة أوي في سلسلة Harry Potter .. المستوي الثالث هم الحكماء المتنورين Illuminated Minervals .. كل يوم بيعدي و أعضاء التنظيم بيكبروا .. زي ما قلتلك في الأول هو كان يعتبر أقرب لنادي ثقافي عشان الناس الأغنياء المسنودة جامد في المجتمع اللي قال إيه ثقافتها ناقحة عليها و مخلياهم ضد النظام الحاكم اللي هم أساساً جزء منه .. خلال الفترة من 1776 لحد 1782 و عدد أفراد التنظيم وصل 600 من ضمنهم ناس تقيلة أوي في البلد زي البارون (أدولف فون نيجي Adolph von Knigge) .. لما جت سنة 1784 كان عدد أفراد التنظيم وصل ما بين 2,000-3,000 حتلاقي فيهم سياسيين و دكاتره و محامين و مهندسين و حتي كتاب مشاهير زي (يوهان ولفجانج فون جوته Johann Wolfgang von Goethe).
يمكن أهم بني أدم في Illuminate بعد (أدم فايزهاوبت) كان البارون (أدولف فون نيجي) .. الرجل ده كان واصل اوي و يمكن هو السبب إن أعداد أفراد التنظيم يزيد كده في وقت قليل .. أساساً هو كان من الماسونيين الأحرار و فضل معاهم سنين لحد ما سابهم و بمجرد ما إنضم لIlluminati فهو أقنع (أدم) بإن التنظيم ياخد شوية أفكار من الماسونية .. يعني مثلاً .. كل عضو من الناس القديمة في التنظيم لازم يبقي له إسم سري .. (أدم) كان إسمه (سبارتاكوس Spartacus) .. (أدولف) كان إسمه (فيلو Philo) .. مش بس ده الإضافة الوحيدة اللي Illuminati خدوها من الماسونية .. التدريج بتاع التنظيم بقي أعقد بكتير .. هم فضلوا 3 فئات كبيرة بس تحتيهم فئات أصغر بحيث بقوا 13 مرحلة بتبدأ بإنك تبقي مبتديء Initiate لحد ما تبقي يدينا و يديك طولة العمر ملك King .. بما إني فتحت السيرة خليني أكملها و أرصلك الفئات بتاعة Illuminati بعد ما إتعدلت عشان تبقي شبه الفئات بتاعة الماسونيين:
- الفئة الأولي و تقدر تسميها مجازاً المبتدئين و دول عبارة عن 4 مراحل .. اللي لسه خام Initiate .. المبتديء Novice .. الحكيم Minerval .. المتنور اللي لسه صغير Illuminatus Minor.
- الفئة الثانية و دي عبارة عن 5 مراحل .. التلميذ Apprentice .. التابع Fellow .. الأستاذ Master .. المتنور الكبير Iluminatus Major .. المتنور اللي يقدر يوجه غيره Illuminatus Dirigens.
- الفئة الثالثة و دي بتتكون من 4 مراحل .. القسيس Priest .. الأمير Prince .. الساحر Magus .. الملك King.
فيه مثل شعبي مشهور أوي بيقول حتي مصارين البطن بتتعارك .. هو المثل ده له حكمة تتعلمها بإن الخلاف في الرأي شيء حتمي .. أي مجموعة بني أدمين شغالين مع بعض في أي حتة لازم في مرحلة من المراحل حيختلفوا مع بعض .. السؤال دلوقتي هل الناس دي حتقعد مع بعضها و يتناقشوا لحد ما يوصلوا لحل وسط يرضي جميع الأطراف ولا حيمسكوا في خناق بعض؟ .. في حالة Illuminati يمكن عشان زي ما قلتلك (أدم فايزهاوبت) ده أساساً منافق فهو مبقاش عارف يمسك التنظيم .. شوية و خلاف كبير حصل بينه و بين البارون (أدولف فون نيجي) علي هو التنظيم ده معمول ليه أساساً؟ و بعد ما إن شاء الله نحدد هو معمول ليه محتاجين نحدد حنعمل ده إزاي؟ .. الإجابة علي السؤالين دول محدش كان عارفهم و عشان كده ناس كتير قررت تسيب التنظيم و تمشي من ضمنهم البارون (أدولف بون نيجي) شخصياً .. من ضمن الناس اللي مشيت من التنظيم كان واحد إسمه (جوزيف أوتزشنايدر Joseph Utzschneider) اللي يمكن لإنه كان بيكره (أدم) أو يمكن لإنه حس إن كرامته إتجرحت أو يمكن لإنه رجل غني إتولد في بقه معلقة دهب فياعيني مش متعود علي حكاية السمع و الطاعة دي فهو قرر يطربق المعبد علي دماغ الكل .. الرجل ده كتب جواب لدوقة بافاريا سنة 1784حكالها علي كل حاجة .. و طبعاً مش محتاج أوصيك علي شوية الملح و الفلفل و اللمون المعصفر اللي إتحطوا علي الطبخة عشان يدوها طعم.
في مجتمع لا صوت يعلوا فيه علي صوت الكنيسة فلما يتقال إن فيه ناس بتقول إن الإنتحار مش حرام و إن المُنتحر مش حيحروح جهنم فدي مصيبة سودا .. في مجتمع الناس بتصحي الصبح تروح تبوس إيد القساوسة عشان ينولوا بركة بابا الفاتيكان فلما يتقال إن فيه ناس شايفه التدين و مفهوم الدين عموماً هراء و هبد ملوش أي معني فده كفر بيّن .. لما في مجتمع الناس كلها متقدرش تقول للحاكم لا يطلع إن فيه تنظيم سري بيشجع علي إغتيال رؤوس الحكم بحجة إن الناس دي فاسدة و لا تستحق تحكم تبقي دي جريمة تأمر لقلب نظام الحكم .. كل ده كوم و إن يتقال إن Illuminati دي دول جواسيس زرعتهم النمسا في بافاريا عشان يبدأوا ثورة للإطاحة بنظام الحكم فده كوم تاني .. طبعاً مش كل الكلام اللي قاله (جوزيف أوتزشنايدر) في جوابه حقيقي بس مش دي القضية .. القضية إن الناس صدقت.
بمجرد ما الكلام اللي في الجواب وصل لدوق بافاريا من مراته فهو طلع قانون في يونيو 1784 بحظر إنشاء أي تنظيمات سرية .. يقال إن القانون مقالش صراحة إسم Illuminati لإن الدوق كان عارف إن التنظيم فيه ناس تقيلة في البلد .. الناس دي ممكن يكونوا ليهم أفكار معينة و أخرهم يعني إنهم يقعدوا مع بعض بليل يتكلموا و يتناقشوا زي أي شلة صحاب قاعدين علي قهوة بلدي بيشيشوا و بيسبوا و يلعنوا في سلسفين الحكومة بس ده مش معناه إن لو بكره الصبح قامت ثورة فالناس دي حتشارك فيها .. لكن لو الدوق قرر إنه يرمي أعضاء Illuminati في السجن فممكن الباقي يحس إن مفيش أمل غير الثورة فعلاً .. القانون ده كان مجرد كارت أصفر طلعه الدوق في وش Illuminati .. لموا الدور و إلا حيكون ليا تصرف تاني .. بعدها بسنة في مارس 1785 طلع قرار بحظر تنظيم Illuminati بالإسم.
الأدلة اللي البوليس لقاها كانت في نظر البافاريين وقتها زي ما إنت كده تسمع إن فيه تنظيم سري لنشر التشيع و الشذوذ الجنسي و الإلحاد و كل الموبقات اللي في الدنيا إتقبض عليه في شقة في شارع الهرم و سبحان الله يعني الشقة كانت فوق كباريه النجوم .. من ضمن الأدلة اللي لقوها ورق لأعضاء التنظيم بيدافعوا فيه عن شرعية الإنتحار و إزاي الإلحاد مش جريمة و خطة شاملة لإزاي يتعمل فرع حريمي من التنظيم و معاهم وصفات طبية للإجهاض .. من ضمن الورق برده شرح لإزاي أي حد جديد عايز ينضم لIlluminati بيعمل إيه؟ الباشمهندس اللي عايز يبقي عضو لازم يكتب تقرير يكتب فيه كل الكتب اللي عنده في البيت و يكتب أسامي الناس اللي بيعتبرهم أعداءه و كمان يكتب إيه هي الصفات اللي هو شايفها عيب في شخصيته .. لو المبتديء ده إتقبل و حب ينتقل للفئة الأعلي اللي هي الحكيم Minerval فهو لازم يتعهد بإن مفيش حاجة في حياته حتبقي أهم من التظيم .. الورق ده كله إتقدم كدليل إدانة بتهم التأمر لقلب نظام الحكم و نشر الإلحاد .. في أغسطس 1787 طلع قرار بتجريم الإنضمام لتنظيم Illuminati و عقوبة الإنضمام ليهم بقت الإعدام .. (أدم فايزهاوبت) إتشال من منصبه كأستاذ في جامعة أنجلوشتادت و إتطرد من بافاريا كلها و راح قعد في حتة إسمها ساكسوني و إشتغل أستاذ في جامعة جوتينجين.
دي كانت قصة Illuminati .. شوية ناس معاها فلوس عملوا زي أي صحاب قاعدين علي القهوة عمالين يشتكوا من الفساد اللي حوليهم بس لمجرد إنهم إختاروا يتقابلوا في مكان سري و يبقي ليهم أسامي سرية و قال إيه يعملوا درجات و ناس تنضم و ناس تترقي فيا عيني إحنا كبني أدمين بنعشق فكرة المجتمعات السرية فلبسنالهم كل الجرايم و المؤامرات اللي تتخيلها و متتخيلهاش .. عشان التنظيم إتقفش في 1787 و الثورة الفرنسية قامت سنة 1789 فلما طلعت إشاعة إن الIlluminati هم السبب في إن الثورة تقوم فمكنش فيه حد عارف يقول للناس يا جدعان دي صدفة .. حكومة بافاريا شافت إزاي الملكية الفرنسية وقعت من يوم و ليلة و مكنش عندهم أي مانع يلبسوا التهمة في Illuminati عشان الناس تخاف تثور ضدهم .. التهمة اللي إتوجهت لIlluminati إنهم شوية كفرة و صدقني لو قلتلك إنك لو عايش في بلد حكومتها فاسدة و مفيش حل غير إنك تعمل ثورة عليهم بس مجرد ثورتك حيخلي الحكومة تبص للناس و تقولهم شايفين الكافر بيعمل إيه فإنت لوحدك حتختار تحط جزمة في بقك .. لسبب ما إنت ممكن تستحمل يتقال عليك خاين بس مينفعش يتقال عليك كافر.
يا مؤمن دول حتي الناس دي إتلبسلها جريمة إغتيال الرئيس الأميريكي (جون كينيدي John Kennedy) .. طب تصدق بإيه إن فيه ناس مقتنعة بإن Illuminate هم السبب ورا فيروس كورونا Covid-19 و علي فكرة إنت لا تتخيل عدد الناس اللي مقتنعة بده .. بناء علي إستطلاع راي عملته مجلة Insider الأميريكية ف15% من الأمريكان مقتنعين بإن Illuminati لسه مكملين و هم اللي ورا مصايب كتير من اللي بتحصل في العالم .. عشان بس تكون مستوعب ده معناه إيه فعايزك تعرف إن في الإنتخابات الرئاسية الأميريكية بتاعة 2016 اللي كسبها (دونالد ترامب) عدد الأمريكان اللي راحوا إنتخبوا وصل 200 مليون بني أدم .. فلو إستطلاع الرأي بتاع Insider ده صح فمن 200 مليون دول حتلاقي 30 مليون بني أدم شايفين إن Illuminati لسه عايشين .. بس تفتكر ليه ناس كتير مقتنعة بده؟ .. تفتكر إزاي مواطن عادي بسيط إحتمال يكون متجوز و مخلف و إلي حد ما متعلم يكون مقتنع إن تنظيم سري إتعمل في القرن ال18 يكون هو المسئول عن إغتيال رئيس أميركا؟ .. الحقيقة إن الإجابة أغرب مما تتخيل.
صدق أو لا تصدق إن الإشاعة دي سببها رجل فاضي إسمه (روبيرت أنتون ويلسون Robert Anton Wilson) .. الرجل ده في الستينات كان شغال صحفي في مجلة Play Boy الإباحية اللي مبتعملش حاجة غير إنها تنشر صور ستات عريانة .. الرجل ده كان عنده فراغ عاطفي و مش لاقي حاجة يملا بيها وقته فقرر يبعت جوابات مزيفة من شخصيات هو مخترعها للمجلة اللي هو شغال فيها و الجوابات دي قال يعني كتبها ناس مقتنعين بإن فيه تنظيم سري قديم إسمه Illuminati هو اللي خطط و نفذ عملية إغتيال الرئيس (جون كينيدي) .. تفتكر يسكت علي كده .. الرجل كتب كتاب إسمه The Illuminate Trilogy يعتبر مرجع في الهبد التاريخي و الفتي الأدبي حط فيه قصص تستحق تتعمل سيناريوهات أفلام علي إنها حقايق مثبتة بتؤكد تورط تنظيم Illuminati ده في أي جريمة أو مذبحة أو مصيبة تخطر علي بالك و حط كمراجع لشغله الجوابات اللي هو مألفها و اللي فيها حكاوي لشخصيات من وحي خياله بتقول إن التنظيم حقيقي و شغال لحد دلوقتي .. الكتاب ده كسر الدنيا في وقت مكنش فيه إنترنت و كان صعب إن الناس تدور علي الحقيقة و تلاقي المعلومة الصح .. و حتي لما الإنترنت دخل حياتنا زي ما يكون ماسورة نظريات مؤامرة إتكسرت و غرقت الدنيا .. من أول إرتباط إسم Illuminati بالعين اللي بتشوف كل حاجة All Seeing Eye للماسونية لمجلس إدارة العالم .. و لو إنت مؤمن بالأراء دي فمبروك إنت مش لوحدك .. سنة 2013 موقع Public Policy Polling نشر إستطلاع رأي إن 28% من الأمريكان مقتنعين بإن فيه حاجة إسمها مجلس إدارة العالم.
يمكن المسلي أكتر من نظريات المؤامرة هو الشخصيات العامة في حياتنا دلوقتي اللي إرتبط أساميهم بIlluminati لسبب ما مش مفهوم الصراحة .. خد عندك مثلاً المغنية (بيونسي Beyonce) اللي لسبب ما فيه ناس مقتنعة بإنها عضوة في التظيم هي و جوزها مغني الراب (جاي زي Jay-Z) .. تسأل الناس دي إشمعني هي يعني؟ يقولك هو إنت مشفتش الحفلة بتاعتها بين شوطين ماتش نهائي بطولة كرة القدم الأميريكية سنة 2013 و إزاي الشاشة اللي وراها و هي بتغني إتعرض عليها رموز شيطانية .. طب دي (بيونسي) و إيه مشكلة جوزها كمان؟ .. يقولك أصله عامل شركة إنتاج أغاني إسمها Roc-A-Fella اللوجو بتاعها علي شكل هرم و ده رمز Illuminati اللي هو بالمنطق ده (تركي أل شيخ) مش بس من Illuminati ده إحتمال يبقي الزعيم بتاعهم أصله مسمي النادي بتاعه بيراميدز و اللي عمل شركة ستيلا بتاعة البيرة هو كمان Illuminati عشان شعار البيرة يبقي هرم و أي حد تسأله إنت ساكن فين يقولك في الهرم يبقي هو كمان Illuminati .. و مش بس (بيونسي) .. مغنية ثانية زي (ريانا Rihanna) فيه جرايد في أميركا مسمياها أميرة الإيلوموناتي Illuminati Princess.
شوف .. أنا عارف كويس إن فيه ناس لسه حتفضل مقتنعة بإن Illuminati دول لسه شغالين و إنهم ورا كتير من المصايب اللي بتحصل في الدنيا دلوقتي .. ده رأيك و إنت حر فيه .. اللي أنا عايزك تطلع بيه من المقالة دي إن أحيانا التاريخ بيبقي أبسط من إنك تربطه دايماً بوجود تنظيمات سرية و مؤامرات خفية .. أحيانا الرجاله بيبقي كل اللي هم عايزينه حرية إنهم يقعدوا علي القهوة يشيشوا و يشتموا في الحكومة براحتهم .. مجرد إنك تسحب منهم الحق ده و تقولهم إن المعترض حيترمي في السجن أديك شفت بيفرقع في وشنا كلنا إزاي.
المصادر:
- مقالة بعنوان Meet the man who started the Illuminati نشرت في مجلة National Geographic و ده لينك المقالة الأصلية:
https://www.nationalgeographic.com/history/magazine/2016/07-08/profile-adam-weishaupt-illuminati-secret-society/ - مقالة بعنوان Who are the Illuminati نشرت في مجلة The Week و ده لينك المقالة الأصلية:
https://www.theweek.co.uk/62399/what-is-the-illuminati-and-what-does-it-control
