لينك التسجيل الصوتي للمقالة علي Sound Cloud:
https://soundcloud.com/user-112011687-312727988/ocwg7zh0kyko
سنة 2002 للي منكوا كان كبير وقتها نزلت أغنية كسرت الدنيا اسمها أقوي من الأيام لواحد من أكتر المغنيين اللي عندهم إكتئاب في الدنيا اللي هو (مصطفي كامل) اللي دلوقتي بقي نقيب الموسيقيين .. الأغنية دي كانت بتشتغل في كل حتة .. تروح تشتري سندويتشات فول و فلافل تلاقيها شغالة .. تروح فرح يا مؤمن تلاقيها شغالة زي ما يكونوا قاصدين يحمسوا العريس عشان يرفع راس الرجاله في ليلة الدخلة .. مش عارف ليه لما عرفت خبر إن (إيكار كاسياس Iker Casillas) إعتزل فضل معلق في دماغي كوبليه معين من الأغنية الكئيبة دي اللي بيقول “القلب الضعيف إتعلم .. القلب اللي داب و إتألم .. القلب اللي ياما إتخان .. القلب اللي شاف أحزان .. تخلي الحجر يتكلم .. كتر الجراح قوتني .. ألام الزمان خلتني .. متعود علي الأوجاع .. أتجرح و أهون و أتباع .. أنا ياما السنين ورتني”.
الغريبة إن السبب اللي خلي (كاسياس) يعتزل هو إن جاتله أزمة قلبية زي ما يكون قلبه مستحملش أكتر من كده .. إنت ممكن تبص للكاريير بتاعة (كاسياس) من منظور يلا نكرم الموظف اللي إدي الشركة كتير و لازم نكرمه بإننا نقول للناس قد إيه هو كان ابن الشركة .. لو ناوي تعمل كده معنديش مشكلة .. إنت بتتكلم عن حارس مرمي بطّل كورة و هو عنده 39 سنة .. حارس مرمي بدأ حياته في ريال مدريد و هو عنده 18 سنة .. خلال السنين دي كلها كان هو كابتن منتخب إسبانيا و خد معاهم كأس عالم و بطولتين أمم أوروبا بعد ما لعب مع المنتخب 167 ماتش دولي .. خلال السنين دي كلها كسب 5 بطولات دوري إسباني و بطولتين كأس إسبانيا و 3 بطولات دوري أبطال أوروبا .. (كاسياس) من اللاعيبه القليلة اللي كسب كل البطولات اللي ممكن ياخدها .. هو أسطورة .. هو القديس .. بس أنا مش ناوي أقضي المقالة كله أرص في إنجازاته .. أنا النهاردة جاي عشان أساعدك تتعلم أهم درس من حياته .. مش مهم تقع كام مرة .. المهم إنك تقوم أكتر ما بتقع.
حياة (كاسياس) عايزين فعلياً النهاردة نقف عند الخوازيق اللي هو خدها فيها .. عايزين نشوف إزاي مش مهم إنك تتخزوق .. مش مهم إنك تقع .. المهم إنك تقوم تاني و تكمل طريقك .. الكاريير بتاعة (كاسياس) لما تيجي تبصلها حتلاقي حاجة غريبة جداً .. عادة حراس المرمي بيبدأوا الكاريير بتاعتهم و هم زي الزفت .. بيغلطوا كتير .. بيتوتروا كتير .. (كاسياس) مش كده .. (كاسياس) لما كان عنده 19 سنة كان حارس المرمي الأساسي لأكبر نادي في العالم .. لما بقي عنده 34 سنة يعني المفروض يبقي في قمة تألقه كانت دي أصعب فترة في حياته .. الرجل ده مختلف و عشان كده أنا عايز أقف شوية قدام محطات من حياته .. هي مش محطات قد ما هي مطبات عشان نتعلم سوا إزاي زي ما قلت إن مش مهم تقع كام مرة .. المهم إنك تقوم أكتر ما بتقع.
نهائي دوري أبطال أوروبا 2001-2002 .. جلاسكو .. أسكتلندا:
زي ما قلتلك الكاريير بتاعة (كاسياس) طلعت زي الصاروخ .. تخيل حضرتك إنك لسه شاب عندك 17 سنة و تلاقي نفسك الحارس الأساسي لريال مدريد في موسم 1999-2000 .. بعد أربع أيام من عيد ميلادك عشان يبقي عندك 18 سنة بتلاقي نفسك بتلعب نهائي دوري أبطال أوروبا و بتكسب البطولة من فالنسيا في النهائي .. بعدها بعشر أيام تلاقي نفسك بتلعب أول مانش دولي ليك مع منتخب إسبانيا .. بعدها بسنة بتكسب الدوري الإسباني مع ريال مدريد .. لما ريال مدريد طلّع مانشستر يونايتد من دور الثمانية من بطولة دوري أبطال أوروبا طلع السير (أليكس فيرجسون Alex Ferguson) بعد الماتش لما سألوه مين أكتر لاعيب لفت نظرك في ريال مدريد فهو مقالش لا (راؤول جونزاليس Raul Gonzales) ولا قال (رونالدو Ronaldo) .. هو قال إن أكتر لاعيب لفت نظره كان (كاسياس) و قال عليه إن صعب أوي يبقي عندك لاعيب عنده 18 سنة و بالهدوء و النضج ده .. كل ده و إنت لسه معندكش 20 سنة.
حاول للحظة تحط نفسك مكان (كاسياس) .. إنت عندك 20 سنة و إنت حارس المرمي لأكبر نادي في العالم .. لسه حتقول هييييييه لقيت واحد إسمه (فلورينتينو بيريز Florintino Perez) بقي رئيس النادي و قالك أنا عايز أعمل فرقة الجالاكتيكوس .. الفرقة اللي كان فيها (راؤول جونساليز) و (جوتي Guti) هوبا بتلاقي (لويس فيجو Luis Figo) جه .. شوية و جه (زين الدين زيدان) .. شوية بتلاقي نفسك فعلياً عيل في أوضة اللبس بتلعب مع الناس دي كلها .. شوية بشوية ثقتك في نفسك بتتهز .. فجأة بتلاقي أخطاءك كترت .. فجأة جمهور ريال مدريد اللي تحسه شرط عشان تبقي واحد منهم إنك تبقي جوزائي متقلب المزاج قلبوا عليك .. بعدما كانوا بيهتفوا باسمك بقيت كل ما تلمس الكورة الجمهور يصفر .. الجرايد بعد ما كانت بتعتبرك إبن النادي بقيت لسه صغير مش عيب يطلعوك إعارة عشان عضمك ينشف شوية .. بقي يتقال عليك إن جسمك مينفعش يبقي جسم حارس مرمي .. بقي يتقال إزاي حارس زي ده يلعب في فرقة الجالاكتيكوس .. وسط ضغط الجماهير و الصحافة و الإدارة و زود عليهم أخطاء (كاسياس) ف(حسن حسني) الكرة الإسبانية (فيسينتي ديل بوسكي Vicente del Bosque) المدير الفني لريال مدريد وقتها ملقاش حل غير إنه يقعد (كاسياس) علي الدكة أغلب موسم 2001-2002 و اللي بقي الحارس الأساسي كان (سيزار سانشيز Cesar Sanchez).
(سيزار سانشيز) اللي مكنش حد عارف عنه حاجة غير إنه كان حارس مرمي بلد الوليد من 1992 لحد 2000 و اللي كان قاعد دكة في ريال مدريد بقاله سنتين دلوقتي بقي بيلعب أساسي علي (كاسياس) .. اه يا زمن خليت الأعمي ساعاتي .. (سيزار) لعب أساسي في ماتش نهائي كأس إسبانيا و لعب أساسي في ربع النهائي و نص النهائي من دوري الأبطال قصاد بايرن ميونيخ و برشلونة .. قبل ماتش الفاينال بتاع البطولة (كاسياس) إتخانق مع مدرب حراس المرمي (مانويل إيميرو Manuel Amieiro) .. السؤال اللي كان حيجنن (كاسياس) إزاي (ديل بوسكي) يلعبه أساسي في نهائي 2000 و هو كان عنده 18 سنة و ميلعبش نهائي 2002 و هو عنده 20 سنة؟
في ماتش نهائي دوري أبطال أوروبا في الموسم ده ريال مدريد كان بيلاعب باير ليفركوزن الألماني في مدينة جلاسكو الأسكتلندية .. الناس كلها بتتفرج علي الماتش و حاسه إن ريال مدريد أكيد حيكسب يعني .. الدقيقة 8 بتيجي و (راؤول) بيجيب جون لريال مدريد .. بعدها بخمس دقايق مدافع باير ليفركوزن وقتها (لوسيو Lucio) بيجيب التعادل .. خلاص الحكم حيصفر نهاية الشوط الأول (زيدان) بيجيب جون من أحلي الأجوان اللي جت في تاريخ البطولة .. الشوط الثاني بيبدأ و قبل ما الماتش يخلص ب22 دقيقة (سيزار سانشيز) بيتصاب .. مكنش فيه حل غير إن (كاسياس) ينزل .. الواد بيعمل كذا صدة أسطورية في التلت ساعة اللي لعبهم عشان ينقذ فرقته .. منهم صدتين برجله من علي خط الجون من (ديميتار بيرباتوف Dimitar Berbatov) لحد دلوقتي ناس بتتكلم علي إزاي (كاسياس) عملهم .. فعلياً لولا (كاسياس) في الكام دقيقة اللي لعبهم كان باير ليفركوزن هو بطل أوروبا.
إفتتاح ماتشات إسبانيا في كأس العالم 2010 في جنوب أفريقيا .. ماتش إسبانيا و سويسرا:
فعلياً الكورة في إسبانيا متفرقش كتير عن الكورة في مصر .. عارف إنك مستغرب بس لو فكرت فيها حتلاقي أوجه الشبه بين الإتنين كتير أوي .. الإتنين فيهم ناديين بس هم اللي مسيطرين مش بس علي البطولات إنما الأهم علي الفلوس الموجودة في البيزنس بتاع كرة القدم .. ريال مدريد و برشلونة في إسبانيا و الأهلي و الزمالك في مصر تحس إن الSystem بتاع كرة القدم معمول مخصوص و متفصل عشان خاطر الإتنين يفضلوا هم اللي مسيطرين علي كل حاجة .. مش عيب خصوصاً إن بيراميدز بدأ يعكنن علي الكل .. العيب إن لما النظام ده يبدأ يأثر علي أداء المنتخب .. العيب إن منتخب إسبانيا يخش أي بطولة و هو مرشح إنه يعمل فيها شغل حلو و تلاقيه بيطلع من الدور الأول لمجرد إن الباشوات اللي بيلعبوا في ريال مدريد و برشلونة مش طايقين بعض.
سيبك من منتخب إسبانيا قبل سنة 2008 .. أنا بتكلم عن قبل كده .. في أول 10 بطولات كأس عالم يتعملوا إسبانيا متأهلتش غير 4 مرات بس .. و مش بس كأس العالم .. في أول 5 بطولات أمم أوروبا يتلعبوا إسبانيا متأهلتش غير مرة يتيمة و المرة دي كانت هي البلد المنظمة .. فيه منكوا كتير مكانش واعي أوي علي الكورة وقت ما بتكلم بس في التسعينات و أوائل الألفينات كانت فيه نكتة بتتقال علي المنتخب الإسباني إنه قبل أي بطولة بيكون هو المرشح يبقي الحصان الأسود و مجرد ما البطولة تبدأ بتحس إن اللي بيلعب ده مركز شباب المزاريطة مش المنتخب اللي بيلعب فيه أهم لاعيبه العالم .. المنتخب اللي لعب فيه (ألفريدو دي ستيفانو Alfredo Di Stefano) و (بيب جوارديولا Pep Guardiola) و (لويس إنريكي Luis Enrique) و (فيرناندو هييرو Fernando Hiero) و (راؤل جونزاليس) تحسه بيقلب علي منتخب فيه (جوني) و (فزاع) و (هجرس) .. ده بدأ يتغير مع سنة 1999.
في السنة دي إتلعبت بطولة كأس العالم للناشئين في نيجيريا و اللي خدتها إسبانيا بس في البطولة دي إتزرعت بذرة الصحوبية بين أهم شخصيتين في تاريخ الكرة الإسبانية و مش ببالغ علي فكرة في الكلام ده .. بتكلم عن (كاسياس) و (تشافي Xavi) .. الإتنين دول واحد كان بيلعب في ريال مدريد و الثاني في برشلونة بدأوا يشكلوا ملامح منتخب إسباني مش بيفكر أوي في قد إيه جماهير برشلونة و ريال مدريد بيكرهوا بعض قد ما بيفكروا في هي الناس حتفتكرنا إزاي لما نبطل كورة؟ .. واحدة واحدة جيل شاب بدأ يطلع .. لما (جوارديولا) إعتزل اللعب الدولي سنة 2001 حل محله (تشافي) اللي كان لسه عنده 21 سنة .. لما (هييرو) و (لويس إنريكي) إعتزلوا اللعب الدولي سنة 2002 اللي جه وراهم كان (كارلوس بويول Carles Puyol) اللي وقتها كان عنده 24 سنة و (تشابي ألونسو Xabi Alonso) اللي كان عنده 22 سنة .. لما (راؤول) بطل يلعب لمنتخب إسبانيا في 2006 كان في ديله (فيرناندو توريس Fernando Torres) و (ديفيد فيا David Villa) .. جيل شاب يمكن متقدرش تقول إنه أحرف من الجيل اللي قبله بس الفرق إن كان المسمار اللي ماسك المنتخب ده في بعضه هي الصحوبية بين (كاسياس) و (تشافي).
حرجع تاني و أقولك إن جيل منتخب إسبانيا الشاب ده مكنش عبقري أوي في بدايته .. المنتخب ده خرج من دور المجموعات في بطولة أمم أوروبا 2004 و خرج من دور ال16 في كأس العالم 2006 .. بس الجيل ده وري للإسبان قبل أي حد تاني إنهم يقدروا يعملوا إيه لما كسبوا بطولة أمم أوروبا 2008 وقت ما كان ماسكهم العجوز (لويس أراجونيس Luis Aragones) و اللي كان يمكن أهم قرار خده قبل البطولة إنه يعين (كاسياس) كابتن المنتخب .. جري الشريط لكأس العالم 2010 و الإسبان نفسهم مكنش عندهم بجنيه ثقة في منتخبهم .. زي ما قلتلك عقلية الخناقة بين ريال مدريد و برشلونة مأثرة عليهم لدرجة إن محدش فيهم مقتنع إن ممكن منتخب إسبانيا يعمل أي حاجة في حياته و حتي إنجاز أمم أوروبا 2008 ده كان صدفة .. الصحافة الإسبانية مسكت المنتخب غسيل و مكواة بعد هزيمتهم في ماتش الإفتتاح قصاد سويسرا لدرجة إن مانشيتات الجرايد الكاتالونية إتهمت (كاسياس) إنه هو السبب في أي مصيبة حصلت أو حتحصل للمنتخب بس اللاعيبه مكنش في دماغها ده .. أو يمكن عشان زي ما قلتلك جو الصحوبية بين اللاعيبه اللي عمله (كاسياس) و(تشافي) خلاهم يكملوا طريقهم لحد ما رفعوا الكأس .. و مين فينا ناسي صده الإنفراد بتاع (أريين روبين Arjen Robben) في الدقيقة 61 و اللي لولاها مكنتش إسبانيا كسبت البطولة.
ماتش فالنسيا في كأس إسبانيا في يناير 2013:
يدوبك لسه (كاسياس) مخلص كأس العالم في 2010 و راجع مدريد لقي (جوزيه مورينيو Jose Mourinhu) في وشه .. مشكلة الرجل ده إنه عامل زي الزبيب .. فيه ناس بتحبه أوي و فيه ناس لو لقته في الأكل بتتفه .. مفيش وسط .. لو تكلم الناس اللي بتشجع ريال مدريد حتلاقيهم يا نفسهم يرجع يمسك الفرقة يا حتلاقيهم بيسبوا و يلعنوا في سلسفين عيلته .. (مورينيو) من المديرين الفنيين اللي ماشي بمبدأ إدبح القطة للاعيبه من أول يوم .. الرجل بسم الله ما شاء الله متعود و إلهي يا رب ميقطعلوش عادة إن أي فرقة جديدة يمسكها لازم ينقي لاعيب يعتبره كبش فدا لكل مشاكل الفرقة و يفضل وراه لحد ما يمشيه .. اللاعيب اللي (مورينيو) من Day One كان حاطه في دماغه كان (كاسياس).
أول موقف كان في أول كلاسيكو ل(مورينيو) كمدير فني لريال مدريد و ده الماتش اللي خلص 5-0 لبرشلونة لو تفتكر .. اللي حصل بناء علي اللي حكاه حارس المرمي الإحتياطي وقتها لريال مدريد (جيرزي دوديك Jerzy Dudek) في كتابه إن في المؤتمر الصحفي اللي قبل الماتش (مورينيو) إتصدم لما لقي الصحفيين عارفين قبل ما الماتش ما يبدأ إن قلب الدفاع (بيبي Pepe) حيعلب إرتكاز .. (مورينيو) دخل أوضة اللبس و بقي مقتنع بإن فيه لاعيب بيسرب أخبار اللاعيبه للصحفيين .. (مورينيو) بص للاعيبه و ملقاش حد فيهم له علاقة بصحفيين غير (كاسياس) .. إشمعني يا عم (مورينيو)؟ .. أصل خطيبته (سارة كاربونيرو Sara Carbonero) صحفية .. الحق يتقال إن لسنة كاملة (مورينيو) مكنش بيقول لحد صراحة إنه شاكك في (كاسياس) لحد ما (سارة) كتبت تحقيق صحفي قالت فيه إن فيه زي ما تقول كده حرب أهلية جوه أوضة اللبس في ريال مدريد و ساعتها (مورينيو) بقي مقتنع بإن (كاسياس) هو الخاين اللي بيسرب أسرار الفرقة و راح إشتكاه لإدارة النادي.
الدنيا باظت أكتر في الموسم الثاني ل(مورينيو) في ريال مدريد .. إفتتاح موسم 2011-2012 كان زي ما الإسبان متعودين بإن بيتلعب ماتش السوبر اللي هو أساساً ماتشين رايح جاي .. المهم إن برشلونة كسبوا السوبر بنتيجة 5-4 بس الحقيقة إن الناس مش فاكره الماتشين قد ما هي فاكره الخناقة اللي دارت بين اللاعيبه بعد ما ماتش العودة خلص و فاكره لما (مورينيو) حط صباعه في عين (تيتو فيلانوفا Tito Villanova) الله يرحمه .. (كاسياس) بصفته مش بس كابتن ريال مدريد إنما كمان كابتن منتخب إسبانيا و فيه بطولة أمم أوروبا 2012 جايه فيوميها بليل إتصل بالتليفون ب(كارلوس بويول) و (تشافي) بصفتهم كابتن و نائب كابتن برشلونة عشان يهدي الأمور بين لاعيبه الفرقتين .. لما الخبر إتعرف (مورينيو) كان شايط .. (مورينيو) وجهة نظره إن الحل الوحيد عشان ريال مدريد ينهي هيمنة برشلونة إن لاعيبه ريال مدريد تتعامل علي إنهم في حالة حرب مع برشلونة .. (كاسياس) شايف إن المنتخب أهم .. (مورينيو) شاف إن (كاسياس) مش بس خاين .. لا ده كمان مش رجل بما يكفي إنه يعتمد عليه في الحرب اللي جايه.
نجاح ريال مدريد في الموسم ده مخلاش (مورينيو) يغير رأيه في (كاسياس) .. كون إن الفرقة كسبت الدوري بعد ما جابت 100 نقطة و دي كانت أول مرة تحصل في تاريخ الدوري الإسباني و إن الريال خد الدوري لأول مرة من 2008 مكنش كافي .. الموسم اللي وراه اللي هو 2012-2013 كان اللي العلاقة بين الإتنين جابت أخرها .. الجو العام في النادي كان زي الزفت .. (مورينيو) معيش الناس كلها في مود عم (أيوب) في مسرحية الجوكر لما كان عمال يزعق إيييييه كلكوا عليا ولا إيييييه .. في ديسمبر 2012 ريال مدريد كان لعب 16 ماتش كسب منهم 10 ماتشات و خسر 3 و إتعادل 3 .. ده كان معناه إن الفرقة معاها 33 نقطة و في المركز الثالث ورا برشلونة و أتليتكو مدريد .. الماتش ال17 كان ضد مالاجا علي أرضهم و كان ماتش صعب ولازم ريال مدريد يكسبه و إلا الفرق بينه و بين أتليتكو مدريد المتصدر حيبقي 10 نقط .. وسط كل ده (مورينيو) بيقرر و محدش عارف هو قرر كده ليه إنه يقعد (كاسياس) دكة و يلعب مكانه الحارس الإحتياطي (أنتونيو أدان Antonio Adan) .. مش قصدي حاجة وحشة بس (أدان) وقتها كان عنده 25 سنة و ملعبش في حياته إلا أربع ماتشات بس في الدوري تقوم ملعبه أساسي في ماتش صعب زي ده؟ .. ليه؟
ريال مدريد خسروا الماتش ده 3-2 و دي كانت الهزيمة الرابعة ليهم في الموسم .. خلي بالك إن الموسم اللي قبله اللي خدوا فيه الدوري مخسروش إلا ماتشين بس .. الماتش اللي وراه ضد ريال سويسداد برده (أدان) بيلعب أساسي .. خمس دقايق و (أدان) بيتطرد و (كاسياس) بينزل .. الماتش خلص 4-3 لريال مدريد و مع نهايته (كاسياس) رجع تاني بقي هو الحارس الأساسي و الدنيا هديت لحد ما جه يوم 23 يناير 2013 .. في اليوم ده إتلعب ماتش كأس إسبانيا ضد فالنسيا و (كاسياس) إيده إتكسرت في الماتش ده .. الإصابة خلت (كاسياس) ميلعبش شهرين كاملين و (مورينيو) طلب إن النادي يشتري الحارس (دييجو لوبيز Diego Lopez) في فترة إنتقالات يناير من نادي إشبيلية .. زي ما إنت شايف قدام الناس إحنا جبنا (دييجو) عشان (كاسياس) إتصاب بس الناس كلها كانت عارفه بما فيهم (كاسياس) نفسه إن (دييجو لوبيز) حارس مرمي محترم جداً و ده السبب إن حتي بعد ما (كاسياس) خف و بقي جاهز يلعب فضل برده قاعد علي الدكة.
صحيح (مورينيو) مشي أخر الموسم ده .. و صحيح إن جه وراه (كارلو أنشيلوتي Carlo Ancelotti) بس الوضع كان واضح زي الشمس للناس كلها .. دلوقتي (أنشيلوتي) معجب ب(دييجو لوبيز) و شايفه حارس كويس .. (فلورينتينو بيريز) عايز يخلص من كل المشاكل اللي كان عاملها (مورينيو) و ده كان معناه إن مش بس (مورينيو) يمشي إنما كمان أي لاعيب كان متخانق معاه لازم يمشي .. جميل .. ده معناه إن (أنشيلوتي) و (بيريز) الإتنين معندهمش مشكلة إن (كاسياس) يمشي بره النادي .. المشكلة إن مرتب (كاسياس) كبير .. المشكلة الأكبر إنه كابتن الفرقة و أهم لاعيب في الفرقة و كلمته بتتسمع جوه أوضة اللبس .. من ناحية (كاسياس) كأس العالم 2014 في البرازيل بيقرب و هو لازم يلعب أساسي عشان يتاخد في المنتخب.
(كاسياس) بيقرر يكمل في النادي و يحارب عشان يبقي هو الحارس الأساسي بس الحقيقة إن (أنشيلوتي) بيحلهاله .. (أنشيلوتي) قرر إن (دييجو لوبيز) حيلعب في ماتشات الدوري بس (كاسياس) حيلعب في ماتشات كأس إسبانيا و دوري الأبطال .. متنساش إن دوري الأبطال ده بالذات كان مهم أوي لريال مدريد لإنها كانت حتبقي البطولة العاشرة ليهم أو لاديسيما .. خلال الفترة من 27 نوفمبر 2013 لحد 26 فبراير 2014 (كاسياس) مدخلش فيه ولا جون طوال 952 دقيقة .. لما ريال مدريد وصلوا الفاينال بتاع بطولة دوري أبطال أوروبا كان إسم (كاسياس) بيتحفر في التاريخ علي إنه أول حارس مرمي يصعد برفقته للفاينال و ميدخلش فيه ولا جون في ولا ماتش من أول دور المجموعات لحد نص النهائي مع إنهم لعبوا قصاد عتاولة زي بروسيا دورتموند و بايرن ميونيخ .. الحظ بيضحك في وش (كاسياس) و ريال مدريد بيكسب برشلونة في نهائي كأس إسبانيا و بيكسب أتليتكو مدريد في نهائي دوري الأبطال .. (كاسياس) هو و (فيكتور فالديز Victor Valdez) حارسيي المرمي الوحيدين في تاريخ الكرة الإسبانية اللي في موسم واحد يكسبوا دوري الأبطال و كأس الملك .. لسه (كاسياس) حيقول هيييييييه لبس في المطب اللي وراه.
ماتش إسبانيا ضد هولندا في دور المجموعات من كأس العالم .. يونيو 2014:
فعلياً مفيش مصيبة بتيجي لوحدها .. المصايب زي ما يكون ليهم جروب واتس بيتفقوا مع بعض يتجمعوا إمتي و فين عشان يحلوا فوق دماغ البني أدم .. لما منتخب إسبانيا إتداس علي وشه من هولندا في ماتش دور المجموعات من كأس العالم 2014 في البرازيل ده كان فعلياً تجسيد لمقولة مفيش مصيبة بتيجي لوحدها .. مش بس إن (كاسياس) كان السبب في إن جونين من الخمسة اللي دخلوا فيه هو السبب فيهم إنما كمان قبل البطولة ما تبدأ و ناس كتير كانت بتقول إن بلاش (كاسياس) يبقي هو الحارس الأساسي للمنتخب .. وقتها كان فيه وحش إسمه (ديفيد دي خيا David de Gea) مكسر الدنيا مع مانشستر يونايتد .. وقتها بقي .. لسه الناس حتقول مش مشكلة ما في كأس العالم اللي فات إسبانيا خسرت أول ماتش ليها قصاد سويسرا فإحنا ممكن نعوض الماتش الجاي .. الماتش اللي بعده إسبانيا بتشيل 2-0 من تشيلي و (كاسياس) برده هو السبب في جون منهم.
لك أن تتخيل إن في كأس العالم 2010 إسبانيا لعبت 7 ماتشات مدخلش في (كاسياس) غير جونين بس و في كأس العالم 2014 في ماتشين دخل في (كاسياس) 7 جوان .. في الماتش الثالث قصاد أستراليا (كاسياس) قعد دكة و دي كانت نهاية المشوار الدولي ل(كاسياس) .. صحيح هو لعب ماتشات تصفيات بطولة أمم أوروبا 2016 بس (ديل بوسكي) إختار إن اللي يبقي أساسي في البطولة هو (دي خيا) و ده القرار اللي مش بس خلي (كاسياس) يعتزل دولياً إنما كمان ينهي علاقته الشخصية مع (ديل بوسكي).
و حتي بعد ما كأس العالم ما خلص لقي نفسه حيخش في مواجهة ما يعلم بيها إلا ربنا مش بس ضد (دييجو لوبيز) إنما ضد حارس جاحد تاني محدش كان يعرف عنه حاجة بس تألق مع منتخب كوستاريكا في كأس العالم إسمه (كيلور نافاس Kylor Navas) .. وقتها فعلياً مفيش حد في ريال مدريد مكنش عايز (كاسياس) يمشي .. الظروف بتساعده و (دييجو لوبيز) بيتباع لميلان الإيطالي .. مع بداية الموسم (أنشيلوتي) بيقرر يعتمد علي (كاسياس) عشان يبقي الحارس الأساسي .. هوبا (أنشيلوتي) بيمشي و بيجي مكانه (رافا بينيتيز Rafa Benitez) و ساعتها (فلورينتينو بيريز) بيقرر إن جه الوقت إن (كاسياس) يمشي .. تاني حاول تحط نفسك مكان (كاسياس) .. إنت عندك 34 سنة .. مشوك من المكان اللي إنت كنت بتعتبره بيتك من و إنت عندك 9 سنين .. الناس كلها حاسه إنك خلاص راحت عليك .. يُقال إنه كان بيفكر جدياً إنه يعتزل بس هو عايز يلعب .. بيقرر يروح بورتو في البرتغال .. صحيح دوري أضعف بكتير من الدوري الإسباني .. صحيح برده حياخد مرتب أقل بكتير من اللي كان بياخده في ريال مدريد بس مش مهم .. المهم إني حلعب .. 4 سنين في بورتو لحد ما أخيراً قلبه مقدرش يستحمل أكتر من كده و في مايو 2019 بنصحي علي خبر إن جاتله أزمة قلبية.
الحظ له دور في حياة أي بني أدم .. الحظ أخره معاك إنه يفتحلك باب وقت ما حتكون فقدت الأمل إن الدنيا ممكن تضحكلك بس إنت لازم تبقي جاهز إنك تمسك في الفرصة بإيديك و سنانك .. كان ممكن (سيزار سانشيز) ميتصابش في النهائي و كان برده غالباً ريال مدريد حيكسب البطولة و ساعتها (كاسياس) حيفضل قاعد علي الدكة .. كان ممكن حاجات كتير أوي تتغير بس الكاريير بتاعة (كاسياس) زي ما قلتها و حفضل أقولها تعلمك إن الطبيعي إن الحياة تديك فوق دماغك .. اللي مش طبيعي إنك لما تتضرب متقومش.
المصادر:
- مقالة بعنوان Iker Casillas proves Rocky correct over 21-year career: Life is all about getting back up نشرت في موقع قناة ESPN و ده لينك المقالة الأصلية:
https://www.espn.com/soccer/blog-marcottis-musings/story/4153762/iker-casillas-proves-rocky-correct-over-21-year-career-life-is-all-about-getting-back-up - مقالة بعنوان The Iker Casillas story: Chapter One نشرت في موقع Between the Sticks و ده لينك المقالة الأصلية:
https://btsgoalies.com/2019/09/15/the-iker-casillas-story-chapter-one/ - مقالة بعنوان The Iker Casillas story: Chapter Two نشرت في موقع Between the Sticks و ده لينك المقالة الأصلية:
https://btsgoalies.com/2019/09/18/the-iker-casillas-story-chapter-two/ - مقالة بعنوان The Iker Casillas story: Chapter Four نشرت في موقع Between the Sticks و ده لينك المقالة الأصلية:
https://btsgoalies.com/2019/09/29/the-iker-casillas-story-chapter-four/
