أفلام الفنانة (نادية الجندي) بتاعة الجاسوسية اللي أٌنتجت في التسعينات مكنتش أفلام كويسة .. هي صحيح موضوعها كان الحرب بين المخابرات العامة المصرية و المخابرات الإسرائيلية اللي إنت عارفها باسم الموساد بس خلينا نكون صرحاء مع نفسينا الأفلام دي كمستوي متجيش حاجة جنب مسلسل (رأفت الهجان) .. بالعكس يعني أنا رأيي إن الأفلام بتاعة (نادية الجندي) دي أساءت لصورة المخابرات العامة أكثر ما زودت ليها .. ليه أنا بقول كده؟ .. لإنها وصلّت ليك الفكرة إن في عمليات المخابرات الطبيعي إنه يحصل و مقبول إنه يتعمل إن ضابط المخابرات يشتغل كأنه قواد لفتاة ليل .. ده علي فكرة مبيحصلش ولو حصل بيكون علي نطاق ضيق في ظروف عملية محددة .. مش كل ما ضابط مخابرات يتحط قدام عملية أول حاجة يفكر فيها إنه يجيب (نادية الجندي) عشان تغري الجاسوس الإسرائيلي و تنام معاه .. الغريبة إن دلوقتي الأية إتعكست .. المخابرات الإسرائيلية بقت هي اللي بتتعامل علي إنها قواد بتاع بنات ليل بس يمكن الفرق إن البنات اللي عندهم أحلي بكتير من (نادية الجندي).
خد عندك (ناتاليا فادييف Natalia Fadeev) مثلاً .. الحق يتقال إنها بنت زي القمر و فيها شبه كبير في ملامحها من عارضة الأزياء الفلسطينية الأصل (جيجي حديد Gigi Hadid) .. دي بنت بتقول علي نفسها Influencer علي أساس إن دي بقت شغلانة اليومين دول و ليها أكونت علي تيك توك بيتابعها عليه أكثر من مليون Follower .. صورها كلها عبارة إن إنها واخدة وقفات Poses عشان تبين جمالها و مفاتنها .. لحد دلوقتي هي متفرقش كتير عن أي بنت عايزه تبقي موديل علي الإنترنت .. علي Instagram ليها أكونت إسمه @gunwaifu بتحط عليه صورها وهي لابسة زي عسكري وماسكة بنادق و مسدسات من اللي بيتلعب بيها لعبة Paint Ball .. هنا إنت بدأت تقول طب دي كده تبقي فتاة أحلامي .. بنت حلوة لا و كمان بتلعب Call of Duty دي ألاقيها فين دي .. جاهز تتصدم؟ .. (ناتاليا فادييف) هي جندية في قوات الإحتياط لجيش الدفاع الإسرائيلي اللي إختصارا بيتسمي IDF ودي تبقي Israeli Defense Force.
كونها مجندة إسرائيلية في حد ذاته مش مشكلة .. إسرائيل زيها زي مصر فيها التجنيد الإجباري بس يمكن الفرق إن في إسرائيل ولاد و بنات بيخشوا الجيش مش ولاد بس زي هنا في مصر .. كونها موديل أو Influencer و في نفس الوقت مجندة في جيش الدفاع الإسرائيلي مش القضية .. القضية إن كتير من بوستاتها سواء علي تيوك توك أو أنستجرام تعتبر بوستات دعائية للقوات المسلحة الإسرائيلية .. خليني برده أديلك مثال .. خلال حرب قطاع غزة الأخيرة هي نزلت فيديو علي تيك توك ليها وهي بترقص بس الكابشن اللي إتحط مع الفيديو هو و أنا بنقله نصاً .. “لما يحاولوا يدمروا بلدك بس إنت عندك واحد من أقوي الجيوش في العالم” .. لحد دلوقتي إنت ممكن تقول عادي يعني هي متعاطفة مع جيش بلدها .. جميل .. بس هي عضوة في فرقة إسمها Alpha Gun Girls .. تطلع إيه البتاعة دي؟ .. دي فرقة بنات كلهم موديلز و كلهم ضباط و مجندات حاليين و سابقين في جيش الدفاع الإسرائيلي بيتصوروا و بيعملوا Photo Sessions جنب أسلحة إسرائيلية كنوع من الدعاية لIDF.
السؤال دلوقتي هو ليه؟ .. إيه اللي يخلي جيش الدفاع الإسرائيلي يجيب بنات حلوة يبقوا موديلز للترويج ليه؟ .. هل مثلاً هم فاكرين نفسهم براند مكياج محتاجين موديلز؟ .. ليه فكر (نادية الجندي) ده سيطر علي دماغ المؤسسة العسكرية الإسرائيلية بالشكل ده؟ .. للإجابة علي هذا السؤال أنا لازم أرجعك لسنة 2008.
في السنة دي قامت برده حرب من الحروب الكتير اللي أنا شخصياً بقيت بتلخبط بينهم بين إسرائيل و حركة حماس .. المهم إن في السنة دي برده و بعد الحرب ما خلصت فيه واحدة ست إسمها (ريبيكا ستاين Rebecca Stein) شغالة أستاذة تطور علم الإنسان في جامعة دوك البريطانية كتبت كتاب فخيم الصراحة إسمه Screen Shot: State Violence on Camera in Israel and Palestine .. سبب إن الست (ريبيكا) كتبت الكتاب ده أصلاً هو إن لما الحرب قامت إسرائيل منعت التغطية الإعلامية الغربية للحرب .. لو إنت صحفي في CNN مثلاً فإنت ممنوع تخش قطاع غزة .. لكن .. لسبب ما جيش الدفاع الإسرائيلي عطي لنفسه الحق إنه ينشر علي YouTube فيديوهات للقصف الجوي اللي كان بيعمله فوق بيوت القطاع .. وقتها YouTube ده كان إختراع جديد و عشان كده جيش الدفاع الإسرائيلي كان عامل حاجة إسمها Social Media Unit شغلتها إنها تستغل مواقع سوشيال ميديا زي فيسبوك و يوتيوب عشان يروجوا للأفكار اللي جيش الدفاع الإسرائيلي عايز ينشرها وسط الناس خصوصاً في الغرب .. (ريبيكا) قعدت مع الناس اللي كانت ماسكة Social Media Unit دي و قالولها إن الفكر بتاع المؤسسة العسكرية الإسرائيلية إننا لازم نستغل سوشيال ميديا.
جري الشريط دلوقتي و بص علي الناس اللي قاعدة علي سوشيال ميديا و قولي إنت شايف إيه .. شايف شباب كتير مش بيحركه حاجة غير طاقته الجنسية .. شباب بيتنح قصاد صور البنات الحلوة العريانة .. شباب ما بيصدق يلاقي صورة ممثلة عريانة عشان يفرغ طاقته في الكومنتات .. خلي البنت من دول تلبس طاقية عسكرية و تشيل بندقية ألي و حتلاقي الشاب من دول بيصدق أي حاجة تطلع من بق البنت .. ليه؟ .. عشان هو مش مركز في كلامها هو مركز في جسمها .. ده ملخص إستراتيجية السوشيال ميديا بتاعة جيش الدفاع الإسرائيلي .. الأكونت بتاع جيش الدفاع الإسرائيلي علي تيك توك إتعمل في 2020 يعني مش جديد بس خلال الوقت ده قدر يجيب أكتر من 90,000 متابع ولو دخلت علي الفيديوهات بتاعتهم حتلاقي أغلبها زي ما قلتلك .. فيديوهات لبنات حلوة يا بتغني يا بترقص.
المصدر:
مقالة بعنوان Why Are Israeli Defense Forces Soldiers Posting Thirst Traps on TikTok? نشرت في مجلة Rolling Stone وده لينك المقالة الأصلية:
https://www.rollingstone.com/culture/culture-features/israel-defense-force-idf-tiktok-thirst-trap-1174211/
