أنا فاكر كويس بحكم إني من مواليد إسكندرية فكان جزء مهم من تعليمنا في الإبتدائي إن المدرسة تنظم رحلة للمتحف الروماني اللي عندنا هنا .. الزيارة دي كانت طلبة كتير بتستناها وفاكر إننا إنبهرنا بالأثار اللي موجودة جوه .. أنا شخصياً فاكر إني بلمت قدام تمثال عجل أبيس .. شوية وكبرنا ورحنا الأهرامات .. شوية وفيه ناس (أنا لسه مش منهم) راحت زارت الأقصر وأسوان .. كلنا إنبهرنا وبلمنا وإتحسرنا علي مجد أجدادنا المصريين القدماء .. بس في نفس الوقت لما كبرنا وإشتغلنا خصوصاً المهندسين مننا بقينا عارفين إن الورق أهم من المبني .. المبني تعدي عليه شيك ولطيف وشكله حلو من بره .. بس الورق بتاع التصميمات ومستخلصات المقاولين وتقارير مراجعة الإستشاريين هي اللي فيها كل صغيرة وكبيرة عن المبني .. ده ينطبق علي الهندسة وينطبق كمان علي علم الأثار.
إن حضرتك تتخرج من كلية تربية قسم أثار وتبقي ضمن فريق إكتشف معبد جديد أو مقبرة جديدة ده حمادة .. وإنك تكتشف الورق بتاع الطريقة اللي الدولة كانت بُتدار بيها ده حمادة تاني خالص .. رغم إنك بتتكلم عن شوية ورق إلا إن اللي إنت بتتعلمه منهم بيوريك اللي بيحصل ورا الكواليس .. مين اللي كان بيدي أمر الإسناد المباشر للمشروع؟ .. مين كان بينفذه؟ .. مين كان بيستلم؟ .. مين كان أساساً بيقول إن إحنا محتاجين نعمل المشروع الفلاني؟ .. إنت متخيل أهمية إننا نلاقي إجابة أسئلة إنت بتلاقيها كل يوم في شغلك بس إحنا بنتكلم عن مصر القديمة .. طب ده عن المشاريع الداخلية .. مين كانوا حلفاء مصر؟ .. مين اللي كان الفرعون بيعتبره عدو؟ ومين كان بيعتبره صديق؟ .. ومين كان بيعتبره ملك زيه؟ .. متنساش إن المصريين القدماء كانوا بيألهوا حكامهم فإزاي حاكم هو في نظر شعبه إله بيتعامل مع حاكم بلد تانية؟ .. دي أسئلة معابد ومقابر الدنيا متقدرش تجاوبلك عليها .. الورق هو اللي يقدر يوريك إجابة الأسئلة دي كلها.
موضوعنا النهاردة هو حاجة إسمها رسائل تل العمارنة أو Amarna Letters ودول عبارة عن 382 لوح من الطمي مكتوب عليهم زتونة اللي كان بيحصل في المطبخ واللي إنت تقدر تسميهم الوثائق الرسمية للحكومة والنهاردة دوري إني أحاول أجاوب عن شوية أسئلة:
- تطلع إيه بالضبط رسايل تل العمارنة دي؟
- أزاي الرسايل دي أٌكتشفت؟
- إيه اللي رسايل تل العمارنة قالته عن السياسة الخارجية للفراعنة؟
خلينا نبدأ بالسؤال الأولاني .. إيه هي رسايل تل العمارنة؟
زي ما قلتلك دي رسايل إتكتبت علي ألواح من الطمي وبناء عليه أنت تقدر تعتبرها زي الوثائق الرسمية بتاعة أي حكومة بس يمكن الفرق إن الرسايل دي إتكتبت في القرن ال14 قبل الميلاد .. الميزة في الرسايل دي إنك تقدر تصنفها لنصين .. النص الأول هو الرسايل بين فرعون مصر وحكام الدول اللي زي مصر أو الدول العظمي في العالم وقتها زي البابليين والأشوريين والحيثيين والميتانيين .. النص الثاني هي الرسايل بين فرعون مصر والدول اللي تقدر تقول إنها تحت سيطرته .. زي ما إنت شايف دراستك للرسايل دي بتوريك طريقتين مختلفتين خالص للحوار بين مصر وجيرانها .. الطريقة الأولانية هو الحوار بين الملوك أو الألهة لإن أرجع وأقولك المصريين القدماء زيهم زي حضارات تانية قديمة كانت بتؤله الحاكم .. الطريقة الثانية هي إزاي فرعون مصر بيتعامل مع الحكام اللي بتطبله.
المميز كمان في الرسايل دي إنها إتكتبت في عهد إتنين من أهم الشخصيات اللي حكمت مصر القديمة .. (أمنحتب الثالث) اللي يعتبر فعلياً (محمد علي باشا الكبير) بتاع الفراعنة وإبنه (إخناتون) اللي بسبب ثورته الدينية دخلت مصر في واحدة من أهم الأزمات السياسية في تاريخ البني أدمين.
دلوقتي جه وقت نتكلم عن هي إزاي لقينا الرسايل دي؟
سنة 1346 قبل الميلاد المصريين صحيوا علي خبر إن الحاكم (إخناتون) قرر ينقل عاصمة البلد من طيبة لمدينة جديدة في نص السكة تقريباً بين طيبة ومدينة ممفيس وسمي العاصمة الجديدة أخيتاتين ودي كلمة مصرية قديمة معناها أفق أتون .. طب يطلع مين أتون ده كمان؟ .. ده حضرتك يبقي الإله الجديد اللي (إخناتون) قال إنه عايز المصريين يعبدوه .. حاول تفهم نقطة .. (إخناتون) بدأ ثورة دينية ودي عشان تشبهها بحاجة تقدر تستوعبها حاول تتخيل إن جه حد مسك البلد وقالك أنا عايز أخلي المصريين يسيبوا مذهب أهل السُنة والجماعة ويعتنقوا المذهب الشيعي .. حيتقاله جميل بس المؤسسات الدينية اللي لسنين وسنين كانت بتدرس مذهب أهل السُنة والجماعة اللي هي مثلاً الأزهر الشريف قاعدة في القاهرة .. فيقولك حلو إنقلي بقي العاصمة بتاعتي بره القاهرة عشان أبعد مؤسسات الدولة الجديدة عن تأثير المؤسسة الدينية بتاعة الديانة القديمة .. العاصمة الجديدة اللي هي أخيتاتين إنت عارفها دلوقتي بإسم تل العمارنة وهي اللي إتسمت عليها رسايل تل العمارنة.
العاصمة الجديدة تل العمارنة فضلت أهم مدينة في مصر من سنة 1346 لحد سنة 1332 ودي السنة اللي مات فيها (أخناتون) .. حاول تلاحظ إن دي مدينة عمرها يدوبك 14 سنة ودي فترة مش كافية إنك تعمل مدينة غنية بالمعالم الأثرية زي طيبة مثلاً بس هي كافية جداً إنك تبني أساس عاصمة إدارية لدولة عظمي زي مصر القديمة واللي أهم مبني فيها كان القصر الملكي .. القصر الملكي ده هو اللي أُكتشفت فيه رسايل تل العمارنة.
سنة 1717 أُكتشف السور الحجري اللي كان محاوط المدينة داير ما يدور .. سنة 1884 بالصدفة البحتة إكتشفوا الرسايل واللي بمجرد ما لقوها كل علماء الأثار في الدنيا جريت علي تل العمارنة عشان يشوفوها .. بس الفكرة مش في كده .. الفكرة إن الرسايل دي لقوها في مبني جوه المدينة كان مكتوب عليه مكتب مراسلات الفرعون .. إنت متخيل مدي تقدم المصريين القدماء في الإدارة كان عامل إزاي .. زي ما قلتلك بالنسبة لبتوع الأثار الورق أهم من المبني .. مدير المتحف البريطاني في لندن وقتها (واليس بادج Wallis Budge) عرف يسرق 82 رسالة منهم ودلوقتي هم معروضين في المتحف .. باقي الرسايل معروضين في المتحف المصري ومتحف شتات-ليشي Staatliche في العاصمة الألمانية برلين.
نيجي للسؤال الثالث .. إيه اللي رسايل تل العمارنة قالته عن السياسة الخارجية للفراعنة؟
بسم الله الرحمن الرحيم كده عايزك تعرف إن رسايل تل العمارنة مش مكتوبة باللغة المصرية القديمة إنما باللغة الأكادية .. تطلع إيه اللغة دي؟ .. حضرتك زمان العراق كانت حضارة فشيخة إسمها الإمبراطورية الأكادية وكانت اللغة بتاعتهم هي اللغة الرسمية لأغلب المنطقة اللي إنت عارفها بإسم بلاد ما بين النهرين .. بمعني أخر .. اللغة الأكادية كانت حاجة شبه اللغة الإنجليزية دلوقتي كده اللي هي اللغة الرسمية المستخدمة للحوار الدبلوماسي بين الإمبراطوريات القديمة .. مع العلم وخلي دي معلومة مهمة في دماغك إن أغلب رسايل تل العمارنة هي رسايل إستلمها الفراعنة من حكام دول تانية .. قليلين أوي الرسايل اللي بعتها الفراعنة لحكام الدول اللي حولينا .. زي ما قلت في البداية إن الرسايل دي تقدر تصنفها نوعين .. النوع الأول هي الرسايل اللي كانت بين فرعون مصر والدول اللي تحت سيطرته اللي حكامها مينفعش يصحي الصبح يفطر قبل ما ياخد إذن الفرعون والنوع الثاني هي الرسايل اللي بين الفتوات بتوع العالم القديم.
المصدر:
- مقالة بعنوان These Pharaoh’s Private Letters Expose How Politics Worked 3,300 Years Ago نشرت في مجلة The National Interest وده لينك المقالة الأصلية:
https://www.nationalgeographic.co.uk/history-and-civilisation/2021/01/these-pharaohs-private-letters-expose-how-politics-worked-3300
