إحصائيات أداء اللاعبين .. إزاي ممكن تلبس الأندية في الحيط؟

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/moneyball-m4a

زمان عشان نادي زي الأهلي أو الزمالك يحتاج يشتري لاعيب في مركز معين وليكن مثلاً لاعيب خط نص مهاجم زي (محمد أبوتريكة) كده ففيه طريقة قديمة ومتجربة وشغالة زي الفل وهي إن النادي يبعت كشّافين مواهب أو Scouts عشان يا إما يدوروا علي لاعيب ينفع أو إنهم يتفرجوا علي لاعيب إتقالهم عليه إنه يجي منه .. كشّاف المواهب ده بيبدأ يتفرج علي الماتشات بتاعة الفرقة اللي اللاعيب بيلعب فيها ويبدأ يشوف هو بيلعب إزاي؟ ونقاط قوته إيه؟ ونقاط ضعفه إيه؟ والأهم يتفرج علي إزاي اللاعيب ده بيتعامل مع زمايله ومع مدربه؟ .. في الأخر لما كشّاف المواهب بيقدم تقريره لإدارة النادي بيبقي تحت إيده معلومات كافية أوي إنهم ياخدوا القرار يا إما يشتروه أو لا .. دي الطريقة اللي بتعبر عنها جملة هذا ما وجدنا عليه أباءنا وأجدادنا .. كشّافين المواهب دول ليهم ميزة وعيب .. ميزتهم إن لو وقع تحت إيدهم لاعيب كويس ورشحوه إن النادي بتاعهم يشتريه ففي الغالب اللاعيب ده بيبقي جوهرة .. حاجة كده زي ما الأهلي إشتري (أبوتريكة) من الترسانة أو لما لييستر سيتي إشتري (رياض محرز) و(إنجولو كانتي N’Golo Kante) من أندية درجة ثانية في فرنسا .. عيب كشّافين المواهب إنهم مبيغطوش كل حتة .. إنت بتبعت كشّاف مواهب في مدينة معينة وبيركز شغله عليها ومبيقدرش يغطي مساحات واسعة.

ده الفكر اللي أندية العالم كله مشت عليه تقريباً في كل اللعبات لحد ما في سنة 2011 طلعلنا واحد زي الخازوق بفكر جديد لانج إسمه (بيلي بيين Bill Beane) وده رجل أمريكاني بيدرب فرقة إسمها أوكلاند أثيليتيكس Oakland Athletics في أميركا وياريته حتي بيدرب كرة قدم .. ده بيدرب بيسبول .. عارفها إنت اللعبة الأمريكاني اللي شبه الراكت دي اللي محدش فينا فاهمها ولا بيتفرج عليها .. الرجل ده إخترع إسلوب جديد لانج في إزاي المدير الفني يقدر يختار يشتري أنهي لاعيب عن طريق إنه يبدأ يبص علي إحصائياته .. الفكرة بمنتهي البساطة شبه الطريقة اللي إنت لما تيجي تلعب PlayStation بفرقة إنت متعرفهاش فتبدأ تبص علي باورات اللاعيبة .. لو مش فاهم قصدي خليني أشرحلك أكتر.

اللي عمله (بيلي بيين) إنه عن طريق Database فيها كل المعلومات عن أرقام اللاعيبة المتسجلة في إتحاد البيسبول بدأ يقيم مين اللي ينفع ومين اللي مينفعش بناء علي إحصائياتهم بغض النظر عن اللاعيب ده بيلعب في نادي إيه وفي دوري إيه وسنه كام سنة وشكله إيه ولا حتي لو كان إتسجن قبل كده .. اللي يهمك هي أرقام زي لعب كام ماتش أساسي وكام ماتش نزل إحتياطي .. جاب كام جون وعمل كام Assist .. معدل تمريراته الصح كام والغلط كام .. بتجمع إنت كل المعلومات دي وبتبدأ تحط باورات اللاعيبة .. اللي بتعمله PES أو FIFA عشان إنت تلعب هم بيعملوه عشان ينقوا اللاعيبة اللي ينفعوا يشتروها .. اللي عمله (بيلي بيين) إتحكي في كتاب إسمه Moneyball وإتعمل فيلم البطل بتاعه كان (براد بيت Brad Pitt) ومن ساعتها ومصطلح Moneyball ده بقي بيتقال علي فكرة إنك تستخدم الإحصائيات في إنك تلاقي لاعيبة فيه ناس بتسميها لاعيبة بتلعب في أندية تحت بير السلم بس باوراتها حلوة أوي ورخيصة وتقدر تشتريها .. فجأة الفكر بتاع Moneyball ده إنتشر في كل الرياضات علي مستوي العالم وخصوصاً كرة القدم وعشان أديلك مثال علي كلامي بص علي اللي عملته فرقة ريدستار بليجراد.

ريدستار بيلجراد دي تبقي الأهلي بتاع صربيا .. دي الفرقة اللي عمالة تكسب الدوري الصربي وموسم 2018-2019 إتأهلوا لدوري الأبطال Champions League وكانوا في مجموعة الموت بتاعة باريس سانجيرمان وليفربول ونابولي وده الموسم اللي ليفربول فيه خد البطولة في الأخر .. المهم .. الفرقة دي أول الموسم كانوا بيدوروا علي صانع ألعاب كويس ولإنهم فرقة صربي فالطبيعي إنهم كانوا يدوروا في البلاد اللي حوليهم يا إما جوه صربيا أو كرواتيا أو ألبانيا أو أي دولة في شرق أوروبا .. فجأة الناس اللي بتشجع الفرقة صحت الصبح علي خبر إن النادي إشتري صانع ألعاب هولندي إسمه (لورينزو إيبيسيلو Lorenzo Epecilio) .. لسه الجمهور حيقول هييييييييييه عرفوا إن النادي إشتراه من فرقة بتلعب في الدوري القبرصي .. هنا السؤال اللي إتسأل: هو إيه اللي لم الشامي علي المغربي؟ .. جبتوه منين ده؟ ومين اللي بيتفرج علي الدوري القبرصي أصلاً؟ .. الإجابة كانت إن فيه بني أدم قاعد علي مكتب في إدارة مخابرات كرة القدم Football Intelligence في شركة في لندن إسمها 21^st Club قدام شاشة الكومبيوتر بتاعته كان عمال يبص علي باورات اللاعيبة وعجبه أوي الباورات بتاعه (لورينزو إيبيسيلو) .. اللي حصل إن إدارة ريدستار بيلجراد راحت للشركة بورقة فيها شوية أسامي لاعيبة هم عايزين الشركة تساعدهم يقرروا يشتروا مين فيهم بس الشركة بصت علي الورقة وردوا عليهم بإسم تاني خالص اللي هو (لورينزو إيبيسيلو) .. الشركة قالت للنادي إن ده لاعيب كويس أوي بنفس الإمكانيات اللي أنتوا بتدوروا عليها وبرخص التراب.

تقدر تقول إن (لورينزو إيبيسيلو) يعتبر قصة نجاح لفكرة Moneyball أو إستخدام الإحصائيات في إنك تختار بيها تشتري وتبيع مين لإنه بعد شهر واحد بس من شراه قدر يجيب الجون اللي خلي ريدستار بيلجراد يتأهل لChampions League .. شركات زي 21^st Club أو Soccer Data Pioneers Prozone بيبقي عندهم ناس بتفهم في مجالات مختلفة زي مهندسين بيانات Data Engineers ومهندسين برمجة Software Engineers ومعاهم ناس بتفهم في الإدارة عشان يبنولك Database متكاملة زي اللي إنت بتشوفها وإنت بتلعب FIFA أو PES .. لنفترض إنك نادي مثلاً بتلعب في الدوري الإنجليزي في نادي إتعود يبقي أخره وسط الترتيب زي ساوثهامبتون أو إيفرتون بس إدارة النادي حلمها إنها تتأهل لأوروبا يعني يا إما ضمن الأربعة الأوائل أو علي الأقل خامس أو سادس .. ساعتها النادي بيقول إنه عايز يشتري لاعيبه كويسين أوي بس بسعر حنين .. النادي بيروح لشركة من بتوع الإستشارات الكروية دول والمهندسين اللي فيها بيقيموا أداء النادي وبيشوفوا هو النادي حاطط لنفسه Target إيه وبيبدأوا يشوفوا البرامج أو Software اللي هم كاتبينها حتقولهم إيه .. مين اللاعيبه اللي تمشي؟ ومين اللاعيبه اللي تقعد؟ .. هل المدير الفني اللي ماسك الفرقة مناسب ولا لا؟ .. هل طريقة اللعب اللي الفرقة بتلعب بيها مناسبة لإمكانيات اللاعيبه ولا لا؟

بإختصار شديد الشركات دي بتعمل Software يخليهم يلعبوا FIFA Football Manager بس بحق وحقيقي .. شركة زي 21^st Club مثلاً عامله Software سموه PIRLO متسمي علي إسم (أندريا بيرلو Andrea Pirlo) أسطورة كرة القدم الإيطالية وكلمة PIRLO دي إختصار Predictive Intelligence Research and Learning Outputs .. فكك من الإسم .. البرنامج ده شبه أوي البرامج اللي شركات زي Netflix و Amazon بتستخدمها عشان تفهم هي الناس عايزة تتفرج علي إيه؟ وتشتري إيه؟ .. PIRLO بيجمع معلومات عن أكثر من 150,000 لاعيب علي مستوي العالم بحيث إنه مثلاً يبص علي لاعيب زي مثلاً (طارق حامد) بتاع الزمالك ويبدأ يحسب هو قطع الكرة كام مرة؟ وباصي الكرة صح كام مرة؟ وجاب كام جون؟ وخد كام إنذار؟ وكام كارت أحمر؟ وعمل كام فاول؟ بحيث إنه يجمع كل المعلومات دي كلها ويحللها ويدي تقييم معين ل(طارق حامد) بناء علي سعره المتوقع .. بس فيه مشكلة .. لو مثلاً نادي زي أياكس أمستردام الهولندي بيدور علي لاعيب إرتكاز وبصوا علي باورات (طارق حامد) لقوا مثلاً إنه قطع الكرة في الموسم 150مرة في الدوري المصري فهل ده معناه إنه لاعب ينفع يلعب في الدوري الهولندي؟ .. كرة القدم بحرها واسع مش زي البيسبول وده حيودينا لأهم عيب في فكرة إستخدام Moneyball في كرة القدم وهي إنها بسهولة أوي ممكن تلبس النادي في خازوق والخازوق اللي حتكلم عنه لبسه نادي فولهام الإنجليزي.

فولهام فرقة صعدت موسم 2018-2019 للدوري الإنجليزي الممتاز Premier League من دوري الدرجة الثانية وعشان أندية إنجلترا بقي معاها فلوس فنادي من أندية تحت بير السلم زي فولهام بقي معاه إنه يصرف أكثر من 100 مليون جنيه إسترليني علي الصفقات الجديدة قال إيه عشان يضمنوا إنهم يكملوا السنة دي في الدوري الممتاز وميهبطوش .. عشان بس أحطك في الصورة .. فولهام كان ثالث أكتر نادي في إنجلترا صرف فلوس علي شرا اللاعيبه في إنجلترا خلال سنة 2018 .. بلاش دي .. هم كانوا المركز ال13 ضمن أندية أوروبا الأكثر بعزقة لفلوسها علي شرا الصفقات .. فولهام صارف فلوس أكتر من بروسيا دورتموند وأكتر من بايرن ميونيخ وأكتر من كل أندية الدوري الإيطالي كله بإستثناء يوفينتوس وروما .. بعد الصرف ده كله الواحد بقي يتوقع إنهم يكونوا بينافسوا علي المراكز المؤهلة لأوروبا .. إذا بيهم بيهبطوا دوري المظاليم تاني وياريت الوضع خلص علي كده .. المهاجم اللي هم شارييينه (أبوبكر كامارا) إتخانق مع زمايله وجابوله البوليس في النادي يقبض عليه .. قصة (أبوبكر كامارا) دي توريك قد إيه الMoneyball ده إختراع فاشل في كرة القدم وخليني أقولك ليه.

فولهام كان من أوائل الأندية الإنجليزية اللي بدأت تطبق فكرة Moneyball في بيع وشرا اللاعيبة .. هم كانوا الClient بتوع شركة إسمها Roster Improvement Trough Analytics (RITA) بداية من 2017 و شركة RITA هي اللي رشحت (أبوبكر كامارا) للنادي وعشان تفهم إيه هي مشكلة Moneyball بص علي الCareer بتاعة اللاعيب .. ده لاعيب بدأ حياته في نادي موناكو الفرنسي وفشل ولعب موسم في فرقة تحت بير السلم في الدوري البلجيكي ومكنش بيلعب وبعد كده راح فرقة تحت بير السلم برده في فرنسا إسمها أمينيس بتلعب في الدوري الممتاز وعمل معاهم شغل مش بطال .. يعني ده لاعيب عدي علي 3 أندية ومعملش في حياته غير إنه لعب كويس في موسم واحد بس وده كان كفاية أوي إن الSoftware بتاع RITA يرشحه لفولهام واللي إشتروه ب5.3 مليون جنيه إسترليني .. أنا متؤكد ومش محتاج حد يحلفلي إن أرقام (أبوبكر كامارا) اللي طلعها الSoftware كانت حلوة أوي بس دي مشكلة الSoftware إنه مش بيوريك أهم حاجة في اللاعيب .. شخصيته .. (شيكابالا) كموهبة يمكن يكون أحرف من (أبوتريكة) بس شخصية (أبوتريكة) هي اللي خلته يبقي له Career أكبر بكتير من بتاعة (شيكابالا) ويمكن لو جبت Software يقيم أداء الإتنين كان قالك إن باورات (شيكابالا) أعلي بكتير وقيّمه بسعر أعلي من (أبوتريكة) .. إدارة فولهام كان المفروض يفهموا الخازوق اللي لبسوه من بدري من الموسم الأول ل(أبوبكر) مع الفرقة اللي كان في دوري الدرجة الثانية لما جاب 7 جوان وده رقم كويس بس خد 7 إنذارات وكارت أحمر .. مهاجم ياخد 7 إنذارات ليه بالصلاة علي النبي؟

موسم 2018-2019 لما فولهام صعد دوري ممتاز مصايب (أبوبكر كامارا) بقت فضايح .. في ماتش جاتلهم ضربة جزاء والمدير الفني (كلاوديو رانييري Claudio Raneri) قال إن اللي يشوط البلنتي (أليكساندر ميتروفيتش Aleksandar Mitrovic) قام (أبوبكر) واخد الكرة غصب وقال أنا اللي حشوط وشاطها وضيعها .. بعدها بكام يوم في التدريب إتخانق هو و(ميتروفيتش) تاني و(رانييري) عاقبه بإنه خلاه يتمرن مع فرقة تحت 23 سنة قام مجاش التمرين أصلاً .. بعدها رئيس النادي (أليستر ماكينتوش Alistair Mackintosh) كان بيزور الفرقة قام (أبوبكر) إتخانق معاه وضربه .. مشكلة (أبوبكر) إنه فيه عيب مش بيبان في الSoftware وهي إنه رجل براس طفل محتاج معاملة خاصة .. مشكلة تانية ظهرت مع إستخدام فولهام لSoftware بتاع RITA إن البرنامج مبيقولش هو اللاعيب بيعرف يتكلم إنجليزي ولا لا .. لما صعدوا دوري ممتاز برده موسم 2018-2019 النادي إشتري إتنين حراس مرمي اللي هم (فابريسيو أجوستو راميريز Fabricio Agosto Ramirez) و(سيرجيو ريكو Sergio Rico) وبعد ما إتمضي معاهم العقود إكتشفوا إن الإتنين مبيتكلموش إنجليزي أصلاً .. المصيبة بانت أوي مع (فابريسيو) اللي لا كان عارف يفهم المدافعين بتوعه ولا هم كانوا عارفين يفهموه .. هو لعب أول ماتشين في الموسم دخل فيه 5 جوان ومن ساعتها محدش شاف وشه تاني ولا حتي في ماتشات الكاس .. مع إن (فابريسيو) لاعيب واخد دوري تركي مع نادي بيشكتاش إلا إنه لاعيب عنده مشكلة وهي إنه عاطفي زيادة عن اللزوم .. ده حارس كان بيلعب ماتش في Champions League مع بيشكتاش ضد دينامو كييف الأوكراني وخسروا الماتش 6-0 منهم 4 جوان دخلوا في الشوط الأول ويدوبك الجون الرابع دخل لقيناه عمال يعيط في الملعب .. تروح تسأل إدارة فولهام هو أنتوا كنتوا بتفكروا في إيه لما إشترتوه يقولولك إن الإحصائيات بتاعته كانت زي الفل وده اللي خلانا ندفع فيه 5 مليون جنيه إسترليني.

محدش قال إننا نرمي الإحصائيات في الزبالة ونفكنا خالص من فكرة Moneyball دي بس علي الأقل الفكر ده يمشي مع الفكر القديم بتاع كشّافين المواهب بحيث الإتنين مع بعض يرسموا صورة واضحة عن اللاعيب .. بما إننا بنتكلم عن (فابريسيو) فاللاعيب ده في بداية الCareer بتاعته كان بيلعب في نادي ديبورتيفو لاكورنيا الإسباني وكان المدرب بتاع حراس المرمي بتاعه (جوزيه سامبادي كوريرا Jose Sambade Correira) اللي دلوقتي هو مدرب حراس المرمي بتاع فولهام فلو كان (فابريسيو) وحش كان هو أول واحد راح لإدارة النادي إعترض .. بس في نفس الوقت الSoftware بتاع RITA عمل مصايب زي إنه رفض إن إدارة فولهام تروح تشتري المهاجم (كالوم ويلسون Callum Wilson) بتاع فرقة بورنموث بحجة إن الإحصائيات بتاعته مش قد كده مع إن اللاعب دلوقتي سعره متقيم ب50 مليون جنيه إسترليني .. إنك تبعت كشاف مواهب يسأل ويتطقس علي اللاعيبة اللي إنت عايز تشتريها بيديك بُعد جديد الإحصائيات مبتعرفش تجيبه اللي هو تاني شخصية اللاعيب وخليني أختم معاك بقصة دمها خفيف أوي حصلت سنة 1984.

في الوقت ده اللي كان بيدرب برشلونة كان واحد انجليزي إسمه (تيري فينابلز Terry Venables) كان بيفكر يشتري لاعيب رأس حربة إسمه (ستيف أرشيبالد Steve Archibald) .. هو كان معجب باللاعب بس ميعرفوش شخصياً فبدأ يسأل عليه الناس وكان رأي الناس فيه إنه لاعيب إنطوائي مبيهزرش مع زمايله وفي حاله مبيتكلمش مع حد .. في إنجلترا ولإنه لاعيب إنجليزي فده يعمل مشكلة .. مفيش حد بيحب الشخصيات الإنطوائية .. بس (تيري فينابلز) كان عايزه يلعب في إسبانيا مش إنجلترا .. يدوبك عرف إنه إنطوائي قاله ده إنت لقطة .. فكر فيها كده .. إنت أساساً مبتكلمش حد يبقي إنت مش حتقرفني في عيشتي شكوي إنك وحداني وملكش حد تتكلم معاه عشان إنت عايش في بلد جديدة عليك ومع ناس مش بتتكلم لغتهم .. ده إنت أهل بلدك نفسهم ملكش علاقة بيهم .. وفعلاً (ستيف أرشيبالد) كان صفقة سوبر لبرشلونة وجابلهم الدوري الإسباني لأول مرة من 11 سنة .. الشخصيات بتفرق .. لما بتشتري وتبيع لاعيبة في نادي إنت مش بتلعب FIFA إنت بتتعامل مع بني أدمين ويمكن ده الدرس اللي إدارة فولهام إتعلمته متأخر أوي.

المصادر:

• مقالة بعنوان Soccer’s Moneyball Moment: How Enhanced Analytics are Changing the Game .. إستخدام الإحصائيات في كرة القدم: إزاي التحليلات الإحصائية ممكن تغير اللعبة .. نشرت في مجلة Forbes و ده لينك المقالة الأصلية:
  https://www.forbes.com/sites/robertkidd/2018/11/19/soccers-moneyball-moment-how-enhanced-analytics-are-changing-the-game/#48b2a4da76b2
• مقالة بعنوان What Stats Do not Tell Fulham is that Abubakar Kamara is a Total Pest .. الحاجة اللي الإحصائيات مقالتهاش لإدارة نادي فولهام إن (أبوبكر كامارا) أفة .. نشرت في جريدة The Daily Mail وده لينك المقالة الأصلية:
  https://www.dailymail.co.uk/sport/football/article-6629271/What-stats-not-tell-Fulham-Aboubakar-Kamara-total-pest.html