في واحد من المشاهد الحلوة أوي من مسلسل لن أعيش في جلباب أبي شخصية (عبده) اللي جسدها الفنان (نور الشريف) الله يرحمه كان بيضبط الشيشة لشخصية للمعلم (سردينة) اللي كان بيقدمها الفنان (عبدالرحمن أبوزهرة) ربنا يديله الصحة فعرض علي المعلم (سردينة) إنه يجيب شيشة خصوصي و(عبده) يبقي يعمله الشيشة بنفسه وبدل ما بيدفع فلوس للقهوجي يديها ل(عبده) .. ومش بس كده .. (عبده) حيعمل للحاج (سردينة) خصم .. رد عليه المعلم (سردينة) وهو بيشر حكمة من كل حتة إن لما يبقي ده كارك أقولك ماشي .. لكن غيرك له كار وإنت لك كار .. خليك في كارك وإتشطر فيه .. ما برده الروائي (إحسان عبدالقدوس) الله يرحمه مكنش سهل برده لإن تقريباً الأخ (بوب أيجر Bob Iger) المدير التنفيذي لشركة ديزني Disney العملاقة كان محتاج يبقي عنده وصلة دش عليها روتانا مسلسلات عشان يتعلم من المعلم (سردينة) بدل العك اللي هو بيعمله ده لإن (بوب أيجر) عمل واحدة من الخطايا الكبري في البيزنس وهي إنه مشي في كار مش كاره لما قرر إن ديزني تخش بتقلها في بيزنس الستريمينج Streaming عشان تنافس نيتفليكس Netflix وتاخد منها حصة من السوق أو Market Share بالبدعة اللي هو عملها واللي إسمها Disney + واللي كانت مصيبة وحلت فوق دماغ أي حد قرر يحط فلوسه في الشركة الوسخة دي .. النهاردة حنحاول سوا نجاوب علي السؤال المهم وهو يا تري إيه اللي حصل في ديزني؟ .. إزاي الشركة اللي كانت رايحة في سكة إنها تبقي الشركة الأعظم في تاريخ البني أدمين بقت مش لاقية أي أرباح تستر بيها نفسها؟
بداية من 2023 والمصايب نازلة ترف فوق دماغ ديزني .. كل فيلم ينزلوه يفرقع في وشهم .. يجربوا يعملوا فيلم جديد ملوش أجزاء قديمة زي Haunted Mansion يفشل .. يجربوا يعملوا الجزء اللي مش فاكر كام من سلسلة أنديانا جونز اللي هو Indiana Jones and the Dial of Destiney برده يقع علي جدور رقبته .. يعملوا فيلم كرتون زي Elemental برده محدش يروح يتفرج عليه .. حتي أخر فيلم تبع سلسلة مارفل اللي هو Ant-Man and the Wasp: Quantumania سواء الجمهور أو النقاد مسحوا بكرامته الأرض .. يا مؤمن ده حتي لما جربوا يعملوا فيلم حركي مستوحي عن كرتون قديم اللي هو The Little Mermaid برده مجابش فلوس .. ومش بس الأفلام خلي بالك .. الموسم الثالث من مسلسل The Mandalorian من ضمن الحاجات الكتير اللي بتنزل عن العالم بتاع Star Wars معجبش ناس كتير .. مسلسل Secret Invasion وده من ضمن برده الحاجات الكتير اللي بتنزل بس عن العالم بتاع مارفل ناس كتير وأنا منهم كنا بنجري الحلقة عشان تخلص لإن محدش كان عنده خلق يتفرج علي العك اللي بيتعرض ده .. الوضع وصل إن خلال اخر 3 شهور من سنة 2023 قناة Disney+ خسرت 11.7 مليون مشترك وده معناه خساير فلوس بتتقدر بحوالي 512 مليون دولار.
الحقيقة إن فيه سببين ورا الإنهيار ده والسببين دول وراهم إتنين غير بعض كل واحد فيهم لما مسك ديزني بوظها بطريقته .. السبب الأولاني هو الجشع اللي خلي (بوب أيجر) يمشي في كار مش كاره .. السبب الثاني واللي كان سببه واحد تاني إسمه (بوب) برده بس (بوب تشابيك Bob Chapek) اللي جه بعد (بوب أيجر) إن ديزني حبت ترسم نفسها قدام الناس علي إنها حامية حمي ما يسمي بWokeness ودي تبقي الفرة اللي بقت منتشرة في المجتمعات الغربية وخصوصاً أميركا والحقيقة إن Wokeness كفكرة هي فكرة حلوة جداً بس تطبيقها اللي كان زي الزفت .. ووكنيس جاية من فكرة إنك صحيت أو Woke up يعني صحيت من النوم العقلي اللي إنت كنت عايش فيه .. لو إنت مجتمع مثلاً عايش فيه أقلية متداس عليها فإنت فضلت لسنين وسنين عامل زي الزومبي ماشي مع المجتمع اللي إنت عايش فيه ودايس معاهم فوق دماغ الأقلية دي عشان إنت مش عايز تبان مختلف عن باقي الزومبي اللي إنت عايش معاهم .. فجأة إنت بتصحي وبتفوق من اللي إنت فيه وبتعرف إن الأقليات ليها حقوق لإنهم بني أدمين زيك زيهم .. لحد هنا الفكرة نبيلة جداً وأي حد يقدر يقف وراها .. المشكلة لما Wokeness أو الصحيان بيخليك تبقي زي الزومبي بس تحت تأثير توجه مجتمعي مختلف اللي هو يلا نخليها سداح مداح والأسوأ من كده إنك مينفعش تفتح بقك تقول رأيك لاحسن تجرح مشاعر حد من الأقليات .. لمن لا يعلم يعني (بوب تشابيك) لبس ديزني في الحيط لدرجة إن مجلس الإدارة مشاه ورجع مكانه (بوب أيجر) تاني.
في أوائل الألفينات جه مسك شركة ديزني طيب الذكر (بوب أيجر) واللي خليني أبقي صريح معاك هو خلي ديزني شوية وحتطلع نار من بقها .. في الفترة اللي هو مسك فيها ديزني لو كنت سألت هي يا تري مين أكبر قناة فضائية فيكي يا أميركا فتقريباً الناس كلها حتشاورلك علي قناة ESPN وتقولك البربرء اللي هناك ده .. قناة ESPN لمن لا يعلم هي النسخة الأمريكاني من قناة BeIn Sports .. خلال الفترة بتاعة (بوب أيجر) كمسئول عن ديزني الشركة استحوذت علي الشركات دي .. جاهز؟ .. بيكسار Pixar اللي بتعمل أفلام الكرتون .. مارفل Marvel بتاعة سلسلة الأفينجرز Avengers .. لوكاس فيلم Lucasfilm بتاعة سلسلة Star Wars اللي تقريباً محدش في مصر بيتفرج عليها غيري .. ومعلش زود عليهم Fox بتاعة سلسلة أكس مين X-Men .. بدأت تلاحظ حاجة؟ .. فلسفة (بوب أيجر) مع ديزني إنه مكنش يبقي منتج أفلام تجيب جوايز .. هو عايز ينتج أفلام تجيب فلوس .. حلو .. هو بدأ يشوف هو الجمهور اللي هو عايزه يبقي التارجيت بتاعه يبقي مين فالمنطق كان بما إنك عايز فلوس يبقي إنت بتدور علي الزبون اللي معاه يدفع .. حلو أوي .. يبقي كل الأفلام بتاعتك تبقي موجهة للفئة العمرية اللي من 25 سنة وإنت طالع .. إحنا مش بتوع أفلام هادفه .. إحنا بتوع أفلام تلم زبون وده معناه إن ديزني بصفتها منتج أفلام مش لازم في السنة تعملها 20-30 فيلم .. ليه كل ده .. هم 10-15 فيلم كل سنة وشكراً .. كده إحنا عارفين جمهورنا مين وعارفين حنعمل كام فيلم في السنة .. السؤال بقي .. نعمل أفلام شكلها إيه؟
(بوب أيجر) مكنش عايز يبقي بتاع أفلام بتنشر رسالة .. هو عايز أفلام ليها جمهورها اللي مستنيها وبمجرد ما الفيلم ينزل وينجح نعمل منه الجزء الثاني والثالث والرابع لحد ما الجمهور يقولك كفاية بجي .. من أول سنة 2000 لحد 2019 المكنة بتاعة ديزني بقت مش عارفة تبطل تطلع قماش .. تقريباً 100% من الأفلام اللي كانت بتعملها ديزني بتنجح مش بس جماهيرياً وبتجيب فلوس حلوة في شباك التذاكر إنما كمان النقاد مكانوش بيطلعوا فيها القطط الفطسانة .. كل فيلم ينجح الناس بتاعة ديزني بتحلبه .. بيجيبوا فلوس من تذاكر السينما .. بيجيبوا فلوس من اللعب والبضاعة اللي بتتباع علي حس الفيلم زي التي-شيرتات والمجات والألعاب .. بيجيبوا فلوس من الملاهي بتاعتهم أو Theme Park ودي شبه دريم بارك كده بس كل حاجة فيها ليها علاقة بالأفلام اللي بتنتجها ديزني .. خلال الفترة اللي (بوب أيجر) مسك فيها ديزني تلتين أرباح الشركة كانت بتيجي من الملاهي بتاعتهم .. عشان تشوف إزاي فلسفة (بوب أيجر) أكلت الشركة الشهد بص علي اللي حصل سنة 2019 .. لو بصيت علي أكتر 10 أفلام جابوا فلوس في شباك التذاكر العالمي حتلاقي 8 منهم من إنتاج ديزني .. هم كانوا أكتر قناة فضائية بتجيب فلوس ولو كنت بصيت علي الفرق بينهم وبين القناة اللي في المركز الثاني اللي هي ESPN فأرباح ديزني كانت 9 أضعاف أرباح ESPN .. إنت متخيل؟ .. طب إنت مستوعب؟
قمة نجاح فلسفة (بوب أيجر) مع ديزني كانت سنة 2022 لما كان نصيب الشركة من أرباح شباك التذاكر العالمي كان 18.22% وده كان فعلاً ما لم نسمع به من قبل خصوصاً إن ديزني في السنة دي نزلت السوق بتسع أفلام بس .. في السنة دي بس هم نزلوا بفيلمين كلوا السوق اللي هم Avatar: The Way of Water و Black Panther: Wakanda Forever .. بس كل ده بدأ يضيع لما (بوب أيجر) حط Netflix في دماغه وقرر يخش الكار بتاعها .. الستريمينج .. خليني أحطهالك علي بلاطة إن دخول شركات إنتاج الأفلام لكار الستريمينج كان فكرة بنت ستين كلب عايزة الحرق بجاز .. إنت فيه عندك 3 شركات اللي هم ديسكوفري Discovery وباراماونت Paramount وسوني Sony الفلوس اللي كانت بتجيلهم من الأفلام والمسلسلات اللي هم بينتجوها سنة 2013 كانت 23 مليار دولار .. جري الشريط لسنة 2023 وأرباح الشركات الثلاثة كانت صفر .. بالنسبة لديزني فسعر السهم بتاعهم في البورصة وصل لأسوأ مستوياته خلال التسع سنين اللي فاتوا .. خلال سنة 2022 بس قناة Disney+ خسرت فلوس حوالي 4 مليار دولار.
بمنتهي البساطة (بوب أيجر) وديزني عموماً فضلت تحلب في سلاسل الأفلام بتاعتها ولما عملوا قناة Disney+ بقوا يعملوا مسلسلات بتكمل القصة لحد ما المتفرج مبقاش طايق نفسه .. مبقاش فيه جديد .. إنت بقيت كمشاهد بتتفرج علي المسلسل مش لسبب غير إنك عايز تبقي ملم بالجديد اللي حصل ولو لقيت صفحة علي الفيسبوك منزلة بوست حرق للأحداث بتقول لنفسك الحمد لله وفرت علي نفسي ساعة إلا ربع بتاعة الحلقة أعمل فيها حاجة مفيدة لنفسي .. استهلاك غير مبرر للمحتوي لدرجة إن الجديد اللي بينزل بيبقي ناقص أو مفيهوش ملح .. قالك حنبدأ في Ant-Man and the Wasp: Quantumania ندخل فكرة العوالم المتعددة أو Multiverse وإتنفذت زي الزفت لدرجة إن أفلام تانية زي Everything, Everywhere All at Once وحتي فيلم تبع مارفل برده اللي هو Spider-Man: Across the Spider-Verse كانوا أحلي بكتير من العك بتاع Quantumania .. وبعدين معلش يعني هو مين فينا دلوقتي متعلق أوي بشخصية إنديانا جونز عشان ديزني تقرر تعمل منها جزء جديد.
الواقع اللي إحنا عايشينه دلوقتي إن خلاص ديزني بتعيد حساباتها تاني في حتة إننا عايزين نرضي كل الناس وإننا عايزين نعبر ونمثل الأقليات وحقوق المثليين وأي حد شايف نفسه وزة وعايز الناس كلها تعومه في المياه .. بس في نفس الوقت مش حتلاقي التحول ده بيتقال عنه كده قدام الناس .. حتلاقيه تحول بطيء بطء السلحفاة عشان محدش يقول عليهم حاجة بس خلينا نتفق إن الفلوس بتوجع.
المصادر:
- مقالة بعنوان Disney’s Downfall: The Rise and Fall of an Entertainment Giant نشرت في موقع The Ringer وده لينك المقالة الأصلية:
https://www.theringer.com/2023/10/3/23900759/disney-downfall-streaming-rise-and-fall-of-an-entertainment-giant - مقالة بعنوان The Recent Downfall of Disney نشرت في موقع Forge Press وده لينك المقالة الأصلية:
https://forgepress.org/2023/09/27/the-recent-downfall-of-disney/
