ده معناه ان حكومة المرابطين في الأندلس بقي ماسكها ناس من المرابطين ميعرفوش حاجة عن الحكم و ميعرفوش حاجة عن الإقتصاد ولا عن جغرافيا و الطبيعة الإجتماعية لأهل الأندلس .. ده معناه إن ماسورة هبد و إتكسرت و غرقت الأندلس كلها.
سقوط طليطلة خلي ملوك الطوائف يبصوا لنفسهم و يفتحوا عنيهم علي الوضع اللي زي الزفت اللي هم فيه .. اه إحنا ناس عندنا قصور ميحلمش بيها بشر .. عندنا كتب مش موجودة في مكتبة بغداد .. عندنا ناس بتفهم في الطب و الفلك و الهندسة .. بس معلش يعني معندناش حد يشيل سلاح.
تعالي نتخيل إن (عبدالرحمن الناصر لدين الله) بعد وفاته جينا رجعناه يعيش تاني ووريناه حال الأندلس .. الرجل ده حكم خمسين سنة نقل بلده من خرابة لقوة عظمي .. إلا إن بعد خمسين سنة من وفاته القوة العظمي دي رجعت خرابة تاني .. تفتكر حيحس بأيه؟ .. تفتكر حيقول إيه؟ .. الخلافة الأموية اللي هو بدأها سنة 929 إنتهت سنة 1031 وبقت الحاجة اللي إنت عارفها دلوقتي بإسم ممالك الطوائف.
علاقة الإسلام بالفايكينج تقريباً إنحصرت في قصة واحدة وهي قصة (أحمد بن فضلان) ودي القصة اللي إتحكت في رواية مشهورة أوي إسمها Eaters of the Dead و إتحولت لفيلم إسمه The 13th Warrior كان من بطولة (أنتونيو بانديراس) و (عمر الشريف) الله يرحمه.