ألمانيا بتزود صرفها العسكري بالفصال .. سنة 2014 الميزانية العسكرية كانت 38 مليار دولار بس .. سنة 2018 الميزانية العسكرية الألمانية كانت 44 مليار دولار .. السنة اللي وراها اللي هي 2019 الرقم زاد شوية بقي 48.5 مليار دولار و إن شاء الله سنة 2025 حيوصل 67 مليار دولار.
سنة 2012 الإسرائيليين و الألمان إتفقوا علي إن إسرائيل حتستلم 3 غواصات كمان و الألمان كانوا عارفين إن الإسرائيليين حيستخدموا الغواصات دي عشان يحطوا عليها صواريخ بتشيل رؤوس نووية بس يمكن اللي خلي المستشارة الألمانية (أنجيلا ميركل Angela Merkel) توافق علي الصفقة هو إنها خدت وعد من رئيس الوزراء الإسرائيلي (بنيامين نتنياهو Benjamin Netanyahu) بإنه حيسعي بجد عشان يمضي إتفاق سلام مع الفلسطينيين.
الحقيقة إن شعبية (إيمانويل ماكرون Emmanuel Macron) بتقع ولا الطيارة المحروقة .. بناء علي أخر استطلاع رأي عمله Website محترم أوي اسمه YouGov في شهر أغسطس 2017 ف36% بس من الفرنسيين راضيين عن أداء الرئيس بتاعهم وده تقريباً نفس الرقم بتاع نسبة الأمريكان اللي مبسوطين من شغل الرئيس الأميريكي (دونالد ترامب Donald Trump).