من الصيف و إحنا بنسمع إشاعات عن صفقات حيعملها ريال مدريد و برشلونة بس في الأخر طلع كل ده فنكوش .. برشلونة قالوا عايزين الإيكس بتاعنا (نايمار) و ريال مدريد قالوا إنهم حيموتوا علي (بول بوجبا) بس كل ده طلع فنكوش مش لسبب غير إن أساساً الناديين مكانوش جد و مكانوش من جواهم عايزين الصفقات دي تخلص.
ريال مدريد عاشوا فترة إعداد زي الزفت مع (زين الدين زيدان) .. رغم إن (زيدان) مش عايز (جاريث بايل Gareth Bale) إلا انه لحد دلوقتي لسه موجود في النادي .. (إيدن هازارد Eden Hazard) فيه كلام كتير حول لياقته البدنية و دلوقتي سامعين تقارير إن (زيدان) إتخانق مع (لوكا جوفيتش Luka Jovich).
فيه موضة دلوقتي وسط لاعيبه الكورة إنهم بقوا شايفين نفسهم شويتين تلاتة .. بقي اللاعب من دول وكيل أعماله أهم عنده من مدربه .. السير (أليكس فيرجسون) شاف العيب ده في (بوجبا) زمان أيام ما كان لسه ناشيء في مانشستر يونايتد و مشاه و سابه يروح يوفينتوس زي ما حنشوف ليه بعدين.