التغيير كان في أساسات النادي .. فرق الناشئين مبقاش يتقيم نجاحها علي أساس خدتوا كام بطولة جمهورية لسنكوا قد ما بقي بيتقاس نجاحهم بالإجابة علي سؤال أنتوا طلعتوا كام لاعيب ينفع يلعب في الفرقة الأولي؟ .. انت بتسمع عن فرقة زي الزمالك كده كل موسم يغيروا مدير فني و مطلوب من الفرقة إنها تسحر و بقدرة قادر تفهم المدير الفني الجديد و تطبق فكره و تكسب بطولات.
النسخة الحالية من الدوري الإنجليزي إلي حد ما مفيهاش السيرك القومي بتاع زمان .. فيه شوية أسامي محافظة علي مكانتها بس بيبدلوا مراكزهم مع بعض .. صحيح فيه أسامي راحت في داهية زي لييدز يونايتد اللي كسبوا الدوري موسم 1999-2000 و دلوقتي في دوري الدرجة الثانية مش عارفين يصعدوا .. يمكن موسم 2010-2011 لما مانشستر سيتي خد الدوري الإنجليزي كانت صدمة للناس اللي بتتابع البطولة لإن قبل كده محدش كان حاطط اسم مانشستر سيتي ضمن الأسامي اللي ممكن تنافس.
للي إنت محتاج تفهمه إن أيا كان مين اللي حيشتري تشيلسي من (إبراموفيتش) فهو حيكون عارف إن النادي لسه مجابش أخره .. بمعني .. صحيح هم أنجح نادي في لندن .. هم النادي الوحيد من لندن اللي معاه 5 بطولات دوري إنجليزي و 5 بطولات FA Cup و الوحيد اللي كسب بطولة Champions League .. مع كل موسم حتلاقيهم من المرشحين إنهم يكسبوا كل بطولة داخلين فيها.