فيه كام قاعدة كده مهم تكون فاهمهم لما تيجي تتكلم عن الهجرة .. كل ما مساحة البلد و عدد سكانها بيقل كل ما حتلاقي إن نسبة المهاجرين فيها أعلي .. كنت قلتلك إن نسبة المهاجرين اللي عايشين في أميركا حوالي 15% من إجمالي تعداد السكان .. لو قارنت أميركا ببلد تانية زي سويسرا تكتشف إن نسبة المهاجرين في سويسرا بتعدي 29% .. في بلد تانية زي لوكسمبورج و دي بلد صغيرة لدرجة إن حي شبرا في القاهرة أكبر منها بتلاقي إن نسبة المهاجرين فيها بتوصل 46%.
خليني أحطهالك علي بلاطة .. مفيش بلد بتنول شرف تنظيم بطولة إياكش حتي تبقي تنظيم بطولة لعب الدومينو علي القهاوي أو بطولة رمي البلي لمسافات طويلة و العملية مش بتبقي فيها مجاملات و هدايا و لعب من تحت الطرابيزة .. إرجع بس بذاكرتك لكم الفضايح اللي كلنا سمعناها من واحد زي (تركي ال شيخ) عن كل التجاوزات اللي كانت بتحصل في كرة القدم المصرية و انت حتستوعب انا بقول إيه .. لما الإتحاد الدولي لكرة القدم FIFA عمل لجنة تحقيق تشوف هل فعلاً قطر إرتكبت تجاوزات لقوا نفسهم قدام حقيقة صعبة أوي .. هو مين مش بيتجاوز؟
إنت محتاج تفهم إن سبب إن حكومة الإمارات تتعب نفسها و تسرب نص الرسايل بين السفير و وزير الخارجية ملوش علاقة لا بالمفاوضات ولا بأي نيلة .. الإماراتيين سابوا كل ده و مسكوا في نقطة إن طيارة مدنية تابعة للخطوط الجوية القطرية Qatar Airways شالت فلوس و نزلت بيها مطار بغداد و عدت فوق المجال الجوي الإماراتي عشان تدي الفلوس دي لمنظمة إرهابية.
خلال السنة اللي إتفرض فيها الحصار السعودي-الإماراتي-البحريني-المصري علي قطر صادرات عمان (اللي ملهاش علاقة بالبترول) اللي راحت لقطر نطت 144% .. خلال شهر ديسمبر 2017 لو جيت تشوف أي حاجة إستوردتها قطر ملهاش علاقة بالبترول حتلاقي إن الدولة رقم واحد اللي قطر إستوردت منها بضاعة هي عمان.
خليني أديك مثال .. حتعرف كمان شوية بالتفصيل إن قطر قررت تشتري 24 مقاتلة Typhoon الأوروبية اللي من تصنيع شركة BAE Systems .. الصفقة دي تعتبر أضخم صفقة توقعها الشركة الأوروبية من حوالي 10 سنين .. إنت من حقك تبص لعدد المقاتلات و تقول لنفسك إيه البذخ ده؟ ما طبعاً القطريين معاهم فلوس مش عارفين يودوها فين.