المشكلة زي ما هي باينه عندك سلسلة و مش عارفين نحييها .. الحل زي ما قلتلك بسيط .. إعمل جزء جديد بحيث إنك تفترض إن أحداث الجزئين الثالث و الرابع و الخامس ولا كأنهم حصلوا .. عيش كأن الأفلام دي ولا كأنها إتعملت لإن خلينا نكون صرحاء مع بعض الأفلام الثلاثة فعلياً إتنسوا من ذاكرة أغلب الناس اللي بتتفرج علي أفلام أجنبي.
فيه خناقه لرب السما بين الناس اللي بتحب Avatar ضد الناس اللي شايفه Avengers:Endgame انه احسن اختراع بعد الكهرباء.. الخناقه ولعت بعد الاخبار اللي قالت Endgame حقق ايرادات في شباك التذاكر العالمي (2.79 مليار دولار) عدت ال 2.78 مليار اللي جابها Avatar .
متستغربش لو سمعت معلومة إن ناس كتير بتعتبر روايات ملك الخواتم اللي كتبها الرجل اللي مجاش زيه (جيه أر أر تولكين) هي شغل خيالي علمي .. ده معناه إن الأفلام اللي بتحكي الروايات هي كمان لازم تتصنف علي إنها أفلام خيال علمي زيها زي Avatar اللي تقدر تقول عليه فيلم خيالي علمي لإنه بيحكي عن سفر البشر لكوكب تاني و إزاي إحنا كبشر بنتعامل مع شعب ثاني له ثقافته و لغته و عاداته و تقاليده.