رأي الناس في فيلم Watchmen كان حاجتين: الحاجة الأولانية إنه متصور حلو أوي و دي ميزة في شغل (زاك سنايدر) و اللي لما تتفرج علي أفلامه زي 300 حتلاقي إن المشاهد خصوصاً مشاهد الأكشن متصورة حلو أوي .. ثاني حاجة و دي برده حاجة مميزة في شغل (زاك سنايدر) ان مفيش قصة و مفيش حوار و مفيش حبكة و مفيش صدمة .. طول الفيلم ناس بترغي في كلام ملوش معني بس الأكشن شكله حلو.
إحنا إتربينا علي إن السوبرهيروز بيجيبوا حق المظلوم .. هم إتكتبوا كده في الروايات و القصص المصورة اللي كنا بنقراها و إحنا صغيرين .. خد عندك شخصية زي سوبرمان مثلاً .. دي شخصية إتكتبت بعد فترة الكساد اللي ضربت أميركا في الثلاثينات و خلت فيه حالة إحباط عام بين الناس .. في القصص المصورة سوبرمان كان واقف في صف المواطن الغلبان و بيحارب الفساد اللي إستشري في المجتمع .. و مش لوحده.
اللي عمله (كريستوفر نولان Christopher Nolan) اللي في حالة إنك متعرفش هو مين فده اللي أخرج ثلاثية The Dark Knight اللي هم Batman Begins و The Dark Knight و The Dark Knight Rises إنه حط نموذج الإجابة بتاع إزاي تعمل فيلم Superhero نظيف.
فجأة شركة Warner Bros فاقت علي المصيبة اللي (زاك سنايدر) عملها بس الحمد لله ربنا بعتلهم فيلم Wonder Woman .. الأراء الأولية للنقاد السينمائيين اللي شافوا فيلم Wonder Woman بتقول إنه أحسن فيلم يتعمل لDC Cinematic Universe وده خلي فيه إحساس كده إنهم شكلهم حيخلوا دور النساء في السلسلة الي حد ما كبير.