بعد تحقيقات فضلت حوالي سنة طلع (مارك زاكبربيرج Marc Zuckerberg) مؤسس Facebook قال إن يا جماعة أنا متؤسف بس إحنا إكتشفنا إن فيه حوالي 126 مليون مواطن أمريكاني فعلاً شافوا بوستات و إعلانات سياسية متصممة مخصوص عشانهم بحيث يختاروا (ترامب) مش (هيلاري).
ميانمار للي ميعرفش طول حياتها كانت عايشة تحت حكم العسكر بشكل ديكتاتوري قمعي اللي هم زيهم زي دول عربية كتير .. مؤخراً بدأ العسكر يرجعوا يقعدوا في الكنبة اللي ورا وسابوا مدنيين هم اللي يسوقوا وده مشي معاه إن إستخدام الإنترنت في ميانمار بدأ يزيد بمعدل سريع أوي شبه معدل أكلك لكيلو الموز وإنت قاعد في البيت مش لاقي حاجة تعملها.
مفيش حد قال نرجع تاني نستخدم موبايلات نوكيا 3310 و نلغي باقات الإنترنت .. بس في نفس الوقت لما تلاقي الدراسات بتقول إن الناس اللي كل شوية بتفتح Facebook علي موبايلاتها تشوف إيه Notifications اللي جاتلها معرضين أكثر من أي حد تاني إن يجيلهم إكتئاب فانت محتاج فعلاً انك تقلل عدد الساعات اللي انت بتقضيها علي الFacebook و باقي الApps علي موبايلك.