تيمور الشرقية عايزه تستغل إنها بتتصنف علي إنها بلد ديموقراطية .. بلد مفيهاش طال عمره .. فهي مؤهلة إنها لو عرفت تلاقي زبون يشتري منها الغاز الطبيعي بتاعها إنها تعمل اللي النرويج عملته .. المشكلة إن الزبون اللي كل شوية يخبط علي بابهم هو الصين و زي ما كلنا عارفين مفيش حد بيعمل بيزنس مع الصين و ربنا بيكرمه .. أبداً.
تخيل معايا إن فيه دولة إسمها مزاريطة جابت كل تحويشة العمر بتاعتها وحطتها في شوال .. غالباً الصناديق من النوع ده بتتعمل لما تبقي دولة عندها مصدر طبيعي واحد ربنا أداهولها و إقتصادها كله معتمد عليه زي البترول مثلاً .. فلو المزاريطة دي دولة ربنا كرمها ببترول كتير و هي عايشة علي إستخراج البترول و تصديره فالمنطق بيقول إن حكومة المزاريطة مش عايزه يجي اليوم اللي سعر بيع برميل النفط يتخسف به الأرض و ساعتها البلد كلها تفلس.