أرامكو السعودية .. شريان الحياة لإقتصاد المملكة.

سبب إن أنا حتكلم عن أرامكو ARAMCO النهاردة هو إني حححاول أشرحلكوا مسألة حساب بسيطة أوي .. المسألة بتقول إزاي دولة بتنتج سُدس إنتاج العالم من البترول مطلوب منها إنها بقدرة قادر تبطل تعتمد علي عائدات النفط ويلاقوا طرق تانية يدخلوا بيها فلوس لإقتصادهم وكل ده ضمن خطة طويلة عريضة متفهمش حتتعمل إزاي اسمها رؤية 2030 ودي عبارة عن سلسلة من الهبدات (يعني مش هبدة واحدة) إبتلانا بيها ولي العهد السعودي (محمد بن سلمان) .. أنا شخصياً فاهم منطق (محمد بن سلمان) إن لازم السعودية ودول الخليج كلها تبدأ تفكر هم حيعملوا إيه لما يجي اليوم اللي البترول ميبقاش له زباين خصوصاً إن العالم دلوقتي بيجري في إتجاه الRenewable Energy .. هي المشكلة إني مش شايف إن الطريقة اللي هو إخترها صح .. بمنتهي البساطة اللي حيحصل إن (محمد بن سلمان) عايز فلوس بالهبل عشان يحطها كاستثمارات في مشاريع ملهاش علاقة بالبترول و عشان يجيب الفلوس دي فهو ناوي يبيع حصة من شركة أرامكو أكبر شركة بترول مش بس في السعودية إنما في العالم .. إنك تبيع حصة في شركة كبيرة زي دي فإنت بتعملها في مزاد علني والمزاد ده بيتعمل في البورصة وبيتسمي Initial Public Offering و إختصاراً بيتسمي IPO .. لما إنت بتيجي تبيع عربيتك علي OLX مثلاً فأول خطوة هي إنك تقيم سعرها وتبيع للي يقدملك أعلي سعر قريب من السعر اللي إنت حاطه .. المشكلة إن السعوديين مقيميين شركة أرامكو بإنها ب2 ترليون دولار .. أنا عارف إنك اتخضيت من المبلغ بس حاول تتخيل صدمة حد كان ناوي يشتري شوية من أسهم الشركة.

الحقيقة إن تقييم السعوديين لثمن أرامكو عامل مشكلتين:

• أول مشكلة إن لو بفرض إن أنا زبون سقع و برده حشتري أسهم في أرامكو رغم السعر المبالغ فيه فأنا حطلب إني أبص علي كل الورق و الحسابات و التفاصيل و الشيكات يعني بإختصار عايز أعرف أنتوا مخبيين إيه تحت غطا البلاعة .. كحل للمشكلة دي السعوديين معينيين فريق كامل من المحاسبين و الإقتصاديين شغالين عشان أي حد ناوي يشتري سواء رجل أعمال أو بنك أو شركة عنده أي سؤال يجاوبوا عليه و الفريق ده شغال برده مع بورصات لندن و نيويورك و طوكيو و غيرها عشان لو فيه أي مشاكل يحلوها .. لو ده يطمنك فرئيس شركة أرامكو (أمين ناصر) طلع قال إن الIPO حيتعمل في كل بورصات العالم الكبيرة .. هل ده حيحصل فعلاً أو لا؟ الله أعلم أنا بس بحاول أطمنك و أنقلك الكلام اللي هو قاله.
• ثاني مشكلة إن سعر برميل البترول دلوقتي وصل 70 دولار وده معناه إن فيه ضغط دولي علي السعودية إنها تزود إنتاجها عشان السعر يقل شوية بس ده حيعمل مشاكل بين السعودية وبين الدول التانية جوه منظمة OPEC ودي الدول اللي بتصدر بترول واللي من مصلحتهم إن سعر البرميل يفضل عالي عشان يحققوا أرباح عالية فإنت منين جاي تقولي إن أرامكو ثمنها 2 ترليون دولار وأنا عارف إنك إحتمال بكره الصبح تزود إنتاجك وهوبا سعر بيع البرميل يقل جامد وكأني كمستثمر رميت فلوسي علي الأرض.

(أمين ناصر) المدير التنفيذي لشركة أرامكو.

هو إحنا نعرف إيه عن أرامكو Aramco؟ لا بجد والله ده سؤال أنا بطرحه علي أي حد بيقرأ المقالة دي .. إنت تعرف إنها شركة بترول بس هل تعرف مثلاً إنها بتشغل كمان موانيء و إن تحت إيدها مثلاً ميناء كامل اسمه راس تنورة علي الخليج العربي وفيه صورة عندك له ويعتبر من أهم موانيء مش بس السعودية إنما العالم كله لإن ده الميناء اللي أرامكو بتصدر منه البترول بتاعها للعالم .. لو السعودية حتشبهها بالنادي الأهلي أيام (مانويل جوزيه) الله يمسيه بالخير فأرامكو هي (محمد أبوتريكه) .. لو حتشبه الإقتصاد السعودي ببرشلونة فأرامكو هي (ليونيل ميسي Lionel Messi) .. من غير أرامكو مفيش سعودية ومفيش إقتصاد سعودي .. ده اللي إنت محتاج تفهمه .. النفوذ اللي السعودية دلوقتي عايشة فيه و إن بكلمة منها تمشي عواصم عربية كاملة سببه أرامكو مش سببه أي حاجة تانية .. إن لما (محمد بن سلمان) أو عمه الملك (عبدالله) الله يرحمه أو حتي قبله الملك (فهد) الله يرحمه يتكلم أاميركا و روسيا و العالم يسمع فده مش سببه إن ولا واحد من اللي قلت اسماءهم دول بني أدمين جامدين فشخ قد ما سببه إن أرامكو هي اللي جامدة فشخ .. أرامكو بنت مستشفيات و طرق و مدارس و ودت ناس سعوديين يتعلموا بره .. بإختصار إنت بتتكلم عن شركة لو كانت السعودية كلها بُتدار بنفس الطريقة اللي هي بتُدار بيها لكان زمان السعودية دلوقتي حاجة زي سنغافورة أو كوريا الجنوبية كده .. أظن مفيد دلوقتي إننا ناخدك في جولة سريعة في تاريخ أرامكو عشان تفهم إزاي الشركة إتولدت و إزاي كبرت لحد ما بقت الديناصور الإقتصادي اللي هي فيه دلوقتي .. قصة أرامكو متقدرش تفصلها عن قصة المملكة العربية السعودية نفسها لإن الإتنين تقريباً إتولدوا مع بعض.

البداية كانت سنة 1933 .. في السنة دي كانت فيه شركة أميريكية اسمها Standard Oil of California اللي هي دلوقتي بقت شركة تشيفرون Chevron خدت موافقة من الملك (عبدالعزيز ال سعود) مؤسس المملكة إنها تشتغل في التنقيب عن البترول في مقابل إنها ادتله صندوق دهب ثمنه كان يعادل وقتها 50,000 جنيه إسترليني و الحقيقة إن (عبدالعزيز) خد الفلوس دي لإنه كان محتاجها أكتر من أي حاجة تانية عشان يصرف علي مملكته اللي لسه مولودة و مكنتش غير عبارة عن شوية قبائل لا عندهم إقتصاد ولا تعليم ولا أي حاجة خالص .. شركة Standard Oil of California بعتت فريق من علماء الجيولوجيا الأميريكيين ومعاهم شوية بدو سعوديين و كام جندي للحماية و إنطلقوا في صحراء الربع الخالي لحد ما يلاقوا بترول .. بفكرك بس إن الكلام ده كان زمان قبل ما يبقي فيه صور أقمار صناعية ولا GPS ولا أي حاجة من ده .. في يوم من الأيام واحد من الفريق اسمه (إيرني بيرج Ernie Berg) إكتشف حقل الغوار اللي طوله لوحده 113 كيلومتر و اللي يعتبر أضخم إكتشاف نفطي في التاريخ لحد دلوقتي .. فجأة قامت الحرب العالمية الثانية سنة 1939 و الدنيا سكتت لحد ما الحرب خلصت سنة 1945 و بعدها الفلوس بدأت تنزل زي المطر علي السعودية و دي كانت بداية إن السعوديين يفكروا يعملوا الشركة اللي هم سموها Arabian American Oil Company أو أرامكو Aramco .. عشان بس تقدر تفهم قد إيه أرامكو أثرت في تكوين المجتمع السعودي أنا محتاج أحكيلك حكايتين بسرعة أوي:

• الحكاية الأولي بتاعة واحد اسمه (عثمان الخويطر) .. ده الرجل العجوز أبو جلابية بيضا اللي عندك في الصور .. الرجل ده إتولد سنة 1933 و في الوقت ده كان السعوديين أغلبهم فقرا و لما (عثمان) كبر شوية كان شغال خدام في البيوت عشان يقدر يساعد في مصروف البيت .. سنة 1949 بدأ الكلام يكتر في السعودية علي إن فيه شركة لسه جديدة بتشغل ناس و بتديلهم فلوس حلوة ولو لقوك شغال ويجي منك حيعلموك .. (عثمان) خد بعضه و قطع المملكة كلها لحد ما وصل لمنطقة ظهران علي الخليج العربي اللي كانت أرامكو شغاله فيها .. في الوقت اللي أرامكو بدأت تشتغل في منطقة الخُبر اللي دلوقتي بقت ميناء تجاري مهم كانت الخُبر دي عبارة عن منطقة مهجورة مفيهاش غير شوية ناس قاعدين في بيوت من جذوع النخل و كل شوية ربنا يبتليهم بموجة من الملاريا تجيب أجل نص اللي عايشين فيها .. واحدة واحدة (عثمان) بدأ يثبت نفسه لحد ما لقوه يجي منه بعتوه تكساس في أميركا يتعلم هندسه البترول و جري الشريط تلاقيه قعد في أرامكو 35 سنة لحد ما وصل بقي نائب رئيس إدارة الحفر قبل ما يطلع معاش سنة 1996 و دلوقتي هو عايش في فيلا في كومباوند الحي الذهبي في ظهران اللي بتملكه أرامكو وعملاه للموظفين بتوعها.
• الحكاية الثانية لواحد اسمه (علي النعيمي) وده يبقي ابن غطاس لؤلؤ و أمه تبقي ست بدوية لا بتعرف تقرأ ولا تكتب .. (علي) إتعلم في مدرسة بنتها أرامكو و إتعين في أرامكو و هو عنده 12 سنة عشان يشتغل Office Boy يعني بيعمل شاي و قهوة في الكافيتريا .. واحدة واحدة (علي) إتعلم إنجليزي و حتي إتعلم إزاي يلعب بيسبول لحد ما الشركة ودته بعثة بيروت و بعد كده بعتوه بعثة أميركا و دخل الكلية و إتخرج و عمل ماجستير كمان .. سنة 1988 (علي النعيمي) بقي الCEO بتاع أرامكو عشان يبقي أول سعودي يبقي في المنصب ده و سنة 1995 إتعين وزير بترول.

(عثمان الخويطر) قصة نجاح مش بس لنفسه إنما لأرامكو كلها في السعودية استمرت أكتر من 35 سنة.

دي نقطة مهمة لازم تفهمها و هي إن أرامكو مش مجرد شركة بترول .. بالنسبة للسعوديين هي أكبر من كده .. أرامكو صنعت بني أدمين كانوا لولاها مش حيبقي ليهم فرصة يبقوا حاجة و دلوقتي بقوا ناس محترمة عملوا Career يفخروا بيها .. أرامكو أحيانا كتير المملكة كانت بتتعمل معاها علي إنها أداة في إيدها زي ما حصل مثلاً أيام حرب أكتوبر لما السعودية وقفت تصدير البترول للغرب .. وسط كل الكلام عن موقف الملك (فهد) ناس كتير متعرفش إن في السنة دي السعودية إشترت 25% من أسهم أرامكو و سنة 1980 سيطروا علي الشركة كلها وبقت بتاعتهم بس ده مش معناه إن الشركة من يوم وليلة كانت أميريكية إمبارح وبقت سعودية النهاردة .. أرامكو فضلت ماشية علي نفس النظام و الفلسفة اللي إتبنت عليها .. كتير من الموظفين الأمريكان اللي كانوا شغالين فيها فضلوا مكملين في شغلهم و الشركات الأميريكية فضلت تشتري منهم بترول عادي جداً .. في الوقت اللي السينمات و المسارح إتقفلت في المملكة كانت الكومباوندات بتاعة أرامكو فيها سينمات عادي خالص و رجاله وستات بيمشوا مع بعض ماسكين إيد بعض عادي و الستات بتلبس اللي هي عايزاه .. سبب إن أرامكو فضلت أرامكو و مباظتش بعد ما السعوديين سيطروا عليها سنة 1980 إن أرامكو فضلت ماشية علي إنها شركة قطاع خاص في بلد كلها ماشيه قطاع عام .. عشان تترقي في أرامكو لازم تثبت كفاءتك مش إنك تبقي قريب أمير.

في الوقت اللي شركات القطاع الخاص السعودي متعرفش حاجة اسمها إنها تسلم مشاريع في معادها و تحت الميزانية المتوافق عليها تلاقي إن أرامكو من شركات البترول القليلة مش بس في السعودية إنما في العالم اللي خدت سمعة زي الفل في النقطتين دول بالذات .. عيبها إنها مش مُطالبة ومتعودتش إنها تطلع تقرير سنوي بالأرباح و الخسائر و المصاريف فإنت فعلياً متعرفش زي ما قلنا تحت غطا البلاعة فيه إيه .. فيه شوية خبراء من بتوع الإقتصاد بيقولوا إن بسبب حقول البترول السعودية بسم الله ما شاء الله بقالها كتير شغالة فتكلفة التنقيب نفسها قليلة .. عندك مثلاً شركة زي Rystad Energy ودي شركة نرويجية شغالة في تحليلات السوق بتقول إن برميل البترول الواحد اللي بس بفكرك إن ثمنه دلوقتي 70 دولار واقف علي أرامكو ب4.88 دولار في حين إن شركة تانية زي Exxon Mobil الأميريكية مثلاً برميل البترول اللي هي بتبيعه بيقف عليها ب10.12 دولار .. لما تبدأ تجمع الفرق ده مع بعضه تلاقي إن أرامكو كقوة مالية هي أكبر بكتير من شركات زي Exxon Mobil أو Royal Dutch Shell .. نقطة تانية وهي إن في أرامكو مفيش مجلس إدارة كل شوية يزن فوق دماغها عشان تطلع تقرير كل 3 شهور يقول أرباح الشركة كام .. أرامكو أصلاً مش في دماغها إنها تجيب أرباح وده بيخليها تقدر تبص لقدام أوي وإنها ميبقاش عندها أي مشكلة تستثمر فلوس في تكنولجيا غالية في مقابل إن التكنولوجيا دي تخليها تقدر تنتج بترول لسنين و سنين و سنين .. خليني أديلك مثال بسيط عشان تفهم أنا قصدي إيه بالضبط.

أرامكو تحت إيدها حقول بترول كتير بس ميجوش حاجة جنب حقل المنيفة اللي بينتج أكتر من 900 ألف برميل يوميا.

في التسعينات أرامكو بدأت تنتج بترول من حقل نقط اسمه شيبة و لما بدأوا شغل استخدموا تكنولوجيا جديد لانج اسمها Horizontal Drilling يعني الحفر الأفقي بحيث إن إنت بدل ما كنت زمان بتحفر عمودي علي سطح الأرض بتحفر موازي لسطح الأرض .. التكنولوجيا دي كانت مكلفة جداً بس أرامكوا مكنش عندها أي مشكلة تصرف عشان تجيبها خصوصاً إن مع الوقت إكتشفوا إن كان عندهم حق لإن الحقل ده بالذات إكتشفوا إنه عامل زي عظم السمك فالVertical Drilling مكنش حيخليك تطلع كل البترول اللي فيه .. الفكر ده مخلي حقول البترول السعودي لسه ما شاء الله يعني بتنتج لحد دلوقتي علي عكس حقول تانية في بحر الشمال وفي خليج المكسيك اللي الإنتاج بتاعها قل جامد .. في الكام سنة الجايين أرامكو ضامنة إنها حتشتغل كويس .. إحتياطي النفط بتاعهم معدي ال260 مليار برميل وده لوحده أكبر من أي إحتياطي بتملكه أي شركة بترول منافسة .. أرامكو تحت إيدها أكبر حقلين نفط في العالم ولسه عمالين يكتشفوا حقول جديدة زي حقل منيفة اللي قالوا إنه بيقدر ينتج 900,000 برميل يومياً.

مشروع مجمع الصدارة للبتروكيماويات بيمثل خطوة من خطوات أرامكو إنها تنوع من أعمالها.

حالياً أرامكو بدأت تبص لنفسها علي إنها ممكن تخش في كذا Business مختلف و متبقاش بس شغالة في التنقيب عن البترول بحيث يتأقلموا مع رؤية 2030 دي .. هم بدأوا يتجهوا لمجال البتروكيماويات اللي الحقيقة بيجيب فلوس حلوة أوي ويمكن مثال علي كده مشروع مصنع صدارة للبتروكيماويات بتكلفة 20 مليار دولار بالتعاون مع شركة Dow Chemicals .. وشغالين علي التنقيب علي الغاز الطبيعي وكمان ماضيين كذا عقد مع شركة Google عشان تيجي تعمل شوية مشاريع Data Centers في المملكة بحيث أرامكو تبدأ تخش في Business جديد عليها أوي هو الData Analysis و Cloud Computing .. اللي أنا شايفه إن واضح كده إن (محمد بن سلمان) بيستسهل .. هو عارف إن أفضل حل إنه يعمل كذا شركة زي أرامكو بنفس هيكلتها و بنفس طريقة شغلها بحيث يفتلحهم الباب يشتغلوا في كذا مجال .. المشكلة إن بناء شركات زي دي دلوقتي صعب و بيحتاج مجهود و فلوس و الأهم محتاج ناس إيدها نظيفة .. هو شاف إن الأسهل إن بدل ما يبقي عندنا كذا أرامكو لا إحنا يبقي عندنا أرامكو كبيرة أوي شغالة في كذا حاجة .. هل ده حينفع؟ الله أعلم .. هل ده له أثار سلبية في المستقبل؟ أكيد علي الأقل إنت بتخاطر إن أرامكو تبقي دولة جوه الدولة .. أيا كان رأيي إيه و أيا كان أنا شايف إيه أكيد نفسي إن الدنيا تتحسن و الشغل يرجع تاني زي الفل لإن زي ما بنقول حد يقول للرزق لا.

المصدر:

هو مقالة نشرت في جريدة The New York Times الأميريكية اسمها An oil giant is taking big steps. Saudi Arabia can’t afford for it to slip يعني شركة بترول عملاقة بتاخد خطوات كبيرة و المملكة العربية السعودية مش حتقدر تستحمل إنها تسيبها تقع وده لينك المقالة الأصلية:

https://www.nytimes.com/2018/06/16/business/energy-environment/saudi-arabia-aramco.html