ناس كتير بتبقي مش فاهمة إن الحكومات بما إنها بتتكون في الاخر من بني أدمين فإنت نظرياً زي ما بتفهم البني أدمين من تصرفاتهم فإنت برده بشوية تركيز تقدر تفهم الحكومات من تصرفاتها .. الفكرة دي يمكن للوهلة الأولي بيبقي صعب مخك يقبلها بس صدقني هي دي الحقيقة .. سواء بتتكلم عن شركات أو مؤسسات أو حتي حكومات فطالما اللي ماسكهم بني أدمين فإنت لو قعدت تتفرج عليهم و معاك ورقة و قلم و بتكتب تصرفاتهم تقدر مش بس تفهم دماغهم ده إنت كمان تقدر تتوقع هم حيعملوا إيه .. ليه ده مهم؟ .. عشان مش كل الحكومات في الدنيا بيشتغل فيها ناس عندها ضمير .. مش كل الحكومات بتشتغل بما يرضي الله .. المشكلة بتكبر كل ما البلد اللي إنت بتتكلم عنها كبرت و ده اللي حيخلينا نتكلم عن اللي بيحصل اليومين دول للإقتصاد الصيني و اللي قبل ما تتخض أو تفرح أوي علي حسب إنت قاعد في مدرجات مين لازم الأول نرصلك الحقايق ورا بعضها:
- حقيقة رقم واحد .. الناس بتوع الإقتصاد اللي ملهمش لا شغلة ولا مشغلة غير إنهم يقعدوا يبصوا علي أرقام و إحصائيات ما يسمي بالأداء الإقتصادي بدأوا يلاحظوا إن في المتوسط إنفاق الأسرة الصينية بدأ يقل .. بمعني أخر .. الزوج مبقاش يقول لنفسه أنا عايز أروق علي عيالي النهاردة فحوديهم فسحة ملاهي بكين .. التريند دلوقتي إن الأسر الصينية بقت تقول لنفسها يلا نحوش .. ده لوحده مش عيب .. يمكن كلنا شفنا إزاي فيروس كورونا Covid-19 داس علي وشنا كلنا فطبيعي إننا منروحش لسكة يلا نبعزق القرشين اللي معانا.
- حقيقة رقم إتنين .. المعدل اللي الشركات الصيني بتستلف بيه فلوس من البنوك بدأ يقل بشكل خلي البنوك هناك تبدأ تهرش في شعرها و تسأل نفسها هو فيه إيه .. إن شركاتك تاخد قروض عشان تعمل بيزنس و تضخ الفلوس في السوق فده بيخلق ما يسمي حركة السوق فلما الحركة دي تقف فده بيخلي زي ما قلنا الناس اللي بيقولوا علي نفسهم بيتابعوا الأداء الإقتصادي يبدأوا يسألوا نفسهم هو خير كفا الله الشر.
- حقيقة رقم ثلاثة .. بدأنا نشوف إن معدلات البطالة بين الشباب الصيني بدأت تزيد الفترة اللي فاتت .. في يونيو 2023 مثلاً طلع رقم رسمي من الحكومة الصينية إن معدل البطالة بين الشباب وصل 20% .. ده مش معناه إطلاقاً إن فيه أزمة توظيف .. محدش قال إن عشان معدلات البطالة بدأت تزيد يبقي كده البلد بتروح في سكة اللي يروح ميرجعش .. بس رغم كده فجأة في سبتمبر 2023 طلع قرار من الحكومة الصينية بإن من هنا و رايح حيتم حظر نشر أي أرقام و إحصائيات خاصة بالإقتصاد بتاع البلد .. بمجرد ما القرار ده طلع ناس كتير قالت في صوت واحد أحيه يا أبو سوسو أحيه.
خليني أقولك من دلوقتي إن الأزمة دي اللي بيعيشها الإقتصاد الصيني لا تستدعي إطلاقاً حالة الذعر اللي ناس كتير عايشة فيها لإن الأزمة دي زيها زي أزمة العلاقة التوكسيك بين (شيرين) و (حسام حبيب) ليها وجهتين نظر .. ناس شايفه إن الموضوع لا يستعدي الهلع ده كله قصاد ناس مش قادرة تبطل تصرخ يلهوووووووووي .. النهاردة حنحاول بهدوء جداً نوريك وجهتين النظر .. ليه إنت محتاج تهدي؟ و ليه إنت محتاج تقلق؟ بس قبل ما نخش في الخناقة دي إنت محتاج تستهدي بالله و ناخدك في جولة سريعة جداً لفهم ما يسمي بالنموذج الصيني China Model لإزاي ممكن بلد تتحول بقدرة قادر من إنها متداس علي وشها لبلد كل الناس نفسها تبقي زيها و الرحلة دي لازم نبدأها من بعد زيارة الرئيس الأميريكي (ريتشارد نيكسون) للصين سنة 1972 و اللي من بعدها بدأ الإنفتاح الصيني علي العالم .. أول خطوة كانت محتاجة تتعمل هي إن الصين تختار طريق تمشي فيه لإن الدول اللي زي الصين دي اللي عايزة تبقي حاجة و تبني لنفسها اسم غالباً بيكون قدامها سكة من إتنين:
- أول سكة إنها تبقي بلد قائمة علي الاستثمارات .. زي دبي كده .. إنت بتروح بكل أدب لأقرب بنك تقوله لو سمحت إديني قرض أفتح بيه بيزنس .. بتاخد القرض و تبدأ تشتغل و تبيع و تكسب .. يجي معاد سد الدين .. تقوم رايح لنفس البنك تقوله أنا عايز أخد قرض تاني بضمان البيزنس بتاعي .. البنك بيوافق .. تقوم واخد الفلوس دافع بيها الفايدة بتاع القرض الأولاني و فاتح بيزنس جديد .. يجي معاد سداد القرض الثاني .. تقوم رايح لنفس البنك تقوله عايز أخد قرض ثالث بضمان البيزنس الثاني .. و لفي بينا يا دينا.
- تاني سكة إنك تبقي بلد قائمة علي الاستهلاك .. إنت بتفتح الدنيا للناس .. اللي عايز يفتح بيزنس يفتح .. اللي عايز يشتغل في أي حاجة يشتغل .. حنخفف من عليك الضرائب و مش حنضايقك بإننا نهريك تصاريح .. هنا الحكومة مش هي اللي راحت تاخد قرض إنما سابت الناس هي اللي تروح تاخد القرض.
الصين إختارت السكة الأولانية .. جري الشريط من سنة 1972 لحد سنة 2000 و كانت الصين بقت عملاق إقتصادي بس خلال الفترة من 2000 لحد سنة 2005 كان رئيس وزراء الصين وقتها (ون جيان باو Wen Jiabao) شوية و حيبوس إيد الناس يلا نتحول من سكة الإقتصاد القائم علي الاستثمارات لإقتصاد قائم علي الأستهلاك .. إيه المنطق ورا اللي الأخ (ون جيان باو) بيقوله؟ .. هنا حنبدأ الخناقة بتاعتنا:
يا جماعة العربية ماشية هي بس دايسة فرامل دلوقتي:
أصحاب الرأي ده لما تيجي تتكلم معاهم تلاقيهم رافعين يافطة مكتوب عليها GDP بتاع الصين زي الفل .. يطلع إيه GDP ده؟ .. ده إختصار Gross Domestic Product أو الناتج الوطني الإجمالي وده عشان تفهمه بما إننا بنقول إن الحكومات زيها زي البني أدمين فتعالي نتخيل إن الصين دي زيها زي عيلتك بالضبط .. لنفترض إنك رجل متجوز و إنت و مراتك بتشتغلوا .. ده معناه إن أول كل شهر مرتبك و مرتبها بتحطوه علي بعض عشان المبلغ ده يبقي مصروف البيت .. لنفترض إن مامتها مثلاً بتديها كل شهر مبلغ صغير فالمبلغ ده هو كمان بيتضاف علي مرتبك و مرتبها .. بإختصار شديد GDP هو مصروف البيت .. هو مجموع كل الفلوس اللي بتخش البلد أول كل شهر سواء بقي من الضرائب أو بيع البترول أو أيا كان مصدر الفلوس اللي بتخش البلد .. فيه ناس في الإقتصاد مقتنعة بإن طول ما GDP بتاع البلد بيزيد يبقي إقتصاد البلد زي الفل .. بناء علي الأرقام بتاعة صندوق النقد الدولي فخلال سنة 2023 GDP بتاع الصين حينمو بنسبة 5.1% .. سنة 2024 حينمو بنسبة 4.5% .. سنة 2025 حينمو بنسبة 4.6% .. تاني .. طول ما الGDP بينمو يبقي تحط في بطنك بطيخة صيفي .. مش مصدقني؟ .. طب أزيدك من الشعر بيت.
هل تعلم إن علي سبيل المقارنة الإقتصاد الأميريكي متوقع إنه خلال سنة 2023 ينموا بمعدل 2% .. سنة 2024 حينموا بنسبة 0.9% .. سنة 2025 حينموا بنسبة 1.9% .. يعني يا متعلمين يا بتوع المدارس مش بس GDP بتاع الصين حينمو ده نسبة نموه أعلي من الإقتصاد الأميريكي يبقي فين المشكلة؟ .. صحيح معدل النمو مش عالي زي ما الصينيين عايزين بس أهو الحمد لله الدنيا ماشية .. العربية دايسه فرامل بس ماشية.
نقول كمان .. بما إن GDP بتاع البلد هو هو مصروف البيت بتاع عيلتك فزي ما الغالبية العظمي من مصروف البيت بيكون جاي من المرتب الشهري بتاع الزوج و الزوجة و بيجي وراه بعد كده أي مساعدات مالية بتيجي من بره أو أي دخل إضافي مش ثابت فبرده GDP بتاع أي بلد بيكون برده متقسم نفس التقسيمة دي:
- الغالبية من GDP بتاع أي بلد بيكون من الاستثمارات المباشرة اللي بتروح عشان تعمل مشاريع.
- المركز الثاني بيجي من الفلوس اللي الناس بتصرفها علي أكلها و شربها و الهدوم و التعليم و المواصلات و الفواتير بتاعة الموبايلات وده اللي بتوع الإقتصاد بيسموه Household Consumption أو الاستهلاك المحلي و برده عشان تفهمه هي أي فلوس فواتير مش رايحة للحكومة إنما رايحة لشركات القطاع الخاص في البلد.
- المركز الثالث بيكون من الخدمات اللي البلد بتقدمها و دي بالنسبة لك تبقي كارتات الطرق أو فلوس الفواتير اللي بتروح للحكومة.
- أخر حاجة هي فلوس التصدير ودي بالنسبة لي كانت صدمة كبيرة إن التصدير بيجيب فلوس حلوة بس مش هو أهم حاجة بتجيب فلوس للبلد.
طب فين المشكلة؟ .. من أول سنة 1980 لحد سنة 2000 نسبة Household Consumption من GDP بتاع الصين كان حوالي 48% .. صحيح الاستثمارات المباشرة هي النامبر وان بس مش أوي .. يدوبك .. سنة 2000 لما الصين إنضمت رسمياً لمنظمة التجارة العالمية الدنيا إتقلبت .. فجأة نسبة Household Consumption أو الفلوس اللي بتخش للبلد من جيب الناس قلت بقت 34% و الكلام ده كان سنة 2010 قصاد إن نسبة الاستثمارات المباشرة عدت 50% .. ليه الحتة دي مهمة؟ .. في المتوسط يعني في كتب الإقتصاد نسبة Household Consumption من GDP بتاع أي بلد المفروض إنه بيلعب حولين 60% .. في أميركا مثلاً نسبته 70% .. ده معناه إن صحيح أرقام GDP بتاعة الصين زي الفل و حتفضل زي الفل بس في نفس الوقت لما تيجي تفصص الأرقام دي حتلاقي إنها جايه من استثمارات بالهبل بقالها 15 سنة بس رايحة لناس مش عارفة تستخدمها ولا تستفيد منها .. يعني إنت عمال تضخ فلوس في مشاريع فشيخة بس مش لاقيه اللي يستفاد بيها.
نقطة تانية مهمة جداً ماسك فيها الناس اللي شايفة إن الدنيا مش حقول زبادي خلاط بس علي الأقل مش مخلياك محتاج تقلق إن الصين بلد بيحكمها رجل واحد هو زعيم الأمة (جي جينبينج Xi Jinping) .. ده معناه إن القرار سهل يتاخد .. الصين مش زي أميركا اللي هي بلد ديموقراطية بيحكمها الخناقة بين حزبين فلو الرئيس الديموقراطي حب يصلح الحال المايل فالمعارضة الجمهورية حيبقي علي قلبها زي العسل إن الإقتصاد يتخرب بيته ولا إن يتقال إن الديموقراطيين جابوا الأزمة الإقتصادية في شوال .. بجرة قلم (جي جينبينج) يقدر يضخ مليارات الدولارات من الإحتياطي النقدي الأجنبي الصيني في السوق.
يا جدعان إحنا حنلبس في الحيط:
الناس اللي شايفة إن الدنيا رايحة في داهية بيقولوا للناس اللي شايفة إن الدنيا حلوة مش أنتوا فرحانين أوي بمعدل النمو في الناتج الوطني الإجمالي .. طب تعالي يا حلو منك له شوفلي كده من سنة 2000 لحد سنة 2019 معدل النمو في GDP بتاع الإقتصاد الأميريكي كان كام؟ .. حتلاقيه في المتوسط يعني بينمو بنسبة 2% كل سنة .. ده معناه إن النمو بتاع الإقتصاد الأميريكي صحيح مش كبير بس علي الأقل محافظ علي نسبته و حيفضل يتمرجح حولين 2% من أول سنة 2000 لحد سنة 2025 .. جميل .. تعالي إعمل نفس الحسبة علي الإقتصاد الصيني حتلاقي إن من سنة 2000 لحد سنة 2019 اللي هي السنة اللي Covid-19 فرقع في وشنا معدل النمو في GDP الصيني كان بيتمرجح حوالي نسبة 9% .. ده معناه إن من سنة 2019 لحد سنة 2025 و معدل النمو في GDP وقع النص تقريباً .. بدأت تفهم المشكلة فين؟ .. حط ده قصاد إن المجتمع الصيني إتداس علي وشه جامد بسبب تطبيق سياسة الطفل الواحد و بقت نسبة العواجيز فيها أعلي بكتير من نسبة الشباب و حتبدأ غصب عنك تحط إيدك علي بقك.
المشكلة خلي بالك أكبر من إن مجرد معدل النمو بتاع الإقتصاد الصيني بعافية شوية .. الصين سوق كبير بينتج كتير فشخ و بيستهلك كتير فشخ .. خد مثلاً قطاع الطيران المدني .. ده قطاع زيه زي دول كتير زبون شركة من شركتين يا إما بوينج Boeing الأميريكية أو إيرباص Airbus الأوروبية .. طب لما الإقتصاد الصيني معدل نموه يقل فده معناه بالتبعية إن قطاع الطيران المدني بتاعه خلال السنين الجاية بدل ما كان حيعوز يشتري مثلاً 50 طيارة جديدة حيحتاج 20 طيارة بس فده حيسمع إن شركة بوينج بدل ما كانت حاطة خطة إنها سنة 2030 تعين 50 موظف جديد حتلاقي نفسها محتاجة تعين 20 بس .. الصين سوق بيستهلك كميات ضخمة جداً من الخمور مثلاً فلما الإقتصاد الصيني يبدأ ينكمش بدل ما السوق الصيني كان بيشتري مثلاً 100 طن نبيذ فرنساوي حيشتري 50 بس فده معناه إن شركات النبيذ الفرنساوي مش حيبقي ليها مبرر إنها تزرع مساحات أكتر .. الكلام ده يمشي برده علي الشركات الصينية اللي هي كمان بتبيع للسوق المحلي اللي لما هو ينكمش فمبيعات الشركات دي حتقل.
الناس اللي حاطة إيدها علي قلبها شايفين إن اللي حيجيب أجل الإقتصاد الصيني هو سوق العقارات و اللي زيه زي أي سلعة في الدنيا من أول الجبنة البراميلي لحد اليورانيوم ماشي بمبدأ العرض و الطلب مش زي سوق العقارات عندنا في مصر اللي ماشي بالشعوذة .. سعر العقار في الصين عمال يقع و ده معناه حاجة غريبة جداً يمكن صعب عليك إنك تستوعبها لإنها العكس تماماً من اللي إنت بتشوفه هنا .. لو مثلاً فيه كومباوند و ليكن اسمه شنغهاي بارك و أنا قررت أشتري فيه شقة كلفتني مثلاً الف يوان اللي هو عملة الصين فعشان زي ما قلتلك سعر العقار عمال يقع فبعد شهر سعر الشقة بقي 500 يوان فإنت طبيعي تضايق لإنك شايف إن المطور العقاري اللي باعلك الشقة ضحك عليك .. مش بس كده .. الناس دي شايفة إن أصلاً يعني فكرة إن القرار في الصين في إيد رجل واحد أساساً مش حاجة كويسة .. ليه الناس دي بتقول كده؟
كان يا مكان سنة 2008 لما إنهار بنك ليمان براذرز Lehman Brothers و أميركا عاشت أسوأ أزمة إقتصادية في تاريخها فاللي حصل إن حكومة طويل العمر (جي جينبينج) فتحت المحبس علي أخره و ضخت فلوس بالهبل في السوق عشان تلحق إقتصاد البلد .. ده فعلاً و الحق لازم يتقال خلي الصين تطلع من الأزمة المالية العالمية زي الشعرة من العجين بس ده في حد ذاته خلق مشكلة تانية محدش كان عامل حسابه عليها .. لما الحكومة الصينية ضخت فلوس في السوق فده خلي المحليات في البلد قلبها يجمد و تروح للبنوك تستلف فلوس عشان تعمل بيها مشاريع بنية تحتية بالهبل .. أه خدامك أنا و العربية إن الصين من 2008 لحد دلوقتي إتعمل فيها مشاريع تخليك تقول وه كيف عملوا الكباري و الطرق دي كلها بس في نفس الوقت ده خلاك قصاد حكومة مديونة بتسعة ترليون دولار للبنوك .. إنت متخيل الرقم؟ .. إنت متخيل حكومة مديونة بالرقم ده لو دخلت في أزمة إقتصادية ممكن تقطم وسطها إزاي؟ .. عشان تفهم نقطة الديون دي كلها تعالي نضربلك مثال بمصر.
لنفترض إن الحكومة عندنا تفتق إلي ذهنها فكرة جهنمية إن ليه لا نبني أكبر مطار في العالم في مدينة السيمبلاويين .. إنت غالباً المدينة دي مش فارقة معاك لدرجة إنك مخدتش بالك إني كتبتها غلط و كان المفروض أكتب السنبلاويين بس مش دي القضية .. القضية إن السنبلاوين مدينة صغيرة مش مطلوب منها إنها تشغل حيز كبير من فراغ تفكيرك .. ناس كتير من اللي أهلها صرفوا كويس علي تعليمها حتقول سنبلاوين إيه اللي أنتوا رايحين تبنوا فيها مطار .. دي مدينة بتعتبر التوكتوك هو وسيلة المواصلات الرسمية عندها .. حترد الحكومة علي الناس دي بإيش دراكوا أنتوا الأهمية الإستراتيجية الإقتصادية القومية للسينبلاوين .. المهم الحكومة بتاخد قرض بالشيء الفلاني و المطار بيتبني .. فيه فلوس حلوة حتتضخ في السوق راحت في مرتبات و مواد خام و تأجير أوناش و فلوس للإستشاري و للمقاول و الناس حلت بقها .. الناس بتوع الإقتصاد بيمسكوا الأرقام بتاعة GDP و شوية حيزغرطوا .. هوبا المطار بيتم إفتتاحه .. جم يشغلوه لقوا المطار فاضي مفيش حد لا بيسافر منه ولا بيسافر ليه .. ده معناه إن مشروع مطار السينبلاوين ده بيتقال عليه Unproductive Investment يعني استثمار مجابش همه .. كتير من المشاريع اللي عملتها الصين في السنين اللي فاتت بتتحط تحت مظلة المشاريع اللي مش جايبه همها دي و اللي مكانش ليها أي تأثير غير إن إقتصاد البلد إتفشخ ديون زي ما قلنا لحد ما بقينا عند مرحلة إن ديون الصين بقت 300% من الرقم بتاع GDP بتاعها .. ده ملوش غير اسم واحد إنه خراب بيوت مستعجل .. صحيح إن المشاريع دي كانت السبب في إن GDP بتاع الصين يفضل يزيد بس زي ما الفنان (سمير غانم) الله يرحمه قال في مسرحية المتزوجون جيت أضبط القميص البنطلون ضرب.
الدرس اللي يمكن أتمني نتعلمه من أزمة الإقتصاد الصيني هو إن صحيح الطموح حلو مفيش كلام بس الأحلي منه إنك تسيب الناس تشتغل .. ناس كتير كان نفسها تصحي الصبح تلاقي الصين بقت القوة العظمي الأولي في العالم يمكن أكتر من الصينيين نفسهم بس الحلم ده بقي رسمياً خلاص مستحيل يحصل و مفيش حد حيعرف يسحب البساط من تحت رجل الأمريكان .. مش لإن الأمريكان جامدين زحليقة إنما لإن عندهم الحاجة اللي مش عند حد تاني .. سابوا الناس تشتغل .. مش حتفرق لما تسمع خبر إن في أغسطس 2023 الحكومة الصينية قررت تضخ ترليون يوان أو ما يعادل 203 مليار دولار في السوق علي أمل إن الخطوة دي تحل الأزمة طالما إنت عايش في بلد متقدرش تقول فيها رأيك بحرية و خليني أديلك مثال علي ده عشان تعرف بجد هو إيه الفرق بين الصين و أميركا .. يحكي أن زمان (إيلون ماسك Elon Musk) أول ما عمل شركته SpaceX مكنش عارف ياخد شغل عشان وزارة الدفاع الأميريكية كانت بتدي عقود تطوير برامج صواريخ الفضاء بالإسناد المباشر للشركات الكبيرة في السوق زي بوينج Boeing و لوكهيد مارتن Lockheed Martin .. يقوم (ماسك) يعمل إيه؟ .. رفع قضية علي وزارة الدفاع بيتهمهم فيها بالفساد .. مش بس كده .. هو كسب القضية .. جري الشريط كام سنة و بقت SpaceX هي النامبر وان في السوق .. إنت متخيل يعني إيه بني أدم صحيح ملياردير بس في الأخر مواطن عادي يرفع قضية علي المؤسسة العسكرية بتاعة بلده يتهمهم فيها بالفساد .. دي لو إتعملت عندنا تطير فيها رقبته .. قصاد إن في الصين عشان (جاك ما Jack Ma) الملياردير برده بس عنده شركة علي بابا Alibaba تجرأ بس و قال حاجة مش عاجباه في البلد طلع قرار بإعتقاله و إتفرضت عقوبات علي شركته خلت أرباحها خلال سنة 2023 يتخسف بيها الأرض النص .. قلتها قبل كده و حكررها تاني .. البلد اللي مبتعرفش تقول فيها رأيك عمرها ما حتشوف نمو إقتصادي .. عمرها.
يمكن أزمة الإقتصاد الصيني دي مش جايه في وقتها خالص للناس اللي كانت يا عيني حاطة أمل كبير معرفش جابوه منين في إن إنضمام مصر لكيان البريكس BRICS ممكن بشكل أو بأخر يساعد في تخفيف أزمة الدولار عندنا بس الحقيقة المرة اللي عايزك تعرفها إن ده مش حيحصل .. طول ما (جي جينبينج) في السلطة مش عايز يسيبها و طول ما الصين بلد محدش يعرف يقول رأيه فيها حتي اللي معاهم فلوس فمستحيل الصين تطلع بره ظل أميركا و يمكن الأزمة دي أهم ضحية ليها هي سعر اليوان و خالص تعازيا القلبية الحقيقة للناس اللي تخيلت مناورة البريكس دي ممكن تجيب نتيجة و يمكن أهو الصين تجربة قصاد عنيكوا في إزاي إن لم تعتبر صرت عبرة.
المصادر:
- مقالة بعنوان All you need to know about China’s economic slowdown نشرت في مجلة Bloomberg و ده لينك المقالة الأصلية:
https://www.bloomberg.com/news/newsletters/2023-09-01/china-s-economy-is-officially-fragile-could-it-collapse#xj4y7vzkg - مقالة بعنوان China’s economy is slowing down. What gives? نشرت في موقع Vox و ده لينك المقالة الأصلية:
https://www.vox.com/world-politics/2023/8/29/23845841/chinas-economy-xi-expert - مقالة بعنوان Five reasons why China’s economy is in trouble نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-asia-china-62830775
