أزمة ديون دبي .. أوعي تتداين .. أوعي.

لينك التسجيل الصوتي علي Sound CLoud:
https://soundcloud.com/user-112011687-312727988/oxq8s02ms13n

فيه حاجات في الدنيا مضمون إنك لو مشيت وراها إن ضغطك يعلي و يتحرق دمك و تحس إنك دايماً بتقول ليه يا رب بتعمل فيا كده .. تشجيع أرسنال أو الزمالك من الحاجات دي .. إنك تشتغل مهندس في مصر من الحاجات دي .. الديون برده من الحاجات دي .. صدقني لو قلتلك إن الديون دي إبتلاء من ربنا و يمكن نصيحتي ليك سواء كنت بتحاول تدبر مصاريف الجواز أو إنك تدير وزارة المالية لدولة إنك أوعي تتداين .. أوعي .. هي الفكرة مش في الديون نفسها قد ما الفكرة في النتائج المترتبة علي الديون و خليني أفهمك قصدي.

لو إنت بني أدم من اللي إيدهم فرطة في المصاريف اللي كل ما يشوف حاجة متعلقة في فاترينة بتحس إن راكبه مليون عفريت و لازم يبعزق فلوسه و يشتريها فإنت غالباً اللي جاي علي قد اللي رايح .. مرتبك اللي بتاخده أول الشهر بيخلص علي أخره .. مش عيب فيه ناس كتير كده .. لو جت مثلاً أزمة إقتصادية زي اللي إحنا فيها دلوقتي بسبب فيروس Covid-19 و الشركة اللي إنت شغال فيها إستعبطت و قالتلك إن مرتب الشهر ده حيقل 25% مثلاً فإنت صحيح بيتعكنن عليك بس علي الأقل إنت بقيت عارف إنت حتعمل إيه .. حتحاول تقلل من مصاريفك شوية .. إفرض بقي لو إنت مديون .. ساعتها إنت إتداس علي وشك .. إنت كل شهر المفروض تدفع نسبة معينة من مرتبك عشان تسدد الدين بالفوايد بتاعته و معني إن مرتبك قل يبقي إنت كده حتدفع قسط الدين و مش حتلاقي تاكل .. إن حضرتك تقرر إنك تتداين دي حاجة لطيفة جداً لو إنت معاك بلورة سحرية و تقدر تشوف المستقبل و عارف إن خلال السنين اللي حضرتك حتسدد فيها أقساط الدين مش حيحصل مصيبة في البلد ولا في العالم .. غير كده مجرد إنك تتداين ملهاش إلا معني واحد .. إنت حيتداس علي وشك .. ده في حالة إنك بتتكلم عن بني أدم فمابالك بقي لو بنتكلم علي دول .. و لإن الكلام علي الإقتصاد ميحلاش من غير ما نجيب في سيرة الناس فتعالوا سوا ننم شوية علي إخواتنا الإماراتيين و أخص بالذكر اللي بيحكموا دبي.

دبي عندها مشكلة كبيرة و هي إنك لو بتتكلم عن عالم طبيعي لا فيه حروب ولا فيه فيروس كورونا فإقتصادها مش جامد أوي زي ما إنت متخيل .. إقتصاد دبي عامل زي ما إنت بالضبط يبقي ليك واحد صاحبك مقضي حياته كلها في الجيم و عامل فورمة الساحل و بياكل أكل هيلثي بس مناعته بعيد عنك مش قد كده .. أي دور برد بيخليه راقد في السرير .. هو تحسه جامد و صحته حلوة ما شاء الله في الظروف الطبيعية .. اللي مخلي إقتصاد دبي مناعته ضعيفة هو حاجة إسمها GRE و دي إختصار Government Related Entities و دي تبقي الشركات الإماراتية اللي مرتبطة بالأسرة الحاكمة في دبي اللي هي أسرة (أل مكتوم) و أخص بالذكر الحقيقة شركة دبي العالمية Dubai World.

.. علي سبيل التشبيه برده لو حنفترض إن البيزنس بتاع إمارة دبي شبه البيزنس بتاع المافيا فدبي العالمية هي (دون كورليون) بتاع العيلة .. هي الأب الروحي اللي في إيده كل حاجة .. كل إستثمارات دبي اللي ماسكها هي الشركة دي .. ده معناه إن ديون الشركة دي لحد دلوقتي وصلت 88.9 مليار دولار و الرقم ده بناء علي دراسة عملتها شركة إستشارات مالية إسمها Capital Economics مقرها في لندن .. الرقم ده لازم يتحط في سياق تبقي إنت قادر تفهمه .. لو إحنا جبنا كل الفلوس اللي بتخش لدبي من السياحة للبترول للإستثمارات اللي هو في الإقتصاد بيسموه الناتج الوطني الإجمالي GDP و دي إختصار Gross Domestic Product حتلاقي إن ديون شركة دبي العالمية لوحدها حوالي 80% من الناتج الوطني الإجمالي لدبي ..  المشكلة مش في كده .. المشكلة إن بسبب مواعيد سداد أقساط الديون فدبي مطالبة بقدرة قادر و معرفش هم حيعملوا ده إزاي إن خلال 3 سنين تكون سددت 21.3 مليار دولار من 88.9 مليار دولار اللي عليها .. دول برده عشان تبقي فاهم 19.4% من GDP بتاع دبي .. لسه إنت رايح فين السواد مخلصش .. سنة 2023 بسبب برده إتفاقات مواعيد السداد فدبي مطالبة إنها تدفع 30 مليار دولار .. علي فكرة لو سألت الإماراتيين حيقولولك علي فكرة بقي الناس بتوع Capital Economics دول هبادين و أرقامهم مش صح .. تسألهم إيه الرقم الصح يقولك هو تقديرات صندوق النقد الدولي IMF اللي قال إن ديون ما يسمي GRE بتاعة دبي وصلت 60.3 مليار دولار سنة 2018 .. اللي هو إنت عايز تقولهم ما هي أرقام منيلة بنيلة برده.

في الظروف الطبيعية لما شركة بتتنيل علي عينها و بتلاقي نفسها عليها ديون متلتلة فبتطلب من الحكومة حاجة بتتسمي Bailout و دي تقدر تقول عليها سلفة بتديها الحكومة للشركة أو للبنك اللي مديون عشان يسدد ديونه و ميقعش .. لو ناوي تقول هييييييه إتحلت و حكومة دبي حتتدخل فأحب أقولك سوري مش حينفع .. إذا كانت شركة دبي العالمية عايزه اللي يسلفها فحكومة دبي نفسها عايزه اللي يسلفها .. ديون إمارة دبي لوحدها بغض النظر عن المصايب بتاعة GRE بتتقدر وفق أرقام صندوق النقد الدولي بإنها حوالي 110% من إجمالي GDP بتاع الإمارة و ده بيخلي دبي واحدة من أكتر الحكومات المديونة علي مستوي العالم .. عشان برده تستوعب الأرقام حاول تتخيل إن واحد مديون بمبلغ عشان تحسبه حاول تجيب دخله السنوي كله و زود عليه 10% كمان.

تاني .. في الظروف العادية كنت قلتلك عادي دبي مش هي الكيان الإقتصادي الوحيد المديون في العالم .. في الظروف العادية السياحة و التجارة و البيزنس بيبقوا شغالين و الشركات اللي تبع دبي العالمية بيخشلها ربح بتقدر إنها تسدد بيها ديونها حتي لو تطلب الأمر إنها تقعد مع البنوك تقولهم و الله إن أنا مش حقدر أسدد الدين اللي عليا السنة دي بس حسدده السنة الجاية أو زي ما بيتسمي إعادة هيكلة الديون .. بس إحنا مش في ظروف عادية .. إحنا طالع عين أهالينا .. فيه جائحة الكورونا .. فيه إنهيار سعر برميل النفط بسبب الخناقة بين روسيا و السعودية .. فيه إن العالم كله مطبق حظر  .. ده معناه إن برج خليفة اللي أنتوا دافعين دم قلبكوا عشان يتبني بقي ملوش لازمة .. فيه إن عدد حالات الإصابة بفيروس كورونا في الإمارات وصلوا 53,000 .. حط ديون دبي أو خليني أبقي دقيق أكتر و أقول ديون GRE بتاعة دبي جنب الظروف المهببة اللي إحنا فيها و حتلاقي إن بناء علي تقديرات شركة Capital Economics فالإقتصاد بتاع دبي متوقع إنه ينكمش بنسبة 5-6% .. مناعة دبي الضعيفة حتخلي إنها مش حتقدر تستحمل الأزمة دي و حترقد في السرير.

فيه ناس بتقول إن يا جماعة مشاكل دبي الإقتصادية بقالها فترة بس إحنا اللي بنستعبط .. لسنين كان أكتر بيزنس بيجيب فلوس لدبي هو سوق العقارات بس من 2014 و الفلوس اللي بتيجي من سوق العقارات عماله تقل و محدش واخد باله .. من 2014 لحد دلوقتي سعر العقارات في دبي وقع 30% .. من 2015 لحد دلوقتي و الأرباح اللي بتيجي من تأجير كل أوضة فندقية في دبي قلت بنسبة 25%  .. المبدأ اللي كانت دبي ماشية عليه في العقارات بالذات كانوا بيسموه إبني و المشتري حيجيي متقلقش Built it and they will come .. هو مبدأ جاب فلوس حلوة بس مش يمكن هو خلاص جاب أخره؟ ..  بمناسبة الكلام عن الديون فأحب أقولك إن قطاع العقارات في دبي لوحده اللي هو شركات التطوير العقاري في دبي مديونة بحوالي 66 مليار دولار مش عارفه تسددهم للبنوك .. بناء علي أرقام شركة S&P Global Rating و دي شركة وظيفتها إنها تقيم قدرة الدول علي إنها تدفع أقساط الديون اللي عليها فإنهيار سعر العقار في دبي مكمل معانا لحد 2021 .. ده معناه إيه؟ .. معناه إن النمو الإقتصادي لدبي بيدوس فرامل بقاله 6 سنين و لسه حيفضل دايس  .. السنة اللي فاتت الإقتصاد بتاع دبي نمي بنسبة 1.94% و دي أقل نسبة نمو تتحقق من 2009 .. حتي الأمل اللي دبي كانت متشعلقة بيه اللي هو مؤتمر Dubai World Expo 2020 و اللي كان بيتقال إنه حيجيب لدبي 25 مليون سايح أعلنوا إنه حيتأجل سنة كمان.

مشكلة الإقتصاد إنه  عامل زي ما في مسرحية المتزوجون لما (سمير غانم) الله يرحمه في دور مسعود قال إنه جه يضبط الكم البنطلون ضرب .. عشان تفهم ده يعني إيه حط قدامك المعلومة دي و هي إن عدد سكان دبي 3.3 مليون بني أدم الأغلبية منهم أجانب جايين يشتغلوا هناك .. حوالي 98% من سوق العمل في دبي بيسيطر عليه أجانب أغلبهم جاي من دول جنوب و شرق أسيا و بسبب فيروس كورونا فشركات كتير يا قفلت يا مشت موظفين يا مدفعتش مرتبات .. سيبك من حكاية إن الناس دي بتاخد فلوس تبعتها لأهاليها في بلدهم .. إعتبرني معنديش أنسانية و لا رحمة و بحسبها بالورقة و القلم .. لما أجي أقولك إن خلال 6 شهور عدد العمال الهنود و الباكتسانيين اللي مشوا من البلد وصل 260,000 .. هي الناس دي مش كانت بتاكل و بتشرب و بتشتري هدوم؟ .. لما الناس دي مشيت مش دي فلوس إتسحبت من السوق؟ .. هي الناس دي مش كانت مأجرة شقق؟ هم الناس دول لما يمشوا مش أصحاب الشقق اللي هم كانوا مأجرينها مش حيلاقوا حد يأجر مكانهم؟ يعني سوق العقار حينزف أكتر ما هو دمه سايح .. إياك تتخيل إن العمالة الأجنبية لما تمشي من دبي فدي حاجة حلوة بالنسبة للحكومة الإماراتية .. لا خالص بالعكس .. هم عارفين ده معناه إن فيه جرس إنذار ولا اللي كان بيضرب في مفاعل تشيرنوبل قبل ما يفرقع.

قد يقول قائل إن خلي بالك دي مش أول مرة دبي تعيش الأيام السودا دي و إن دبي شافت موتات كتير قبل كده .. ده حقيقي علي فكرة .. سنة 2009 بسبب الأزمة المالية العالمية دبي إتداس علي وشها و بورصتها خسرت حوالي نص قيمتها .. عارف إيه اللي أنقذ دبي وقتها؟ .. إنها خدت Bailout يعني سلفة من أبوظبي ب20 مليار دولار .. السؤال دلوقتي وحاول تفكر قبل ما تجاوب .. هل أبوظبي ممكن تلحق دبي تاني؟ .. قبل ما تحاول تجاوب فيه معلومتين لازم يبقوا محطوطين في دماغك و المعلومتين حيبدأوا بجملة إن أبوظبي معاها فلوس كتير أوي .. المعلومة الأولانية إن أبوظبي معاها فلوس كتير أوي لدرجة إن بسبب الضربة الإقتصادية اللي جت مع فيروس كورونا فحكومة أبوظبي أعلنت إنها حتضخ في السوق 27 مليار دولار كحزمة مساعدات مالية للقطاع الخاص و البنوك .. المعلومة الثانية إن أبوظبي معاها فلوس كتير أوي لدرجة إن صندوق الثروة السيادية بتاعها فيه فلوس كاش 950 مليار دولار و دول كافيين إنهم يسددوا ديون دبي 13 مرة .. بس رغم كل ده هل أبوظبي حتلحق دبي؟ .. هل أساساً أبوظبي من مصلحتها إنها تلحق دبي؟

المشكلة إن الحل اللي أي حد بيفهم في الإقتصاد بيقول إنه لازم يحصل عشان دبي تعرف تسدد الديون اللي عليها هو نفس الحل اللي عمر ما دبي حترضي تعمله .. الحل هو إن شركة دبي العالمية دي لازم تتباع .. مش كلها بس حتت منها .. إنت حتاخد الكيان العملاق ده اللي إسمه دبي العالمية و تعيد هيكلته بحيث فيه شركات حتندمج مع شركات و فيه شركات حتتباع .. إعادة الهيكلة ده صدقني لو قلتلك إنه حينسف وظايف كتير في دبي .. حاول تتخيل إن ده عامل زي ما في المشهد اللي إتهرس مليون مرة في السينما المصرية إن الدكتور بيقول للزوج لازم نضحي بالجنين عشان الأم تعيش .. الأهم من كل ده .. إفرض لو أبوظبي إشترطت إنها هي اللي تشتري شركات كانت تبع دبي العالمية؟ .. كنت إتكلمت قبل كده عن الخناقة بين طيران الإمارات التابع لدبي و طيران الإتحاد اللي تبع أبوظبي .. إفرض لو أبوظبي قالت إن شرطي إني أسدد ديونك يا دبي إنك تبيعي شركة طيران الإمارات فهل دبي حتوافق؟ .. صحيح حيتقال قدام الناس إنها عملية دمج بين شركتين أختين بس الحقيقة مش كده.

الحق يتقال برده إن دبي بتحاول قدر الإمكان إن اليوم الأسود إنهم يروحو يستلفوا من أبوظبي ميجيش و فيه شوية خطوات هم خدوها عشان يحاولوا ينقذوا نفسهم من غير ما يتضطروا إنهم يقدموا أي تنازلات لأبوظبي:

الخطوة الأولي .. زي ما حكيت قبل كده في مقالة تاريخ الفلوس فدول كتير من اللي عليها ديون متلتله بتلجأ إنها تشوف والله هي الديون دي كام و تحولها لسندات Bonds بحيث يجي حد بيزنس مان معاه فلوس يشتري السندات دي بحيث إنه يدفع فلوس كاش في مقابل إنه يبقي معاه ورقة بتقول إنه بيملك مثلاً 5% من ديون دبي .. البيزنس مان ده بيقعد مع دبي و بيتفقوا علي هي دبي حتسددله 5% من ديونها دي إزاي .. حلاوة الفكرة دي إنك بتصحي الصبح أولاً تلاقي ديونك اللي إنت مديون بيها للبنوك إختفت و فوق ده كله إن معاك فلوس كاش تعمل بيها اللي إنت عايزه .. عيبها إنك بدل ما كنت مديون لبنك واحد إنت بقيت مديون ل20 بيزنس مان مثلاً كل واحد فيهم عايز فلوسه في معاد غير التاني .. المهم  ..  الكيان اللي في إيده السندات بتاعة ديون دبي هو مؤسسة دبي للإستثمارات الحكومية Investment Corporation of Dubai أو ICD و دي عبارة عن صندوق إستثمار سيادي بيملك تحت إيده شركات لو سمعت أساميها حتتخض زي طيران الإمارات و بنك NBD و مجموعة تطوير إعمار اللي بتملك برج خليفة .. ده معناه إن لو دبي لجأت للحل ده فألف مين حيجري عشان يشتري ديون دبي .. الخطوة دي فيها Risk كبير بس لو إتعملت صح حتبقي ضربة معلم.

الخطوة الثانية .. دبي حالياً بتتفاوض مع 10 بنوك عشان تاخد قرض ب540 مليون دولار من كل بنك لوحده يعني بتتكلم إنهم عايزين يستلفوا 5.4 مليار دولار و السداد يبقي علي خمس سنين.

أنهي خطوة من الإتنين دبي حتنفذها؟ .. الله أعلم .. هل ممكن دبي تعمل نفسها حتلجأ لحل منهم فأبوظبي تحس إن فرصتها إنها تلوي دراع دبي بتروح منها فتقدم هي عرض إنها تسدد ديون دبي بشروط بسيطة؟ .. برده الله أعلم .. اللي أنا عايزك تطلع بيه من المقالة دي إن إقتصاد دبي عنده مشكلة و لازم المشكلة دي تتحل .. تقديري الشخصي إن حكومة دبي حتتعامل مع المشكلة ولا كأنها موجوده لحد ما يجي مؤتمر Dubai World Expo 2021 و بناء علي مدي النجاح اللي حيحققه المؤتمر هم حيتصرفوا .. مهما سمعت في الأخبار إن شركة زي S&P Global Rating طلعت قالت إنها خفضت من تصنيف دبي الإئتماني لمرحلة الزبالة Junk Status فولا كأنك سمعت حاجة .. مهما إتقال في الأخبار إن صندوق النقد الدولي بيحذر من كارثة فعايزك تسمع من ودن و تطلع من الودن الثانية .. حكومة دبي ولا كأنها سامعه حاجة لحد السنة الجاية و بعد كده يحلها الحلال.

المصادر:

• مقالة بعنوان Dubai, hit by lockdown and oil price crash, could be headed for another debt crises نشرت في موقع قناة CNBC الإخبارية الأميريكية و ده لينك المقالة الأصلية:
  https://www.cnbc.com/2020/04/24/coronavirus-lockdown-dubai-could-be-headed-for-another-debt-crisis.html
• مقالة بعنوان Dubai contemplates a downsized future after the pandemic نشرت في مجلة Financial Times و ده لينك المقالة الأصلية:
  https://www.ft.com/content/5ff1cc05-64eb-4e1a-bf53-62c7e62d5a2c