تاريخ الفلوس .. ازاي الكاش بقي ميزه

حاول تتخيل ان اللي انا عايز اعمله في المقاله دي اني ناوي اقرفك في عيشتك و اقعد معاك نحلل سوا كلمه كلمه من الاغنيه بتاع ميزه اللي غناها (احمد مكي) .. اللي حتكلم عنه في قصه دي هو تاريخ الفلوس .. التطور الطبيعي لازاي انت حضرتك بقيت تصحي الصبح تروح تشتغل 8 ساعات في اليوم عشان في الاخر ينزلك مرتبك علي حسابك في البنك و تروح اول كل شهر لاقرب ATM عشان تسحب شويه ورق تجيب بيهم اكل و شرب .. حنحكي ازاي البني ادمين اتحولوا من نظام المقايضه لنظام العملات الذهبيه او الفضيه لمرحله ورق البنكوت و دلوقتي رايحين في سكه البيتكوين .. الرحله دي حصلت ازاي؟ .. ازاي فكره البزنس اتطورت للمرحله اللي احنا فيها دلوقتي؟ .. ازاي الحكومات بتجيب فلوس؟ .. يعني ايه فايده؟ .. يعني ايه بنك مركزي؟ .. دي اسئله وجوديه وعلي فكره لو رحت سالت اي حد خريج اقتصاد غالبا هو حيعاني زي ما انا حعاني دلوقتي كده اني احاول ابسطلك المفاهيم اللي المفروض ان حياتنا كلها قايمه عليها دلوقتي .. اهم مفهوم وده الاساس اللي لازم تبدا انك تفهم معناه هو الفلوس.

هو يعني ايه فلوس؟ .. يعني ايه Money؟

خليك معايا من الاول .. كان يا مكان علي راي (احمد مكي) .. رحنا لزمن المقايضه لا بنكنوت ولا حتي فايده .. العمله كانت خد و هات لا فيه ورق ولا قرشينات .. معاك 3 بيضات ترجع شايل قفه حاجات .. باااااااااس .. اقف هنا بقي .. الجمله اللي فاتت دي هبد .. هي اه القافيه حكمت عشان الاغنيه تطلع حلوه بس مش ده الConcept اللي المقايضه اتبنت عليه .. المقايضه كمفهوم اتطورت مع الزمن .. ايام الكهوف كان اه انا معايا تفاحه وانت معاك فرخه وانت اساسا فيجيتريان فكان حلو اوي اننا نبدل .. انت تاكل التفاحه وانا بحب الفراخ .. لما المجتمعات اتطورت و بقت فيه ناس بتزرع و فيه ناس بتعمل ادوات و ناس بتبني وكل واحد بقت له شغلانه محدده فالبشر بقوا مجبرين انهم يقايضوا .. حاول دايما تنزل بمستوي تفكيرك لمستوايا انا و انت .. انا مش بتكلم عن مقايضه بين دول .. انا مش بتكلم عن رحله الشتاء و الصيف بتاعه قريش .. انا بتكلم ان انا فلاح بزرع قمح مثلا وانت صياد بتصطاد سمك .. فكره المقايضه نفسها بدات تلبس في حيطه اسمها تزامن الاحتياجات ولو انت خريج تجاره انجلش فاسمها Coincidence of Wants .. يعني ايه البتاعه دي؟ .. ده الاساس اللي اتبنت عليه التجاره و السؤال اللي الفلوس كانت اجابته .. عشان تفهمه تاني متحاولش تطبقه علي Scale كبير .. تخيل زي ما قلت ان انا فلاح وانت صياد .. لو انت مراتك عايزه تخبر عيش وانا مراتي نفسها في سمك صياديه .. قشطه .. انت حتاخد مني القمح بتاعي و انا حاخد منك السمك بتاعك .. لكن .. افرض ان انا مش عايز السمك بتاعك بس مراتك نفسها تخبز عيش و حتنكد عليك عيشتك لو مروحتش بقمح .. ده بيخلينا قصاد احتمالين:

• الاحتمال الاول انك تدور علي حد يكون عايز سمك و يديلك هو حاجه في مقابلها بس بشرط ان الحاجه دي تكون انا عايزها .. ده معناه ان حضرتك حتيجي تسالني طب انت عايز ايه و اقولك مثلا انا عايز برتقان فحضرتك تنزل تلف ع حد يكون عايز سمك و عنده برتقان لمجرد انك لما تروح البيت مراتك متنكدش عليك .. زود علي كده مصيبه تانيه وهي الوقت .. انت زمان مكنش عندك ثلاجات .. انت محتاج خلال اقل من يوم تكون لقيت الشخص ده والا السمك بتاعك حيعفن .. تاني مراتك حتنكد عليك .. نفس مشكله الوقت دي قارفاني في عيشتي انا كمان .. انا المحصول بتاعي بحصده مره في السنه .. طب طول السنه اللي انا مش بحصد فيها لو حبيت اجيب حاجه من السوق حعمل ايه؟
• الاحتمال الثاني ان احنا نلاقي حاجه او سلعه او بضاعه ثالثه احنا الاتنين عايزينها و نقدر نقايض بيها .. حاجه نبقي كلنا عايزينها .. حاجه نقدر نقايض بيها من غير ما نبقي مرتبطين بوقت او موسم معين من السنه .. الحاجه دي هي الفلوس.

الفلوس هي حاجه ايا كانت الحاجه دي ايه بس ليها كذا شرط .. الشرط الاول انها متبوظش يعني مينفعش مثلا الحاجه دي تبقي ورد او سمك لو اتساب من غير قصريه او من غير ثلاجه يفسد ويموت .. الشرط الثاني انها تبقي صعبه تتجاب يعني مينفعش تبقي متاحه بكميات كبيره والا حتغرق السوق ومش حيبقي ليها قيمه يعني مينفعش تقولي ورق الشجر مثلا حنستخدمه كفلوس .. الشرط الثالث والاهم ان كل اهل البلد يتفقوا علي ان ليها قيمه اياكش حتي الحاجه دي تبقي السجاير الفرط .. الثلاث شروط مش معناهم ان الذهب او الفضه بس ينفعوا .. في تاريخ البشر احنا استخدمنا حاجات فعلا غريبه كفلوس .. استخدمنا المواشي كفلوس .. لو بصيت عليها حتلاقي ان المواشي فعليا بتحقق الشروط الثلاثه .. الجاموسه بتعيش لسنين وده الشرط الاول .. الجواميس مش موجوده في كل حته زي ورق الشجر وده الشرط الثاني .. وطبعا بما ان البشر اتفقوا علي ان ليها قيمه فده كان الشرط الثالث .. لما الاوروبيين اكتشفوا اميركا السكان الاصليين استخدموا الخمور كفلوس .. تاني تعالي نشوف .. هي مكنتش بتفسد لو اتسابت .. مكنتش موجوده في كل حته .. هم اتفقوا علي ان ليها قيمه .. في السجون السجاير بتستخدم كلفوس .. بدات تفهم الفكره؟ .. الفلوس بالشكل ده الاخوه بتوع الاقتصاد بيسموها النقود السلعيه ولو انت برده خريج تجاره انجلش فهي بتتسمي Commodity Money  بمعني اخر هي العمله ..  العمله  معناه ان الخمور او السجاير او الجواميس في حد ذاتها ملهاش قيمه .. قيمتها بتيجي من قدرتها علي اني اشتري بيها حاجات .. الذهب انا اقدر اعمل منه حلق او سلسله بس لو عملت منه جنيه دهب فانا مش حجيب لخطيبتي شبكتها سلسله علي شكل جنيه دهب .. تاني .. العمله فكرتها ان كلنا نتفق علي ان ليها قيمه .. انت لما يبقي في ايدك جنيه دهب او ورقه بمتين جنيه فانت بتبقي متطمن ان اللي في ايدك ده حاجه قيمتها هي انها بتخليني اشتري حاجه مش لسبب غير ان احنا كلنا اتفقنا علي كده.

خلينا نرجع تاني لاغنيه (احمد مكي) .. معاك 3 بيضات ترجع شايل قفه حاجات .. بس الحياه دي اوانها فات .. المشكله كانت اكبر من مجرد اننا هييييييه لقينا حاجه تنفع نستخدمها كفلوس .. لما البشر بدأوا يبنوا مجتمعات و حضارات و بدأت التجاره بين البشر تكبر لقينا ان النقود السلعيه دي خلتنا نلبس كذا خازوق:

• خلينا ناخد اول خازوق و نتخيل سوا ان احنا عايشين في قريش قبل ميلاد النبي (عليه الصلاه و السلام) وقت ما اقتصاد قريش كله كان قايم علي رحتلي الشتاء و الصيف .. دلوقتي انا تاجر واخد معايا جمال و رحت سافرت الشام اشتري بضاعه عشان ارجع ابيعها في قريش .. حلو .. هي البضاعه اللي انا حشتريها دي مش بفلوس .. اه .. هي مش الفلوس دي ولتكن مثلا عملات ذهبيه بتتحط زي ما بيقولوا في صره من الدنانير  ليها وزن؟ .. اه .. هو انت فاكر ان سهل كده اجيب كام جمل و احط عليهم شوله ذهب؟ .. هو الذهب ده مش تقيل؟ .. طب هو انا لو سافرت بالجمال بتاعتي مش احتمال يطلع عليا حراميه يسرقوني؟
• تاني خازوق وتعالي نتخيل اننا مثلا عايشين في عصر الفراعنه .. ايه اللي يحصل لو وزير الماليه اللي المفروض جزء من شغلته انه يجيب الذهب يسيحه و يشكله علي شكل عملات بدأ يغش في شغله .. ايه اللي يحصل لو كان بيزود نسبه النحاس في الذهب؟ .. مش معني كده ان الفلوس اللي في السوق مش حيبقي ليها قيمتها الحقيقيه؟
• ثالث خازوق طب افرض اننا عايشين مثلا في عصر الرومان ايام ما كانوا بيحكموا العالم كله .. اقوي اقتصاد في العالم .. اقوي كيان عسكري في العالم و بالتالي حروب مكلفه في كل حته .. لو تكلفه الحروب دي زادت اوي لدرجه ان الدوله خلصت كل مخزون الذهب و الفضه اللي عندها حيبقي ايه العمل؟ .. جم يدوروا علي اي مناجم ذهب او فضه في البلد ملقوش .. علي فكره الانجليز لبسوا الخازوق ده جامد اوي في حربهم مع الصين اللي معروفه باسم حرب الافيون .. الانجليز كانوا بيستوردوا كميات رهيبه من الشاي الصيني و الصينيين مكانوش بيقبلوا غير الفضه كفلوس و بالتالي مع الوقت مخزون انجلترا من الفضه خلص وده خرب بيت الاقتصاد بتاعهم.
• رابع خازوق وده خازوق غريب شويه هو افرض ان ربنا فتح في وش البلد و حد بقي بيرمي علي عتبه بابها ذهب و فضه .. ده حصل مع اسبانيا لما البحاره الاسبان اكتشفوا اميركا .. حنفيه ذهب و اتكسرت و غرقت الدنيا .. الاقتصاد الاسباني عاش حاله تضخم كبيره اوي بسبب ان السوق اتملي دهب .

وزي ما قال (مكي) .. رحنا لزمن الكاشات .. ازاي بقي الصين و الطليان و وراهم الانجليز اخترعوا زمن الكاشات؟

فيه بني ادم اسمه (ماركو بولو Marco Polo) وده يبقي رحاله تقدر تقول عليه النسخه الاوروبي من (ابن بطوطه) سافر الصين و بدا يتعلم ازاي المجتمع ده عايش و لما رجع حط الافكار اللي هو شافها دي كلها في كتاب مشهور جدا .. الكتاب ده فيه افكار سابقه عصرها زي مثلا فكره المكرونه الاسباجتي و فكره الايصالات .. ايوه زي ما قريت .. (ماركو بولو) هو اللي فتح عين الطليان علي اختراع المكرونه اللي جابهالهم من الصين بس مش دي قضيتنا .. قضيتنا دلوقتي هي الايصالات .. فيه فصل في الكتاب ده عنوانه ازاي الخان الاعظم حول ورق الشجر لفلوس عشان الناس تستخدمها كعمله وفي الكتاب هو حكي ازاي الصينيين نقلونا من مرحله المقايضه لمرحله الكاشات .. بص .. الحضاره الصينيه القديمه كانت ماشيه بنظام غريب شويه وهو ان العملات عندهم كانت حاجه شبه الجنيه الذهب بس مخروم من النص عشان لو انا حبيت اشتري حاجه ثمنها 100 جنيه ذهب فانا بجيب حبل ادخله في خرام الجنيهات الدهب و اعمل منه سلسله .. مع الوقت طول السلسله بقي بيعبر عن مبلغ الفلوس .. شويه و الاقتصاد عمال يكبر .. التجاره الداخليه جوه الامبراطوريه عماله تزيد لدرجه ان التجار بقوا بيتعاملوا بمبالغ وصلت مئات الالاف .. احيانا وزن الفلوس لوحده بقي اكبر من وزن البضاعه اللي التاجر بيشتريها .. ولان الحكومه كانت مركزيه واغلب تعامل التجار كان مع الحكومه فالحكومه اقترحت حاجه لطيفه اوي .. ايه رايكوا بدل ما نديلك حبل فيه 10,000 جنيه دهب انا حديلك ورقه مكتوب فيها ان انت ليك عند الحكومه 10,000 جنيه دهب .. و يا سيدي لو حبيت في اي وقت تاخد فلوسك تعالي العاصمه واستلمها .. باختصار شديد الحكومه بقت بتدي التاجر ايصال بفلوسه.

في الاول زي اي فكره جديده الناس كانت شاكه .. مع الوقت الثقه بدات تزيد لان كذا تاجر يروح للعاصمه بورقه الايصال و ياخد فلوسه فعلا .. شويه و التجار قالوا لنفسهم طب هو احنا ليه اصلا نتعامل بالجنيه الذهب طب ما نتعامل بالايصالات دي بينا و بين بعض .. لما الحكومه عرفت بقت هي بتطبع ايصالات .. بقيت انا كتاجر لو ليا عند الحكومه مثلا 1000 جنيه ذهب فانا باخد من الحكومه 10 ايصالات كل ايصال ب100 جنيه ذهب .. لو حبيت اشتري بضاعه من تاجر تاني و كانت البضاعه دي ب100 جنيه ذهب فانا بدل ما بديله الجنيهات الذهب بديله ايصال من العشر ايصالات اللي معايا .. النظام ده بدا يتطبق في الصين من القرن السابع الميلادي في اسره تانج Tang Dynasty مرورا بالقرن ال11 في اسره سونج Song Dynasty لحد سنه 1300 ودي السنه اللي (ماركو بولو) زار فيها الصين .. الرجل كان مبهور بالنظام و شايفه نقله نوعيه في التجاره بس من وجهه نظر الصينيين ده كان حقا و صدقا ما وجدنا عليه اباؤنا و اجدادنا .. (ماركو بولو) لما نقل الفكره للطليان حطوا عليها التاتش بتاعتهم .. اللي عمله الطليان بفكره (ماركو بولو) عشان تفهمه تخيل ان انك رحت كارفور تشتري حاجات عشان تدفع بالفيزا .. تخيلت .. اهو تخيل توم و جيري بياخدوا فلوسك و بيجروا لحد اقرب فرع للبنك بتاعك يسحبوا الفلوس .. وبعد كده يجروا للبنك اللي كارفور بيتعامل معاه و يرجعوا جري ليك عشان يدولك الايصال اللي بيطلع من المكنه اللي بتقرا كارت الفيزا بتاعك .. في حاله انك لسه مش مجمع خليني اشرحلك النظام الطلياني ده كان عامل ازاي:

• انا تاجر جاي من اسكندريه بتعامل مع بنك مصر مثلا فبروح اقرب فرع بنك مصر وبروح اطلب منهم يدوني ايصال ب10,000 جنيه.
• لما بسافر بورسعيد مثلا اشتري بضاعه فانا بحمل البضاعه ع المركب و بدي للتاجر اللي انا اشتريت منه البضاعه الايصال اللي انا خدته من بنك مصر فرع اسكندريه .. التاجر اللي باعلي البضاعه بياخد الايصال يروح لاقرب فرع بنك مصر في بورسعيد يديهم الايصال بس مش بيدوله 10,000 جنيه كاملين .. هم بيخصموا منهم حاجه بسيطه زي مثلا 5% ثمن الخدمات البنكيه.
• فرع بنك مصر بتاع بورسعيد حيبعت حد ومعاه الايصال و يروح لفرع البنك في اسكندريه .. بمجرد ما فرع بنك مصر في اسكندريه يجيله الايصال فهو بيبعتلي مندوب لحد عندي عشان ادفع الفلوس اللي عليا 10,000 و فوقهم مصاريف الخدمات البنكيه.

زي ما انت شايف الطليان كانوا وصلوا لنفس المستوي اللي انت بتدفع بيه ثمن الحاجه اللي انت اشتريتها من كارفور بالفيزا بس بالتصوير البطيء .. الحقيقه ان المستوي ده من التقدم في التعاملات البنكيه ساهم فيه اسباب تانيه ملهاش علاقه بالفلوس .. ايطاليا مكنتش دوله موحده انما كانت عباره عن نظام City States زي نظام الاغريق كده لما كان عندهم اثينا و اسبرطا .. مدن تعتبر دول مستقله .. في ايطاليا كانوا اهم 3 مدن- دول هم فينيسيا (البندقيه) و ميلان و فلورينسا .. ال3 مدن كانوا دايما في حاله حرب مع بعض و بالتالي فطرق التجاره بينهم مكنتش امنه اوي .. زود علي كده ان الحروب الصليبيه كانت ساعدت علي ان اوروبا بقي عندها الاساسات بتاعه النظام البنكي .. لو انا مواطن فرنساوي مخي اتلحس بكلام بابا الفاتيكان و عايز اروح اسافر القدس عشان انضم لحمله صليبيه علي امل اني اترمي في الجنه حدف  فانا مش حينفع اسافر بكل فلوسي و ممتلكاتي من فرنسا لحد القدس والا انا حتسرق .. الفاتيكان وافقوا علي اقتراح فرسان المعبد Knights Templar بنهم يحطوا اول فكره للبنوك لما بقي ليهم افرع في كل اوروبا بحيث انت تحط فلوسك في الفرع بتاع البنك بتاعهم في مدينتك ولما توصل القدس بالسلامه تروح تستلم فلوسك .. تاني .. النظام ده بدأ يطبق في ايطاليا من بعد سنه 1300 وفضل ينمو و يكبر و يكبر و الطليان فاكرين انهم كده جابوا اخر الفكره .. مكانوش عارفين ان الانجليز سنه 1640 كانوا حياخدوا الفكره في حته تانيه خالص و الغريب ان الانجليز مبصوش لفكره الطليان ولا فكره (ماركو بالو) وقالوا والله زين هادي الفكره .. لا خالص .. الانجليز ظروفهم كانت مختلفه حبتين و طريقه انشاءهم للتعاملات البنكيه كانت مختلفه شويه عن التجربه الطلياني.

سنه 1640 انجلترا كانت بتلبس في الحيط .. كان بيحكمها رجل ابن ستين كلب اسمه (تشارلز الاول) .. كان فاسد الفساد الوسطي الجميل .. هو كان متخانق مع البرلمان فبمنتهي البساطه عمل زي (اللمبي) لما قال ل(عاطف) ارمي ياض البتاع مبحبوش و مبحبكش انت كمان قام قافل البرلمان خالص .. ولان وفق الدستور البريطاني البرلمان هو بس اللي يقدر يفرض ضرايب ع الناس ولان (تشارلز الخامس) كان عايز فلوس وهو كان قافل البرلمان قام رايح لحاجه اسمها مينت Mint وده كان عباره عن مخزن كل التجار و الحدادين بتوع لندن بيحطوا فلوسهم فيه بدل ما يخبوها تحت البلاطه و خد الفلوس دي كلها وضع يد .. طبعا ده كان كفيل ان تقوم ضده ثوره و الاخ اتعدم في ميدان عام بس مش دي القضيه .. القضيه انك بقيت قصاد وضع غريب جدا ان التجار و الحدادين بتوع لندن اللي تحت ايدهم ثروه محترمه مبقوش عارفين يحطوها فين .. اكيد هم مبقاش عندهم اي ثقه في البتاع اللي اسمه Mint ده .. في قعده صفا الحدادين قالوا للتجار ان احنا بدأنا نشتغل علي فكره جديده اننا بقينا نعمل خزن حديد جامده ومش بتتكسر بسهوله عشان نخزن فيها فلوسنا فلو انتوا حابين تقدروا تحطوا فيها فلوسكوا في مقابل طبعا انكوا تدونا نسبه صغيره .. فكره صغيره خلت الحدادين بتوع لندن يعملوا كارير شيفت و يبقوا بنوك .. الحدادين او دلوقتي اصحاب البنوك في انجلترا عملوا الاول نفس الحاجه اللي الصينيين عملوها .. حضرتك تاجر بتسيب فلوسك معانا فاحنا بنديلك ايصال نكتب فيه المبلغ اللي حضرتك سايبه .. لكن .. خلي بالك بقي من اللي جاي دلوقتي .. الانجليز حطوا تاتشايه كده بتاعتهم هي اللي غيرت مفهوم الناس عن التعاملات البنكيه .. هو شالوا الشرط بتاع ان عشان التاجر يسترد فلوسه لازم يبقي اسمه ع الايصال .. هو كتبوا ع الايصال ان المبلغ اللي مكتوب فيه حيسترد لايا كان حامل الايصال .. ده خلي الانجليز يستخدموا الايصالات دي كفلوس .. شويه و الناس بقوا يطلبوا من الحدادين اللي بقوا اصحاب بنوك انهم ياخدوا كذا ايصال .. انا حطيت في البنك 100 جنيه فانا عايز 10 ايصالات كل ايصال ب10 جنيه .. فكره صغيره اوي خلت البنوك الانجليزي يقدموا للعالم فكره البنكنوت.

يمكن عشان الحدادين دول كانوا في الاصل مهندسين فكانوا بيفهموا .. اللهم زيدنا تواضع يعني .. فهم خدوا بالهم من حاجه .. الناس بقت بتتداول ورق البنكنوت ده بينهم و بين بعض و محدش بيقرب للفلوس الذهب اللي متخزنه عندهم .. طب يجري حاجه لو سلفنا الناس فلوس من اللي قاعده عندنا في الخزن دي محدش بيقربلها؟ .. حضرتك سبت عندنا 1000 جنيه دهب و خدت مكانهم ايصالات .. عدت ايام وشهور وانت مجتش عشان تاخد فلوسك .. يعني هي الفلوس حتفضل عندنا كده؟ .. طب ما احنا ممكن علي حسها ندي ورق بنكوت لناس تانيه بنفس المبلغ كقرض .. ومن هنا اتولد اهم اختراع في التعاملات البنكيه و اللي حياتنا كلها لحد دلوقتي قايمه عليه .. الخدمات البنكيه الاحتياطيه الجزئيه او Fractional Reserve Banking .. بمعني اخر قدره البنوك انها تدي قروض بفوايد .. اقفلي بقي هنا عشان لو انت متخيل ان فوائد البنوك دي قضيه خلافيه فتعالي احكيلك ازاي الفكره دي اساسا اتطورت لحد الشكل اللي انت عايشه دلوقتي .. التجربه دي مرت بمراحل هبد انت لا تتخيلها واحيانا مش حتصدق ان كل ده حصل .. لو انت فاكر ان فوايد البنوك دي حرام فاستني لما تعرف ازاي هي خربت اقتصاد دول.

البنوك الانجليزي بقت بتوزع ع الناس ورق بنكنوت الناس بتتعامل معاه علي انه عمله ورقيه بحيث ان الناس حاطه فلوسها الذهب و الفضه في البنوك و محدش بيروح يسال عليها .. الكلام ده كان سنه 1640 .. شويه و السويد لقطت الفكره .. سنه 1660 البنوك السويديه بقت زيها زي البنوك الانجليزيه مش بس بتطبع ورق بنكنوت انما كمان بقت بتدي قروض .. ده معناه ان فكره Fractional Reserve Banking بقت بتطبق هناك ودي فكره عامله زي عمايل الكيكه كده .. مقاديرها لازم بقي صح .. طريقه العمايل لازم تبقي صح والا الكيكه حتترمي في الزباله .. عمايل الكيكه الفرق بينها وبين الطبيخ ان الطبيخ لو ناقص ملح في النص انت ممكن تزوده ملح .. الكيكه انت مش حتعرف اذا كانت هي محتاجه شويه فانيليا او بيكينج باودر زياده الا بعد فوات الاوان .. البنوك السويدي بقت بتوزع في قروض زي ما انت في رمضان قاعد قدام المسلسل و مش بتقدر تبطل اكل .. الناس بدأت تاخد بالها انك كرشت او بمعني اخر الناس بدأت تاخد بالها ان البنوك بتعمل حاجه غلط .. هوبا الناس كلها جريت ع البنوك ترجع فلوسها الذهب و الفضه .. طبعا الفلوس خلصت قبل ما الناس كلها تاخد فلوسها .. و طبعا زي ما انت متوقع انهار الاقتصاد السويدي .. فيه منكوا دلوقتي بيقول لنفسه طب يا عم الحاج ما دلوقتي اللي بيحل المشكله دي هو البنك المركزي .. عندك حق .. بس وقتها مكنش لسه اتعمل البنك المركزي .. اول بنك مركزي بالمعني الفعلي لللكلمه كان البنك المركزي الانجليزي او بنك انجلترا Bank of England وده اتاسس سنه 1695 .. اللي انا عايز احكيه ازاي العالم كله بدأ يقتنع واحده واحده ان يا جدعان لازم كل دوله يبقي فيها بنك مركزي .. هو يعني ايه بنك مركزي؟ .. بيعمل ايه البتاع ده؟

الطريق الي البنك المركزي ده اتفرش بالهبد .. انت مش متخيل كم الهبيده اللي في تاريخ الاقتصاد و البنوك اللي فشخوا (سوري انا عارف اني كنت بطلت استخدم الكلمه دي بس مش قادر) اقتصاد بلدهم .. انا الحقيقه عايز اتكلم عن اتنين بالذات .. اتنين بني ادمين هبدوا هبد ولا اللي انت بتهبده في انترفيو او في امتحان شفوي في الكليه وانت مش فاهم اصلا الماده بتتكلم عن ايه .. بس ده ميمنعش ان احيانا الهبد جاب نتيجه .. الاتنين اللي حتكلم عنهم هم (نيكولاس باربون Nicholas Barbon) و (جون لاو John Law).

(نيكولاس باربون) .. اللي اخترع وضع اليد و كمان ادانا التامين ضد الحريق و الرهن العقاري:

(نيكولاس باربون) ده من الشخصيات المسليه جدا اللي ممكن انت تقرا عنها .. ابوه كان من كبارات البلد وكان عايز ابنه يشرفه وسط الناس ولان وقتها مكنش فيه حاجه ممكن الولد يعملها عشان يشرف ابوه غير انه يبقي يا محامي يا دكتور ف(نيكولاس) خد بكالريوس الطب من جامعه اوتريخت الهولنديه و بقي دكتور .. مشكلته انه كان عايز فلوس .. هو كان بيعشق الفلوس .. ولانه شاف ان مهنه الدكتره دي مبتأكلش عيش فهو راح لشغلانه المقاولات و التطوير العقاري .. ربنا بعتله هديه من السما سنه 1666 تمثلت في حريق لندن .. الحريق ده دمر 13,000 بيت و خلي في يوم و ليله 16% من سكان لندن نايمين في الشارع .. (نيكولاس) كان عارف ان القانون الانجليزي وقتها بيمنع انشاء اي بيوت سكنيه في الحته الفاضيه بين لندن وبين حي ويستمينيستر Westminster اللي فيه القصر الملكي و البرلمان بس هو قالك يعني هم اخرهم يعملوا ايه .. (نيكولاس) خد حته الارض دي وضع يد وبدأ يبني فيها .. لما اتقاله انت ايه اللي انت عملته ده يا مجنون؟ كان رده زي ما قلتلك اخرهم يعملوا ايه .. البيوت اتبنت .. الناس كانت نايمه في الشارع .. لو الحكومه فكرت تهد البيوت دي فهم كده بيخاطروا تقوم ثوره .. الحكومه حتسكت و حتحط جزمه في بقها وده اللي حصل فعلا .. كانت عنده مشكلتين .. اول مشكله هي التمويل .. ازاي حيجيب فلوس بناء البيوت دي؟ .. ثاني مشكله هي الناس الفقيره اللي بيوتها اتحرقت و معهاش تدفع ثمن البيوت الجديده اللي هو بناها حتسدد ازاي؟ .. عشان (نيكولاس) يحل المشكلتين دول هو اخترع حاجتين و الحاجتين دول اقتصاد دول دلوقتي قايم عليهم .. التامين ضد الحريق و الرهن العقاري.

الاول هو راح عمل صندوق التامين ضد الحريق .. هو فعليا خد فكره الجمعيه اللي احنا بنعملها في مصر ان يبقي عندك 10 بني ادمين كل واحده يدفع جنيه مثلا وكل شهر واحد من العشره ياخد في ايده 100 جنيه .. بس هو كان بياخد جنيه من كل واحد يحطهم في صندوق بحيث ان بعد كده لو حصل حريق كبير في لندن الناس اللي بيوتها اتحرقت تاخد فلوس من الصندوق ده عشان تشتري بيت تاني .. ده اسمه التامين ضد الحريق .. اللي عمله (نيكولاس) انه خد شويه فلوس من الصندوق ده كراس مال انه يبني البيوت .. صحيح فكرته نقلت الاقتصاد البريطاني لسنين قدام و دلوقتي الفكره دي متطبقه بشكل كبير بس هو عملها عشان يوفر لنفسه سيوله .. ده كان حل المشكله الاولانيه .. المشكله الثانيه كانت اصعب .. الناس معهاش فلوس تدفع وده خلاه يفكر في انه يخترع الرهن العقاري .. هو بدأ بانه اسس حاجه اسمها بنك العقار الوطني National Land Bank وبقي بيدي الناس قروض بحيث يعيشوا في البيوت ومش شرط يدفعوا ثمن البيت كله كاش و مقدم .. انت كل شهر بتدفع جزء من الدين اللي عليك .. (نيكولاس) بصلها علي انه عايز فلوس .. مجرد انه يسترزق بس هو مكنش واخد باله ازاي الفكره دي خلت الاقتصاد الانجليزي كانه رجل متجوز خد نص حبايه فياجرا .. سوق العقار في لندن بالذات كان مفرمل الاقتصاد ..الناس كانت بتحوش و بتدفع دم قلبها علي بيت و بمجرد ما اشتروه خلاص كده مبقاش عندهم القدره انهم يحطوا فلوسهم في اي حاجه تانيه .. ثروه الناس مبقتش تتحرك .. لا فيه وظايف بتتخلق .. ولا فيه اقتصاد بينمو .. مجرد بيوت .. فكره الرهن العقاري اللي عملها (نيكولاس) خلت الناس تشتري بيت و في نفس الوقت يقدروا يعيشوا حياتهم بشكل طبيعي و يصرفوا علي حاجات تانيه.

فيه نقطه انا عايز اتكلم عنها بخصوص (نيكولاس باربون) دلوقتي .. هي صحيح ملهاش علاقه بفكره البنك المركزي بس حتفيدنا قدام لما نتكلم شويه عن العلاقات التجاريه بين الدول .. شوف .. في الوقت اللي (نيكولاس) كان عايش فيه كانت العلاقات التجاريه بين الدول العظمي اللي هم فرنسا و انجلترا مثلا كانت حاجه اسمها الاتجاريه ولو انت برده من بتوع تجاره اينجليش فانت ممكن تكون خدتها تحت مسمي Mercantilism .. البتاعه دي فكرتها بمنتهي البساطه ان انجلترا و فرنسا بيلعبوا مع بعض Age of Empire بس بالاقتصاد .. كل دوله ليها مستعمرات في كل حته في العالم .. كل دوله اهم حاجه عندها هي انها تقدر تلم اكبر قدر ممكن من الذهب و الفضه من مستعمراتها و تروح تخزنه عندها .. مفيش حاجه اسمها تبادل تجاري بين الانجليز و الفرنساويين .. التجاره بس بين الدوله الام و مستعمراتها .. لو مصر مثلا مستعمره انجليزيه فهي مينفعش تعمل اي بيزنس تجاري لا مع فرنسا ولا مع اي مستعمره فرنسيه تانيه .. المستعمرات مش وظيفتها تصنع .. المستعمرات وظيفتها انها توفر المواد الخام للدوله اللي محتلاها عشان التصنيع يتم هناك .. اللي قاله (نيكولاس) واللي حنشوفه بيتطبق فعليا بعدين مش دلوقتي هو ليه لا منعملش كده .. ليه لا نبطل نعتمد علي الذهب و الفضه خالص و نعتمد بشكل كلي علي العملات الورقيه .. لو ده حصل ففكره Mercantilism مش حيبقي اي معني .. لو ده حصل فحيبقي من مصلحتنا يبقي فيه علاقات تجاريه بين انلجترا و فرنسا و باقي الدول اللي حولينا .. لو ده حصل مش حيبقي فيه اصلا معني للاستعمار .. طبعا انت متخيل ازاي الناس في الحته دي بالذات قالوا علي (نيكولاس) انه عبيط مش فاهم حاجه بس زي ما قلتلك بلاش نقف في الحته دي دلوقتي لاننا حنرجعلها تاني بعد كده.

(جون لاو) .. يا جدعان فين ميتين ام البنك المركزي:

(جون لاو) زيه زي (نيكولاس باربون) مكنش عاجبه الشغلانه اللي اهله خلوه يشتغلها و كان عايز يعمل كارير شيفت .. (جون) كان اسكتلندي من عيله حدادين اتحولوا لاصحاب بنوك زي ما حكينا .. لما بقي عنده 17 سنه ابوه مات و ده خلاه يبقي حر يعمل اللي هو عايزه وهو مكنش عايز غير انه يبقي صايع .. تخيله عامل شبه شخصيه (علاء ولي الدين) الله يرحمه في فيلم الناظر .. انا عايز اصيع يا استاذ لمبي .. الواد ضيع ثروته في القمار و الخمره و النسوان في لندن .. في يوم اتخانق مع واحد تاني علي واحد ست .. كل واحد كان فاكرها بتاعته .. الاتنين كانوا سكرانين و (جون) قتله .. اتقبض عليه و اتحكم عليه بكفاله ولانه كان خايف من التار اللي عليه خد ديله في سنانه و هرب بره لندن و راح يعيش في هولندا .. هو كان ناوي برده يبزعق قرشين في صالات القمار لحد ما دخل بورصه امستردام .. دخوله البورصه خلي حاله يتشقلب 180 درجه .. مبقاش الصايع الضايع النسوانجي .. جاب ورقه و قلم وبدأ يحلل و يفهم هو سوق البورصه شغال ازاي؟ .. ايه علاقه البورصه بنظريه الاحتمالات؟ .. طب مش ده معناه ان البورصه متفرقش كتير عن القمار؟ .. طب ليه بورصه امستردام جامده وماسكه نفسها اوي كده؟ .. اكيد ده له علاقه بالوضع الاقتصادي للجمهوريه الهولنديه .. طب ايه العلاقه؟ .. ازاي هولندا البلد اللي مفيهاش اي مصادر ثروه طبيعيه زي دول تانيه زي انجلترا و فرنسا بس اقتصادها اقوي بكتير من انجلترا و فرنسا؟ .. هولندا جابت ثروتها دي كلها منين؟

خمس سنين وهو بيدور علي اجابه لحد ما لقاها .. الضمير .. هولندا زيها زي اي دوله اوروبيه استعماريه كانت مبتعملش حاجه في حياتها غير انها تجيب ذهب و فضه من مستعمراتها تخزنه عندها و تقوم طابعه ورق بنكنوت علي حسب كميه الذهب و الفضه الموجوده .. والاهم ان البنوك الهولنديه كانت بتسلف فلوس بحساب .. لازم البنك يبقي فيه احتياطي ذهب و فضه يكفي لو حصل يوم اسود و الاقتصاد وقع .. ده خلي الاقتصاد الهولندي ماسك نفسه اوي .. صحيح هو مش قادر يوصل لمراحل نمو كبيره و ينط في الثروه بس المواطن الهولندي كان عنده ثقه كبيره في اداء بنوك بلده و الثقه دي هي الاساس اللي قومت الاقتصاد الهولندي .. (جون لاو) حط كل الافكار دي في كتاب اسمه Money and Trade Considered with a Proposal for Supplying the Nation with Money .. كل اللي (جون لاو) كان عايزه انه ياخد الكتاب ده يروح بلده اسكتلندا عشان يقنع حكومه اسكتلندا انها تمشي ورا اللي عملته هولندا .. نعمل بنك مركزي .. يطبع ورق بنكنوث علي قد كميه الذهب و الفضه اللي موجودين و نسلف فلوس علي شكل قروض بحيث ان الفلوس اللي بنسلفها تبقي نسبه من احتياطي الذهب و الفضه اللي عندنا .. باختصار شديد حنطبق فكره Fractional Reserve Banking زي ما الكتاب بيقول بس محدش سمع كلامه .. اسكتلندا وقتها كانت اولا عايشه ازمه اقتصاديه فمحدش كان عايز يسمع اي افكار بره الصندوق و ثانيا كلمه انجلترا كانت بتمشي علي اطخن طخين وعمر ما الانجليز حيسمحوا بتطبيق فكره ممكن تخلي الاقتصاد الاسكتلندي ينمو لدرجه انه يخلي الاسكتلنديين يقولوا علي فكره بقي احنا عايزين نتطلق.

(جون لاو) رجع هولندا تاني قفاه يقمر عيش .. عشر سنين عمال يتنقل بين هولندا و فرنسا .. عشر سنين وهو بيلعب قمار بس باحتراف .. بقي بيلعب قمار وهو معتمد علي نظريات رياضيه واهمها نظريه الاحتمالات .. هو كان بتاع رياضيات شاطر جدا علي فكره .. عمال يكسب و يجمع في فلوس .. هو بدا يطبق نظريات الاحتمالات بتاعه الرياضيات في القمار ومع الوقت بقي واحد من اغني اغنياء اوروبا .. الرجل كان اله حاسبه متحركه .. لا اله حاسبه ايه .. لا قول كود ماتلاب ميخرش المياه .. شويه و بقي يتعزم انه يلعب قمار في قصور امراء اوروبا وفي قعداته مع امراء اوروبا بدا يتكلم معاهم عن افكاره في الاقتصاد .. ليه كلنا منبقاش زي هولندا؟ .. طب ليه منحطش التاتش بتاعتنا وناخد الRisk اللي الهولنديين خايفين ياخدوها؟ .. من ضمن الناس اللي كانت بتسمع كان الفرنساويين .. هم وقتها كان حالهم يصعب ع الكافر .. حكم (لويس الرابع عشر) كان كارثي .. البلد فلست لا و كمان مديونه .. الفرنساويين كانوا عايزين يتعلقوا في اي امل ولما سمعوا كلام (جون لاو) شافوا ان هو ده الحل الوحيد .. خطه (جون) كانت سهله و الاهم انها كانت عبقريه .. خطه مبتطلعش الا من دماغ رجل عارف يجيب القرش من الهواء:

• اول خطوه ان فرنسا حتعمل زي هولندا و تعمل بنك مركزي .. البنك المركزي ده هو اللي حيطبع فلوس و الفلوس دي حتبقي ورق بنكنوت.
• ثاني خطوه هي التمويل .. هو عرض اسهم البنك للبيع .. لو حضرتك مواطن فرنساوي بيتقالك ان عشان تشتري سهم في البنك الجديد انت حتدفع 16% بس قيمه السهم كاش .. طب و الباقي؟ .. حنديلك بيهم سندات .. السندات دي هي ديون البلد وفي نفس الوقت دي الفلوس اللي البلد المفروض تديها لكل مواطن راح اشتري سهم .. طب و احنا استفدنا ايه؟ .. الناس كانت عارفه ان السندات دي ملهاش لازمه لان الحكومه مفلسه و عمرها ما حتعرف ترجع للناس فلوسها بس الناس بقت بتتاجر في السندات دي .. الناس كانت واثقفه في البنك انه حينجح بس مش دلوقتي .. ده كان استثمار لعيالهم و عيال عيالهم .. اللي اشتري سندات بقي بيبيعها لناس تانيه متخيله انها بكده حتأمن مستقبل عيالها .. و هوبا اغلب ديون البلد اختفت.
• ثالث خطوه ودي كانت الخطوه اللي دمرته ان بما ان البنك المركزي ده بقي هو اكبر بنك في فرنسا ف(جون) عمل شركه استيراد و تصدير سماها The Company of the West بحيث ان الشركه دي هي اللي تدير انتقال المواد الخام من مستعمره فرنسا في منقطه لويزيانا في اميركا .. برده انت مش فاهم الفكره .. زي ما عمل في البنك المركزي هو طرح اسهم الشركه دي في السوق للي عايز يشتريها .. السهم الواحد بيتباع ب5000 ليفرا اللي هي عمله فرنسا وقتها .. انت مش بتدفع المبلغ كله مره واحده .. بتدفع 15% كاش مقدم و الباقي بالتقسيط .. حلو .. خد انت الفلوس اللي اتدفعت مقدم دي كلها سدد بيها باقي ديون البلد .. حلو اوي .. (جون) حط من جيبه فلوس كاستثمار للشركه وهوبا سمعه السهم بقت زي الالماظ في السوق .. شويه و سعر السهم بقي 10,000 ليفرا .. شويه كمان و بقي 5,500,000 ليفرا .. لحد ما بقي 15,500,000 ليفرا .. زي ما انت شايف ده اسمه هراء .. ده اسمه هبد .. انا لو زارع افيون في مستعمره لويزيانا مكنتش حعرف اجيب فلوس عشان ابرر بيها ان سعر السهم ينط النطه (سوري في الكلمه برده) فشيخه دي.

في المرحله دي (جون) بدا يحس بالمصيبه اللي داخله عليه .. هو كان عارف ان مستعمره لويزيانا مفيهاش الا 800  بني ادم .. هو محتاج عدد الناس يتضاعف و الناس تبدا تشتغل و تبعت اي حاجه لفرنسا .. اي فلوس يا جدعان .. عشان يحل المشكله بقي يطلع المساجين من السجون و يجوز كل واحد فيهم لعاهره او فتاه ليل و يبعتهم علي لويزيانا يعيشوا هناك بس كان خلاص اللي حصل حصل .. مفيش حاجه تبرر ان سعر السهم يوصل 15 مليون .. التضخم زاد لدرجه ان حتي لما (جون) حاول يقلل سعر السهم او يقلل من قيمه العمله بقي بيخرب الدنيا زياده .. شويه و البنك المركزي الفرنسي انهار هو و شركه The Company of the West وده دخل فرنسا في كارثه اقتصاديه ربنا نجاها منها بالستر.

قرارات (جون لاو) ممكن  تكون لبست الاقتصاد الفرنسي في الحيط بس المشكله كانت مش الفكره .. المشكله كانت في التنفيذ .. مينفعش البنك المركزي يبقي هو الجهه اللي بتطبع فلوس و يبقي هو اللي يدير ديون البلد و كمان يبقي طرف في البيزنس و يتعامل علي انه بنك استثماري يدي يسلف فلوس .. فيه حاجه اتطبقت كانت غلط .. وهنا يجي دور بنك انجلترا او Bank of England .. اول بنك مركزي بحق و حقيقي .. بنك اتبني علي افكار (جون لاو) اللي حطها في كتابه Money and Trade Considered with a Proposal for Supplying the Nation with Money وفي نفس الوقت استفاد من اخطاء الفرنساويين و السويديين من قبلهم.

دلوقتي حنبدأ بقي نتكلم عن الشغل اللي علي نظيف .. عارف لما صنايعي يجي يعملك شغلانة في البيت و تلاقيه بيقولك من الحمار اللي إشتغل هنا قبل مني؟ .. أهو قصة ميلاد البنك المركزي الإنجليزي Bank of England كده .. لما البشر قالوا لنفسهم كفاية هبد بقي و تعالوا نشتغل علي نظيف .. إحنا حنجيب أفكار (نيكولاس باربون) و (جون لاو) و نشوف حنطبقها إزاي علي نظافة .. مهم تكون فاهم زي ما قلت في الجزء الثاني و حكررها النهارده إن أفكار (جون لاو) مكنتش غلط .. هو كان شايف مستقبل البشر في إعتماد إقتصادنا علي العملات الورقية و إن يبقي فيه بنك مركزي هو اللي يطبع الفلوس دي .. المشكلة إننا مكناش عارفين نطبق الأفكار دي إزاي؟

يمكن أول سؤال بيجي لدماغك لو فتحت قدامك سيرة طبع الفلوس و البنك المركزي هو إحنا بنحدد نطبع قد إيه فلوس إزاي؟ .. ده سؤال مهم بس فيه سؤال أهم منه .. مين أصلاً اللي حيطبع الفلوس دي؟ .. إحنا مصحيناش الصبح قلنا لنفسنا إن لازم يبقي عندنا بنك مركزي .. الطريق لإنشاء بنك إنجلترا عدي علي مشكلتين و المشكلتين دول هم السبب في الهبد اللي هبده (جون لاو) زي ما شفنا في الجزء الثاني.

المشكلة الأولي .. كل بلد فيها بنوك أكتر من محلات الفول و الفلافل عندنا:

المشكلة كانت معقدة أكتر ما انت متخيل .. كل بلد .. لا كل بلد إيه .. كل مدينة كان فيها كذا بنك و كل بنك بيطبع فلوس غير البنك الثاني .. ده في المدينة الواحدة .. تخيل ده في البلد كلها بقي .. كل ده و مفيش طريقة نقارن بيها مين عملته أقوي من مين .. بص خليني أديلك مثال بسيط و منه تفهم قد إيه المشكلة كانت عويصة .. لنفترض إن انا إسكندراني حبيت أروح أشتري حاجة من بورسعيد .. نفس المثال اللي قلته في الجزء الأول و حكينا بيه إزاي النظام البنكي الإيطالي كان شغال سنة 1300 بس لما بقينا في سنة 1690 الوضع كان فعلاً خرج بره السيطرة .. نرجع تاني للمثال .. لنفترض إن انا بتعامل مع بنك مصر و رحت حطيت عندهم 100 جنيه ذهب و خدت منهم ورق بنكنوت بيقول إن انا سايب في بنك مصر فرع إسكندرية 100 جنيه ذهب .. رحت انا بورسعيد أشتري حاجة .. التاجر اللي رحتله حيبص لورقة البنكنوت بتاعة بنك مصر فرع إسكندرية و يقولي إيه يا أخ البتاعة دي إحنا معندناش منها .. بورسعيد مفيهاش إلا بنك CIB و بنك QNB بس معندناش إحنا بنك مصر هنا .. طب ده معناه ايه؟

معناه إن لما التاجر ياخد ورق البنكنوت بتاعي يروح لبنك CIB اللي هو بيتعامل معاه فعشان البنك لسه حيبعت مندوب لفرع بنك مصر إسكندرية ياخد منهم ال100 جنيه ذهب و ده حيكلف التاجر مصاريف إدارية فالتاجر حيسحب مني انا و انا بشتري منه البضاعة المصاريف الإدارية دي .. ده معناه إن ورقة البنكنوت بتاعتي مبقاش قيمتها 100 جنيه ذهب .. بقي قيمتها أقل .. علي فكرة انا فارض المثال إني بتعامل مع بنك كبير زي بنك مصر .. تخيل لو انا بتعامل مع بنك إبن يومين زي بنك عوده مثلاً .. ساعتها التاجر حيقولي عشان إحتمال البنك يفلس في أي وقت فهو كمان حيقلل نسبة من قيمة ورقة البنكنوت بتاعتي .. يعني انا رايح أشتري بضاعة و انا عامل حسابي إني حصرف 100 جنيه إذ أكتشف إن اللي معايا فعلاً حوالي 70 بس.

ده إسمه عك ملوش إسم تاني .. أهي كل مدينة في كل بلد كانت عايشة في العك ده .. الناس كلها كانت عارفه المشكلة و الناس كلها كانت عارفه الحل .. لازم كل بلد يبقي ليها عملتها الموحدة .. يعني مينفعش كل بنك يطبع ورق بنكنوت من دماغه .. بس إزاي؟ .. مين الجهة اللي حتطبع الورق ده؟ .. إزاي أقنع الناس إنها تصدق إن ورقة البنكنوت دي ليها قيمة أصلاً؟ لإن متنساش إن في الجزء الأول قلنا إن أهم شرط عشان تقول علي أي حاجة فلوس إن الناس يبقي بينها إتفاق علي إن ليها قيمة .. طب هو البنك المركزي ده دوره إنه حيطبع فلوس و خلاص؟

المشكلة الثانية .. الديون بقت أكتر ما انت بتمشي في الشارع تسمع حد بيصرخ (فيجووو الدخلااااااوي):

سنة 1694 إنجلترا حالها مكنش يفرق كتير عن حال فرنسا لما (جون لاو) بدأ يطبق أفكاره .. الديون كانت متلتلة .. الحروب بين إنجلترا و فرنسا مكلفة أوفر .. فكرة إن إنجلترا يبقي ليها أساطيل متوزعة في كل حتة من العالم و كل أسطول عايز توفرله أكل و شرب و بارود .. ده خلاك مثلاً لو انت مواطن إنجليزي المفروض إن بلدك هي قوة عظمي ليها مستعمرات في كل حتة بس انت لو رحت السوق تشتري حاجة مش حتلاقي .. التضخم مخلي الأسعار فوق مستوي قدرة المواطن إنه يدفع .. دول عظمي بس نظامها المالي (سوري في الكلمة) مفشوخ لدرجة إن عندك ناس غنية أوي و ناس فقيرة أوي  .. كل ده سببه الديون .. الديون كانت فعلاً كتير .. كتير أووفر .. الحل كان قصاد الناس كلها .. لازم يبقي فيه بنك مركزي يلاقي صرفة في الديون دي .. لما بنك إنجلترا إتعمل حيبان أوي تأثير علم النفس علي الإقتصاد .. الإتنين فعلياً مربوطين ببعض جداً و الربطة بين الإقتصاد و علم النفس هي كلمة واحدة .. الثقة.

فكرة إن الحكومة بتتعامل مع بنك واحد بس مع الوقت بيخلي فيه ثقة بين المواطن و البنك ده .. ده معناه برده إن عاجلاً أم أجلاً البنوك اللي في البلد كلها لازم هي كمان تتعامل مع البنك ده لدرجة إنهم حيسمعوا كلامه .. الثقة دي هي اللي خلت ورقة البنكنوت اللي تطلع من بنك إنجلترا ليها تقل في السوق .. الإنجليز مصحوش الصبح قالك باااااس مفيش بنك حيطبع فلوس إلا بنك إنجلترا .. لا خالص .. هم سابوا البنوك التانية في الأول تطبع ورق بنكنوت عادي بس مع الوقت الناس بقت بتجري علي ورقة البنكنوت بتاعة بنك إنجلترا .. لدرجة إن بقي فيه ناس بتدفع فيها أكتر .. النظام كان إن انا مثلاً حروح البنك أديله 100 جنيه ذهب و في المقابل أخد منهم ورق بنكنوت بقيمتهم .. لما بنك إنجلترا بقي يطبع ورق بنكنوت الناس بقت ممكن تدفع 120 جنيه ذهب و تاخد ورقة بنكنوت ب100 بس .. مش لسبب غير إن ورقة البنكنوت بتاعة بنك إنجلترا حلت المشكلة الأولانية .. انا أقدر أروح أصرفها في أي حتة لإن كل التجار و كل البنوك الثانية في البلد بتعترف بيها .. ورقة البنكنوت بتاعة بنك إنجلترا بقت عماله تاكل السوق واحدة واحدة لحد ما في سنة 1884 طلع قرار بإن مفيش بنك في إنجلترا من حقه يطبع فلوس إلا بنك إنجلترا .. أخيراااا إنجلترا بقي ليها عملتها الموحدة اللي بتطلع من البنك المركزي.

دي كانت المشكلة الأولانية اللي البنك المركزي الإنجليزي حلها .. خلاص مبقاش كل بنك يطبع ورق بنكنوت .. فضلت مشكلة الديون .. الديون لازم تفهم قصتها ومنها حتفهم هو إزاي وجود كيان زي البنك المركزي ممكن يحلها .. إزاي إنجلترا وصلت لمرحلة إن ديونها بقت متلتلة؟ و إن التضخم عالي و إن الناس يا غنية أوي يا فقيرة أوي؟ .. الإجابة حضرتك في حاجة انا جبت سيرتها في الجزء اللي فات .. Fractional Reserve Banking أو قروض البنوك.

خليني برده أديلك مثال .. لنفترض إن انا معايا 100 جنيه ذهب و رحت حطتهم وديعة في بنك و في المقابل خدت انا 100 ورقة بنكنوت .. البنك وقتها بناء علي فكرة Fractional Reserve Banking بيحتفظ بس ب10% من ال100 جنيه ذهب اللي انا حطتهم عنده .. طب و الباقي؟ .. بيسلفهم كقروض .. هو علي إيدك اليمين ده بيخلق حالة نمو في الإقتصاد انت لا تتخيلها لإن كل 100 جنيه ذهب انا بحطهم في البنك فالبنك بيسلف بيهم 1000 ورقة بنكنوت للناس .. دي الميزة اللي العملات الورقية بتديهالك إنها بتنط بالإقتصاد لقدام .. لكن .. إيه اللي يحصل لو الناس كلها راحت البنك عشان تحول ورق البنكنوت بتاعها لجنيهات ذهب تاني؟

الوضع دلوقتي إن البنوك بقت بتسلف أكتر بكتير من الفلوس اللي موجودة عندها في الخزنة لمجرد إنهم أقنعوا نفسهم إن يا جماعة أكيد يعني مش الناس كلها حتهجم علي البنك عشان تحول ورق البنكنوت بتاعها للذهب و الفضة اللي هم سايبينه عندنا .. ده السبب اللي البنوك دلوقتي عامله حد أقصي للتعاملات البنكية إنك مينفعش تسحب أو تودع أكتر من مبلغ معين لإن فعلياً لو كل الناس اللي ليها فلوس في البنوك راحت سحبتها فالفلوس اللي في خزن بنوك مصر كلها مش حتكفي .. بس عشان حصل قبل كده زي ماقلتلك في السويد و في فرنسا إن البنوك بقت بتدي قروض عمال علي بطال و فيه ناس خدت قروض و معرفتش تسدد الفلوس اللي عليها فلما الناس عرفت و راحت جري علي البنوك ترجع فلوسها البنك مكنش معاه .. وهوبا الإقتصاد وقع .. ناس كتير خسرت تحويشة عمرها .. في إنجلترا الناس بطلت تحط فلوسها في البنوك  و بقوا يخزنوها تحت البلاطة ده في الوقت اللي البنوك نفسها بتحاول تلم أكبر قدر ممكن من الذهب و الفضة عشان اللي له فلوس عندها تعرف تردهاله .. فإنجلترا كان وضعها كالأتي .. الناس معاها فلوس بس مخبياها .. البنوك مش لاقيه حد يودع عندها فلوس و بالتالي هي مش بتدي قروض .. تضخم عمال يزيد يوم عن يوم بسبب ديون البلد.

جري الشريط كام سنة و حتلاقي نفسك قصاد بلد إقتصادها مفيهوش فلوس .. الناس خايفة علي فلوسها و البنوك خايفة تسلف .. التضخم بيكبر و ديون البلد محدش لاقي حل ليها .. لما جت سنة 1884و إتفعل قانون البنك المركزي الإنجليزي إن بقي هو الوحيد اللي يقدر يطبع فلوس فالبنك إتعلم من الدرس بتاع (جون لاو) .. البنك المركزي مينفعش يخش في بيزنس .. هو دوره إنه يحمي البيزنس .. البنك المركزي بقي بيقول للبنوك متحاوليش تخزني فلوس .. سلفي فلوس و انا حسندك .. البنوك بقت بتسلف و هي مش خايفة لإن البنك المركزي في ظهرها .. شوية و التضخم قل .. الإقتصاد بقي فيه فلوس .. و ديون البلد بقت بتسدد واحدة واحدة .. لكن انت محتاج تفهم نقطو و هي أساس شغل البنك المركزي الإنجليزي و بقي أساس شغل كل البنوك المركزية في كل حتة في العالم .. الغطاء الذهبي أو Gold Standard.

يطلع إيه Gold Standard ده يا سي دوني؟

الفكرة بمنتهي البساطة إن لو انا مواطن إنجليزي و معايا مثلاً 100 جنيه إسترليني فانا أقدر أروح البنك المركزي و أحول الفلوس دي لكمية ذهب .. الفكرة إن البنوك المركزية كانت بتتعامل بنفس المبدأ بتاع البنوك زمان .. انت بتروح تحط ذهب في البنك و بناء علي قيمة الذهب ده البنك بيطبع فلوس .. الحكاية دي أساساً جت بالصدفة .. كنت حكيت في الجزء الثاني إن قامت حرب بين إنجلترا و الصين إسمها حرب الأفيون بسبب إن إنجلترا كانت بتستورد كميات رهيبة من الشاي الصيني و الصين مكنتش بتقبل مقابل للشاي ده إلا الفضة .. مع الوقت إحتياطي إنجلترا من الفضة خلص .. لما البنك المركزي الإنجليزي بدأ يطبع فلوس فمكنش عنده غير الذهب عشان يسند بيه ثمن ورق البنكنوت و من هنا الفكرة سمعت في كل حتة في العالم .. أي بنك مركزي في أي دولة بيطبع فلوس بناء علي Gold Standard و هو إيه هي كمية الذهب المتخزنة عنده كغطاء لقيمة العملة .. زي ما قلت هو الموضوع بدأ بالصدفة بس مع الوقت إكتشفنا إن فكرة Gold Standard دي بتحل مشكلتين كبار جداً:

• المشكلة الأولي هي التضخم أو Inflation .. فيه ناس كانت بتطبع فلوس عمال علي بطال .. بيطبعوا فلوس أكتر حتي من السقف اللي يحققلك نسبى 10% Fractional Reserve Banking .. بمجرد ما الحكومة تعمل كده فبتلاقي معدل التضخم بيضرب في السما .. علي فكرة وجود البنك المركزي من عدمه مش حيحميك من انك تتفادي الحكاية دي .. فيه دول لما بتتزنق بسبب الحروب مثلاً بتبدأ تطبع فلوس لمجرد إنها تسد تكاليف الحرب .. ده بيعمل حاجتين .. أول حاجة إن المواطن البسيط بياخد أحلي خازوق لإن ساعتها مرتبه مش بيبقي مكفي لإن أسعار الحاجة في السوق بقت نار .. ثاني حاجة إن الدول اللي ليها علاقات تجارية مع الدولة اللي طبعت فلوس هي كمان بتتخزوق .. انا بايعلك بضاعة بمبلغ معين بس انت لما طبعت فلوس انت المفروض تديني فلوس أكتر .. أهي النقطة دي بالذات هي اللي حتودينا للمشكلة الثانية اللي Gold Standard بيحلها.
• المشكلة الثانية هي سعر تبادل العملة Exchange Rate .. فاكر لما قلتلك إن (نيكولاس باربون) قال لازم فكرة Mercantilism دي تتلغي و قال إن لازم نفتح الباب قصاد التجارة الخارجية بين الدول .. أهو بمجرد إن كل دولة بقي عندها البنك المركزي بتاعها اللي بيطبع عملة رسمية لكل بلد الباب ده إتفتح علي البحري .. التجارة بين الدول نطت بس ده حطنا قصاد مشكلة .. إيه العلاقة بين الجنيه الإسترليني و الفرانك الفرنسي؟ .. إزاي نحسب مين فيهم أعلي من الثاني؟ .. بما إن العملات الأوروبية بقت علي Gold Standard فانا بقيت عارف إن الجنيه الإسترليني بقد إيه ذهب و انا عارف برده الفرانك الفرانساوي بكام دهب .. أكنك بالضبط بتحول وحدات قياس يعني أكنك بتحول من متر لبوصة.

كل ده تقدر تقول إنه إتكسر و إتدمر مع الحرب العالمية الأولي .. كل سنين التعب و الهبد لحد ما حطينا نظام مالي ينفع دول العالم كلها تمشي عليه راح في ستين داهية .. دول العالم بطلت تلتزم بGold Standard و بقوا يطبعوا فلوس عمال علي بطال عشان يغطوا تكاليف الحرب .. بعد ما الحرب خلصت مفيش دولة مكنتش مديونة حتي اللي كسبوا الحرب .. يمكن الدولة الوحيدة اللي متأثرتش أوي كانت أميركا اللي فضلت مكملة علي Gold Standard بس لإن باقي دول أوروبا مبقاش معاها فلوس تدفعها عشان تشتري أي حاجة من أميركا فالأمريكان لقوا إن الذهب اللي عندهم مبقاش له لازمة ..أميركا عاشت نفس تجربة إسبانيا لما الإسبان إكتشفوا أميركا و بدأوا يكبوا دهب علي عتبة باب الملك .. التضخم بقي زي النار كلت كل حاجة .. هوباااا الكساد الكبير ضرب العالم .. رغم كل ده الناس فضلت متفائلة .. دي فترة و حتعدي .. زي اللي بيحصل دلوقتي كده .. و زي ما إحنا بنبقي بنتفرج علي الماتش في أمان الله و نلاقي فجأة حد شاط كورة من بره ال18 جت جون .. الحرب العالمية الثانية كانت الجون اللي دخل فجأة.

إقتصادياً الحرب دي عملت حاجة غريبة أوي .. دول أوروبا كلها لما الحرب خلصت كانت مديونة لأميركا بشكل ما أو بأخر .. خليني أفهمك .. كنت إتكلمت في مقالة حرب الموارد بتاعة الحرب العالمية الثانية إن الأمريكان عملوا إتفاق مع الإنجليز إسمه Lend-Lease كان بيقول إن في بداية الحرب قبل ما أميركا تخشها بنفسها مصاريف المجهود الحربي كلها أميركا حتشيلها .. كل الدبابات و الذخيرة و الطيارات و العلاج و الأكل و الشرب اللي إنجلترا محتاجاها أميركا حتوفرها .. طبعاً البضاعة اللي راحت دي كلها متدفعش ثمنها .. فلما الحرب خلصت الوضع كان كالأتي:

الفرنساويين عايزين من الألمان فلوس تعويض عن الإحتلال الألماني لفرنسا في الحرب .. الإنجليز عايزين من الفرنساويين فلوس تعويض عن تحرير إنجلترا لفرنسا من الإحتلال الألماني في الحرب وعمر ما الفرنساويين حيدفعوا اللي عليهم إلا لما الألمان يدفعوا اللي عليهم .. الأمريكان عايزين من الإنجليز فلوس و عمر ما الإنجليز حيسددوا اللي عليهم إلا لما ياخدوا فلوسهم من الفرنساويين .. كل ده في الوقت اللي بسبب إتفاقية Lend-Lease فتقريباً أميركا عندها إحتياطي العالم كله من الذهب .. حربين عالميتين عدوا و أميركا هي اللي كانت بتسلف أوروبا .. كل ما دولة تتزنق في فلوس البضاعة اللي كانت بتاخدها من أميركا بتدفعلها بالذهب .. الحل كان بسيط .. كل دول العالم تربط سعر عملتها بالدولار مش بالذهب .. تاني .. بما إن سعر الدولار لسه مربوط بالذهب .. و بما إن أميركا عندها أكبر إحتياطي ذهب في العالم .. إذن اربط كل أسعار العملات الثانية بالدولار .. و من هنا إتولدت فكرة الإحتياطي النقدي الأجنبي.

دولة زي مصر البنك المركزي بتاعها مبقاش مطلوب منه عشان يسند ثمن عملته إنه يخزن ذهب .. لا خالص .. بقي مطلوب منه إنه يجمع أكبر قدر من العملة الصعبة اللي هي الدولار الأميريكي .. مع الوقت بعد الحرب العالمية الثانية قيمة الدولار عماله تزيد و تزيد بشكل أوفر لحد ما جت سنة 1965 .. في السنة دي الرئيس الفرنسي (تشارلز دي جول Charles de Gaulle) أساساً كان مخنوق من الأمريكان و شايفهم شوية حرامية فقام يعمل إيه .. راح دفع لأميركا فلوس و قالها لو سمحتي هاتي الدهب بتاعي اللي عندك .. شوية و دول تانية قلدته .. دول كتير زهقت من إن عملتها مربوطة بالدولار لمجرد إن الدولار مسنود بالذهب  فقالوا لا بقي إحنا عايزين نرجع تاني لGold Standard .. خلال الفترة من 1965 لحد سنة 1971  و أميركا بتنزف فلوس بسبب الحرب الباردة و الحرب الكورية و حرب فيتنام ده غير إن دول كتير بقت بتسحب دهبها من أميركا .. كل ده خلي الرئيس الأميريكي (ريتشارد نيكسون Richard Nixon) إنه يقرر إنه ميخليش الدولار قايم علي Gold Standard .. كان المفروض إن الخطوة دي تخلي دول العالم كلها ترجع تاني تربط عملتها بالدهب مش بالدولار بس ده محصلش .. سميه كسل .. سميه اللي نعرفه أحسن من اللي منعرفوش .. سميه ليه تتعب أكتر بدل ما ممكن تتعب أقل .. سميه زي ما تسميه .. المهم إن دول العالم فضلت تربط عملتها بالدولار.

انا عارف إني طولت معلش بس دي كانت حكاية الفلوس الورقية .. إزاي ظهرت؟ و إزاي إتطبقت؟ و إزاي بقت حياتنا كلها معتمدة عليها؟ .. يمكن اللي انا عايزك تخرج به إن الفكرة نفسها مش قديمة .. أخر تاريخ انا قلته كان 1971 يعني تقريباً وقت باباك ما كان لسه صغير .. يا عيني إحنا متخيلين إن أكيد النظام المالي اللي إحنا عايشينه دلوقتي و حياتنا كلها واقفه عليه بقاله كتير متطبق و شغال بس ده مش حقيقي .. النظام ده قائم علي الهبد فلما تتحمق في نفسك أوي و تقول إن النظام البنكي ده نظام فاسد فانا بس عايزك تهدي كده و تفتكر إن النظام ده هو أحسن الوحشين .. فيه دول تانية لبست خوازيق قبل منك .. هل النظام البنكي الحالي فيه مشاكل؟ .. أكيد اه .. هل المشاكل دي تستدعي إننا نهده كله؟ .. أكيد لا .. هو نظام زيه زي أي حاجة في الدنيا محتاج كل فترة يتطور و يتراجع و الأهم إن الناس اللي شغالين فيه ميتعاملوش معاه علي إنه قرأن نازل من السما مينفعش نقرب له.

المصادر:
فيديو علي YouTube بعنوان The history of paper money-origins of exchange-extra history part 1 وده لينك الفيديو:
ttps://www.youtube.com/watch?v=-nZkP2b-4vo
فيديو علي YouTubeبعنوان The history of paper money-not just noodles-extra history part 2 وده لينك الفيديو:
tps://www.youtube.com/watch?v=rPHTmGjoe2k
فيديو بعنوان The history of paper money-Barbones economy-Extra history-Part 3 نشرت علي YouTube وده لينك الفيديو:
https://www.youtube.com/watch?v=GKtNuzakzMA
فيديو بعنوان The history of paper money-Lay down the law-Extra history-Part 4 نشر عي YouTube وده لينك الفيديو:
http://outube.com/watch?v=lzH1p3t2oRE
فيديو بعنوان The history of paper money-Working out the kinks-Extra history-Part 5 نشر علي YouTube  وده لينك المقاله الاصليه:
https://www.youtube.com/watch?v=LrB9bS2VOLE
فيديو بعنوان The history of paper money-The gold standard-Extra history- Part 6 نشر علي YouTube وده لينك المقاله الاصليه:
https://www.youtube.com/watch?v=GNo7MDN5-0g