لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a-2?utm_source=clipboard&utm_medium=text&utm_campaign=social_sharing
عمرك سألت نفسك هي إيه مشكلة كوريا الشمالية مع أميركا؟ طب ليه كوريا الجنوبية و كوريا الشمالية منفصلين عن بعض؟ طب إيه سر العداوة بين نظام الحكم الكوري الشمالي مع كوريا الجنوبية؟ علي فكرة الموضوع ده مش مجرد دولتين مش طايقين بعض زي مثلاً فلسطين و إسرائيل .. الموضوع أسوأ من كده بكتير .. كراهية أميركا متأصلة في الثقافة الكورية الشمالية لدرجة إن وفق كلام جريدة The Telegraph البريطانية ففي شهر يونيو من كل سنة النظام الكوري الشمالي بيعمل حاجة إسمها شهر المعاناة ضد الإمبريالية الأميريكية .. لمدة شهر كامل مفيش حاجة بتتقال في الإعلام أو الجرايد أو و إنت ماشي في الشارع في أي حتة في كوريا الشمالية غير إن أميركا دي شيطان عايز يموتنا كلنا .. السؤال اللي حنحاول نجاوب عنه في المقالة دي هو ليه النظام الكوري الشمالي بيكره أميركا أوي كده؟
الحقيقة إن الإجابة بمنتهي البساطة هي الحرب الكورية .. مشكلة الحرب الكورية إنها حرب حصلت في الخمسينات بس توقيتها خلاها تتحشر بين الحرب العالمية الثانية اللي إنتهت سنة 1945 و بين حرب فيتنام اللي بدأت سنة 1968 و ده مخلي الحرب الكورية مش واخده الإهتمام اللي تستحقه في الإعلام الأميريكي ولا حتي العالمي .. مفيش حد بيتكلم عن الحرب الكورية و لو سألت أي حد تعرفه إنت تعرف إيه عن الحرب الكورية مش حيكون عارف عنها حاجة .. في المقالة دي حنحاول نجاوب علي كذا سؤال:
- هي الحرب الكورية قامت ليه؟
- إيه اللي حصل في الحرب دي؟
- هي الحرب الكورية خلصت إزاي؟
خلينا نبدأ بالإجابة عن أول سؤال: هي الحرب الكورية قامت ليه؟
زمان أثناء الحرب العالمية الثانية اليابان إحتلت شبه الجزيرة الكورية و كانت مسيطرة عليها .. بس لما الحرب العالمية الثانية إنتهت حصل في شبه الجزيرة الكورية زي اللي حصل مع ألمانيا بالضبط إنها إتقسمت لنصين .. نص تحت سيطرة الولايات المتحدة و نص تحت سيطرة الإتحاد السوفيتي .. زي ما ألمانيا إتقسمت لألمانيا الشرقية (تحت سيطرة السوفييت) و ألمانيا الغربية (تحت سيطرة الأمريكان) فشبه الجزيرة الكورية هي كمان إتقسمت .. بناء علي كلام وكالة CNN ففي سنة 1948 يعني بعد نهاية الحرب العالمية الثانية بسنتين شبه الجزيرة الكورية إتقسمت للجمهورية الكورية في الجنوب و دي تحت سيطرة الأمريكان و الجمهورية الشعبية الديموقراطية الكورية في الشمال و دي تحت سيطرة السوفييت .. بناء علي كلام National Geographic فخط عرض 38 درجة كان هو الخط الفاصل بين حدود الدولتين .. طبعاً حتسأل إشمعني يعني خط عرض 38 درجة يبقي هو الخط الفاصل؟ الحقيقة إن حتي وزير الخارجية الأميريكي وقتها (ديين راسك Dean Rusk) مكنش عارف و مكنش فيه أي سبب لا جغرافي ولا إقتصادي يوضح إشمعني خط عرض 38 درجة يبقي هو الخط الفاصل بين الدولتين بس تقدر تقول إن الأمريكان و السوفييت شافوا إن ده حل مؤقت مناسب و بعدين يبقوا يتفقوا مع بعض يقسموا الحدود إزاي.
المشاكل بين الجمهوريتين فضلت تكبر لحد ما في يوم 25 يونيو 1950 القوات المسلحة الكورية الشمالية عدت خط عرض 38 درجة و بدأت عملية غزو كوريا الجنوبية … الأمريكان عشان يمنعوا إنهيار كوريا الجنوبية اللي كان جيشها أضعف بكتير من جيش كوريا الشمالية اللي كان مدعوم بقوة من الإتحاد السوفيتي راحوا للأمم المتحدة و طلبوا من الدول الأعضاء في الأمم المتحدة إنهم يبعتوا قوات لحماية كوريا الجنوبية و علي فكرة دي كانت أول مرة الأمم المتحدة تتدخل عسكرياً في دولة ما من دول العالم .. يمكن لإن الأمم المتحدة كانت لسه متكونة قريب فالسوفييت مكانوش عاملين حساب إن ممكن أميركا تستخدم الأمم المتحدة بالشكل ده أو يمكن لإن السوفييت كانوا متخيلين إن الأمم المتحدة دي ملهاش أي ستين لازمة فعشان كده وقفوا ورا كوريا الشمالية في غزوها لكوريا الجنوبية .. المهم إن فيه 16 دولة وافقت إنها تبعت قوات لمساعدة كوريا الجنوبية و فيه 41 دولة وافقت إنها تبعت مساعدات إنسانية و معدات .. الهدف الأساسي من العملية العسكرية اللي عملتها الأمم المتحدة إنها توحد شبه الجزيرة الكورية و ده حيحصل بإن القوات الدولية دي تقدر إنها أولاً تصد الهجوم الكوري الشمالي و بعد كده تبدأ هي تعمل هجوم مضاد بحيث تقدر تحتل كوريا الشمالية بالكامل .. رغم إن فيه 16 دولة زي ما قلتلك بعتت قوات مسلحة لكوريا الجنوبية إلا إن 90% من إجمالي القوات اللي راحت كانت من أميركا.
المبرر اللي الأمريكان قالوه عشان يدخلوا الحرب الكورية كان إن دي مواجهة مش بس بين دولتين متخانقين مع بعض إنما مواجهة أكبر بين الشيوعية و الرأسمالية .. مواجهة بين أميركا و بين الإتحاد السوفيتي .. الأمريكان كانوا شايفين إن زمان السوفييت كانوا عايزين ينشروا نفوذهم و يتوسعوا في العالم بإنهم ينشروا الفكر الشيوعي بطرق سياسية بس وقوفهم ورا كوريا الشمالية خلي دي أول مرة يلجأوا لنشر الشيوعية بالحرب و القوة و ده أجبر أميركا إنها ترد هي كمان بالقوة .. أو علي الأقل ده المبرر اللي قاله الرئيس الأميريكي وقتها (هاري ترومان Harry Truman).
ده حيخلينا نروح للسؤال الثاني و هو إيه اللي حصل في الحرب دي؟
زي ما قلنا إن الغزو الكوري الشمالي لكوريا الجنوبية حصل يوم 25 يونيو 1950 .. في أكتوبر 1950 يعني في خلال 4 شهور بس كانت القوات الأميريكية مش بس قدرت إنها تصد الهجوم الكوري الشمالي إنما فعلياً إحتلت العاصمة الكورية الشمالية بيونج يانج .. السوفييت فعلياً مكانوش قادرين يقفوا قدام الأمريكان بس الوضع إتغير لما الصين دخلت اللعبة .. الصين قدمت دعم مش طبيعي لكوريا الشمالية و ده خلاها تشن هجوم كاسح ضد القوات الأمريكية أجبرها إنها تنسحب من العاصمة بيونج يانج و رجعوهم تاني لحدود كوريا الجنوبية … بداية من سنة 1950 لحد سنة 1952 مفيش حد عرف يحسم الحرب .. بناء علي كلام جريدة The Washington Post الأميريكية فسبب أساسي في مشاعر الكراهية ضد أميركا في كوريا الشمالية راجع لإسلوب القصف الجوي المستمر لكوريا الشمالية .. الغارات الجوية الأميريكية علي كوريا الشمالية كانت عنيفة لدرجة إن خلال سنتين بس أدت لمقتل 20% من إجمالي تعداد سكان كوريا الشمالية .. ده بإعتراف وزير الخارجية الأميريكي (دين راسك Dean Rusk) اللي قال في شهادته علي الحرب دي لجريدة The Washington Post إن سلاح الجو الأميريكي مسبش بيت في كوريا الشمالية إلا دمره و مسبش حاجة بتتحرك إلا و قصفها بالطيران .. الغريب إن الإعلام الأميريكي مجابش سيرة جرائم الحرب اللي إرتكبتها القوات الجوية الأميريكية في كوريا الشمالية ولا حد غطاها .. حتي حلفاء أميركا نفسهم شافوا إن اللي عملته أميركا في كوريا الشمالية ده عنصري و همجي و ملوش أي مبرر .. يا ريت الموضوع وقف لحد كده .. وفق كلام Website إسمه Mental Floss فالأمريكان مكانش عندهم أي مشكلة إنهم يضربوا كوريا الشمالية بالقنبلة النووية بس يمكن الرفض القاطع للدول الأوروبية هو اللي أجبر أميركا إنها ترجع في كلامها.
طب الحرب دي خلصت إزاي؟
بناء علي كلام CNN فمندوب الإتحاد السوفيتي لدي الأمم المتحدة (جايكوب ماليك Jacob Malik) إقترح إنه بما إن مفيش طرف عارف يحقق نصر عسكري حاسم فمبقاش فيه بديل غير إعلان وقف إطلاق النار .. مباحثات وقف إطلاق النار بدأت في يوليو 1951 و إنتهت في أكتوبر 1952 من غير الوصول لأي نتيجة .. السبب في فشل المباحثات دي وفق كلام BBC إن كوريا الشمالية كانت مُصرة إن كل أسري الحرب الكوريين الشماليين اللي الأمريكان قابضين عليهم لازم يرجعوا بلدهم تاني .. المشكلة إن كتير من الأسري دول كانوا رافضين أصلاً يرجعوا كوريا الشمالية تاني .. الوضع فضل علي ما هو عليه لحد سنة 1953 بعد وفاة الديكتاتور السوفيتي (جوزيف ستالين) لما إتمضي علي معاهدة وقف إطلاق النار بحيث إن الإتفاق كان أسري الحرب اللي عايزين يرجعوا بلدهم كوريا الشمالية يرجعوا و اللي رافضين حيتم إعطاءهم حق اللجوء السياسي في كوريا الجنوبية .. الغريب إن بناء علي كلام CNN فمعاهدة وقف إطلاق النار وقع عليها كوريا الشمالية و الصين و الأمم المتحدة بس كوريا الجنوبية رفضت التوقيع .. الإتفاق ده أنهي حالة الحرب و قال إن حيبقي فيه خط فاصل بين كوريا الشمالية و الجنوبية طوله 300 كيلومتر حيبقي عبارة عن منطقة منزوعة السلاح Demilitarized Zone و لحد اللحظة اللي إنت بتقرأ فيها المقالة دي فالخط ده هو اللي بيفصل بين كوريا الشمالية و كوريا الجنوبية.
المصدر:
مقالة بعنوان What was the Korean war? The 1950s era conflict is why North Korea still hates us today .. نشرت في Website إسمه Mic.com و ده لينك المقالة الأصلية:
https://mic.com/articles/176099/what-was-the-korean-war-the-1950s-era-conflict-is-why-north-korea-still-hates-us-today#.ZMPbDJ93E
