الحروب النابليونية .. امشي علي مهلك عشان توصل بسرعة .. الجزء الثالث.

النهاية بس مش أوي .. أهم حاجة إنك تبقي عارف أخرك فين:

من أهم الدروس في السياسة إنك متحاربش حد في أكل عيشه .. لو فكرت فيها حتلاقي إن أغلب الثورات اللي قامت علي الحكام في تاريخ البشر ولعت بسبب إن الحاكم استبد واتفرعن لدرجة إنه حارب الناس في أكل عيشها .. غلي عليها عيشتها .. داس عليهم بضرايبه .. خلاهم يقلقوا علي توفير قوت عيالهم .. (نابليون) لما فرض حصاره القاري علي بريطانيا عشان يجبرها تيجي هي ليه عشان تحاربه فهو كان لازم يفهم إنه مش بس بيلعب بمستقبل بلده .. ده بيلعب بمستقبل شعوب تانية .. شعوب حتبص لنفسها وتسأل السؤال المهم .. الله وأنا مالي يا لمبي .. من ضمن الشعوب دي كانت إسبانيا .. اللي خلي الموقف منيل بستين نيلة إن العيلة المالكة الإسبانية وقتها كانت بينها خناقة داخلية علي مين يقعد علي الكرسي .. قدام الناس اللي بيحكم هو الملك (كارلوس الرابع) .. الملك له دراع يمين اسمه (مانويل جودوي) مش بس بيسرق فلوس الملك وخارب الدنيا .. ده كمان أغري الملكة (ماريا لويزا) وخانت جوزها الملك معاه وبقت عشيقته والناس كلها عارفه بما فيهم الملك نفسه وابنه .. يقوم ابن الملك (فريديناند السابع) عامل انقلاب عسكري عشان يطير أبوه من علي الكرسي .. ده في الوقت اللي تقريباً أسبانيا كانت تحت الاحتلال الفرنساوي لإن لو تفتكر في نوفمبر 1807 القوات الفرنساوية الإسبانية المشتركة غزت البرتغال فانت عندك قوات فرنساوية تقريباً مسيطرة علي كل الموانيء الإسبانية .. عشان نفوذ (نابليون) في إسبانيا بقي صعب يتقاله لا فلما هو عرض علي العيلة المالكة الإسبانية انها تزوره في باريس عشان يقعدوا قعدة عرب يتكلموا عشان يحلوا أزمة الحكم دي محدش استجري يقوله مش جاي.

فاكر الإنقلاب اللي عمله (نابليون) علي الحكومة الفرنساوية .. فاكر هو عملها ازاي .. اهو تخيل انه عمل ده في العيلة المالكة الإسبانية .. هو جابهم عنده .. قعدهم في أوضة .. حبسهم .. وعين أخوه ملك لإسبانيا .. شفت سهلة ازاي من وجهة نظره .. (نابليون) شاف الدنيا من شباك بيته وعشان كده هو تخيل إنه بمناورة واحدة خد إسبانيا في جيبه .. هوبا قامت الثورة الإسبانية علي الوجود الفرنساوي في البلد .. شوية والأنجليز بعتوا قوة عسكرية للبرتغال عشان يخلوها تستقل تاني عن الاحتلال الأسباني الفرنساوي المشترك .. المقلب السياسي اللي (نابليون) حب يعمله عشان يسرق الحكم في إسبانيا فرقع في وشه بشكل محدش كان يتخيله .. رد فعل الشارع الإسباني مكنش معمول حسابه لإن محدش من دايرة المقربين من (نابليون) كان فاهم الشارع الإسباني .. مين حيقبل فكرة إن العائلة المالكة بتاعته تتحبس وتجيب أخوك يحكم .. حتي لو العائلة المالكة الإسبانية بنت ستين كلب عايزه الحرق كلها بجاز وسخ .. نفس الحسبة الغلط اللي أبوحنان عملها في إيران .. برده هو تخيل إن تغيير نظام الحكم في إيران حيبقي قلبة وقومه .. سبع سنين و(نابليون) محشور في إسبانيا مش عارف يطلع في الخناقة اللي اتعرفت باسم حرب الاستقلال الإسبانية اللي ولعت سنة 1807 و انتهت 1814.

• الحرب النابليونية الخامسة .. الخروج من الفخ إلي فخ أنيل:

مع الوقت بقي واضح إن (نابليون) غرز في إسبانيا غرزة ما يعلم بيها إلا ربنا ودي كانت فرصة إنجلترا إنها تخليه يغرز أكتر بس في حتة تانية .. في إبريل 1809 هم لعبوا في دماغ الإمبراطور (فرانسيس) بتاع الإمبراطورية النمساوية عشان يضرب (نابليون) للمرة الرابعة عشان تبقي أسرع حرب تحصل في فترة حكم (نابليون) .. في أربع شهور بس كانت القوات النمساوية رجعت تاني مكانها بس فيه حاجة حصلت في الحرب دي خلت الناس كلها تهرش في شعرها .. دي أول مرة القوات الفرنساوية تتعور أوي كده .. يوم 21 مايو 1809 قامت معركة أسبيرن أيسلنج واللي فيها لأول مرة من سنين طويلة القوات البرية الفرنساوية يتحط عليها .. حتي لما الحرب اتحسمت لصالح فرنسا في معركة فاجرام يوم 5 يوليو 1809 كان نصر مكلف أوي أوي .. قصاد إن النمساويين خسروا 40 ألف مقاتل فالفرنساويين مات ليهم 34 ألف .. استسلام النمسا جه بشرط إنها مش بس تنضم للحصار القاري إنما كمان (نابليون) اتجوز بنت (فرانسيس) وبقي كده متجوز اتنين اللي هي بنت امبراطور النمسا مع (جوزفين) مراته  ومن بنت (فرانسيس) خلف منها ولي عهده.

عشان برده أوريك إن التاريخ مش بيعيد نفسه أنما احنا اللي بهايم .. تاني .. انت خطتك يا عم (نابليون) إنك حتحاصر بريطانيا اقتصادياً عشان هم اللي ييجوا بنفسهم يتعاركوا معاك .. حلو .. اتقالك إن الإسبان الموضوع صعب عليهم والفلوس اللي بتخشلهم من التجارة قلت وقالوا لنفسهم احنا مش مطالبين نستحمل عشان خاطر (نابليون) وأديك رحت تتعارك معاهم واتحشرت هناك ومش عارف تطلع .. شوية واتقالك إن الروس هم كمان في السر رجعوا تاني يتاجروا مع الإنجليز عشان يخففوا شوية من خسايرهم .. تقوم تعمل ايه يا عم (نابليون) .. تجمع جيش قوامه 650 ألف مقاتل وتبدأ تزحف بيه علي روسيا سنة 1812 في الوقت اللي انت لسه مش عارف تطلع من حشرتك في إسبانيا .. النسخة الأولانية اللي محدش بيتكلم عنها عن (هتلر) .. وزي ما (هتلر) اكتشف في الحرب العالمية الثانية فخط الدفاع الأول عن روسيا هي إن روسيا بلد كبيرة .. كبيرة أوي .. كبيرة خالص .. الروس استغلوا ده لصالحهم بإنهم عملوا الفتيس بتاع جيشهم علي المارشدير ورجعوا لورا .. وهم بينسحبوا بيحرقوا أي شجرة .. يردموا أي بير .. يدمروا أي بيت .. ده في تكتيكات الحروب بيسموه تكتيك الأرض المحروقة Scorched Earth Tactic .. مهم تسأل نفسك هو ليه الروس عملوا كده .. استفادوا ايه يعني؟

هي مسألة منطق سهلة جداً .. دلوقتي (نابليون) زي ما قلتلك جمع جيش فيه 650 ألف مقاتل .. ده رقم خزعبلي .. انت مش بتتكلم عن جيش انت بتتكلم عن ديناصور ماشي علي الأرض .. ديناصور حركته تقيلة .. بياخد وقت عشان يروح من حتة لحتة .. الحل إنك تقسم الديناصور ده لديناصورات أصغر اللي هي التقسيمة اللي أخترعها (نابليون) إنه بيقسم الكيان الكبير ده لعدد من الفيالق أو اللواءات .. الفيالق الأصغر دي أكلها وشربها بيكون من سرقتها لخير القري الزراعية اللي علي طريق الحرب وبالتالي إنت مبقتش محتاج خطوط إمداد عشان توفر أكل وشرب للعساكر بتوعك .. طب لما الروس يحرقوا الأراضي الزراعية اللي هم بينسحبوا منها فكده الفرنساويين مش حيعرفوا يستفيدوا بيها .. فده حيخلي الفرنساويين مجبرين يوفروا خطوط إمداد تنقل أكل وشرب عشان العساكر متموتش من الجوع .. فده لوحده حيرجع يبطأ حركة الجيش الفرنساوي تاني .. التكتيك ده اللي عمله الروس سحب من الفرنساويين أهم ميزة عندهم .. سرعة الحركة .. المشكلة إن خطوط الإمداد بتاعته كانت أبطأ من حركة جيشه فده خلي مع كل كيلومتر (نابليون) بيقطعه جوه روسيا هو بيخسر عساكر بسبب الجوع والمرض .. كتير منهم هربوا من الخدمة بعد ما شافوا زمايلهم بيروحوا هدر .. الزحف النابليوني علي روسيا بدأ في يونيو 1812 بجيش قوامة زي ما كررت قبل كده 650 ألف مقاتل .. جري الشريط شهر بس في يوليو 1812 الجيش ده اتخسف بيه الأرض بقي 285 ألف .. جري الشريط كمان شوية في أغسطس 1812 الجيش الفرنساوي اللي دخل معركة سمولنسك كان قائم علي 170 ألف .. لما الجيش الفرنساوي بقي علي عتبة باب موسكو بقي تحت ايده 130 ألف بس عشان يعدي علي (نابليون) أسود يوم في حياته .. يوم معركة بورودينو يوم 7 سبتمبر 1812.

هو صحيح كسب المعركة بس طلع منها متشلفط .. في معركة واحدة خساير (نابليون) كانت فوق 30 ألف عسكري قصاد فوق 44 ألف قتيل في الجيش الروسي .. الطريق إلي موسكو كان مفروش بدم الضحايا اللي راحوا من غير أي معني .. (نابليون) بيخش موسكو بيلاقيها مدينة مهجورة زي ما بتشوف في أفلام الزومبي كده زي مثلاً I am Legend بتاع (ويل سميث) الله يمسيه بالخير .. مدينة لا تصلح إنك تعيش فيها .. (نابليون) من يأسه بعت رسالة ل(أليكساندر) اللي كان مستخبي في العاصمة وقتها سانت بطرسبرج بيطلب منه الاستسلام عشان (نابليون) ميسمعش غير صوت صرصور الحقل .. هنا بس (نابليون) فهم الخازوق اللي هو لبسه .. هو تحت ايده حوالي 100 ألف عسكري بس جوه موسكو اللي زي ما قلتلك مدينة مهجورة ومحروقة مينفعش يتحامي فيها .. دلوقتي انت في سبتمبر يعني فاضلك أكتوبر وتبقي دخلت في نوفمبر .. سويت نوفمبر .. بس في روسيا مسموش سويت نوفمبر .. اسمه كولد نوفمبر .. فريزينج نوفمبر .. (أليكساندر) سابله موسكو مخضرة بس من غير فايدة .. (نابليون) محتاج ينسحب من روسيا .. وبسرعة قبل ما نوفمبر يحل عليه .. الروس بدأوا يضربوا خطوط الإمداد بتاع الفرنساويين عشان يعطلوهم أكتر .. زي ما قلتلك هو سباق سرعة .. واحد عايز يجري قبل ما نوفمبر يحل .. والثاني عايز يعطله عشان يهل عليه نوفمبر.

هنا برده عرق الندالة نقح .. فاكر لما (نابليون) عرف إن الحملة الفرنسية علي مصر كانت معركة خسرانة فقرر يسيب رجالته وخد ديله في سنانه وجري .. هنا برده كلاكيت تاني مرة .. وسط المعاناة اللي عايشها رجالته جه قالهم أصل أنا عرفت إن فيه مؤامرة ضدي في باريس فلازم اسبقكوا انا .. الجيش اللي راح روسيا وهو 650 ألف .. رجع 70 ألف بس منهم.

• الحرب النابليونية السادسة .. العجل وقع يا رجاله:

لما الجيش الفرنساوي اتحط عليه في غزوه لروسيا فده كان بداية إن الزهر يلعب وتتبدل الأيام بس بعيد عنك بقت سواد فوق دماغ (نابليون) .. بعد ما الفرنساويين كانوا هم اللي بيضربوا فدلوقتي الروس هم اللي بدأوا غزوهم للأراضي الفرنساوية .. بروسيا باعت (نابليون) وانضمت لروسيا .. زيها برده السويد .. النمسا عشان بنت الإمبراطور متجوزة (نابليون) فمكنش ليهم عين يقلبوا عليه فالنمسا وقفت علي الحياد .. (نابليون) ملقاش قدامه غير انه يستدعي الأحتياط فبقي تحت ايده جيش صحيح كعدد هو مش بطال حوالي 100 ألف بس أغلبهم عيال صغيرة معندهمش أي خبرة قتالية والأهم إن كان عنده عجز رهيب في الحصنة .. الحصنة في الوقت ده كانوا زي القوات الجوية دلوقتي .. هو قادر يقف علي رجله قصاد التحالف الروسي البروسي السويدي المشترك بس عشان هو معندوش سلاح خيالة فهو مش عارف يحسم الحرب .. عشان محدش كان عارف ياخد من التاني لا حق ولا باطل فالنمساويين عرضوا إنهم يتوسطوا للوصول لهدنة بس كل محاولاتهم فشلت بسبب نشوفية دماغ (نابليون) فقال ايه النمساوين خدوا ده مبرر إنهم يقلبوا علي (نابليون) وينضموا للتحالف اللي ضده.

يمكن لأول مرة التحالف اللي ضد (نابليون) يبقي عندهم استراتيجية واضحة للتعامل معاه .. أخيراً بعد ست حروب الناس دي بدأت تنسق مع بعضها هم حيعملوا ايه والحقيقة هي فكرتهم كانت تقريباً هي هي التكتيك اللي الروس استخدموه ضده .. كل ما (نابليون) يجي عليك اجري .. بس كده .. كل ما الفرنساويين يتقدموا مثلاً باتجاه القوات البروسية أو الروسية فهم حينسحبوا جري عشان يدوا فرصة للقوات السويدية والنمساوية إنها تضرب ظهر الفرنساويين .. التكتيك ده كان فعال جداً لدرجة إن (نابليون) بدأ ينسحب لورا لحد ما لقي نفسه حرفياً متحاصر من أربع جيوش في معركة لايبزج يوم 16 أكتوبر 1813 واللي انتهت بهزيمة قاسية ل(نابليون) وخسارته لفوق 30 ألف عسكري عشان بعد معركة لايبزج يلاقي نفسه في وضع زي القطران .. الإنجليز قدروا يطردوا أخر غسكري فرنساوي بره إسبانيا .. الدانمرك اتضربت جامد من السويد وأُجبرت إنها تخون (نابليون) .. نفس الكلام مع إيطاليا .. الدنيا كانت مديه ظهرها ليه من كل حتة .. الشعوب اللي هو احتلها مش طايقاه سواء كنت بتتكلم عن الألمان او الهولنديين أو الطليان .. شعبه هو شخصياً طهق منه بعد سنين من الحرب اللي مش بتخلص والاف الضحايا من شباب البلد .. الإنجليز حرفياً بعزقوا مليارات فلوس لتمويل الحرب ضده.

في محاولة أخيرة لإنقاذ ما يمكن إنقاذه (نابليون) جمع اللي فاضل من رجالته ولمدة 6 أيام من 10 لحد 15 فبراير 1814 قضاها كعب داير يدي جيوش الحلفاء علي قفاهم واحد ورا الثاني بس ده ممنعش إن الكترة تغلب الشجاعة عشان يوم 31 مارس 1814 الحلفاء بيخشوا العاصمة باريس .. الغريبة في حاجة .. الغريبة إن فجأة تحس إن فرنسا بنزينها خلص .. الشعب بقي مش قادر ومش عايز يحارب لدرجة إن الشارع خرج يرحب بجيوش الحلفاء اللي احتلت باريس يعني المواطن الفرنساوي البسيط خرج من بيته يهيص ويرحب بجيش احتلال أجنبي أطاح بالحاكم الشرعي بتاع بلده لمجرد إنه خلاص زهق من الحرب ومبقاش قادر يكمل أكتر من كده .. قادة القوات اللي تحت (نابليون) هم كمان زي ما يكون جتلهم كرشة نفس وكلهم استسلموا في وقت واحد ومن غير أي تنسيق ما بينهم .. الناس كلها تعبت .. الناس كلها كانت عايزه ترتاح .. بأي ثمن .. والثمن اللي اتدفع كان غالي أوي أوي.

النهاية خالص .. مينفعش رجل يطلع معاش ويفضل قاعد في البيت:

اللي (نابليون) كان عايزه إنه يتنازل عن الحكم لصالح ابنه اللي يبقي حفيد الإمبراطور (فرانسيس) إمبراطور النمسا بس الطلب ده اترفض .. اللي حصل إن بضغط إنجليزي اتجاب الملك (لويس الثامن عشر) من بيتهم عشان يجي يحكم اللي هو يبقي أخو الملك (لويس السادس عشر) اللي قامت ضده الثورة الفرنساوية وترجع تاني فرنسا تبقي مملكة ولا كأن كان فيه ثورة فرنساوية .. (نابليون) اللي كان عنده وقتها 44 سنة اتنفي لجزيرة صغيرة اسمها إيلبا قصاد ساحل إيطاليا وقال يعني عشان الحلفاء يتقال عليهم مراعيين مشاعره فهم ادوله لقب إمبراطور إيلبا .. حتسألني أكيد هو استحمل ازاي أو إيه كان رد فعله .. حقولك .. هو حاول ينتحر بإنه يشرب ازازة سم كان معلقها علي رقبته طول سنين الحرب علي أساس إن في اللحظة اللي هو يتأكد إنه حيتأسر فيها يقوم شاربها عشان محدش يقبض عليه حي .. بس للأسف بعد سنين من التخزين السم باظ واللي حصل ما (نابليون) شربه إن جاله نزلة معوية حادة.

حياة (نابليون) في إيلبا كانت إلي حد كبير هادية .. هو كان متطمن علي مراته وابنه لإنهم كانوا عايشين كويس .. صحيح بعيد عنه بس كويسين .. بيجيله أول كل شهر مرتب محترم من الحكومة الفرنساوية .. جاله كتير ناس تزوره من مؤرخين وصحفيين وفنانيين .. أي حد كان عايز يقابل أهم شخصية في أوروبا كان يقدر عادي خالص .. بس فضلت أهم مشكلة قارفاه في عيشته إنه مش لاقي حاجة يعملها .. دي مشكلة عويصة بتقابل أي رجل بيطلع معاش .. يعني إيه أقعد في البيت من غير لا شغله ولا مشغلة .. زود علي كده خبر وفاة مراته الأولانية (جوزفين) اللي هي يمكن الست الوحيدة اللي هو حبها رغم إن العلاقة بينهم وفق معايير طب العلاقات الزوجية أكيد بتتصنف إنها علاقة توكسيك بنت ستين كلب .. ومعاك كمان الإشاعة الي طلعت إن (فرانسيس) حماه بيحاول يلاقي عريس لبنته اللي هي أم ابنه .. حاجة جواه خلته يقول لنفسه يا ولاد التيييت .. هو انا عشان مشيت اقوم اتنسي كده .. فين أيام ما كنت بنيم أوروبا كلها من المغرب .. في يوم في عز ما هو بيفكر وهو قاعد علي البحر لقي مركب راكنه مش عليها حد .. هنا (نابليون) بص حوليه لقي نفسه لوحده علي الجزيرة اللي هو انت اه منفي بس مش محبوس .. مفيش عسكري واحد يوحد ربنا بياخد مرتب عشان يخلي (نابليون) مسجون علي جزيرة إيلبا .. حرفياً مفيش حد يقدر يمنعه إنه يلم شنطة هدومه وياخد المركب اللي راكنه في الميناء دي قدامه ويطلع علي فرنسا تاني .. وده اللي حصل .. بمنتهي البساطة اللي في الدنيا هو لم حاجته وخد معاه ألف مقاتل من أهل جزيرة إيلبا وخد المركب وطلع علي باريس.

في السنة اللي (نابليون) قضاهم علي جزيرة إيلبا الشارع الفرنساوي اكتشف إنه خد أكبر قفا مغري لما تخيلوا إن حياتهم حتتحسن لو مجرد إن (نابليون) غار في داهية .. الملك الجديد (لويس) لا كان عايز يحكم ولا نيلة ومقضيها حفلات وسهر وأكل وشرب ومسخرة .. اه مفيش حرب بس مفيش أي حاجة خالص برده .. لا شغل ولا اقتصاد ولا تجارة .. بس في نفس الوقت لما (نابليون) رجع من منفاه محدش برده شاله علي الاكتاف .. هو اه عساكره رفضوا يرفعوا السلاح ضده بس بمجرد ما جه خبر إنه رجع فالملك (لويس الثامن عشر) جري زي العيل الصغير علي بلجيكا فده فتح الباب ل(نابليون) إنه يرجع تاني يقعد علي الكرسي .. ودي نقطة تستحق إنك تقف قدامها .. هل (نابليون) مجرد جه يملا فراغ؟ .. هل هو بس الظروف ساعدته إن الشخص اللي كان المفروض يحل محله طلع منيل بستين نيلة اللي هو الملك (لويس)؟

• الحرب النابليونية السابعة .. الجون اللي بيخش فيك في الدقيقة تسعين:

في مارس 1815 الحلفاء اللي هزموا (نابليون) قبلها بسنة أعلنوا الحرب تاني بس المرة دي هم مأعلنوش الحرب علي فرنسا .. هم أعلنوها عليه هو شخصياً .. أوروبا مبقتش تتعامل مع (نابليون) علي إنه زعيم دولة هم في مشكلة معاها .. هم اعتبروه مجرم سرق الحكم غصب .. (نابليون) كان قصاد تحالف من الإسبان والنمساويين والبروسيين والإنجليز محاوطينه داير ما يدور بس يمكن أقرب تهديد ليه كانت القوات البروسية والإنجليزية اللي قاعدة في بلجيكا .. الفكرة كانت إنه لو وجه ضربه استباقية للاتنين دول بحيث يفجعهم ويخرجهم بره اللعبة فهو ممكن يجبر ساعتها الدول الأوروبية المتحالفة ضده إنها تقعد تتفاوض معاه لإن يمكن الحاجة اللي محدش كان مصدقها إن (نابليون) ما بعد إيلبا غير (نابليون) ما قبل (إيلبا) .. تقدر تقول الزمن هده شوية .. بس في نفس الوقت (نابليون) مكنش حيلته غير حوالي 125 ألف مقاتل قصاد 220 ألف مقاتل بروسي وإنجليزي قاعدين في بلجيكا .. النهاية كانت في معركة واترلوو يوم 18 يونيو 1815 اللي خسرها (نابليون) بسبب شوية حظ .. هو كان عايز يضرب البروسيين لوحدهم ولما يخلص منهم يروح للإنجليز بس هو مقدرش يحقق ده والإنجليز قابلوا البروسيين وحاربوه سوا ودي كانت نهاية عودة (نابليون).

بعد وترلوو الإنجليز أسروا (نابليون) والمرة دي هم اللي اختاروله مكان منفاه واللي كان جزيرة سانت هيلينا في المحيط الأطلنطي قصاد سواحل أفريقيا عشان المرة دي ميقدرش ياخد فلوكة ويرجع بيها لفرنسا .. مش بس كده .. الإنجليز حطوله 2000 عسكري وسفينتين حربيتين مخصوص ليه عشان ميفكرش يهرب أو حد يهربه .. بالمناسبة .. لما (نابليون) اتحبس في سانت هيلينا كان عنده 46 سنة بس يعني نسبياً لسه صغير بمعايير الزمن بتاعنا و لحد ما مات يوم 5 مايو 1821 وعنده 51 سنة وهو بيكتب مذكراته اللي كان بيحاول فيها إنه يلمع صورته قدر الإمكان وهي دي النقطة اللي انا واقف قدامها وهي إنك لما تفكر فيها حتلاقي إن في العصر اللي (نابليون) عاش ومات فيه ورغم إنه مكنش فيه إنترنت ولا سوشيال ميديا بس رغبته وسعيه إن سمعته وصورته قدام الناس وقدام التاريخ تبقي زي الألماظ بتوريك قد إيه فكرة الدعاية أو البروباجاندا مهمة جداً للفئة دي من البني أدمين زي (نابليون) وزي مثلاَ حد زي الرئيس (محمد أنور السادات) كمثال لحد من الجزء من العالم بتاعنا اللي احنا عارفينه .. اللي برده مهم إنك تفهمه هو إن جزء من الدعاية ليك هو فشل أعداءك .. يعني إيه .. في المرة الأولانية اللي (نابليون) اتقلش فيها الإنجليز رجعوا الملك (لويس السادس عشر) واللي كان مكنش في دماغة حاجة غير الهلس والسهر والمليطة وده اللي خلي عودة (نابليون) من منفاه الأولاني سهلة والدنيا مشيت معاه زي السكينة في الجاتوه .. كلاكيت تاني مرة لما اتقلش للمرة الثانية واتنفي لجزيرة سانت هيلينا فالانجليز رجعوا تاني الملكية واللي قعد علي الكرسي كان (تشارلز العاشر) اللي برده مكنش في دماغة اي حاجة غير النسوان والخمرة والسهر وده اللي برده اللي خلي صورة (نابليون) في دماغ المواطن الفرنساوي إنه علي الأقل كان بيحارب عشان مباديء الثورة الفرنساوية رغم كل عيوبه ومشاكله وأخطاءه.

الحقيقة إن حياة (نابليون) يمكن هي تجسيد لرأيي الشخصي إن البني أدمين ربنا خالقنا معقدين بما يكفي إنك مينفعش تحكم علي حد بإنه تديله Rate كام نجمة من خمسة زي سواقين أوبر وكريم .. البني أدمين أعقد سيكا من كده .. (نابليون) مكنش حاكم طيب .. هو مكنش حاكم عفيف اللسان .. هو مكنش بيخاف علي مشاعر غيره .. هو من نوعية الرجاله اللي لو عجبته مراه حد شغال عنده ممكن ينفيه لموقع في أخر بلاد المسلمين عشان يستفرد بيها ويكون هو شخصياً متجوز برده عادي جداً .. بس هو برده نفس الشخص اللي كان ميقبلش إن مستعمر أجنبي يحط رجله علي تراب بلده .. هو نفس الشخص اللي كان لو حد قاله لا بيكون مصيره القبر .. وده برده نفس البني أدم اللي لحد دلوقتي الدستور الفرنساوي ودساتير دول كتير في العالم واخده نفس دستة القوانين اللي هو حطها واتسمت قوانين (نابليون) كمرجع قانوني ودستوري ليها.

يمكن الحكمة اللي عايزك تطلع بيها من القصة الطويلة اللي حكيناها علي مدار 3 أجزاء إن الاستعجال وحش .. سواء انت بتخطط تبقي حاكم يتضربلك تعظيم سلام في الرايحة والجاية أو يدوبك عايش علي باب الله بتتمني مرتبك يكفي عيالك لحد اخر الشهر .. في الحالتين إنتوا قدامكوا نفس المشكلة وهي إن فيه تارجيت عايز تحققه في وقت قليل وبموارد أقل .. اللي حيخليكوا توصلوا للي انتوا عايزينه هو ميكس بين حاجتين عكس بعض .. التخطيط و الصبر .. إن يبقي عندك خطة وفكر إنت حتوصل للي انت عايز تحققه ازاي .. بس في نفس الوقت خليك عارف إنك مش انت اللي بتسيطر علي الكون .. فيه مليون حاجة ممكن تحصل تبوظلك كل خططك أو تخليك توصل بدري .. كله في ايد ربنا .. عشان كده اعمل اللي عليك ومتشغلش بالك بقي توصل متوصلش توصل بكره توصل بعده توصل قبل معادك .. بداية نهايتك إنك تتخيل إن مصيرك في إيدك .. أوعي تقع في الغلطة دي.

المصادر:

• مقالة بعنوان ‘The Death of Napoleon’ captures the end of a tumultuous era  نشرت في مجلة National Geographic وده لينك المقالة الأصلية:
  ‘The Death of Napoleon’ captures the general’s final moments | National Geographic
• سلسلة مقالات نشرت علي موقع War Times Journal حتلاقوها في اللينك ده:
  The Napoleonic Wars Series