الحروب النابليونية .. امشي علي مهلك عشان توصل بسرعة .. الجزء الثاني.

الحرب النابليونية الثالثة .. الفيل والحوت مسكوا في خناق بعض:

سنة 1803 الوضع كان كالاتي .. فرنسا باعت الحتة من أمريكا اللي كان اسمها لويزيانا للحكومة الأمريكية والفلوس دي (نابليون) خدها لتمويل جيش جامد زحليقة عشان يحطه علي مركب ويعبر بيه بحر المانش أو القنال الإنجليزي عشان يبدأ عملية غزو بري لبريطانيا .. خليك عارف حاجة .. فيه نظرية بيسموها في السياسة نظرية الفران الهربانة .. لما سفينة بتبدأ تغرق بسبب خرم في جسمها في اللي بيحصل إن غرف الهواء اللي في بطن السفينة بتبدأ تتملي مياه .. شوية والفيران اللي كانت عايشه في بطن السفينة بتبدأ تجري وتهرب وتطلع لفوق ودي أول علامة لطاقم السفينة إن حصلت مصيبة .. إنك تجمع جيش كامل علي ساحل نورماندي عشان تعبر بيه بحر المانش فدي حاجة مش سهلة وبتحتاج شغل كتير والأهم إن سهل تتلقط .. فيه حد حياخد باله إن فيه حاجة بتحصل وده اللي الأنجليز فهموه .. في نفس الوقت هم فاهمين إن عبور بحر المانش ده عملية انتحارية خصوصاً إن الأسطول البريطاني هو اللي متحكم في مين بيعدي ومين ميعديش .. حاجة كده زي ما Game of Thrones في الموسم الأول لو تفتكر (نيد ستارك) كان دايماً يقول ل(روبيرت باراثيون) إن حتي لو (دينيريس تارجاريان) اتجوزت (خال دروجو) وبقي تحت إيدها جيش من الدوثراكي فبرده هي معهاش أسطول يخليها تعبر البحر الضيق .. بس ده ميمنعش إن الإنجليز يلاقوا طريقة ينكدوا بيها علي عيشة (نابليون) زي ما برده (روبيرت باراثيون) كان عايز يبعت حد يسيح دم (دينيريس).

الاستراتيجية اللي مشي بيها الإنجليز واللي حطها رئيس الوزراء وقتها (وليام بيت) إن إحنا اللي حنعمله إننا نبعزقلنا قرشين .. أي ملك أو إمبراطور مستعد ياخد قرشين ويمد إيده علي (نابليون) إحنا حنديله اللي هو عايزه .. (فرانسيس الثاني) إمبراطور النمسا قال وماله .. روسيا اللي كان ماسكها القيصر (أليكساندر الأول) قالت محدش يقول للرزق لا .. السويد اللي كانت تحت حكم (جوستاف الرابع أدولف) قالت أنا دايسه .. بس خلي بالك من حتة إن دايماً لازم يبقي فيه مبرر يبان من بره إنه شرعي إنك تروح تعلن الحرب علي حد .. مينفعش (فرانسيس الثاني) مثلاً اللي أحب ما عليه إن (نابليون) يتحرق بجاز إنه يطلع طواعية كده وبكل سلام نفسي يقول لشعبه أيوه إحنا رايحين نحارب فرنسا عشان إحنا واخدين فلوس من إنجلترا لإن حيترد عليه طب ما الإنجليز يحاربوه بنفسهم .. ليه أبعت عيالي يموتوا عشان إنت تسترزق .. في مايو 1805 الحجة اللي (فرانسيس الثاني) كان عايزها جاتله لحد عنده لما (نابليون) أعلن نفسه مش بس إمبراطور فرنسا إنما كمان ملك إيطاليا اللي هو أراك توزع الألقاب علي نفسك من مال الست الوالدة .. مش بس النمسا .. روسيا والسويد ومملكة نابولي ومعاهم طبعاً إنجلترا بفلوسها أعلنوا الحرب علي (نابليون).

الحرب النابليونية الثالثة بدأت بهجوم روسي نمساوي مشترك علي فرنسا .. هجوم سويدي علي الدانمرك .. هجوم من نابولي علي شمال إيطليا.

فجأة (نابليون) لقي نفسه بيحارب 3 جيوش علي 3 جبهات مختلفة .. الجيش الروسي النمساوي المشترك خطة هجومه إنه حيعبر نهر الراين اللي بيفصل بين فرنسا وإقليم بافاريا في ألمانيا وبالتالي الناس دي حتبقي حرفياً في الصالة بتاعة فرنسا .. مملكة نابولي جيشها دخل شمال إيطاليا .. السويد غدرت بالدانمرك حليفة فرنسا .. وهنا في المرحلة دي بيتجلي (نابليون) بدماغه العالية ويمكن بيعلمنا واحنا بنحاول نفهم الفترة دي من التاريخ دروس مهمة جداً في القيادة .. في الحرب النابليونية الأولي اتعلمنا منه إن القائد اللي بجد هو اللي بيشمر وبينزل يشتغل مع العساكر بتوعه .. في الحرب النابليونية الثانية اتعلمنا منه أهمية عنصر المفاجأة وإنك تتعلم ازاي تفجع عدوك وهو مش واخد باله .. في الحرب النابليونية الثالثة بنتعلم درس مهم برده وهو أهمية السرعة وفيه فرق كبير أوي بين السرعة والتسرع.

إنت بتواجه 3 جيوش .. يعني كقوة تدميرية وعدد مقاتلين إنت حيتحط عليك لو لعبت بالطريقة التقليدية .. إنت محتاج تبقي أسرع منهم .. محتاج تبقي أخف منهم .. تديهم الألم علي وشهم وقبل ما يردوا عليك تكون لفيت ورا ظهرهم عشان تديهم علي قفاهم .. عشان ده يحصل (نابليون) قسم جيشه اللي كان بيتسمي وقتها Le Grande Armeeجراند أرمي ودي كلمة فرنساوي معناها الجيش الكبير لنفس التقسيمة اللي احنا لحد دلوقتي عايشين عليها في العصر الحديث وهي تقسيمة الجيش لفيالق Corps .. بمعني اخر انت مبقاش عندك جيش واحد مكون من أفرع رئيسية اللي هي المشاة والخيالة والمدفعية .. لا إنت بقي عندك كذا فيلق أو لواء بحيث كل لواء فيه شوية كتايب متوزعين يعني حتلاقي كتيبة مشاة و كتيبة خيالة وكتيبة مدفعية في كل لواء وكل لواء قيادته مستقلة عن الثاني بس كلهم تحت مظلة فيلق .. التقسيمة دي اللي محدش شافها ولا جربها قبل كده كانت نقلة نوعية في التكتيك العسكري .. الجيش الفرنساوي اتقسم ل7 فيالق كل فيلق ماسكه قائد بيتسمي مارشال وكل فيلق فيه كتيبة مشاة وكتيبة مدفعية وكتيبة خيالة .. في نفس الوقت عندك الحرس الإمبراطوري ودول تقدر تقول عليهم الحرس الجمهوري كده في الجيش المصري دلوقتي .. وفيه كمان قوات الخيالة ودول تقدر تقول القوات الخاصة بتاعته وكانت تحت قيادة المارشال (يواكيم ميورات Joachim Murat).

اللي حصل إن (نابليون) فوق خالص في نورماندي وفجأة جاله خبر إن النمساويين بيتحركوا هم والروس والاتنين لو اتلموا علي بعض حيبقي نهار أسود يا استاذ ممتاز .. في أسبوعين كان (نابليون) نقل 200 الف مقاتل من ساحل فرنسا علي بحر المانش وداهم إقليم بافاريا عشان يحاول يواجه النمساويين والروس قبل ما يعدوا نهر الراين .. وهو رايح (نابليون) خد باله إن الجيش النمساوي تحت قيادة واحد اسمه (كارل ماك فون ليبريخ) بس المؤرخين بيحيبوا يختصروا اسمه ل(ماك) سرح شوية في تقدمه في بافاريا ودي حاجة حلوة بس هو عايزه يتقدم كمان .. عايزه يبعد شوية حلوين عن الجيش الروسي .. طب ازاي .. (نابليون) خلي المارشال (يواكيم ميورات) قائد سلاح الخيالة بتاعه إنه يجري للغابات السودا في سويسرا ودي منطقة غابات كثيفة شوية عشان كده اتسمت الغابات السودا بحيث يخلي النمساويين متخيلين إن الجيش الفرنساوي كله دخل الغابة ومستني فيها .. الجنرال (ماك) بلع الطعم زي الأهبل وقام رازع واحدة القوات تتقدم عشان يلاقي نفسه اتحاصر في الغابات السودا بين سلاح الخيالة الفرنساوي بقيادة (ميورات) وبين الجيش الفرنساوي بقيادة (نابليون) .. عشان يدوس (نابليون) علي وش النمساويين.

الروس اللي كانوا تحت قيادة الجنرال (ميخائيل كوتوزوف) كان بينهم وبين النمساويين فوق 400 كيلومتر لإن زي ما قلتلك الأخ (ماك) سرحت منه شوية واتقدم بدري عنهم وكمان حركة الخيالة بتوع (ميورات) ضحكت عليه أكتر .. يوم 19 أكتوبر 1805 يعني بتتكلم عن بعد يدوبك شهر ونص من الحرب الجنرال (ماك) بيعلن استسلام جيش الإمبراطورية النمساوية اللي كان مفاضلش منه غير 60 ألف أسير .. استسلام الجيش النمساوي ضرب كل الحسابات مع كل الناس .. بالنسبة للروس فالجنرال (كوتوزوف) فهم من بدري إن واحد هو ميقدرش يهزم (نابليون) لوحده .. لو يمكن (ماك) مكنش عبيط بالشكل ده وكان صبر كان القوات النمساوية الروسية المشتركة كان حيبقي ليها أمل بس دلوقتي مستحيل .. ثاني حاجة إن الجيش الروسي طلع ميتينه عشان يمشي فوق 1170 كيلومتر من جوه روسيا لحد بافاريا في ألمانيا بس للأسف دلوقتي هو مبقاش قدامه غير حل واحد .. لف وأرجع تاني.

الجنرال (كوتوزوف) حاول علي قد ما يقدر إنه يخلي انسحابه تكتيكي ومش متسرع وعشان يعرف ينقذ عساكره اضطر يضحي بفيينا عاصمة الإمبراطورية النمساوية وسابها ل(نابليون) يفرح بيها علي أمل إنه لما يدخلها وده حصل فعلاً يوم 12 نوفمبر 1805 فده يعطل شوية (نابليون) عن مطاردته للجيش الروسي .. خطة (كوتوزوف) نجحت وفعلاً قدر يوصل لحتة اسمها أولموتز دلوقتي مكانها في جمهورية التشيك وهناك لقي مستنيه القيصر (أليكساندر الأول) وكمان (فرانسيس الثاني) إمبراطور النمسا اللي خسر جيشه وخسر العاصمة بتاعته .. (نابليون) في ديلهم بس في نفس الوقت هو عايز يخلص .. (نابليون) محتاج الروس هم اللي يهاجموه .. طب يعملها ازاي .. هو قرر يلعب علي الجانب النفسي بتاع ثقة الإمبراطور (أليكساندر الأول) في نفسه اللي كان وقتها عنده 27 سنة .. بعتله جواب تقدر تقول إنه هزقه فيه .. جواب ملخصه إنت لو رجل ابن رجل تعلالي بدل ما انت بتجري زي النسوان .. الجواب حط (أليكساندر) في خانة اليك .. لو كمل جري حيبقي منظره إيه قدام رجالته وشعبه .. في لحظة نادرة هو قرر يبقي رجل وقرر إنه يهاجم زي ما (نابليون) كان عايز عشان تحصل معركة اوستيرليتز يوم 2 ديسمبر 1805 اللي انتهت بهزيمة للتاريخ للجيش الروسي وللمرة الثالثة علي الثوالي النمسا بتطلب وقف إطلاق النار .. مش كده وبس .. سنة 1806 إيطاليا كلها بقت تحت سيطرة (نابليون) عشان تخلص الحرب النابليونية الثالثة بنصر تاريخي ليه .. الناس اللي اتفرجت علي فيلم Napoleon اللي من بطولة (يواكيم فينيكس) وإخراج (ريدلي سكوت) حتلاقوا تجسيد واقعي جداً لمعركة أوستيرليتز واللي صادف إنها تمت في الذكري السنوية لتنصيب (نابليون) إمبراطور علي فرنسا.

معركة أوسترليتز أو زي ما كتير من المؤرخين بيحبوا يسموها معركة الأباطرة الثلاثة هي اللي حسمت الحرب النابليونية الثالثة لصالح (نابليون) .. دلوقتي بعد ما النمساويين استسلموا جه دور الروس .. شروط الهدنة أقل حاجة تتقال عليها إنها كانت مهينة جداً للنمساويين .. الإمبراطور (فرانسيس الأول) مثلاً اتقاله انت حتدفع 40 مليون فرانك تعويضات علي شوية أراضي كده علي الحدود بينهم وبين فرنسا راحت عليهم كثمن للعرش عشان (فرانسيس) يفضل قاعد علي الكرسي.

علي الناحية الثانية صحيح الحرب النابليونية الثالثة خلصت بنصر جاحد ل(نابليون) بس كان فيه خبر كده نغص عليه عيشته شوية مع إنه ملوش ذنب فيه .. فاكر لما قلتلك إن الحرب النابليونية الثانية دي قامت أصلاً بتمويل بريطاني بعد ما الإنجليز شافوا (نابليون) بيحشد جيشه علي ساحل نورماندي علي أمل إنه يلاقي طريقة إنه يعبر بيه بحر المانش .. الفكرة إن مش بس فرنسا اللي كانت ماسكة في خناق بريطانيا .. إسبانيا هي كمان كان بينها وبين بريطانيا خناقة لرب السما قامت علي حسها معركة بحرية مشهورة جداً اسمها معركة ترافلجار يوم 21 أكتوبر 1805 .. سبب شهرة معركة ترافلجار اللي علي اسمها فيه ميدان كبير في العاصمة الإنجليزية لندن مش بس كانت إن فيها مات قائد الأسطول البريطاني (هوراشيو نيلسون) إنما كمان معركة ترافلجار من نتايجها إن الأسطول الإسباني اتحط عليه حطة خلت إن لأكثر من 100 سنة من بعد المعركة دي والأسطول البريطاني هو الأقوي والأجحد علي مستوي العالم .. معركة ترافلجار حطت قدام (نابليون) الواقع المر اللي هو انسي يا بطل فكرة إنك تعبر بحر المانش دي وتغزو بريطانيا برياً .. بس زي ما ترافلجار نكدت علي (نابليون) عيشته فبرده أوسترليتز نكدت علي الانجليز عيشتهم .. زي ما (نابليون) عرف إن خلاص كده هو مش حيعرف يغزو بريطانيا فالإنجليز اللي وقتها زي ما قلتلك كان ماسكهم رئيس وزراء اسمه (وليام بيت) ايقن إن مش حيجي اليوم اللي إنجلترا تخلص فيه من (نابليون) بمواجهة برية مباشرة .. يقال إن لما (وليام بيت) جاله خبر نصر (نابليون) في أوسترليتز قال للي حوليه ارموا خريطة أوروبا دي من قدامي لإن خلاص أوروبا راحت مننا وبقت في ايد (نابليون).

الحرب النابليونية الرابعة .. خلوني أنا الشرير في رواية أحدهم المرة دي:

كده بس عشان نبقي حقانيين .. الحرب الأولي والثانية (نابليون) مكنش ليه ذنب فيهم .. الثالثة نظرياً تقدر تقول هو اللي بدأها .. في فبراير 1806 (نابليون) بعت جيش صغنون كده بقيادة المارشال (أندريه ماسينا) لمملكة نابولي في جنوب إيطاليا .. ليه؟ .. لو تفتكر في الحرب النابليونية الثالثة مملكة نابولي كانت من ضمن الدول اللي خدت فلوس من إنجلترا عشان تضرب (نابليون) وحاولوا ياخدوا منه شمال إيطاليا .. نابولي مخدتش غلوة في إيد الفرنساويين عشان (نابليون) يدي عرش مملكة نابولي لاخوه (جوزيف) .. شوية و أخوه الثاني (لويس) هو جابه من بيته وعينه ملك علي هولندا .. لحد هنا عادي .. يا سيدي الرجل إمبراطور وبيروق علي اخواته وبيخلي كل واحد فيهم ملك علي حتة .. اللي جاي بقي كان فيه مشكلة .. الناس بتاعة التاريخ بتحب تقول علي واحد اسمه (أوتو فون بسمارك) إنه أبو الدولة الألمانية لإنه هو اللي أسس ما يسمي بالبلد اللي انت عارفها دلوقتي باسم ألمانيا .. علي عيني وعلي راسي بس فعلياً يعني حلم الدولة الألمانية بدأ بخازوق عمله (نابليون) لما حب يجامل الناس اللي عايشه في أقليم بافاريا .. الناس دي وقفت معاه جامد في الحرب النابليونية الثالثة وكتير منهم انضموا لجيشه عشان يحاصروا الجنرال (ماك) بتاع الإمبراطورية النمساوية و(نابليون) عشان يروق عليهم خلي إقليم بافاريا مع شوية أراضي حوليه مملكة مستقلة تحت حمايته الشخصية وسمي المملكة اللي لسه مولودة دي اتحاد الراين Confederate of the Rhine .. ليه ده مهم .. ده مهم لإن مملكة اتحاد الراين دي اتولدت في نفس الحتة اللي كان المفروض اتعملت فيها حاجة اسمها الإمبراطورية الرومانية المقدسة Holy Roman Empire اللي عملها (شارلمان) وعاشت ما بين سنة 800 لحد سنة 1806 .. إعلان ميلاد مملكة الراين خلي الإمبراطور (فرانسيس) بتاع النمسا يطلع يقول يا جدعان خلاص الإمبراطورية الرومانية المقدسة تعيشوا انتوا.

خريطة توريك شوية الممالك اللي لما تحطهم مع بعض بيتسموا اتحاد الراين Confederate of the Rhine اللي هو لو جبتها وحطيت جنبها خريطة ألمانيا دلوقتي حتلاقيهم هم هم زي بعض.

الصبح تقوله لازم تحارب .. يهرب منها ويروح البلاط الملكي يلاقي كل مستشارينه بيقولوله لازم تحارب .. الناس في الشارع بتبصله بقرف عشان مستنياه يسترجل ويحارب .. وعشان الزن اخرته وحشة فالملك (فريدريك) عمل غلطة محدش عارف الحقيقة هو كان شارب ايه وقتها عشان يعمل اللي هو عمله ده .. يوم 10 أغسطس 1806 من غير ما يبعت لحلفاءه سواء بتتكلم عن النمسا أو روسيا أو السويد فالباشمهندس أعلن التعبئة العامة للجيش وبعت إعلان الحرب ضد فرنسا.

المشكلة مش في كده .. المشكلة إن بروسيا بدأت التعبئة العامة بدري عن الفرنساويين .. بروسيا هي اللي بعتت إعلان الحرب علي فرنسا يعني المفروض بروسيا هي المعتدي بس اللي بدأ يتحرك بقواته كان الفرنساويين وهم اللي بدأوا يتحركوا جوه الأراضي بتاعة بروسيا في أكتوبر 1806.. سبحان الله يعني .. الغزو الفرنساوي بدأ باحتلال اقليم ساكسوني بجيش قوامه 166 ألف ومعاهم 256 مدفع ميداني .. التارجيت اللي (نابليون) حطه لنفسه هو إنه يخش مدينة لايبزج وعشان يعمل ده هو قسم جيشه ل3 فيالق .. نفس التقسيمة اللي هو اخترعها في الحرب النابليونية الثالثة .. يوم 10 أكتوبر واحد من الفيالق الفرنسية وهي بتتقدم باتجاه لايبزج بقيادة المارشال (جين لانز) اتضرب بهجوم انتحاري نفذته قوة من الجيش البروسي بقيادة الأمير (لويس فريدريك) ابن عم الملك (فريدريك وليام الثالث) والهجوم انتهي بموت الأمير وانسحاب العساكر بتوعه عشان يبقي أول ضحية من العيلة المالكة البروسية .. وسط العطلة اللي اتعطلها الفيلق بتاع المارشال (جين لانز) فالفيلقين التانيين بقيادة (جين بابتيست جولز بيرنادوت) و (لويس نيكولاس دافو) اتقالهم لفوا حولين مدينة يينا عشان تضربوا ظهر المدينة لحد ما الفيلق بتاع (جين لانز) يتحرك تاني باتجاه المدينة مباشرة .. اشمعني يعني مدينة ليينا .. دي اللي عساكر الاستطلاع الفرنساويين قالوا إن الجيش البروسي قاعد فيها.

المشكلة إن عساكر الاستطلاع كانوا غلطانين .. كان فيه فعلاً قوة بروسية في يينا بس مش الجيش الأساسي انما كانوا قوة صغيرة بقيادة جنرال اسمه (هوهين لوهي) .. الجيش البروسي الأساسي اللي كان قوامه 52 ألف عسكري بقيادة دوق مدينة برونزوييك كان في طريقه إنه يصطاد الفيلق بتاع المارشال (لويس نيكولاس دافو) .. الوضع علي الأرض كان غريب الشكل .. الخناقة بين بروسيا وفرنسا بقت في جبهتين بيتحاربوا في وقت واحد الوضع فيهم معكوس .. في يينا الفرنساويين كان ليهم التفوق العددي علي البروسيين .. (نابليون) شخصياً ومعاه (جين لانز) قصاد القوة الصغيرة بقيادة (هوهين لوهي) اللي اتحط عليه في يينا وده مفهوم ومنطقي والرجل عمل اللي عليه وزيادة .. علي الناحية الثانية في حتة اسمها أورشتادت فيلق يتيم بقيادة المارشال (دافو) لقي نفسه قدام الجيش البروسي الأساسي .. 27 ألف عسكري فرنساوي قصاد 52 عسكري بروسي .. موجة ورا موجة من الهجوم البروسي بقيادة الجنرال (جيبهارد ليبريخت فون بلوكر) ولا بيحوق ولا بيجيب نتيجة لحد ما قائد الجيش دوق مدينة برونزوييك اتقتل بطلقة جت في عينه .. حتي لما الملك (فريدريك وليام) شخصياً تولي قيادة الجيش في الوضع المنيل بستين نيلة معرفش يسيطر علي عساكره واللي انسحبوا من غير ما حد يديهم الأمر.

يدوبك اسبوعين بس بعد النصر المزدوج في يينا و أورشتادت كان الفيلق بتاع المارشال (دافو) دخل برلين .. بعدها بيوم الجنرال (هوهين لوهي) اللي كان يمكن أرجل جنرال في الجيش البروسي استسلم في مدينة بينسلاو اللي دلوقتي في بولندا .. الجنرال (بلوكر) واللي فاضل معاه كانوا حوالي 20 ألف عسكري فضلوا ينسحبوا لحد مدينة لوبيك في الدانمرك واستسلموا هناك .. الحرب بدأت في أكتوبر وخلصت في أقل من 33 يوم عشان القوات المسلحة البروسية اللي كان ليها تاريخ طويل ومجد محدش يقدر ينكره اتهانت .. في 33 يوم بس بروسيا كانت خسرت 20 الف قتيل و 140 ألف أسير و 800 مدفع ميداني .. الملك (فريدريك وليام) انسحب لمدينة كونينبرج علي الحدود بين بروسيا و روسيا علي أمل إن وجوده جنب القوات الروسية يحميه من (نابليون) .. وهي دي الفكرة .. انت بتتكلم عن زمن مش معني إن الجيش البروسي اتداس علي وشه إن كده الحرب خلصت .. الحرب بتخلص لما اللي أعلن الحرب بيقول إنها خلصت .. لازم (فريدريك وليام) يطلع قدام الناس يقول أحنا اسفين يا صلاح ولحد ما ده يحصل لازم (نابليون) يكمل .. عشان كده في ديسمبر 1806 هو وصل لمدينة وارسو اللي دلوقتي تبقي عاصمة بولندا بس وقتها كانت جزء من بروسيا.

بروسيا كانت تحت حماية روسيا لدرجة إن الجيش الأول الروسي بقيادة الجنرال (ليفن أوجست فون بينينجسن) هو اللي كان القائد الميداني للقوات الروسية واللي بعد سلسلة من الجري ورا بعض المواجهة المنتظرة بين الفرنساويين والروس حصلت في فبراير 1807 في مدينة إيلاو .. فبراير .. روسيا .. يعني ثلج .. يعني سقعة .. يعني سواد الحلل .. المعارك كانت بتحصل في ظروف مأساوية تجيب اكتئاب والإكتئاب الأكبر لما تعرف إن بعد 3 أيام من المعارك وسط الثلج والجوع والألم محدش حسم المعركة لصالحه لا الفرنساويين ولا الروس .. أقرب التخمينات بتقول إن خساير الروس كانت 20 ألف قصاد إن الفرنساويين خسروا 25 ألف منهم فيلق كامل انتهي من الوجود .. بعد مأساة إيلاو تقدر تقول إن سواء الروس أو الفرنساويين كانوا محتاجين فترة يريحوا وده حصل فعلاً لحد ما الروس هم اللي بدأوا يتحركوا يوم 5 يونيو 1807 عشان يلاقوا نفسهم متحاصرين يوم 14 يونيو 1807 في معركة فريدلاند اللي خسر فيها الروس 40% من قواتهم في يوم واحد.

الحقيقة اللي بقت قدام الناس كلها إن طالما إنت بتتكلم عن حرب برية بين عساكر راكبين حصنة معاهم مدفعية تقيلة فمفيش حد فيكي يا أوروبا حيعرف ياخد من (نابليون) لا حق ولا باطل .. النمسا تضربه لوحدها مش نافع .. النمسا معاها روسيا برده مش نافع .. يجيبوا معاهم بروسيا برده مفيش فايدة .. ده السبب اللي عشانه في يوليو 1807 قامت مفاوضات سلام نتج عنها معاهدة تيلسيت Treaties of Tilsit واللي مش بس طلع منها اتفاق خلي أوروبا تعيش حالة سلام يمكن لأول مرة من خمس سنين بس كمان طلع منها حاجة محدش كان متوقعها .. (نابليون) و (أليكساندر) لقوا نفسهم بينهم كيميا غريبة .. العلاقة اللي مش ولا بد اللي بينهم وصلت لمرحلة إن مصادر تاريخية قالت إن (نابليون) قال لمراته (جوزفين) إن لولا إن (أليكساندر) رجل كنت زماني خليته عشيقتي .. الإتفاق الروسي الفرنساوي كان سهل وبسيط .. روسيا حتبدل تحالفاتها بدل ما كانت متصاحبة علي بريطانيا فدلوقتي بقت حليفة فرنسا اللي حتساعدها إنها تضرب السويد وتاخد منها فنلندا وضع يد .. بعد ما كانت بروسيا متصاحبة علي روسيا وروسيا اللي بتحميها فدلوقتي روسيا معندهاش مانع إن تلت مساحة بروسيا تتسحب منها عشان تتعمل مملكة جديدة اسمها مملكة ويشتفاليا ويبقي الملك بتاعها أخو (نابليون) الصغير اللي اسمه (جيروم) واللي كان وقتها عنده 22 سنة .. مش بس كده .. بروسيا كمان خسرت وارسو عشان الحتة دي من اتفاقية تيلسيت تبقي بداية فكرة إن بقي عندك البلد اللي انت دلوقتي عارفها باسم بولندا .. بس فضلت النقطة اللي قارفه (نابليون) في عيشته .. بريطانيا.

اتفاقية تيلسيت مش بس اتشهرت إنها انهت الحرب اللي مولعة في أوروبا بقالها خمس سنين ومش بس اتشهرت عشان المفاوضات تمت علي بارج في نهر تيلسيت .. ومش بس اتشهرت عشان بسببها كل التحالفات القديمة في أوروبا اتعكست .. بس يمكن سبب شهرتها هي اللوحة دي واللي بتوريك البوسة اللي حصلت بين (نابليون) و (ألكساندر الأول) ملك روسيا واللي بتوريك قد ايه الاتنين وقعوا في غرام بعض.

زي ما مفيش حد في أوروبا عارف ياخد من (نابليون) لا حق ولا باطل في أي معركة برية فبرده محدش عارف ياخد من بريطانيا لا حق ولا باطل في أي معركة بحرية .. بريطانيا جزيرة بيفصل بينها وبين فرنسا بحر المانش .. صحيح الجيش الفرنساوي يقدر يحط علي الجيش البريطاني بس عشان ده يحصل لازم الأسطول الفرنساوي يسترجل ويعدي بحر المانش وده مستحيل يحصل لإن الأسطول البريطاني مش بس حيحط عليه .. ده حيمحيه من الوجود .. طب والحل؟ .. الحل اللي فكر فيه (نابليون) هو إنه محتاج يجبر بريطانيا إن هي اللي تجيله .. هو محتاج يعور إقتصاد بريطانيا لدرجة إن نزيف الفلوس اللي بيتعرض ليه الإقتصاد البريطاني يبقي كافي إن الإنجليز يتجننوا في نفوخهم وهم اللي يعدوله بحر المانش .. سنة 1806 بدأت ملامح خطة (نابليون) تبان لما عمل حاجة اسمها الحصار القاري Continental System وهو بمنتهي البساطة دول أوروبا حتطلع بريطانيا بره اللعبة .. محدش في أوروبا حيتاجر مع الإنجليز .. تقدر تقول إن فكرة Continental System ما هو إلا حصار إقتصادي لبريطانيا .. فيه ناس حتقول لنفسها طب ما حلوة الفكرة بس هو لو ده رأيك فإنت ناسي حاجتين:

أول حاجة هي النفس البشرية اللي ربنا خلقها بتسعي دايماً إنها تجيب فلوس .. متنساش فكرة إن الممنوع مرغوب .. حتمنع حاجة فاعمل حسابك إن قرار المنع ده حيخلق معاه أوتوماتيك فرص التهريب وخليني أقولك إن الإنجليز في حتة التهريب دي بالذات معلمين .. يمكن ناس كتير متعرفش إن أنجلترا دخلت خناقة لرب السما مع الصين عشان خاطر الصين لقت إن الإنجليز بيهربوا أفيون لدرجة إن الشارع الصيني بقي نصه عامل دماغ .. ولما الصين قالت لإنجلترا بس يا بابا قامت حرب اتسمت حرب الأفيون عشان خاطر انجلترا كانت وقتها أكبر ديلر أفيون في العالم .. الشاهد من اللي عايز أقوله إن الإنجليز مش حيعطلوا يعني لو قلتلهم محدش حيتاجر معاكوا.
ثاني نقطة وهي إن الأسطول الإنجليزي فعلياً مسيطر علي البحار والمحيطات كلها تقريباً فهو بمجرد ما الحصار الإقتصادي ده اتفرض قام الأسطول الإنجليزي محاصر كل الموانيء الفرنسية سواء علي البحر المتوسط أو علي المحيط الأطلنطي .. ده معناه إن قرار (نابليون) هو صحيح خلي التجار الفرنساويين ميعرفوش يتاجروا مع التجار الإنجليز بس في نفس الوقت التجار الفرنساويين نفسهم مش عارفين يتاجروا مع حد أصلاً عشان الموانيء بتاعتهم كلها مقفوله .. صحيح الحصار القاري ده عور الإقتصاد الإنجليزي بس في نفس الوقت بلاش تتخيل إن الاستراتيجية دي كانت برداً وسلاماً علي الإقتصاد الفرنساوي لإن الاتنين اتعوروا جامد .. ومش بس الإقتصاد الفرنساوي اللي اتعور انما اقتصاد أي بلد متحالفة مع فرنسا وزي ما بنقول دايماً كل برغوت علي قد دمه .. فيه دول اقتصادها كان يستحمل الضربة اللي اتعرض ليها ودول تانية علي الله حكايتها مع أول قلم علي وشها قالت اااه.

الخساير اللي اتعرض ليها الإقتصاد الإنجليزي كانت كبيرة لدرجة إن الإنجليز كانوا محتاجين ياخدوا أكشن .. هم بدأوا يصعدوا الموضوع واحدة واحدة .. الأول في سبتمبر 1807 راحوا بأسطولهم ضربوا مدينة كوبنهاجن عاصمة الدانمرك للمرة الثانية عشان يبعتوا رسالة لأوروبا كلها .. اللي حيقف مع (نابليون) خسران .. بس برده محدش خاف والدانمرك أعلنت رسمياً انضمامها للحصار القاري .. بريطانيا صعدت الموضوع أكتر وأجبرت الولايات الأمريكية إنها توقف أي تعامل تجاري مع فرنسا بس الولايات الأمريكية معرفتش تنفذ ده .. البلد الأوروبية الوحيدة اللي وقفت مع بريطانيا كانت مملكة البرتغال واللي المرة دي (نابليون) هو اللي صعد الموضوع وبعت قوة عسكرية مشتركة بينه وبين اسبانيا وغزي البرتغال في نوفمبر 1807 والحقيقة إن الغزو مشي زي السكينة في الجاتوه لدرجة إن لشبونة عاصمة البرتغال سقطت من غير ما تتضرب طلقة حتي والعائلة المالكة البرتغالية خدت ديلها في سنانها وهربت علي البرازيل.

المصادر: