يوغوسلافيا .. الردم علي الدم مش بيجيب نتيجة .. الجزء الثاني.

لينك التسجيل الصوتي علي ساوند كلاود:
https://on.soundcloud.com/6tnrbU80ntDxtX11kX

الأزمة الإقتصادية .. رصاصة الموت اللي مكنش معاها رسالة انتحار:

حرجع تاني بسرعة لحتة إن (تيتو) كان مخلي كل جمهورية تمشي بدماغها في ازاي تدور اقتصادها وفيه جمهوريات كتير خصوصاً سلوفينيا وكرواتيا طبقوا أفكار رأسمالية شوية وده السبب ورا إن الإقتصاد اليوغوسلافي تحت (تيتو) نط نطة حلوة أوي .. المشكلة كانت بعد (تيتو) .. السيستيم اللي اتحط في شركات القطاع العام اليوغوسلافية إن مش حتيجي الحكومة تجيب لواء في الجيش تمسكه شركة المحلة للغزل والنسيج وده في حد ذاته كان حاجة كويسة .. ده لواء لا بيفهم في القماش ولا الملايات .. النموذج ده من الاشتراكية اللي احنا شفناه في مصر إن لواءات العسكر بقوا ماسكين كل حاجة سواء كانوا بيفهموا فيها أو لا مش هو اللي اتطبق في يوغوسلافيا .. اللي كان بيحصل إن كل شركة قطاع عام ليها مجلس إدارة منتخب من جوه عمال الشركة .. حاجة كده شبه انتخابات الفصل اللي كنا بنعملها في المدارس .. في الغالبية العظمي من الشركات دي كان اللي بيكسب انتخابات مجلس إدارة الشركة هو الشخص اللي بيوعد زمايله إنه أول ما يقعد علي الكرسي فأول قرار حياخده إنه يديهم علاوة.

من بره الدنيا علي فكرة مش وحشة .. كده كده العلاوات بتتصرف بس الفرق إن بدل ما العلاوة كانت بتروح لجيب السيد اللواء رئيس مجلس الإدارة اللي ملوش لا شغله ولا مشغلة فدلوقتي الفلوس بتروج لجيوب العمال الغلابة اللي هم فعلاً مقومين الشركة .. تاني .. المشكلة مش في السيستيم .. المشكلة في التطبيق .. شوية بشوية والدنيا بدأت تحود جامد .. العلاوات عمالة تزيد والانتاج زي ماهو .. طب شركات القطاع العام كده حتخسر لإنها عمالة تزود من ميزانية المرتبات ومفيش دخل زيادة بيخش .. طب والحل؟ .. زود الأسعار .. ده حضرتك في الاقتصاد بيسموه تضخم .. إن سعر المنتج عمال يزيد بمعدل تصاعدي في فترة قليلة من غير ما يكون فيه مبرر واضح للزيادات دي ولا حد كان فاهم اللي بيحصل .. شوية والحكومة بدأت تتدخل بانها زودت برنامج الدعم اللي هي بتقدمه للمواطن بحيث بقي يشمل دعم للشركات عشان الشركات متعلنش إفلاسها .. لحد هنا الموضوع مكنش مشكلة .. ليه؟ .. لإن وقتها (تيتو) كان بيحكم ولإن وقتها كانت لسه الحرب الباردة مولعة.

بص علي الخريطة اللي فوق دي كده .. دي خريطة أوروبا في الثمانينات وقت ما انا اتولدت و وقت ما كان فيه حاجة اسمها الاتحاد السوفيتي اللي هو باللون الاحمر وفيه حاجة اسمها أوروبا الغربية اللي هي باللون الأزرق ومعاهم أمريكا وكانت بينهم خناقة لرب السما اسمها الحرب الباردة أو Cold War .. زي ما انت شايف فيوغوسلافيا محشورة في النص بين روسيا الشيوعية وبين أوروبا الرأسمالية .. صحيح إن الموقف الرسمي ليوغوسلافيا هي عدم الانحياز لأي طرف بس في نفس الوقت لو كان السوفييت أو الأمريكان متضايقين إن يوغوسلافيا مش معاهم ففي نفس الوقت هم عايزين علي الأقل يعني تفضل يوغوسلافيا علي الحياد اللي هي فيه .. طب ده يضمنوه ازاي .. اعطيهم فلوس .. زود علي كده إن يوغوسلافيا تحت حكم (تيتو) مكنش فيه إسرائيل جنبها وبالتالي الفلوس اللي كانت بتجيله مكنتش بتتصرف في حروب ورا بعضها ضد الصهاينة فكانت بتروح عشان تخلي المواطن اليوغوسلافي مش حاسس بالتضخم اللي عمال يزيد زي السرطان في اقتصاد بلده .. المشكلة بدأت بعد ما (تيتو) مات اللي هو سبحان الله يعني بعديها بشوية الإتحاد السوفيتي بدأ يفك من بعضه .. شوية والحرب الباردة وقفت وهنا حنفية الفلوس اللي كانت بتروح ليوغوسلافيا وقفت لإن مش بس السوفييت بطلوا يدفعوا ده كمان الأمريكان قالوا لنفسهم مفيش داعي نشتري ولاء اليوغوسلافيين لإن معدش ليهم لازمه.

فجأة التضخم بقي مفيش حاجة تفرمله وده اللي خلي الحكومة اليوغوسلافية تلجأ للحل اللي كان في الأخر رصاصة انتحارها .. راحت خدت فلوس من صندوق النقد الدولي .. الكيان ده اللي اسمه صندوق النقد الدولي International Monetary Fund أو IMF اختصاراً عمل مع يوغوسلافيا زي ما عمل معانا بالضبط .. عايز تاخدي قرض يا مصر .. وماله .. بس عومي العملة .. ارفعي الدعم .. شيلي بقي خالص شركات القطاع العام وخصخصيها .. انت في مصر فاهم وعارف تداعيات ده كويس لإنك عشته وشفته .. الفرق إن تطبيق ده في مصر حماده وتطبيقه في يوغوسلافيا حماده تاني خالص .. في مصر احنا بلد واحده بنتكلم لغة واحدة وأغلبنا ليه ديانة واحده .. لو اتحط علينا وحسينا بالظلم مفيش غير كيان واحد بس نلومه اللي هو الحكومة واللي أسهل ما عليها إنها تخوفنا كلنا بإن اللي يعترض حنتهمه إنه منتمي للجماعة المحظورة ونرميه ورا الشمس .. يمكن لو فكرة القرض بتاع صندوق النقد ده اتطبقت وقت ما (تيتو) كان بيحكم كان الموضوع عدي بس عشان وقت ما القرض ده اتاخد يوغوسلافيا كانت 6 جمهوريات ومنطقتين ليهم حق الحكم الذاتي فالاتهامات بقت تتوجه عيني عينك خصوصاً إن زي ما قلتلك برده من شويه فالجمهوريات الستة اقتصادهم مكنش زي بعضه .. كرواتيا وسلوفينيا كانوا واقفين علي رجليهم ومعدل دخل الفرد فيهم وصل 8 أضعاف معدل دخل الفرد في كوسوفو مثلاً .. السؤال اللي كان بيتسأل ليه أنا كمواطن عايش في كرواتيا أو سلوفينيا طلع عيني في نظام رأسمالي مبيرحمش أشيل هم مواطن تاني مفخد عايش في كوسوفو أو البوسنة شغال في شركة قطاع عام بيروح بعد ما يصلي الظهر وانا افضل في شغلي لحد اخر الليل .. عايز اقولك إنك لو دخلت علي النت دورت علي مين هو الشعب الأكثر كسلاً علي مستوي العالم حزر فزر حيطلعلك مين؟ .. لا مش السودان .. الجبل الأسود .. فانت مستوعب الخناقة؟

بص علي الرسم البياني اللي قدامك ده .. ده بيوريك GDP per Capita يعني متوسط الدخل القومي مقسوم علي عدد أفراد البلد خلال الفترة من 1970 لحد 1990 .. إنت شايف الكيرف بتاع يوغوسلافيا بيقع زي الطيارة المحروقة ازاي .. انت متخيل ومستوعب إن الاقتصاد اليوغوسلافي اداءه زي الزفت مقارنة بالاقتصاد الإسباني يا مؤمن .. الاسبان اللي هم من أكسل شعوب أوروبا واللي كان اقتصادهم اللي اداءه ولا اداء (شيكوبانزا) هو السبب في انهيار اليورو بعد الأزمة المالية العالمية بتاعة 2008 .. في التقرير السنوي بتاع التهديدات الدولية اللي بتصدره وكالة المخابرات المركزية الأميريكية CIA اللي طلع سنة 1990 الناس دي قالت يا جدعان الحقوا يوغوسلافيا .. دي بلد نسبة البطالة فيها 15% و فيها معدل تضخم خزعبلي وصل 2700%  .. عشان بس تفهم يعني ايه معدل تضخم زي ده فعايز أقولك إن سعر رغيف العيش ممكن يتضرب 4 مرات في شهر واحد .. حاول بقي تبقي قدامك الصورة واضحة .. يوغوسلافيا عايزه تاخد قرض من صندوق النقد الدولي .. القرض عشان يتاخد مطلوب شوية اصلاحات قاسية جداً .. الاصلاحات دي بدأت تتنفذ .. الناس في الشارع بدأت تسخن .. هنا بدأت فكرة العرقيات والدين تخش في اللعبة .. ازاي؟

دلوقتي زي ما قلتلك يوغوسلافيا عبارة عن 6 جمهوريات اللي هم صربيا والجبل الأسود والبوسنة ومقدونيا وسلوفينيا وكرواتيا ومنطقتين ليهم حق الحكم الذاتي اللي هم كوسوفو وفويفيدينا بس صادف يعني إن المنطقتنين دول جوه واحدة من الجمهوريات اللي هي صربيا فاحنا مش حنحسبهم دلوقتي .. فانت عندك 6 جمهوريات .. منهم واحدة اللي هي الجبل الأسود محسوبة هي كمان علي صربيا فانت برده تقدر تصفيهم ل5 جمهوريات عايش فيهم 5 شعوب .. الصرب .. السلوفينيين .. الكروات .. المقدونيين .. البوسنيين المسلمين  .. حتي تقسيمة الحدود جوه يوغوسلافيا بين الجمهوريات الستة اترسمت وفق هو مين عايش فين فارسم حوليهم خط وتبقي دي بلدهم .. شوية انت عارف الناس بدأت تسيح في بعضها ودي نقطة حنقف عندها كمان شوية .. بس المهم إن وسط الفرح ده كله في ناس اتنست .. لو بصيت علي الخريطة اللي تحت حتلاقي فيه بلد كده صغيرة جاره ليوغوسلافيا اسمها ألبانيا .. ألبانيا كانت ليها جاليه كبيرة عايشة في كوسوفو .. كنسبة وتناسب حتلاقي إن عدد الألبان اللي عايشين في كوسوفو اللي هي أصلاً مش بلدهم بس هم عايشين فيها عشان شغلهم هناك أكتر من عدد المقدونيين اللي عايشين في مقدونيا وأكتر من عدد سكان الجبل الأسود اللي عايشين في مونتينيجرو .. ورغم كده فالألبان اللي عايشين في كوسوفو محدش كان بيعتبرهم واحدة من الكيانات اللي بتشكل يوغوسلافيا وعشان هم كألبان شايفين نفسهم يوغوسلافيين بس اليوغوسلافيين مش شايفينهم جزء منهم فالألبان هم اول ناس اعترضت علي اللي بيحصل .. هم أول ناس نزلوا الشارع عشان يقولوا إن الاصلاحات الاقتصادية دي حتموتنا ودي المظاهرات اللي القوات المسلحة نزلت الشارع خلصت عليها عشان تبقي أول قطرة دم تنزل تسيح في الشوارع.

(ميلوسوفيتش) .. الخوف هو موتور الشعوب:

سنة 1989 بيوصل للكرسي في صربيا واحد اسمه (سلوبودان ميلوسوفيتش) .. معلومة رقم واحد إن ده رجل وسخ بكل ما تحمله الكلمة من معني بس لو إنت ناوي تمشي في سكة السياسة النجسة فعايزك تعرف إن مفيش حد أكتر من (ميلوسوفيتش) تتعلم منه أساسيات الشغلانة .. أول خطاب ليه كزعيم  للصرب هو اختار مكان معركة كوسوفو التانية اللي حصلت سنة 1389 ومش بس كده .. ده علي المنصة اللي هو بيخطب عليها حط التاريخين سوا جنب بعض قال يعني عشان اللي مش فاهم يفهم .. الرسالة واضحة للكل .. زي ما سنة 1389 كانت السنة اللي الصرب فيها بقوا تحت حكم الأتراك فسنة 1989 هي السنة اللي الصرب فيها حيرجعوا يبقوا هم أسياد قرارهم .. للأسف القوميين الصرب اللي (ميلوسوفيتش) يبقي الزعيم بتاعهم محطوطين في موقف صعب .. الاتحاد السوفيتي انهار .. روسيا محتاجة حد يلحقها والخامورجي اللي ماسكها (بوريس يلتسن) بيكسر كل حاجة عدلة قام عليها المجد السوفيتي .. الأمريكان اخر حاجة فارقة معاهم هي مصلحة الصرب .. الثورات الديموقراطية عمالة تولع واحدة ورا الثانية في الجمهوريات السوفيتية القديمة .. حتي المجر بقت ديموقراطية دلوقتي .. طب افرض شعبنا لقط العدوي بتاعة الديموقراطية دي حنعمل ايه .. طب والاقتصاد اللي مش عارفين نفرمل انهياره .. بس كل ده مش مهم .. المهم إن يوغوسلافيا تبقي للصرب والصرب هم اللي يحكموا يوغوسلافيا.

(ميلوسوفيتش) خلي بالك مقالش حاجة جديدة .. فاكر لما قلتلك أن أول ما (تيتو) مات واتعمل مجلس رئاسي فكان موقف الصرب إن معلش بقي الفيدرالية دي مش جايبه همها وبما إن الصرب هم أكبر جمهورية من الستة فاحنا لازم اللي نقرر مين يعمل ايه امتي وازاي .. كل اللي عمله (ميلوسفيتش) إنه عشان يوصل للتارجيت ده إن صربيا هي تبقي الامر الناهي في يوغوسلافيا فهو محتاج يكوش علي اللعبة .. هو محتاج يلوي دراع أي حد أضعف منه عشان في الاخر كلمته تمشي وتاني هو مقالش حاجة جديدة .. هو بس جه نفذ اللي كل الصرب كانوا عايزينه .. زي ما الصورة اللي فوق دي بتوريك فوق الاحصاء السكاني ليوغوسلافيا سنة 1991 فالصرب كانوا بيشكلوا 36% من اجمالي سكان البلد (اللي هم باللون البينك) .. ركز كده في الصورة .. صربيا مش بس هي اللي متلونة بالبينك .. فيه حتت تانية جوه البوسنة و حتت جوه كرواتيا فيها تكتلات كبيرة من الصرب فمن وجهة نظر (ميلوسفيتش) الحتت اللي عايش فيها أغلبية سكانية صربية هي بالتبعية جزء من صربيا حتي لو جغرافياً هي جزء من جمهورية البوسنة والهارسك أو جزء من جمهورية كرواتيا .. عشان (ميلوسوفيتش) يحقق التارجيت بتاعه فهو بدأ زي ما حتشوف دلوقتي:

• البداية بالشعب الصربي نفسه اللي لازم كله يتعمله غسيل مخ .. ليل نهار في التليفيزيون بيتذاع برامج عماله تعيد وتزيد في ازاي الصرب دول ضحايا جرايم الكروات والمسلمين .. فجأة الجرح بتاع الاوستاشا بقي يتفتح تاني .. صورة (هتلر) وهو بيزور معسكر اعتقال يوزانافاتس بقت تتنشر في الصحف بعد ما كان مجرد ذكر اسمها أيام (تيتو) يعتبر جريمة ضد الدولة اليوغوسلافية.
• المجلس الرئاسي اللي بيحكم يوغوسلافيا فيه 8 كراسي بيمثلوا الجمهوريات الستة ومعاهم المنطقتين اللي ليهم حق الحكم الذاتي .. بس تاني المنطقتين دول اللي هم كوسوفو وفويفيدينا جغرافياً جوه صربيا فهو بدأ إنه يحط في الكرسيين بتوع كوسوفو و فويفيدينا ناس مواليين لصربيا فكده 3 كراسي من الثمانية بقوا تحت ايده.
• شوية وحط واحد موالي لصربيا في الكرسي بتاع مونتينجرو اللي هي الجبل الأسود فكده بقي معاه 4 كراسي مع الثمانية .. ده معناه إن مفيش قعدة بيقعدها المجلس الرئاسي إلا وطلع منها قرار ماشي في مصلحة صربيا لإن صربيا معاها 50% من الكراسي .. مخبيش عليك (ميلوسفيتش) كان فرحان بنفسه أوي .. هو في ايده مصير يوغوسلافيا .. هو اللي حيحقق تارجيت صربيا القوية اللي شعبه بيحلم بيها من أيام (تيتو) ما كان عايش.

مشكلة (ميلوسوفيتش) إنه مكنش عنده القدرة علي التخيل .. كونك يا سيدي رجل جامد زحليقة عايز تكوش علي اللعبة وتبقي في ايدك كل الصلاحيات ويتقالك الكبير أوي راح الكبير أوي جه براحتك .. بس في نفس الوقت لو انت مكنش عندك الحكمة الكافية إنك تفهم حدودك فين وعند أنهي مرحلة الناس اللي صابره عليك حتنفجر في وشك فانت نهايتك حتكون أسرع مما تتخيل .. كرواتيا وسلوفينيا الاتنين شافوا القطر محطته حتنتهي فين .. هم شايفين انهم جوه تحالف بتقوده صربيا .. تحالف عليه روشتة اصلاحات اقتصادية قاسية وغالباً صربيا حتخلي كرواتيا وسلوفينيا يشيلوا حبة حلوين من المصاريف .. الدستور اليوغوسلافي كانت فيه فقرة قاتلة بتقول إن أي جمهورية من الستة لو عملت استفتاء شعبي وغالبية سكان الجمهورية دي قالوا ايوه احنا عايزين نستقل فمن حق الجمهورية دي إنها تسيب يوغوسلافيا .. عشان كده سنة 1990 سلوفينيا وكرواتيا كل واحدة فيهم عملت استفتاء شعبي انتهي بإن اغلبية سكان البلدين مع فكرة الاستقلال عشان يوم 25 يونيو 1991 كرواتيا وسلوفينيا بيعلنوا استقلالهم .. اقف بقي هنا.

عشان برده أوريك قد ايه مشكلة إن (ميلوسوفيتش) معندوش قدرة علي التخيل ودته في ستين داهية .. دلوقتي انت لما كرواتيا وسلوفينيا استقلوا انت حرفياً حققت اللي انت عايزه .. انت كنت عايز يوغوسلافيا تبقي بلد ماشيه بدماغ صربيا .. حلو .. انت كان معاك 50% من أصوات المجلس الرئاسي ولما سلوفينيا وكرواتيا مشيوا فانت حرفياً بقيت الأمر الناهي .. حلو أوي .. يعني المفروض إنت دلوقتي مشكلتك اتحلت .. بس هي الفكرة إن البني أدم عموماً يعني مش بيقدر يشوف الصورة كاملة .. انت بتبقي نفسك تجيب عربية .. تقوم الليل وتصلي الفجر وتقول يارب عايز عربية .. ولو طلعلك المصباح السحري بتاع علاء الدين أول حاجة حتطلبها انا عايز عربية BMW M Series .. طب لو جتلك العربية دي انت حتقدر علي بنزينها .. حتقدر علي صيانتها .. حتقدر علي تصليحها لو لا قدر الله حصلتلك حادثة من عين الناس اللي حتبصلك فيها .. انت بتبقي شايف النص اللي انت عايزه من الأمنية بس مخك مش بيبقي قادر يستوعب المشاكل المترتبة علي إنك حققت اللي انت عايزه .. إنت كنت عايز تبقي انت الأمر الناهي في يوغوسلافيا عشان تاخد فلوس سلوفينيا وكرواتيا تحل بيها مشاكلك الاقتصادية .. بس لما سلوفينيا وكرواتيا قالتلك سلامات يا أم احمد لقيت نفسك غرزت في حفرة .. انت اصلاً من غيرهم مش حتعرف تحل مشاكلك الاقتصادية .. استقلالهم عراك قدام الناس .. عدم وجودهم حيخلي الناس تشوفك علي حقيقتك .. فاشل.

وعشان (ميلوسوفيتش) ميبانش فاشل قدام شعبه فهو لجأ لنفس التكتيك اللي بيروحله أي حاكم مستبد معندوش حلول .. هو قال لشعبه عارفين من السبب في كل مشاكلكوا؟ .. الكروات والسلوفينيين .. هم اللي سرقوا فلوسكوا ودلوقتي فرحانين بانهم اغنياء ولما قلنالهم لازم تساعدونا خدوا بعضهم وجريوا .. مش بس كده .. فاكرين خريطة التقسيم العرقي ليوغوسلافيا .. فاكرين لما قلتلكوا إن كتير من الصرب عايشين في البوسنة وعايشين في كرواتيا .. أهو 12% من سكان كرواتيا أصلاً يعني صرب .. طب ايه رأيكوا بقي أنا عايز اخد الأرض اللي عايش عليها ال12% من سكان كرواتيا دول لإنهم حقنا .. بس (ميلوسوفيتش) كان شايف إن سلوفينيا أسهل من كرواتيا فقرر إن أول ضحاياه تكون القوات المسلحة السلوفينية اللي هو مكنش يعرف إن بقالها سنين بتستعد لليوم الأسود ده.

• يوم 25 يونيو 1991 سلوفينيا بتعلن استقلالها .. في نفس اليوم القوات المسلحة السلوفينية بتعلن حالة الطواريء .. يوم 26 يونيو أول ضحايا الحرب بيموتوا وهم طاقم طيارتين هليوكوبتر تابعين لسلاح الجو الصربي وقعوا بصواريخ سام-7 مضادة للطيارات .. علي فكرة .. واحد من الطيارين الصرب اللي ماتوا دول كان اصلاً سلوفيني بس كان رأيه إن سلوفينيا لازم تفضل جزء من يوغوسلافيا وكان ضد استقلالها عشان بس اوريك قد إيه الخناقة دي خيوطها داخله في بعض.
• يوم 27 يونيو 1991 القوات المسلحة السلوفينية بدأت هجوم رائع علي الصرب علي طول الحدود مع إيطاليا نتج عنه تدمير دبابتين واسر 3 دبابات تانية .. يوم 28 يونيو السلوفينيين أسروا مخزن ذخيرة كامل بالعساكر اللي بيحموه.
• يوم 28 يونيو برده كتير من الوحدات العسكرية اليوغوسلافية اللي المفروض تروح تهاجم سلوفينيا العساكر سابت وحداتها وراحت انضمت للقوات السلوفينية لإن بمنتهي البساطة العساكر دول كانوا في الأصل سلوفينيين فمش حيرفعوا السلاح علي أهل بلدهم .. يوم 4 يوليو كانت الحرب خلصت باتفاق سلام ما بين سلوفينيا وبين الصرب عشان سلوفينيا تبقي بلد مستقلة من غير أي مشاكل بعد ما راح في حرب استقلالهم عن صربيا 44 قتيل بس .. مقارنة باللي حيحصل كمان شوية يا بلاش فعلاً.

يدوبك هو استقلال كرواتيا أٌعلن من هنا .. صربيا أعلنت الحرب علي كرواتيا من هنا .. ليه؟ .. عايزين بس تلت مساحة كرواتيا عشان عايش فيها صرب كتير .. روغم كل ده فيه صرب كتير كانوا ضد اللي بيحصل .. في الاسابيع الاولي اللي بعد الحرب صربيا كانت مليانة مظاهرات ضد الحرب .. 50% من الصرب عموماً و 80% من الصرب اللي عايشين في بلجراد اللي هي عاصمة صربيا رفضوا المشاركة في التجنيد الإجباري .. بس رغبة الصرب في إنهم يفرضوا كلمتهم علي الكروات كانت مكملة أيا كان رأي الشارع:

• يدوبك الحرب في سلوفينيا وقفت في يوليو 1991 ففي نفس الشهر الحرب مع كرواتيا بدأت .. أول مدينة كرواتية تقع كانت فوكوفار واللي بعد حصار دام شهور وبعد ما بسبب القصف الجوي والمدفعي تقريباً مبقاش فيها بيت واقف علي حيله.
• في أكتوبر 1991 البحرية بتاعة الجبل الأسود بدأت حصارها وتدميرها للموانيء الكرواتية علي البحر الأدرياتيكي .. المدينة الوحيدة اللي يمكن صمدت كانت مدينة دوبروفنيك.
• يوم 8 سبتمبر 1991 مقدونيا اللي دلوقتي اسمها مقدونيا الشمالية أعلنت انها حتعمل استفتاء شعبي لاستقلالها بنفس الثغرة اللي استغلتها كرواتيا وسلوفينيا ويوم 25 سبتمبر مقدونيا الشمالية بقت بلد مستقلة بس لسبب لا يعلمه إلا الله صربيا سابت مقدونيا تستقل وفضلت العلاقة بينهم كويسة.
• عشان محدش لا من الصرب ولا من الكروات كان عارف ياخد من الثاني لا حق ولا باطل فالأمم المتحدة عرفت في يناير 1992 تمضي اتفاق وقف اطلاق نار كان من نتايجه إن الاتحاد الاوروبي اعترف باستقلال كرواتيا.

البوسنة .. فكرة إنك تهرب من عدوين مش عدو واحد:

المشكلة كانت يوم 3 مارس 1992 لما البوسنة والهارسك أعلنت استقلالها بناء برده علي نتيجة الاستفتاء الشعبي اللي هي عملته .. البوسنة زيها زي كرواتيا فيها نسبة صرب مش بطالة عايشين فيها .. وفق احصائيات السكان اللي عملتها الحكومة اليوغوسلافية قبل الحرب فالبوسنة والهارسك كان 44% من سكانها مسلمين اللي بيتقال عليهم بوزنياك .. 32% من السكان صرب .. 17% من السكان كروات و 6% اللي فاضلين بيعتبروا نفسهم يوغوسلافيين .. زي ما انت شايف وضع البوسنة معقد حبتين .. لما الصرب اللي عايشين في البوسنة رفضوا المشاركة في الاستفتاء بتاع الاستقلال فلقينا إن نسبة الاقبال علي الاستفتاء راحت في داهية .. يدوبك هم 63% كانت نسبة الإقبال علي الاستفتاء بس 99.7% قالوا عايزين نستقل .. مش بس كده .. هو صحيح غالبية اللي راحوا الاستفتاء قالوا ايوه احنا عايزين نستقل عن يوغوسولافيا بس الصرب اللي عايشين في البوسنة قالوا طب ايه رأيكوا بقي احنا كمان عايزين نعمل استفتاء علي إننا عايزين ننضم لصربيا لإن فيه مناطق كاملة جغرافياً جوه البوسنة بس عايش فيها أغلبية سكانية صربية .. الصرب البوسنيين علوا الأمبير سيكا لما المدن اللي عايشين فيها جوه البوسنة سيطروا عليها وأعلنوا من نفسهم كده إن المدن دي اللي هي جوه البوسنة بقت جمهورية مستقلة سموها جمهورية صربيسكا Republic of Srpska  .. الصرب طبعاً كان عاجبهم اللي بيحصل  و (ميلوسوفيتش) أعلن اعتراف صربيا بالكيان المسرطن اللي اسمه صربيسكا وكل البوسنيين اللي عايشين في جمهورية صربيسكا دي اتطردوا منها و شوية والقوات الصربية حاصرت ساراييفو عاصمة البوسنة  .. فكرة إن القوات الصربية كانت أضعف من إنها تتسحل في حرب علي 3 جبهات ضد السلوفينيين والكروات و البوسنيين فهم لو انت صاحي معايا علي التسلسل الزمني للأحداث فكان لما الصرب حاصروا سراييفو كانوا خلاص خلصوا خناقتهم مع السلوفينيين و الأمم المتحدة تدخلت عشان توقف الضرب بينهم وبين الكروات .. ده خلي الصرب حرفياً فاضيين للبوسنيين.

بمجرد ما البوسنة اعلنت استقلالها فالثريسوم بتاع الصرب والبوسنة وكرواتيا مسكوا في خناق بعض .. البوسنة وكرواتيا ضد صربيا والجبل الأسود اللي بقوا بلد واحد اسمها جمهورية يوغوسلافيا الفيدرالية .. في الأول مشكلة الصرب كانت مع الكروات عشان لما كرواتيا اعلنت استقلالها كان زي ما قلتلك 12% من سكان كرواتيا اساساً صرب عايشين علي مساحة تشكل تقريباً ربع مساحة كرواتيا فكان الصرب من أول طلقة اتضربت وهم هدفهم واحد .. اي متر أرض جوه كرواتيا عايش عليه حد صربي فاحنا احناخد الأرض دي .. لما البوسنة والهارسك هي كمان اعلنت استقلالها ففي الاول الكروات والبوسنيين تعاملوا مع بعض بمبدأ عدو عدوي صديقي .. شوية والكروات هم كمان قلبوا علي المسلمين .. سراييفو عاصمة البوسنة محفوظ لاسمها لقب المدينة صاحبة أطول مدة حصار في تاريخ البشر .. هي المدينة اللي فيها واحدة من أسواً جرايم الحرب اللي حصلت في التاريخ برده وهي مذبحة سيبرنيتشا اللي مات فيها 8372  رجل وطفل واللي كانت دليل واضح علي إن رغبة الكروات والصرب في الحرب دي إنهم يصحوا الصبح ميلاقوش مسلم عايش في يوغوسلافيا.

أكتر من 3 سنين من الدم من 1992 لحد 1995 .. جرايم حرب من كل شكل ولون مات فيها ما بين 100-200 ألف قتيل وبسببها اتهجر 4 مليون بني أدم وهي دي المشكلة إن الدول الأوروبية مكنتش عايزة حنفيه لاجئين تفتح في وشها:

• بداية تدخل الأمم المتحدة والاتحاد الأوروبي إنهم عملوا مناطق أمنة للاجئين بمساعدة  حلف شمال الأطلنطي NATO اللي فرض مناطق حظر طيران فوق البوسنة عشان القوات الجوية الصربية متفردش عضلاتها علي البوسنيين .. تقدر تسميها معسكرات لاجئين عشان بس اللاجئين دول ميعدوش الحدود ويبقوا جوه الدول الأوروبية .. خليكوا مكانوا واحنا حنحاول نحميكوا من الصرب والكروات.
• شوية واتعرضت خطة اسمها فانس-أوين Vance-Owen Peace Plan قالت طب ايه رأيكوا هي مش البوسنة والهارسك دي منطقة سايحة علي بعضها عايش فيها بوسنيين وصرب و كروات .. طب ايه رأيكوا نقسمها مناطق بحيث لو حتة عايش فيها أغلبية صربية تبقي بوسنة الصربية ولو حتة عايش فيها اغلبية مسلمة تبقي بوسنة المسلمين وهكذا .. الفكرة دي رفضتها صربيا لإن وقتها كانت القوات الصربية حرفياً مسيطرة علي أغلب البوسنة فايه اللي يخليهم ينسحبوا من حتت وياخدوا حتت .. من وجهة نظر الصرب باشا انا معايا البوسنة كلها جزرة وقطمها جحش.
• بداية إن العيون كلها تتركز علي إن الصرب هم سبب كل المصايب اللي في الدنيا لما الكروات بعد كل ما جرايم الحرب اللي هم ارتكبوها في المسلمين وفي الصرب زي ما يكونوا جالهم كرشة نفس .. فجأة الكروات اعلنوا انسحابهم من الخناقة دي .. يوم 5 فبراير 1994 صربيا تقمصت دور الشرير في رواية أحدهم لما قالت أيوه أنا السبب في كل المصايب وبعد ما رسمياً كرواتيا انسحبت من الحرب فاذا بالصرب يضربوا سراييفوا بغارة مدفعية عيار 120 مليمتر استشهد بسببها 62 بوسني مسلم واتصاب 144.
• الغارة دي هي اللي قلبت الدنيا كلها علي الصرب .. طلع بيان رسمي من NATO إن لو الصرب مسحبوش مدفعياتهم التقيلة من حصارهم لسراييفو فقسما بايمانات المسلمين والمسيحيين واليهود طياراتنا حتفرتك المدافع دي .. الصرب راحوا يشتكوا لمامتهم روسيا اللي كان ماسكها وقتها الخامورجي الأشهر علي الإطلاق (بوريس يلتسن) .. (يلتسن) قال للصرب اسمعوا كلام NATO واسحبوا المدفعية التقيلة بتاعتكوا وانا ليكوا عليا حكلم الأمريكان إنهم يرجعولكوا البوسنة.
• هنا بيتجلي دور الغباء .. الخناقة كانت في سكتها للحل .. لأول يوم من سنين وسراييفو عاشت ليلة هادية .. متفهمش مين حب يعمل فيها رجل فعطي امر لمسلحين من الصرب انهم يقصفوا معسكر لاجئين تحت حماية الأمم المتحدة .. بالمناسبة قيادات الصرب وقتها طلعت قالت والانجيل ما احنا اللي عطينا الامر ده .. رد NATO إن لأول مرة في تاريخ الحلف ومكنتش حصلت لحد وقتها إن طلع أمر بإن طيارتين F-16 Fighting Falcon يضربوا منصات المدفعية بتاعة الصرب اللي حولين سراييفو .. الدفاع الجوي الصربي وقع واحدة من الطيارتين والطيار عرف ينط بكرسيه القاذف والقصة دي هي اللي اتبني عليها واحد من أهم الأفلام بتاعة هوليوود في التسعينات وهو فيلم Behind Enemy Lines .. في أغسطس 1994 اتصاب عسكري أوكراني ضمن قوات حفظ السلام بتاعة الأمم المتحدة لما الصرب هجموا علي معسكر تابع ليهم وبرده رد NATO كان غارة جوية بطيارتين A-10 Warthog والموضوع اتلم.
• في يوليو 1995 الوضع خرج عن السيطرة لما الصرب هجموا علي معسكر اللاجئين في سيبرنيتشا وقتلوا اللاجئين اللي فيه واستخدموا عساكر الأمم المتحدة في المعسكر كدروع بشرية عشان ميخلوش NATO يضربهم بغارات جوية .. مجزرة سيبرنيتشا كانت السبب ورا إن اعلن عن عملية عسكرية سموها عملية القوة المتعمدة Operation Deliberate Force عشان يقنعوا الصرب إن خلاص بقي كفاية وساخة لحد هنا .. لمدة 20 يوم اتعملت 3500 غارة جوية بمعدل 175 غارة يومياً يعني بتتكلم عن 7 غارات كل ساعة شاركت فيها 400 طيارة مقاتلة من 15 بلد مختلفة .. في فرح الغارات الجوية دي اتدمر فوق 400 هدف جوه صربيا ومن أصل 400 طيارة موقعتش منهم غير طيارة يتيمة طراز ميراج 2000 تابعة لسلاح الجو الفرنساوي.
• مين بقي استغل الفرصة .. شطور .. الكروات قالك بما إن الصرب اتحط عليهم فيلا بينا بقي نطرد كل الصرب اللي جوه أرضنا بالمرة .. الكروات المرة دي هم حرفياً وبدون أدني مبالغة طهروا أرضهم من الصرب .. حتي لو انت صربي الأصل عايش في كرواتيا من أيام (تيتو) كان عايش فانت أجبرت تسيب أرضك وبيتك .. في اللحظة دي الصرب وخصوصاً (ميلوسوفيتش) فهم اللي فيها خلاص .. الحرب خلصت .. صربيا اتحط عليها.

نوفمبر 1995 اتمضت اتفاقية دايتون Dayton Accords اللي نصت علي إن حيبقي فيه 60 الف مقاتل من الأمم المتحدة لضمان إن محدش يضرب حد .. البوسنة والهارسك حتبقي بلد مستقلة عايش فيها مسلمين من البوسنة و عايش فيها كروات وعايش فيها صرب عادي جداً .. كوسوفو حتفضل جزء من صربيا عشان يوم 14 ديسمبر 1995 الحرب البوسنية تخلص .. الدنيا هدت مؤقتا بس اللي خد علي قفاه من كل ده كان الألبانيين .. فاكر لما قلتلك إن ألالبانيين اللي عايشين في البوسنة كانوا أول ناس ساح دمها في الشوارع لما اعترضوا علي الاصلاحات الاقتصادية القاتلة اللي كانت عايزه حكومة يوغوسلافيا تعملها عشان ترضي صندوق النقد الدولي .. دلوقتي البوسنة خدت استقلالها .. طب كوسوفو؟ .. لسنين والألبان اللي عايشين في كوسوفو واللي بيشكلوا أغلبية سكان المنطقة بيطلبوا بهدوء وبصوت واطي لو سمحتوا عايزين نستقل .. قامت الحرب ومخدوش دولتهم .. خلصت الحرب ومخدوش دولتهم .. معاك إن اللي ضرب أول طلقة كان الألبانيين اللي كان راس الحربة في حرب استقلالهم ضد الصرب هو الكيان اللي اسمه جيش تحرير كوسوفو بس رد فعل الصرب كان شنيع .. نفس السيناريو هو هو بتاع غزة .. اه فيه تاريخ طويل للخناقة بس خلينا نتفق إن فيه ناس سبحان الله يعني بتقول إن الصراع الفلسطيني الصهيوني بدأ يوم 7 أكتوبر 2023 .. بس حتي لو حنمشي وراهم فرد فعل الصهاينة مينفعش توصفه بأقل من جريمة تطهير عرقي .. ده اللي عمله الصرب في كوسوفو سنة 1999.

رد الأمريكان كان حاسم وفيه ناس كتير بتقول عليه قاسي بس في النقطة دي من القصة أي حاجة وحشة تحصل في الصرب مش حزعل عليها الصراحة .. نص مصانع صربيا اتضربت كلها في غارة واحدة .. معاك إن استهداف البنية التحتية لأي بلد يعتبر جريمة حرب .. مش بس كده .. لما NATO ضرب الصرب في البوسنة فكانت الغارات دي متوافق عليها بقرار من مجلس الأمن التابع للأمم المتحدة .. المرة دي مكنش فيه قرار زي ده .. بمعني أخر .. NATO ضرب صربيا سنة 1999 زي ما أمريكا ضربت إيران في 2026 من غير موافقة الأمم المتحدة .. نقطة تانية إن الغارات الجوية المرة دي علي صربيا بسبب كوسوفو لسبب ما لا يعلمه متفهمش متسربعين ولا ايه بس القصف نتج عنه مصايب زي مثلاً إنهم ضربوا بالغلط معسكر لاجئين قتلوا فيه 50 لاجيء ألباني بالغلط .. ضربوا السفارة الصينية في بلجراد عاصمة صربيا بالغلط برده .. قتلوا 500 مدني صربي بالغلط برده .. الفكرة إن ده لازم يبقي واضح عشان بسبب الغلطات دي لسه لحد دلوقتي فيه روح عداء مش عايزه تتحل بين الصرب والكوسوفيين والألبان لإنهم شايفين إن الحرب في كوسوفو خلصت عشان الأمريكان سيحوا دم الصرب من طياراتهم.

بس الغارات الجوية الأمريكية كانت قاسية جداً علي الصرب لدرجة إنهم قبلوا كل شروط أمريكا.. كوسوفو بقت تحت حماية دولية والصرب اللي كانوا عايشين في كوسوفو سابوها وراحوا صربيا لحد ما في 2008 كوسوفو خدت استقلالها .. فضلت صربيا والجبل الأسود بلد واحدة لحد ما في 2006 اتعمل استفتاء شعبي علي الاستقلال في الجبل الاسود وافق فيه 55% بس من الشعب علي الاستقلال عشان يوم 3 يونيو 2006 تنفصل صربيا والجبل الأسود وده كان قبل أيام من كاس العالم 2006 في ألمانيا لو تفتكر وصربيا اللي دخلت البطولة وهي مرشحة تبقي حصان أسود اتحط عليها من كل الدول اللي في مجموعتها.

اللي عمله (ميلوسوفيتش) ده يعتبر درس مهم في السياسة خلي بالك .. كوني ضد اللي هو عمله وشايف إنه إنسان وسخ لا يمنع إنك تستهدي بالله وتبص كويس للي هو عمله .. هو حول الخوف لسلاح فعال جداً في ايده .. فكر فيها كده .. إنت مواطن عايش في مصر .. إنت ممكن تبقي مصري .. و ممكن تبقي عربي .. و ممكن تبقي مسلم .. و ممكن تبقي أفريقي .. أربع هويات اتجمعوا في بني أدم كحيان بيسف تراب زيك .. إنت ممكن تبقي أكتر من حاجة في وقت واحد عادي جداً .. حتي إنت كمصري إنت ممكن تفخر بالجزء الفرعوني و الجزء الإسلامي و الجزء بالبطلمي و حتي الجزء الفاطمي و الجزء السني من تاريخك .. عادي جداً .. المشكلة إن لما يجي حد يخوفك من جزء من هوياتك دي .. أقرب حاجة زي دي حصلت لينا بعد اللي حصل في ماتش الجزائر لو تفتكر اللي اتعمل في السودان .. فجأة الإعلام بقي بيخوفك من كل ما هو جزائري .. اللي هو انت شوية وكنت حتقول ياريت كان الفرنساويين خلصوا عليهم كلهم ولا كان اسم (جميلة بوحريد) بقوا بيدرسوه في كتب التاريخ عندنا في مصر .. اللي عمله (ميلوسوفيتش) إنه حول فشله في إدارة ملف الاقتصاد لسلاح في ايده .. الخوف ..  هو بقي يخوف الصرب من كل حاجة .. يخوفهم من الكروات اللي عايزين يموتوهم من الجوع .. الخوف من المسلمين اللي واقفين مع الكروات .. الخوف من الغرب اللي بيكرههنا عشان احنا ارثوذوكوس وعشان احنا صرب .. الصرب الغلابة اللي الدنيا جايه علينا .. تخويف الصرب من الناس اللي بتكرهم كان مش بس هدفه إن الصرب يوافقوا علي اللي بيعمله (ميلوسوفيتش) إنما كمان عشان الصرب اللي ضد اللي هو بيعمله يخرسوا خالص .. بمجرد ما هو قدر يقنع الصرب أو يخوفهم بما يكفي إن مستقبلهم ومستقبل عيالهم مربوط بموت ناس تانية فساعتها بس بقي مقبول ليه إنه يعمل اللي هو عايزه في الكروات وفي المسلمين في البوسنة.

بس يمكن الدرس المهم اللي انا عايز اتكلم عنه من قصة يوغوسلافيا هي أهمية الكلام .. احنا لازم نتكلم مع بعض .. تعالي انت هنا في مصر مثلاً .. فيه ناس من اخواتنا المسيحيين مقتنعين من جواهم إنهم عايشين حالة قمع ضدهم وإن المسلمين بيستهدفوهم .. الناس دي مينفعش طريقة التعامل معاها تبقي شششش مش عايزين قلق .. نفس الفكرة مع المسلمين .. فيه ناس مقتنعة من جواها إن المسيحيين دول لازم يدفعوا الجزية وبرده مينفعش ردنا عليهم يكون انت ارهابي ولا ايه .. احنا كمصريين فيه بينا وبين أهل سينا مشكلة .. فيه مع أهل النوبة مشكلة .. المسلمين والمسيحيين فيه بينهم مشكلة .. وعلي فكرة .. مقارنة بالمشاكل اللي بين الصرب والكروات والبوسنيين فمشاكلنا دي تعتبر مشاكل عالم أول بس الفكرة إن احنا لازم نتكلم مع بعض .. فكرة الردم علي المشاكل دي مش بتحل حاجة.

درس حرب يوغوسلافيا قاسي جداً في أهمية إننا نتكلم مع بعض .. هل احنا ملايكة .. لا .. انا عارف إن ده حيزعل ناس كتير بس حاول تفهم إن صحابة سيدنا النبي (عليه الصلاة والسلام) اللي هم رضوان الله عليهم جميعاً مسكوا في خناق بعض .. بتحصل .. عادي .. بس الردم علي الدم مبيحلش حاجة .. 140 ألف بني أدم علي أقل تقدير ماتوا في الحرب بتاعة يوغوسلافيا .. والأسواً من ده إن حلم يوغوسلافيا اتحول لكابوس .. حلم إن في يوم من الأيام السلاف يبقي ليهم بلدهم اللي يفرحوا بيها ويدافعوا عنها ويغنوا نشيدها الوطني في كاس العالم .. الجرايم اللي ارتكبت في الحرب دي فعلاً تخليك تفقد أملك في الإنسانية ومخبيش عليك خلال كتابتي للسلسلة دي جت لحظات سألت نفسي هو ليه ربنا خلقنا أصلا .. للحظات حسيت إن الملايكة كان عندهم حق لما قالوا لربنا اتخلق فيها من يسفك الدماء .. 50 الف حالة اغتصاب منظمة وعشان تفهم ده معناه إيه تخيل إن فيه عيلتين في الصعيد متخانقين مع بعض يقوم رجالة عيلة من العيلتين يخطفوا ستات العيلة التانية ويغتصبوهم عشان يخلفوا منهم أطفال يشيلوا اسمهم في محاولة إنك تشيل من التاريخ اسم عيلة تانية .. ده اسمه تطهير عرقي .. بعد الحرب ما خلصت اتعملت محاكمات لحساب المجرمين اللي ارتكبوا وساهموا وحموا الجرايم دي وفيه 161 واحد ادين في المحاكمات دي واللي من ضمنهم كان (ميلوسوفيتش) شخصياً.

المصادر:

• فيديو بعنوان The Breakup of Yugoslavia Explained  نشر غلي YouTube وتقدر تتفرج عليه من اللينك ده:
  (8247) The Breakup of Yugoslavia Explained – YouTube
• فيديو بعنوان How to Destroy a State نشر علي YouTube وتقدر تتفرج عليه من اللينك ده:
  How to Destroy a State
• فيديو بعنوان The Yugoslav Wars: History, Hatred and War Crimes نشر علي YouTube وده لينك الفيديو تقدر تتفرج عليه:
  The Yugoslav Wars – History, Hatred, and War Crimes