لينك التسجيل الصوتي علي ساوند كلاود:
https://on.soundcloud.com/YL2F60NI8sP5SlQQco
يمكن أنا بحب إني أوصف اللي انا بعمله هنا إني مش مجرد بكتب مقالات قد ما أنا بحب فكرة إنك تقرالي وإنت في مود إنك بيتحكالك قصة لإن في الأخر سواء إنت بتتكلم عن حاجة حصلت في التاريخ أو بتتكلم عن حاجة حصلت في السياسة أو سلاح بنتكلم عنه أو حتي في الكورة فانت في الأخر قصاد قصة .. قصة ليها بداية و وسط ويمكن نهايتها لسه متحددتش بس في الاخر ليها نهاية .. قصة فكرتها إنها تبقي عبرة ليك وتتعلم منها حاجة .. واللي حنحكيه النهاردة هو الحقيقة واحدة من القصص التراجيدية في تاريخ البني أدمين .. قصة معقدة لدرجة إن ليها أكتر من وجهة نظر وللأسف وجهات النظر دي مش جايه من أراء قد ما هي جايه من ثقافات وتجارب ودم و موت و دموع .. قصة مليانه عبر ودروس .. قصة مليانة وجع من الماضي وأمل في المستقبل .. قصة النهاردة هي قصة البلد اللي يمكن فيه ناس منكوا سمعوا اسمها قبل كده وهي يوغوسلافيا واللي قبل ما اكمل كلامي حاول تبص علي الخريطة دي وتشوف هي فين يوغوسلافيا وعايزك من مجرد مكان البلد دي تستوعب قد ايه البلد دي فيها حاجة غلط.
الميلاد .. الوجود في حالة تضاد مع المنطق:
يوغوسلافيا كانت مكان البلد اللي انت عارفها باسم منطقة البلقان ويوغوسلافيا بلد المفروض إنها مكنتش تبقي موجوده في الدنيا لإن المنطق نفسه بتاع ميلادها مش موجود .. دي بلد مكونة من تسع شعوب اتحطوا مع بعض في حتة واحدة واتقالهم انتوا اسمكوا يوغوسلافيا .. بلد بتتكلم 3 لغات .. عايش فيها 4 ديانات و 5 قوميات و 6 جمهوريات و 8 أقليات عرقية .. وكل دول محاوطهم 7 جيران ولا واحد فيهم عايز البلد دي تعيش .. ورغم كل ده اتولدت يوغوسلافيا .. لما بلد زي دي المنطق نفسه يرفض وجودها ورغم كده اتولدت فانت لازم تسأل نفسك ليه؟ .. ليه أصلاً كانت فيه حاجة اسمها يوغوسلافيا؟ والحقيقة إن الإجابة عن السؤال ده بسيطة جداً وهي إن يوغوسلافيا أساساً هي فكرة .. فكرة إن ليه لا يبقي فيه وطن يعيش فيه ما يسمي بالشعب السلافي .. أقف بقي هنا.
يمكن إحنا كعرب ممكن نبقي متفهمين النقطة دي لقربنا من فكرة القضية الفلسطينية .. الفلسطينيين من وجهة نظرنا علي الأقل ووجهة نظر أي بني ادم عنده ضمير يستحقوا إن يبقي ليهم وطن يحميهم ويحموه .. وطن له حدود و حكومة و جيش و إقتصاد و علم .. ما يسمي بالشعب السلافي Slavic People أو السلاف Slavs هم الناس اللي كانوا عايشين في شرق أوروبا .. الناس اللي انت دلوقتي عارفهم باسم التشيك و بولندا وروسيا وأوكرانيا و الحتة اللي انت عارفها باسم البلقان اللي بعد كده بقت يوغوسلافيا .. الشعب السلافي خلال تاريخه الطويل اتحط عليه حطة وحشة أوي .. الدنيا حرفياً رجعت بظهرها داست عليهم .. من أول الدولة الرومانية مروراً بالهان و بالمرة جه وراهم المغول واللي جه في ديلهم الدولة العثمانية واتختمت معاهم بالإمبراطورية النمساوية المجرية .. تاريخ طويل مليان بالعبودية ومن هنا جت التسمية التاريخية ليهم بالشعب السلافي لإن عبد في اللغة اللاتينية يعني سلاف اللي هي بقت في اللغة الإنجليزية دلوقتي بقت Slave .. منطقة البلقان اللي عايش فيها حبة محترمة من الشعب السلافي هي يمكن الوحيدة اللي لو فكرت فيها شوية مش حتلاقيهم عرفوا يحققوا الاستقلال بتاعهم .. بولندا بلد مستقلة .. روسيا بلد مستقلة .. أوكرانيا بقت بلد مستقلة .. بس البلقان لا.
بداية قصتنا هي سنة 1878 .. في السنة دي كانت البلقان مقسومة ما بين حتت تحت سيطرة الدولة العثمانية وحتت تانية تحت الاحتلال النمساوي المجري .. زود علي كده إن في الوقت ده كانت دول تانية شبه البلقان برده بدأت يبقي ليها كيان مستقل زي مثلا الطليان والألمان .. الطليان عمرهم ما كانوا دولة موحدة بس هم عند مرحلة معينة من تاريخهم بصوا لبعض في المراية وقالوا لنفسهم سواء انت بتتكلم عن واحد عايش في ميلان في أقصي شمال إيطاليا أو نابولي تحت خالص في الجنوب فاحنا كلنا بنتكلم نفس اللغة .. كلنا مدمنين اسبريسوا .. كلنا بناكل اسباجيتي بالصلصة .. فليه لا منبقاش دولة مستقلة .. يعني هي البلد إيه غير شوية ناس بيتكلموا نفس اللغة وبياكلوا نفس الأكل وبيعملوا دماغ بنفس المشروب .. سنة 1878 كانت السنة اللي حتة من البلقان وهي الكيان المشترك اللي اسمه صربيا والجبل الأسود استقلت عن الدولة العثمانية مع نهاية ما يسمي الحرب الصربية العثمانية بس علي الناحية الثانية الإمبراطورية النمساوية المجرية مكنش عندها استعداد تدي أي بلد من بلاد البلقان استقلالها .. لحد ما قامت الحرب العالمية الأولي سنة 1914.
لو تفتكر معايا كلامنا عن الحرب العالمية الأولي فهي قامت بسبب طلقة اتضربت في مدينة سراييفو اللي هي دلوقتي عاصمة البوسنة والهارسك واللي كتير بيحبوا يسموها القدس بتاعة أوروبا لإنها يمكن المدينة الأوروبية الوحيدة اللي حتلاقي فيها كنيسة كاثوليكية جنب اختها الأروثوذوكسية قصاد جامع وجنبه معبد يهودي .. الطلقة اللي بدأت الحرب طلعت من مسدس واحد صربي الأصل بس عايش في البوسنة عشان كده بيسموه بوسني صربي اسمه (جافريلو برنسيب) قتل بيها الأرشيدوق (فرانز فيرديناند) ولي عهد الإمبراطورية النمساوية المجرية يوم 28 يونيو 1914 .. عايزك بس تقرأ اعتراف (جافريلو برنسيب) وتقولي انت رأيك إيه .. جاهز .. “أنا قومي يوغوسلافي بحلم بتوحيد كل اليوغوسلافيين ومش فارق معايا شكل البلد دي حيبقي ايه بس هي لازم بلد حرة من الاحتلال النمساوي” .. بدأت تستوعب إن فكرة البلد اللي بتضم كل السلاف الجنوبيين كانت عايشه في دماغ ناس كتير من ضمنهم واحد صربي الأصل عايش في البوسنة وسط ناس أغلبهم مسلمين بس هو مسيحي أرثوذوكسي .. تاني .. هي بلد وجودها ضد المنطق بس ناس كتير مقتنعة بيه ومستعدة تقتل وتموت عشانه.
خلال الحرب النمسا احتلت صربيا والجبل الأسود والحكومة بتاعة البلد دي اللي كانت لسه يدوبك ملحقتش تفرح باستقلالها عن الدولة العثمانية لقت نفسها لازم تهرب من البلد وراحت عاشت في بريطانيا .. سنة 1917 ممثلين من شعوب البلقان اللي هم صربيا والجبل الأسود ودي الدول اللي وقتها كانت مستقلة بس محتلة دلوقتي قعدوا مع مع ممثلين شعوب البلقان اللي لسه تحت الاحتلال النمساوي اللي هم سلوفينيا و كرواتيا و فويفدينا و البوسنة والهارسك وفرح العمدة ده خلص بإن الكيانات دي كلها حتتحد مع بعضها في بلد جديدة لانج .. بلد حيسموها مملكة الصرب والكروات و السلوفينيين.
خلي بالك من نقطة .. الحرب العالمية الأولي خلصت سنة 1918 يعني القعدة اللي قعدها الوفود بتاعة شعوب البلقان دي مكنش ليها أي لازمة أو معني علي الأقل من وجهة نظر الحلفاء وأهم بلد فيهم هي انجلترا .. لكن .. لما الحرب خلصت وبدأت الإمبراطورية النمساوية المجرية تفك من بعضها فالانجليز كانوا بيزغرطوا .. شوية وقامت ثورات في فيينا اللي هي عاصمة النص النمساوي من الإمبراطورية وكمان بودابيشت عاصمة النص المجري ولعت .. شوية والجزء اللي انت عارفه دلوقتي باسم التشيك و سلوفاكيا اعلنوا استقلالهم .. وده فتح الباب لأولاً صربيا والجبل الاسود يستقلوا تاني من الاحتلال النمساوي بعد ما كانوا استقلوا عن الدولة العثمانية وبعد كده الكيان ده اللي هو صربيا والجبل الأسود بقوا هم وباقي دول البلقان دولة مستقلة .. بمعني اخر .. حلم دولة الشعب السلافي اتحقق .. مملكة الصرب والكروات و السلوفينيين بقت حقيقة تمسكها بايدك .. سنة 1929 الناس اللي عايشه في البلد دي بصوا لبعض في المراية وكلهم قالوا اللي هم حاسينه من جواهم بس مكسوفين يقولوه بصوت عالي .. اسم مملكة الصرب والكروات و السلوفينيين ده اسم يعر .. هم محتاجين اسم تاني يعبر عنهم .. ومن هنا اتغير اسم البلد بتاعتهم لمملكة يوغوسلافيا Kingdom of Yugoslavia .. الفكرة إن الاسم نفسه بيعبر عنهم .. هو مقسوم نصين .. يوج Yug ودي كلمة معناها الجنوب في اللغة السلافية .. سلافيني Slavini وده النطق بتاع الشعب السلافي لنفسهم .. يعني كلمة يوغوسلافيا دي ترجمتها هي بلد السلاف الجنوبيين.
من اليوم الأول لتكوين البلد دي وكانت فيه خناقة حولين هي يا تري البلد دي حتمشي ازاي والخناقة كانت أساساً يعني بين أكبر كيانين في البلد .. الصرب و الكروات .. الكروات عايزينها بلد فيدرالية بحيث كل حتة تمشي بدماغها .. الصرب عايزينها بلد مركزية .. كل ده مكنش مهم لإن اللي كان بيحكم يوغوسلافيا كانت ملكية ديكتاتورية .. سنة 1939 لما الحرب العالمية الثانية فرقعت في وش أوروبا كان اللي بيحكم مملكة يوغوسلافيا هو الأمير (بول) .. فيه منكوا بيهرش في شعره دلوقتي .. ازاي مملكة يحكمها أمير؟ مش المفروض يبقي ملك .. شطور .. سنة 1934 اغتيل الملك (أليكساندر الأول) واللي عشان ولي عهده (بيتر الثاني) كان لسه قاصر فالأمير (بول) كان هو القائم بأعمال الملك .. الفكرة إن من بدري أوي الأمير (بول) كان عارف حاجتين .. الأولانية إن مملكة يوغوسلافيا علي رادار النازيين وإن حيجي اليوم اللي (هتلر) يقول هذه لي .. الثانية إن القوات المسلحة اليوغوسلافية وقتها كانت مثيرة للضحك ومينفعش يتقالها دافعي عن البلد قصاد النازيين .. عشان كده يوم 25 مارس 1941 الأمير (بول) مضي معاهدة سلام مع النازيين في السر .. لسبب ما لا يعلمه إلا الله اليوغوسلافيين كانوا واخدين قلم في نفسهم لإن لما اتعرف إن الاتفاقية دي اتضمت الناس كانت بتغلي في الشارع .. ازاي احنا نمضي اتفاق سلام مع النازيين .. طب خليهم يجربوا يقربوا مننا كده .. مظاهرات ملت شوارع العاصمة بلجراد .. بعد توقيع المعاهدة بيومين عناصر من المخابرات البريطانية خططت لتنفيذ انقلاب عسكري ضد الأمير (بول) واللي ساب البلد مخضرة وراح بكامل حريته هو وعيلته لجنوب أفريقيا عشان يعيش في منفاه وإن ولي العهد (بيتر الثاني) اللي كان وقتها يدوبك عنده 17 سنة بقي هو الملك .. ومش بس كده .. المخابرات البريطانية خلت (بيتر الثاني) يطلع يعلن إلغاء معاهدة السلام مع النازيين.
وقتها الناس كلها في يوغوسلافيا متفهمش كانوا شاربين ايه عشان يرحبوا باللي حصل .. حتي الحزب الشيوعي اللي كان ممنوع من المشاركة السياسية طلع بيان بيرحب فيها بعودة الملك (بيتر الثاني) وإن ازاي يوغوسلافيا علمت علي قفا ألمانيا النازية .. طبعاً مش عايز اقولك إن (هتلر) كان بيطلع نار من ودانه .. في الوقت ده كانت القوات المسلحة النازية بتخطط لمساعدة الطليان في عملية غزو اليونان بس (هتلر) أمر بإن غزو اليونان يتركن علي جنب دلوقتي .. انا عايز يوغوسلافيا .. وزي ما الأمير (بول) توقع .. (هتلر) وقف وسط رجالته من قادة الفيرماخت وزعقلهم وهو بيشاور علي مكان يوغوسلافيا علي الخريطة .. هذه لي .. في أسبوعين كانت يوغوسلافيا تحت سيطرة النازيين عشان وهو بيجيله الخبر الأمير (بول) كان بيقول لنفسه كنتي سيبيه يمسكها يا فوزية .. في إبريل 1941 مملكة يوغوسلافيا اتقطعت حتت .. فيه حتة خدتها المجر اللي كانت حليفة لألمانيا النازية .. حتة تانية خدها النازيين .. حتة تالتة خدها الطليان اللي هم كمان كانوا صحاب النازيين .. اقف بقي هنا.
فيه ناس رأيها إن الحرب الأهلية اليوغوسلافية بدأت في التسعينات لإن ده الوقت اللي اليوغوسلافيين ضربوا نار علي بعض قدام الناس .. بس فيه رأي تاني عايز اعرضه عليك هنا هو إن الشرخ في العلاقات بين الصرب والكروات بدأ من بدري أوي .. بدأ من سنة 1941 لما البلد بقت تحت الاحتلال النازي .. الكروات مثلاً زي ما قلتلك كانوا متخانقين مع الصرب في رأيهم هو البلد حتروح علي فين أو حتمشي ازاي بس الخناقة دي مكملتش بسبب الغزو النازي .. اهو كتير من الكروات وقفوا في صف النازيين علي أمل إن لما ألمانيا تكسب الحرب فهي حتقف مع الكروات في اجبار الصرب إنهم يمشوا زي ما الكروات عايزين .. هوس الكروات بفكرة السيطرة علي مستقبل يوغوسلافيا خلاهم يعملوا كيان عسكري اسمه اوستاشا Ustasa والاوستاشا دول عملوا معسكر اعتقال اسمه يوزانا فاتس Josenavac .. معسكر الاعتقال ده كان بيتعمل فيه نفس جرايم التطهير العرقي اللي كانت بتحصل في اليهود والغجر والبولنديين في معسكرات الاعتقال النازي اللي يمكن اشهرها كان اشويتز بس علي مستوي خلي (هتلر) شخصياً يتدخل عشان يخفوا شوية من شغلهم .. ريحة الدم جابت (هتلر) من برلين لكرواتيا عشان يقولهم خفوا اللعب شوية .. الاوستاشا بمنتهي البساطة كان أي حد صربي أو يهودي أو مسلم يقع في ايدهم كانت ليلته سودا .. حتي الكروات اللي كانوا ضد الاحتلال النازي مسلموش من الاوستاشا .. علي الناحية الثانية أو الExtreme المضاد من الاوستاشا كان فيه التشيت-نيكس Cetniki اللي هم عايزين يوغوسلافيا فقط للصرب ويلعن ميتين أي قومية تانية .. بس سواء الاوستاشا أو التيشت-نيكس فهم دول كانوا الفئة المتطرفة أوي من اليوغوسلافيين والقليلة عدداً كمان واللي مش مدعومة غير من يدوبك 10% من السكان .. الغالبية العظمي واللي كانت مسيطرة علي الساحة كانوا الشيوعيين أو البارتيزان Partizani ودول اللي عايزين يوغوسلافيا لكل اليوغوسلافيين مش حتفرق إنت ابن مين أو عرقيتك إيه أو ديانتك إيه ودول اللي كسبوا حرب الاستقلال ضد النازيين.
فاكر لما قلتلك إن يوغوسلافيا دي هي صحيح بلد واحدة بس عايش فيها ناس كتير بديانات كتير ولغات كتير .. بس سبحان الله وجود بلدهم تحت الاحتلال خلاهم كلهم ايد واحدة تحت سيطرة الشيوعيين اللي كانوا أكبر قوة مسلحة في البلد .. بس زي ما اليوغوسلافيين قتلوا نازيين فهم كمان قتلوا بعض .. 340 ألف صربي ماتوا بايد الاوستاشا .. التشت نيكس سيحوا دم الكروات والمسلمين .. الشيوعيين سيحوا دمهم كلهم بالاضافة للنازيين .. لما جت سنة 1945 كان الشعب اليوغوسلافي لوحده من غير مساعدة حد كان طرد المجريين والنازيين والطليان من أرضه .. الفكرة إن رأس الحربة في حرب الاستقلال اليوغوسلافية دي كانوا الشيوعيين واللي كان طبيعي بعد ما الحرب ما خلصت ويوغوسلافيا استقلت إن خلاص بقي الملكية دي تروح في داهية تاخدها ويتم اعلان البلد جمهورية يوغوسلافيا الاشتراكية الفيدرالية .. من حيث العلم كل اللي حصل إنهم خدوا علم بلدهم اللي هو علم هولندا بس مقلوب ورزعوا فيه نجمة حمرا في النص.
(تيتو) .. زيه زي (أحمد السقا) كان عايز ينسي ماضيه:
أي بلد في الدنيا لازم يبقي ليها شوية حاجات من غيرها البلد مينفعش تبقي بلد .. منها مثلاً إن يبقي ليك حدود تعرف تدافع عنها .. منها إن يكون ليك علم بيعبرعنك وعن قيمة ومبادءك .. الأهم إن يبقي عندك قيم ومباديء أصلاً .. خد مثلاً مصر .. مصر هي جمهورية عربية ذات أغلبية سكانية مسلمة .. هل ينفع بكره الصبح مصر تبقي ملكية؟ هو احنا أصلاً ملكيين بس اسماً جمهوريين من ساعة ما بعد ثورة يوليو وبقي اللي يحكمنا قاعد علي الكرسي لحد ما يموت زي ما يكون ورثنا بالحياة بس هل ينفع مصر بكره الصبح تقرر متتكلمش عربي؟ .. هل ده أوبشن أصلاً .. هل ينفع بكره الصبح الشعب المصري عن بكرة أبيه يقرر إنه ميبقاش مسلم ويبقي بهائي مثلاً؟ .. إنت متخيل إن دي حاجة ممكن تحصل؟ .. نفس الكلام علي يوغوسلافيا .. دي بلد .. هل ليها حدود؟ الإجابة اه .. هل ليها علم؟ الإجابة برده اه .. بس هل ليها مباديء وقيم؟ .. تعالي نشوف .. يوغوسلافيا أو النسخة الجمهورية الإشتراكية من يوغوسلافيا اتبنت علي 3 قيم أو مباديء:
- أول حاجة إن الناس دي من أول يوم وهم عارفين إن يوغوسلافيا دي ميكس غريب من كذا عرقية وكذا ديانة .. صحيح كلهم بيتقال عليهم سلاف بس ده ميمنعش إن فيه اختلافات بينهم وهي دي الفكرة إن كل أقلية عرقية أو دينية جوه الكيان الكبير اللي اسمه يوغوسلافيا معترف بيهم ومفيش حد فيهم له مكانة زيادة عن حد تاني .. كلنا في الهوا سوا .. كلنا طلع ميتينا عشان نطرد النازيين من أرضنا .. احنا في حرب الاستقلال من النازيين مات لينا 1.7 مليون بني أدم .. الناس دي مماتتش هدر.
- ثاني حاجة إن هذه بلد اشتراكية اقتصادها في ايد الحكومة ومفيش حاجة اسمها إن حد يفتح البيزنس الخاص بيه .. مش شارك تانك هو .. صحيح مع الوقت بقي فيه حرية حركة شوية للحكومات الستة اللي بتتكون منها يوغوسلافيا بس علي الأقل اسماً يعني دي بلد اشتراكية يعني الشركات كلها قطاع عام .. مفيش حاجة اسمها سوبرماركت .. الناس تجيب اكلها من جمعيات استهلاكية زي اللي جيلي من مواليد الثمانينات لحقها وشافها في مصر.
- ثالث حاجة وهي الجزء الفيدرالي من اسم البلد .. يوغوسلافيا هي اتحاد من 6 جمهوريات كلهم زي بعض قدام القانون والجمهوريات دي هي سلوفينيا .. البوسنة والهارسك .. صربيا .. الجبل الأسود .. مقدونيا .. كرواتيا .. بعد كده طلع حتتين زيادة اللي هم فويفيدينا و كوسوفو ورغم إنهم جغرافياً جوه الحتة اللي اسمها صربيا بس ليهم حق الحكم الذاتي.
هنا بقي يجي دور هو مين الكبير أوي بتاع فرح العمدة ده وده حيجي دور إننا نتكلم عن بني ادم لو انت عايش في القاهرة فانت عارف اسمه كويس لإن متسمي علي اسمه يمكن واحد من أهم شوارع البلد .. (جوزيف بروز تيتو) .. الرجل ده كان هو يوغوسلافيا و يوغوسلافيا كانت هي (تيتو) .. هو اتولد في حتة اسمها كومورفيتس ودي قرية صغيرة علي الحدود بين سلوفينيا وكرواتيا لأم سلوفينية وأب كرواتي .. لما اجي انا اقولك إن (تيتو) كان ماشي بمبدأ إن احنا كلنا عيلة واحدة فانا هنا مش بكلمك عن لوجو دعائي في انتخابات أو كدبة تتباع للناس فيصدقوها .. هو حقاً وصدقاً كان مؤمن بده .. هو مؤمن إن اليوغوسلافيين عبارة عن عيلة واحدة وزي أي عيلة واحدة فزي ما مصارين البطن بتتعارك احنا كمان عادي نتعارك ونعور بعض بس لازم نسامح وننسي .. احنا في حرب الاستقلال ضد النازيين مات لينا 700 ألف بسبب التطهير العرقي بينا وبين بعض .. لازم نسامح عشان نتحرك لقدام .. الشيوعيين اللي هو كان قائدهم في حرب الاستقلال عن النازيين مش بعد ما الحرب ما خلصت كانوا بيجروا ورا الاوستاشا في الشوارع .. لا خالص .. هو حكم يوغوسلافيا تحت مبدأ اسمه الاخوية والوحدة أو براتسفو اي يدينتسفو .. وتاني ده مش مجرد لوجو .. ده مبدأ حياة .. حاجة شبه فكرة إن عندنا ناس كتير مش بتحب تفتح سيرة الفتنة الكبري مثلاً .. ده مجرد مثال يوريك إن (تيتو) كان من أنصار فكرة ما بلاش نتكلم في الماضي لإن الماضي كان كله دم ودموع و موت.
عايز بس اديلك لمحة عن قد إيه الرجل ده كان ماسك البلد في قبضة يده .. دلوقتي الشيوعيين هم اللي حكموا البلد من أول 1945 يعني المفروض المنطق بيقول إن يوغوسلافيا تترمي في حضن الاتحاد السوفيتي بس زي ما اتفقنا في الأول يوغوسلافيا بلد متعرفش المنطق .. سنة 1948 اتعمل اجتماع بين (تيتو) بصفته زعيم يوغوسلافيا مع (جوزيف ستالين) زعيم الاتحاد السوفيتي وفي القعدة دي بقي واضح للكل إن (تيتو) و (ستالين) كيميا بينهم مش راكبه .. يقوم (تيتو) يشتغل مع الرئيس (جمال عبدالناصر) الله يرحمه عشان يأسسوا سوا منظمة عدم الانحياز .. انت متخيل الجحود .. سنة 1980 لما (تيتو) مات حرفياً وبدون أدني مبالغة البلد فكت من بعضها .. مكنش فيه في يوغوسلافيا الشخصية اللي تقدرتملا الفراغ الكبير اللي هو سابه.
عشان كده السيستيم اللي اخواتك في يوغوسلافيا عملوه هو إنهم بدلوا منصب الرئيس بحاجة شبه المجلس الرئاسي .. دلوقتي يوغوسلافيا مقسومة ل6 جمهوريات وعليهم كمان منطقتين ليهم حق الحكم الذاتي يعني بتتكلم عن 8 حتت .. كل حتة حيبقي ليها حد ينوب عنها في المجلس فبدل ما كان القرار بيطلع من شخص واحد بقي يطلع من 8 .. انت متخيل العك .. يعني انا شخصياً مش مع فكرة إن السٌلطة كلها تتحط في إيد رجل واحد اللي هو السيستيم اللي عمله (تيتو) بس علي الأقل يعني ميزة السيستيم ده حاجة شبه فكرة القوامة في الجواز اللي في الأخر القرارات اللي عليها خلاف بتطلع في الاخر من رجل واحد وإلا القرارات المصيرية دي مش حتتاخد أصلاً ونفضل كلنا قاعدين مستنيين الفرج .. اهو تخيل دلوقتي جوازه فيها 8 أفراد ب8 عقليات و 8 أولويات .. طبيعي إن مفيش حاجة تتم .. بالعكس .. ده كل مشكلة المفروض إن المجلس ده يقعد يتكلم فيها ويحلها القعدة بتقلب لجولة من توجيه الاتهامات علي مين هو السبب في المشكلة ومبقاش هم الناس اللي في المجلس هو إنهم يلاقوا حل.
وعلي فكرة ده منطقي وانا مينفعش اقول إن لازم البشر في لحظات معينة يقلبوا ملايكة .. ده مش حيحصل .. بس لازم يبقي عندك الحكمة الكافية إنك تبقي عارف ده وعشان كده تحط سيستيم يحاول إنه يحجم رغبة البشر إنهم يكوشوا علي كل حاجة .. نرجع تاني لفكرة المجلس الرئاسي ده .. دلوقتي صربيا رغم إنها واحدة من الجمهوريات الستة اللي بتكون يوغوسلافيا بس هم شخصياً مش شايفين إن النموذج الفيدرالي ده مش جايب همه وبما إن صربيا هي أكبر جمهورية فيهم من حيث المساحة وعدد السكان فلازم القرار يطلع من صربيا ومش من حد تاني .. كوسوفو وفويفيدينا مثلاً زهقوا من فكرة إنهم بيتم التعامل معاهم علي إنهم أقاليم أو مناطق ليها حق الحكم الذاتي ومش جمهوريات مستقلة فهم ملهمش لا شغلة ولا مشغلة غير الزن علي فكرة عايزين نستقل عايزين نستقل .. سلوفينيا وكرواتيا لأسباب ليها علاقة بإن (تيتو) صحيح كان مسمي بلده جمهورية يوغوسلافيا الاشتراكية بس عشان هو رجل رايق مبيشغلش باله بالناس تقول عليه إيه فهو كان سايب كل جمهورية من الجمهوريات الستة تمشي اقتصادها زي ما هي عايزه و سلوفينيا وكرواتيا الاتنين طبقوا افكار رأسمالية حبتين فده خلي اقتصادهم طاير عن باقي الجمهوريات اللي بتتكون منها يوغوسلافيا وده خلاهم دايماً في أي قعدة عايشين دور ابن عمك اللي معاه فلوس اللي شايف باقي العيلة شوية فلاحين وشحاتين ومش بيبقي طايق نفسه في أي تجمع عائلي.
خليني من دلوقتي أهو اقولك انا رأيي إيه واللي ححاول اعرضه عليك هنا .. أصل مشكلة يوغوسلافيا هي الفلوس وبعد كده المشكلة تشعبت وخدت أشكال عرقية ودينية .. بس أصل المشكلة هي الإقتصاد .. ليه أنا بقول كده .. ناس كتير بتحمل (تيتو) مسئولية انهيار البلد والحقيقة إن الاتهام ده فيه تبسيط مستفز للأمور .. الرجل مات سنة 1980 .. الحرب الأهلية في يوغوسلافيا ولعت سنة 1991 يعني الدولة اليوغوسلافية كملت بعد وفاة (تيتو) 11 سنة كمان اللي هو اساساً يعني تلت عمرها اللي هي عاشته والرجل في الحكم .. فكرة إن حرب البوسنة أو الحرب الأهلية اليوغوسلافية قامت بسبب الكراهية العرقية دي اسطورة محدش عارف يموتها .. اه معاك كان فيه توتر قديم ودم ساح علي الارض بسبب الخناقات العرقية دي بس المشكلة الاساسية هي فشل رهيب في إدارة ملف الاقتصاد وإن محدش حب يشيل الليلة فرموها علي فكرة أصل الكروات والصرب والمسلمين بيكرههوا بعض.
المصادر:
- فيديو بعنوان The Breakup of Yugoslavia Explained نشر غلي YouTube وتقدر تتفرج عليه من اللينك ده:
(8247) The Breakup of Yugoslavia Explained – YouTube - فيديو بعنوان How to Destroy a State نشر علي YouTube وتقدر تتفرج عليه من اللينك ده:
How to Destroy a State - فيديو بعنوان The Yugoslav Wars: History, Hatred and War Crimes نشر علي YouTube وده لينك الفيديو تقدر تتفرج عليه:
The Yugoslav Wars – History, Hatred, and War Crimes
