لينك التسجيل الصوتي علي ساوند كلاود:
https://on.soundcloud.com/feRoC
مصطلح إفساد كرة القدم بالنسبة لينا كمشجعين كورة دايماً إرتبط تعريفه بإن نادي معاه فلوس يقدر يشتري لاعيبة كتير بسعر عالي ولا كأنهم ست بيت داخله سوبرماركت وبتشتري لاوازم البيت أول الشهر .. دايماً إفساد كرة القدم إرتبط في دماغنا بنادي زي بايرن ميونيخ الألماني اللي مفيش لاعيب جوه ألمانيا يطلع ويكون كويس إلا لما يشتروه حتي لو مش محتاجينه أوي .. الأهلي والزمالك عندنا بيعملوا كده بقالهم سنين وإنضملهم بيراميدز .. بس بداية ظهور المصطلح ده أنا فاكر كويس إنه بدأ ينتشر علي لسانا بداية من سبتمبر 2008 لما كلنا عرفنا إن عيلة (ال ناهيان) اللي هم العيلة اللي بتحكم أبوظبي عاصمة الإمارات إشتروا نادي مانشستر سيتي الإنجليزي .. فاكر إنت لما إشترو (روبينيو Robinho) من ريال مدريد ب38.7 مليون جنيه إسترليني ولاعيب من تحت بير السلم إسمه (جو Jo) إشتروه من سيسكا موسكو الروسي ب21.6 مليون جنيه إسترليني ومعاهم (نايجل دي يونج Nigel de Jong) الهولندي اللي جابوه من نادي هامبورج الألماني ب16.2 مليون جنيه إسترليني و(كريج بيلامي Craig Bellamy) الله يمسيه بالخير اللي إشتروه من ويستهام ب14 مليون جنيه إسترليني وكل ده في موسم 2008/2009 بس اللي هو يدوبك لسه (ال ناهيان) بيرشوا مياه.
مكنة الفلوس كملت بعزقة في المواسم اللي بعد كده لحد ما أخيراً ربنا فتح عليهم و خدوا الدوري الإنجليزي في موسم 2011/2012 لأول مرة من 44 سنة بالجون التاريخي اللي جابه (سيرجيو أوجويرو Sergio Aguero) يوم 13 مايو 2012 في كوينز بارك رينجرز في الدقيقة 93 .. لما إحنا كمشجعين كورة شفنا مانشستر سيتي وهو بيشتري (أوجويرو) من أتليتكو مدريد الإسباني ب36 مليون جنيه إسترليني وفي نفس الموسم يجيبلهم الدوري فده إنحفر في مخنا علي إنه تجسيد لمصطلح إفساد كرة القدم .. أنا نادي معايا فلوس بدفع فلوس عشان أشتري لاعيبة فشيخة بفلوس كتير عشان يجيبولي بطولات بقالي سنين محروم منها .. مانشستر سيتي خلانا نؤمن بإن لو إنت نادي معاك فلوس فإنت تقدر تشتري النجاح بفلوسك عن طريق إنك تصرف مبالغ مفيش حد يقدر يصرفها غيرك علي شرا لاعيبة علي أعلي مستوي عشان تجيبلك النجاح .. بداية من سبتمبر 2008 لما (ال ناهيان) إشتروا النادي لحد مايو 2012 اللي هو تاريخ أول بطولة دوري إنجليزي يكسبوها الناس دي صارفه أكتر من 1.1 مليار جنيه إسترليني .. في الموسم اللي السيتي خد فيه الدوري النادي صارف 127.5 مليون جنيه إسترليني وده كان وقتها رقم خزعبلي ومن هنا جه مصطلح إفساد كرة القدم.
لما سمعنا الخبر بتاع إن (ال ناهيان) إشتروا السيتي كلنا قلنا ااااه اللي معاه قرش ومحيره يشتري نادي ويصرف عليه .. كلنا قلنا إن الشيخ (منصور بن زايد) اللي هو بقي مالك النادي ده عيل معاه فلوس مش عارف يوديها فين فقال يشتري نادي ويبقي إسمه رئيس النادي راح رئيس النادي جه .. بس لاحظنا إن الشيخ (منصور) مبيحضرش ماتشات ومش بنشوف وشه .. وإزاي أساساً نشوف وشه وهو شغلانته الأساسية مخلياه مش عارف يعمل حاجة تانية .. للناس اللي متعرفش الشيخ (منصور) هو اللي ماسك شركة مبادلة Mubadala وكمان هو اللي ماسك مكتب الشئون الاستراتيجية Executive Affairs Authority في أبوظبي اللي بتتسمي إختصاراً EAA ودي فرع من الحكومة الإماراتية اللي مسئولة عن التخطيط للاستثمارات الاستراتيجية لأبوظبي .. وهنا إنت محتاج تفهم إن شراء الشيخ (منصور) للسيتي مكنش مجرد هواية أو واحد معاه فلوس مش عارف يوديها فين .. أبوظبي شايفه شراءها للسيتي استثمار استراتيجي هدفه هو تحسين علاقاتها مع الغرب وخصوصاً بريطانيا .. بلاش الشيخ (منصور) .. رئيس النادي اللي هو (خلدون ال مبارك) كان رئيس الوزراء بتاع أبوظبي .. إيه اللي يخليك تمسك رئيس الوزراء بتاعك إدارة حاجة إنت بتعتبرها هواية مضيع عليها فلوسك؟
اللي حتكلم عنه النهاردة هو إزاي المكنة دي بتشتغل .. إسم مانشستر سيتي دايماً في دماغك مربوط بصورة الشيخ (منصور بن زايد ال ناهيان) رئيس النادي واللي ممكن متبقاش عارف هو مين بس لما بتشوف صورته بتقول عليه هو مش ده بتاع أبوظبي اللي شاري مانشستر سيتي .. الشيخ (منصور) ده مجرد الواجهة .. ورا الكواليس فيه مكنة كبيرة أوي هي اللي بتمشي السيتي .. الراعي الرسمي للنادي هي شركة طيران الإتحاد الإماراتية اللي بيملكها الأخ غير الشقيق للشيخ (منصور) .. الشركات اللي ماضية عقود رعاية مع النادي هي شركة الإتصالات بتاعة أبوظبي إتصالات Etisalat ومعاها هيئة السياحة بتاعة أبوظبي والثالثة تبقي شركة أبار Aabar للاستثمارات البترولية ودي شركة إماراتية كبيرة .. المكنة الكبيرة دي عشان تفهمها لازم يبقي معاك ورقة وقلم وألة حاسبة وتفضل وراها وغالباً الموضوع بيبقي معقد ومبيتفهمش وخليني أديلك مثال بسيط علي كده .. شايف الجدول اللي تحت ده علي طول .. الجدول ده بيوريك كم الفلوس اللي إتصرفت علي نادي مانشستر سيتي لحد مايو 2012 وحتلاقي في الأخر الرقم النهائي هو ال1.1 مليار دولار اللي قلت ان (ال ناهيان) صرفوها علي النادي لحد التاريخ ده .. لما تبص علي الأرقام اللي في الجدول مش حتفهم حاجة .. لما القصة اللي ورا الجدول تتحكالك حتلاقي نفسك بتهرش في شعرك وبتقول يا ولاد التييييييييت.
عشان تفهم القصة لازم أرجعك تاني ليوم 13 مايو 2012 اللي هو اليوم اللي مانشستر سيتي حسم فيه لقب الدوري الإنجليزي لأول مرة من 44 سنة .. في الفترة دي اللي كان بيدرب الفرقة واحد إكسلانس في نفسه أوي إسمه (روبيرتو مانشيني Roberto Mancini) .. الرجل ده قبل ما يجي يدرب السيتي كان الCV بتاعه فعلاً تقيل .. هو كان كاسب بطولة الدوري الإيطالي 3 مرات وكاسب كأس إيطاليا 4 مرات اللي هو كان (ال ناهيان) جايبينه عشان يكسب الدوري الإنجليزي مش عشان حاجة تانية لإنه كان تخصص دوريات .. الرجل ده جه في موسم 2009/2010 ولما جه خلي النادي يشتريله فرقة كاملة .. في أيامه السيتي إشتروا (إيدن دزيكو Eden Dzeko) من وولفيسبورج الألماني ب33.3 مليون جنيه إسترليني .. إشتروا (يايا توريه Yaya Toure) من برشلونة ب27 مليون جنيه إسترليني .. إشتروا (ماريو بالوتيلي Mario Balotelli) من إنترميلان ب26.55 مليون جنيه إسترليني وفوقهم (ديفيد سيلفا David Silva) من فالنسيا ب25.88 مليون جنيه إسترليني .. وهو اللي شاري (أوجويرو) وإشتري لاعيبه كتير أوي .. بإختصار (مانشيني) كان مراتك اللي كل ما تنزل معاك كارفور ترجعك مفلس .. المشكلة ظهرت الموسم اللي وراه 2012/2013 .. في الموسم ده السيتي معرفش يحافظ علي اللقب واللاعيبه مبقتش طايقه (مانشيني) وحاجة زفت يعني .. المهم إن (ال ناهيان) أو خلينا نقول الشيخ (منصور) قرر إنه يمشي (مانشيني) .. الناس قالوله حقك يا ريس .. بس فجأة متفهمش إزاي طلعلتلهم لايحة اللعب المالي النظيف Financial Fair Play أو FFP إختصاراً زي الخازوق اللي محدش كان عامل حسابه عليه.
الFFP دي لايحة جديدة حطها الإتحاد الأوروبي لكرة القدم اللي هو يويفا UEFA تقريباً في نفس الوقت اللي صدر فيه قرار إقالة (مانشيني) .. اللايحة دي بإختصار شديد كانت عايزة تحمي الأندية الأوروبية من إنها تفلس بسبب إنها بتصرف فلوس أكتر بكتير من الأرباح اللي بتجيلهم وده بيخلي الأندية تتداين ومبتعرفش تسدد .. المشكلة خد باله منها المدير المالي للنادي (جورجي شوميلاس Jorge Chumillas) اللي إكتشف إن عشان النادي يمشي (مانشيني) لازم يدفعوله الشرط الجزائي بتاعه اللي هو كان 9.9 مليون جنيه إسترليني وده معناه إن الحسابات بتاعه النادي حتطلع بخسارة قيمتها المبلغ ده لإن الحسابات كانت مضبوطة بالشعرة وقرار الإقالة طلع فجأة ومحدش من الحسابات كان عامل حسابه عليه .. الحل إن بقدرة قادر متفهمش إزاي لازم النادي يلاقي شركة تمضي معاه عقد رعاية بمبلغ أكبر من 9.9 مليون جنيه إسترليني عشان يدوبك حسابات النادي تطلع مضبوطة علي الشعرة زي الأول.
فيه ناس منكوا دلوقتي بتسأل نفسها هو ده بينفع؟ .. الحقيقة إنك عشان تجاوب علي السؤال ده لازم تفهم الأول هو أي نادي طبيعي في الدنيا بيشتغل إزاي؟ .. لنفترض إن نادي طبيعي زي الإتحاد السكندري مثلاً جابوا مدرب بيفهم خلي الفرقة تلعب كورة قدم حلوة أوي وبقي بينافس الأهلي والزمالك .. لإن ماتشات الإتحاد متزاعة علي التليفيزيون ففيه شركات بتروح للنادي تمضي معاه عقود رعاية عشان يبقوا Sponsors للنادي .. الفلوس دي بتتحط علي ميزانية الفرقة وبتتصرف علي شراء اللاعيبة .. لو النادي صرف أكتر من الميزانية المحطوطة فساعتها النادي بيقول إنه طلع خسران وبيحاول الموسم اللي وراه إنه يعوض الخسارة دي إنه يبيع شوية لاعيبة من اللي عنده .. ده أي نادي طبيعي في الدنيا بيشتغل كده .. الفرق إن السيتي الرعاة والملاك بتوعه كلهم أسرة مع بعضيهم .. لا هم فعلياً أسرة مع بعضيهم .. هم فعلاً قرايب.
لما حصل الموقف بتاع (مانشيني) كل اللي السيتي عملوه بناء علي فكرة قالها المدير التنفيذي للنادي (فيران سوريانو Ferran Soriano) إنهم مضوا عقود رعاية جديدة بتتنفذ بأثر رجعي .. اللي حصل إن الرعاة دفعوا فلوس للنادي كمكافأة لفوزهم ببطولة الكأس اللي هو أساساً السيتي مكنش لسه كسبها .. لما الموسم خلص و(جورجي شوميلاس) اللي بفكرك إنه المدير المالي للنادي يعني الرجل بتاع الحسابات قدم ورقه للإتحاد الأوروبي لكرة القدم كان الورق بيقول إن شركة طيران الإتحاد دفعت 1.5 مليون وشركة أبار دفعت 0.5 مليون وهيئة سياحة أبوظبي دفعت 5.5 مليون جنيه إسترليني كمكافأة فوز ببطولة الكأس .. الفلوس دي إتضافت بسبب تعديلات في عقود الرعاية الشركات مضتها مع النادي وشوف يا أخي الصدف العقود إتعدلت في نفس التوقيت اللي لوائح FFP بدأت تتطبق .. هوبا ولا كأننا قاعدين في مدرسة هوجوارتس لتعليم السحر بتاعة (هاري بوتر Harry Potter) السيتي طلع ورقه سليم وقدر يتحايل علي لايحة FFP.
تاني المشكلة كلها إن فيه خازوق إسمه FFP .. خليني برده أفهمك ليه ده خازوق بس بمثال تاني .. سنة 2010 لما السيتي مضي عقد الرعاية مع شركة أبار للاستثمارات البترولية كان العقد بيقول إن الشركة حتدفع للنادي 15 مليون جنيه إسترليني سنوياً .. اللي عرفناه بعد كده إن المبلغ الحقيقي اللي حيتدفع هو 3 مليون جنيه إسترليني بس وال12 الباقيين حيجوا من جيب الشيخ (منصور بن زايد) شخصياً .. وهنا المشكلة .. FFP بتقول إن عشان السيتي يروح يشتري لاعيبه بملايين لازم يجيب الفلوس دي من عقود الSponsors فده معناه إن لازم الفلوس اللي الشيخ (منصور) بيدفعها من جيبه لازم علي الورق الرسمي تتحط كأنها جزء من عقد رعاية .. ومش أبار لوحدها .. شركة طيران الإتحاد الورق الرسمي بتاع حساباتها هي بيقول إن عقد الرعاية بتاعها مع النادي ب8 مليون جنيه إسترليني سنوياً بس الحسابات بتاعة النادي بتقول إن الشركة بتدفع 35 مليون جنيه إسترليني .. الفرق ده بيجي من جيب الشيخ (منصور) برده .. بس الموضوع مش بسيط زي ما إنت بتقرأ كده .. المكنة دي تفاصيلها كتير ومعقدة فحاول تركز معايا ومتوهش وأنا ححاول أشرح الموضوع بشكل مبسط.
مبدأياً أي كلام له علاقة بالفلوس بين أي شركة إماراتية وبين النادي بيتم عن طريق حاجة إسمها Abu Dhabi United Group أو مجموعة أبوظبي المتحدة وإختصاراً بتتسمي ADUG .. البتاعة دي تبقي شركة كبيرة أوي مملوكة للشيخ (منصور) والADUG هي اللي بتملك النادي .. الفلوس بتروح وتيجي عن طريق تحويلات بنكية بس بتبقي عن طريق وسطاء .. يعني مثلاً سنة 2015 كان النادي قدام الناس كلها بيخشله 67.5 مليون جنيه إسترليني كفلوس عقد الرعاية اللي النادي ماضيه مع شركة طيران الإتحاد .. اللي ورا الكواليس إن شركة طيران الإتحاد بتدفع 8 مليون جنيه إسترليني في السنة بس بيتحولوا بشكل مباشر عن طريق البنك من حساب الشركة لحساب النادي .. الباقي اللي هم 59.5 مليون جنيه إسترليني بيطلعوا من الحساب الشخصي بتاع الشيخ (منصور) أو من حساب شركاته التانية ويقعدوا يلفوا علي شركات كتير في سلسلة من التحويلات البنكية لحد ما في الأخر يروحوا لحساب شركة طيران الإتحاد .. بعد كده الشركة تقوم محولة الفلوس مباشرة لحساب النادي.
من سنة 2010 والناس بتوع السيتي عارفين إن فيه مصيبة جايالهم في السكة مع تطبيق لايحة FFP في 2013 .. هم كانوا عارفين إن Business النادي كله قايم علي فلوس الشيخ (منصور) .. ده رجل عنده يخت بمنصتين هبوط طيارات هليكوبتر دفع فيه 500 مليون يورو وعنده 5 عربيات بيوجاتي فيرون Bugatti Veyron .. مش بقر عليه ولا بحسده بس بالورقة والقلم الرجل ده في أول أربع سنين من شراه للنادي دفع من جيبه الشخصي 1.1 مليار دولار في السنة الواحدة .. كان فيه كذا حل علي فكرة .. كان ممكن يبدأوا يدوروا علي مصادر دخل تانية بعيدة عن فلوس الشيخ (منصور) .. كان ممكن يقللوا شوية من مصاريفهم .. كان ممكن يبطأوا شوية من طموحاتهم بحيث يهدوا علي نفسهم وبالتالي كم الفلوس اللي هم بيصرفوها هي كمان حتقل .. كان قدامهم فترة 3 سنين يبدأوا يشوفوا حل كويس ويطبقوه بس هم إتدلعوا او خلينا نقول عملوا زي أي طالب عنده إمتحانات فاينال لما قال لنفسه أنا جامد وحعرف ألم المنهج كله قبل الإمتحان بيومين .. في موسم 2010/2011 النادي صرف 140 مليون يورو علي الصفقات الجديدة .. الموسم اللي وراه إتصرف 90 مليون يورو .. الفلوس عمت تفكير ناس كتير من اللي بيمسكوا واللي بيشجعوا النادي والصراحة أنا مش قادر ألومهم .. ده نادي قبل سنة 2008 كان في مزبلة التاريخ ودلوقتي بقي معاهم فلوس تخليهم يشتروا لاعيبة زي (أوجويرو) و(ماريو بالوتيلي) و (كارلوس تيفيز Carlos Tevez) .. سنة 2012 يعني قبل سنة واحدة من تطبيق اللايحة بتاعه FFP كان فيه ناس جوه قسم الحسابات بتاع النادي صوتها إتنبح من كتر الزعيق .. يا جدعان إحنا لو كملنا بعزقة فلوس بالشكل ده حيتوقع علينا عقوبات .. وسط حالة الرعب اللي جت فجأة لإدارة السيتي قعدوا يسعوا في كذا إتجاه عشان يلحقوا نفسهم.
عندك مثلا المدير التنفيذي (فيران سوريانو) اللي طلب يعمل إجتماع عاجل لحاجة إسمها European Club Association أو ECA وده يبقي إسمه إتحاد أندية أوروبا وده عبارة عن إن كل أندية أوروبا يبعتوا حد منهم يتقابلوا علي قهوة عشان لو حد فيهم عايز حاجة .. وفي القعدة دي (سوريانو) عرض عليهم فكرة إن أندية أوروبا تقف قصاد (ميشيل بلاتيني Michel Platini) رئيس UEFA وقتها عشان يوقفوا تطبيق FFP بس يا عيني الرجل إتصدم لما إكتشف إن فيه أندية أوروبية كتير خصوصاً الأندية الصغيرة فرحانة أوي بتطبيق FFP وفيه أندية تانية كانت مش عايزة FFP تتطبق بس مش عايزين يقولوا كده قدام الناس عشان ميبقاش شكلهم وحش .. المهم إن (سوريانو) إقتنع إن إدارة النادي لازم تتصرف لوحدها عشان تلحق نفسها وهنا جت فكرة طب ليه لا نعمل System عشان نمشي الفلوس بتاعتنا اللي رايحة واللي جايه فيه بحيث إن الSystem ده يبقي معقد لدرجة إن خسايرنا تختفي فيه وفي الأخر لما تيجي تمسك الحسابات بتاعة النادي تلاقيها فلة شمعة منورة .. الSystem ده لو عايز تفهمه تخيل إن مانشستر سيتي شركة وبقي بيبعت شغله كله Outsourcing و Subcontracting يعني يدي شغله مقاولة لشركات تانية من الباطن .. عارف إنك مش فاهم فخليني أديلك مثال.
دلوقتي لو النادي الأهلي مثلاً عامل إتفاق رعاية مع شركة زي فودافون فمن ضمن الحملات الإعلانية اللي بتنزل إن النادي يجيب شوية لاعيبة من الفرقة يصورهم جنب بعض مع اللوجو بتاع فودافون .. عشان ده يتم الأهلي لازم يدفع للاعيبه اللي حتتصور لإن ساعتها النادي بيشتري الMarketing Rights اللي هي حقوق التسويق بتاعة اللاعيب .. مش الأهلي بس اللي بيعمل كده كل أندية العالم بتعمل كده .. اللي عمله السيتي بقي إنه جاب شركة من بره إسمها شركة فوردام للإدارات الرياضية Fordham Sports Management تمسكله الليلة .. الشركة دي هي اللي علي الورق بتدفع فلوس الMarketing Rights للاعيبة وده خلي جزء محترم من الفلوس اللي بتتصرف كل موسم وبتتحمل علي ميزانية النادي تتشال .. اللي أهم من كده إن الشركة دي قدام الناس وعلي الورق الرسمي برده بتدفع للسيتي 30 مليون يورو كل سنة .. كده ورقنا سليم وميخرش المياه .. الليلة دي كلها إتسمت مشروع القوس الطويل Project Longbow وده بقي إسمها جوه إدارة السيتي .. بس كأي خطة تهرب مالي زي دي لازم اللي يمسكها ناس من بره النادي .. يعني مينفعش لا (سوريانو) بصفته الرئيس التنفيذي ولا (خلدون ال مبارك) بصفته رئيس النادي ولا حتي الشيخ (منصور) بصفته مالك النادي ينفع أساميهم يبقي علي الورق .. الحل إنك تكمل في سكة الOutsourcing وإنك زي ما جبت شركة تمسكلك الMarketing Rights تجيب شركات من بره تديريلك الليلة وهنا حتكتشف إن مع الوقت Project Longbow ده قعد يكبر يكبر يكبر لحد ما وصل لمرحلة إن محدش بقي عارف يلمه ولا حد بقي عارف الحقيقة فين.
بداية إن Project Longbow ده يبدأ يخرج عن السيطرة كانت لما إدارة السيتي إتكلمت مع واحد إسمه (ديفيد رولاند David Rowland) وإبنه (جوناثان Jonathan) .. الرجل كان بيزنس مان له إسمه في السوق وكان حيتعين سكرتير مالي لحزب المحافظين اللي هو دلوقتي الحزب الحاكم في بريطانيا بس هو تراجع عن إنه يقبل المنصب لما الصحافة كشفت إنه بيتهرب من دفع الضرايب بقاله سنين .. يعني ده رجل أونطجي ونصاب .. أهو النصاب الأونطجي ده يبقي صاحب الشيخ (منصور بن زايد) .. طب إيه اللي يخلي إدارة السيتي تروح للرجل ده وإبنه؟ .. بص يا سيدي .. كان فيه بنك في أيسنلدا ودي دولة في أوروبا فوق خالص جنب القطب الشمالي إسمه بنك كاوبت-هينج kaupthing Bank والبنك ده سنة 2008 لما حصلت الأزمة المالية العالمية إنهار وإتباع خردة واللي إشتروا البنك ده كان الأخ (ديفيد رولاند) وإبنه وغيروا أسمه بقي بنك هافي-لاند Banque Havilland والبنك ده بقت شغلته غسيل الأموال والتهرب الضريبي .. البنك ده بقي بيكبر بسرعة الصاروخ وبقي له فروع في لوكسمبورج وليختنشتاين وجزر البهاماز وسويسرا .. برده أنا مفهمتش إيه اللي يخلي إدارة السيتي تروحلهم؟ .. حقولك .. فاكر شركة Fordham Sports Management اللي قلتلك إن السيتي جابها عشان تمسكله الMarketing Rights للاعيبة؟ أهو الشركة دي مملوكة لبنك Banque Havilland و ياريتها بتملكها بشكل مباشر دي شركة بتملك شركة بتملك شركة زي ما إنت حتشوف في الFlow Chart دي.
متتخيلش إن الإتحاد الأوروبي لكرة القدم كان نايم علي ودانه .. بالعكس .. سنة 2014 إتفتح تحقيق مع مانشستر سيتي وباريس سان جيرمان بس سبب إن UEFA أساساً طلب يفتح تحقيق هو إنهم لما بصوا علي ورق الحسابات بتاعة السيتي إكتشفوا إن النادي بيعمل Outsourcing كتير ودي كانت أول مرة المحاسبين بتوع الإتحاد الأوروبي يشوفوا حاجة زي دي فشكوا إن يكون فيه حاجة غلط مع إن الحسابات متخرش المياه .. لما UEFA حب يفرض عقوبات فإدارة الناديين هددوا بإنهم حيرفعوا قضية علي UEFA ولإن فعلاً الأدلة كانت ضعيفة أوي ف(جياني إنفانتينو Gianni Infantino) اللي كان وقتها السكرتير التنفيذي لUEFA وحالياً هو رئيس الإتحاد الدولي لكرة القدم FIFA إقترح إن يتوقع عقوبات مالية بسيطة علي الناديين كقرصة ودن يعني والناديين قبلوا والموضوع إتلم علي كده.
إدارة السيتي مبتحبش يتقالها لا .. في أغسطس 2015 النادي كان حاطط عنيه علي (كيفين دي بروينه Kevin De Bruyne) صانع الألعاب البلجيكي اللي كان بيلعب وقتها في نادي وولفيزبورج الألماني وخد معاهم بطولة كأس ألمانيا .. نادي وولفيزبورج كان عارف إن (دي بروينه) بقي عليه الطلب وممكن يطلبوا فيه سعر عالي أوي وعشان كده رفضوا ال50 مليون اللي السيتي عرضها في الأول .. في سبتمبر 2015 السيتي خد اللاعب ب75 مليون وده يوريك إزاي إن نادي زي وولفيزبورج الألماني اللي هو نادي بتصرف عليه شركة Volkswagen الألمانية بتاعة العربيات واللي بتبيع في السنة أكتر من 200 مليون عربية برده ميقدرش يقف قصاد قوة وإغراءات السيتي .. السر اللي ناس كتير أوي عارفاه إن نادي بايرن ميونيخ الألماني كان عايز يشتريه هو و(ليروي ساني Leroy Sane) جناح منتخب ألمانيا .. وكيل أعمال اللاعب قعد مع مندوبي البايرن وقعد مع مندوبي السيتي وسمع عرضهم .. حط نفسك مكانه وإنت بتسمع عرض السيتي .. إنت وكيل أعمال لاعب لسه صغير عنده 20 سنة وجالك نادي إنجليزي قالك إنه حيدي اللاعب بتاعك 28 مليون يورو فلوس في إيده كمرتب علي مدي 3 سنين .. عرض زي ده بايرن ميونيخ بجلالة قدره ميقدرش يقدمه.
بلاش تتخيل إن الإمارات أو أبوظبي أو ال(ناهيان) هم السبب في كل المصايب اللي بتحصل لإن ده مش حقيقي .. أندية إنجلترا بقي في إيدها فلوس تخليها تشتري اللي هم عايزينه .. مثال بسيط علي كده إن سنة 2018 السيتي جاله من بث ماتشات الدوري الإنجليزي 170 مليون يورو وده كان نصيب النادي من التورتة .. عايزك تعرف إن ال170 مليون دول يبقوا أكتر ب75% من الفلوس اللي بياخدها نادي بايرن ميونيخ سيد معلمين ألمانيا من بيع ماتشات الدوري الألماني .. الفلوس دي اللي بعيد عن أيا كان مين اللي بيملك النادي مخليه أندية إنجلترا تقدر تدفع مرتبات خرافية محدش يقدر ينافسهم فيها .. معلش لاعب زي (إليكاي جوندوجان Ilkay Gundogan) جميل وبيفهم كورة وكل حاجة حلوة بس مبيلعبش أساسي ومش ده اللي يتدفعله مرتب شهري 11 مليون يورو .. دي نقطة .. النقطة الثانية إن سيتي مش مجرد نادي واحد .. دي معلومة ممكن تصطدم ناس كتير بس السيتي دول كذا نادي مع بعض.
عشان تفهم النقطة دي تخيل إن السيتي وستارباكس Starbucks حاجة واحدة .. إنت بتروح ستارباكس بتاع مول مصر تشرب قهوتك وحتلاقيه هو هو ستارباكس بتاع مول سان ستيفانو في الإسكندرية لإنهم نفس الماركة أو البراند Brand .. الBrand بتاعة السيتي بقي إسمها City Football Group أو CFG إختصاراً .. الأندية اللي شايله الBrand بتاعة CFG هي مانشستر سيتي في إنجلترا ونيويورك سيتي في أميركا وميلبورن سيتي في أستراليا .. غيرهم فيه أندية تانية علي مستوي العالم CFG مش بتملكها كلها بس بتملك حصة محترمة من أسهمها اللي هم نادي جيرونا الإسباني ويوكاهاما مارينوز الياباني وكلوب أتليتيكو توركي الأوروجواياني .. الفلسفة ورا الخطوة دي إنك تحقق كذا حاجة في بعض .. مبدأياً السيتي مش عايز يحصر فرصته إنه يلاقي (ليونيل ميسي Lionel Messi) الجديد وسط ناشيء مانشستر سيتي بس .. إنت عايز يبقي ليك أكاديميات في كذا حتة في العالم عشان لو طلع اللاعيب السوبر تلقطه من ولسه هو ناشيء .. أحياناً لاعيبة بتحتاج تاخد خبرة ماتشات لحد ما تبقي جاهزة تلعب في السيتي وده حيتحقق من شراكتهم مع نادي جيرونا الإسباني مثلاً لإنه بيلعب في الدوري الممتاز الإسباني .. طبعاً ده غير العائد المادي لإن لو مثلاً شركة زي نيسان Nissan بتاعة العربيات حبت تمضي عقد رعاية مع السيتي فهي حتمضيه مع 6 أندية في 6 دول مختلفة فطبعاً ده حيخلي ثمن الصفقة يتضرب في 6 .. إنت متخيل حجم الفلوس اللي أنا بتكلم عنها؟
عشان أنا طولت عليك أوي في المقالة دي فخليني أختم بإنك لو حبيت تقيم التجربة بتاعة السيتي فإنت محتاج تبصلها من وجهتين نظر مختفلين شوية:
- أول نقطة هي الفلوس .. الشيخ (منصور) من سنة 2008 لحد دلوقتي صارف من جيبه أكتر من 2 مليار دولار وده مبلغ كبير فشخ بس زي ما إنت شفت الفلوس دي كلها إتصرفت بأساليب غير قانونية وغير شرعية أحياناً .. فوق ده كله إن صحيح النادي أو خلينا نقول مجموعة CFG بقت بتجيب فلوس يعني أرباحهم السنة اللي فاتت كانت 10 مليون جنيه إسترليني بس يظل ده رقم قليل أوي لو قارنته بالفلوس اللي إتصرفت والفلوس اللي حتتصرف .. علي الناحية التانية مهم إنك تكون فاهم كويس إن الشيخ (منصور) إشتري السيتي سنة 2008 ودفع فيه 100 مليون جنيه إسترليني .. سنة 2015 باع 13% من أسهم النادي لواحد إسمه (لي رويجانج Li Ruigang) تقدر تسميه (نجيب ساويرس) بتاع الصين ودفع فيهم 265 مليون دولار .. خلال 10 سنين بس قيمة نادي مانشستر سيتي في السوق زادت بنسبة 10% .. يعني فيه فلوس بتتصرف وبتتعوض من ناحية تانية.
- تاني نقطة هي البطولات أو خليني أكون دقيق أكتر وأقول الماتشات اللي الفرق اللي تحت راية CFG بتكسبها واللي الحقيقة في رأيي إنت محتاج تسقفلهم كتير .. خد عندك نادي زي جيرونا سنة 2018 إتأهل لأول مرة للدوري الإسباني وبسم الله ما شاء الله خلص الموسم في نص الجدول ودي حاجة كويسة أوي لنادي لسه صاعد دوري ممتاز .. فرقة أتليتيكو توركي في أوروجواي صعدت دوري ممتاز .. فرقة ميلبورن سيتي اللي بتلعب في الدوري الأسترالي يدوبك بعد ما مجموعة CFG إشترت النادي ب3 سنين كسبوا أول لقب دوري أسترالي.
أنا كده خلصت .. عرضتلك الحقايق المتاحة وقلت رأيي .. اللي فاضل إنك تكون رأيك الشخصي.
المصادر:
سلسة تحقيقات صحفية إتنشرت في جريدة Der Spiegel الألمانية بعنوان Manchester City Exposed إتقسمت علي 4 أجزاء ودي لينكات الأجزاء الأربعة:
- الجزء الأول بعنوان Bending the rules to the tune of millions يعني التلاعب علي القواعد بالملايين وده لينك المقالة الأصلية:
http://www.spiegel.de/international/manchester-city-exposed-bending-the-rules-to-the-tune-of-millions-a-1236346.html - الجزء الثاني بعنوان The secret: Project Longbow يعني السر: مشروع القوس الطويل وده لينك المقالة الأصلية:
.spiegel.de/international/manchester-city-and-the-fight-against-financial-fairplay-a-1236347.html - الجزء الثالث بعنوان Recruiting Pep Guardiola يعني تعيين (بيب جوارديولا) وده لينك المقالة الأصلية:
http://www.spiegel.de/international/world/manchester-city-exposed-chapter-3-recruiting-pep-guardiola-a-1236621.html - الجزء الرابع بعنوان A Global Empire يعني إمبراطورية عالمية وده لينك المقالة الأصلية:
http://www.spiegel.de/international/world/manchester-city-exposed-chapter-4-a-global-empire-a-1236622.html
