موضوعنا النهاردة اللي حنتكلم عنه هو نادي مانشستر سيتي الإنجليزي .. النهاردة إحنا مش حنتكلم عن قد إيه (بيب جوارديولا Pep Guardiola) مدير فني عبقري أو إن إزاي الفريق بيلعب كرة قدم مختلفة عن كرة القدم اللي إتعودنا عليها .. إحنا مش حنجيب سيرة لا هم جابوا كام جون ولا هم حيكسبوا كام بطولة السنة دي .. إحنا أساساً مش حنتكلم عن كرة القدم أصلاً .. إحنا كلامنا حيبقي عن الBusiness بتاع مانشستر سيتي .. عشان تبدأ تفهم إحنا إزاي حنتكلم عن الموضوع ده فإحنا حنحكي قصة والقصة دي ليها 3 أبطال حياة كل واحد فيهم كانت ماشية في سكة لحد ما الثلاثة إتقابلوا في مرحلة وقرروا إنهم يشتغلوا مع بعض عشان يخلوا مانشستر سيتي ماركة أو Brand زي ماكدونالدز كده وزي ما ماكدونالندز هو أكبر ماركة Fast Food في العالم فالثلاثة دول عايزين مانشستر سيتي يحولوه لأكبر نادي في العالم .. الناس دي طموحها إنهم يبقوا أكبر من ريال مدريد ومانشستر يونايتد وبرشلونة والناس دي ناوية إنها تغزو العالم.
خلينا نبدأ بأول واحد وأهم واحد اللي هو (فيران سوريانو Ferran Soriano):
ده رجل إتولد لأسرة متوسطة بس مش فقيرة أوي في حي إسمه بوبلينو Poblenou في مدينة برشلونة الإسبانية .. أبوه كان شغال حلاق رجالي .. أساساً هو مكنش لاعب كرة قدم ده كان بيلعب راجبي بس قدر إنه يكبر لحد ما بقي ضمن مجلس إدارة نادي برشلونة وصدقني لو قلتلك إن الرجل ده هو اللي بني فريق برشلونة بتاع موسم 2008-2009 اللي إكتسح كل بطولات العالم وقدر إنه يفوز بالسداسية اللي هم البطولات ال6 المتاحة ليهم في الموسم .. في الفترة من 2003 لحد 2008 كان (فيران سوريانو Ferran Soriano) مسئول عن كل صغيرة وكبيرة في حسابات نادي برشلونة .. سنة 2003 الرجل ده كان شايف إن النادي في أزمة ومحتاج فريق من ناس بتفهم إنها تطلعه من أزمته فهو شكل فريق يدخل إنتخابات النادي برئاسة (خوان لابورتا Juan Laporta) والفريق ده شكله وشغله كأنه فريق حملة إنتخابية رئاسية في أميركا .. نفس الفكر ونفس طريقة صرف الفلوس .. البرشلونيين إنبهروا بالحملة الإنتخابية بتاعة الفريق ده ولما كسبوا الإنتخابات وبدأت مرحلة (بيب جوارديولا) والبطولات اللي بدأت ترف علي النادي فأي برشلوني أصيل عمره ما حيقول إن حيجي مجلس إدارة قوي وناجح زي مجلس الإدارة بتاع (خوان لابورتا) و(فيران سوريانو).
فكك من كم البطولات اللي كسبها برشلونة تحت قيادة (بيب جوارديولا) .. حاول تنسي يا تري كام جون جابهم (ليونيل ميسي Lionel Messi) حسموا كام بطولة للنادي .. عمر ما نجاح نادي برشلونة في الفترة دي كان حيتحقق لولا طريقة الإدارة بتاعة (فيران سوريانو) .. ناس كتير متعرفش إن سنة 2003 نادي برشلونة كان بيخسر فلوس ولا كأنه حد متعور وبينزف بس هو قدر بسبب طريقة إدارته للنادي إنه مش بس يخليه نادي عارف يقف علي رجله إنما يخليه نادي بيجيب فلوس .. فلسفته بمنتهي البساطة إن لازم الأندية اللي ليها شعبية كبيرة علي مستوي العالم زي برشلونة إنها تستغل الشعبية دي بحيث بدل ما تتصرف علي إنهم زي ما يكونوا بينظموا سيرك بيتعمل كل أسبوع في استاد الكامب نو في إقليم كاتالونيا فهم لازم يبدأوا يشتغلوا زي شركات إنتاج الأفلام بتاعة هوليوود .. (فيران سوريانو) كان بيفكر بأسلوب مختلف خالص عن أسلوب أي حد في مجال إدارة كرة القدم .. هو مثلاً كان مستغرب أوي من طريقة تعامل الأندية الإنجليزية مع المديرين الفنيين .. مثلاً ليه المدير الفني في إنجلترا زي (أرسين فينجر Arsene Wenger) أو السير (أليكس فيرجسون Alex Ferguson) بيتقال عليه Manager كأنه هو اللي بيدير كل صغيرة وكبيرة في النادي؟ .. الصح من وجهة نظره إن المدير الفني مبيفكرش في حاجة غير الملعب واللاعبين بتوعه إنما الإدارة المالية ومين نبيعه ومين نشريه دي بتاعة حد زي (فيران سوريانو) كده في مجلس الإدارة عارف كل صغيرة وبيرة في الBusiness بتاع النادي وعارف إمكانيات النادي المادية كويس.
الرجل ده فعلياً أثبت إنك تقدر تدير نادي كرة قدم كأنه شركة ودي كانت المشكلة .. أي شركة شغالة في أي Business لما بتلاقي نفسها بتكسب فلوس كتير فهي بتفكر تتوسع .. بتفكر إزاي تفتح فروع في أماكن مختلفة عشان تقوي من الBrand بتاعتها وتزود من أرباحها .. المشكلة إن برشلونة نادي شعبي زيه زي النادي الإسماعيلي أو النادي المصري البورسعيدي في مصر عملية صنع القرار فيه جاية من جمعية عمومية من ال143,000 عضو بتوعه لو إنت جيت قلت للأعضاء دول إن المرحلة الجاية من التوسع إن نادي برشلونة يبدأ يشتري أندية صغيرة تانية في دول مختلفة عشان يبقوا فروع له في قارات العالم زي ما كان (فيران سوريانو) عايز إن نادي برشلونة يبدأ يشتري نادي في أميركا عشان يبقي فرع لنادي برشلونة هناك .. فهم أولاً حيضحكوا عليك وبعد كده حيشتموك ويقولوا عليك مجنون ولو لقوك مُصر علي أفكارك دي حيمشوك و ده فعلاً اللي حصل مع (فيران سوريانو) سنة 2008 .. الجمعية العمومية للنادي قررت تطرده زي ما يكون ده مثلاً بني أدم كافر وأهل البلد مبقوش طايقينه فقرروا يطردوه من بلدهم .. بعدها قرر (فيران سوريانو) إنه يسيب مجال إدارة كرة القدم خالص وأسس شركة طيران إسمها Spanair وده حيودينا للشخصيتين التانيين في القصة واللي حنتكلم عنهم مع بعض.
الشخصيتين اللي بعد كده هم الشيخ (منصور بن زايد ال ناهيان) و(خلدون ال مبارك):
الأولاني واحد من العائلة المالكة الإماراتية والثاني مستشار للعائلة المالكة والإتنين دول أولاً كانوا شاريين نادي مانشستر سيتي .. ثانياً كانوا حاطين عنيهم علي (فيران سوريانو) بقالهم فترة ومتابعين الCareer بتاعته وثالثاً وده الأهم مقتنعين زيه بإن الأندية خصوصاً الأندية اللي معاها فلوس لازم تُدار كأنها شركات ويبقي ليها فروع في كل حتة في العالم .. تقدر تقول إن الثلاثة كان ليهم نفس الدماغ .. بإختصار هم كانوا عايزين مانشستر سيتي يبقي ماكدونالدز كرة القدم .. بس الإتنين كان قدامهم مشكلة ومشكلة كبيرة كمان .. كرة القدم دلوقتي مبقتش زي زمان .. إنت دلوقتي ممكن تلاقي لاعب كرة قدم ثمنه في السوق يعدي ال200 مليون دولار زي (نايمار Neymar) وفيه كلام علي إن ريال مدريد مقدم عرض في (محمد صلاح) ب280 مليون دولار .. ماتشات كرة القدم فيه ملايين بيتفرجوا عليها وعندك مثلاً ماتش النهائي بتاع بطولة Champions League فيه ملايين بيتفرجوا عليه علي مستوي العالم .. زمان وزمان ده اللي هو من 10 سنين مثلاً الفلوس لوحدها كانت بتحسم كل حاجة بس دلوقتي الوضع مش كده لإن إذا كان زمان فيه 4 أو 5 أندية بس اللي معاهم فلوس فدلوقتي فيه 15 أو 20 نادي معاهم فلوس .. زود علي كده قواعد اللعب المالي النظيف Financial Fair Play أو FFP اللي عقدت الأمور أكثر اللي هو إنت حتي لو نادي معاك فلوس فلازم تكون مستف ورقك وحساباتك ودفاترك مضبوطين عشان الدفاتر متقولش إنك طالع في السنة خسران وعليك فلوس تقوم رايح نتشتري لاعيبه بملايين.
سنة 2012 لما نادي مانشستر سيتي حقق أول لقب بطولة دوري إنجليزي Premier League من أكثر من 44 سنة بالجون اللي جابه (سيرجيو أوجويرو Sergio Aguero) في الدقيقة الأخيرة من أخر ماتش في الدوري ناس كتير مفرحتش للسيتي قد ما كان كل الكلام إن الشيخ (منصور) بيفسد كرة القدم .. الإتهام اللي كان بيتوجه للنادي إنهم إشتروا لقب الPremier League لما دفعوا أكثر من مليار دولار علي شراء اللاعبين بداية من سنة 2008 ودي السنة اللي الشيخ (منصور) إشتري فيها نادي مانشستر سيتي .. لو فكرت فيها من طرف واحد حتقول إن الناس دي عندها حق .. ده رجل عربي معاه فلوس قعد يصرف مليار دولار علي 4 سنين بيشتري في لاعيبة عشان يكسب الPremier League .. بداية من 2012 بدأ الإتحاد الأوروبي لكرة القدم UEFA إنه يطبق الFFP ودي فكرتها بمنتهي البساطة إنها تمنع الأندية تصرف فلوس أكتر من الأرباح بتاعتها .. السؤال اللي كان بياكل دماغ الشيخ (منصور) و(خلدون ال مبارك) هو إزاي مانشستر سيتي يكسب بطولات من غير ما يخسروا فلوس؟
الإجابة علي السؤال ده في رأي الشيخ (منصور) و(خلدون ال مبارك) كانت في الأفكار بتاعة (فيران سوريانو) .. في أكتوبر 2011 (فيران سوريانو) حضر إجتماع في فندق ماي-فاير Mayfair في مدينة نيويورك الأميريكية مع واحد إسمه (مارتي إيدلمان Marty Edelman) المحامي بتاع الشيخ (منصور) في أميركا واللي كمان الشيخ (منصور) عينه في مجلس إدارة النادي عشان يحاول يقنعه إنه يشتغل مع نادي مانشستر سيتي بس (فيران سوريانو) مرضاش ورفض العرض .. وقتها زي ما قلتلك مانشستر سيتي مكانوش لسه كسبوا بطولة الPremier League ومكنوش وقتها ليهم إسم كبير وكان لسه إسم مانشستر بيتحط في دماغ أي حد مصحوب بإسم يونايتد مش سيتي .. الأهم إن (فيران سوريانو) مكنش شايف إن الشيخ (منصور) ينفع يبقي رئيس نادي لإنه كان شايفه رجل خليجي معاه فلوس وبيبوظ كرة القدم عن طريق إنه بيضخم أوي من سعر اللاعبين .. في إبريل 2012 إتعمل إجتماع تاني بس المرة دي في مقر النادي في مدينة مانشستر والمرة دي الإجتماع حضره الشيخ (منصور) شخصياً والإتنين إتفقوا علي الخطة .. الخطة إن الشيخ (منصور) حيحط الفلوس .. أي فلوس يحتاجها (فيران سوريانو) عشان يخلي مانشستر سيتي إسمه أكبر من إسم برشلونة وعلي الناحية الثانية (فيران سوريانو) حيبدأ يحط أفكاره عشان يخلي مانشستر سيتي أكبر نادي في العالم أكبر حتي من ريال مدريد.
المرحلة اللي بعد كده كانت التنفيذ .. إزاي الأفكار دي كلها تتنفذ؟
مبدأياً لازم تكون فاهم (فيران سوريانو) بيفكر إزاي .. الرجل ده بيقول إن أندية كرة القدم هي براندات عالمية .. إنت ممكن تمشي في شوارع أفقر دولة أفريقية عايش فيها ناس لا بتعرف تقرأ ولا تكتب بس تلاقي الناس عارفه كويس مين هو مانشستر يونايتد وريال مدريد .. بس رغم كل ده الأندية معندهاش Business ضخم يجيبلها فلوس .. إنت ممكن يكون عندك نادي القاعدة الجماهيرية بتاعته علي مستوي العالم 500 مليون مشجع بس لما تبص علي الفلوس اللي بتخش للنادي تلاقيها في السنة متجيش 500 مليون دولار يعني دولار من كل مشجع .. فكر فيها كده .. إنت ممكن تكون بتشجع مانشستر يونايتد وبتعشقه وبتتفرج علي كل ماتشاته بس عمرك ما حطيت جنيه واحد عشان تشتري منتج للنادي سواء تي-شيرت أو جزمة وطبعاً عمرك ما روحت حضرت ماتش في الاستاد هناك .. السؤال اللي (فيران سوريانو) كان عايز يجاوب عليه هو إزاي أنا كنادي كبير استفيد مادياً من المشجعين بتوعي المنتشرين في كل حتة في العالم؟
الإجابة بسيطة بس محتاجه ناس مبتخافش .. بص يا سيدي .. إنت عشان تعمل اللي (فيران سوريانو) بيقول عليه لازم إنت كنادي تبقي عالمي بس في نفس الوقت محلي .. إنت محتاج مثلاً إن نادي مانشستر سيتي يجي مصر ويفتح فرع له .. مش يفتح محل بيع منتجات .. لا يفتح فرع للنادي يبدأ يبقي فيه أكاديمية ناشئين ويطلعوا لاعيبة يقدر مانشستر سيتي يشوف مين فيهم النوابغ وياخدهم عنده والباقي يتباع لأندية مصرية وعربية تانية .. مش كده وبس .. النادي اللي تبع مانشستر سيتي في مصر بيلعب في الدوري وبينافس ومع الوقت تبقي له شعبية .. ده فكر لما قاله (فيران سوريانو) لمجلس إدارة برشلونة قالوله إنت مجنون وطردوه من النادي وهو كان محبط ومتخيل إن فكره ده محدش حينفذه بس لقي جوز مجانين زيه اللي هم الشيخ (منصور) و(خلدون ال مبارك) ما صدق إنه يشتغل معاهم .. في الأول كان متردد لإنه كان حاسس إنه بيبيعوا الوهم بس لما حس منهم إنهم صادقين في اللي بيقوله كان حد بيقوله شبيك لبيك.
الكيان اللي بيملك نادي مانشستر سيتي هي مجموعة إسمها مجموعة سيتي لكرة القدم City Football Group أو CFG إختصاراً .. إذا كنت بتسمع مثلاً إن باريس سانجيرمان إشتري (نايمار Neymar) أو إن برشلونه إشتري (كوتينيو Coutinho) فالسيتي بيشتري أندية .. مجموعة CFG بتسيطر علي 6 أندية حول العالم بس الحقيقة إحنا حنركز كلامنا أوي النهاردة علي 3 أندية منهم اللي هم:
- نادي نيويورك سيتي New York City FC لإن ده أول العنقود وأول نادي بره إنجلترا مجموعة CFG تشتريه.
- نادي أتليتيكو توركي Atletico Torque في أوروجواي لإن ده مشروع يوريك قد إيه الناس دي شايفه حاجة إحنا مش شايفينها.
- نادي جيرونا Girona FC الإسباني وده الحقيقة مثال لمقوله إسعي يا عبد وأنا أسعي معاك.
خلينا نبدأ بأول نادي اللي هو نادي نيويورك سيتي New York City FC:
يوم السبت 1 سبتمبر 2012 إتعين (فيران سوريانو) رئيس لمجلس إدارة نادي مانشستر سيتي وبعدها بيومين كان في مدينة نيويورك الأميريكية عشان يبدأ رحلة شراء أول نادي لمجموعة CFG بره إنجلترا وكان القرار إن النادي اللي حيشتروه حيكون في الدوري الأميريكي بس طبعاً عشان مستحيل يلاقوا إدارة نادي كرة قدم بيلعب فعلياً في الدوري الأميريكي مستعدة تبيع النادي بتاعها فكانت التوقعات إما إن CFG حتشتري نادي مثلاً بتاع كرة سلة أو بيسبول ويخلوه بيلعب كرة قدم كمان أو إنهم يبدأوا يعملوا نادي كرة قدم من الصفر .. ده معناه إن لو حصل والنادي اللي حيشتروه مكنش أساساً نادي كرة قدم ومكنش بيلعب في الدوري الأميريكي فهم عشان يقولوا يا رحمن يا رحيم لازم يدفعوا 100 مليون دولار لإتحاد كرة القدم الأميريكي MLS عشان بس ياخدوا مكان في فرق الدوري .. وسط السعي والتدوير (مارتي إيدلمان) اللي بفكرك إنه المحامي بتاع الشيخ (منصور) أخد (فيران سوريانو) عشان يقابلوا (هانك شتاينبرينر Hank Steinbrenner) و(هال شتاينبرينر Hal Steinbrenner) ودول إتنين أخوات بيملكوا نادي نيويورك يانكيز New York Yankees واحد من أكبر أندية البيسبول في أميركا.
الإتنين دول ورثوا النادي من أبوهم بس (هانك) كان بيعشق حاجة إسمها كرة قدم والحقيقة إن الإجتماع مقعدش أكثر من 15 ثانية .. الإتفاق إن الأخوين حيبقي ليهم 20% من أسهم النادي الجديد اللي حيتعمل في مقابل إنهم عرضوا إن ملعب New York Yankees يبقي هو الاستاد المؤقت للنادي لحد ما ربنا يكرم ومجموعة CFG تبني استاد خاص بيها .. رغم إن ملعب New York Yankees هو أساساً ملعب بيسبول بس إنت عشان تحوله لملعب كرة قدم فإنت محتاج شغل 72 ساعة قبل الماتش .. النادي الجديد إتسمي New York City Football Club وبدأ يلعب في الدوري الأميريكي من سنة 2015 والجماهير بتاعته بقت بتسميه New York City وأحب بس أفكرك إن ده النادي اللي كان بيلعب فيه (ديفيد فيا David Villa) وكان بيلعب فيه (أندريا بيرلو Andrea Pirlo) قبل ما يعتزل .. علي حسب تقديرات مجلة Forbes فالنادي دلوقتي قيمته وصلت 275 مليون دولار ودي كانت بداية إن البراند الجديدة للمشروع تبقي City .. كده المشروع يقدر يروح أي بلد في أي مدينة ويبدأ يشتغل والناس حتربطه بمانشستر سيتي.
تاني نادي حنتكلم عنه هو أتليتيكو توركي Atletico Torque:
ده نادي بيلعب في دوري الدرجة الثانية في أروجواي إتأسس سنة 2009 وبدأ يبقي عنده فرقة محترفين سنة 2012 ومجموعة CFG إشترته في مايو 2017 .. الحقيقة اللي حتي الناس جوه مجلس إدارة مانشستر سيتي عارفينها كويس إن مفيش حد عارف مين هو أتليتيكو توركي ومحدش عارف هي توركي دي فين أساساً وإيه اللي يخلي مجموعة CFG تروح تشتري نادي مجهول زي ده .. بس كل ما تغوص أكتر حتفهم مدي عبقرية الناس اللي بتخطط لمشروع السيتي .. أظن إنك متعرفش إن النادي ده موجود في عاصمة أوروجواي مونتفيدو .. وأظن برده إن كتير ميعرفوش إن دولة أوروجواي هي أكثر دولة بتطلع مواهب كره قدم بالنسبة لعدد سكانها .. دي الدولة اللي طلعت (لويس سواريز Luis Suarez) و(إدينسون كافاني Edinson Cavani) واللي ربنا يستر لما نلاعبهم في كأس العالم الجاي.
الخطة اللي CFG بتفكر فيها إنهم يخلوا النادي يتأهل للدوري الممتاز الموسم ده وبعد كده يوصل لواحد من المراكز الأربعة المؤهلة للبطولات القارية لأندية أميركا الجنوبية .. الخطوة اللي وراها إن النادي يتحول لمصنع لتصدير اللاعبين الموهوبين مش بس من أوروجواي إنما من كل دول أميركا الجنوبية عشان يتباعوا لأندية أوروبا .. الBusiness ده لوحده ممكن يوصل ل50 مليون دولار في السنة .. أحب بس أقولك إن في شهر ديسمبر 2016 النادي أخد درع دوري الدرجة الثانية وإتأهل رسميا للدوري الممتاز وده بعد أقل من 6 شهور من بعد ما CFG اشتروه.
ثالث نادي حنتكلم عنه هو نادي جيرونا الإسباني Girona FC:
ده نادي مجموعة CFG خلصت في شهر يوليو 2017 صفقة شراء 44% من أسهم النادي مقابل 3.5 مليون جنيه إسترليني بس وده رقم قليل أوي عشان تدفعه في شراء أسهم نادي بيلعب حالياً في الدوري الممتاز الإسباني .. الفكرة إن لما الطرفين إتفقوا علي السعر اللي هو 3.5 مليون جنيه إسترليني كان النادي لسه بيلعب في دوري الدرجة الثانية ودلوقتي هم في الدوري الممتاز .. اللي أنا عايز أوصله ليك إن كرة القدم حتبقي أكبر رياضة في العالم حتي في دول زي أميركا والهند وده مخلي مشروع السيتي عنده طموح إنه يكمل إلي مالا نهاية .. هم ناويين يتوسعوا في أفريقيا وماليزيا وفييتنام .. سقفهم إن حيبقي ليهم نادي واحد أو ناديين بالكتير في كل قارة بحيث إن الخطوة الجاية بالنسبة ليهم هو إنهم يشتروا نادي في الصين .. في أكتوبر 2015 الرئيس الصيني (جي يبينج Xi Jinping) اللي بيعشق حاجة إسمها كرة قدم زار استاد الإتحاد وبعدها بشهرين كانت مجموعة من المستثمرين الصينيين إشتروا 13% من قيمة أسهم CFG مقابل 400 مليون دولار مع العلم إن القيمة الإجمالية لمجموعة City Football Group بتقدر حالياً ب3 مليار دولار .. لما الرئيس الصيني زار استاد الإتحاد وزار نادي مانشستر سيتي طلعت في دماغه إنه يعمل دوري كرة قدم صيني شبه الدوري الإنجليزي والجنون اللي إنت شايفه من الفلوس اللي الأندية الصينية بتدفعها عشان تشتري لاعيبه بدأ كله بزيارة عملها الرئيس الصيني للنادي .. خلي بالك إن رقم ال400 مليون دولار ده لوحده يعتبر أكبر من إجمالي الفلوس اللي الشيخ (منصور) صرفها علي النادي .. يعني مشروع السيتي بيجيب فلوس كتير أكتر من الفلوس اللي بتتصرف عليه.
مجموعة CFG مش هم أول ناس في الدنيا تخترع مفهوم إن كيان يملك أكثر من نادي رياضي .. عندك شركة Red Bull بتاعة مشروبات الطاقة بتملك ناديين اللي هم Red Bull Salzburg النمساوي و RB Leibzig الألماني بس الفرق بين مشروع Red Bull وبين مشروع السيتي هو إن الأول تقدر تسميه محاولة من شركة إنها توسع من أعمالها ويبقي عندها كذا Business يجيب فلوس .. اللي بتعمله مجموعة CFG إنها حولت مانشستر سيتي لبراند زيها زي Google أو Pepsi وخلتها تنتشر في كل حتة في العالم .. الفكر ده في Business بيتسمي Glocalization اللي هو الMix بين كلمتي Globalization و Localization يعني إنك تجيب العولمة والمحلية تضربهم في الخلاط يطلعلك إنك تجيب ماركة معروفة علي مستوي العالم بس تبيعها في الأسواق المحلية .. ده معناه 4 حاجات:
- أول حاجة إنك لو عايش في نيويورك في أميركا وبتشجع نادي New York City فإنت بشكل أوتوماتيكي بقيت بتشجع مانشستر سيتي .. يعني كده إنت ضربت القاعدة الجماهيرية بتاعتك في إتنين.
- ثاني حاجة إن لو شركة زي Nissan اليابانية حبت تعمل حملة إعلانية ليها علي تي-شيرتات مانشستر سيتي فهي كده ضمنت إن إسم Nissan حيتحط كمان علي تي-شيرتات أندية نيويورك سيتي الأميريكي وميلبرن سيتي الأسترالي يعني بدل ما إسمك حيتشاف في دوري واحد حيتشاف في 3 دوريات وحتدفع 3 أضعاف المبلغ وإنت راضي ومبسوط.
- إنت لو بتلعب في نادي نيويورك سيتي الأميريكي فإنت فترة الإعداد بتاعتك تقدر تقضيها في مجمع الإتحاد Etihad Campus بتاع نادي مانشستر سيتي بدل ما نادي نيويورك سيتي يبقي مضطر يدفع دم قلبه عشان يبني مجمع رياضي متكامل في نيويورك برده والكلام ده شامل كل الأندية اللي مجموعة CFG بتملكها أو بتملك حصة منها.
- فكرة إن (بيب جوارديولا) المدير الفني لمانشستر سيتي بقي لما يحب يدور علي لاعب معين بقي تحت إيده تشكيلة متنوعة من المواهب الشابة من كل دول العالم يقدر يختار منهم أي حد مناسب ببلاش لإن كلهم فعلياً بيلعبوا للسيتي .. بإختصار شديد هم عايزين يعملوا كذا نسخة من أكاديمية لاماسيا La Masia بتاعة برشلونة حول العالم عشان يطلعوا لاعبين ناشئين يبقوا زي جيل برشلونة اللي طلع مع (جوارديولا) زي (ميسي) و(أندريس إنيستا Andres Inesta) و(تشافي Xavi) و(كارلوس بويول Carlos Puyol).
فلسفة (فيران سوريانو) هو ليه أعمل زي إدارة باريس سانجيرمان وأصرف 198 مليون جنيه إسترليني عشان أشتري لاعب موهوب زي (نايمار) لما أنا ممكن أطلع لاعب ناشيء ببلاش من نادي زي أتليتكو توركي وحيتربي في النادي بتاعي وعلي مباديء النادي بتاعي .. ده فكر إنت ممكن تبقي زي أي حد في الجمعية العمومية بتاعة نادي برشلونة وتقول عليه كفر بكل مباديء كرة القدم وإنت ممكن تبص للفكر ده وتصقفله من كتر إعجابك به كما لو كان ده Post علي Facebook كنت عملتله Like و Share .. أيا كان رأيك .. (فيران سوريانو) مجنون وإتلم علي إتنين أجن منه والثلاثة مع بعض حيجننونا كلنا.
المصدر:
- مقالة بعنوان Manchester City’s plan for global domination نشرت في جريدة The Guardian البريطانية وده لينك المقالة الأصلية:
https://www.theguardian.com/news/2017/dec/15/manchester-city-football-group-ferran-soriano
