خلينا نتفق إن كتير مننا بيحب كرة القدم .. و خلينا نتفق إن كلمة كتير دي كلمة خادعة شوية لإن أنا مش بتكلم عن نسبة الرجالة اللي بتحب تشرب شوربة الكوارع .. أنا عارف إن نسبة البنات اللي بتتفرج علي كرة القدم قليلة فإحنا بحكم إن المقالة فيها كمية أرقام كتير فحنفترض إن النسبة دي صغيرة أوي و بالتالي حنتجاهلها .. إني أقول إني كتير من الرجاله بيحبوا كرة القدم فكأني بقول إن كتير من الرجاله عاجباهم (جيورجينا) صاحبة (كريستيانو رونالدو) أو إن كتير من الرجاله بيشربوا شاي و قهوة .. اللي أنا أقصده إن اللي بيحبوا الكورة كتير و لو إنت بتحب الكورة فإنت غالباً حد من إتنين .. يا إنت بتحب الكورة عشان بتشجع فرقة معينة و نفسك الفرقة دي تكسب كل ماتشاتها و تاخد كل البطولات و كأن مفيش حد بيلعب كورة غيرها .. أو إنت رجل زي حالاتي بتتفرج علي كورة عشان تتبسط و لما بتيجي تتفرج علي ماتش أعصابك مش بتتحرق قد ما إنت كأنك بتتفرج علي فيلم أو مسلسل اللي هو الأحداث شاداك بس مش فارق معاك الماتش يخلص كام كام .. خليني أقول من دلوقتي إن كلامي حيزعل النوع الأولاني من مشجعين الكورة و حيجي علي هوي النوع الثاني .. إتفقنا؟ .. نيجي بقي للهدف من الكلام .. هو بالصلاة علي النبي مفيش مفاجأت ليه كتير بتحصل في الكورة؟
عشان برده أبقي واضح أنا بتكلم عن مفاجأة زي إن لييستر سيتي ياخد الدوري الإنجليزي سنة 2016 يعني برده عشان أحطك في الصورة .. أخر مرة فرقة في إنجلترا بره الستة الكبار تاخد الدوري كانت فرقة بلاكبيرن قبل ما الدوري الإنجليزي بصورته بتاعة دلوقتي يتعمل .. بتكلم عن مفاجأة زي إن نادي بورتو البرتغالي ياخد دوري أبطال أوروبا موسم 2003-2004 .. السنة دي مثلاً لو نابولي خد الدوري الإيطالي فحتبقي أول مرة من سنة 1990 أيام ما كان (دييجو أرماندو مارادونا) لسه بيلعب .. السؤال دلوقتي هو هل فعلاً ماتشات كرة القدم نتايجها بقت محسومة من قبل ما تتلعب؟ .. هل الفلوس بوظت كرة القدم بحيث القاعدة بقت لو إنت نادي معاك فلوس فإنت حتقدر تشتري اللاعيبة اللي إنت عايزها و تدفعلهم المرتبات اللي هم عايزينها و بالتالي تفضل تاخد البطولات اللي الجماهير عايزاها؟ .. ده السيناريو اللي عاجب أوي النوع الأول من مشجعين كرة القدم .. لو إنت بتشجع مانشستر يونايتد أو ريال مدريد أو حتي الأهلي في مصر فإنت عايز النادي بتاعك يبقي معاها أحسن لاعيبة في البلد أو في القارة عشان يفضل يكسب و مع كل بطولة ياخدها تجري علي السوشيال ميديا عشان تنزل صورة لشعار النادي و معاها جملة ولا فيه غيره بيفرحني .. بس النوع الثاني من مشجعين كرة القدم الوضع ده بيستفزنا أوي و يمكن عشان كده لما نزل الخبر بتاع عقوبة خصم 15 نقطة من نادي يوفينتوس و إن لجنة تحقيق مستقلة في الإتحاد الإنجليزي لكرة القدم طلعت قالت إن إدارة نادي مانشستر سيتي متهمة ب115 مخالفة فحسينا إننا بنتغسل من جوه .. ياااه جه الوقت إننا نشوف يوم في الحرامية دول و ده اللي إحنا النهاردة جايين نتكلم عنه .. هو إيه بالضبط اللي هببته إدارة نادي يوفينتوس و إدارة نادي مانشستر سيتي؟
خلينا نتفق علي حاجتين .. أول حاجة إن الكلام اللي حقوله مش معناه إني بشاور علي أي نادي من الإتنين و بأتهمه بأي حاجة لإني مؤمن جداً بإن العدالة لازم تاخد مجراها فأنا دوري أفهمك مش إني أتهم حد .. متنساش كمان إن لسه إدارة يوفينتوس قدامها فرصة تطعن علي القرار اللي طلع ضدها و لسه حتتشكل لجنة تانية جوه الإتحاد الإنجليزي عشان تقرر هل مانشستر سيتي حيتوقع عليه عقوبة أو لا .. ثاني حاجة إن المقالة دي و إن كانت بتتكلم عن أندية كرة قدم و حتتحط علي الموقع ضمن مقالات كرة القدم بس دي مش مقالة كرة قدم .. دي مقالة كلها أرقام و حسابات و إزاي إن نادي زي يوفينتوس لازم تبصله علي إنه شركة زي مثلاً شركة أسمنت و إن اللاعيبة اللي بتلعب في النادي دي زي ما تقول كده مكن الشركة إشترته عشان المكن يبقي جزء من رأس مال الشركة .. مقالة النهاردة حتتقسم نصين بحيث نص متعلق بمشكلة يوفينتوس و نص تاني متعلق بمشكلة السيتي و خلينا نخش في الموضوع علي طول بعد المقدمة الطويلة دي.
يوفينتوس .. شعرة معاوية بين الإستعباط و الإحتيال:
حالة يوفينتوس حالة غريبة لإن أساساً اللي بدأ ينخرب وراهم مش النيابة ولا الإتحاد الإيطالي لكرة القدم إنما هيئة البورصة الإيطالية .. في رأيي الشخصي اللي بيميز حالة يوفينتوس هو إن التهمة المتوجهة ليهم صعب أوي تثبتها لإن ساعتها حيتطلب منك إنك تثبت نية .. بمعني .. خلينا نبدأ بالعقوبة اللي إتوقعت عليهم .. أولاً هم حيتخصم منهم 15 نقطة و ده حيخلي يوفينتوس يتحول من نادي حيلعب في أوروبا الموسم الجاي لنادي بيلعب في المنطقة الدافئة من جدول الدوري .. ثانياً إن فيه 11 مسئول جوه النادي حيتوقفوا من ضمنهم رئيس النادي السابق (أندريا أنييلي Andrea Agnelli) اللي حيتوقف سنتين .. من ضمنهم برده المدير التنفيذي السابق للنادي (فابيو باراتيتشي Fabio Paratici) اللي دلوقتي ماسك مدير نشاط الكورة في نادي توتنهام اللي حيتوقف سنتين و نص .. لو عايز تعرف هي العقوبة دي مين حطها فالإجابة هي لجنة تابعة للإتحاد الإيطالي لكرة القدم .. نيجي بقي للسؤال المهم .. هي الناس دي عملت إيه غلط؟
المشكلة في الطريقة اللي إدارة يوفينتوس كانت بتعمل بيها صفقات تبادل اللاعيبة .. تاني .. أنا مش بتكلم عن صفقات البيع و الشراء العادية .. أنا بتكلم عن صفقات تبادل زي مثلاً صفقة إنتقال (أرتورArthur ) من برشلونة ليوفينتوس مقابل إنتقال (ميراليم بيجانيتش Miralem Pijanic) من يوفينتوس لبرشلونة .. دي صفقة تبادل بين إتنين لاعيبة بين ناديين من غير ما يتدفع فيها ولا مليم .. لاعيب مقابل لاعيب .. طب حلو إيه المشكلة برده؟ .. لنفترض إن أنا مكان إدارة يوفينتوس و كان عندي لاعيب إسمه (ميراليم بيجاينتش) أنا قيمت سعره علي إنه بعشرة مليون دولار و بعته لنادي تاني إسمه برشلونة فساعتها أنا من حقي كإدارة يوفينتوس إني أكتب في الحسابات بتاعتي إن جالي فلوس أو دخل قيمته 10 مليون دولار .. طب لو فيه لاعيب إسمه (أرتور) بيلعب في نادي برشلونة و أنا عايز أشتريه فجت إدارة برشلونة قيمت سعره بإن هو كمان ثمنه في السوق 10 مليون دولار بس أنا لما جيت أدفع الفلوس لبرشلونة مدفعتش الفلوس كاش و علي الطرابيزة .. أنا قلت لإدارة برشلونة أنا حاخد (أرتور) بعقد 5 سنين بحيث حدفعلكوا كل سنة 2 مليون دولار اللي هو تقسيط يعني .. السؤال بقي .. في الوضع ده المحاسب بتاعي يسجل كل ده إزاي؟
اللي بيحصل إن لو الصفقة حصلت السنة دي فالمحاسب بتاعي بيقول إن يوفينتوس جاله دخل 10 مليون دولار صافي (مع إن الفلوس دي ممكن تكون حتتقسط) و عشان أنا المفروض دفعت 10 مليون دولار فالمنطق بيقول إن لما يتطرح الإتنين من بعض فكأني مصرفتش حاجة بس أنا بكتب في الحسابات إني دفعت 2 مليون دولار (عشان أنا قسطت ثمن شراء (أرتور) علي خمس سنين) .. فبكده بقدرة قادر بدل ما كان حساباتي بتاعة السنة دي المفروض تقول إني المحصلة صفر فأنا سبحان الله بقي معايا ربح 8 مليون دولار .. زي ما أنا كنادي يوفينتوس إستعبطت و عملت كده فإدارة نادي برشلونة هي كمان إستعبطت و عملت زيي .. بس شوف يا أخي كل الهري اللي أنا قلته ده مش هو المشكلة .. الإستعباط بتاع الحسابات ده مش هو الحاجة الغلط و تقريباً مفيش نادي في أوروبا مبيستعبطش في حساباته كده عشان يهرب من العقوبات بتاعة لوائح اللعب النظيف .. طب فين المشكلة برده؟
المشكلة إن لما لا (أرتور) ولا (ميراليم بيجانيتش) يبقي ثمنهم في السوق 10 مليون دولار بس المحاسبين بتوع الناديين شافوا إن ميزانية النادي فيها عجز بالمبلغ ده فهم إتفقوا مع بعض و طبخوها سوا إنهم حيبالغوا في تسعير اللاعيبة عشان الرقم اللي يتحط في الحسابات يبقي الرقم اللي هم شايفينه من مصلحتهم يتكتب .. عشان كده زي ما قلتلك مشكلة حالة يوفينتوس إنك محتاج تثبت النية إنك بتعمل حاجة غلط و ده في عُرف القانون صعب و يمكن مستحيل .. إنت يا سرقت يا مسرقتش لكن مينفعش أحبسك عشان إنت كنت بتفكر تسرق .. علي الناحية الثانية كل ما قيمة الصفقة كفلوس بتزيد بتلاقي إن فعلاً فيه إستعباط بيحصل .. يعني أنا لو نادي يوفينتوس و عندي عجز في الميزانية 80 مليون دولار فكل اللي محتاج أعمله إني أدور علي نادي أقوله تيجي نبدل لاعيب بلاعيب و نتفق سوا إن ثمن الواحد فيهم 100 مليون دولار .. و هوبا الناديين بقي من حقهم يكتبوا في حساباتهم بتاعة السنة دي إن جالهم دخل 80 مليون دولار من الهواء .. لو دي مش سرقة فحتسميها إيه؟
عشان بس أبقي منصف .. الموضوع مش جديد .. من فترة فيه 8 أندية إيطالية هي يوفينتوس و جنوة و سامبدوريا و إمبولي و برو فيرشيليا و نوفارا و بيسكارا و بارما و بيزا إتوجه ليهم نفس التهمة و القاضي بتاع المحكمة الرياضية حكم ببراءتهم لنفس السبب اللي أنا عمال أكرره اللي هو حتثبت إزاي سوء النية؟ .. دلوقتي ناديين قالوا نبدل لاعيب بلاعيب و إتفقوا علي إن اللاعيب ثمنه كذا و بين البايع و المشتري يفتح الله .. اللي محدش كان عامل حسابه إن عشان يوفينتوس متسجل كشركة مساهمة في البورصة و وزارة المالية بيبقي ليها متطلبات رخمة شوية في تقديم الحسابات للشركات اللي ليها أسهم في البورصة و اللي خدوا بالهم إن فيه حاجة غلط في الحسابات بتاعة يوفينتوس .. إتعمل تحقيق إسمه بريزما Prisma فضل يكبر و يكبر لدرجة إن النيابة طلبت تتنصت علي مكالمات تليفونية و جمعت أدلة كتير من ضمنها ورق مكتوب و ممضي من ناس جوه مجلس إدارة يوفينتوس إن النادي كل ما يتزنق في قرشين يعمل صفقة تبادلية بالشيء الفلاني عشان ورق الميزانية يتضبط بحيث إن علي حسب أهم كلمة إتكتبت في التحقيق بتاع بريزما ده إن الإستعباط بقي Systemic أو منهجي و دي بينقل اللي بتعمله إدارة الناي من مرحلة الإستعباط لمرحلة الإحتيال المالي.
تاني .. مشكلة يوفينتوس مش مشكلة رياضية .. مفيش حاجة في اللوايح بتاعة الإتحاد الإيطالي لكرة القدم بتقول إن اللي بتعمله إدارة النادي ده غلط .. المشكلة مشكلة مالية و جنائية عشان النادي متسجل كشركة مساهمة في البورصة .. عشان كده المحامين بتوع يوفينتوس معندهمش حل غير إنهم يستنوا لحد ما يستلموا كل الأدلة المتاحة في التحقيق بتاع بريزما و بعد كده يطعنوا في الحكم اللي طالع في المحكمة الدستورية العليا في إيطاليا اللي حيبقي عندها خيار من إتنين .. يا يقولوا إن الحكم سليم و يتطبق .. أو يقولوا إن الحكم مش شرعي و يتلغي .. بمعني إنك مش حتسمع إن الحكم مثلاً إتخفف بقي 5 نقط بدل 15 .. و عشان ده تحقيق جنائي مش رياضي ففي نوفمبر 2022 مجلس إدارة يوفينتوس كله قدم إستقالته .. المصيبة إن لو المحكمة الدستورية العليا أيدت الحكم اللي طلع قبل كده فممكن الإتحاد الأوروبي لكرة القدم يزيط فيها هو كمان و يفرض علي يوفينتوس عقوبات إضافية لخرقه قواعد اللعب النظيف يعني مش بس يتخصم من يوفينتوس نقط و ميلعبش في أوروبا الموسم الجاي ده ممكن يتوقف من اللعب في أوروبا لمدة سنتين.
المستقبل مش حقول أسود بس علي الأقل مش لطيف ليوفينتوس .. إحنا دلوقتي سنة 2023 .. سنة 2022 النادي طلع قال إنه خسايره وصلت 250 مليون دولار و السنة اللي قبلها 2021 خسايره كانت 210 مليون دولار .. صحيح إن الخساير دي كلها سببه تأثير جائحة فيروس كورونا علي البيزنس عموماً بس لنفترض إن المحكمة الدستورية العليا أيدت الحكم بخفض 15 نقطة من رصيد النادي في الدوري فكده باي باي المشاركة في دوري أبطال أوروبا الموسم الجاي .. كل دي ضربات مالية بتوجع .. ده السبب اللي خلي رئيس النادي الجديد (جيانلوكا فيريرو Gianluca Ferrero) طلع قالها علي بلاطة للجماهير إن متستنوش صفقات سوبر و إن الإعتماد خلال المواسم اللي جاية حيكون علي الشباب و الناشئين.
مانشستي سيتي .. أن الأوان نسمع الناس دي حتقول إيه:
مهم تبقي فاهم من دلوقتي إن التهمة الأساسية المتوجهة لإدارة السيتي هي في حد ذاتها تهمة مايعة ملهاش مسكة .. الكلام اللي علي الورق إن بعد تحقيق إستمر أكتر من 4 سنين فالنتيجة بتاعته إن إدارة السيتي يا إما مقدمتش أو لما قدمت فهي قدمت ورق بتاع الحسابات و الميزانية للنادي رسم صورة مش دقيقة للوضع المالي للنادي خلال تسع مواسم و لازم أقولك إن التهم المتوجهة للسيتي دلوقتي هي هي التهم و هي هي القضية اللي إتكلمنا عنها سنة 2019 و اللي إتبنت من أولها لأخرها علي سلسلة مقالات نشرها جرنان ألماني إسمه دير شبيجل Der Spiegel و كان مصدر الكلام اللي نشره الجرنان الألماني هو ما يسمي بتسريبات كرة القدم Football Leaks .. طبعاً حتسألني إيه دي .. كان يا مكان كان فيه هاكر برتغالي إسمه (روي بينتو Rui Pinto) قدر يهاك الإيميلات الخاصة بالناس اللي ماسكة نادي مانشستر سيتي و نشر غسيلهم الأسود كله علي الإنترنت .. حلو .. جه الإتحاد الأوروبي لكرة القدم بدأ تحقيق كبير و كانوا مركزين نخربتهم دي ورا ما يسمي مجموعة أبوظبي المتحدة Abu Dhabi United Group و دي إسم الشلة من رجال الأعمال الإماراتيين اللي بيملكوا أكبر حصة من أسهم النادي .. جميل .. طب إيه اللي حصل بعد كده؟
جه الإتحاد الأوروبي منزل عقوبة خلت الناس تقول وه .. لو تفتكر وقتها طلع قرار بحرمان السيتي من المشاركة في أي بطولة أوروبية سواء دوري الأبطال أو اليوروبا لييج لمدة سنتين .. كانت قضية كبيرة وقتها و إتقال إن بسبب القرار ده فيه لاعيبة كتير من السيتي بتفكر تمشي .. جت إدارة السيتي قدمت طعن في محكمة الإستئناف الرياضي Court of Arbitration for Sport و إختصاراً بتتسمي CAS و اللي كان قرارها هو الأتي .. أولاً هم فرضوا عقوبة مالية فشيخة علي السيتي بس مش ده المهم .. المهم إنهم لغوا العقوبة بتاعة الإتحاد الأوروبي اللي هي الإيقاف لمدة سنتين لإن التهمة اللي إتوجهت للنادي سقطت بالتقادم .. يعني إيه؟ .. يعني اللي عملته إدارة السيتي غلط و كلنا عارفين إنه غلط ولازم يتعاقبوا بس هم عملوا الغلط ده من فترة طويلة أوي و كان الإتحاد الأوروبي نايم في العسل فلما فاقوا كان خلاص عدت سنين علي الغلط ده و مبقاش ينفع السيتي يتعاقب عليه وفق اللوايح بتاعة الإتحاد الأوروبي لكرة القدم.. جميل جداً .. اللي محدش كان عامل حسابة إن الإتحاد الإنجليزي لكرة القدم قام مكمل هو التحقيق بتاع الإتحاد الأوروبي علي أساس إن لوائح الإتحاد الإنجليزي مفيهاش ثغرة سقوط التهمة بالتقادم دي.
فيه شوية نقط لازم تبقي واضحة ليك أوي .. أولاً رغم إن دي قضية فعلياً قديمة يعني إحنا كتبنا عنها سنة 2019 و دلوقتي إحنا في 2023 يعني إحنا بقالنا 4 سنين في الموال ده بس خلال السنين دي كلها ولا مرة حد قعد ما إدارة السيتي سألها ما قولكم في التهم الموجهة إليكم .. عشان كده بعد ما الإتحاد الإنجليزي خلص تحقيقة و طلع تقرير قال فيه إن السيتي كسر فوق ال100 لايحة من لوائح الإتحاد فدلوقتي إتشكلت لجنة سرية عشان تعمل تحقيق سري و في الأخر تطلع حكم نهائي مفيهوش طعن .. اللجنة دي يمكن لأول مرة من سنين حتقعد مع إدارة السيتي و تسمع ردهم و تفهم وجهة نظرهم .. إيه اللي حيحصل بعد كده أنا فعلياً لا أملك إني أهبد حتي بس لو اللجنة دي طلعت قالت إن السيتي غلطان فالعقوبات اللي ممكن تتفرض علي النادي بتتراوح ما بين إن تتسحب منهم البطولات اللي خدوها في الأربع سنين اللي فاتوا و ساعتها حيبقي يا فرحتك يا جماهير ليفربول و ويونايتد أو إن السيتي يهبط لدوري الدرجة الثانية زي ما حصل مع يوفينتوس بعد قضية كالتشيو بولي و ساعتها كل جماهير الأندية الإنجليزية حتزغرط أو حتي يتم خصم نقط من السيتي الموسم ده و ساعتها غالباً مش حيلعبوا في أي بطولة أوروبية الموسم الجاي.
اللي أنا عايز أختم بيه إني أقولك إن مفيش حد بيشوف نفسه وحش .. بمعني .. لو إنت سألت أي حد من مشجعي السيتي هو يا تري إيه رأيك في الإتهامات الموجهة للنادي بتاعك حتلاقيه بيقولك دي غيرة منافسين .. هو شايف إن أندية زي ليفربول و مانشسيتر يونايتد و تشيلسي اللي غيرانة من نجاح السيتي هي اللي بتنخرب وراه و بتدورله علي أي غلطة عشان توقعه .. نفس المنطق حتلاقيه مع مشجع اليوفي .. هو شايف إن مؤسسات الدولة الإيطالية من بوليس و نيابة و قضاء و حتي جوه الإتحاد الإيطالي لكرة القدم متغاظة من الكيان اللي إسمه يوفينتوس و إن غيرة أندية تانية إنترميلان هي اللي ورا المشاكل دي كلها مع إن نفس المشجع ده بينسي إن لحد كام شهر رئيس نادي يوفينتوس كان (أندريا أنييلي) اللي يعتبر من أغني أغنياء أوروبا و عضو في مجلس إدارة شركة فيات FIAT و لحد ما هبد الهبداية بتاعة السوبر لليج Super League كان هو رئيس اللجنة التنفيذية في الإتحاد الأوروبي لكرة القدم و كان رئيس إتحاد أندية كرة القدم الأوروبية يعني تقريباً هو كان أجمد تنين وسط التنانين بتاعة بيزنس كرة القدم في أوروبا .. تلاقي المشجع من دول سواء بقي بتتكلم عن اللي بيشجع اليوفي أو السيتي أو غيرهم و دي خصلة بنت ستين كلب في المشجعين المتعصبين إن دايماً علي لسانة الإسطوانة المشروخة بتاعة إشمعني هم؟ .. معرفش إنت تعرف ولا لا بس نفس التهمة المتوجهة ليوفينتوس هي هي نفسها بحذافيرها متوجهى لنادي نابولي بس لسه نتيجة التحقيق في قضية نابولي مش مُعلنة و مش رسمية فتلاقي مشجع يوفينتوس يقولك إشمعني نابولي؟ .. مشجع السيتي يقولك طب ما تشيلسي بيحرق فلوس ولا كأنها فلوس حرام إشمعني هم.
الحل للمشكلة دي سواء كنت بتتكلم عن حالتي يوفينتوس و السيتي علي وجه الخصوص أو إفساد كرة القدم عموماً إن لازم أي حد له علاقة بكرة القدم من أول رئيس النادي لمدير الكورة للمدير الفني لللاعيبة لحتي المشجعين لازم يبقي عندهم إيمان إن فيه نظام عادل و شغال .. مفيش خيار و فاقوس .. اللي يغلط يتحاسب أيا كان إبن مين في البلد .. في نفس الوقت لازم المشجع بالذات يبقي فاهم زي ما قلت في المقدمة إن كرة القدم إتغيرت .. المشكلة اللي عايشها يوفينتوس و السيتي ليها علاقة أولاً و أخيراً بتستيف الورق الخاص بالحسابات و الميزانية و دي حاجة لإن مشجع كرة القدم العادي بيبقي صعب عليه إنه يفهمها فبتلاقي مخه بشكل تلقائي يجري إنه يفسر اللي بيحصل إن أكيد فيه مؤامرة مع إن مفيش مؤامرة ولا نيلة .. يعني خليني أحكيلك قصة غريبة حصلت في الساعات الأخيرة من الميركاتو بتاع يناير اللي فات ده إن تشيلسي كان حيبيع (حكيم زياش) لباريس سانجيرمان و خلاص اللاعيب بيحضر شنطته و مسافر و بيتحضرله الكشف الطبي و مجرد العقد حيتبعت بالإيميل لباريس يتمضي و شكراً .. عشان وقتها أغلب المحاسبين و المحامين بتوع تشيلسي كانوا مسحولين في صفقة إنتقال (ميخايلو مودريك Mykhaylo Mudryk) من شاختار دونيتسك و عشان هو أوكراني و الحرب هناك معطلة كل حاجة فكانت صفقة معقربة و مفيش حد كان فاضي من المحاميين التقال في تشيلسي فاللي مسك تستيف الورق بتاع عقد (حكيم زياش) عيال صغيرة فضلت تغلط في حاجات تافهة في العقد بتاعه فكل ما يبعتوه لباريس المحامين بتوع باريس سانجيرمان يطلعولهم غلطات .. الهري دي فضل مكمل لحد ما فترة الميركاتو خلصت و (حكيم زياش) مراحش و فضل محبوس في تشيلسي .. هل بقي فيه حد من مشجعي تشيلسي أو باريس عنده خلق إنه يسمع ده و يصدق إن دي غلطة محامين؟ .. أكيد لا.
المصادر:
- مقالة بعنوان Clear verdicts in Man City, Juve cases might restore faith in soccer’s ruling bodies, but don’t hold your breath نشرت في موقع محطة ESPN و ده لينك المقالة الأصلية:
https://www.espn.com/soccer/blog-marcottis-musings/story/4872764/man-city-juventus-cases-could-restore-faith-in-soccer-regulators
- مقالة بعنوان Explaining Juventus mess: What they did wrong and what it means نشرت في موقع محطة ESPN و ده لينك المقالة الأصلية:
https://www.espn.com/soccer/blog-marcottis-musings/story/4858715/explaining-juventus-mess-what-they-did-wrong-and-what-it-means
