لينك التسجيل الصوتي علي ساوند كلاود:
https://on.soundcloud.com/6Q4kEjuUPPsZkYbcl8
فيه شعوب ربنا خلقها شاطرة في حاجات معينة .. العرب شاطرين في الحلويات .. الطليان شاطرين في المكرونة والبيتزا .. الفرنساويين شاطرين في الموضة والمخبوزات .. الألمان شاطرين في الهندسة .. بس الحاجة الغريبة فعلاً إن في الكام سنة اللي فاتوا انا اقدر اقول وانا متطمن إن الإسبان هم أشطر خلق الله في تخريج ماسورة مدربين كرة قدم شاطرين ومغرقين الدنيا وبسم الله ما شاء الله مسيطرين علي السوق .. عشان بس ميبانش إن كلامي مرسل ومش مدعوم بأرقام فانا عايزك تعرف كام معلومة كده:
- لو جيت بصيت علي الدوريات الخمسة الكبيرة في أوروبا اللي هم الدوري الإنجليزي والألماني والإيطالي والأسباني والفرنساوي حتلاقي إن إسبانيا هم أكتر جنسية بينتمي إليها المدربين اللي ماسكين فرق في الدوريات دي .. المدربين الإسبان نسبتهم 19.6% باجمالي 28 مدرب في الدوريات الخمسة الكبيرة .. وراهم المدربين الطليان ونسبتهم 16.1% باجمالي 23 مدرب .. وراهم الألمان بنسبة 15.4% باجمالي 22 مدرب .. في المركز القبل الأخير حتلاقي المدربين الفرنساويين بنسبة 12.6% وباجمالي 18 مدرب .. وأخيراً المدربين الأنجليز اللي تقريباً سمعتهم إن امكانياتهم متفرقش كتير عن مدربين الايجيبشن بريميير ليج بنسبة 7% باجمالي 10 مدربين اللي هم الاندية في الدوري الانجليزي اللي معهاش فلوس تجيب مدربين أجانب.
- الموسم ده اللي هو 2025-2026 اتلعبت 3 بطولات أوروبية اللي هم دوري أبطال أوروبا Champions League و الدوري الأوروبي Europa League ودوري المؤتمرات Conference League .. من الست الفرق اللي وصلوا الفاينال في البطولات الثلاثة منهم 4 فرق ماسكهم مديرين فنيين إسبان.
السؤال دلوقتي هو ليه؟ .. ايه سر تفوق المدربين الأسبان بالشكل ده؟ .. عباقرة هم أوي يعني؟ .. هم اللي جابوا التايهة؟ .. في رأيي الشخصي عايز تفهم ايه المشكلة .. بص علي الاحصائية اللي حطيتها ليك في البداية بتاعة نسبة المدربين اللي بينتموا للدوريات الأوروبية الخمسة الكبيرة .. بص علي ألمركزين الأول والأخير .. بدأت تشوف طرف الخيط؟ .. المدربين الإسبان هم أكتر جنسية اشتغلت في الدوريات الخمسة الأوروبية الكبيرة والمدربين الأنجليز كانوا في المركز الأخير .. خليني اعرضلك وجهة نظري أكتر .. لو بصيت علي نفس الدوريات وبدأت تشوف هو ايه وضع المديرين الفنيين الوطنيين في دوريات بلدهم دي حتلاقي الأتي:
- الدوري الإسباني نسبة المدربين الإسبان اللي بيشتغلوا فيه بتوصل 75% من اجمالي المديرين الفنيين بيمرنوا فرق الدوري الإسباني اللي بيسموه لا ليجا La Liga.
- في الدوري الألماني النسبة بتاعة المدربين الوطنيين بتقل شوية حتلاقي إن المدربين الألمان اللي بيمرنوا فرق في البونديزليجا Bundesliga وصلوا 66.7%.
- في الدوري الإيطالي اللي بيسموه سيريا اه Seria A نسبة المدربين الطليان بتوصل 65% يعني مش بعيد أوي عن نسبة الألمان اللي بيمرنوا فرق في الدوري الألماني.
- الدوري الفرنساوي برده النسبة مش بطاله للمدربين الفرنساويين اللي شغالين فيه 55.6%.
- المشكلة في الدوري الإنجليزي اللي بيسموه بريميير لييج Premier League واللي ناس كتير وانا منهم الحقيقة بعتبره الدوري الأقوي علي مستوي العالم واللي بحكم الأرقام اللي مفيهاش مجال لاختلاف الأراء فهو الدوري الأغلي علي مستوي العالم .. نسبة المدربين الإنجليز في الدوري الإنجليزي يدوبك 25% .. ده معناه إن المدربين الإسبان هم أكتر جنسية شغالة في الدوري الإسباني بتاع بلدهم والأهم إنهم أكتر جنسية ماسكة فرق في الدوري الإنجليزي.
بس الفكرة إن الأرقام والإحصائيات لوحدها مش بتوريك الصورة كاملة .. هي بس بتوريك حجم أو Scale هيمنة المديرين الفنيين الإسبان علي الساحة الكروية لإن زي ما انا شارحلك من شوية هم مسيطرين علي دوريين من الدوريات الخمسة الكبيرة اللي هم الدوري الإسباني بتاع بلدهم ومعاه الدوري الإنجليزي بس هو برده السؤال اللي محدش جاوب عليه لحد دلوقتي هو ليه؟ .. ليه أي فرقة كورة معاها فلوس وعايزه تعمل مشروع بتقرر تجيب مدير فني إسباني؟ .. وهي الفكرة الحقيقة في أهم كلمة في السؤال وهي كلمة مشروع .. لسبب ما اسم المديرين الفنيين الإسبان بقي مرتبط بفكرة المشروع أو Project اللي هو إن النادي من الأول خالص بيقول أنا مش مستعجل علي إني أخد بطولة .. بمعني أخر .. لو إنت نادي في أوروبا عايز تاخد بطولة بكره الصبح فانت مش حتجيب مدير فني إسباني .. السؤال هو ازاي ده حصل؟
لو السؤال ده انا كنت سألته لنفسي من سنتين تلاتة كان حيكون رأيي غالباً هو الحاجة اللي بيسموها في كرة القدم متلازمة جوارديولا Guardiola Syndrome وهي بمنتهي البساطة إن بداية من 2009 وانت طالع لما (بيب جوارديولا) فجعنا كلنا لما شفنا فرقة برشلونة وهي بتدوس علي وش أي حد في الملعب فبقي واضح للناس كلها إن فيه طريقتين لا ثالث لهما كرة القدم بتتلعب بيهم:
- أول طريقة هي السيكسي فوتبول واللي فيه ناس بتسميها التيكي تاكا ودي الطريقة اللي بيلعب بيها (جوارديولا) وفيه ناس وانا منهم بحب اشبهها بالعيل الصغير اللي شبطان في لعبة والفكرة بمنتهي البساطة إن السيكسي فوتبول باختصارهي إن فرقتك تفضل شبطانة في الكورة ومستحوذة عليها .. مش لازم نعمل بيها حاجة .. بس تبقي معانا .. دي الطريقة اللي فرقة برشلونة وقت ما كان ماسكها (جوارديولا) ووراه (تيتو فيلانوفا) الله يرحمه لعبوا بيها .. دي الطريقة اللي (جوارديولا) نيم ألمانيا كلها من المغرب بيها لما مسك بايرن ميونيخ .. دي الطريقة اللي إسبانيا كسبت بيها بطولتين يورو وفي النص حشرت بينهم بطولة كاس عالم .. وعشان (جوارديولا) بيلعب بالطريقة دي اللي بتعتمد بالأساس إن يبقي عندك حارس مرمي بيعرف يلعب برجليه فالناس اللي متابعه كورة فاكرة كويس الخناقة اللي حصلت لما أول ما (جوارديولا) جه مانشستر سيتي ومشي الحارس الإنجليزي (جو هارت) عشان مبيعرفش يلعب برجليه .. ده كان يوريك قد إيه الرجل ده مؤمن بفكره إنه مستعد يخش في خناقة مع الإنجليز نفسهم ويدبحلهم القطة عشان كلمته تمشي وقد كان.
- ثاني طريقة هي الخلف خلاف بتاع السيكسي فوتبول وهي ما يسمي الأجلي فوتبول أو زي ما ناس كتير بتحب تسميها كورة ركنة الاوتوبيس ودي اللي اتشهر بيها بدون وجه حق الحقيقة (جوزيه مورينيو) و تلميذه اللي عايز اوتوبيس سياحي فاخر يدوس عليه (دييجو سيميوني) .. فكرة ركنة الاوتوبيس إننا حنفضل قاعدين في منطقة جزاءنا مستنيين حد من الفرقة اللي معاها الكورة يسرح أو يعمل تمريرة غلط أو يتكعبل عشان نفجعه ونقطعها منه ونروح زي الطيارات المحروقة في هجمة مرتدة .. دي الطريقة اللي انترميلان خد بيها الثلاثية التاريخية بتاعتهم .. دي الطريقة اللي إيطاليا خدت بيها كاس عالم 2006 .. دي الطريقة اللي (سيميوني) حط بيها أتليتكو مدريد كواحد من أضلاع ثريسوم تفوق الكرة الإسبانية في السنين اللي فاتت.
الوضع اللي كان قدام أي إدارة نادي هو زي ما (كاظم الساهر) بيقول إني خيرتك فاختاري .. عايز تلعب بأنهي طريقة وبناء عليه تجيب المدير الفني اللي يلعبلك بالطريقة دي .. الفكرة إن مؤخراً بدأت تطلع طريقة ثالثة .. طريقة محدش بيعرف يلعب بيها زي الجيل الجديد من المديرين الفنيين الإسبان وهي طريقة لعب معتمدة علي فكرة هو الكلام علي إيه النهاردة .. احنا بنلعب بالتشكيل وبالفكر اللي يخلينا نكسب الفرقة اللي قدامنا .. نشوف نقطة ضعفها ايه ونلعب عليها .. مبيعرفوش يدافعوا قصاد العرضيات يبقي نقرفهم في عيشتهم بكرات عرضية من الوينجين ولا اكنك وانت بتتفرج علي الماتش تحس إنك ركبت ألة الزمن وبتتفرج علي ماتش كورة من الثمانينات ايام ما كان الكابتن (محمود الجوهري) الله يرحمه بيدرب منتخب مصر .. قلبين الدفاع بتوعهم بطاء يبقي الوينجين بتوعنا يجروا من وراهم عشان الكورة تتلعبهم من لاعيب خط وسط بيكون بيعرف يباصي .. إنت قصاد واقع جديد لانج إنك بتتفرج علي فرقة النهاردة بتلعب 4-4-2 بس الماتش الجاي حيلعبوا 4-3-3 وعشان عندهم ماتش في Champions League قصاد فرقة بتستحوذ علي الكورة كتير فتلاقي طريقة اللعب اتقلبت بقت 3-4-3 .. مدرسة ماشية بمبدأ أنا محدش يتوقعني.
المدرسة الجديدة اللي طلعت دي بيمثلها مديرين فنيين إسبان العيون كلها عليهم دلوقتي .. خد عندك مثلاً (تشابي ألونسو) .. ده رجل كان مدير فني لفرقة علي الله حكايتها اسمها باير ليفركوزن بتلعب في الدوري الألماني .. الفرقة دي سمعتها كانت زي الزفت في حتة إنهم دايماً في الموسم اللي يبقوا فيه جامدين زحليقة بيجيوا في اخر كام ماتش في السيزون ومتفهمش ايه اللي بيحصلهم وركبهم بتبدأ تخبط في بعض ويخسروا .. ده اللي حصلهم في سيزون 2002-2003 لما خسروا نهائي Champions League وخسروا الدوري في اخر كام ماتش .. ده السبب إن طلع عليهم في ألمانيا اسم باير نيفر كوزن .. يعني دي الفرقة اللي عمرها ما حتكسب بطولة .. سبحان الله يمسكهم (ألونسو) ويكسبوا الدوري .. يكسبوا الكاس .. يوصلوا فاينال اليوروبا لييج .. ومش بس كده .. يكسبوا الدوري من غير ما يخسروا ولا ماتش .. فرقة Invincible بتاعة البونديزليجا بعد ما اللقب ده احتفظ بيه أرسنال لنفسه أيام (أرسين فينجر) الله يمسيه بالخير.
لو تيجي تسألني هو يا تري إيه طريقة لعب باير ليفركوزن في الموسم التاريخي بتاعهم اللي كسبوا فيه الدوري الألماني حرد عليك والمصحف ما اعرف .. لو الماتش احتاج يركنوا الاوتوبيس ويلعبوا علي المرتدات حيعملوا كده .. لو الماتش احتاج يمسكوا كورة ويقضوها تيكي تاكا وبناء الهجمة من حارس المرمي حيعملوا كده .. الماتش مقفل بالضبة والمفتاح وعايزين جون من كورنر حيعرفوا يجيبوا جون من كورنر .. لما (ألونسو) راح ريال مدريد فدي كانت شهادة في حقه إنه مخافش من التجربة ومهربش من المسئولية .. بدايته كانت رائعة في ريال مدريد بس هي مشكلة الطريقة الثالثة في لعب الكورة اللي بينتمي ليها (ألونسو) إنها بتحتاج قبل ما يكون عندك لاعيبه كورة مهاريين فانت محتاج يبقي عندك لاعيبة رجاله .. لاعيبه طبيعتها بتخليها تقبل بسهولة فكرة التضحية عشان خاطر الفريق .. إنت ممكن يتطلب منك تضغط وتحلق علي الفرقة اللي قدامك زي الفراخ .. حيتطلب منك تدافع ولا كانك بتدافع عن شرفك .. دي صفات مش حتلاقيها في لاعيبة ريال مدريد اللي ورثهم (ألونسو) وعشان كده مشي وبعد ما مشي والموسم خلص رئيس النادي (فلورينتينو بيريز) اكتشف إنه محتاج يمشي نص الفرقة كمان لإن الحقيقة اللي بقت واضحة للكل إن المشكلة مش في (ألونسو) ولا في طريقته .. المشكلة إن المقادير المتاحة في أوضة لبس ريال مدريد متنفعش مع الطريقة الجديدة اللي بينتمي ليها المديرين الفنيين الإسبان.
مثال تاني فج الحقيقة يمكن أكتر من (ألونسو) هو (سيسك فابريجاس) .. الاتنين فيهم عوامل مشتركة .. الاتنين بدأوا حياتهم كلاعيبة كورة في نفس المركز اللي هو نص الملعب .. الاتنين بدأوا حياتهم في إسبانيا .. الاتنين بعد كده راحوا انجلترا وعضمهم نشف هناك .. الاتنين عدي عليهم مدربين تقال أوي شربوا منهم أفكار كتير .. الاتنين كانوا زمايل في الجيل الذهبي لمنتخب اسبانيا اللي خد بطولتين يورو ورا بعض في 2008 و 2012 وبينهم زي الساندويتش كاس عالم 2010 .. زي ما (ألونسو) ورانا أفكاره في الكورة اللي هي جزء من المدرسة الجديدة في التدريب في باير ليفركوزن فبرده (فابريجاس) ورانا ده في فرقة كومو في الدوري الإيطالي .. صحيح هو مخدش الدوري بس وصل بيهم إنه حيلعب تشامبيونز لييج موسم 2026-2027 في انجاز مشجعين النادي اللي علي الله حكايته عمرهم ما كانوا يحلموا بيه .. (فابريجاس) نجح مع كومو عشان افكاره اللي هي تقريباً نفس أفكار (الونسو) اللي هي نفس الفكرة بتاعة احنا ملناش طريقة لعب انما بنتأقلم علي حسب حنلاعب مين عايزه لاعيبه مش مغرورة ومش فرحانة بنفسها وده اللي كان متاح ليه في كومو.
المثال الثالث واللي انا عارف إنه حيعمل جدل لإنهي برده شايفه بينتمي لنفس المدرسة هو (مايكل أرتيتا) .. هو بقاله كتير بيبني العمارة بتاعة ارسنال بس الحمد لله ربنا كرمه وخد الدوري .. (أرتيتا) مدرب اسباني .. حصل .. هل بيلعب سيكسي فوتبول؟ .. مش كتير .. بيبني الهجمة من حارس المرمي بتاعة (ديفيد رايا)؟ اه عشان بيعرف يلعب برجله .. طب هو بيركن الاوتوبيس؟ لو احتاج عشان عنده خط دفاع من أقوي خطوط الدفاع في أوروبا مش في انجلترا بس .. طب بيعتمد علي الكراث الثابتة؟ .. زي المياه والهواء .. رغم إن (أرتيتا) كان تلميذ (جوراديولا) والمفروض يعني إن المنطق بيقول إن التلميذ يمشي علي نفس فلسفة استاذه .. حنهاجم وانتوا مالكوا خلوا الدفاع ينفعكوا .. بس (أرتيتا) زيه زي (فابريجاس) زيه زي (ألونسو) جايين معاهم مدرسة جديدة .. مدرسة اتولدت صحيح في إسبانيا بس في حتة من إسبانيا تختلف كتير عن إسبانيا اللي انت عارفها .. جايه من الباسك.
فوق خالص في شمال إسبانيا حتلاقي حتة محشورة بين إسبانيا وفرنسا اسمها اقليم الباسك .. اقليم الباسك ده رغم إنه في شمال إسبانيا إلا إن عشان تفهم دماغ الناس اللي عايشه فيه حاول تبصلهم علي إنهم الصعايدة بتوع إسبانيا .. هم أكتر ناس مليانين تناقضات ممكن تشوفها في حياتك .. هم أخر ناس اعتنقت المسيحية الكاثوليكية سواء في إسبانيا أو أوروبا كلها بس هم برده اللي بدأت عندهم شرارة الحملة الصليبية لطرد المسلمين من الأندلس .. لسنين وهم بيطالبوا باستقلالهم عن إسبانيا والناس القديمة اللي زي حالاتي اللي كانت بتتفرج علي نشرة أخبار الساعة تسعة بليل علي القناة الأولي ممكن يكونوا عدي عليهم اسم حركة إيتا الإنفصالية ودي حركة كانت بتنفذ هجمات إرهابية ضد أهداف عسكرية وحكومية إسبانية علي أمل إن يجي اليوم اللي اقليم الباسك يبقي دولة مستقلة بس اللي عرفوا يوصلوا ليه إن الباسك وإن كاء جزء من المملكة الإسبانية إلا إنه اقليم بيتمتع بحق الحكم الذاتي .. الباسك كاقليم بيمثل 1.4% بس من مساحة إسبانيا عايش فيه 4.6% من اجمالي تعداد سكان البلد بس سبحان الله متفهمش ازاي 20% من أندية الدوري الإسباني منتمية لاقليم الباسك .. الاقليم ده طلع منه حنفية مديرين فنيين وسبحان الله كلهم بينتموا للمدرسة الجديدة في كرة القدم .. اسامي زي (أوناي ايمري) .. زي (مايكل ارتيتا) .. زي (تشابي ألونسو) .. زي (أندوني أيراولا) اللي لسه متعين مدير فني لليفربول .. زي (جولين لوبيتيجي) اللي كان ماسك إسبانيا لو تفتكر ومسك ريال مدريد فترة ومسك منتخب قطر .. زي (أيمانول ألجواسيل) المدير الفني اللي عمل بصمة حلوة مع ريال سوسيداد .. زي (جوزيه لويس مينديليبراند) اللي كان ماسك فرقة أوليمبياكوس اليوناني وخد بطولة يوروبا لييج و كونفيرينس لييج .. حتي ناس مكانوش مديرين فنيين بس كانوا مديرين كورة زي (تشيكي بيجريستين) اللي لسنين كان ماسك مدير الكورة في مانشستر سيتي وهو اللي جاب (جوارديولا).
تفوق المديرين الفنيين الإسبان اللي أصلهم من الباسك راجع أولاً وأخيراً للطريقة اللي الأندية الإسبانية وخصوصاً اللي في الباسك بتشتغل بيها واخص بالذكر هنا اتليتيكو بلباو و ريال سوسيداد .. اقرب حاجة تخليك تفهم هي الناس دي بتشتغل ازاي هو اني اقولك إن الناديين دول هم الاسماعيلي بتاع إسبانيا أيام ما كان الإسماعيلي بيطلع لاعيبه ولا اجدعها خط انتاج في مصنع من بتوع الجيش .. انت بتتكلم عن ناديين لسنين وسنين وهم ماشيين بفلسفة إن بالصلاة علي سيدنا النبي اي ماتش ليهم في الدوري أو الكاس أو بطولة أوروبية بص علي ال11 لاعيب اللي في الملعب حتلاقي 80% من التشكيلة هم لاعيبة اتولدوا واتربوا في الباسك .. زود علي كده إنك بتتكلم عن ناديين مملوكين بشكل شبه كامل للجماهير .. حاول تبصلهم علي إنها فعلاً خط انتاج في مصنع .. العيل الصغير بيتولد في الباسك .. ابوه وامه بيودوه نادي يلعب فيه سواء بلباو أو سوسيداد أو أوساسونا أو ديبورتيفو الافيز.. لو الواد فيه الرمق بيلعب اساسي طول مراحل الناشئين لحد ما يلعب دوري ممتاز .. لو الواد فلتة زي (ألونسو) مثلاً بيطلع بره يلعب في دوريات أوروبية يلقط رزقه من البطولات .. الواد يبطل كورة يرجع تاني الباسك يمرن في أكاديمية النادي وده اللي عمله (ألونسو) .. يعمل شغل حلو في قطاع الناشئين يخلي العين تبقي عليه فيجيله عرض يمسك فرقة الدوري الممتاز .. جمعية ودايره .. ده معناه إن مع الوقت الباسك بقي مزرعة كتاكيت عماله تطلع في لاعيبه و في مدربين.
مثال تاني صارخ يمكن أكتر من (ألونسو) هو (إيمانول ألجواسيل) .. ده زي ما قلتلك كان المدير الفني لريال سوسيداد وانت محتاج تبقي خبير في اللاليجا الصراحة عشان تبقي عارف هو مين الرجل ده بس هي دي الفكرة ورا أهميته .. إنه مجرد ترس في مكنة انت كمشجع كورة مش شايفهها .. هو كان بيلعب باك شمال وبدأ حياته في أشبال ريال سوسيداد وقضي حياته كلها كلاعيب كورة في النادي وأول ماتش لعبه كان في موسم 1990-1991 ولما اعتزل مرن في مراحل الناشئين لحد لما في 2011 بقي مساعد المدير الفني لفرقة تحت 19 سنة .. بعد كده اترقي يمسك الفرقة اللي بتلعب في دوري المظاليم .. في موسم 2017-2018 مسك الفرقة الأولي كمدير فني مؤقت في اخر 9 ماتشات في السيزون ولما اتعرض عليه يكمل في منصبه هو رفض علي أساس إنه هو شايف نفسه أكتر كمدرب لمراحل الناشئين .. بعدها بسنة كلاكيت تاني مرة اتطلب يمسك الفرقة الأولي برده في اخر السيزون وبعد ما خلص السيزون كمل في منصبه كمدير فني .. (ألجواسيل) قعد في منصبه خمس سنين خد فيهم ريال سوسيداد من فرقة اخرها تنافس علي الهروب من الهبوط لفرقة كسبت كأس ملك إسبانيا سنة 2020 في النهائي اللي لعبوه قصاد أتليتيكو بلباو في دربي الباسك عشان النادي يحقق أول بطولة ليه من 34 سنة ومن وقت ما مسكهم لحد دلوقتي وريال سوسيداد بيلعب في أوروبا سواء تشامبيونز ليج أو يوروبا ليج.
نجاح الباسك في انتاج كتاكيت اللاعيبه وفراخ المدربين خلي مناطق تانية جوه اسبانيا تمشي زيهم .. برشلونة .. اشبيلية .. دلوقتي انت بقيت في وضع غريب جداً إن سنة 2017 إسبانيا بقي عندها 15,089 مدرب معاهم رخصة تدريب UEFA Pro او UEFA A .. ده قصاد إن انجلترا مثلاً في نفس السنة اللي هي 2017 كان عندها 1,796 مدرب معاهم واحدة من الرخصتين .. بس خلي بالك .. ربنا قال اسعي يا عبد وانا اسعي معاك .. أندية الباسك سعت إن يبقي عندها اكتفاء ذاتي من اللاعيبة والمدربين بس هم برده ربنا وفقهم إنهم تحت مظلة اتحاد كورة اسباني بيدي دعم كبير للمديرين الفنيين الإسبان اللي عايزين ياخدوا رخص تدريب .. لو انت مواطن اسباني عايز تاخد شهادة A License إسبانية اللي شرط عشان تمرن فرقة في الدوري الإسباني فانت حتدفع 960 يورو وعشان تاخد رخصة Pro License الأوروبية بتدفع 1,070 يورو .. قصاد لو انت مواطن أنجليزي وعايز تاخد نفس الرخصتين فانت عشان تمرن في الدوري الإنجليزي وتاخد A License بتدفع 3,645 يورو وعشان تاخد Pro License بتكعلك 9,890 يورو.
اللي انا عايزك تعرفه إن نجاح المديرين الفنيين الإسبان في الفترة الحالية وهيمنتهم علي الساحة ونسبة مش قليلة منهم جايين من إقليم الباسك هو في الاخر نتاج سنين من التعب والشغل والتخطيط .. اللي بيحصل ده مش فلتة قد ما هو حصاد محصول اتزرع بقاله سنين .. شغل عملته الأندية إن لأسباب قومية وتاريخية بحتة قالت لنفسها احنا مش ناقصنا ايد ولا رجل عشان نجيب خواجة يمسك فرق الكورة بتاعتنا وحنعتمد بشكل كامل علي ولادنا .. شوية واتحاد الكورة قالهم طب وانا حدعم الفلتات اللي بتطلع من عندكوا واديها الشهادات والتدريب اللي هم محتاجينه .. تجربة متكاملة لازم تبصلها علي بعضها عشان تفهم هي حصلت ازاي.
المصادر:
- مقالة بعنوان Why are Spanish Coaches succeeding worldwide? نشرت علي موقع GC3 Media وده لينك المقالة الأصلية:
Why Are Spanish Coaches Succeeding Worldwide? – GC3 MEDIA - مقالة بعنوان Why does the Basque Country produce so many top coaches? نشرت علي موقع Jobs in Football وده لينك المقالة الأصلية:
Why Does the Basque Country Produce So Many Top Coaches? | Jobs In Football
