مشكلة البني أدمين عموماً هي إننا دايماً بنحب نعقد الأمور ويمكن ده سبب من أسباب خراب المنظومة التعليمية في مصر إن المدرسين دلوقتي بقوا بيحطوا المعلومة في بق الطالب عشان يرميها في ورقة الإمتحان وينجح وده في حد ذاته بيتعارض مع طبيعة البشر اللي ربنا خلقنا بيها وده اللي مخلي العيال اللي بتطلع من المدارس حرفياً ودون أدني مبالغة طور تايه في برسيمه .. عشان بنبسطلهم الدنيا عكس ما عقلنا غصب عننا بيحب يجعلص التفاهات .. خد قصة بقرة بني إسرائيل مثلاً .. القصة دي ليها كذا رواية بس أنا حكلمكوا عن واحدة فيها يمكن لإنها أكتر رواية بتوصل الفكرة اللي أنا عايز أتكلم فيها .. كان فيه رجل معاه فلوس في بني إسرائيل بس الرجل مكنش له ولاد يورثوه فواحد من قرايبه كان طمعان في الورث قتله ورمي جثته في الشارع .. مش بس كده .. القاتل راح لسيدنا (موسي) عليه السلام يشتكيه إن قريبه مات ومحدش عارف مين اللي قتله اللي هو تجسيد للمثل الشعبي قتل القتيل ومشي في جنازته .. سيدنا (موسي) عليه السلام جمع الناس وقالهم اذبحوا بقرة .. الناس بصتله وقالتله أتتخذنا هزواً اللي هو إنت بتهزر معانا .. رد عليهم “أعوذ بالله بأن أكون من الجاهلين-قالوا ادع لنا ربك يبين لنا ما هي قال إنه يقول إنها بقرة لا فارض-عوان بين ذلك” .. يعني بقرة سنها متوسط لا هي كبيرة ولا هي لسه صغيرة اللي هي تقدر تقول نص نص .. “قالوا ادع لنا ربك يبين لنا ما لونها قال إنه يقول إنها بقرة صفراء فاقع لونها-تسر الناظرين” .. واضحة دي يعني شكلها حلو .. “قالوا ادع لنا ربك يبين لنا ما هي إن البقر تشابه علينا وإنا إن شاء الله لمهتدون-قال إنه يقول إنها بقرة لا ذلول تثير الأرض مسلمة لا شية فيها” .. يعني زي ما تقول كده متذلتش في الشغل ومحدش سحلها في الزراعة ومفيهاش عيب .. “قالوا الأن جئت بالحق فذبحوها وما كادوا يفعلون” .. بس هي الحقيقة القصة مخلصتش علي كده.
بني إسرائيل فضلوا يدوروا علي بقرة بالمواصفات دي ملقوهاش غير عند واحدة ست كبيرة في السن بتربي يتامي وكانت مش سالكة برده هي كمان .. هي كانت عارفه إن مفيش بقرة بالمواصفات اللي ربنا قال عليها موجودة في السوق غير عندها قامت هي ضاربة سعر البقرة في إتنين .. الناس راحت لسيدنا (موسي) تشتكيله إن الست مغلية السعر فهو رد عليهم معلش يعني ما أنتوا اللي جبتوه لنفسكوا .. إنت إتقالكوا أذبحوا بقرة فكنتوا أذبحوا أي بقرة وخلاص بس هي النفس البشرية اللي حبت تنخور في التفاصيل .. طب شكلها إيه طب لونها إيه .. القصة ليها باقي إن سيدنا (موسي) قالهم هاتولي عظم البقرة اللي أتذبحت فخد حته وراح لجثة الميت ضربه بيها فرجع للحياة لحظياً وقال لسيدنا (موسي) مين اللي قتله فسيدنا (موسي) أعدم قريبه اللي هو لو كان ساب جثته في الطريق وسكت كان زمانه ورث فلوسه من سكات بس نقول إيه .. هي النفس البشرية كده .. وده حيودينا لموضوعنا النهاردة .. تعدد الزوجات.
ربنا قالها صريحة في سورة النساء .. “وإن خفتم ألا تقسطوا في اليتامي فانكحوا ما طاب لكم من النساء مثني وثلاث ورباع فإن خفتم ألا تعدلوا فواحدة أو ماملكت أيمانكم ذلك أدني ألا تعولو” .. وفي نفس السورة عشان متروحش بعيد يعني قال “ولن تستطيعوا أن تعدلوا بين النساء ولو حرصتم فلا تميلوا كل الميل فتذروها كالمعلقة وإن تصلحوا وتتقوا فإن الله كان غفوراً رحيماً .. يعني إنت عشان تتجوز إتنين لازم تعدل بينهم بس مش حتعرف تعدل بينهم فخليك في واحدة .. سهلة أهي .. بس نقول إيه جينات بني إسرائيل فينا فقررنا إننا نقاوح ومتخذين من مسلسل عائلة الحاج متولي مثل أعلي يحتذي بيه والحقيقة إن أنا النهاردة جاي أبشرك وفي نفس الوقت جاي أحذرك .. جاي أبشرك إن التريند العالمي تجاه فكره تعدد الزوجات أو Polygamy بالإنجليزي بدأ يتغير وخليني أقولك إن علي سنة 2050 يدينا ويديك طولة العمر تعامل العالم مش بس في عالمنا العربي أو الإسلامي إنما حتي الغربي مع فكرة تعدد الزوجات حيبقي شبه رأيهم في المثلية الجنسية كده اللي هو كانت حاجة مرفضة ويعاقب عليها القانون بس دلوقتي رفضها بقي يعاقب عليه القانون .. وفي نفس الوقت جاي أحذرك .. ربنا قال هو ينفع بشرط العدل ومش حتعرف تعدل فبلاش .. اللي عايز اتكلم عنه النهاردة هو ليه أنا بقولك إن خلال ال30 سنة الجايين إنت قصاد تغيير جذري في وجهة نظر العالم في فكرة تعدد الزوجات؟ .. الحقيقة إن فيه 3 أسباب رئيسية للتغيير ده:
سبب رقم واحد .. الناس قيمها ومبادئها بتتغير مع الوقت:
أنا عارف إن تعدد الزوجات مقبول بس المثلية الجنسية حرام شرعاً بس هنا أنا مش بتكلم عن كونهم حلال أو حرام قد ما أنا عايز أقف عند العلاقة بين ثقافة الناس والقوانين اللي بتحكمهم وعارف إن ده يبان موضوع فلسفي معقد بس هو مش كده .. تعالي مع بعض نتخيل سوا إننا بنحاول نتوقع يا تري هو قانون الأحوال الشخصية في مصر حيبقي شكله إيه كمان 50 سنة .. لو شايف إنه سؤال سخيف علي أساس إن عمر ما القانون حيتغير في 50 سنة فأنا عايزك ترجع تقول الكلام ده لاجدعها محامي في مصر وقوله إن خلال 50 سنة حيبقي فيه حاجة إسمها خلع وحاول تتخيل ملامح وشه وإنت بتشرحله إزاي الخلع حيبقي واقع كلنا عايشينه دلوقتي .. الفكرة في إن فيه 3 حاجات بيتغيروا ورا بعض وفي ديل بعض .. الثقافة وبعد كده السياسة وبعد كده القانون .. الخلع يعتبر مثال صارخ علي ده إن في الأول الناس بدأت تتكلم عن حقوق المرأة وإزاي المرأة من حقها تلبس اللي هي عايزاه وتشتغل زي ما هي عايزه .. شوية والسياسة العامة للدولة متمثلة في المسلسلات والأفلام بقت بتشجع ده .. لما كل ده حصل الناس كلها بصت للقانون وقالوله دورك إنك تتعدل لإن مينفعش البلد كلها تبقي قررت تروح في سكة ويفضل القانون علي قديمه .. نفس الفكرة هي هي تقدر تطبقها علي المثلية الجنسية بره في المجتمع الغربي.
لحد سنة 1987 يعني قبل ما أنا اتولد بسنة كانت المثلية الجنسية بتتصنف علي إنها مرض عقلي زيها زي إنفصام الشخصية كده في الإصدار الثالث من مرجع Diagnostic and Statistical Manual of Mental Disorders (DSM-III) اللي يعتبر من أهم المراجع العلمية في الطب النفسي .. سنة 1994 يعني لما بقي عندي 6 سنين نزل الإصدار الرابع من المرجع نفسه واللي فيه المثلية الجنسية إتغير تصنيفها من مرض عقلي لإضطراب بسبب إن البني أدم اللي عنده الإضطراب ده مش عارف ميوله الجنسية إيه .. سنة 2013 لما بقي عندي 25 سنة إتشال كل ما له علاقة بإن المثلثة الجنسية تعتبر إضطراب نفسي في الإصدار الخامس .. دلوقتي المثلية الجنسية بقت واقع مقنن في الغرب .. ده معناه إن لو فيه حد قدي عايش مثلاً في أميركا فهو إتولد في مجتمع رافض للمثلية الجنسية بس مع الوقت الرفض ده تحول مش بس لقبول للفكرة ثقافياً وسياسياً إنما بقت مصدق عليها قانوناً .. مش بس كده .. إنت أي حد يطلع يقول إنه ضد المثلية الجنسية بقي ممكن يعاقب قدام القانون .. ليه أنا بحكي ده .. وفق معهد الدراسات الإحصائية جالوب بول Gallup Poll فسنة 2006 يدوبك 5% بس من الأمريكان كانوا مع فكرة تعدد الزوجات .. جري الشريط لحد سنة 2023 النسبة دي نطت بقت 23% وده تقريباً نفس نسبة الأمريكان اللي كانوا مؤيدين للمثلية الجنسية في التسعينات .. إزاي ده حصل؟
- واحد من أهم البدع اللي ظهرت مؤخراً وبقت بلوة وحلت علينا كلنا خصوصاً لو إنت متجوز وعندك أطفال هي ما يسمي LGBTQ+ .. فيه حالة إنك عايش في كهف مش دريان بالدنيا فدي حركة فكرتها هي تطبيع المثلية الجنسية في المجتمع بس مع الوقت فيه ناس كتير ركبت الموجة ومؤخراً اللي صوتهم عالي فيها هم المتحولين جنسياً Transgenders بس من ضمن الناس اللي ركبت الموجة بتاعة LGBTQ+ هم الرجاله اللي عنيهم زايغة اللي بيقولوا إن الفكرة مش بس قبول فكرة المثلية الجنسية إنما قبول أي ميول جنسية مهما كانت درجة شذوذها أو غرابتها ومن ضمنها إن الرجل من حقه يعيش مع أكتر من ست في وقت واحد وده يوريك إن الناس بتوع LGBTQ+ دول بيفكروا بنصهم التحتاني ودي بداية إن المجتمع يروح في ستين داهية.
- برده من ضمن النتائج المترتبة علي بدعة LGBTQ+ هي إن الناس دي لما ضغطت عشان الجواز بين المثليين يتقنن فهم هدموا فكرة إن الجواز أو Marriage زي ما هو بيتعرف قانوناً هو علاقة شرعية بين رجل وست .. دلوقتي بقي ينفع ست وست .. ينفع رجل ورجل .. ينفع أي حاجة مع أي حاجة وبدل ما هو بقي ينفع أي حاجة مع أي حاجة فإيه المشكلة يبقوا رجل مع إتنين ستات .. هي جت علي قرمط يعني.
- مع إنتشار بدعة LGTBQ+ ففيه بدعة تانية برده حطت رجليها جوه المجتمع الغربي وهي الإلحاد ومش بس الإلحاد .. يعني أنا معنديش مشكلة إنك تقرر تبقي ملحد .. يا سيدي أعمل اللي يريحك .. بس أنا عندي مشكلة لما تديني يضايقك .. إنت قصاد وضع دلوقتي إنك لما تبقي شخص متدين عايش بره سواء كنت مسلم أو مسيحي أو حتي يهودي فإنت بيتبصلك علي إنك يااااع إنت إزاي عايش كده اللي هو التدين بقي عامل زي السلوبت كده اللي هو مبقاش موضة ومينفعش تنزل الشارع لابس سلوبت .. بما إن الدين مبقاش حاجة الناس بتفكر تبني حياتها عليها فيلا بينا ندوس بقي في سكة السداح مداح.
سبب رقم إتنين .. معدلات الولادة إتفشخت:
الموضوع سهل وبسيط بس أنتوا مصعبينها علي نفسكوا .. عشان بلد إياكش حتي المزاريطة يفضل عدد سكانها ثابت مبيتغيرش لا بيزيد ولا بيقل لازم في المتوسط كل إتنين متجوزين يخلفوا 2.1 عيل .. شايفك يا ظريف يا اللي حتسالني هو الواحد من العشرة ده نجيبوا إزاي؟ ده الفكة يعني؟ .. لا يا قلبي الواحد من عشرة ده عشان يعوض حالات موت الأطفال وحالات العقم .. فتاني .. الفكرة إن كل إتنين متجوزين حيموتوا في يوم من الأيام بعد عمر طويل إن شاء الله فإحنا محتاجينهم يخلفوا طفين وفكك من الواحد من عشرة دلوقتي .. دي القاعدة .. نيجي بقي للحالات الخاصة:
- لو حصل ومعدل الإنجاب أو Birth Rate زي ما بيسموه في بلد ما قل بقي 1.7 وده فعلاَ حصل في دول زي أميركا والصين والبرازيل وأستراليا دلوقتي فده بيتقال عليه المنطقة الخطر Danger Zone اللي هو زي ما تكون سايق ولمبة الحرارة تنور في تابلوه العربية فياريت تركن علي جنب دلوقتي وتشوف إيه اللي ناقص المياه ولا الزيت فبرده البلد اللي معدل الخلفة فيها يوصل 1.7 تستهدي علي نفسها كده وتشوف هي حتخرج من المصيبة دي إزاي عشان حرفياً البلد لو كملت علي كده حتجيب وش سلندر.
- لو معدل الخلفة قل بقي 1.3 وده حالياً موجود في إيطاليا وإسبانيا واليابان وأوكرانيا فإنت تقدر تقول البلد دي راحت الشلاحات خلاص .. خلال أقل من 70 سنة البلد دي عدد سكانها حيقل النص وبنسبة كبيرة البلد اللي بيقل معدل الخلفة فيها عن 1.3 مش بتعرف تلحق نفسها خلاص.
عايزك تعرف إن فيه دول رايحة في داهية حرفياً .. سنة 2021 أغلب الدول الأوروبية معدل الخلفة فيها كان بيتراوح ما بين 1.7-1.2 اللي هو خلاص الدول دي بتروح مننا .. دولة زي كوريا الجنوبية معدل الخلفة عندهم 0.9 .. سنغافورة وهونج كونج بقوا 1.1 .. علي الناحية الثانية بقي بص للدول الأفريقية والدول الإسلامية اللي متاح فيها تعدد الزوجات تلاقي معدلات الخلفة بسم الله ما شاء الله بتتراوح ما بين 3.5-7 .. مش بس كده .. إنت المهاجرين من الدول دول اللي عايشين في أوروبا شوية وحيحتلوا القارة .. شوف فرنسا مثلاً .. الورق الرسمي بيقول إن معدل الخلفة في فرنسا 1.9 وده بيخلي فرنسا هي البلد اللي فيها أعلي معدل خلفة في أوروبا كلها بس لما تيجي تفصص الرقم ده تلاقي إن معدل الخلفة بين الفرنساويين اللي بشرتهم بيضا حتلاقيه 1.2-1.3 قصاد إن المهاجرين العرب والأفارقة اللي عايشين في فرنسا ورغم إن نسبتهم يدوبك 7-18% بس من عدد السكان حتلاقي إن معدل الخلفة عندهم 6-8.1 ودي أرقام أرانب مش أرقام بني أدمين .. أقولك علي إحصائية حتجيبلك صداع .. لو الوضع ده كمل كده لما تيجي سنة 2050 حتلاقي الغالبية العظمي من سكان فرنسا مسلمين .. الواقع ده بيوريك ليه الدول الأوروبية بتجري من سيرة حرب لإنهم عارفين العسكري اللي بيروح مش حنعرف نعوضه قصاد حقيقة إن سنة 2060 لو معدلات الخلفة دي كملت زي ما هي فالمسلمين حيكونوا أغلبية سكان كوكب الأرض.
سبب رقم ثلاثة .. كيس الشيتوس الحجم العائلي:
من الحاجات اللي يمكن في يوم من الأيام تقتنع بيها زي ما حصلي كده إنك تعرف إن (دونالد ترامب Donald Trump) حرفياً وبدون أدني مبالغة فشخ أميركا في أفكارها .. أنصار الرجل ده في أميركا اللي صادف إنهم عايشين في الولايات الجنوبية والوسطي واللي منتمين للحزب الجمهوري وشايفن إن (ترامب) رجل صح الصح تقدر تقول عليهم صعايدة أميركا .. الناس دي مع الوقت بقوا ماشيين عكس التيار في كل حاجة .. الحكومة تقولهم خدوا مصل فيروس كورونا Covid-19 يقولولها لا شكراً الله الغني .. الحكومة تقولهم عايزين نعمل قانون يجبر أي حد عايز يشتري سلاح يقدم علي فيش وتشبيه عشان بس نتأكد إن معليهوش أحكام يقولوا للحكومة اللي حيقرب من السلاح اللي معانا حنتاويه هنا مطرح ما يجي .. الحكومة تقولهم إن جدو (جو بايدن Joe Biden) هو الرئيس الشرعي المنتخب يقولوا إن لا والله نتيجة الإنتخابات اتزورت والمفروض اللي يكسبها كان كيس الشيتوس .. الناس دي بإختصار شايفين إن الحكومة الأميريكية بقت لعبة في إيد حركة LGBTQ+ وبناء عليه إحنا ضد أي حاجة تمثلهم .. مش كده وبس .. إحنا حنروح للإكستريم خالص الناحية الثانية وإحنا ضد أي قواعد أو قيود أو لوايح تحطها مش بس الحكومة الأميريكية إنما أي النظام العالمي ككل وده حيودينا لموضوعنا .. تعدد الزوجات.
شوف يا ابني .. زمان أيام الإمبراطورية الرومانية عشان دي بلد كانت عايشة علي قفا العبيد اللي طافحين الكوتة عشان خاطر الطبقة الحاكمة تعيش كويس فطبيعي ومنطقي إن قانون الإمبراطورية يقول إن مش مسموح بتعدد الزوجات بين طبقة العبيد لكن طبقة النبلاء وكبارات البلد يتجوزوا كتير زي ما هم عايزين .. الفكرة إنك مش عايز العبيد اللي هم أساساً عددهم أكبر من عدد الأحرار يخلفوا كتير لدرجة إن التوزيع السكاني في الإمبراطورية يختل .. كله عايز مصلحته برده .. لما المسيحية بقت الديانة الرسمية للإمبراطورية الرومانية وبعد كده إتأسست الفاتيكان فالمسيحية خدت نفس الفكرة بتاعة رفض تعدد الزوجات وكملت بيها لنفس المبرر وهي إن الطبقة الحاكمة مكنتش عايزة عدد العبيد أو الفقراء يضرب منها .. جري الشريط شوية ولما الأمم المتحدة إتكونت بعد الحرب العالمية الثانية ورغم إن تعداد سكان كوكب الأرض أتمسح بيه الأرض في الحرب دي إلا إن برده لايحة الأمم المتحدة رافضة تعدد الزوجات وده اللي مخلي إنصار كيس الشيتوس جوه أميركا صوتهم بيعلي بإن لا بقي إحنا مش عاجبنا النظام القديم بتاعكوا وعايزين الرجل يتجوز زي ما هو عايز.
وده بيحطني قدام التحذير .. خلي بالك إن مش معني إني أقولك إن الإسلام حيبقي الديانة الأكبر علي مستوي العالم علي سنة 2050 إنك تقول الله أكبر وتسكت .. لازم تفهم إن ده بيحط علي كتافك مسئولية مش صغيرة إن الدول الإسلامية لازم تلاقي طريقة تأكل وتشرب وتعلم وتجوز جحافل الشباب الصغير اللي عندها اللي لو ملقوش حاجة يعملوها لما يكبروا حتلاقي إن العدد ده تحول من نعمة لنقمة .. ربنا قال مش حتعرف تعدل فبلاش عشان هو عارف إن لو كل واحد إتجوز إتنين وخلف أربعة جري الشريط 50 سنة والوضع الإقتصادي للبلد حيخرج عن السيطرة .. تخيل بقي لما العالم كله يعمل كده .. ده يبقي نهار أسود يا أستاذ ممتاز.
المصادر:
- مقالة بعنوان 3 Reasons Polygamy will be Legal in Most Countries by 2050 نشرت في موقع Medium وده لينك المقالة الأصلية:
https://calebrockstedt.medium.com/3-reasons-polygamy-will-be-legal-in-most-countries-by-2050-b6bd878aa227
