اليومين دول فيه كلام أو خليني أقول همس كده خافت بيتقال وسط الناس اللي قارية شوية في السياسة الخارجية إن فيه محاولات بيعملها الفريق الرئاسي بتاع الرئيس الأميريكي (جو بايدن Joe Biden) إنهم يجيبوا هاتريك ممكن مش بس يخلي جدو (بايدن) ياخد جايزة نوبل للسلام ده كمان الفريق بتاعه يستحق جايزة نوبل في الفيزياء لإنك لما تسمع تفاصيل الهاتريك اللي هم عايزين يعملوه حتلاقي نفسك غصب عنك بتضرب كف علي كف وبتقول لا حول ولا قوة إلا بالله الفلوس اللي أهلكوا صرفوها علي تعليمكوا راحت هدر .. بإختصار شديد عشان مدخلكش في الهري بتاع تفاصيل السياسة فالهاتريك أو صفقة القرن اللي أنا بتكلم عنها دي حتشمل الأتي:
- تطبيع كامل للعلاقات بين المملكة العربية السعودية وإسرائيل.
- الإتفاق علي معاهدة تعاون مشترك بين أميركا والسعودية عشان تقدر تستوعبها كأن السعودية بقت عضو في حلف شمال الأطلنطي NATO من غير ما تاخد كارنيه العضوية بحيث إن يبقي من حق السعودية تبدأ مشروع نووي سلمي ويبقي من حقها تاخد أحدث الأسلحة اللي بتطلع من شركات السلاح الأميريكية .. قصاد إن السعودية ترجع تاني تقف في ظهر أميركا وتسيبها بقي من التريند بتاع دفء العلاقات مع الصين ده سواء بإنها توافق إن بيع البترول السعودي للصين يبقي باليوان بدل الدولار أو أي نوع من البيزنس بين السعودية و شركة واواي Huawei اللي كتير في الغرب شايفينها الدراع التكنولوجي للمخابرات الصينية .. وطبعاً إنهاء رسمي للحرب الخليجية في اليمن.
- توقيع إتفاق ينهي الصراع العربي الإسرائيلي بإعلان قيام دولة فلسطين.
علي فكرة الكلام ده مش مجرد أفكار طالعة من ناس قاعدة في التكييف بتشرب النسكافية الصبح .. الفكرة دي بقالها فترة بتتطبخ بين جدو (بايدن) ومستشار الأمن القومي بتاعه (جايك سوليفان Jake Sullivan) ووزير خارجيته (أنتوني بلينكين Anthony Blinken) ومبعوثه للشرق الأوسط (بريت ماكجورك Brett McGurk) .. وعلي فكرة (جاك سوليفان) و (بريت ماكجورك) سافروا الرياض وقعدوا مع ولي العهد السعودي (محمد بن سلمان) يشوفوا طلباته .. طبعاً لو تيجي تسألني عن رأيي حقولك كلها طموحات وأماني ملهاش مكان غير عالم الأحلام والسبب ورا رأيي ده إن الهاتريك ده اللي حيجيب أجله هو شخص واحد .. (بنيامين نتنياهو) رئيس وزراء إسرائيل دلوقتي .. ليه؟ .. لإن اللي بيعمله الرجل ده دلوقتي في إسرائيل موردش علي حد قبل كده .. الرجل ده قاعد في الكرسي عشان في ظهره تكتل سياسي من أحقر الناس اللي عايشين في البلد الوسخة اللي اسمها إسرائيل دي .. الاسم الرسمي المؤدب ليهم هو إنهم ناس منتمين للتيار اليميني المتطرف بس اللي أنا عايزك تعرفه إن محصلش في تاريخ إسرائيل كله حتي في وقت النكبة إن مسك الكيان الصهيوني ناس بالعقلية بتاعة اللي واقفين ورا (نتنياهو) دلوقتي وده خلي بالك إتهام خطير إني أقوله ولازم أقدملك الأدلة علي إتهام خطير زي ده:
دليل رقم واحد .. إن يطلع مدير سابق للمخابرات العامة الإسرائيلية اللي إنت عارفها باسم الموساد اللي هو (تامر باردو Tamir Pardo) يوصف حكومة بلده وعلي فكرة (تامر باردو) كان مدير المخابرات العامة في وقت كان (نتنياهو) رئيس الوزراء يصفها بإنها حكومة عنصرية إتنقت عشان هدف واحد بس إن يفضل (نتنياهو) مكمل في الكرسي لإن في اللحظة اللي تسقط عنه الحصانة بتاعة منصب رئيس الوزراء النيابة حتجري تقبض عليه بتهم فساد وعشان كده زي ما (تامر باردو) قال إن دي حكومة فيها عناصر مكانهم هو عصابة الكوكلاكس كلان Ku Klux Klan أو KKK ودي عصابة أعضاءها كانوا بيلبسوا أبيض في أبيض وبيغطوا وشهم بماسك قماش أبيض وموارهومش لا شغلة ولا مشغلة غير خطف وقتل وإغتصاب وحرق بيوت وكنايس الأمريكان السمر اللي من أصول أفريقية .. حتقولي طب يا سيدي (تامر باردو) رجل منفسن من مديره اللي مشاه منصبه وطبيعي إنه ميسيبش فرصة غير ويشتم فيه .. منطقي .. خد بقي الدليل الثاني.
دليل رقم إتنين .. في أغسطس 2023 إتسرب خبر إن وزير الخارجية الإسرائيلي (إيلي كوهين Eli Cohen) اللي (نتنياهو) إختاره بعت مذكرة لسفير إسرائيل في رومانيا (رويفين عزار Reuven Azar) إنه ياخد واحد تاني اسمه (يوسي داجان Yossi Dagan) يعتبر من أكتر الناس المؤيدة لتوسعة الإستيطان في الضفة الغربية ورجل شايف إن العرب والمسلمين وخصوصاً الفلسطينيين ملهمش مكان في البلد ويروحوا يقابلوا زعيم الحزب اليميني المتطرف في رومانيا .. لمعلوماتك العامة الحزب اليميني المتطرف الروماني لسنين وسنين وهو حزب إسرائيل قاطعة علاقتها معاه ومفيش أي حوار بينها وبينه لإن بمنتهي البساطة ده حزب شايف إن الهولوكوست دي إشاعة محصلتش وشايفين إن النازيين دول ناس صح الصح وأي حاجة يعملوها صح الصح .. أظن السؤال دلوقتي هو ليه؟ .. ليه حكومة إسرائيل عايزة تحط إيدها في إيد حزب شايف إن (أدولف هتلر) كان عنده حق؟ .. الإجابة وفق جرنان هاارتز الإسرائيلي إن الأخ (يوسي داجان) عايز يجمع أكبر تأييد ممكن لتوسعة المستوطنات في الضفة الغربية بين الأحزاب اليمينية المتطرفة في أوروبا .. المنطق بتاعه إن الناس دي مش بتكره في حياتها قد المهاجرين المسلمين اللي بيسافروا أوروبا بطرق مش شرعية فإيه المشكلة إنهم بالمرة يعني كمان يكرههوا الفلسطنيين المسلمين العرب اللي عايشين في الضفة الغربية؟
وده اللي أنا عايز أوصله .. (نتنياهو) عشان يفضل في الكرسي وميتحبسش معندوش مشكلة إنه يمسك أجنة وشاكوش ويكسر في الأساس اللي إتبنت عليه العلاقة بين أميركا وإسرائيل في ال75 سنة اللي فاتوا وهو إن إسرائيل هي الكيان الوحيد اللي بيضمن مصالح أميركا في الشرق الأوسط وفي مقابل ده فأميركا حتعمل المستحيل عشان تحمي إسرائيل من جيرانها العرب الوحشين المتوحشين وده أصل الخناقة اللي جوه إسرائيل دلوقتي .. إحنا وصلنا لليوم اللي هاارتز اللي هي المفروض الجرنان اللي بيتكلم باسم مش حقول اليسار إنما الناس اللي ماسكة العصاية في النص في إسرائيل بقت بتتهم AIPAC اللي هو اللوبي اليهودي في أميركا بإن دورهم تحول من حماية مصالح إسرائيل وبقي حماية مصلحة (نتنياهو) وتولع مصلحة إسرائيل.
اللي أنا عايز أقوله إن أنا متفهم جداً طموح (محمد بن سلمان) إنه يبقي يتقال عليه إنه جاب الصراع العربي الإسرائيلي في شوال .. إنت مش متخيل أسهم الرجل ده في الغرب حتبقي عاملة إزاي لو هو كان السبب في إنهاء الحرب اللي مستمرة من وقت بعثة سيدنا النبي (عليه الصلاة و السلام) لحد دلوقتي وصدقني كل ده أنا مقدره جدأً .. فيه فرصة حقيقة إن (محمد بن سلمان) يكتب اسمه في كتب التاريخ بس هو لازم يصدقني إن ده مجرد وهم .. الإتفاقات التاريخية زي مثلأ توحيد ألمانيا أو إنهاء الحرب الأهلية في رواندا بتحتاج إن اللي يقعد يتكلم علي طرابيزة المفاوضات تبقي حكومات بتحترم نفسها .. حكومات زي ما قال الكتاب .. حكومات عندها مباديء تقدر تتناقش معاهم فيها .. بس حكومة إسرائيل دلوقتي مش كده .. دي مش حكومة دي عصابة .. (نتنياهو) حيحاول يلعب لعبة بنت ستين كلب .. هو عنده خناقة لرب السما مع المحكمة الدستورية العليا وعشان يكسبها هو محتاج يبان إن هو مش (محمد بن سلمان) اللي جاب الصراع العربي الإسرائيلي في شوال .. هو حيحاول إنه يغري (محمد بن سلمان) بإن يا ريس أي تكنولوجيا عسكرية أو مخابراتية إنت عايزها مننا إعتبر نفسك خدتها في مقابل إنك متقوليش إنك عايزني أوافق علي دولة فلسطينية تشمل الضفة الغربية .. عايز تعملها في غزة معنديش مشكلة بس الضفة الغربية بتاعتي .. لو ده حصل فنقدر نقول مبروك (نتنياهو) أكل عيش علي قفا (محمد بن سلمان) وأتمني إن (محمد) يبقي عنده الحكمة وبعد النظر الكافي إنه يبقي شايف الخازوق ده من بعيد.
لو (محمد بن سلمان) عرف يزنق (نتنياهو) في كورنر إن مفيش تطبيع علاقات بين المملكة وإسرائيل من غير إعلان دولة فلسطينية تشمل الضفة الغربية فصدقني ده يبقي المسمار الأخير في نعش حكومة العنصريين اللي بتحكم إسرائيل دلوقتي .. ليه؟ .. لو (نتنياهو) رفض وقال يفتح الله فهو كده قرر يمشي في سكة إنه يخسر مش بس علاقته بالسعودية إنما علاقته بالإماراتيين كمان لإن ساعتها السعوديين حيلووا دراع الإماراتيين إنهم ينسحبوا من إتفاقية إبراهيم Abraham Accords اللي هم فرحانين بيها أوي دي .. لو (نتنياهو) وافق فهو مش بس خلي إسرائيل تحط إيدها في إيد السعوديين إنما مش بعيد تسمع بعدها عن إتفاقيات تعاون بينها وبين دول إسلامية كبيرة تانية زي أندونيسيا وماليزيا بس طبعاً مش محتاج أقولك إن (نتنياهو) مش حيبقي في الكرسي ساعتها عشان يفرح بنفسه لإن مجرد إقراره بإن خلاص مش حيبقي فيه استيطان وكل المستوطنات الغير شرعية اللي الإسرائيليين خدوها غصب حترجع تاني للفلسطينيين فإنت تقدر تقول علي حكومته يا رحمن يا رحيم .. و صدقني حكومة العنصريين في إسرائيل عارفه ده كويس .. في أغسطس 2023 وزير المالية الإسرائيلي (بتسلائيل سموتريش Bezalel Smotrich) طلع قال إنه مش حيسمح إن يتمضي أي إتفاق سلام مع السعودية يكون بيشمل إن إسرائيل تقدم أي تنازل مهما كانت للفلسطنيين.
ليه الكلام ده مهم؟ .. عشان من سنة 1936 وإنت طالع الناس كلها كانت عارفه إن الأساس ورا حل الصراع العربي الإسرائيلي هو ما يسمي حل الدولتين أو Two-States Solution .. الكلام ده إتقال من أول لجنة بييل Peel Commission اللي حكينا قصتها في سلسلة النكبة .. يا مؤمن دي حتي الحركة الصهيونية قالت كده مروراً بقرار التقسيم اللي طلع من الأمم المتحدة سنة 1947 واللي بسببه قامت حرب فلسطين و قراري الأمم المتحدة 242 و 338 و إتقال نصاً في إتفاقية كامب ديفيد وأوسلو وحتي في إتفاقيات إبراهيم .. إنت بقالك 80 سنة عايش جوه صراع أنا وإنت و الناس كلها عارفه إن الحل بتاعه هو إن يبقي فيه بلدين واحدة اسمها إسرائيل و واحدة اسمها فلسطين .. الجديد بقي إن اللي ماسك إسرائيل دلوقتي بيقولوا لا معلش الكلام ده ميلزمنيش عشان الضفة الغربية دي بتاعتنا.
أرجع وأقولك أنا متفهم جداً إن ممكن ريق (محمد بن سلمان) يكون بيجري علي إن الصفقة دي تتم لإن صدقني نتايج الصفقة دي حتبقي أهم بكتير من نتايج معاهدة كامب ديفيد .. عارف إنك متضايق بس دي الحقيقة .. مصر مبقتش زي زمان .. دلوقتي مفتاح الشرق الأوسط كله بقي في إيد الرياض فصفقة زي دي حتخلي السعودية زيها زي أي بلد عضوة في NATO وحيبقي من حقهم يبقي عندهم مشروع نووي سلمي بس تحت إشراف أميريكي وحيفتح ليهم باب الترسانة العسكرية الأميريكية من أول طيارات F-35 لحد منظومة الدفاع الجوي THAAD .. صفقة حتفتح لإسرائيل باب شغل إنت لا تتخيله من أول المغرب لحد باكستان .. في نفس الوقت فيه خوازيق ممكن ميكونش حد عامل حسابه عليه خلي بالك .. الإتفاق اللي السعودية عايزه تمضيه مع أميركا حيكون هو أول إتفاق عسكري من النوع ده تمضيه أميركا مع بلد مش ديموقراطية .. يعني قول اللي إنت عايزه علي إزاي الرياض هي المتحكمة في مصير العرب دلوقتي بس ده لا يمنع إنك طول ما إنت عايش هناك إنت تحط جزمة في بقك وتقول طويل العمر يطول عمره يزهزه عصره ينصره علي مين يعاديه من سكات وده حيتطلب موافقة رسمية من الكونجرس .. يمكن تبقي أخر كلمة عايز أقولها هي أين الفلسطينيين أنا لا أراهم .. يا عيني الناس دي حالها بقي يصعب علي الكافر وهم شايفين مصيرهم بيتحكم فيه ناس تانية ولا كأن ليهم وجود.
المصادر:
- مقالة بعنوان You can’t normalize relations with a government that isn’t normal نشرت في جريدة The New York Times و ده لينك المقالة الأصلية:
https://www.nytimes.com/2023/09/05/opinion/biden-middle-east-deal.html - مقالة بعنوان Biden is weighing a big Middle East deal نشرت في جريدة The New York Times و ده لينك المقالة الأصلية:
https://www.nytimes.com/2023/07/27/opinion/israel-saudi-arabia-biden.html
