أنا من الجيل اللي مكنش بيعرف إيه اللي بيحصل في الدنيا غير من نشرات الأخبار بتاعة القناة الأولي .. كان فيه زمان نشرة أخبار الساعة ثلاثة و الساعة ستة و الساعة تسعة و في أخر الليل خالص أحداث 24 ساعة .. أنا من الجيل اللي كان بيعرف إيه اللي كان بيحصل في جنوب لبنان من التقارير بتاعة دكتور (سيد علي) .. اللي كان بيغطيلنا أخبار الإنتفاضة الفلسطينية كان (سمير أبو العافية) و (طارق عبدالجابر) .. طبعاً لو إنت من جيل الألفينات إنت متعرفش حاجة و مشفتش اللي أنا بتكلم عنه ده .. يمكن اللي أنا عايز أقوله إني عايش بقالي كتير زي (اللمبي) .. أنا حضرت خمس رؤساء لأميركا فأنا الحقيقة مش فاهم و مش مستوعب إزاي بني أدم زي (بنيامين نتنياهو) ده لسه عايش؟ .. ده أنا كنت بشوف نشرات أخبار كان فيها رئيس وزارة و أنا في إبتدائي .. إزاي الرجل ده لحد دلوقتي بيخش إنتخابات و بيكسبها؟ .. أنا شخصياً كنت من الناس اللي متخيله إن الCareer بتاعة (نتنياهو) إنتهت في يونيو 2021 لما إتشكلت حكومة وحدة وطنية .. أنا شخصياً بإيديا دول قلت إن مش بعيد نصحي الصبح علي خبر إن النيابة قبضت علي (نتنياهو) بتهم الفساد المتلتلة المتحضرة ضده .. بس نقول إيه .. مش بس أنا كنت غلطان .. ده طلع زي البرص إبن الصرمة مبيموتش.
في حالة إنك كنت مشغول بأخبار كتب الكتاب بتاع (شيرين عبدالوهاب) و (حسام حبيب) فمن كام يوم إتعملت إنتخابات برلمانية في إسرائيل كسبها حزب الليكود بقيادة (نتنياهو) .. المشكلة مش في كده .. المشكلة إن (نتنياهو) عشان يكسب الإنتخابات دي لم معاه كل الصيع اللي في البلد .. أي حد شايف إن المسلمين عموماً و الفلسطينيين خصوصاً و ميضرش نلم معاهم عرب 48 ملهمش مكان غير الحرق بجاز تقدر تقول و إنت متطمن إنه راح إنتخب (نتنياهو) في الإنتخابات دي .. إنت لا تتخيل حجم السفالة و قلة الأدب و العنصرية و الإجرام و التشدد الديني اللي حتلاقيهم من اللي ماسكين إسرائيل في الأربع سنين الجايين .. المشكلة مش في كده .. المشكلة لما تكتشف إن عمر ما كان (نتنياهو) حيكسب الإنتخابات إلا بأصوات الناس دي .. و عمر ما حد في تاريخ إسرائيل فكر إنه يحط إيده في إيد الناس دي قبل كده .. ليه؟ .. حاول تتخيل و ده مجرد مثال لتوضيح الأمور إن حد زي (جمال مبارك) نزل إنتخابات ضد الرئيس (عبدالفتاح السيسي) و عشان يجيب أصوات ف(جمال) صحينا الصبح لقيناه حاطط إيده في إيد السلفيين و الإخوان المسلمين .. اللي هم الناس اللي عمر ما حد فيكي يا مصر تجرأ إنه يتصور و هو بيسلم علي حد فيهم أصلاً .. النقطة دي محتاجة تتشرحلك كويس أوي عشان تفهم ليه الأيام الجايه حتبقي غريبة فشخ مش بس جوه إسرائيل إنما عندنا إحنا كمان.
إنت دلوقتي في مصر لو جيت نزلت الشارع و سألت الناس هي كلمة تيارات إسلامية بتعني ليك إيه دلوقتي تفتكر حيقولوا إيه؟ .. خلينا نبقي متفقين إن الكلمة دي بقت بعبع .. إنت لو ماشي في ميدان التحرير سايب دقنك و ماسك موبايلك حتي لو بتكلم صاحبتك في حاجات قليلة الأدب ففيه إحتمالية مش صغيرة إنك تلاقي حد مباحث بيقولك بطاقتك يا باشا .. ليه؟ .. دقنك .. إنت مستوعب قد إيه كلمة إسلامي بقت بتخوف؟ .. في إسرائيل كده برده .. و ليه في إسرائيل .. العالم كله كده .. فيه توجه تحسه شبه الزحمة في الشارع اللي بتخليك تمشي في إتجاه ما حتي لو الإتجاه ده مش إنت اللي عايز تمشي فيه و هو إن خلاص الدين أو التدين أو التمسك بالقيم الدينية بقي دقة قديمة .. إحنا في عصر نيتفليكس و حقوق المثليين و علم قوس قزح .. فلما تصحي الصبح تلاقي حكومة إسرائيل ماسكها ناس شايفه و ركز أوي في الجملة الجايه دي إن إسرائيل دولة يهودية فطبيعي إن الغرب يبص لده و يقول لنفسه هي مالها بردت كده ليه .. أنا عارف إنك مستغرب و مش مقتنع باللي بقوله بس إنت محتاج تفهم نقطة و هي إن من بعد ما (دونالد ترامب) بقي رئيس في 2016 فيه حاجة إتشرخت في العلاقات بين أميركا و إسرائيل و كنت إتكلمت عن ده قبل كده .. دلوقتي لو إنت مواطن أمريكاني جمهوري شايف إن كيس الشيتوس الحجم العائلي ده رجل صح الصح و اللي بيقوله يبقي صح الصح فإنت بشكل تلقائي بتصنف نفسك علي إنك أولا رجل متدين و ثانياً شايف إن إسرائيل دي أحلي أختراع حصل في الدنيا من بعد المكرونة بالبشاميل .. لو إنت مواطن أمريكاني بس ديموقراطي فإنت شايف كيس الشيتوس ده رجل إبن وس#% و الأهم إنك بني أدم بتصنف نفسك علي إنك ليبرالي .. ده معناه إنك مع حقوق الشواذ و مش لاقي مبرر إنك تقف في ظهر إسرائيل .. هوبا بيجيلك النسخة الإسرائيلي من كيس الشيتوس يرجع تاني يحكم إسرائيل .. بمعني أخر .. إسرائيل بقت زيها زي (ترامب) نص الشعب الأمريكاني بيحبها و نصه التاني مش بيطيقها.
وسط كل ده الحقيقة فيه إتنين أنا عايز أقف عندهم و أتحسر .. حد أنا متعاطف معاه و حد أنا شمتان فيه .. اللي أنا متعاطف معاهم هم عرب 48 و صدقني حنتكلم سوا دلوقتي عنهم عشان عارفك كنت لسه حتعلي صوتك عليا .. اللي أنا فعلياً شمتان فيهم رغم إن دي مش عادتي هي كل الدول العربية اللي اليومين دول راميين نفسهم في حضن إسرائيل و خصوصاً الدول اللي مضت علي إتفاقية إبراهيم و اللي برده إتكلمنا عنها قبل كده .. الإتنين دول بالذات أنا عايز أقف عندهم شوية.
عرب 48 .. أتمني تكونوا إقتنعتوا إن مفيش فايدة:
مشكلة عرب 48 الأزلية إن لا الفلسطينيين شايفيهم فلسطينين بحق و حقيقي و لا الإسرائيليين مستعدين يثقوا فيهم بكيس شيبسي .. هم شخصياً عندهم مشكلة أزلية إنهم مش عارفين هم مين و دي الحقيقة أزمة بدعي ربنا ميبتليش بيها حد فينا .. (نتنياهو) راجع تاني للكرسي و معاه ناس شايفه إن عرب 48 دول شوية خونة .. ناس شايفه إن مفيش حاجة إسمها دولة فلسطينية .. ناس شايفه إن (نتنياهو) ده رجل أشرف من الشرف و أي كلمة تتقال في حقه بإنه مرتشي أو نصاب أو فاسد فاللي يقولها يا يعتذر يا ياخد بعضه و يمشي من البلد يا إما ذنبه علي جنبه .. ناس زي (إيتمار بن غفير) .. ده رجل غريب جداً .. ده رجل لو قارنته مثلاً ب(مرتضي منصور) ف(ضاضا) بالنسبة له ملاك .. أنا شخصياً يعني مسمعتش قبل كده عن حد يطلع حكم محكمة يثبت عليه تهمة العنصرية .. أه و الله زي ما بقولك كده .. سنة 2007 طلع حكم محكمة بيقول إن (إيتمار بن غفير) عنصري و دلوقتي هو زعيم حزب القوة اليهودية .. عملها إزاي ده معرفش .. ناس زي (بتسلابيل سموتريتش) وفكك من إسمه .. يكفي إنه أقولك إنه زعيم حزب إسمه حزب صهيون الديني و الإسم لوحده كفاية إنك تفهم إحنا بنتكلم عن مين .. تخيل إن (نتنياهو) قعد (إيتمار) مع (بتسلابيل) مع بعض عشان يضربوا أحزابهم مع بعض في الخلاط و ينزلوا الإنتخابات بقايمة موحدة .. تخيل كده لقاء السحاب بين الجماعات الجهادية و السلفية مع بعض ينزلوا إنتخابات سوا .. مش بقول إن ده معناه إن الجماعات الجهادية و السلفية هي النسخ اليهودية من اللي بيحصل في إسرائيل إنما بقولك تخيل قوي سياسية متشددة بتشتغل سياسة بإسم الدين تحط إيدها في إيد بعض و ينزلوا إنتخابات و يكونوا السبب في إن (نتنياهو) يكسبها .. ولا تتخيل ليه ما حصلت فعلاً في مصر لما السلفيين حطوا إيدهم في إيد الإخوان المسلمين و شوف وصلنا لحد فين دلوقتي.
الوضع فعلاً مؤلم بالنسبة لعرب 48 .. الناس دي قدمت كل التنازلات الممكنة عشان يتقال عليهم إسرائيليين و برده مفيش فايدة .. فاكر حكومة الوحدة الوطنية اللي جبت سيرتها في المقدمة؟ .. الحكومة دي كان شايلها إتنين .. واحد إبن ناس كده إسمه (يائير لابيد) .. التاني يبقي (منصور عباس) من القائمة العربية الموحدة اللي هم بيمثلوا عرب 48 .. ده رجل قال كل اللي الإسرائيليين عايزينه .. عايزينه يعترف بدولة إسرائيل إعترف .. عايزينه يقول إن الهولوكوست كان جريمة في حق الإنسانية قال .. (منصور عباس) و عرب 48 عموماً مش قادرين يفهموا نقطة و هي إن مفيش فايدة .. حضراتكوا عرب و الإسرائيليين بطبعهم عمرهم ما حيثقوا فيكوا ولا حيعتبروكوا جزء منهم .. أنتوا (جون سنو) بالنسبة ل(كاتلين ستارك) .. أنتوا (عبدالله السعيد) بالنسبة للأهلي .. أنتوا الزبيب في الرز بالنسبة لي .. إسرائيل في تاريخها عمرها ما شافت فترة إستقطاب سياسي زي دلوقتي .. زيها زي أميركا بالمناسبة .. بس فيه فرق خلي بالك .. إنت مش قدام بلد نصها شايف إن التوراة هي الحل و نصها شايف إن السداح مداح هو الحل .. إنت مش قدام بلد نصها شايف إن إسرائيل دولة يهودية و نص تاني شايف إن حقوق الشواذ مثلاً لازم يحميها الدستور .. لا خالص .. إنت قدام بلد نصها شايف إن (نتنياهو) ده رجل صح الصح و كل اللي بيقوله صح الصح .. قصاد نص تاني مش عايز يشوف (نتنياهو) علي الكرسي .. طب نجيب مين مكانه؟ مش عارفين .. طب إنتوا شايفين إيه البديل؟ الله أعلم .. مش عايزين (نتنياهو) و خلاص .. ده يفسرلك ليه حزب العمل اللي كان زمان أهم حزب يساري فيكي يا إسرائيل مخدش غير يدوبك 3.5% من الأصوات.
عرب 48 مش قادرين يفهموا إن المجتمع الإسرائيلي إتغير خالص يا (لينا) .. زمان و زمان ده اللي هو أيام ما كنت بتفرج علي نشرات الأخبار في التليفزيون لما يتقال إن حزب الليكود المتشدد (وخلي بالك من كلمة متشدد دي) كسب إنتخابات في إسرائيل فده معناه إن غالباً الحزب رافع يافطة كبيرة مكتوب عليها إن لو كسبنا الإنتخابات مش حيبقي فيه حاجة إسمها دولة فلسطينية و مفيش مفاوضات و مفيش خريطة طريق ولا حيبقي فيه حل للصراع العربي الإسرائيلي و حناخد كل الضفة الغربية وضع يد و اللي مش عاجبه يشرب من أي خرارة .. دلوقتي حزب الليكود بيكسب مش بس بإنه بيقول مفيش حاجة إسمها فلسطين إنما كمان عرب 48 اللي بيمثلوا 21% من إجمالي تعداد سكان إسرائيل و 20% من دكاترتها و 25% من ممرضينها أساساً بقي يعني مينفعش يتقال عليهم إسرائيليين .. و مش حنبقي قليلين الأدب لو قلنا إن من جواهم كل واحد فيهم إرهابي بس مخبي.
عرب الخليج .. بتحطوا نفسكوا في مواقف بايخة:
تقدر تقول إن أنا عارف نية الخلايجة .. هم أساساً مكانوش طمعانين غير في برامج التجسس علي الموبايلات اللي بتعملها الشركات الإسرائيلي زي بيجاسوس عشان يراقبوا بيها المواطنين بتوعهم .. بس كده .. إتفاقيات إبراهيم و يلا نعمل رحلات جوية بين دبي و تل أبيب كل ده الخلايجة مش عايزين من وراه غير إنهم يبقوا زي الست المتجوزة اللي مش بتهدأ غير لما تمسك موبايل جوزها .. فجأة بيلاقوا اللي بيحصل في إسرائيل ده .. صدقني لو قلتلك إن هم شخصياً مش عارفين يتعاملوا مع ده إزاي و ده يفسرلك ليه صوت صرصور الحقل ده في الإعلام العربي عموماً تجاه اللي بيحصل في إسرائيل .. مش حتلاقي حد بيغطي الإنتخابات .. فجأة الإعلام العربي حينسي إن فيه حاجة إسمها إسرائيل .. ليه؟ .. عشان (نتنياهو) حط الخلايجة في موقف بايخ محدش فيهم كان متوقعه ولا عايزه.
تخيل كده الخلايجة مضطرين يتعاملوا مع حد زي (إيتمار بن غفير) ده .. الرجل ده أنا مش عارف أبطل أفكر فيه لإنه غريب جداً .. تخيل يا مؤمن إن ده رجل إتطرد من الخدمة العسكرية في القوات المسلحة الإسرائيلية عشان القادة بتوعه كانوا شايفينه عنصري زيادة عن اللزوم .. ده رجل شايف إن لو إنت عسكري إسرائيلي قتلت مواطن فلسطيني حتي لو بدم بارد و من غير أي مبرر فمينفعش أصلاً تتقدم للمحاكمة .. رجل زي ده تقعد تتكلم معاه إزاي؟ .. اللي الدول العربية عموماً و خصوصا مصر الحقيقة حتلاقي نفسها بتتعامل معاه هو إن إذا كان في مصر التدين و التيارات الإسلامية بعبع مينفعش نسمح ليها إنها ترجع تاني فصدقني لو قلتلك إن الدين دلوقتي بقي هو الهواء اللي السياسيين في إسرائيل بيتنفسوه و دي الحقيقة حتبقي مرحلة أنا شخصياً مش عارف القيادة المصرية حتتعامل معاها إزاي .. بمعني أخر و برده ده مثال للتشبيه مش أكتر .. تخيل إن الرئيس (السيسي) محتاج يقعد مع النسخة الإسرائيلي من الشيخ (حازم صلاح أبو إسماعيل) .. إنت متخيل أو مستوعب أنا بقول إيه؟
خليني أختم بإن يمكن فيه وجهة نظر تانية لكل اللي أنا قلته ده و هي إن الناس من جواها مش عايزة حرية قد ما هي عايزة إستقرار .. خليني أديلك مثال .. مفيش حد بينكر إن الوضع الإقتصادي للبلد مش أحسن حاجة في الدنيا .. كتير مننا نفسه يشوف مش بس الحكومة إنما الرئيس نفسه مشي .. بس خلي بالك .. إنت معاك رئيس بقاله في الكرسي 8 سنين .. في إسرائيل خلال الأربع سنين اللي فاتوا البلد إتعمل فيها 5 إنتخابات برلمانية عشان كل إنتخابات بتتعمل مفيش حزب بيعرف ياخد أغلبية تخليه يشكل حكومة و هو مستريح .. منطقي و مفهوم إن الناس تكون تعبت و زهقت و قالت لنفسها تشدد تشدد مش حتفرق بس نخلص .. الحكومة الإسرائيلية الجديدة دي حتكون أول حكومة تتشكل بأغلبية برلمانية في إسرائيل من سنة 2019 .. الكنيست أو البرلمان في إسرائيل فيه 120 كرسي منهم 64 محسومين ل(نتنياهو) قصاد إن أقرب معارضيه (يائير لابيد) الحزب بتاعه تحت إيده 51 كرسي .. الحكومة دي عشان تتشكل مش قبل أخر السنة بس يمكن الأيام الجايه حتورينا حاجات كتير و أدينا مستنيين إيه اللي ممكن يموت البرص.
المصادر:
- مقالة بعنوان Israel’s elections: 5 Takeaways نشرت في جريدة The New York Times و ده لينك المقالة الأصلية:
https://www.nytimes.com/2022/11/02/world/middleeast/israel-election-5-takeaways.html - مقالة بعنوان Lapid concedes in Israel, paving way for Netanyahu’s return to power نشرت في جريدة The New York Times و ده لينك المقالة الأصلية:
https://www.nytimes.com/2022/11/03/world/middleeast/israel-netanyahu-election.html - مقالة بعنوان The Israel we know is gone تشرت في جريدة The New York Times و ده لينك المقالة الأصلية:
https://www.nytimes.com/2022/11/04/opinion/israel-netanyahu.html
عزيزي فؤش (تايمز)
انت عرفت نفسك على انك مهندس ميكانيكا ومحب للصحافة والكتابة … طبعا انا معرفش قد ايه انت شاطر كمهندس ميكانيكا ولكني متأكد أنك ممتاز كمدون و (محب للصحافة والكتابة) … موضوعاتك غزيرة ومتنوعة وعميقة، وهي ليست بالطويلة المملة ولا بالمختصرة المخلة، واخترت أسلوب للكتابة يجمع بين العربية الصحيحة والعامية المعبرة فسهلت الامر على قراء المدونة.
النصيحة اللي عاوز أقدمها لك (لوجه الله) هي كالتالي: إذا كنت (اقصد انت) مهندس ميكانيكا خيبان فلا مشكلة … لإنك في المقابل مهيأ للكتابة بشكل احترافي وأظن حايكون لك مستقبل واعد جدا في الصحافة او التأليف المستقل في المجال اللي تحبه … وياريت تلتحق بأي برامج أو دورات (أو أيا كان مسماها) خاصة اذا كانت اكاديمية بالحضور المباشر أو أون لاين.
المشكلة تظهر (في رأيي) لو انك مهندس ميكانيكا شاطر … لإن تقديم مدونة بالشكل الممتاز اللي بتتميز بيه مدونتك (الغزارة، التنوع، العمق، الأسلوب) محتاج لاشك لوقت طويل وجهد كبير جدا، فازاى حاتقدر توفق بين صناعة كارير كمهندس شاطر والاستمرار في تقديم مدونة ممتازة زي دي؟ … الخوف هو انك متقدرش توفق بين الاتنين فتخسر الاتنين.
اما لو حاتقدر توفق بين الهندسة ك (كارير) و التدوين والصحافة كهواية فده حايبقى شيء رائع ونادر وأتمنى انك تقدر فعلا عليه.
إضافة: قلت اما لو حاتقدر توفق بين الهندسة ك (كارير) و التدوين والصحافة كهواية فده حايبقى شيء رائع ونادر وأتمنى انك تقدر فعلا عليه … والأروع والأندر من ذلك هو انك تقدر تجمع بين الاتنين ك (كارير) … الدكتور احمد مستجير كمثال.
ربنا يخليك علي رأيك و أتمني إني أفضل عند حسن ظنك و مش لوحدك الحقيقة للناس اللي بتقرأ اللي بكتبه .. أنا جربت أكتب لحساب حد بس محبش فكرة إن حد يوافق أو يرفض اللي أنا بكتبه .. قلمي أو الكيبورد بتاعي بيكتب اللي أنا مقتنع بيه و مش حابب فكرة إني معبرش عن رأيي عشان مش عايز أزعل حد .. أخيراً أنا بس حابب أقولك إن أنا أحيانأً شخصياً بسأل نفسي إزاي أنا مهندس بقالي 12 سنة في الكار ده و لسه بلاقي وقت أكتب .. يمكن لما ألاقي إجابة حقولك.