فيه خناقة دايرة اليومين دول بس محدش بيجيب سيرتها بين إيران وبين أميركا بس يمكن عشان الخناقة دي لحد دلوقتي مش داخل فيها عناصر لابسة الزي العسكري الإيراني فالموضوع مش واخد حقه من الإهتمام الإعلامي .. في الإعلام المظاهر بتفرق فإزاي عايز الإعلام يغطي خناقة اللي داخلين فيها بقلبهم مش عايزين حد يعرف عنها حاجة لإن صحيح أنا قلتلك الخناقة دي بين إيران وبين أميركا بس إيران مش بتتعارك بنفسها .. دي خناقة تعتبر مثال صارخ للحاجة اللي بتتسمي في السياسة حرب بالوكالة أو Proxy War إني أجيب ناس تتعارك بالنيابة عني عشان مينفعش أبان قدام الناس إني بلطجي .. الخناقة دي ولعت بعد اللي حصل يوم 7 أكتوبر 2023 بالهجوم اللي شنته عناصر من حركة حماس جوه إسرائيل ومن بعده بدأت الغارات الغير إنسانية الإسرائيلية علي قطاع غزة .. وسط حالة الغضب والحزن واليأس اللي سيطرت علي الشارع العربي كله وكتير مننا جاله إحساس وحش أوي اللي هو إشمعني إحنا عايشين كويس وليه حكوماتنا مش عايزة تاخد موقف عشان علي الأقل لو مش حنحمي أهلنا في القطاع يبقي علي الأقل نخليهم عارفين ياكلوا ويشربوا فتلاقي إن أخواتك في إيران قرروا يزيطوا عشان يخلوا رجالتهم سواء بتتكلم عن حزب الله في اليمن أو الحوثيين في اليمن أو المليشيات الشيعية في العراق تبدأ تنكد علي الأمريكان عيشتهم بإنهم بدأوا يستهدفوا التواجد العسكري الأميريكي في سوريا والعراق والأردن اللي كان دوره بداية من 2014 هو هزيمة تنظيم الدولة الإسلامية في العراق والشام اللي إنت عارفه باسم داعش أو ISIS .. دي الخناقة اللي إنت بتسمع عنها إن الحوثيين قافلين مضيق باب المندب بالضبة والمفتاح وده مسمع معانا في عائدات قناة السويس اللي إتخسف بيها الأرض.
الحقيقة إن الخناقة دي أنا عايز أقف قدامها لكذا سبب الحقيقة .. السبب المهم واللي معصبني إن الخناقة دي إحنا هنا في مصر اللي بندفع جزء من ثمنها لإن لما عائدات قناة السويس راحت فده خلي إن البلد مش بيخشلها دولارات وده ساهم في الأزمة الإقتصادية المنيلة بنيلة اللي إحنا عايشينها وده اللي مخليني متعصب إننا صرفنا دم قلبنا عشان نجيب حاملتين طيارات هليكوبتر ميسترال عشان تبقي الذراع الطولي للقوات البحرية بس لما جت ساعة الجد وإحتجنا نسلك مضيق باب المندب عشان نلحق إقتصادنا اللي بيغرق فجأة دور مصر في الخناقة دي ولا له حس .. فيه أسباب تانية من ضمنها إن الخناقة دي بتوريك إزاي إن المستقبل في التسليح مش رايح في سكة مين عنده كام طيارة مقاتلة ومين تحت إيده كان دبابة قد ما هو مين معاه كام طيارة بدون طيار Drone ومين عنده صواريخ بعيدة المدي تقدر تصطاد هدف مساحته متجيش متر في متر بس بعيد عندك فوق 1,500 كيلومتر زإزاي إن دلوقتي اللي بيحسم معركة هو مين عنده السلاح اللي يقدر يوقع الطيارات بدون طيار .. بس يمكن أهم سبب هو إن دي خناقة صحيح أغلبنا ميعرفش عنها حاجة بس صدقني لو قلتلك إنك لو سافرت إيران مشيت في شوارع أي مدينة هناك من طهران لأصفهان لقم حتلاقي الناس من أكبرها لأصغرها عارفين إن الحرس الثوري الإيراني مشمر دراعاته وماسك في خناق أميركا مش بإنه بيتعارك بإيديه .. لا .. هو طالق رجالته عليها .. وده المرعب في الموضوع .. إنت لو حصل لا قدر الله واحد من رجاله إيران سواء الحوثيين أو حزب الله أو المليشيات الشيعية في العراق جت معاه وربنا سهله وضرب ضربة وجعت الأمريكان زي اللي حصل سنة 1983 لما حزب الله فجر معسكر قوات مشاة البحرية الأميريكية في العاصمة اللبنانية بيروت فإنت قصاد وضع إن ممكن الخناقة تقلب بعركة بجد بين إيران وأميركا.
اللي مخليني أنا قلقان من الخناقة دي هو ميكس من 4 حاجات يمكن لو واحدة فيهم لوحدها متخلينيش أقلق بس عشان الثلاثة متحققين مع بعض فمخبيش عليك أنا حاطط إيدي علي قلبي:
- أول حاجة إن إيران مش مسترخصة تبعت أي سلاح لرجالتها من صواريخ لطيارات بدون طيار وأخص بالذكر الحقيقة الحوثيين في اليمن والمليشيات الشيعية في العراق .. عشان بس أوريك إزاي الخناقة دي مولعة وإنت مش حاسس بيها فعايزك تعرف إن بناء علي كلام CENTCOM بداية من يوم 17 أكتوبر 2023 فيه أكتر من 100 هجوم بصواريخ أرض-بحر وصواريخ كروز وصواريخ باليستية وطيارات بدون طيار ولانشات متلغمة استهدفت سفن سواء مدنية أو حربية في البحر الأحمر .. السبب اللي خلاك مش سامع حاجة عن ده إن كتير من السفن الحربية الأميريكية اللي بتخدم دلوقتي في البحر الأحمر وخليج عدن متركب عليها أنظمة رادار حديثة بتقدر تشوش علي الأسلحة دي كلها بس متتخيلش إن الموضوع مع ماشي مع الأمريكان زبادي خلاط لإن الهجمات دي كلها أدت لحد دلوقتي لإصابة أكتر من 180 فرد في القوات المسلحة الأميريكية
- ثاني حاجة إن الإيرانيين زي ما يكون قلبهم ميت .. يوم 28 يناير 2024 فيه طيارة بدون طيار متركب عليها عبوة ناسفة استخدمها عناصر من مليشيا شيعية في العراق إسمها المقاومة الإسلامية العراقية عشان تضرب معسكر أميريكي في الأردن إسمه برج 22 واللي أدي لمقتل 3 عساكر أمريكان وإصابة 47.
- ثالث حاجة هو غباوة رد الأمريكان علي كل هجوم يتعرضوله .. فاكر الهجوم اللي حصل علي برج 22؟ .. يوم 2 فبراير 2024 إتعملت فوق 100 غارة جوية علي أهداف جوه العراق وسوريا واليمن قامت بيها قاذفات B-1 طارت من ولاية تكساس الأميريكية لحد ما ضربت أهدافها ورجعت ومعاها صواريخ كروز إتضربت من حاملة الطائرات إيزنهاور في البحر الأحمر والغارات دي أدت لمقتل 40 بني أدم الله أعلم مين فيهم المدني ومين فيهم المسلح .. مش كده وبس .. يوم 7 فبراير 2024 طيارة بدون طيار أميريكية اغتالت (أبوباقر السعدي) وده يبقي قائد كتائب حزب الله واحدة من المليشيات الشيعية العراقية اللي تحت إيد إيران .. غباوة الأمريكان بيقابلها عند الإيرانيين .. يوم 18 فبراير 2024 الحوثيين ردوا بإنهم غرقوا سفينة شايلة علم دولة علي باب الله اسمها بيليز في مضيق باب المندب عشان تبقي أول سفينة تغرق بالكامل من ساعة بداية الأزمة الحالية .. خلي بالك إن فيه عامل برده يبان بالنسبة لك تافه إن السفينة دي واللي كان اسمها روبيمار Rubymar كانت شايلة حمولة حلوة من السماد فالسماد ده لما نزل المياه عمل مشكلة بيئية.
- رابع حاجة ويمكن أخطر نقطة إن الأمريكان دلوقتي في كل قاعدة عسكرية ليهم في الخليج والعراق وسوريا والأردن إتحطت أوضة اسمها مركز تكامل المعارك Combar Integration Center .. فكك من الاسم مش حيهمنا في حاجة دلوقتي .. دي بتبقي محطة دفاع جوي مهمتها إن العسكري اللي واقف قدام شاشة الكومبيوتر يتقاله إن فيه حاجة إتضربت علي القاعدة اللي هو قاعد فيها وبيكون قدامه كذا إختيار .. يا إما الحاجة اللي جايه دي طيارة بدون طيار شايلة قنبلة أو صاروخ باليستي في هجوم شبه اللي حصل في برج 22 وساعتها ضابط الدفاع الجوي بيتك علي زرار عشان يضرب صاروخ أرض-جو اسمه كايوتي Coyote بيصطاد الطيارات بدون طيار .. يا إما الرادار يقوله إن الحاجة اللي جايه دي مش صاروخ ولا حاجة .. أو إن الرادار يقوله إن ده صاروخ أو طيارة بدون طيار بس حتنزل في حتة بعيد عن القاعدة اللي إنت قاعد فيها ففكك منها عشان الصاروخ الكايوتي الواحد ثمنه فوق 200,000 دولار قصاد إن أجدعها طيارة بدون طيار إيراني ثمنها مش بيكسر 20,000 دولار .. إنت قدام وضع إن ضابط الدفاع الجوي بيبقي قدامه 90 ثانية عشان يقرر يضرب ولا ميضربش بناء علي معلومات مش كاملة ويبقي نهار أسود لو الرادار شاورله علي طيارة مدنية وقاله دي طيارة بدون طيار والضابط بتاع الدفاع الجوي وقعها بصاروخ أرض-جو.
إنت قصاد وضع إن دلوقتي كل يوم بيعدي ربنا بيسترها عشان كان ممكن تحصل كذا مصيبة صحيح إحتمالات إن مصيبة منهم تحصل قليلة بس لو حصلت فكلنا حنلطم لإن مصير العالم بيكون بين إيدين ضابط لسه متخرج من الكلية ممسكينه بطارية دفاع جوي وشاشة كومبيوتر متوصله برادار وربنا معانا وإتنين ملايكة .. فيه وجهة نظر إتقالت علي لسان الجنرال (مايكل كوريلا Michael Kurilla) المسئول عن ملف الشرق الأوسط جوه قيادة المنطقة المركزية الأميريكية اللي بيسموها سينتكوم CENTCOM إن جزء من اللي إيران عايزه توصله إنها تبعت رسالة لدول الخليج اللي بتشمشم ورا تطبيع كامل للعلاقات مع إسرائيل والرسالة دي بتقول لو أنتوا عايزين تترموا في حضن إسرائيل اللي عايشة بفضل حماية أميركا ليها فإتفرجوا إحنا بقي بنعمل إيه في أميركا .. قصاد إن علي الناحية الثانية الأمريكان مبعترين عساكرهم في كل حتة من غير ما يكون عندهم فكر واضح هي العساكر دي بتهبب إيه في عيشتها .. هل تعلم سيدي القاريء إن أميركا ليها 2,500 عسكري في العراق و900 عسكري في سوريا ده غير قاعدة برج 22 في الأردن؟ .. طب الناس دي بتعمل إيه هناك؟ .. الرد الرسمي من وزارة الدفاع الأميريكية إن العساكر دول دورهم تدريب القوات المسلحة العراقية بالإضافة لضمان عدم عودة داعش تاني بس في نفس الوقت إنت لازم تبقي عارف إن كل عسكري من دول هو معرض إن في أي يوم إن يتضرب عليه صاروخ يجيب أجله.
المصادر: مقالة بعنوان Inside America’s Shadow War With Iran نشرت في جريدة The New York Times وده لينك المقالة الأصلية:
https://www.nytimes.com/2024/03/05/opinion/biden-iran-middle-east.html
