هو إيه اللي بيحصل بالضبط في مانشستر يونايتد؟ .. ده سؤال يبان أهبل و ملوش معالم خصوصاً للناس اللي ملهاش أوي في كرة القدم .. فلو إنت ملكش في كرة القدم سواء كنتي بنت أو كنت ولد فبلاش تكمل المقالة دي لإنها مش معمولة ليك .. لو إنت مهتم بقي بكرة القدم فإنت أكيد عارف مين هو مانشستر يونايتد و مش محتاج أديك أي مقدمات فخلينا نخش في الموضوع علي طول .. اللي عايزك تفهمه إن مانشستر يونايتد نادي فيه خناقة كبيرة و زي أي خناقة عشان تفهم هي إتعملت ليه و أسبابها إيه لازم الأول تفهم هو مين بيتخانق مع مين؟
أطراف الخناقة اللي جوه مانشستر يونايتد و اللي واضحين أوي قدام الإعلام هم المدير الفني للفريق (جوزيه مورينيو Jose Mourinho) و المدير التنفيذي للنادي (إيد وودوارد Ed Woodward) و كابتن و يمكن نجم الفريق (بول بوجبا Paul Pogba) .. و خلينا نبدأ كلامنا بنجم الشباك بتاع الخناقة اللي مفيش حد إلا و بيجيب في سيرته و اللي (أبوتريكه) قلش عليه و دي نادراً ما بتحصل إن (تريكه) يقلش و قال عنه إنه عمال يشتكي زي ما يكون إشتري شكاية بالكهربا .. خلينا نبدأ كلامنا بإننا نجيب شوية في سيرة (مورينيو).
عشان تفهم حجم المشكلة اللي (مورينيو) فيها دلوقتي تخيل نفسك ماسك منصب كبير في بنك .. إنت بدأت حياتك في بنك مصر و عملت لنفسك إسم بعد كده رحت HSBC و عملت معاهم شغل حلو أوي و دلوقتي إنت في CIB و عملت مشاكل و الناس بتشتكي منك و بيفكروا يمشوك بفضيحة و إنت عارف إن لو ده حصل مش حتلاقي شغل في محل صرافة ما بالك ببنك يقبلك .. دي مشكلة (مورينيو) .. الرجل ده بيحارب عشان ينقذ الCareer بتاعته .. الرجل ده خد الدوري المحلي في إسبانيا و إيطاليا و إنجلترا و بالبرتغال .. المفروض واحد بالCV ده أندية العالم كلها تكون بتحفي وراه عشان تعينه حتي لما كان بيتخانق مع إدارة النادي اللي كان شغال فيه .. فاكر لما كان في تشيلسي أول مرة و إتخانق مع (رومان إبراموفيتش Roman Abramovic)؟ تاني يوم كانت إدارة إنتر ميلان معاه علي التليفون و عايزاه يجي و لما راح إكتسح معاهم الدوري الإيطالي و كمان كسب Champions League .. راح ريال مدريد و إتخانق مع إدارته تاني يوم كان (إبراموفيتش) مشغله أغاني (تامر حسني) و بيقوله إرجع بقي وحشتني .. حتي لما إتخانق تاني مع (إبراموفيتش) جه (إيد وودوارد) قاله سيبك من الروسي المعفن ده و تعالي عندي في مكتبي أشربك شاي بالياسمين.
المشكلة دلوقتي إن لو (مورينيو) مشي من مانشستر يونايتد و أنا رأيي إن (وودوارد) فعلاً حيمشيه علي أخر الموسم ده بالكتير أوي تفتكر مين النادي المجنون اللي حيعنيه؟ أكيد ولا نادي من الستة الكبار في إنجلترا حيعوزه .. الريال و البرسا لا طبعاً .. حتي يوفينتوس و باريس سانجيرمان مش بيفكروا فيه .. الرجل ده لو إتشال من مانشستر يونايتد بفضيحة حيعمل زي صاحبنا اللي حيمشي من CIB و مش حيلاقي شغل في حتة نظيفة و حيضطر يروح مكان صغير يبني إسمه من الأول.
فيه ناس بتراهن عليه .. عندك واحد زي (جايمي كاراجر Jamie Carragher) أسطوره ليفربول و اللي كتب مقالة في جريدة The Telegraph البريطانية واخدها كواحد من مصادري شايف إن (مورينيو) يقدر يعدي من الأزمة دي و إن كان في رأيي إن الطبع غلاب .. (مورينيو) بني أدم مبيعرفش يعدي مشاكل و مبيعرفش يحافظ علي نجاحه .. دي طبيعته .. هو بني أدم فيه 3 طباع و إنت يا (وودوارد) كنت عارفهم كويس لما عينته:
- ده رجل بيعرف يكسب بطولات و هو فعلاً كسب بطولتين كاس محلي و بطولة Europa League مع مانشستر يونايتد.
- ده رجل مش بتاع سيكسي فوتبول .. ده رجل سواق أوتوبيسات بيعرف يركن الأوتوبيس بتاعه و يلعب علي الهجمة المرتدة.
- ده رجل عصبي متقدرش تتوقع هو ممكن يقول إيه لو وقف قدام مايك .. لما بيكسب بيقضيها قصف جبهات و بيبقي مسلي فشخ لجمهور فرقته .. لما بيخسر بيبقي عامل زي صاحبك في البلاي ستيشن اللي كل ما يخسر يطلع يقولك الدراع بايظ و الله حظ و أنا كنت أحسن و حرام تكسب.
و دي هي مشكلة (مورينيو) .. هو مدرب كويس بس مش قديم أوي في الشغلانة زي السير (أليكس فيرجسون Alex Ferguson) اللي حتي لما كان بيخسر محدش من الصحفيين بيقدر يتريق عليه أو يحرجه .. بمجرد ما بيخسر الإعلاميين عارفين كويس طبعه خصوصاً الطبع الثالث فبمجرد ما بيقعد قدام المايك بيعمل زي ما (أبوتريكه) قال بيفضل يشتكي .. أصل الدراع كان بايظ .. أصل أنا جبت كور في العارضة و إنت كل فرصك جبتها جوان .. يمكن الإستثناء الوحيد كان بورتو و إنترميلان اللي سابهم من الباب الكبير زي ما بنقول .. لدرجة إن دلوقتي طلعت نكتة عن (مورينيو) هي إنه مبيعرفش يكمل الموسم الثالث له علي خير أو زي ما بيتقال عليها بره Third Season Syndrome أو متلازمة الموسم الثالث و إن كان في رأيي دي هبدة كبيرة شوية .. الرجل ده لما كان ماسك تشيلسي و في موسمه الثالث قبل ما يمشوه كسب بطولتين كأس إنجلترا اللي هم League Cup و FA Cup .. (مورينيو) محتاج حد ياخد بإيده و ينصحه و يوريه الطريق زي ما كده (حزلقوم) طلعلته روح الفنان (غسان مطر) عشان ينصحه يعمل الصح .. بس (غسان مطر) بتاع (مورينيو) هو السير (أليكس فيرجسون) شخصياً.
ناس كتير ناسية إن في الفترة ما بين 2003 و 2007 مانشستر يونايتد مشمش ريحة بطولة الدوري الإنجليزي .. دي الفتره خليني أفكرك اللي (إبراموفيتش) جاب فيها (مورينيو ) يدرب لتشيلسي و دي الفترة اللي الشيخ (منصور) إشتري فيها مانشستر سيتي و في الفترة دي فرقة أرسنال كان ترعب أي حد .. ناس كتير وقتها و لو مش مصدقني إعمل Search بنفسك كانت بتقول علي السير (أليكس فيرجسون) إنه عجز و لازم يبطل تدريب عشان يسيب المجال للجيل الجديد من المدربين زي (مورينيو) .. سبحان الله زي ما دلوقتي الإعلام برده بيقول نفس البق الحمضان ده علي (مورينيو) عشان قال إيه يسيب بقي المجال للجيل الجديد من المدربين زي (زين الدين زيدان).
تفتكر السير (أليكس فيرجسون) عمل إيه؟ .. بني فرقته كلها من أول جديد و بداية من 2008 محدش بقي عارف يوقفه .. الرجل ده من 2008 لحد 2013 كسب 4 بطولات دوري و بطولة Champions League و يمكن دي أنجح فترات حياته كمدير فني لمانشستر يونايتد .. علي فكرة السير (أليكس فيرجسون) صرف فلوس برده عشان يشتري لاعيبه بس صرف صح و بعقل و يمكن دي الحاجة اللي (مورينيو) محتاج يستهدي بالله و يفهمها .. الأهم من كده إنه محتاج يتعلم من السير (أليكس فيرجسون) إزاي يدي لعيبته بالجزمه القديمة لو حد فيهم إتعوج و هنا يجي دور الكلام عن تاني أهم بني أدم في الخناقة دي اللي هو (بول بوجبا).
فيه موضة دلوقتي وسط لاعيبه الكورة إنهم بقوا شايفين نفسهم شويتين تلاتة .. بقي اللاعب من دول وكيل أعماله أهم عنده من مدربه .. السير (أليكس فيرجسون) شاف العيب ده في (بوجبا) زمان أيام ما كان لسه ناشيء في مانشستر يونايتد و مشاه و سابه يروح يوفينتوس زي ما حنشوف ليه بعدين .. ده اللي (مورينيو) محتاج يتعمله من السير (أليكس فيرجسون) .. اللاعيب اللي يتعوج قعده دكة و بيعه كمان لو حكمت .. ده مشي (ديفيد بيكهام David Beckham) و هو في عز مجده عشان إتعوج عليه مرة .. أنا عارف و فاهم كويس أوي رأي الناس اللي بتقول طب ما تشوف (بوجبا) عمل إيه مع منتخب فرنسا في كأس العالم .. يبقي أكيد أداءه العالي ده مقارنة بأداءه اللي زي الزفت مع مانشستر يونايتد معناه حاجة واحدة هي إن (مورينيو) مش عارف يتعامل مع (بوجبا) و مش عارف يكتشنه صح.
أنا فاهم منطقك بس ممكن تمشي ورا منطقي شوية .. ممكن تبص علي منتخب فرنسا في كأس العالم و تقولي شايف إيه .. ده منتخب راكن الأوتوبيس ورا .. خط نصه منضبط جداً حتي المهاجم بتاعهم مشاطش كورة واحدة جوه التلات خشبات طول البطولة و بيلعبوا علي الهجمة المرتدة و الكرات الثابتة .. اللي هي هي نفس طريقة و دماغ (مورينيو) .. (مورينيو) مش عايز من (بوجبا) غير إنه يبقي لاعب خط وسط Box-to-Box بيعرف يباصي كويس و ينقل الكرة للمهاجمين عشان يعملوا الهجمة المرتدة .. طب ما إنت يا إبن الحلال بتعرف تعمل كده مع منتخب فرنسا كويس أهو .. ليه بقي لما بتلبس أم التي-شيرت الأحمر بتنسي الكورة بتتلعب إزاي؟ .. المطلوب منك هنا هو هو المطلوب منك هناك .. مالك بقي؟ .. أنا شخصياً شايف إن المشكلة في (بوجبا) .. هو شخصيته مش راكبه مع (مورينيو) .. هو عايز حد زي (ديديه ديشامب Didier Deschamps) كده يطبطب و يدلع و يسيبه يلعب في تسريحة شعره و يرقص و يعمل مقالب في زمايله و يعيش حياته الطفولية البريئة دي .. (مورينيو) عايز لاعيب رجل .. حاجة زي (فرانك لامبارد Frank Lampard) كده و دي الحاجة اللي (بوجبا) مستحيل يقدمها .. إزاي يفضل بنفس تسريحى الشعر طول حياته مش فاهم أنا.
الجديد في اللي بيحصل جوه مانشستر يونايتد و اللي ممكن متشوفوش في أي حتة في الدنيا إن طول عمرنا بنسمع عن محللين رياضيين ينقلوا و يغطوا خناقات جوه أندية بس عمرنا ما سمعنا عن محللين رياضيين هم اللي بيولعوا الدنيا و تقريباً هم السبب في إن فيه مشكلة جوه مانشستر يونايتد أصلاً .. و أنا هنا علي عكس أي كلام إنت ممكن تسمعه في أي Page رياضية إما بتقول إن (مورينيو) هو الغلطان أو إن (وودوارد) هو أس المشاكل أو إن (بوجبا) هو الشيطان اللي ورا الليلة كلها .. أنا هنا حعرض وجهة نظر مختلفة شوية إن مصيبة مانشستر يونايتد هي ما يسمي بدفعة 1992 أو Class 92 زي ما بيتسموا بره.
سنة 1992 كان ماسك مانشستر يونايتد السير (أليكس فيرجسون) و الرجل ده لو تفتكر خد بطولة Champions League من بق نادي بايرن ميونيخ و كان ساعتها فرقة مانشستر يونايتد معتمدة علي عمود فقري من لاعيبه إنجليز كلهم صغيرين في السن .. في السنة دي الفرقة خدت الثلاثية اللي هم الدوري الإنجليزي و كأس إنجلترا و بطولة Champions League و من ساعتها و إسمهم في الإعلام بقي دفعة 92 .. اللاعيبه دول إعتزلوا و كل واحد راح في سكته .. عندك (ديفيد بيكهام) دلوقتي بيفتح نادي جديد في مدينة ميامي الأميريكية .. عندك الباك الشمال (فيل نيفيل Phil Neville) بقي ماسك منتخب ستات إنجلترا .. عندك (ريان جيجز Ryan Giggs) شغال دلوقتي مدير فني لمنتخب ويلز .. بس فيه منهم إتنين اللي هم كابتن الفرقة و الباك اليمين (جاري نيفيل Gary Neville) و خط الوسط (بول سكولز Paul Scholes) اللي بقت شغلتهم دلوقتي إنهم محللين رياضيين زي (ميدو) و (أبوتريكه) كده .. (جاري نيفيل) شغال في قناة Sky Sports و (بول سكولز) شغال في قناة BT .. المشكلة إن الإتنين دول بالذات زي ما بنقول كده في المثل عايزين جنازة يشبعوا فيها لطم .. شكلك مش مصدقني .. حاسس بيك أنا .. طب ممكن تسيبني أثبتلك وجهة نظري.
الإتنين دول بالذات و دفعة 92 عموماً هم السبب في إن (ديفيد مويس David Moyes) يمشي و من بعده (لويس فان خال Luis Van Gaal) و شكلهم كده بيسعوا إن (مورينيو) يمشي .. المشكلة إن كل ما يطلعوا ينتقدوه يتاخد كلامهم علي إنه شتيمة و إنتقاد في (وودوارد) و في واحد إسمه (مينو ريولا Mino Raiola) و ده يبقي وكيل أعمال (بوجبا) ..خليني أفكرك إن في الماتش الثاني لمانشستر يونايتد في الدوري قدام فرقة برايتون لو تفتكر خسروا الماتش ده 3-2 و بعد الماتش في التحليل طلع (جاري نيفيل) قال إن جزء من مشاكل الفرقة إن (مورينيو) طلب يجيله لاعيبه معينة في الصيف بس (وودوارد) رفض .. مجرد تعليق إتقال في حلقة برنامج رياضي عشان يغطوا ماتش كورة .. تاني يوم جماهير يونايتد قلبت علي (وودوارد) اللي لقي نفسه يا عيني مضطر يحط في بقة جزمة قديمة و ميجيبش سيرة إن (مورينيو) يمشي و يجيبوا مكانه (زين الدين زيدان) أو (أنتونيو كونتي Antonio Conte) .. بص قول علي دفعة 92 اللي إنت عايزه بس يظل رأيي فيهم إنهم لاعيبه رجاله .. مفيش لاعيب خط وسط بيلعب بالروح بتاعة (سكولز) و يمكن عشان كده هم مش طايقين (بوجبا).
من وجهة نظر لاعب رجل زي (سكولز) أو لاعب كابتن أقوي فرقة في العالم زي (جاري نيفيل) فلاعب زي (بوجبا) ده مبالغ فيه .. مبالغ في عدد تسريحات شعره .. مبالغ فيه إهتمامه بتغطية الإعلام ليه .. هم شايفينه بني أدم مبالغ فيه .. لاعيب كرة علي أعلي مستوي بس كبني أدم هو مبالغ فيه .. الأهم إنهم شايفين إن السير (أليكس فيرجسون) باعه و هو صغير ليوفينتوس لإنه شاف فيه من صغره إنه بني أدم مبالغ فيه .. فلما السير يقول علي بني أدم كده يبقي هو كده .. ده بيوقع الشلة بتاعة دفعة 92 في خناقات كتير علي الSocial Media مع (مينو ريولا) اللي تاني بفكرك إنه وكيل أعمال (بوجبا) .. أخر خناقة كانت بعد ماتش برايتون برده لما (سكولز) قال في تعليقه علي الماتش إن (بوجبا) مينفعش قائد في الملعب .. رد عليه (مينو ريولا) في Tweet إن (سكولز) حتي لو كان واقف قدام سير (وينستون تشرتشل Winston Churchill) اللي كان ماسك رئاسة وزراء بريطانيا وقت الحرب العالمية الثانية برده حيقول عليه مينفعش يبقي قائد .. ملخص اللي أنا عايز أقوله إن دفعة 92 عينت نفسها ولاه و حراس علي النادي خصوصاً بعد ما السير (أليكس فيرجسون) طلع نفسه معاش .. بس يبقي السؤال هو الناس دي عايزه إيه من (مورينيو)؟
هل هم عايزين يمشوه؟ ولا هم واقفين وراه عشان شافوا إنهم في كل مرة لما سعوا ورا إقالة المدير الفني لما معجبهمش النادي لبس في الحيطة و لحد دلوقتي مش عارف يطلع؟ هل لما واحد زي (جاري نيفيل) يطلع يقول إن أصل لو (وودوارد) كان جدد عقد (مورينيو) قبل ما الموسم ما يبدأ كان بقي ملزم إنه يجيبله اللاعيبه اللي هو عايزها بس كده هو بيلعب علي إنه يطفش (مورينيو) من النادي فهل معني كده إن (جاري نيفيل) غير رأيه و بقي مع إن المدير الفني لمانشستر يونايتد (أيا كان هو مين) لازم يكمل مدته و الإدارة تصبر عليه زي ما صبرت علي السير (أليكس فيرجسون)؟ .. مع العلم إن من سنة 2013 لحد دلوقتي مانشستر يونايتد صارف علي اللاعيبه اللي إشتراهم أكثر من 711 مليون جنيه استرليني.
علي الناحية التانية شلة 92 عامله مشاكل مع (وودوارد) .. عندك مثلاً إنهم مش ناسيينله إنه مرتين كان قدامه يخلي (جيجز) هو المدير الفني للفرقة بس رفض بحجة إنه معندوش خبرة كافية .. بس يمكن المشكلة اللي عامله شرخ في العلاقة بينهم و بينه إن الرباعي (سكولز) و (نيكي بات Nicky Butt) و الأخوين (نيفل) شركاء مع بعض في فندق إسمه Hotel Football إتبني لازق في إستاد الأولد ترافورد و عايز أقولك إن (وودوارد) حارب بكل الطرق إن الفندق ده ميتبناش .. بس قدام الناس هناك أربعة لاعيبه كورة إدوا رجل المفروض إنه بتاع Business علي قفاه و أجبروه يقبل بوضع هو مش عايزه.
فيه منكوا بيسأل أكيد طب هو السير (أليكس فيرجسون) مبسوط بكده؟ هل و هو شايف لاعيبته القديمة و هي عماله تطوح النادي يمين و شمال بنفوذها هو كده منشكح؟ .. الحقيقة اه .. السنة اللي فاتت قبل ماتش خيري قال إنه مبسوط بإنه شايف (ريو فيرديناند Rio Ferdinand) شغال محلل رياضي مع (سكولز) اللي هو بيسميه (سكولزي Scholesy) كإسم دلع و مبسوط أوي باللي بيعمله (جاري نيفل) اللي أثبت نفسه كBusinessman محترم عمال يشتري حاجات كتير في مانشستر .. اللي انا شايفه دلوقتي إن السير (أليكس فيرجسون) و شله لاعيبته القدام واقفين ورا (مورينيو) علي عكس مواقفهم القديمه مع (مويس) و (فان خال) و طالما الوضع كده فإيد (وودوارد) متكتفه و مش حيعرف لا يمشي (مورينيو) ولا يجيب (زيدان).
المصادر:
- مقالة بعنوان Battles tearing Manchester United apart as Jose Mourinho, Ed Woodward and former players wage war و ده لينك المقالة الأصلية:
http://www.dailymail.co.uk/sport/football/article-6098467/Battle-tearing-Manchester-United-apart-Jose-Mourinho-Ed-Woodward-former-players-wage-war.html - مقالة بعنوان Jose Mourinho is fighting to stay at top level- if he leaves Man Utd, which club will take him? إتنشرت في جريدة The Telegraph و كتبها أسطوره ليفربول (جايمي كاراجر Jamie Carragher) و ده لينك المقالة الأصلية:
https://www.telegraph.co.uk/football/2018/08/24/jose-mourinho-fighting-stay-top-level-leaves-man-utd-big-club/
