ميزة جيلنا إنه الدنيا سحلته لدرجة بقي عارف أهم قاعدة في الحياة الناس عايشة بيها دلوقتي .. الشغل مبيقفش علي حد .. دي و حقيقة إن الست والدتك دايماً عندها حق .. لو إنت بتشتغل في القطاع الخاص فإنت عارف إن الشغل مش بيموت .. الشغل مش بيقف علي حد .. لو مشيت النهاردة حيجي بكرة غيرك عشرة .. مش مهم إنك رابع دفعتك .. مش مهم إنك بتعرف تشتغل AutoCAD و Revit و كل البرامج اللي السوق بيستخدمها و مش بيستخدمها .. مش مهم بتعرف تتكلم كام لغة .. لو الشغل متسلمش في معاده حتمشي و حجنيب غيرك .. لو الكلاينت إشتكي منك برده حتمشي و حنجيب غيرك .. الكلام ده يمشي علي الشغل سواء في البيزنس أو الهندسة أو حتي كرة القدم و لو مش مصدقني روح إسأل (فرانك لامبارد Frank Lampard).
في رأيي الشخصي العلاقة بين (لامبارد) و بين مالك نادي تشيلسي (رومان إبراموفيتش Roman Abramovich) هي زيها زي علاقة أي صاحب شغل مع موظف شاطر شغال عنده .. مشكلة (لامبارد) إنه كان متخيل إنه شاطر جداً و مهم لدرجة إن صاحب الشغل ميقدرش يمشيه .. أصل مين حيمشي الشغل من بعده؟ .. ده أنا عارف كل صغيرة و كبيرة في الشركة .. خليني أبقي صريح معاك أكتر و أقولك إن (لامبارد) كان متخيل إنه مش بس شاطر و من غيره الشغل حيقع إنما كمان كان متخيل إنه محمل صاحب الشغل جميلة و خليني أفهمك النقطة دي بالذات .. من وجهة نظر (لامبارد) فهو جه مسك الفرقة في وقت كان (إبراموفيتش) أساساً مكنش حيلاقي حد يرضي يجي يشتغل .. النادي متوقع عليه عقوبة حظر شراء أي لاعيب .. أهم لاعيب في الفرقة اللي هو (إيدين هازارد Eden Hazard) باعوه لريال مدريد .. مين كان حيرضي يمسك الفرقة في ظروف زي دي؟ .. طب إيه رأيك بقي إن أنا جيت مسكت الفرقة و حققت إنجاز إني كنت من ضمن الأربعة الكبار و لعبت في بطولة Champions League و أنا معتمد علي اللاعيبة الناشئين اللي النادي كان متعود يبيعهم أو يطلعهم إعارة عشان يسترزق منهم بقرشين حلوين .. بذمتك إنت لو مكان (لامبارد) مش حتبقي حاسس إن صاحب الشغل ميقدرش يمشيك؟ .. لو إنت مكانه مش حتقول لنفسك أنا أستحق إن حتي لو الدنيا ممشتش معايا شوية إن صاحب الشغل يصبر عليا عشان هو عارف إني أقدر أسلم شغل حلو؟
اللي (لامبارد) كان محتاج يفهمه إن إذا كان أنا مثلاً كمهندس بقضي أغلب وقتي بسأل نفسي هو يا تري التسليمة الجاية حتتسلم إزاي؟ و إيه المشاكل اللي في التصميم اللي محتاجة تتحل؟ فصاحب الشغل بيكون بيسأل نفسه سؤال تاني خالص .. هو أنا لو أنا مشيت إيه اللي حيحصل؟ .. مفيش صاحب شغل مبيشغلش باله بإحتمالية إن أهم موظف عنده يخشله فجأة يقوله إن أنا جايلي Offer أعلي و عايز أمشي .. دايماً صاحب الشغل عنده هسهس إسمه Plan B اللي هي حنهبب إيه لو أهم موظف عندي مشي .. أو إضطريت أمشيه .. إنت كموظف بتبقي مسحول في شغلك لدرجة إن غالباً بيتوه من دماغك إن صاحب الشغل لما بيجي الصبح يسلم عليك بيكون بيسأل نفسه يا تري حتجيلي تقولي أنا جايلي Offer أعلي و عايز أمشي إمتي يا ناكر الجميل يا اللي لميتك من الشوارع و إنت مش لاقي شغل و بتشحت .. (لامبارد) كان محتاج يفهم إن (إبراموفيتش) صاحب شغل مش باقي علي حد لدرجة إنه مش بس عنده Plan B إنما عنده Plan C كمان .. إيه رأيك بقي؟
أرجوك حاول متظلمش (إبراموفيتش) و حاول عشان خاطري تبص للموضوع من وجهة نظره هو .. لو إنت يا (لامبارد) متخيل إنك عملت إنجاز لما خدت رابع الدوري في الظروف الصعبة اللي إنت إستلمت فيها الفرقة فعايزك ترجع بالزمن لسنة 2012 .. في السنة دي أنا جبت مدير فني مؤقت إسمه (روبيرتو دي ماتيو Roberto Di Matteo) و خد بطولة Champions League و قعدته الموسم اللي وراه بس مشيته مش بس عشان أداء الفرقة بقي زي الزفت إنما لإن الفرقة خدت البطولة بإنهم فضلوا يركنوا الأوتوبيس .. ده مقبول لو إنت حتلاعب برشلونة في نص النهائي أو بايرن ميونيخ في النهائي بس مش منطقي إنك تلاعب ويستهام كده برده يعني .. (دي ماتيو) مشيته عشان هو كان جاي كمدير فني مؤقت و مكنش ينفع بصراحة إنه يمسك الشغلانة أكتر من كده .. لما مشيت (جوزيه مورينيو Jose Mourinho) في المرة الثانية الفرقة كانت بينها و بين منطقة الهبوط نقطة .. حتي (أنتونيو كونتي Antonio Conte) سبته يكمل السنتين بتوعه .. و (ماوريسيو ساري Mauricio Sarri) هو اللي مشي عشان يمسك يوفينتوس.
أنا عايزك تعرف إن عاجلاً أم أجلاً (إبراموفيتش) حيجيب (جوليان ناجلزمان Julian Nagelsmann) المدير الفني لفرقة أر بي لايبرج الألمانية .. (إبراموفيتش) شبطان في (ناجزلمان) زي ما خطيبتك بتبقي شبطانه تيجي معاها عيد ميلاد صاحبتها عشان تغيظ شلتها بيك .. بس إذا كان تشيلسي معاه فلوس فبرده لايبزج معاه فلوس .. (ناجزلمان) إستحالة يجي دلوقتي و يسيب لايبزج في نص الموسم .. عشان كده (إبراموفيتش) راح للأوبشن التالت .. (توماس توخيل Thomas Tuchel).
ميغركش الملايين اللي إتدفعت في تشيلسي عشان يشتروا لاعيبة الموسم ده .. حاول متبصش ل170 مليون يورو اللي إتدفعوا و تقول دول أكتر من الفلوس اللي صرفتهم أندية ليفربول و مانشستر سيتي و مانشستر يونايتد في فترة الإنتقالات الصيفية اللي فاتت .. أنا عايزك تعرف إن اللاعيبة دي كلها جت مش عشان (لامبارد) عايزها .. اللاعيبة دي كلها جت عشان يوم ما (ناجلزمان) يمسك الفرقة يبقي مبسوط .. ده السبب ورا إن أغلب اللاعيبة الجداد اللي تشيلسي إشتراهم كانوا من ألمانيا أو علي الأقل عدوا علي الدوري الألماني .. (تيمو فيرنر Timo Werner) لعب مع (ناجلزمان) في لايبزج .. (كاي هافيرتز Kai Havertz) لما كان بيلعب في باير ليفركوزن ف(ناجلزمان) كان عايز يشتريه و يجيبه لايبزج .. (أنتونيو روديجير Antonio Rudiger) قلب الدفاع ألماني و لعب في الدوري الألماني و (ناجلزمان) عارفه كويس .. حتي أحرف واحد في فرقة تشيلسي دلوقتي اللي هو الأمريكاني (كريستيان بوليسيك Christian Pulisic) عظمه نشف في بروسيا دورتموند قبل ما يجي تشيلسي .. ده يفسرلك ليه اللاعيب اللي كان فعلاً (لامبارد) عايزه مجاش اللي هو (ديكلان رايس Declan Rice) لاعيب خط النص العربجي في فرقة ويستهام .. (لامبارد) كان حيموت عليه بس الإدارة قالتله لا .. طب ليه؟ .. قالك أصله كان ناشيء في أكاديمية تشيلسي و إحنا بعناه لما كان عنده 14 سنة فحيبقي شكلنا وحش لو رجعناه .. لا و النبي .. هم مجابوش (رايس) عشان حسوا إن إحتمال (ناجلزمان) ميكونش عايزه لما إن شاء الله يعني في يوم محدش عارف إمتي يجي فيه تشيلسي .. فرقة تشيلسي دي فيها حاجة غلط لإن اللاعيبة اللي إشتروها زي بالضبط لما تحب تجيب لمراتك هدية في عيد جوازكوا .. هي مقالتلكش نصاً هي عايزة إيه فده يخليك تسأل نفسك هو يا تري ممكن تكون هي نفسها في إيه؟ و السؤال ده لو رجل سأله لنفسه قبل ما يجيب هدية لواحدة الست فدايماً الهدية بتطع غلط و المفاجاة بتقلب بخناقة.
طب لما (ناجلزمان) إتعرف إنه مينفعش يجي؟ .. جه (توخيل) .. الإتنين ألمان و بالتالي عارفين اللاعيبة الألمان اللي تشيلسي إشتراهم .. عايز أقولك إن (توخيل) هو اللي خلي (بوليسيك) أحرف لاعيب في بروسيا دورتموند و بسبب شغل (توخيل) معاه تشيلسي إشتروه .. صادف كمان إن (توخيل) إشتغل قبل كده مع (تياجو سيلفا Thiago Silva) في باريس سانجيرمان .. يا عيني (لامبارد) صعبان عليا أوي .. كان متخيل إن كل الملايين اللي بتتدفع دي عشان خاطر سواد عيونه .. هو كان متخيل إن النادي واقف في ظهره و عاملين معاه زي (عادل إمام) في مسرحية الزعيم .. عايز جناح؟ خد (تيمو فيرنر) .. عايز صانع ألعاب؟ خد (هافيرتز) .. هو كان متخيل إن صاحب الشغل حيديله وقته .. غلبان أوي .. في البيان اللي طلع من إدارة تشيلسي لإعلان إقالة (لامبارد) إتقالت جملة غريبة أوي .. قالك إحنا مشيناه عشان الوضع في الفرقة وصل لمرحلة و خليني أنقل الجملة نصاً زي ما هي كده .. Without Any Clear Path to Sustained Improvement يعني علي بلاطة كده الفرقة دي مفيش منها رجا .. من الأخر برده (إبراموفيتش) مشا (لامبارد) ل3 أسباب:
- السبب الأول .. لما بقي عنده شبه يقين إن تشيلسي مش حيكون من ضمن الأربعة الكبار الموسم ده .. و مش بس كده .. كلنا عارفين إن إحتمالات إن تشيلسي بمستواه اللي كان بيلعب بيه تحت إيد (لامبارد) يعدي من أتليتيكو مدريد في Champions League زيها زي إحتمالات إن (ياسمين صبري) تسيب (أحمد أبو هشيمة) و تتجوزك إنت .. معلش يعني في أخر 8 ماتشات لتشيلسي في الدوري لما (لامبارد) كان ماسكهم خدوا 7 نقط بس من أصل 24 نقطة.
- السبب الثاني إن زي أي صاحب شغل بيكون له العصفورة بتاعته وسط الموظفين فالعصفورة بتاعة (إبراموفيتش) واحدة إسمها (مارينا جرانوفسكايا Marina Granovskaia) .. منصبها الرسمي هي المديرة التنفيذية للنادي بس فعلياً هي العصفورة .. هي اللي فضلت تزن فوق ودن (إبراموفيتش) إن (لامبارد) مش هو الشخص المناسب بسبب خناقته اللي بقت مشكلة شخصية مع حارس المرمي الإسباني (كيبا أريزابلاجا Kepa Arrizabalaga) .. وجهة نظر الست (مارينا) مش إن حرام ال71 مليون جنيه إسترليني اللي إتصرفوا عليه يترموا علي الأرض كده .. هي مشكلتها إن كان ممكن (لامبارد) يتعامل مع (كيبا) أحسن من كده شوية .. هل هي عندها حق؟ .. الله أعلم.
- السبب الثالث و ده المهم الحقيقة إن أحيانا كتير الموسم ده حسينا إن (لامبارد) نفسه مش عارف هو عايز إيه .. معلش يعني إنت لحد دلوقتي لعبت 19 ماتش الموسم ده عملت فيهم 50 تغيير في المراكز.
عشان تفهم (توخيل) انت لازم تقسم ال Career بتاعته لنصين .. النص الأولاني لما كان ماسك فرقة ماينز و بعد كده مسك فرقة بروسيا دورتموند .. علي فكرة هو و (يورجين كلوب Jurgen Klopp) عدوا علي نفس الأندية تقريباً و دي صدفة غريبة .. في النص ده من حياته كنت تقدر تلخص أسلوبه في اللعب زي ما (محمد سعد) كان بيقول .. أنا مفيش حد يتوقعني .. إنت تنزل قدامه لا إنت عارف التشكيلة اللي حتلعب إيه ولا إنت عارف الأدوار اللي اللاعيبة بتاعته حتعملها .. نجاحه مع ماينز خلاه يروح بروسيا دورتموند قعد معاهم سنتين كسب فيهم بطولة كأس ألمانيا و بعد كده مشوه رغم إنه في السنتين خد مركز ثاني و ثالث في الدوري .. بعد كده قعد سنة في البيت مش لاقي شغل لحد ما جاتله فرصة شغل إنه يمسك باريس سانجيرمان و بدأ النص الثاني من Career بتاعته .. ميس الحضانة .. لاعيبة باريس سانجيرمان مش محتاجين مدير فني .. سواء (نايمار Neymar) أو (كيليان إيمبابي Kylian Mbappe) لاعيبة بتاخد مرتبات بالملايين و الأهم إنها مناخيرهم و السما .. دي لاعيبة مينعش تقولها إحنا مطرود مننا واحد و إرجعوا دافعوا .. أوضة اللبس في فرقة زي باريس سانجيرمان مش زي أوضة اللبس في فرقة بيرنلي مثلاً .. دي حضانة مش أوضة لبس .. في باريس سانجيرمان (توخيل) كان لازم يطبطب و يدلع و يدادي .. دي نفس المعاناة اللي عاشها أستاذه (كارلو أنشيلوتي Carlo Ancelotti) .. أحياناً بحس إن مجرد وصول باريس سانجيرمان لنهائي Champions League هو ده سقفهم.
ده حيحطنا قدام وضع طب يا سيدي لنفترض جدلاً يعني إن (لامبارد) قلب علي كابتن (رضا عبدالعال) و كان لازم يمشي .. خدامك أنا و العربية .. طب ممكن نسأل هو إيه المطلوب من (توخيل) بالضبط؟ .. الإجابة انه يكسب .. هو صحيح محدش مستني منه حاجة في الكام شهر اللي فاضلين لحد الموسم ما يخلص بس من أول الموسم الجاي و إنت طالع و هو حيتحاسب حساب الملكين .. ده معناه إن (توخيل) مش حيفرق معاه أوي فكرة إنه ينمي المواهب الناشئة أو إنه يعلم العيال الصغيرة .. لا خالص .. لاعيبة زي (مايسون ماونت Mason Mount) و (رييس جيمس Reece James) و (تامي إبراهام Tammy Abraham) مستنيهم أيام سودا في تشيلسي .. (تامي إبراهام) اللي ناس كتير في إنجلترا شايفاه مستقبل خط هجوم المنتخب .. مشجعي تشيلسي نفسهم كان حاطين عليه أمل إنه يبقي (محمد صلاح) أو (هاري كاين Harry Kane) بتاعهم بس في نفس الوقت هو محتاج وقت و محتاج شغل كتير و محتاج صبر و الحقيقة إن (توخيل) لا عنده وقت ولا عنده صبر.
أنا بس عايز أختم إني أسيبك و إنت مستوعب كويس أوي إن اللي عملته إدارة تشيلسي ده Risk مش سهلة .. إنت دلوقتي بقي عندك إحتمالين .. الإحتمال الأول إن من دلوقتي لحد أخر الموسم نتايج تشيلسي تفضل زي الزفت كده و بالتالي أخر الموسم حتلاقيهم زي الكلاب إشتروا (ديكلان رايس) ده إذا كان معاهم فلوس أصلاً و ساعتها كلنا حنسمع (لامبارد) بيقول أنا صح أنا صح .. الإحتمال الثاني إن بعد الموسم اللي جاي (توخيل) يعمل شغل حلو مع تشيلسي و ساعتها الإدارة حتحط جزمة في بقها و تجدد عقده و ينسوا خالص إنهم يجيبوا (ناجلزمان) .. و أتمني كمان متنساش إن (توخيل) دماغه جزمة قديمة لما بتقفل معاه بيقلب صعيدي .. متنساش إنه ساب بروسيا دورتموند و باريس سانجيرمان بخناقة .. و حاول كمان متنساش إن (إبراموفيتش) من ساعة ما مسك تشيلسي سنة 2003 غير المدير الفني للفرقة 14 مرة يعني بتتكلم عن صاحب شغل مش باقي علي حد.
المصادر:
- مقالة بعنوان Frank Lampard has been taken for a ride by Chelsea, with Thomas Tuchel inheriting a squad full of Bundesliga stars that looks built for him. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-9185999/MARTIN-SAMUEL-Frank-Lampard-taken-RIDE-Chelsea.html - مقالة بعنوان Chelsea gamble by sacking Frank Lampard نشرت في موقع محطة ESPN الأميريكية و ده لينك المقالة الأصلية:
https://www.espn.com/soccer/blog-marcottis-musings/story/4297780/chelsea-gamble-by-sacking-lampardreal-madrids-old-guard-winliverpool-and-man-uniteds-fun-cup-clash - مقالة بعنوان Chelsea’s issues go beyond Lampard’s management: Why they aren’t giving up on him yet نشرت في موقع محطة ESPN الأميريكية و ده لينك المقالة الأصلية:
https://www.espn.com/soccer/blog-marcottis-musings/story/4294009/chelseas-issues-go-beyond-lampards-management-why-they-arent-giving-up-on-him-yet
