اللي حنتكلم عنه النهاردة هو ال1700 طيارة اللي عند الصين .. لإن الصين عندها حاملة طيارات يتيمة والحاملة دي تبع القوات البحرية فده بيخلي إن القوات البحرية الصينية هي كمان عندها طيارات مقاتلة زيها زي القوات الجوية .. المهم إن الإتنين مع بعض عندهم 1700 طيارة وده بيخلي الصين عندها تاني أكبر سلاح جو في العالم بعد أميركا اللي عندها 3400 طيارة مقاتلة هم كمان متوزعين علي القوات الجوية والبحرية لإن أميركا عندها حاملات طائرات .. اللي حنتكلم عنه النهاردة هو كوكتيل الطيارات اللي عند الصين .. الكوكتيل ده في منه طيارات سوفيتية ومنه طيارات روسية ومنه طيارات صينية بس حتي الطيارات الصينية اتصنعت Copy & Paste من طيارات تانية زي ما حنفهم كمان شوية .. لإن الموضوع مُعقد وحيتوهك فإحنا حنقسم الطيارات دي أقسام كل قسم علي حسب هي الطيارة دي جايه منين .. عشان تفهم أكتر خليني أرصلك الأقسام اللي حنتكلم عنها:
- الطيارات اللي الصين اشترتها من الإتحاد السوفيتي الله يرحمه واللي لسه في الخدمة لحد دلوقتي.
- الطيارات اللي الصين سرقت تصميمها من الإتحاد السوفيتي الله يرحمه.
- الطيارات اللي الصين صنعتها بنفسها وصممتها بنفسها ومسرقتش حاجة من حد.
- الطيارات اللي الصين خدتها من روسيا بعد ما الإتحاد السوفيتي إنهار.
- دخول الصين لمجال الطيارات الStealth أو اللي ليها القدرة علي التخفي من الرادار.
الطيارات اللي الصين اشترتها من الإتحاد السوفيتي ولسه في الخدمة لحد دلوقتي:
أنا عارف إن كتير منكوا اللي اتولدوا في الألفينات متعرفوش إيه هو الإتحاد السوفيتي لإنكو معشتوش أيامه .. روسيا زمان أيام باباك ما كان لسه في سنك دلوقتي كانت عبارة عن دولة كبيرة أوي إحتلت شوية دول حوليها و وحدتهم مع بعض في حاجة سموها الإتحاد السوفيتي وكان قوة عظمي زيه زي أميركا دلوقتي والإتحاد ده إتفك سنة 1989 .. المهم إن في الخمسينات الإتحاد السوفيتي والصين كانت العلاقة بينهم زي العلاقة بين (عمرو دياب) و (دينا الشربيني) دلوقتي .. الإتنين كانوا دايبين في بعض .. الإتحاد السوفيتي مكنش عنده أي مشكلة إنه مش بس يدي الصينين سلاح إنما كان بيعلمهم إزاي يصنعوه .. واحدة من أوائل الطيارات المقاتلة اللي كانت تصنيع صيني كانت J-6 واللي كانت نسخة طبق الأصل من الطيارة السوفيتية MiG-19 .. الصين صنعت الالاف من الJ-6 وأغلبهم كلهم دلوقتي طلع بره الخدمة بس فاضل منهم 150 طيارة الصينيين بقوا بيسموهم بعد التعديلات الكتير اللي إتعملت عليهم نانشانج كيو-خمسة Nanchang Q-5 ووظيفتهم دلوقتي إنهم يشيلوا قنابل موجهة بالليزر.
سنة 1960 العلاقة بين الصين والإتحاد السوفيتي بقت شبه العلاقة بين (أحمد عز) و (زينه) اللي هو الإتنين مش طايقين بعض بس لما الإتحاد السوفيتي حب يرجع المياه لمجاريها أدوا الصينيين هدية عبارة عن 12 مقاتلة MiG-21 اللي كانت وقتها الBMW بتاعة الطيارات المقاتلة .. الصينيين زي أي بنت بتتقل علي حبيبها خدت الهدية وقفلت الباب في وش السوفييت .. الصينيين خدوا الطيارات دي فكوها حتت وفهموا هي بتشتغل إزاي و بشوية Reverse Engineering عملوا واحدة زيها بس سموها تشينجدو جيه-سبعة Chengdu J-7 .. خلال الفترة من 1978 لحد 2013 الصين أنتجت الالاف من الJ-7 وحالياً فيه منهم حوالي 400 طيارة في الخدمة .. الحقيقة إن الMiG-21 وبناء عليه الكلام بيشمل الJ-7 كانت طيارة تحفة كل حاجة فيها Perfect .. السوفييت عملوا طيارة رغم إنها من تصنيع الستينات إلا إنها لحد دلوقتي تقدر تقف قصاد طيارة حديثة زي F-16 Fighting Falcon من حيث السرعة والقدرة علي المناورة .. عيبها إن خزان البنزين بتاعها صغير وبالتالي مبتقدرش تطير مسافات بعيدة ومبتقدرش تشيل ذخيرة كتير .. بس يمكن العيب الأهم هو إن الرادار بتاعها علي قده أوي .. سنة 2004 الصينيين حلوا المشكلة دي لما عملوا الJ-7G ودي هي هي الJ-7 العادية بس غيروا الرادار بتاعها وحطولها Doppler Radar تصنيع إسرائيلي بيقدر يخلي الطيار يشوف أي حاجة حوليه بدائرة نصف قطرها 55 كيلومتر .. بس خدت بالك إن الصينيين الطيارة عندهم من الستينات بس إفتكروا يحلولها مشكلتها سنة 2004 .. Its Never Too Late يا جماعة.
الطيارات اللي الصين سرقت تصميمها من الإتحاد السوفيتي:
في الخمسينات يعني بعد الحرب العالمية الثانية ما خلصت السوفييت طلعوا قاذفة قنابل بمحركين سموها توبيلوف-16 بادجر Tu-16 Badger .. الصينيين بطريقة ما خدوا التصميمات بتاعتها وعملوا واحدة Copy & Paste منها سموها جيان إتش-ستة Xian H-6 .. صحيح الطيارة دي قدراتها متجيش حاجة جنب قاذفة القنابل الأميريكية B-52 أو جنب قاذفة القنابل الروسية توبيلوف-95 بير Tu-95 Bear حفيدة الTu-16 Badger اللي الصينيين سرقوا تصميماتها بس تظل الXian H-6 مهمة لسبب وهو إن الصينيين عملوا منها نسخة اسمها H-6K أولاً بتقدر تمونها بنزين وهي في الجو و ثانياً بتقدر تشيل صواريخ بعيدة المدي تقدر إنها مثلاً تقصف أسطول أميريكي كامل وتغرقه وهو لسه علي بعد 6000 كيلومتر من الشواطيء الصينية.
الطيارات اللي الصين صنعتها بنفسها:
في الستينات الصينيين سألوا نفسهم هو إحنا لحد إمتي حنفضل ناخد طيارات سوفيتية ونعملها Reverse Engineering طب ما إحنا إتعلمنا الشغلانة وجه الوقت اللي نعملها بنفسنا .. الصينيين قعدوا يشتغلوا 20 سنة لحد في الأخر ما طلعولنا الطيارة شينيانج جيه-ثمانية Shenyang J-8 سنة 1979 .. الطياره دي لما تشوفها تحس إن الصينيين جابوا تصميم الMiG-21 وتصميم السوخوي-15 السوفيتية Su-15 ضربوهم في الخلاط وحطوهم في الفرن عشان في الأخر يطلعوا الJ-8 .. الJ-8 كانت سريعة بتقدر تطير بسرعات ماخ 2.2 بس متعرفش تناور ولا فيها أنظمة ملاحة جوية و إتصالات كويسة .. اللي هو مجرد صاج متلحم في بعضه فيها موتور جامد وخلاص علي كده .. الصينيين تاني لجأوا للإسرائيليين عشان يحلولهم مشكلة الرادارات ونزلوا نسخة جديدة من الJ-8 سموها J-8II فيها رادار إسرائيلي قوي بحيث دلوقتي بقت طيارة سريعة وفيها رادار كويس بس مبتعرفش تناور اللي هو بالضبط حاجة شبه الطيارة الأميريكية F-4 Phantom وحالياً الصين عندها 150 طيارة J-8II في الخدمة.
زي ما قلتلك في البداية إن الصين عندها حاملة طائرات يتيمة فطبيعي إنهم يفكروا إنهم يبقي عندهم طيارات مقاتلة تنفع تشتغل من علي متن حاملات طائرات .. هم قالوا لنفسهم إن بقي عندهم الJ-8 فعايزين يعملوا واحدة أختها بس بتقدر تقلع من علي حاملة طائرات .. هنا جت الطيارة JH-7 Flying Leopard أو النمر الطائر .. الطيارة دي دخلت الخدمة سنة 1992 والحقيقة إن أقرب تشبيه يوصفهالك إنها عامله زي العربية النص نقل .. مش سريعة أوي وأخر سرعة ليها هي ماخ 1.75 بس بتقدر تشيل كمية ذخيرة بتخليها تقيلة اوي زي العربيات النص نقل وبالتالي قدرتها علي المناورة شبه معدومة .. لو حصل في مرة وطيارة من JH-7 دي واجهت مثلاً طيارة أميريكية زي F/A-18 Superhornet فحيتمسح بكرامتها الأرض.
مع الوقت الصينيين بدأوا يفهموا المشكلة اللي هم فيها .. الطيارة الأساسية اللي القوات الجوية بتاعتهم بتعتمد عليها اللي هي J-8 والطيارة الأساسية بتاعة القوات البحرية اللي حتشتغل علي حاملة الطائرات الوحيدة اللي عندهم اللي هي JH-7 الإتنين فيهم نفس العيب وهو إنهم عاملين زي العربيات النص نقل .. إلي حد ما سراع وبيشيلوا كمية ذخيرة كبيرة بس الإتنين ملهمش أي قدرة علي المناورة والإتنين أجهزة الملاحة الجوية والإتصالات بتاعتهم علي قدها خالص وده محتاج يتغير .. الحل كان إن الصين قدمت للعالم الطيارة Chengdu J-10 Vigorous Dragon ودي تبقي النسخة الصيني من الطيارة الأميريكية F-16 Fighting Falcon واللي علي فكرة سرقوا تصميمها من أميركا واللي إداهم التصميمات بتاعتها هم الإسرائيليين .. الJ-10 زيها زي الF-16 الاتنين طيارات سريعه اوي ليهم قدره رهيبه علي المناوره والاتنين بيتقال عليهم Multi-Role Fighters يعني طيارات بتقدر تقوم بكذا مهمه والاهم انهم اتبنوا بتكنولوجيا اسمها Fly-By-Wire .. التكنولوجيا دي عامله بالضبط زي فكره الPower Steering في العربيات انك بسهوله بتنقل حركه الدريكسيون بتاعه السواق للعجل بحيث ان العربيه تبقي المناوره بيها اسهل و اسرع .. الفكره برده انك عايز استجابه الطياره لحركه الJoy Stick في ايد الطيار تبقي سريعه و لحظيه وده هدفه انك تعوض الUnstable Aerodynamics بتاعه التصميم بتاعه الطيارتين .. بصوا هو موضوع كبير فبلاش نخش في تفاصيله دلوقتي .. الصينيين نزلوا منها نسخه تانيه هي J-10B ودي فيها انظمه ملاحه و اتصالات علي اعلي مستوي فيه شويه امكانيات عاليه اوي زي نظام البحث و التتبع اللي بيشتغل بالاشعه تحت الحمرا و نظام رادار اسمه Active Electronically Scanned Array او AESA اختصارا وده بيخلي الJ-10B حقا و صدقا متفرفش حاجه عن الF-16 .. الصين عندها حاليا 250 طياره J-10
الطيارات اللي الصين اشترتها من روسيا بعد ما الاتحاد السوفيتي انهار:
روسيا في اوائل التسعينات كانت بتشحت وكانت بتجري ورا اي قرشين تقدر تجيبهم وده خلاها ترمي خلافاتها مع الصين في الزباله لما الصين جت خبطت علي باب روسيا و عرضت عليها تشتري منها شويه طيارات Sukhoi Su-27 اللي كانت وقتها معجزه هندسيه روسيه .. الطياره دي كانت ليها قدره علي المناوره حاجه شبه عربيات الFormula-1 و ليها نفس مدي الطيران و نفس الحموله زيها زي الطياره F-15 Strike Eagle اللي الامريكان وقتها كانوا طالعين بيها السما .. الروس وافقوا علي الصفقه ودي كانت اكبر غلطه هم عملوها في حياتهم .. الصين عرضت علي روسيا انها حتدفع فلوس زياده في مقابل ان الصين يبقي ليها حق تصنيع التسليمات اللي بعد التسليمه الاولي .. الروس وافقوا .. فعلا الصين اول ما بقي ليها حق تصنيع الSu-27 قامت برده عملت شويه Reverse Engineering انهم فكوها حتت و عرفوا بتشتغل ازاي و عملوا واحده Copy & Paste منها سموها Shenyang J-11.. مش كده وبس .. الصينيين بدأوا يعدلوا فيها و نزلوا منها نسخ احدث هي J-11B و J-11D و طبعا الروس كانوا بيشدوا في شعورهم .. بس للاسف برده كانوا محتاجين الفلوس و الصينيين لووا دراعهم اكتر .. الصين اشترت من روسيا 76 طياره Su-30MKK Flanker و Su-30MK2 Flanker ودي اختها بس اللي بتنفع تشتغل من علي متن حاملات الطائرات .. تاني كلاكيت تالت مره الصينيين خدوا الطيارات الSu-30 فكوها حتت برده و بشويه Reverse Engineering حلوين عملوا النسخه بتاعتهم من الSu-30 و سموها Shenyang J-16 Red Eagle و عملوا اختها اللي تنفع تشتغل من علي متن حاملات الطائرات و سموها Shenyang J-15 Flying Shark .. حاليا الصين عندها 20 طياره من الJ-15 شغالين علي حامله الطائرات اللي حيلتهم اللي اسمها لياونينج Liaoning
ده مش معناه ان الReverse Engineering مفيهوش مشاكل .. عندك مثلا الJ-10 اللي بفكرك انها شبه الF-16 وقع منها كذا طياره بسبب ان لسه الصينيين عندهم مشاكل في تكنولوجيا Fly-By-Wire .. طيارات J-11 و J-15 و J-16 اللي بفكرك ان الصينيين عملتهم بشويه Reverse Engineering لطيارات السوخوي الروسي كلهم شغالين بمحركات WS-10 Turbofans ودي محركات لما تيجي تعملها صيانه بتلاقي مصايب ده غير انها مش بتدي قوه الدفع المطلوبه احيانا .. مشكله المحركات دي الصينيين مش لاقيين ليها حل و يمكن عشان كده سنه 2016 الصين قررت تشتري 24 طياره Su-35 اللي هي احدث طياره تعملها روسيا و حيشتروهم بمحركات AL-41F Turbofans بتاعتهم
دخول الصين في عصر الStealth:
عشان بس احطك في الصوره .. الامريكان عشان يعملوا الF-22 Raptor اللي هي اول مقاتله جيل خامس يعني اللي ليها القدره علي التخفي من الرادار قعدوا من سنه 1985 لحد ما دخلوها الخدمه في اوائل الالفينات .. الصينيين علي الناحيه التانيه دخلوا مجال الStealth في وقت قياسي و طلعلولنا سنه 2017 اول طياره Stealth بتاعتهم اللي هي Chengdu J-20 اللي فيه منها حاليا 20 طياره في الخدمه .. زيها زي اول تجارب الصين في مجال تصميم الطيارات المقاتله فالJ-20 هي طياره بكرسيين تقيله فشخ و وبتقدر تشيل حموله كبيره من الذخيره وده بيخليها ملهاش تقريبا قدره علي المناوره خالص زي الF-22 او F-35 Lightening II .. الJ-20 تنفع انك تنفذ بيها غاره جويه كبيره علي اهداف ارضيه او بحريه بس انك تقولي انك حتستخدمها في مهمه خلف خطوط العدو عشان مثلا تتفادي انظمه رادرات معقده فده مش حيحصل و مش حينفع تعمله .. مش مشكله علي فكره .. تكنولوجيا Stealth معقده و كلها مشاكل وانك تبدا فيها و تعمل حاجه و تنتج طياره فده لوحده انجاز بس الصينيين لما لقوا نفسهم مش عارفين يتقنوا التكنولوجيا لجأوا للحل اللي دايما بيروحوله في المواقف اللي زي دي وهو السرقه .. الصينيين عملوا عمليه Hack مشهوره اوي علي السيرفرات بتاعه شركه Lockheed Martin الاميريكيه اللي بتصنع الF-22 و الF-35 و سرقوا تصميماتها و منها طلعولنا تاني طياره Stealth اللي هي J-31 Gyrfalcon وفي ناس بتسميها FC-31 .. هي من بره تحس انها اخت الF-35 بس مبتعرفش تطلع و تنزل راسي زيها و مفيهاش كم الSensors و انظمه الملاحه المعقده
فيه كلام علي ان الصين حاليا بتصنع حامله طائرات تانيه علي الLiaoning وفيه كلام علي ان اللي حيشتغل عليها هو طيارات J-31 وفيه كلام علي ان الصين بتفكر تصدر الJ-31 بحيث تبقي بديل رخيص لF-35 .. بس كل ده كلام .. طالما مشكله المحركات متحلتش يبقي كل ده هري .. حاليا الصين بتصنع محركات WS-13 Turbofans اللي هي شغاله علي J-20 و J-31 بس حتي المحركات دي فيها مشاكل وده حيودينا للمشكله الكبيره اللي بتواجه القوات الجويه الصينيه وهي ان عندهم طيارات كتير فشخ بس ملهاش لازمه .. فكر فيها كده:
- حوالي 33% من الطيارات اللي بتملكه الصين هي طيارات جيل تاني قديمه ملهمش اي لازمه الا في حاله انك تعمل غاره جويه ضخمه اللي هي حاجه كده زي حرب اكتوبر 1973
- حوالي 28% من طيارتهم هي قاذفات قنابل استراتيجيه .. هم شغالين كويس بس محسوبين علي انهم طيارات جيل ثالث
- حوالي 38% من طيارات الصين تقدر تسميها طيارات جيل رابع اللي تقدر تقف الند بالند قصاد طيارات زي F-15 و F-16
- بتتكلم عن 1% بس طيارات جيل خامس
ده معناه ان عايز تخلص من 61% من اجمالي الطيارات اللي عندك لان معدش ليهم لازمه و قدموا اوي و تجيب مكانهم حاجات احدث .. و تبدا تشتغل علي ازاي تزود نسبه طيارات الجيل الخامس بتاعتك لان ده بقي المستقبل .. مطلوب تشتغل علي تدريب الطيارين اللي حيشتغلوا علي الطيارات دي كلها و تشوف حتصين ازاي اسطول معقد زي ده وازاي حتخليهم يشتغلوا مع بعض في مهام عسكريه كبيره .. بصوا الطريق قدام الصين طويل فشخ عشان يبقوا عندهم قوات جويه تقدر يبقي ليها فرصه للنصر لو دخلت في مواجهه مفتوحه مع اميركا مثلا .. مش عايز ابان اني متحامل علي الصينيين .. علي فكره انك محترم جدا الانجاز اللي هم وصلوا ليه .. الناس دي سابقانا بسنين ضوئيه بس هم شخصيا عارفين ان قدامهم طريق طويل يمشوه لو عايزين يبقي عندهم قوات جويه فعلا يتقال عليها القوات الجويه الاقوي في العالم
المصدر:
مقاله بعنوان Analysis: The weapons and dangers of the Chinese air force او تحليل: اسلحه و مخاطر القوات الجويه الصينيه نشرت علي موقع اسمه Defense Maven وده لينك المقاله الاصليه:
