لينك التسجيل الصوتي علي ساوند كلاود:
https://on.soundcloud.com/s5SSp
إنك تيجي متأخر أحسن من إنك متجيش خالص .. الجملة دي ممكن تمشي علي ناس كتير .. تمشي علي البوي فريند التوكسيك اللي بتحبيه اللي قرر فجأة إنه يحترم نفسه ويجي يتقدملك من أبوكي .. تمشي علي موقفنا كمجتمعات عربية من العدوان الإسرائيلي علي قطاع غزة وقرارنا اللي جه فجأة إننا نبطل نصدق إن الفلسطنيين باعوا أرضهم .. وكمان تمشي علي الطيارة الرافال Rafal .. دي طيارة مقاتلة من تصنيع شركة داسولت أفييشين Dassault Aviation الفرنساوية بقالها في السوق فوق العشرين سنة محدش لا سامع ليها لا حس ولا خبر .. طيارة مبيعاتها مش أحسن حاجة في الدنيا لإن زي ما قلتلك هي متاحة في السوق بقالها عشرين سنة ولحد يوم 25 إبريل 2023 كان فيه منها 243 نسخة في الخدمة في القوات المسلحة لخمس دول بس اللي هم مصر وفرنسا واليونان والهند وقطر وفجأة وتحت شعار ربك لما يريد خلال 12 شهر بس شركة Dassault Aviation مضت عقود بيع فوق 92 طيارة ل3 دول مختلفة اللي هم 80 طيارة رايحين للقوات الجوية الإماراتية و 6 طيارات رايحين للقوات الجوية الأندونيسية ضمن صفقة شراء 42 طيارة وكمان 6 طيارات للقوات الجوية اليونانية .. أول سنة 2022 الرافال إتباع منها 13 طيارة بس راحت لليونان والهند وقطر وعلي أخر السنة الشركة جتلها 164 طلبية من ضمنهم 125 طيارة حتتصدر لدول أجنبية و 39 طيارة حتروح للقوات الجوية الفرنسية.
النهاردة حنحاول نجاوب سوا علي السؤال اللي بيدور في دماغ كتير منكوا .. هي تطلع إيه الرافال دي معلش عشان أنا أول مرة أسمع الإسم ده .. ده حقيقي علي فكرة كتير مننا ميعرفوش إسم الرافال لإن السمعة المتاخدة عن سوق الطيارات إن أحسن بلدين تشتري منهم طيارات مقاتلة هم روسيا وأميركا .. الروس بيصنعوا الميج والسوخوي والأمريكان بيصنعوا الطيارات اللي أولها حرف إف F بس الرافال دي منعرفش عنها حاجة والنهاردة حنحاول سوا نشيل التراب اللي إتجمع علي الإسم خصوصاً مع صفقات الشراء اللي نازلة عليهم ولا أكنها حاجة ساقعة سبيرو سباتس.
هي حلوة يعني الرافال دي؟
أولاً لازم تبقي فاهم إن دي طيارة إتعملت بناء علي متطلبات القوات الجوية الفرنسية بيتركبلها موتورين سنيكما Snecma M88 .. أول مرة حد يشوف الرافال كان في يوليو 1986 ضمن محاولة للفرنساويين إنهم يقولوا للعالم علي فكرة بقي إحنا بنعرف نعمل طيارات مقاتلة كويسة والرافال بدأت تطلع من خطوط الإنتاج في مايو 1991 وبتنزل ب3 نسخ:
- أول نسخة هي Rafale C ودي بتنزل بكرسي واحد يعني Single-Seat يعني بيطير بيها واحد بس ودي بتخدم في القوات الجوية الفرنساوية وعندها منهم 40 طيارة وماضيين عقد شراء 31 طيارة كمان.
- ثاني نسخة هي Rafale B ودي بتنزل بكرسيين Twin-Seat يعني بيطير بيها طيار ومعاه الملاح بتاعه ودي برده بتخدم في القوات الجوية الفرنساوية اللي عندها منها 53 طيارة وماضيين عقد شراء 6 طيارات غيرهم.
- ثالث نسخة هي Rafale M ودي طيارة بكرسي واحد وبتشتغل من علي حاملات الطائرات ودي بتخدم في القوات البحرية الفرنساوية من ديسمبر 2000 علي حاملة الطائرات اليتيمة اللي حيلة فرنسا وإسمها حاملة الطائرات شارل ديجول Charles de Gaulle وسنة 2001 بدأت تخش الخدمة بشكل رسمي .. لحد اللحظة اللي إنت بتقرأ فيها الكلام ده فالقوات البحرية الفرنسية عندها 41 طيارة Rafale M وماضيين عقد شراء طيارتين عليهم ومن حقهم يطلبوا 10 كمان.
الطيارة الرافال من الطيارات اللي سمعتها حلوة في السوق .. زي ما قلتلك لحد إبريل 2023 فيه 243 طيارة رافال بتخدم في القوات الجوية لخمس دول علي مستوي العالم منهم 90 طيارة Rafale B يعني 37% من إجمالي طيارات الرافال اللي في السوق قصاد إن الطيارة Rafale C هي أكتر نسخة بتتباع وفيه منها 112 طيارة علي مستوي العالم بنسبة 46% من إجمالي طيارات الرافال اللي في السوق .. النسخة Rafale M مفيش منها غير 41 طيارة كلهم بيخدموا في القوات البحرية الفرنساوية .. نيجي بقي للمعلومة المهمة .. في العشرين سنة اللي الرافال فيهم في السوق موقعش منها غير 5 طيارات منهم 4 طيارات Rafale M وطيارة يتيمة Rafale B وده بيخلي من وجهة نظر الإحصائيات علي الأقل فالرافال هي الفولفو Volvo بتاعة الطيارات المقاتلة بس يمكن ميزة الرافال اللي بتخليها من أكتر الطيارات الكويسة وUnderrated في الدنيا هي إنها بتجمع 3 مزايا عكس بعض لو فكرت فيها:
- أول ميزة إنها خفيفة جداً وليها قدرة خزعبلية علي المناورة وده سببه شكلها لإن الرافال بتتحط ضمن قائمة الطيارات اللي جناحين بتوعها علي شكل دلتا يعني جناح علي شكل مثلث وكمان بيتركبلها جناحات صغيرة أوي في مقدمة الطيارة بتتسمي كانارد Canards بيدوها القدرة إنها تخمس حلو في الجو .. زود علي كده إن بيتركبلها موتورين مش موتور واحد موديل Snecma M88-2 Afterburning Turbofan فإنت بتتكلم عن طيارة خفيفة وموتورها عفي .. حاجة كده شبه الهيونداي فيرنا.
- ثاني ميزة هي شغل الكهرباء بتاعها اللي بيسموه في هندسة الطيران Avionics .. بيتركبلها رادار فعلاً حلو إسمه RBE2-AA وده رادار بيتصنف علي إنه من فئة AESA ودي إختصار Active Electronically Scanned Array يعني ده رادار بيخلي الطيار يقدر يلقط ويراقب ويضرب كذا هدف في وقت واحد .. بيتركبلها برنامج حرب أليكترونية إسمه سبيكترا Spectra بيخلي الطيار يعرف لو فيه صاروخ إتوجه عليه أو لو فيه رادار لقطه ولو فيه رادار لقطك فبرنامج Spectra بيقدر يشوش علي الرادار ده .. فهي تقدر تقول شبه العربيات الألماني في حتة الكهرباء دي بالذات اللي هي فيها أوبشنز حلوة.
- ثالث ميزة إنها من أكتر الطيارات اللي بتقدر تشيل حمولة لإن فيها 14 نقطة تثبيت بتقدر إنت تركب عليها كل ما لذ وطاب من القنابل والصواريخ وخزانات البنزين الخارجية .. هي من الطيارات القليلة اللي بتقدر تشيل صواريخ أمريكاني وفرنساوي وبتقدر تشيل صواريخ نووية كمان ده غير إن فيها مدفع رشاش عيار 30 مليمتر بيضرب 125 طلقة.
فيه سبب رابع الحقيقة وهو إن الرافال من أكتر طيارات جيل 4.5 اللي فاضلها تكة وتبقي طيارة Stealth يعني ليها القدرة علي التخفي من الرادار لإنها طيارة إتصممت عشان تطلع عين الرادار إنه يلقطها ودي خاصية بتتسمي Reduced Radar Cross-Section أو RCS لإنك لو أخدت بالك إن الزعنفة الرأسية اللي في ديل الطيارة قصيرة مش طويلة والموتورين بتوعها متركبين في بطن الطيارة في نصها تقريباً ده غير إن 70% من جسم الطيارة بيتعمل من مادة مخلقة صناعياً أو اللي بتتسمي .Composite Material
مين عنده رافال في الدنيا؟
مصر وقطر ..رغم إن زي ما قلتلك الرافال في السوق من أوائل التسعينات إلا إن أول مرة نسمع إن فيه حد بره فرنسا قرر يدفع فيها فلوس كانت في فبراير 2015 لما إتعرف إن مصر وقطر قرروا يشتروا 24 طيارة لكل بلد بحيث إن مصر خدت 16 طيارة Rafale B و 8 طيارات Rafale C بحيث أول مجموعة تستلمهم مصر كانت في يوليو 2015 وده فعلاً اللي يتقال عليها أسرع ديليفري في مصر لإن مش منطقي إن بلد تمضي عقد شراء طيارات مقاتلة في فبراير تستلمهم في يوليو بس اللي حصل إن الطيارات دي كانت المفروض تروح للقوات الجوية الفرنسية بس شركة Dassault Aviation عرفت تتفاوض مع وزارة الدفاع الفرنسية إن تسليم الطيارات لفرنسا يتأجل شوية في مقابل إن الطلبية تروح مصر الأول وده اللي حصل فعلاً .. سنة 2021 إتعرف إن مصر قدمت طلب لشراء 30 طيارة كمان عبارة برده عن ميكس بين Rafale B و Rafale C .. خبر برده يتحطلك كده في النص إن في مارس 2023 إتقال إن القوات الجوية المصرية حققت إنجاز متحققش قبل كده إن الطيارين المصريين وصلوا 10,000 ساعة طيران بطيارات الرافال ودي أول مرة قوات جوية بره فرنسا توصل للرقم ده .. إذا كانت قطر في الأول طلبت تشتري 24 طيارة فهم في 2017 طلبوا يشتروا 12 كمان بحيث القوات الجوية القطرية بقي تحت إيدها 36 طيارة رافال بدأت تستلمهم من فبراير 2019 بحيث إن قطر دلوقتي بقي عندها 27 طيارة Rafale C اللي هم مسميينها Rafae EQ و 9 طيارات Rafale B اللي هم مسميينها Rafale DQ.
الهند .. علاقة الهند بالرافال غريبة جداً لإنها بدأت بمشروع طموح فشخ إسمه الطيارة المقاتلة متعددة المهام متوسطة المدي Medium Multi-Role Combat Aircraft أو MMRCA إختصاراً ودي فكرتها إن الهند تلاقي طيارة مقاتلة تتصنع عندها أو تاخد رخصة تجميعها وبعد تدوير قعد سنين أخيراً الهند إختارت الرافال بحيث الخطة كانت إن الهند عايزة يبقي عندها 126 طيارة بحيث أول 18 يتصنعوا في فرنسا والباقي يتجمعوا في الهند .. جت سنة 2016 قامت خناقة لرب السما في الهند حولين إن الصفقة دي حوليها شبهات فساد بالهبل فإتلغي مشروع MMRCA وإتحطت بداله صفقة شراء 36 طيارة جاهزين من فرنسا وخلاص بحيث أول 5 طيارات أستلمتهم القوات الجوية الهندية في يوليو 2020 في قاعدة أمبالا الجوية .. دلوقتي القوات الجوية الهندية عندها 28 طيارة Rafale C و8 طيارات Rafale B .. الخناقة الجايه هي إن القوات البحرية الهندية عايزة طيارات ينفع تشتغل من علي حاملة الطائرات الهندية والسباق دلوقتي علي مين ترسي عليه الصفقة هي طيارة Rafale M وطيارة F/A-18F Super Hornet الأمريكاني من تصنيع شركة بوينج ودي يمكن اللي إنت شفتها في فيلم Top Gun: Maverick.
اليونان .. اليونان بلد علي الله حكايتها لدرجة إنها لما جت تشتري طيارات جديدة تقدر تقف بيها قدام القوات الجوية التركية راحوا لفرنسا خدوا 18 طيارة رافال بحيث 12 منهم مستعملين شاريينهم من القوات الجوية الفرنسية و6 طيارات جداد بحيث القوات الجوية اليونانية دلوقتي عندها 9 طيارات Rafale C و 4 طيارات Rafale B .. في مارس 2022 اليونان مضت عقد إنها تشتري 6 طيارات جداد كمان.
الإمارات .. في ديسمبر 2021 الإمارات جابت صدمة للعالم لما قدمت طلب شراء 80 طيارة رافال .. ليه أنا قلت جابت صدمة للعالم؟ عشان انا شخصياً إتكلمت قبل كده عن رغبة الإمارات إنها تشتري طيارات F-35 بس بعد Presentation قدمتها Dassault Aviation في معرض دبي للطيران واضح إنهم كلوا دماغ الإماراتيين اللي قرروا يرموا F-35 في الزبالة ويدفعوا 17.5 مليار دولار في إبريل 2022 عشان تستلم الطيارات خلال الفترة من 2027 لحد 2031 .. عايز أقولك إن فوق البيعة بتاعة الطيارات فالإمارات عايزة تشتري ذخيرة بس بعقد حيوصل 2 مليار يورو .. المشكلة مش في كده .. المشكلة إن السعودية شافت الإمارات عايزة تشتري الرافال قامت هي كمان شبطانة وفيه كلام علي إن المملكة عايزة تشتري 54 طيارة رافال .. معاك إن تبسيط رغبة المملكة إنها تشتري الرافال في مجرد الغيرة وتقليد الإمارات مش صح لإن فيه منطق ورا الأمور .. هو منطق غريب بس أهو منطق.
دلوقتي القوات الجوية السعودية تحت إيدها 3 أنوع طيارات مقاتلة مختلفة .. عندهم نسخة بتتعمل مخصوص ليهم من الطيارة F-15 الأمريكاني إسمها F-15SA وSA دي إختصار Saudi Advanced .. عندهم طيارات Eurofighter Typhoon ودي طيارة فرنساوي إنجليزي ألماني مشتركة .. وعندهم طيارات قديمة إسمها بانافيا تورنيدو Panavia Tornado شاريينها من إنجلترا .. فدلوقتي السؤال المنطقي فشخ هو ليه السعودية عايزة تشتري نوع طيارات رابع؟ .. دلوقتي زي ما قلتلك إن Eurofighter Typhoon هي طيارة فرنساوي إنجليزي ألماني مشتركة والعقد اللي بتمضيه الدول الثلاثة مع أي حد عايز يشتري الطيارة إن من حق أي دولة من الثلاثة المصنعة للطيارة إنها تعترض علي الصفقة وتلغيها خالص لو المشتري مكنش علي هواها .. اللي حصل إن في يوليو 2023 المستشار الألماني (أولاف شولز Olaf Scholz) طلع قال إن ألمانيا مش حتوافق علي بيع أي طيارات أو ذخيرة أو أي حاجة تخص الطيارة Typhoon للسعودية وفي حالة إنك بتسأل ليه كفا الله الشر فأنا أحب أقولك إن ألمانيا من 2018 وهي مرخمة علي السعودية بعد جريمة قتل الصحفي (جمال خاشقجي) .. ليه ده عامل مشكلة؟ .. لإن السعودية سنة 2007 إشترت 72 طيارة وسنة 2018 مضت عقد مبدأي لشراء 48 طيارة كمان فلما تيجي دلوقتي ألمانيا تضربلي كرسي في الكلوب وتقول مفيش حاجة تخص الطيارات دي حتروح السعودية فإنت أكنك كده أجبرت القوات الجوية السعودية إنها تركن أسطولها من الطيارات Typhoon دي وبقي ولا له أي لازمة.
فيه نقطة لازم تبقي عارفها إن الطيارات شبه العربيات في حتة إن اللي جرب يسوق عربية بلد فسهل عليه يروح يشتري منها تاني .. بمعني .. لنفترض إن أول عربية إنت سقتها كانت رينو لوجان Renault Logan .. دي عربية فرنساوي مش أحسن حاجة في الدنيا بس ممكن بعد ما بعتها وركبت وراها عربيات تانية فإنت ممكن قلبك يحن وتقرر ترجع للفرنساوي تاني بإنك تجيب رينو ميجان Renault Megane أو بيجو 508 .. برده كده في الطيارات .. الدول اللي إشترت الرافال زي مصر واليونان وقطر والهند وحتي الإمارات القوات الجوية بتاعتهم كلها جربت تطير بالميراج ألفين Mirage 2000 وفيه دول زي مصر مثلاً عدي عليها النسخة الأقدم منها الميراج خمسة Mirage 5 .. ولإن لكل قاعدة شواذ فدول زي كرواتيا وأندونيسا أول مرة يجربوا الطيارات الفرنساوي كانت في الرافال بس هي الفكرة زي ما قلتلك اللي جرب يطير بطيارة بلد فسهل عليه يرجعلها تاني.
المستقبل شكله إيه للرافال؟
الحقيقة إن المستقبل شكله مش بطال للشركة اللي بتصنع الرافال اللي هي Dassault Aviation لإن الكلام علي إن فرنسا وألمانيا وإسبانيا شغالين سوا علي مشروع طيارة مقاتلة مشتركة من الجيل السادس مديينها إسم مقاتلة الجيل الجديد New Generation Fighter أو NGF بحيث الشركة اللي حتبقي مسئولة عن تطوير الطيارة دي هي Dassault Aviation بحيث المفروض يعني إن الطيارة دي يبدأ يبان ليها ملامح علي سنة 2040 وعليك خير ولحد ما ربنا ينفخ في صورتها ونشوفها فوزارة الدفاع الفرنساوية ناوية تمضي عقد شراء 42 طيارة رافال جديدة والحقيقة أنا شخصياً مش عارف هل دي نصاحة ولا بعزقة فلوس علي الفاضي .. المهم .. في فبراير 2020 بدأت المرحلة الأولي من مشروع NGF اللي إتسمت Phase 1A والمفروض إن مدتها كانت 18 شهر عشان المهندسين تبوع Dassault Aviation يقعدوا مع الأخوة المهندسين برده بتوع الفرع العسكري من شركة Airbus Defense & Space عشان يرسموا شوية ورق يحققوا فيها أحلامهم كلها .. طبعاً مش محتاج أقولك إن قعد شوية مهندسين مع بعض في أوضة واحدة وفي أول فرصة حيمسكوا في خناق بعض وده اللي حصل فعلاً والمرحلة الأولانية خالص اللي كان المفروض تقعد سنة وست شهور طولت سنة كمان لحد ما في ديسمبر 2022 أخيراً ربنا كرم الناس ووصلوا لإتفاق مبدئي هم ناويين يهببوا إيه بالضبط بحيث إن المفروض إن Dassault Aviation حتبعزقلها 3.5 مليار دولار عشان تبني النموذج الأولي أو Prototype بتاع الطيارة ومعاد التسليم المفروض إنه 2030.
اللي أنا عايز أختم بيه إن الرافال من أكتر الطيارات اللي محدش بيتكلم عنها رغم إن بداية من 2015 وإنت طالع هي تاني اكتر طيارة إتباعت في العالم بعد F-35 اللي بتصنعها شركة لوكهيد مارتن Lockheed Martin الأمريكاني .. دي طيارة كل ما حد يحتار بينها وبين الأمريكاني يختاروها هي .. الهند كانت محتارة بينها وبين Super Hornet وإختارتها في الأخر .. الإمارات كانت رايحة في سكة F-35 وغيرت رأيها وإشترت الرافال .. الرافال نتاج فلسفة فرنساوي إن إحنا مش ناقصين إيد ولا رجل .. فرنسا بلد عندها ترسانة نووية فهم من زمان قرروا إنهم يقدروا يعتمدوا علي نفسهم في حتة تصنيع السلاح .. فلسفة بدأت بالميراج ودلوقتي بالرافال ومكملة بNGF بس يمكن الدرس اللي نتعلمه هو إزاي الحكومة الفرنسية نفسها واقفة في ظهر صناعة السلاح بتاعتها .. دي حكومة مكنش عندها مشكلة تأجل تسليمها دفعة طيارات عشان خاطر تسلم الطيارات لمصر قبل معادها ودي كانت الخطوة اللي خلت دول كتير تبص للفرنساويين وتقول الناس دي جدعان .. دي حكومة مش بتدخل نفسها في اللي ملهاش دخل فيه زي ما ألمانيا بتعمل .. يعني أنا شخصياً شايف إن اللي حصل مع (جمال خاشقجي) جريمة لا تغتفر بس هو مستشار ألمانيا استفاد إيه لما حب يعمل نفسه رجل علي السعوديين؟ .. ما اللي دفع الثمن في الأخر هي صناعة السلاح الألمانية .. الفرنساويين مستعدين ييجوا علي نفسهم عشان خاطر شركاتهم في حين إن الألمان بقوا عشاق أخد اللقطة .. زيهم زي الأمريكان .. يمكن عشان كده قصة الرافال تستحق إنها تتحكي .. هي مش أحسن طيارة في الدنيا بس اللي عملوها حالفين ينجحوها.
المصادر:
- مقالة بعنوان How France’s Rafale fighter evolved into an export champion نشرت علي موقع Flight Global وده لينك المقالة الأصلية:
https://www.flightglobal.com/defence/how-frances-rafale-fighter-evolved-into-an-export-champion/153348.article - مقالة بعنوان Rafales For Riyadh: Saudi Arabia Considers Buying French Fighter Jets For First Time نشرت في مجلة Forbes وده لينك المقالة الأصلية:
https://www.forbes.com/sites/pauliddon/2023/10/22/rafales-for-riyadh-saudi-arabia-considers-buying-french-fighter-jets-for-first-time/?sh=15ed23837633 - مقالة بعنوان The Dassault Rafale Fighter Jet Demands Your Attention نشرت في مجلة Popular Mechanics وده لينك المقالة الأصلية:
https://www.popularmechanics.com/military/aviation/a28763707/dassault-rafale-fighter-jet/ - مقالة بعنوان Dassault Rafale: The French Fighter That Could Kill Anything In The Sky نشرت في مجلة 1945 وده لينك المقالة الأصلية:
https://www.19fortyfive.com/2022/07/dassault-rafale-the-french-fighter-that-could-kill-anything-in-the-sky/ - مقالة بعنوان How the sky became the limit for France’s Rafale Jet نشرت في مجلة Financial Times وده لينك المقالة الأصلية:
https://www.ft.com/content/28753610-444d-46b6-9e39-abdf7d6c83ee
احنا فمصر هنا اللي سوقنا للطيارة دي و من بعد ما اشتريناها دول كتير بدأت تشتريها فرنسا فشلت فتسويق الطيارة دي لقرب العشرين سنة رغم انها ناجحة و ملحوظة اليورو فايتر تايفون تصنيع ألماتي إنجليزي إيطالي و ليس فرنسي لان فرنسا خرجت من مشروعها من البداية و توجهت لصناعة الرفال اللي بتنافس التايفون