النكبة .. كذبة إن الفلسطينيين باعوا أرضهم.

لينك التسجيل الصوتي للجزء الأول من المقالة علي Sound Cloud:
https://soundcloud.com/user-112011687-312727988/4kjry8czuts6?si=f564fd2d118742968514119b7ff1c1ef

لينك التسجيل الصوتي للجزء الثاني من المقالة علي Sound Cloud:
https://soundcloud.com/user-112011687-312727988/8kwqajofz0xx?si=ffe014998b7a46979c0e7061a13c2851

لينك التسجيل الصوتي للجزء الثالث من المقالة علي Sound Cloud:
https://soundcloud.com/user-112011687-312727988/n9ozkr3ynkou?si=ecc05b03383f4eeba74a30877b12322f

قصة النهاردة اللي حنحكيها إنت عارفها كويس أوي وتقريباً هي السبب في إن حياتك شكلها كده دلوقتي .. بجد والله لو فكرت فيها شويه حتلاقي إن اللي حصل سنة 1948 هو اللي مخلي حالك كده .. تسأل نفسك هو ليه مصر بلد مفيهاش مستقبل؟ .. قالك عشان العسكر مسكوها بقالهم سنين .. تسأل طب العسكر مسكوها ليه؟ قالك عشان الملك ضيع فلسطين .. فعلياً أيا كانت البلد اللي إنت عايش فيها سواء مصر أو سوريا أو العراق أو لبنان وأيا كانت المشكلة اللي إنت عايش فيها سواء مش لاقي شغل أو مش عارف تتجوز أو حد من أهلك محبوس سياسي فالسبب ورا كل ده هو اللي حصل سنة 1948 .. في السنة دي ضاعت فلسطين وإتولدت إسرائيل ومعاها إتخلقت مشاكلك كلها .. ده فيما يخصك يا كائن ميهمكش غير مصلحتك .. في نفس الوقت قصة النهاردة هي قصة مأساة والحقيقة إن أنا مشكلتي إن من صغري وأنا بسمع جملة أصل الفلسطينيين باعوا أرضهم .. فيه ناس من اللي نفسيتها سليمة كانت حاسة إن دي إشاعة أو معلومة غلط إتقالت عشان يخلونا نكره القضية الفلسطينية .. المصيبة إن فيه ناس فعلاً مصدقة الكذبة دي ولو إنت من الناس دي فأنا عايز أخدك من إيدك أوريك أشهر وأوسخ كذبة إتقالت في التاريخ .. كذبة إن الفلسطينيين باعوا أرضهم.

البداية سنة 1799 .. (نابليون بونابرت) بيقول لليهود إلحقوني وحديكوا دولة:

سنة 1789 المصريين صحيوا الصبح لقوا (نابليون بونابرت) جايب رجالته وجاي يحتل مصر ودي اللي إنت عارفها بإسم الحملة الفرنسية علي مصر .. المصريين كان نفسهم يسألوه نفس السؤال اللي المفروض يعني الفرنساويين يكونوا سألوه ل(نابليون) من بدري .. هو حضرتك جاي تهبب إيه هنا؟ .. الفكرة كانت إن (نابليون) ياخد مصر ويعتبرها منط للهند اللي كانت تحت إيد الإنجليز .. طبعاً الفكرة فرقعت في وش (نابليون) واللي بدل ما زي أي رجل محترم بيعمل يقول أنا أسف إني ضيعت وقتكوا ويلم حاجته ويمشي بأدب راح سايب مصر وخد شوية من رجالته وراح ياخد مدينة عكا من إيد العثمانيين .. وقتها العثمانيين كانوا ملطشة للي يسوا واللي ميسواش بس مش هي دي قضيتنا دلوقتي .. سنة 1799 قوات (نابليون) كانت بتحاصر المدينة واللي عشان كانت واقفة في زوره ومش عارف يدخلها قام باعت جواب لليهود اللي عايشين في فلسطين قالهم فيه إنه مستعد يديهم دولة مستقلة ليهم في فلسطين إذا ما ساعدوه إنه ياخد عكا .. صحيح اليهود مسمعوش كلامه وصحيح (نابليون) خد ديله في سنانه ورجع فرنسا تاني بس الفكرة ذات نفسها إتقالت .. ليه لا نعمل دولة لليهود في فلسطين تحت حماية الإستعمار؟ .. بجد ليه لا؟

تلف الأيام وتدور الأيام والفكرة ترجع تظهر تاني سنة 1840 .. في السنة دي (محمد علي باشا) الكبير الله يرحمه كان عامل قلق في المنطقة .. لا العثمانيين طايقينه ولا الإنجليز عايزينه .. في السنة دي وزير الخارجية الإنجليزي اللورد (هنري جون تيمبل بالميرستون Henry John Temple Palmerston) ومعلش إسمه طويل حبتين بعت جواب للسفير الإنجليزي في إسطنبول عشان يخليه يحاول يقنع السلطان العثماني إن ليه لا نعمل دولة مستقلة لليهود في فلسطين .. طب إيه الفكرة؟ .. قالك عشان الدولة دي تبقي هي المادة العازلة بين مصر والدولة العثمانية .. وقتها الفكرة إترفضت عشان هو أساساً اليهود اللي كانوا عايشين وقتها في فلسطين ميجوش 3,000 بني أدم .. بس أرجع وأقولك إن الفكرة كانت عاملة زي الفيروس اللي بدأ ينتشر وزي أي فيروس في الدنيا محتاج عائل أو Host قوي عشان يقدر يحتوي الفيروس والعائل ده تمثل في واحد إسمه البارون (إيدموند دي روثتشايلد Edmond de Rothschild) .. ده رجل مش بس غني ده باشا من باشاوات فرنسا .. الرجل ده سنة 1880 راح زار فلسطين وصرف من جيبه 40 مليون فرانك فرنساوي عشان يبني 13 مستوطنة لليهود في فلسطين علي مدي 40 سنة وحاول أرجوك إنك تستوعب الرقم اللي أنا لسه قايله دلوقتي ده .. 40 مليون فرانك ده كان رقم خزعبلي بمعايير الزمن وعلي فكرة الأخ (إيدموند دي روثتشايلد) ده إتدفن في تل أبيب في إسرائيل ولحد دلوقتي زيارة قبره جزء أساسي من منهج التاريخ اللي بيدرسه أي طالب إسرائيلي.

الإنتقال لمرحلة الصهيونية سنة 1885 .. الله يخرب بيت السويسريين علي اللي عايز يروح سويسرا:

أول مرة حد يقول إسم الصهيونية أو Zionism كان سنة 1885 واللي إخترع الإسم ده كان صحفي نمساوي إسمه (نيثان بيرنباوم Nathan Birnbaum) ومهم تفهم هو كان قصده إيه بالإسم ده .. صهيون أو Zion واحد من أسامي مدينة القدس في التوراة .. لو أنا جيت لحد قلتله إنت صهيوني فده معناه إن الرجل ده مع فكرة إنشاء دولة لليهود في فلسطين .. أقف بقي هنا .. سنة 1885 لما إتقال إسم صهيونية لأول مرة كان فيه يهود عايشين في فلسطين تحت حكم الدولة العثمانية .. ده مش معناه إن اليهودي اللي كان عايش في فلسطين ده يبقي صهيوني .. لا خالص .. اللي أنا بقوله ومهم الفرق ده يبقي واضح من دلوقتي إن اليهودي الأوروبي اللي عجبته فكرة الصهيونية بقي هو نفسه شايف إن اليهودي اللي عايش في فلسطين يهودي نص كم لا مؤاخذة يعني .. هو شايف إن عشان حلم الدولة اليهودية في فلسطين ده يتحقق فهم محتاجين نوع جديد من اليهود مختلف عن اليهودي الطيب الغلبان الكيوت اللي راضي يعيش تحت حكم العثمانيين .. الفكرة دي إتشرحت بالتفصيل في كتاب إسمه الدولة اليهودية The Jewish State نُشر سنة 1896 واللي كتبه إتنين .. الأولاني كان صحفي نمساوي برده إنت عارف إسمه كويس اللي هو (تيودور هيرتزل Theodor Herzl) والثاني كان دكتور إسمه (ماكس نورداو Max Nordau) .. مش بس كده .. (ماكس نورداو) ده دفع من جيبه مصاريف سفر إتنين حاخامات يهود عشان يسافروا فلسطين يشوفوا هل الوضع علي الأرض بيقول إن ممكن حلم قيام الدولة اليهودية في فلسطين ده يتحقق ولا لا؟ .. الإتنين حاخامات سافروا فلسطين فعلاً وكتبوا تقرير بعتوه ل(ماكس نورداو) و (تيودور هيرتزيل) .. التقرير ده مرعب خصوصاً حتة الConclusion أو الإستنتاج النهائي بتاعه واللي قالوا فيه نصاً .. العروسة زي القمر بس متجوزة رجل تاني.

بدأت تفهم المشكلة فين من وجهه نظرهم؟ .. فلسطين عايش فيها مجتمع بقاله سنين .. المجتمع ده مسلمين ومسيحيين ويهود .. لا المسلمين ولا المسيحين حيقبلوا الفكرة وحتي اليهود اللي هناك لا يُعتمد عليهم .. طب والحل؟ .. نبدأ واحدة واحدة نبعت يهود من اللي إحنا شايفينهم هم اليهود اللي بحق وحقيقي لفلسطين وواحدة واحدة عددهم يكتر لحد ما يقدروا يحطوا الفلسطينيين قدام واقع جديد وهو إن اليهود (اللي جايين من أوروبا) حطوا إيدهم علي أرضكوا وروحوا أشربوا من أي خرارة .. السؤال دلوقتي .. نعمل ده إزاي؟

سنة 1897 بيتعمل المؤتمر الصهيوني الأول والمؤتمر ده إتعمل علي كتاف الثلاثة (نيثان بيرنباوم) و(ماكس نورداو) و(تيودور هيرتزل) ولإنهم هم الثلاثة سويسريين وقالك مفيش داعي للشحططة فخلي المؤتمر يتعمل في مدينة بازل السويسرية .. في المؤتمر ده الثلاثة حطوا برنامج أو خطة إزاي حلم الدولة اليهودية ده يتحقق والأساس بتاع الخطة زي ما قلت إنك تبدأ واحدة واحدة تنقل اليهود الأوروبيين لفلسطين عشان يحطوا رجليهم هناك .. حتفضل المشكلة دايماً هي مين حيحمي الدولة دي؟ .. الدولة الصهيونية دي فعلياً حتبقي زي السرطان اللي حيتزرع وسط فلسطين وبالتالي لازم كيان أو جهاز مناعي يحمي السرطان ده .. (هريتزل) قالهم باااااس دي حتتي .. الرجل بقي يلف علي دول أوروبا كلها يقولهم إحمونا وإحنا حنحمي مصالحكوا .. يروح لفرنسا يقولها إحنا حنبقي سندكوا في المنطقة .. يروح للإنجليز يقولهم إدعمونا وإعتبرونا رجالتكوا .. قال نفس البق الحمضان ده للروس .. مين بقي اللي صدق (هيرتزل)؟ .. الإنجليز.

سنة 1907 يعني قبل ما الحرب العالمية الأولي تقوم ب7 سنين والإنجليز بيفكروا حيقسموا تورتة الدولة العثمانية إزاي .. ده يوريك إزاي العثمانيين في أخر أيامهم كانوا نايمين في مية البطيخ .. في السنة دي الحكومة الإنجليزية شكلت لجنة عشان تسأل نفسها السؤال بتاع هو إحنا لو بكرة الصبح الدولة العثمانية وقعت وفلسطين بقت تحت إيدنا حنعمل إيه؟ .. إجابة السؤال ده من وجهة نظر اللجنة دي هي إننا نقف ورا (تيودور هيرتزل) .. هو مش الرجل ده عايز يعمل دولة لليهود في فلسطين؟ .. اه .. حلو أوي .. إحنا بقي عايزين الدولة دي تفضل معادية لجيرانها وتفضل مرمية في حضن أوروبا بحيث إن موقع الدولة دي كخازوق في نص العالم العربي حيفصل مصر عن سوريا والعراق وبالتالي عمر ما الدول العربية حتتوحد  .. دماغ شياطين دي خلي بالك .. التقرير ده إتسلم لرئيس الوزراء الإنجليزي وقتها (هنري كامبل بانرمان Henry Campbell Bannerman) .. في نفس السنة اللي هي 1907 كان فيه واحد إسمه (حاييم وايزمان Haim Weizman) سافر فلسطين .. ده أساساً كيميائي بس دي كانت الواجهة .. دي الفاترينة .. الرجل ده كان مقتنع بالفكر الصهيوني زي ما إنت مقتنع بإن مامتك هي أكتر واحدة بتعرف تعمل محشي .. المهم .. الرجل ده سافر مدينة يافا وأسس شركة مقاولات هناك .. عارف مين اللي عطاله رأس المال اللي أسس بيه الشركة؟ .. شطور (إيدموند دي روثتشايلد) .. سنة 1910 كانت أكبر علامة بإن الخطة ماشية في الإتجاه الصح لما الشركة بتاعه (حاييم وايزمان) عرفت تشتري أرض مساحتها 10,000 فدان في حتة إسمها مرج بن عامر شمال فلسطين .. في يوم وليلة 60,000 فلاح فلسطيني خسروا أرضهم وإضطروا إنهم يمشوا منها .. (حاييم وايزمان) بدأ يجيب فلاحين يهود من أوروبا عشان يشتغلوا في الأرض ولو مكفوش كان بيجيب يهود من اليمن .. ده في الوقت إن لا العرب ولا العثمانيين ولا الفلسطينيين كانوا حاسين بالمصيبة اللي جاية عليهم.

بداية من سنة 1907 وإنت طالع واليهود في فلسطين صوتهم بقي يطلع  .. خلينا نبقي دقيقين أكتر وبنخاف ربنا في كلامنا بإن بعد كده نقول علي اليهود الأوروبيين اللي جم فلسطين إنهم صهاينة .. المهم إن الصهاينة بقوا يطلعوا في مظاهرات يطلبوا بالإعتراف باللغة العبرية كلغة أساسية جنب العربية .. أرجوك متنساش إن ده في الوقت اللي لسه فلسطين كانت تحت سيطرة العثمانيين .. سنة 1908 كيميائي برده بس المرة دي فلسطيني إسمه (نجيب نصار) بيؤسس جرنان إسمه الكرمل إتعمل مخصوص عشان يحذر إن يا جدعان فيه مصيبة بتتعمل .. الحركة الصهيونية دي خنجر مسموم وبيتغرز في جسم الأمة العربية .. وطبعاً مش محتاج ألحم في كلامي ده جملة ولا حياة لمن تنادي.

الحرب العالمية الأولي .. الفرصة مبتجيش غير مرة واحدة:

الحرب العالمية الأولي قامت سنة 1914 .. في يناير 1915 فيه واحد إسمه (هيربيرت صامويل Herbert Samuel) وده كان سياسي بريطاني وصهيوني يعني رجل مقتنع بإن لازم تتعمل دولة يهودية في فلسطين كتب تقرير سري قدمه للحكومة الإنجليزية والتقرير ده سماه مستقبل فلسطين The Future of Palestine .. في التقرير ده الرجل قال إن لسه الوضع مش مناسب إن تتعمل دولة لليهود في فلسطين .. الشغل اللي بيعمله (حاييم وايزمان) صحيح مهم إنه يبدأ يزود من أعداد اليهود الأوروبيين اللي هم الصهاينة في فلسطين بس إحنا موصلناش للأعداد اللي تكفي إننا نعلن دولة .. عشان كده .. الحركة الصهيونية بتقترح إن بريطانيا تحتل فلسطين عشان تحت الإحتلال البريطاني لفلسطين الوضع حيبقي مناسب إن (حايين وايزمان) يكمل شغله لحد ما عدد الصهاينة في فلسطين يبقي كفاية لإعلان الدولة اليهودية ..التقرير بتاع (هيربيرت صامويل) ده إتاخد هو هو كده وإتحط في الإتفاقية اللي فشخت الوطن العربي .. إتفاقية سايكس بيكو .. الإتفاقية دي إشتغل عليها إتنين .. واحد إنجليزي هو السير (مارك سايكس Mark Sykes) وواحد فرنساوي هو (فرانسوا جورج بيكو Francois Georges Picot) .. (هيربيرت صامويل) قالك فلسطين تفضل تحت الإحتلال البريطاني بس إتفاقية سايكس بيكو سمته إسم سيكسي أكتر هو الإنتداب البريطاني .. مش بس كده .. سنة 1917 الحكومة الإنجليزية ممثلة في رئيس الوزراء (ديفيد لويد جورج David Lloyed George) تعهدت بإنها حتحقق حلم اليهود بإن يبقي ليهم دولة في فلسطين .. طبيعي إنك تسأل هو التعهد ده بالصلاة علي سيدنا النبي عليه الصلاة والسلام كان إزاي؟ … اللي حصل إن وزير الخارجية الإنجليزي (أرثر بلفور Arthur Balfour) بعت جواب ل(والتر روثتشايلد Walter Rothschild) وده يبقي إبن (إيدموند روثتشايلد) واللي كمل في نفس رحلة أبوه في دعم حلم الدولة اليهودية في فلسطين والجواب ده هو اللي إتقال فيه إن بريطانيا حتدي لليهود حق إنهم يعملوا دولة ليهم في فلسطين .. يعني وعد بلفور أو وعد من لا يملك لمن لا يستحق اللي صدعونا بيه سنين ده طلع في الأخر جواب غرامي بين إتنين رجالة .. إنتي فين يا نيتفليكس.

يوم 7 ديسمبر 1917 المنظمة الصهيونية العالمية نظمت حفلة في لندن للإحتفال بوعد (بلفور) .. عارف كان مين وسط الحضور في الحفلة دي؟ .. (هيربيرت صامويل) صاحب فكرة الإنتداب البريطاني لفلسطين .. (مارك سايكس) واحد من اللي قطعوا تورتة الدولة العثمانية .. (حاييم وايزمان) شخصياً الرجل بتاع المنظمة في فلسطين واللي شغال بإيده في الموقع بلغة المهندسين .. (والتر روثتشايلد) البنك اللي بيمول الليلة دي كلها .. يوم 11 ديسمبر 1917 القوات الإنجليزية بقيادة الجنرال (إيدموند ألينبي Edmund Allenby) بتدخل القدس الشريف .. من ضمن العساكر الإنجليز اللي دخلت القدس كانت وحدة قتالية يهودية كان من أفرادها (ديفيد بو جوريون David Ben Gorion) اللي بعد كده حيبقي أول رئيس وزراء لإسرائيل وحنتكلم عنه قدام شوية بالتفصيل .. المهم .. بعدها بكام يوم الجنرال (إديموند ألينبي) إستقبل في مكتبه في القدس (حاييم وايزمان) وده يوريك قد إيه الإنجليز والصهيانة كانوا طابخينها سوا بس كل الطبيخ ده مكنش كفاية .. لحد سنة 1917 كان عدد اليهود في فلسطين حوالي 50,000 قصاد 500,000 مسلم.

علي فكرة مش بس الإنجليز اللي كانوا بيسألوا نفسهم هو إحنا حنعمل إيه في التورتة بتاعة الدولة العثمانية .. الأمريكان كمان كانوا بيسألوا نفسهم السؤال ده .. سنة 1918 لما الحرب خلصت وإتعمل مؤتمر باريس للسلام كان قبلها الرئيس الأميريكي (وودرو ويلسون  Woodrow Wilson) شكل لجنة برئاسة إتنين .. واحد دكتور إسمه (هنري كينج Henry King) والثاني سياسي إسمه (تشارلز كراين Charles Crane) والإتنين دول كتبوا تقرير لو كان حكام العرب وقتها بيقروا أو بيفهموا كانوا إترعبوا أو علي الأقل فهموا إن فيه حاجة غلط .. التقرير قال إن 90% من سكان فلسطين هم يا مسلمين يا مسيحيين وكلهم ضد فكرة إقامة دولة يهودية علي أرضهم .. مش بس كده .. التقرير قال إن إحساس معاداة الصهيونية في فلسطين قوي في الشارع ومش حينتهي قريب .. طب حتي لو الإنجليز نشفوا دماغهم وأصروا يكملوا في خطة البرنامج الصهيوني وإنهم يعملوا دولة لليهود في فلسطين فبالميت خالص إنجلترا محتاجة 50,000 ألف عسكري وبما إن ده كتير أوي الصراحة فمفيش داعي لوجع القلب والأحسن إننا نرمي الفكرة في الزبالة.

سنة 1919 إتعمل مؤتمر باريس للسلام .. المؤتمر ده حضره (ديفيد لويد جورج) و(أرثر بالفور) اللي هم رئيس وزراء ووزير خارجية إنجلترا .. حضره كمان (حاييم وايزمان) بصفته ممثل المنظمة الصهيونية العالمية .. بص بقي الحتة دي .. في المؤتمر الثلاثة قدموا خريطة مقترحة للدولة اليهودية اللي هم عايزينها والدولة دي بتضم فلسطين كلها والضفة الشرقية من نهر الأردن وحتة من جنوب سوريا وحتة من جنوب لبنان .. طبعاً إنت بتسأل نفسك هو العرب اللي حضروا الإجتماع ده عملوا إيه لما شافوا الخريطة دي؟ .. حقولك .. اللي حضر المؤتمر ده كان الأمير (فيصل بن الحسين) إبن الشريف (حسين بن علي) اللي يرحمهم واللي زي ما حكينا في مقالة إتفاقية سايكس بيكو هو اللي قام بالثورة ضد العثمانيين في شبه الجزيرة العربية والأخ (فيصل) مش بس وافق علي الهراء ده .. لا ده كمان مضي إتفاقية مع (حاييم وايزمان) برعاية ضابط المخابرات الإنجليزي (تي إي لورينس T.E. Lawrence) اللي إحنا عارفينه باسم (لورينس العرب).

فلسطين تحت الإنتداب البريطاني .. 15 سنة من الغليان:

الخطة مشيت زي السكينة في الجاتوة .. سنة 1920 بريطانيا بتعلن إن فلسطين بقت تحت الإنتداب وبناء عليه إتعين واحد في منصب المندوب السامي البريطاني اللي هو تقدر تقول عليه اللي حيمسك الليلة في فلسطين .. عارف إختاروا مين؟ .. (هيربيرت صامويل)  .. ده اللي قلنا عليه إنه كان صهيوني وهو صاحب فكرة الإنتداب البريطاني لفلسطين أصلاً كحل لإستمرار الحلم الصهيوني .. سنة 1922 منظمة عصبة الأمم اللي هي النسخة الأولانية خالص من الأمم المتحدة أقرت رسمياً الإنتداب البريطاني لفلسطين.

لما تيجي تقرأ القرار اللي طالع من الكيان اللي المفروض يعني إنه بيحمي حقوق الناس تلاقيه بيقول إن الإنتداب البريطاني لفلسطين جزء أساسي من شغله هو ضمان قيام دولة لليهود .. سنة 1922 هي فعلياً السنة اللي أنا شايفها سنة ميلاد إسرائيل .. مش 1948 إنما 1922 .. الفكرة إن (هيربيرت صامويل) بدأ يحط الأساسات لقيام إسرائيل لإنك لو بصيت علي القرارات اللي هو طلعها بصفته المندوب السامي لبريطانيا حتلاقي نفسك بتقول هااااااار اسود هو إحنا كعرب إزاي كنا عايشين في اللالاند كده؟

• أول حاجة إنه إعترف باللغة العبرية كلغة رسمية لفلسطين جنب اللغة العربية.
• حط أكتر من 100 قانون لتسهيل تسريب الأراضي العربية للصهاينة .. من ضمن القوانين دي كانت منح الصهيانة أراضي ببلاش .. حد مات وساب حتة أرض وملوش ورثة فلإنجليز يدوا أرضه للصهاينة .. حد إتحكم عليه بأي تهمة يقوموا ساحبين أرضه ومديينها للصهاينة.
• سمح للصهاينة بإن يكون ليهم نظام تعليمي مستقل ومنفصل عن الفلسطينيين .. الصهاينة بقي ليهم المدارس بتاعتهم والمناهج بتاعتهم والإمتحانات بتاعتهم.
• أهم حاجة هي السماح بإن للصهاينة يبقي ليهم مليشيات مسلحة مستقلة تحميهم بشكل منفصل عن الوجود العسكري الإنجليزي.

هنا جه الوقت إننا نتكلم شوية عن الفلسطينيين نفسهم .. وقتها اللي كنت تقدر تقول عليه إنه بجد يعني بيتكلم بإسم الفلسطينيين كان مفتي فلسطين الحاج (أمين الحسيني) الله يرحمه .. مهم تبقي فاهم إن الرجل ده مكنش قائد الفلسطينيين عشان هو (وليام والاس William Wallace) بتاعهم أو إنه بيعرف يتكلم أو إنه سياسي له مصداقيته .. لا خالص .. الرجل ده بقي مفتي فلسطين بالحظ .. أبوه كان المفتي ولما مات أخوه بقي المفتي ولما أخوه مات الحاج (أمين الحسيني) بقي المفتي .. (أمين الحسيني) لما إتحطت قدامه مسئولية الشعب الفلسطيني كان عنده 25 سنة .. معلش يعني هو الرجل ده كان يعرف إيه في عيشته في السن ده عشان يحمي شعبه؟ .. أنا شخصياً مبحبش فكرة إني وأنا قاعد في التكييف وفي إيدي كوباية النسكافية أعمل فيها أبوالعريف وأفضل أحكم علي خلق الله من غير ما أسأل نفسي هم يا تري عملوا كده ليه بس فعلياً إنت أو أنا أو أي حد تاني كان في مكان الحاج (أمين الحسيني) كان حيبقي عارف إن إنجلترا باعتك وإشترت الصهاينة.

دي المعلومة المؤكدة ..  تقوم برده مُصر تمشي في نفس السكة اللي إتهرست قبل كده ومجابتش نتيجة وهي إنك تبعت ناس تتكلم مع الإنجليز وتقولهم إحنا رجالتكوا وبلاش تثقوا في الصهاينة .. إنت مش متخيل إزاي الفلسطينيين إتباعوا وقتها .. ولا دولة عربية وقفت في ظهرهم .. كل أمراء وحكام العرب كانت مصلحتهم مع الإنجليز .. من سنة 1922 لحد سنة 1925 وماسورة هجرة يهودية وإتكسرت وغرقت فلسطين .. في 3 سنين بس عدد اليهود اللي هاجروا من أوروبا لفلسطين وصلوا 33,000 .. في 3 سنين إتبنت 13 مستعمرة يهودية جديدة .. في 3 سنين عدد العمالة اليهودية في فلسطين زاد أوي لدرجة إنهم إضطروا يعملوا نقابة عمالية إسمها الهيستدروت برئاسة (ديفيد بن جوريون) .. في ال3 سنين دول مدينة تل أبيب اللي هي دلوقتي عاصمة إسرائيل الإنجليز عطولها حق الحكم الذاتي .. في 3 سنين دول كمان أُفتتحت الجامعة العبرية واللي حفلة إفتتاحها حضرها (هيربيرت صامويل) المندوب السامي البريطاني في فلسطين وحضرها وزير الخارجية البريطاني (أرثر بالفور) وكمان حضرها زعيم الجمعية الصهيونية العالمية (حاييم وايزمان).

كان فين العرب من كل ده؟ .. كان فين العرب لما فلسطين دخلت في العصيان المدني سنة 1925 لما (بالفور) زارها عشان يفتتح الجامعة العبرية؟ .. كان فين العرب لما الفلسطينيين رفعوا أعلام سودا في البلكونات إحتجاجاً علي اللي بتعمله بريطانيا؟ .. كل ده كوم واللي حصل سنة 1929 ده كوم تاني .. في السنة دي شوية من الصهاينة نظموا وقفة عند حائط المبكي أو حائط البراق في القدس .. طبعاً الفلسطينيين شافوا المنظر والدم غلي في عروقهم .. الوقفة قلبت بخناقة إتعرفت بعد كده بإسم ثورة البراق ..  إتقال وقتها إن الفلسطينيين إتجمعوا وضربوا اليهود اللي واقفين بناء علي اللي أمرهم بيه واحد إسمه (فرحان السعدي) .. فيه حوالي 100 بني أدم ماتوا في الخناقة دي منهم صهاينة ومنهم فلسطينيين .. بسبب ده طلع بيان من مكتب المندوب السامي البريطاني وقتها (جون تشانسلر John Chancellor) تقدر تقول إنه قال انه حيطلع ميتين اللي مسئول عن اللي حصل .. الإنجليز إعتقلوا 3 فلسطينيين علي أساس إنهم هم المسئولين عن كل اللي ماتوا وكانوا (فؤاد حسن حجازي) و(عطا أحمد الزير) و(محمد خليل جمجوم) الله يرحمهم جميعاً .. اللي هو عايز تقولهم طب الناس دي جبتوا أساميهم بالقرعة ولا لعبتوا الفلسطينيين اللي إعتقلتوهم الشايب ودول اللي خسروا .. المهم إن الثلاثة الإنجليز أعدموهم يوم 17 يونيو 1930.

الإنجليز تخيلوا إن إعدام الثلاثة حيخلي الفلسطينيين يخافوا ويسكتوا خصوصاً إنهم ملهمش ظهر .. مفيش كيان في الأرض كان راضي يحميهم أو يسمع صوتهم .. ده في الوقت اللي الفلسطينيين بقوا شايفين بلدهم بتروح منهم .. الإنتداب البريطاني أُعلن سنة 1920 وخلال 10 سنين بس عدد اليهود اللي هاجروا لفلسطين وصلوا 175,000  .. ده في الوقت اللي الإعلام الغربي كان بيتقاله حاجة غريبة جداً .. المواطن الأوروبي بقي بيتقاله إن فلسطين دي عبارة عن خرابة وصحراء جرداء مفيهاش صريخ إبن يومين وإن العرب دول شوية جهلة كلهم مرض وفقر وجهل وقال إيه إن اليهود الأوروبيين اللي بيهاجروا لفلسطين دول هم اللي حينقلوها لمصاف الدول المحترمة.

اللي فعلاً غريب هو إن الإعلام الغربي بقي بيبيع للمواطن الأوروبي فكرة إن فلسطين مش عايش فيها مسيحيين .. كل ده والفلسطينيين لسه مش يائسين .. من سنة 1933وإنت طالع وكل يوم فيه مظاهرة ضد هجرة اليهود وكل يوم عدد الضحايا الفلسطينيين من بطش الإنجليز بيزيد .. كل يوم متظاهرين يا بيموتوا يا بيعتقلوا .. والإنجليز مكنوش بيفرقوا يضربوا مين .. (موسي كاظم الحسيني) عمدة القدس السابق واللي كان عنده 80 سنة إتسحل لحد مات علي إيد العساكر الإنجليز.

الثورة الفلسطينية سنة  1936 .. ماسورة غصب وإتكسرت وغرقت الدنيا:

في الوقت ده الفلسطينيين كانوا مقسومين نصين .. أو مش نصين خلينا نبقي حقانيين ونقول كانوا مقسومين الربع والتلات أربع .. الربع الأقلية ده كان بيعبر عنه واحد إسمه الشيخ (عز الدين القسام) الله يرحمه واللي شايفين إن إحنا من سنة 1920 وإحنا بنتكلم مع الإنجليز ودلوقتي بقينا في 1935 ومفيش فايدة .. التلات أربع اللي فاضلين بيقولوا لسه فيه أمل في المفاوضات والكلام وإن مفيش داعي للعنف خصوصاً إن مفيش حد واقف في ظهرنا .. الشيخ (عز الدين القسام) ركب دماغه وبدأ فعلاً يشكل وحدات قتالية إستهدفت الإنجليز والصهاينة لحد ما الإنجليز حاصروه هو ورجالته وأُستشهد .. إستشهاد الشيخ (عز الدين القسام) كان الشعلة اللي ولعت في المجتمع الفلسطيني .. يوم 19 إبريل 1936 الثورة إنفجرت في وش الإنجليز في مدينة يافا ومنها إنتشرت في كل حتة في فلسطين .. رد فعل الإنجليز كان في منتهي القسوة .. الإنجليز لو كانوا مسكوا حد عليه إشتباه بإنه مشارك في الثورة كانوا بيفجروا بيته ويبيتوه هو وأهله في الشارع .. سنة 1936 لوحدها الإنجليز دمروا 200 بيت في مدينة يافا كعقاب جماعي لأهل المدينة علي ثورتهم.

خلال 6 شهور بس كان 190 فلسطيني أُستشهدوا وإتصاب 800 في الثورة  .. لما الثورة عدي عليها سنة كان أُستشهد 1000 فلسطيني ومات 37 عسكري إنجليزي و 69 صهيوني ..  وسط ما الإنجليز كانوا محتاسين يعملوا إيه في ثورة الفلسطينيين إذ تفاجيء بإن (ديفيد بن جوريون) اللي وقتها كان قيادي في الحركة الصهيونية راح قابل المندوب السامي البريطاني وقتها (أرثر ورهوب) وعرض عليه فكرة إن ليه لا نرمي الفلسطينيين بره أرضهم ونوديهم يعيشوا في الأردن واليهود ياخدوا أرضهم؟ .. ساعتها (أرثر) رد عليه قاله دي فكرة زينة والله … عشان بس تستوعب حجم المأساة بتاعة الفلسطينيين وقتها فقادة العرب طلعوا بيان مضي عليه الأمير (عبدالله بن الحسين) الله يرحمه اللي كان بيحكم الأردن وغيره الحقيقة طلبوا فيه من الفلسطنيين إنهم يوقفوا الثورة وإن إنجلترا حليفتنا وبنت حلال وأدوها فرصة تثبت حسن نواياها.

القيادة السياسية الفلسطينية ملقتش حل غير إنهم يحطوا جزمة في بقهم ويوقفوا ثورتهم ويوافقوا يقعدوا مع المندوب اللي إنجلترا بعتته عشان يحل الأزمة وكان إسمه (إيرل بييل Earl Peel) .. الأخ (بييل) ده كتب تقرير نُشر في يوليو 1937 والمفروض إنه بناء علي كلام القادة العرب فالرجل ده هو اللي حيجيب حق الفلسطينيين .. بص اللي حصل بقي .. التقرير بتاع الأخ (بييل) قال إن لازم فلسطين تتقسم بحيث إن تلت مساحة فلسطين حتتعمل عليها دولة لليهود وتلتين مساحة فلسطين حتتعمل دولة للعرب بحيث إن الدولة دي حتبقي مؤقتاً يعني تحت سيطرة الأردن .. مش بس كده .. قالك حنعمل طريق سريع من القدس ليافا يفصل بين الدولتين والطريق ده حيبقي تحت سيطرة الإنجليز مؤقتاً برده .. طبعاً فيه سؤال مهم .. هو معلش الفلسطينيين اللي عايشين في التلت اللي اليهود حياخدوه عشان يعملوا عليه دولتهم حيحصلهم ايه؟

التقرير بتاع (بييل) قالك الناس دي حيتم نقلهم أو حيتعملهم Transfer بحيث نجبرهم يسيبوا أرضهم ويروحوا في أي داهية .. اللي الأخ (بييل) كان بيقوله ده إسمه تطهير عرقي بس الإنجليز قالك إيييه ده مين قال ده تطهير عرقي ده إسمه إنتقال أو Transfer  بس .. حنخليهم يعزلوا يعني .. لما القيادة الفلسطينية إعترضت علي اللي الكلام اللي إتقال في تقرير (بييل) فالإنجليز أعلنوا الأحكام العرفية في سبتمبر 1937 وقالوا إن اللجنة العربية العليا اللي المفروض إنها هي الكيان اللي بيمثل الفلسطينيين في مفاوضاتهم مع الإنجليز ده تنظيم إرهابي وبناء عليه اللجنة دي تتحل ومفيش مفاوضات بعد كده .. فيه 5 من أعضاء اللجنة دي الإنجليز قبضوا عليهم ونفوهم لجزر سيشل وعلي فكرة واحد من الخمسة دول كان عمدة القدس (حسين الخالدي) .. في أكتوبر 1937 الحاج (أمين الحسيني) مفتي فلسطين وبالتالي هو رئيس اللجنة العربية العليا ملقاش حل غير إنه يهرب بره فلسطين وراح قعد في لبنان .. اللي الإنجليز قالوه صراحة كده تقسيم فلسطين بقي أمر واقع والحكام العرب موافقين واللي مش عاجبه يا حننفيه بره البلد يا حنعتقله يا حنعدمه .. جزرة وقطمها جحش.

إذا كانت سنة 1922 هي بداية ميلاد إسرائيل ففي رأيي إن سنة 1937 كانت السنة اللي مقاومة الفلسطينيين فيها إنتهت .. المجتمع الفلسطيني بقي ملوش قيادة سياسية تقعد تتفاوض مع الإنجليز .. ده في الوقت اللي الإنجليز بقوا يتسلوا علي بقايا المقاومة المسلحة الفلسطينية .. العساكر الإنجليز بقوا فجأة من غير لا إحم ولا دستور يخشوا قرية وياخدوا الستات يقعدوهم في الجامع والرجالة يحبسوهم في المحلات ويقفلوا عليهم .. العساكر يلفوا بيت بيت يدوروا علي السلاح ولو لقوا إياكش حتي مظروف طلقة فاضية البيت كله بيتنسف كعقاب لصاحب البيت علي إنه فكر بس يشيل سلاح .. الموضوع فعلاً كان وصل لمرحلة معسكرات الإعتقال الجماعية زي اللي كان الألمان النازيين بيحطوا اليهود فيها .. الالاف من الفلسطينيين إتحبسوا لشهور من غير ما يتوجه ليهم أي تهم .. فاكر (نجيب نصار) اللي كنت قلتلك إنه كيميائي وعمل جرنان إسمه الكرمل عشان يحذر فيه العرب والفلسطينيين من البرنامج الصهيوني لبناء دولة يهودية؟ .. أهو الإنجليز إعتقلوا مراته (ساذج نصار) لمدة 11 شهر كاملين من غير ما يوجهوا ليها أي تهمة .. فاكر برده لما قلتلك إن سنة 1922 وقت ما (هيربيرت صامويل) كان المندوب السامي البريطاني لفلسطين سمح لليهود بإن يبقي ليهم مليشيات مسلحة خاصة بيهم عشان تحميهم؟ .. أهو سنة 1938 فيه واحدة من المليشيات دي إسمها الارجن Irgun بدأت تستهدف المسلمين والعرب وبقوا عاملين زي ما إنت بتسمع إن تنظيم القاعدة فرقع قنبلة في سوق في العراق مثلاً .. يوم 6 يوليو 1938 ناس تبع الأرجن فجروا عربيتين مفخختين في سوق في مدينة حيفا .. اليوم اللي وراه 7 يوليو فجروا قنبلة في سوق في مدينة القدس .. اليوم اللي بعده 8 يوليو فجروا قنبلة في موقف أوتوبيسات في مدينة القدس .. 3 أيام من الرعب والإرهاب أُستشهد فيهم 68 فلسطيني.

حاول تفهم إن زي ما اليهود إيدهم ملطخة بدم المسلمين والعرب فالإنجليز كمان مسئولين زيهم .. تنظيم إرهابي زي الأرجن ده كان بياخد تسليحة وتمويله من الإنجليز .. تنظيم إرهابي تاني زي الهاجاناه Haganah اللي دربه وعلمه إزاي يقتل ويصطاد العرب في فلسطين كان ضابط إنجليزي إسمه (أورد ويندجيت Orde Windgate) .. علي فكرة (موشيه دايان) اللي بعد كده بقي وزير دفاع إسرائيل كان من تلاميذ (ويندجيت) .. في نفس الوقت أرجوك حاول تفهم إن فكرة إن الفلسطينيين باعوا أرضهم دي بدعة من بدع الشيطان إتقالتلك وإنت صدقتها عشان من جواك تكره الفلسطينيين .. سنة 1938 المقاومة الفلسطينية المسلحة كانت بتحاول تعمل اللي تقدر عليه .. كتير من أعضاء المقاومة كانوا يا إما ناس شاركت في الشوط الأول من الثورة اللي قادها الشيخ (عز الدين القسام) وفيه ناس كانت متخيلة إن الشيخ (القسام) كان غلطان بس بعد كده إكتشفت إن الرجل ده كان عنده حق وكان شايف حاجة غايبة عن عيون كتير من الفلسطينيين والحاجة دي إن الإنجليز ولاد ستين كلب .. المقاومة الفلسطينية كانت ماشية بنفس مبدأ سلسلة مطاعم كنتاكي كده اللي هو فيه عندك فروع متوزعة في حتت مختلفة وكل فرع ماسكه مدير فرع .. يعني مثلاً منطقة الجنين كان ماسكها (فرحان السعدي) اللي لو فاكر قلتلك إن الإنجليز إتهموه بإنه هو العقل المدبر ورا ثورة البراق .. منطقة نابلس ماسكها (محمد صلاح الحمد) واللي أُستشهد في مايو 1938 .. في القدس كان اللي ماسك الفرع (عبدالقادر الحسيني) .. في يافا حتلاقي (حسن سلامة) .. اللي ماسك الليلة دي كلها واللي في إيده الفرانشايز كان (عبدالرحيم الحاج محمد) .. الإنجليز فضلوا يجروا وراه ويطاردوه لحد ما أُستشهد في كمين إتعمله في حتة إسمها سنور في مارس 1939.

مهم أوي تبقي فاهم برده إن فعلياً المقاومة المسلحة الفلسطينية كانت زي ما بنقول كده بتنفخ في قربة مخرومة .. الناس دي مش مدعومة من الحكومات العربية .. القيادة السياسية بتاعتها زي ما قلتلك يا مُعتقلة يا إتنفت بره البلد .. خلال سنة واحدة بس اللي هي 1938-1939 الإنجليز أعدموا 112 فلسطيني بتهمة التعاون مع المقاومة ومن ضمن اللي إتعدموا كان (فرحان السعدي) اللي كان ماسك فرع المقاومة في الجنين واللي إتعدم رغم إن سنه كان 80 سنة .. إنت متخيل؟ .. ميكس العقاب الجماعي بتفجير البيوت والإعتقال والإعدام كفيل إنه يكسر الروح المعنوية لأي شعب .. ده في الوقت اللي الصهاينة نفسهم كانوا بيضربوا من تحت الحزام بشكل مبدع الحقيقة .. كانوا بيعملوا نوادي إسلامية وطنية .. شفت السفالة وقلة الأدب .. مش إسلامية بس أو وطنية بس .. لا الإتنين .. وبيخلوا فيها أعضاء فلسطينيين بس ولاءهم لليهود عشان بياخدوا منهم فلوس .. لو فيه وفد سياسي فلسطيني رايح يتكلم مع الإنجليز كممثلين للشعب الفلسطيني فالناس بتوع الأندية دي يبعتوا جوابات للإنجليز يقولوهم فيها إن اللي أنتوا بتتفاوضوا معاهم دول مش بيمثلوا الشعب الفلسطيني وإن الشعب الفلسطيني معندوش مشكلة إنه يقبل وجود الدولة اليهودية وإن الصهاينة دول أجدع ناس بعد الصعايدة.

الثورة الفلسطينية إستمرت من 1936 لحد 1939 .. في 3 سنين كان أُستشهد 5000 فلسطيني وأُصيب 40,000 قصاد مقتل 1000 عسكري إنجليزي و 400 يهودي .. بذمتك إنت حد قالك علي الثورة دي؟ أو كنت تعرف عنها حاجة؟ .. هل حد قالك علي 5000 شاب زي الورد اللي أُستشهدوا عشان يدافعوا عن أرضهم؟ .. من الشباب الفلسطينيين في الفئة العمرية بين 18-40 سنة اللي هم أمل الأمة حتلاقي إن واحد من كل تسعة منهم يا إتقتل يا أعتقل يا إتنفي .. إيه هي فرصة الشعب الفلسطيني إنه يقوم تاني أو يبني أي جيش؟ .. تقريباً أي فرصة ليهم إنتهت .. صدقني لو قلتلك إن فلسطين مضاعتش في 1948 .. لا خالص .. فلسطين ضاعت فعلياً سنة 1939 .. صدقني لو قلتلك إن إعلان دولة إسرائيل لو كان الموضوع مشي زي ما اليهود كانوا عايزين لكنت لقيته إتعمل في السنة دي اللي هي 1939 بس يشاء ربك إنه يدي للعرب فرصة تانية تمثلت في الحرب العالمية الثانية.

الحرب العالمية الثانية .. ما بين الرهانات الغلط والفرص اللي ضاعت يا قلبي لا تحزن:

الحقيقة إن السنين بتاعة الحرب العالمية الثانية كانت غريبة جداً بالنسبة للوضع في فلسطين .. فيه كذا نقطة حصلوا في السنين دي تموا مع بعض في وقت واحد وده في الأخر اللي أدي إلي إن حرب 1948 تحصل:

• أول حاجة هي إن كتير من المنظمات الإرهابية الصهيونية إنضمت للقوات المسلحة البريطانية في الحرب وعشان كده خدوا خبرة كبيرة أوي في الحروب والأسلحة والتكتيكات العسكرية .. متنساش إن (موشيه دايان) خسر عينه في واحدة من معارك الحرب العالمية الثانية مع الإنجليز.
• ثاني حاجة هي قرار الحاج (أمين الحسيني) واللي مهم تبقي لسه فاكر إن الرجل ده كان بيمثل المقاومة السياسية الفلسطينية إنه يرمي نفسه في حضن الألمان والحقيقة إن القرار ده كلف الفلسطينيين كتير أوي خصوصاً إن زي ما كلنا عارفين التاريخ بيكتبه المنتصر.
• ثالث حاجة هي إن خلال سنين الحرب الصهاينة بدأوا مشروع مهم فشخ هو مشروع ملفات القري Villages Files Project .. الفكرة إن الصهاينة كانوا عايزين يجمعوا كل المعلومات الممكنة عن القري الفلسطينية .. كل قرية تعداد سكانها كام؟ .. مواردها إيه؟ .. بيتزرع فيها إيه؟ .. إزاي تخش القرية وإزاي تطلع منها؟ .. المعلومات دي كلها كانت مفيدة جداً في إيد الإسرائليين لما قامت حرب 1948.
• وقت الحرب العالمية الثانية الإنجليز بدأوا يربطوا الحزام علي عدد المهاجرين اليهود اللي بييجوا فلسطين من أوروبا ودي النقطة اللي مكانتش عاجبة الصهاينة .. يُحكي أن سنة 1940 كانت فيه سفينة فرنساوي إسمها باتريا كانت شايلة 800 مهاجر يهودي هربانين من ألمانيا والمفروض إنها كانت حتنزلهم في ميناء حيفا .. الإنجليز رفضوا ينزلوا المهاجرين دول وكانوا حيودوهم جزيرة مورشيوس .. تنظيم الهاجانا الإرهابي الصهيوني معجبهومش الوضع وقرروا يفجروا السفينة بقنبلة والسفينة غرقت ومات 260 بني أدم .. علي فكرة إحنا عرفنا إن تنظيم الهاجاناه هو المسئول فعلاً عن تفجير السفينة بعد غرقها ب60 سنة لما اللي زرع القنبلة طلع إعترف.

كل ده كان بيحصل والصهاينة يوم عن يوم وبفكرك إن ده وقت ما الحرب العالمية الثانية كانت مولعة وصلوا لإقتناع إن معلش يعني بعد ما الحرب ما تخلص مستحيل تفضل إنجلترا هي القوة العظمي الأولي في العالم .. يوم عن يوم وبقي واضح إن الرهان المضمون هو أميركا .. عشان كده في مايو 1942 إتعمل إجتماع في فندق بيلتمور في مدينة نيويورك الأميريكية والإجتماع ده حضره 600 بني أدم من الحركة الصهيونية العالمية .. من ضمن اللي حضروا كان (حاييم وايزمان) اللي هو يبقي رئيس الحركة الصهيونية العالمية و(ديفيد بن جوريون) اللي ماسك الوكالة اليهودية .. ده حضرتك الإجتماع اللي طلع منه الحاجة اللي إنت عارفها بإسم اللوبي اليهودي في أميركا .. إذا كان الإنجليز قرروا من سنة 1907 إنهم يقفوا ورا الصهاينة عشان يعملوا دولة إسرائيل في فلسطين عشان كانوا شايفين إن دي أحسن طريقة لضمان إن العرب والمسلمين ميقومش ليهم قومة .. اللي هي فكرة إن لو زرعنا إسرائيل زي الخازوق اللي يفصل بين مصر وسوريا والعراق فإحنا حنضمن إننا لسنين حنعرف نسيطر علي الدول العربية .. لكن .. الأمريكان فعلياً مفيش مبرر ليهم إنهم يدعموا فكرة قيام إسرائيل وعشان كده إجتماع فندق بيلتمور لقي الحاجة اللي عايزها الأمريكان .. الفلوس.

أغنياء اليهود طلعوا من الإجتماع ده وهم فاهمين كويس هم حيعملوا إيه .. أميركا دولة ديموقراطية وده معناه إن سياسة الدولة أو خلينا نقول مصالح الدولة بيرسمها المصالح الشخصية للسياسيين اللي ماسكين البلد .. أميركا بلد فيها حزبين اللي هم الجمهوري والديموقراطي .. كل حزب محتاج فلوس يصرفها علي المرشحين بتوعه عشان يخشوا البرلمان .. اليهود عندهمش أي مشكلة إنهم يغرقوا السياسيين الأمريكان فلوس في مقابل إنهم يخلوا أكبر قوة عظمي في العالم مصلحتها تبقي من مصلحة إسرائيل.

واحدة واحدة المنظمة الصهيونية العالمية بقت تسيب إنجلترا ونقلت شغلها كله لأميركا .. سنة 1944 بيتعمل المؤتمر الصهيوني العالمي في مدينة أتلانتيك في ولاية نيوجيرسي .. الفلوس لعبت دور السحر .. خلال سنة واحدة كانت فلوس اللوبي اليهودي هي السبب في إنتخاب كتير من أعضاء الكونجرس لدرجة إن سنة 1945 يدوبك بعد ما الحرب العالمية الثانية ما خلصت الرئيس الأميريكي (هاري ترومان Harry Truman) طلع قال مفيش مانع إن 100,000 يهودي كانوا عايشين في أوروبا وسابوا بيوتهم بسبب الحرب إنهم يهاجروا فلسطين .. سنة 1945 كانت السنة اللي فعلاً الصهاينة والإنجليز بقوا عاملين زي الإتنين المتجوزين اللي قرروا يبهدلوا بعض في المحاكم .. في الوقت اللي الصهاينة إشتروا الأمريكان بفلوسهم فالإنجليز كانوا لسبب ما أظن حتي الإنجليز مكانوش عارفينه كانوا رافضين يفتحوا حنفية الهجرة اليهودية لفلسطين .. سنة 1945 كانت السنة اللي السحر إنقلب علي الساحر .. منظمات الهاجانا والأرجن ومعاهم منظمة إسمها علي مسمي الحقيقة اللي هي عصابة ستيرن إتحدوا مع بعض تحت مظلة المقاومة اليهودية .. بعد ما كان الإنجليز حبايب الصهاينة دلوقتي سلاح الصهاينة بقي متوجه ليهم.

تفجير خطوط سكة حديد تلاقي .. تفجير أقسام بوليس حصل .. يوم 22 يوليو 1946 إنفجار بيستهدف فندق الملك داوود في قلب القدس واللي الإنجليز كانوا بيستخدموه كمقر لعملياتهم العسكرية ومات في التفجير ده 91 بني أدم بس مش هي دي القضية .. التفجير ده اللي كان مسئول عنه هو منظمة الأرجن الإرهابية اللي في واحد مارس 1947 فجروا فندق الضباط في القدس واللي مات فيه 16  بني أدم .. وبرده مش دي القضية .. في يوليو 1947 منظمة الأرجن برده كانت عايشه دور (شمس الزناتي) وخطفت إتنين عساكر إنجليز واحد إسمه (كليفارد مارتن) والثاني إسمه (ميرفين بايس) وإتقال وقتها إن الإتنين عساكر دول إتخطفوا كرد علي إعتقال الإنجليز ل3 عناصر من تنظيم الأرجن وإن الثلاثة إتحكم عليهم بالإعدام .. الإنجليز نشفوا دماغهم وأعدموا الثلاثة .. تاني يوم الإنجليز لقوا الإتنين عساكر مقتولين وجثثهم متعلقة من شجرة في شوارع مستعمرة ناتانيا .. وشوف برده كل ده مش القضية .. القضية إن عارف مين كان زعيم تنظيم الأرجن؟ .. (مناحم بيجين) اللي بعد كده بقي رئيس وزراء إسرائيل وخد جايزة نوبل للسلام .. (بيجين) اللي كان بيتفاوض مع الرئيس (السادات) الله يرحمه ولا تخرج قبل أن تقول لا اله إلا الله.

سنة 1947 الإنجليز قرروا يسيبوها مخضرة وقالوا للأمم المتحدة تعالي إنتي أحكمي فلسطين .. بعد ما كنا حبايب اليهود دلوقتي بقي بيتلعن سلسفين اللي جابونا مش بس من المسلمين إنما من اليهود كمان .. لو حنرجع للتشبيه بتاع إن الإنجليز والصهاينة بقوا عاملين زي الإتنين المتطلقين اللي ساحلين بعض في المحاكم فتقدر تقول إن الإنجليز بقوا عاملين زي الست اللي لمت حاجتها وسابت العيال مع الرجل وراحت لبيت أهلها وجوزها صحي الصبح محتاس .. من سنة 1920 وفلسطين تحت الإنتداب أو خلينا نستخدم المصطلح الصح ونقول تحت الإحتلال البريطاني .. 54 سنة كتير أوي ودي مدة كافية إنك خلاص تتعود علي وجود الإنجليز .. الوضع شبه اللي حصل بعد جمعة الغضب في ثورة يناير لما صحينا لقينا الشرطة فص ملح وداب .. الأمم المتحدة نفسها ككيان لا زمان ولا دلوقتي مؤهلة إنها تمسك حضانة فمابالك بدولة وعشان هم كمان يسلتوا إيدهم من المسئولية قالك الحل الوحيد إن فلسطين تتقسم 3 حتت .. حتة تبقي دولة يهودية .. حتة تبقي دولة عربية .. حتة تبقي تحت السيطرة الدولية اللي هي حتبقي مدينة القدس .. اللي هو رجعوا تاني للحل بتاع (إيرل بييل) .. الحل ده إتقال رسمي يوم 29 نوفمبر 1947 لما الجمعية العمومية للأمم المتحدة طلعت القرار رقم 181 .. بااااااس أقف بقي هنا .. مهم أوي تبقي فاهم في المرحلة دي هي كانت إيه مشكلة القرار 181 ده بالضبط لإن القرار ده كان هو السبب في إن حرب 1948 تحصل أصلاً.

المشكلة إن القرار قالك إن الدولة اليهودية حتاخد 56% من إجمالي مساحة فلسطين مش التلت بس زي ما (إيرل بييل) قال ودي مش المشكلة الوحيدة .. لو بصيت علي الخريطة بتاعة القرار حتلاقي إن الدولة اليهودية قسمت الدولة العربية نصين اللي هو قطاع غزة ومدينة يافا والإتنين فعلياً بقوا مفصولين عن باقي الدولة .. أي حد بيفهم في الجغرافيا كان حيبص للخريطة دي ويقول إيه الهبد ده .. يمكن لو كان اللي عمل القرار قالك نقسم مساحة فلسطين نصين زي مثلاً كوريا الجنوبية والشمالية كده كان الموضوع إتبلع .. لكن التقسيم وفق الهبل ده كان صعب يتقبل .. ورغم كده القرار إتوافق عليه في التصويت بتاع الجمعية العمومية للأمم المتحدة .. 33 دولة وافقت قصاد 13 دولة رفضت و 10 دول إمتنعت عن التصويت.

إتعرف بعد كده إن أميركا دفعت رشاوي وضغطت علي كتير من الدول ال33 اللي وافقت علي القرار .. مندوبي دول الفلبين وليبيريا مثلاً بعدها بسنين قالوا أيوه إحنا إتقالنا من أميركا يا توافقوا علي إنشاء دولة إسرائيل يا حنمنع عنكوا المساعدات .. بس شوف حتي ده مش القضية .. القضية إن فلسطين بتتاخد مننا غصب من سنة 1920 والشعوب العربية بدأت تفوق سنة 1947 .. يعني أنا قايلك إن المقاومة الفلسطينية المسلحة إنتهت فعلياً علي الأرض سنة 1939 بس جامعة الدول العربية طلعت في مايو 1948 قالت لازم ندعم المقاومة المسلحة الفلسطينية .. وهنا أنا أحب أقول للحكومات العربية من قلبي يعني .. أتنيلوا .. أتنيييييييييلوا.

مشروع التطهير العرقي للفلسطينيين:

في المرحلة دي إسرائيل بقت عاملة زي الدوري المصري بالنسبة للنادي الأهلي كده .. إحنا كل سنة بنبقي عارفين إن الأهلي حياخد الدوري فالسؤال مش بيكون هو مين حياخد الدوري قد ما هو السؤال إزاي الأهلي حياخد الدوري؟ .. هنا نفس الكلام .. كان فاضل إتنين بس علي حدود مورتيانيا مع المغرب مش فاهمين إن الخريطة بتاعة تقسيم فلسطين اللي طلع علي حسها قرار الأمم المتحدة رقم 181 مينفعش غير إنها تتطبع ويتلف بيها فلافل وبتنجان مقلي .. إحنا بقينا عارفين إن القرار ده إتعمل عشان دولة إسرائيل يبقي ليها شرعية .. اللي إحنا عايزين نتكلم فيه هو إزاي حدود البلد دي حتترسم؟ .. من هنا وإنت طالع حتلاقي الأحداث بتجري فححاول أحط اللي حصل في نقط ورا بعضها ولو حبينا نتكلم بشوية تفصيل عن نقطة محددة حنعمل ده:

• الخطة الصهيونية إنت تقدر تلخصها بكلمة واحدة .. الإرهاب .. في أول أسبوع من سنة 1948 عربية مفخخة إنفجرت ودمرت معاها مبني بلدية يافا واللي كان بناه العثمانيين وقت ما كانوا بيحكموا فلسطين والتفجير ده مات فيه 26 بني أدم أغلبهم فلسطينيين.
• في نفس الإسبوع عربية مفخخة برده بتنفجر قدام سينما سميراميس في القدس وبرده فوق العشرين بني أدم ماتوا أغلبهم فلسطينيين.
• يوم 6 يناير 1948 بيحصل إجتماع بين المندوب السامي البريطاني في فلسطين وبين (ديفيد بن جوريون) وفي الإجتماع ده المندوب السامي سأل (ديفيد بن جوريون) صراحة كده إذا كان تنظيم الهاجانا الإرهابي هو المسئول عن تفجير سينما سيراميس و(ديفيد) مرضاش يطلع كداب وإعترف بإن أيوه إحنا اللي فجرنا السينما.
• يوم 15 فبراير 1948 مسلحين من تنظيم الهاجانا الإرهابي بيهجموا علي قرية القيصرية القريبة من مدينة حيفا .. عارف مين كان قائد القوة اللي شنت الهجوم ده؟ .. (إسحاق رابين) اللي بعد كده بقي رئيس وزراء إسرائيل .. بس أنا عايزك تقف شوية هنا .. الصهاينة كانوا عارفين هم عايزين إيه ويحققوه إزاي وهنا حرجع أجيب سيرة حاجة قلتها قبل كده وهي مشروع ملفات القري Villages Files Project .. فاكر المشروع ده اللي الصهاينة بدأوه وقت ما الحرب العالمية الثانية كانت مولعة؟ .. المشروع ده خلاهم عارفين بالضبط هي كل قرية ومدينة فلسطينية عايش فيها كام؟ بياكلوا إيه؟ بيشربوا إيه؟ إزاي يدخلوا المدينة؟ وإزاي يحتلوها؟ .. قرية القيصرية كانت الحلقة الأولي من المسلسل .. كانت أول تجربة بحق وحقيقي لتنفيذ المشروع الإرهابي الصهيوني .. القرية إتحرقت بالكامل والصهاينة أجبروا الألف فلسطيني اللي عايشين فيها إنهم يسيبوا بيوتهم ويمشوا .. تجربة قرية قيصرية ورت للصهاينة إن الدنيا سهلة .. العرب مش فالحين غير في الكلام .. المقاومة الفلسطينية أضعف من إنها تواجهنا .. الإنجليز ولا كأنهم شايفين حاجة.
• يوم 10 مارس 1948 بيطلع قرار من الوكالة اليهودية ممضي من رئيسها (ديفيد بن جوريون) بيدي بيه الإذن للتنظيمات الإرهابية الصهيونية إنها تبدأ عملية التطهير العرقي للفلسطينيين من أرضهم .
• يوم 9 إبريل 1948 مسلحين من تنظيمي الأرجن وعصابة ستيرن هاجموا قرية دير ياسين اللي يدوبك علي بعد كام ساعة بالعربية من القدس الشريف والصهاينة إرتكبوا مذبحة إتعرفت بإسم مذبحة دير ياسين أُستشهد فيها أكتر من 100 فلسطيني منهم ستات وأطفال وعواجيز .. عارف الوساخة مش في كده .. أنا أقدر أفهم الوحشية الصهيونية .. بس إن تبقي قرية دير ياسين علي بعد 3 كيلومتر من مقر معسكر البوليس الإنجليزي في القدس ولما قائد المعسكر يتقاله إن العصابات الصهيونية بترتكب مذبحة في القرية فيكون رده وإحنا مالنا يبقي هي دي الوساخة.
• يوم15 إبريل 1948 بتبدأ القوات الإنجليزية إنسحابها من فلسطين .. المفروض إن أساساً الحكومة البريطانية أعلنت رسمياً يوم 14 مايو 1948 إنها حتنهي الإنتداب بتاعها أو إحتلالها لفلسطين علي أساس إن خلاص كده يا جدعان الصهاينة قلبوا علينا بعد ما خدوا اللي هم عايزينه .. يعني لما الإنجليز طلعوا قالوا إننا حننسحب فعايزك تعرف إن فعلياً علي الأرض هم كانوا بينسحبوا قبلها بشهر .. كل ما الإنجليز ينسحبوا من حته الصهاينة يقعدوا مكانهم.
• يوم 16 إبريل 1948 الإنجليز إنسحبوا من مدينة طبرية والإنجليز أجبروا الفلسطينيين اللي عايشين في المدينة إنهم يمشوا ويسيبوها للصهاينة .. يوم 18 إبريل كان الإنجليز أجبروا 5,000 مواطن فلسطيني إنهم يسيبوا المدينة .. اليوم اللي وراه الصهاينة دخلوا المدينة .. أرجع وأقول تاني إن الفلسطينيين عمرهم ما باعوا أرضهم.
• يوم 21 إبريل 1948 أخر عسكري بريطاني بينسحب من مدينة حيفا وزي ما حصل في طبرية الإنجليز أجبروا 50,000 من أهل المدينة الفلسطينيين إنهم يسيبوا بيوتهم ويروحوا لمدينة عكا .. يوم 22 إبريل مدينة حيفا بتقع في إيد مسلحي تنظيم الهاجانا الإرهابي.
• يوم 14 مايو 1948 الصهاينة دخلوا مدينة يافا واللي رغم إنها بناء علي قرار الأمم المتحدة فهي جزء من الدولة العربية إلا إن الصهاينة خدوها برده بعد ما 17,000 من أهل المدينة أجبروا إنهم يسيبوها و يهربوا.

يوم 14 مايو 1948 إنجلترا بتنهي إحتلالها لفلسطين وقبل ما الإنجليز يلموا شنطهم ويروحوا في داهية كان (ديفيد بن جوريون) بيعلن قيام دولة إسرائيل .. إعلان قيام دولة إسرائيل كان عامل زي ما يكون بيتلعب ماتش وحكم يحسب ضربة جزاء في الوقت بدل الضايع .. متفهمش إزاي بتجيلك إنت كمشجع طاقة رهيبة إنك تعترض وتعلي صوتك مش بنشوفها منك لما الحكومة ترفع عليك سعر البنزين من غير لا إحم ولا دستور بس ما علينا يعني دلوقتي .. الوضع غلي وكان حيفرقع في وش الكل وعشان كده الأمم المتحدة بعتت رجل سويدي إسمه (فولكي بيرنادوت Folke Bernadotte) كمبعوث سلام عشان يلاقي حل وسط .. الرجل ده كان رجل بلسم يتحط علي الجرح يطيب .. هو اللي كان ماسك الصليب الأحمر وقت الحرب العالمية الثانية وهو اللي أشرف علي عملية علاج وإعادة تأهيل 30,000 معتقل كانوا محبوسين في معسكرات الإعتقال النازية .. يوم 16 سبتمبر 1948 الرجل ده سلم تقريره للأمم المتحدة واللي قال فيه نصاً اللي بيعمله الصهاينة ده عيب وحرام وإن لازم الفلسطينيين اللي إتهجروا بره أرضهم يرجعوا تاني .. الرجل رجع تاني للإقتراح الأولاني خالص بتاع (إييرل بييل) لو فاكره .. إحنا حيبقي عندنا دولتين واحدة يهودية والتانية فلسطينية بس علي الأقل حدودهم حتبقي مفصولة عن بعض مش اللوحة السريالية اللي قالها قرار الأمم المتحدة رقم 181 .. ده مع حق العودة للاجئين الفلسطينيين .. تاني يوم اللي هو 17 سبتمبر كان مسلحين من عصابة ستيرن إغتالوا (فولكي بيرنادوت) في كمين إستهدف الموكب بتاعه في شوارع القدس .. علي فكرة .. عصابة ستيرن اللي كان ماسكها وقتها كان رجل إسمه (إسحاق شامير) وزيه زي باقي شلة التنظيمات الإرهابية الصهيونية وقتها مسك منصب رئاسة وزراء إسرائيل بعد كده.

كل يوم بيعدي بعد إغتيال (فولكي بيرنادوت) والصهاينة بيتوسعوا .. هجوم ورا هجوم علي القري الفلسطينية وإجبار أهلها علي إنهم يلموا حاجتهم ويمشوا .. اللي مسك بعد (فولكي بيرنادوت) كان النائب بتاعه وكان رجل أمريكاني إسمه (رالف بانش Ralph Bunch) .. الرجل ده قال لنفسه إن العمر مش بعزقة .. لما (فولكي) قال حاجة مش علي مزاج الصهاينة قتلوه .. خليني ماشي جنب الحيط .. الرجل ده في فبراير 1949 قدر يخلي مصر وإسرائيل يمضوا علي إتفاقية الهدنة .. لبنان مضت علي الإتفاقية في مارس .. الأردن حصلتهم في إبريل وأخيراً سوريا مضت في يوليو .. يوم 10 مايو 1949 الإتفاقية إتطبقت .. يوم 11 مايو إسرائيل إنضمت للأمم المتحدة .. كمافكأة ل(رالف بانش) أدوله جايزة نوبل للسلام .. إتفاق الهدنة اللي مضته الدول العربية مع إسرائيل ده كان إتفاق أغرب من إتفاق القايمة بتاع الجواز عندنا .. في إبريل 1950 فلسطين إتقسمت نصين .. النص الشرقي اللي إسمه بقي الضفة الغربية راح للأردن .. النص الغربي هو قطاع غزة وده راح لمصر .. في يوم وليلة مبقاش فيه دولة إسمها فلسطين .. فلسطين بقي إسم ملوش معني.

حرب فلسطين .. والله ربنا حيحاسبكوا علي المصايب اللي أنتوا عملتوها دي:

أقفلي بقي هنا عشان فيه نقطة محتاجة تتشرحلك .. يوم 14 مايو اللي هو يوم إنسحاب الإنجليز من فلسطين كان هو نفس اليوم اللي أعلن فيه (ديفيد بن جوريون) قيام دولة إسرائيل وإنه بقي أول رئيس جمهورية ليها .. الإنجليز مشيوا من هنا والصهاينة بقي إسمهم إسرائيليين من هنا .. مش بس كده .. من أول سنة 1948 والإنجليز قايلين للعرب محدش فيكوا يخش فلسطين إلا بعد ما نمشي .. يعني من أول سنة 1948 والتطهير العرقي للفلسطينيين شغال وتهجيرهم من أرضهم ماشي زي السكينة في الجاتوة والعرب قال إيه سامعين كلام الإنجليز بإن حاضر مش حندخل دلوقتي وده لوحده زي ما تكون بتلعب ماتش وتقرر إنها متروحش تلعب ماتش الذهاب ويعتبروك منسحب وتخسر 3-0 .. ورينا بقي يا فالح حتعرف تعمل الريمونتادا في ماتش العودة إزاي؟

اللي أنا عايز أقف عنده أوي هنا إنك تفهم ليه حرب 1948 كانت مهزلة؟ .. الحروب زي الطبيخ .. عشان تعمل طبخة حلوة محتاج مقادير ومقادير إنك تكسب حرب هي 3 حاجات .. معلومات مخابراتية دقيقة عن هو عدوك فين؟ تسليحة إيه؟ قياداته عايزة إيه؟ .. عايز يبقي معاك سلاح وسلاح كتير كمان .. عايز تبقي إنت شخصياً عارف هو إنت رايح تهبب إيه؟ ومهم تبقي فاهم إن أسهل حاجة في الدنيا إنك تبدأ حرب بس الصعب فشخ إنك تعرف إمتي تنهيها .. تعالي بقي نشوف أزاي إحنا كعرب خسرنا الحرب دي قبل حتي ما نقول توكلنا علي الله:

الفشل المخابراتي:

أول معلومة بتهمك عن العدو بتاعك هو يا تري حيحاربني بكام بني أدم؟ .. العرب كانوا متخيلين إن الصهاينة يدوبك كام ألف وإحنا بسم الله ما شاء الله كتير فمفيش داعي نقلق .. الحقيقة إن العرب وقتها كانوا نايمين في العسل .. خلال الست شهور الأولي من سنة 1948 لو جيت تحسب هي العصابات الإرهابية الصهيونية خصوصاً الكبار اللي هم الهاجانا والأرجن وعصابة ستيرن تحت إيدهم كام واحد شايل سلاح فحضرتك هم وصلوا 40,000 مقاتل .. عارف إجمالي عدد المسلحين بتوع المقاومة الفلسطينية اللي لسه فاضلين كانوا كام؟ .. 3000 مقاتل بس .. طب يا سيدي زود عليهم ال4,000 متطوع عربي اللي إتسموا جيش التحرير العربي اللي راحوا علي سوريا عشان يشاركوا في الدفاع عن فلسطين بقيادة واحد إسمه (فوزي القاوقجي) فتلاقي نفسك في حرب 40,000 قصاد 7,000 .. دول الفلسطينيين والمتطوعين .. القوات العربية النظامية اللي دخلت فلسطين كان عددهم شاكب راكب 24,000 .. فتاني .. أي حد يقولك إن في حرب 1948 العرب كان عددهم أكتر من الصهاينة فخليك عارف إنه بيهبد.

إستغلال وجشع يودي جهنم:

سيبك من اللي بتسمعه عن حكاية فضيحة الأسلحة الفاسدة .. أساساً مكنش فيه سلاح .. المقاتل الفلسطيني عشان يشيل بندقية يدافع بيها عن بلده بيتقاله إن الطلقة الواحدة ثمنها 100 ليرة .. معلش يعني هو الفلسطينيين أغنياء فشخ عشان يشتروا طلقة البندقية ب100 ليرة؟ .. أومال البندقية نفسها بكام؟ .. حتي لما حد من بره حاول يساعد الفلسطينيين بإنه يديهم سلاح مكانوش حكومات إنما افراد .. يُحكي أن كان فيه ضابط أردني إسمه (محمد الحنيطي) وده كان قائد الحامية العربية في مدينة حيفا .. الرجل ده شاف بعنيه إزاي المقاومة الفلسطينية تسليحها يعني يصعب علي الكافر فقرر إنه يتصرف بإنه يديهم سلاح من اللي كان مخصص للقوات المسلحة الأردنية .. وقتها القائد العام للقوات المسلحة الأردنية كان جنرال إنجليزي إسمه (جون جلوب John Glubb) إستدعي (محمد) وسأله إنت إيه اللي إنت بتهببه ده؟ إنت السلاح ده مينفعش توديه للفلسطينيين .. (محمد) قدم إستقالته وراح سافر دمشق يشتري هو سلاح من السوق السودا ويعبر بيه الحدود لفلسطين … الرجل ده أُستشهد في كمين عملته العصابات الصهيونية ليه هو وقافلة السلاح اللي كانت معاه .. بلاش ده .. (عبدالقادر الحسيني) اللي قلتلك إنه كان ماسك فرع المقاومة الفلسطينية في القدس راح بنفسه دمشق يترجي الحكومة السورية إنها تديله سلاح والسوريين رفضوا .. يوم 6 إبريل 1948 الرجل ده كتب جواب لجامعة الدول العربية إتهمها بإنها هي المسئولة عن ضياع فلسطين لإنها حتي مرضتش إنها تبعت سلاح للفلسطينيين يدافعوا عن أرضهم .. يوم 8 إبريل (عبدالقادر) أُستشهد في معركة الدفاع عن القدس.

الأسئلة الوجودية اللي تودي في داهية:

هو القرار كان بيتاخد إزاي في الحرب؟ .. القوات العربية اللي دخلت فلسطين كانوا المصريين والأردنيين والعراقيين .. كل واحد كان في ملكوت لوحده بس يمكن القوات الأردنية بالذات هي اللي عليها علامات إستفهام كتيييييره أوي .. مبدأياً كده وبسم الله الرحمن الرحيم قائد القوات المسلحة الأردنية زي ما قلت من شوية مكنش رجل أردني .. ده كان (جون جلوب) اللي إتكلمت عنه من شوية .. وعلي فكره مكنش لوحده .. كان فيه أكتر من 40 ضابط إنجليزي ماسكين مناصب قيادية في القوات المسلحة الأردنية فإنت متقدرش تقول إن قرار المؤسسة العسكرية الأردنية كان مسئول عنه بني أدمين أردنيين بيخافوا ربنا .. اللي حصل إن (جون جلوب) عرض علي الملك (عبدالله) ملك الاردن انه يتكلم مع قادة إسرائيل بحيث يوصلوا لإتفاق .. يا نحلة لا تقرصيني ولا عايز عسل منك .. إحنا مش حنضرب بعض في مقابل إن الإسرائيليين يدوا الأردنيين الضفة الغربية والقدس الشرقية .. إشمعني يعني الضفة الغربية؟ .. قالك أصل يوم 2 مايو قبل ما القوات العربية تخش فلسطين إتعمل إجتماع لقادة الجيوش العربية عشان يتفقوا هو كل جيش وظيفته حتبقي إيه .. في الإجتماع ده إتقال إن الجيش الأردني دوره إنه يخش لحد الضفة الغربية والقدس الشرقية .. يعني الحق يتقال لما الملك (عبدالله) باع القضية مخدش حاجة أكتر من حقه .. الرجل إتقاله رجالتك حتقف عند القدس الشرقية والضفة الغربية ودول اللي هو خدهم من الإسرائيليين.

عشان ضميري يستريح وأحس إني وصلتلك الحقيقة لازم تفهم حقيقة كارثة اللاجئين الفلسطينيين ويعني إيه حق العودة؟

رغم إن الجيوش العربية دخلت فلسطين والمفروض يعني إن هدفها هو إنهم يستعيدوا فلسطين إلا إن الوضع علي الأرض كان كالأتي .. يوم 30 يوليو 1948 عدد الفلسطينيين اللي أُجبروا إنهم يسيبوا بيوتهم ويهربوا وصل 400,000 .. في ديسمبر 1948 الرقم وصل 700,000 لاجيء .. لما ده حصل الجمعية العمومية للأمم المتحدة طلعت القرار رقم 194 واللي بيقول إن أي لاجيء فلسطيني عايز يرجع أرضه ويعيش في سلام مع جيرانه لازم يرجع في أسرع وقت ممكن .. في إبريل 1949 الأرقام كانت مرعبة .. دمار أكتر من 400 قرية و 11 مدينة فلسطينية .. أكتر من 700,000 لاجيء .. إستشهاد 13,000 فلسطيني وإصابة أكتر من 40,000 ..  الرقم ده كان في سنة 1949 .. لك أن تتخيل إن سنة 1946 يعني قبلها ب3 سنين بس كان عدد الفلسطينيين 1.2 مليون بني أدم قصاد 600,000 صهيوني .. في ظرف 3 سنين كانت كل حاجة إتغيرت .. أهل البلد أُجبروا إنهم يسيبوها ويعيشوا في مخيمات لاجئين في لبنان وسوريا وقطاع غزة والأردن.

فيه 3 حاجات لازم تبقي متؤكد منهم في قضية النكبة والحاجات دي اللي عشان خاطري خدهم كأساس للطريقة اللي إنت بعد كده حتبص بيها للقضية الفلسطينية لإن صدقني لو قلتلك إن الإعلام سواء الغربي أو بتاعنا بيستغل إن حضرتك مش عارف حاجة عن الفترة دي عشان يبيعلك أفكار تخليك تبيع القضية الفلسطينية وتقول زي ما قائد البوليس الإنجليزي قال لما إتقاله إن الصهاينة بيرتكبوا مذبحة في قرية دير ياسين .. وإحنا مالنا.

أول حاجة هي فكرة إن الفلسطينيين باعوا أرضهم:

ده محصلش .. تاني .. ده محصلش .. ولو كان حصل وإنت مقتنع اوي إنه حصل فممكن حضرتك تفهمني ايه المبرر اللي يخلي الصهاينة يرتكبوا اكثر من 70 مذبحة ضد الفلسطينيين؟ .. بلاش دي .. طب يا سيدي دي كانت وقت حرب والبشر بيطلعوا أوسخ ما فيهم في حاجتين .. الحروب والطلاق .. طب ممكن حضرتك تفسرلي ليه بعد توقيع إتفاقية الهدنة اللي أنهت حرب 1948 ليه المذابح فضلت مستمرة ضد الفلسطينيين؟ .. سنة 1950 يعني بعد سنة من توقيع إتفاق الهدنة الصهاينة دخلوا قرية أبوغوش وأجبروا أهلها ال105 إنهم يسيبوها ويروحوا علي الأردن .. قرية المجدل علي البحر المتوسط حصل فيها نفس الموقف وأهلها أُجبروا إنهم يطلعوا منها ويروحوا قطاع غزة .. علي فكرة قرية المجدل هي اللي إتبني عليها مدينة أشكلون الإسرائيلية دلوقتي وده الحقيقة اللي حيودينا للنقطة الثانية.

ثاني حاجة هي إن النكبة صدق أو لا تصدق حلت مشكلة الإسكان للصهاينة:

عشان تفهم النقطة دي خليني أسألك سؤال .. لو أنا جيت قلتلك إن من أول يوم 14 مايو 1948 وده اليوم اللي أُعلن فيه قيام دولة إسرائيل لحد يوم 30 ديسمبر 1951 يعني بتتكلم في ظرف 3 سنين عدد سكان إسرائيل نط بقي 1.3 مليون بني أدم .. ممكن حضرتك تقولي هي الناس دي قاعدة وعايشة فين؟ .. اللي هو إنت متجوز وهوبا إتقالك إن أهل مراتك جايين يقعدوا عندكوا يومين فالسؤال الأول اللي بيجي في دماغك هي الناس دي كلها حتنام فين؟

لو إنت مهاجر هربان من الهولوكوست وجيت فلسطين متخيل إنها أرض الميعاد والناس هناك بتوزع شيكولاتات وحاجة ساقعة ببلاش فإنت حتتصدم بإن بيتقالك معلش إحنا عاملين معسكر فيه خيام حضرتك إنت وأهلك حتناموا في الخيام دي لحد ما نشوفلكوا صرفة .. اللي كان بيحصل إن كل بيت فلسطيني أهله بيجبروا إنهم يسيبوه كانوا بيدوه لأسرة يهودية مهاجرة .. يعني مثلاً .. ضواحي يافا إتسكن فيها 45,000 مهاجر يهودي في بيوت كانت مملوكة للعرب .. الداون تاون بتاع يافا إتسكن فيه 40,000 مهاجر يهودي .. منطقة رام الله واللدة إتسكن فيها 8,000 مهاجر يهودي .. مدينة عكا إتسكن فيها 5,000 .. وشوف يا أخي رغم إني عارف إنك بيتحرق دمك دلوقتي من الأرقام اللي إنت بتسمعها فأحب أقولك إن حتي كل ده مكنش مكفي .. لو جيت تحسب هو فيه كام بيت فلسطيني إتاخد غصب وراح لأسر يهودية فإنت بتتكلم عن ما بين 140,000-160,000 بيت .. ده رقم كبير فشخ .. بس لو حطيته قصاد إن سنة 1949 لوحدها فيه 240,000 مهاجر يهودي جه إسرائيل فإنت حتكون قصاد وضع إن الصهاينة بقوا بيلعبوا الكراسي الموسيقية بالبيوت الفلسطينية .. اللي يلحق يلاقي بيت ياخده واللي مش حيلحق حيبات في الشارع .. زي أي لعبة في الدنيا ليها قواعد وقواعد اللعبة إن الصهيوني اللي يلاقي بيت فاضي ويلحق يحط حاجته فيه ويبات فيه ليلة يبقي البيت ده حلال عليه .. طبعاً مش محتاج أقولك إن معداش وقت كتير وكان الوضع فرقع في وش الحكومة الإسرائيلية.

في إبريل 1949 يعني يدوبك لسه حرب 1948 خلصانة تحصل ثورة المهاجرين .. بص هي مش ثورة بالشكل اللي جه في دماغك .. اللي حصل إن 300 مهاجر يهودي لموا بعضهم وإقتحموا مقر الكنيسيت اللي هو البرلمان الإسرائيلي في تل أبيب .. وقتها الكنيست كان معمول في مبني مهجور كان سينما زمان .. كذا أسبوع ورا بعض والمهاجرين اليهود بقوا يقتحموا مقرات الوزارات الإسرائيلية  .. الوضع كان مرشح إنه يقلب لكارثة لحد ما جت الست اللي أنقذت إسرائيل مرتين .. مرة في الوقت اللي إحنا بنحكي فيه القصة دي ومرة بعدها بسنين لما كانت هي رئيسة وزراء اسرائيل وقت حرب أكتوبر 1973 .. الست دي تبقي (جولدا مائير Golda Meir) .. بغض النظر عن ملامحها واللي ناس كتير كانت بتتريق عليها فالست دي كانت بتفهم .. هي مهاجرة يهودية جت من أوكرانيا زيها زي ناس كتير بس خلال الفترة من 1949 لحد 1956 كانت ماسكة منصب وزيرة العمل .. (جولدا مائير) إشتراكية زي ما الكتاب ما بيقول وبدأت تعمل برامج إسكان إجتماعي زي اللي أي حكومة إشتراكية بتعملها زي ما حصل عندنا هنا في مصر وقت (جمال عبدالناصر) .. بس زي أي مشروع إسكان في الدنيا بتقرر أي حكومة إنها تعمله بتلاقي نفسها قدام سؤال مهم أوي .. حنجيب الفلوس دي كلها منين؟ .. وده حيوديني للنقطة الثالثة.

ثالث حاجة هي إن الصهاينة سرقوا البيوت باللي فيها:

فكك من التبرعات .. ناس كتير بتقول وعندها حق إن اليهود الأغنياء اللي عايشين في أوروبا وأميركا كانوا بيبعتوا فلوس تبرعات كتير لإسرائيل بس كل ثروة أغنياء اليهود مكنش حتكفي مصاريف الدولة الإسرائيلية في أوائل أيامها وهنا بيجي دور الفلسطينيين اللي إتهجروا من أرضهم .. الناس دي هربت هي وعيالها ويدوبك باللي يقدروا يشيلوه بس الباقي سابوه في البيوت .. بيحكي المؤرخ (توم سيجيف Tom Segev) في كتابه 1949: The First Israelis إن الصهاينة سرقوا أي حاجة قدامهم كانت مملوكة للفلسطينيين .. يعني مثلاً .. في مدينة اللدة الإسرائيليين مسكوا 1,800 ونش وعربية نقل شايلين بضايع .. في مدينة يافا مثلاً البيوت الفلسطينية كانت مليانة خير لدرجة إن الإسرائيليين لما جم يحسبوا قد إيه فلوس هم سرقوها من البيوت دي فهم سرقوا بضايع وأكل وشرب وخير بما يعادل 37,000 دولار يومياً .. في مدينة حيفا مثلاً الإسرائيليين دخلوا البنوك وسرقوا الفلوس اللي كان الفلسطينيين شايلنها .. لك أن تتخيل إن بنوك مدينة حيفا لوحدها كان فيها 1.8 مليار دولار .. في مدينة رام الله فجأة كده بقي فيه 600 محل مهجورين بالبضاعة اللي فيهم.

أنا كده خلصت .. أنا مش عايز أطول في الختام غير إني أقول حسبي الله ونعم الوكيل .. أرجوك حاول متصدقش اللي بيتقالك بإن الفلسطينيين بأعوا أرضهم .. القضية الفلسطينية دي بتاعتك إنت كمان.

المصادر:

• مقالة بعنوان Israel’s borders explained in maps نشرت في موقع هيئة الإذاعة البريطانية BBC وده لينك المقالة الأصلية:
  https://www.bbc.com/news/world-middle-east-54116567
• مقالة بعنوان Nakba: Why the Zionists expelled Palestine’s Arab population نشرت في موقع Middle East Eye وده لينك المقالة الأصلية:
  https://www.middleeasteye.net/opinion/nakba-why-zionists-expelled-palestines-arab-population
•  فيديو بعنوان Al-Nakba: The Palestinian catastrophe – Episode 1 نشر علي YouTube وده لينك الفيديو:
  https://www.youtube.com/watch?v=H7FML0wzJ6A&t=3s
• فيديو بعنوان Al-Nakba: The Palestinian catastrophe – Episode 2 نشر علي YouTube وده لينك الفيديو:
  https://www.youtube.com/watch?v=yI2D5Fsd9lg&t=625s
•  فيديو بعنوان Al-Nakba: The Palestinian catastrophe – Episode 3 نشر علي YouTube وده لينك الفيديو:
  https://www.youtube.com/watch?v=5SKECszemmA&t=217s
• فيديو بعنوان Al-Nakba: The Palestinian catastrophe – Episode 4 نشر علي YouTube وده لينك الفيديو:
  https://www.youtube.com/watch?v=0m__A7MlDrk