أنا عايزك تحاول تستوعب معلومة إن لحد سنة 1822 مكنش حد عارف يقرأ ويفهم أي كلمة مكتوبة علي حيطان أي معبد من المعابد الفرعونية في مصر .. اه إحنا بنبص للأثار دي ونبلم بس لا إحنا فاهمين هي اسمها إيه ولا بتعمل إيه ولا مين اللي عملها .. بالنسبة لينا اللغة الهيرولغيفية كان زيها زي اللغة الصينية بالنسبة ليك .. إنت ممكن تبصلها علي يافطة مطعم صيني وتبقي فاهم إن دي صيني بس إنت مش فاهم إيه معني الكلام ده .. سنين علي الحال ده .. من أول ما الفتح الإسلامي لمصر جه مروراً بالعصر الذهبي للإسلام ولحد ما الحملة الفرنسية علي مصر وصلت وإحنا لا عارفين نقرأ ولا نفهم الكلام اللي علي الأثار بتاعتنا لحد ما الفرنساويين لقوا حجر رشيد .. حتة صخر مكتوب عليها فرمان ملكي ب3 لغات هو اللي خلانا نبقي عارفين تاريخنا وفاهمينه وعشان كده مش ببالغ لو قلت إن إكتشاف حجر رشيد والأهم فك شفرة اللغة الهيروغليفية هو بلا منازع أهم إكتشاف تاريخي في تاريخ البني أدمين وعشان كده النهاردة جايين نتكلم عن ده بإننا نحاول نجاوب علي 3 أسئلة:
- إيه هو حجر رشيد أصلاً وعبارة عن إيه؟
- إزاي إكتشفناه؟ وإزاي إنتقل من رشيد للعاصمة البريطانية لندن؟
- إزاي فكينا شفرته؟ وهل الموضوع كان سهل؟
حجر رشيد .. النسخة الفرعوني من قرار أجازة العيد اللي بيطلع من الحكومة:
سنة 196 قبل الميلاد بيقعد علي كرسي الحكم في مصر (بطليموس الخامس) خامس حكام أسرة البطالمة اللي هم أساساً يعني مش مصريين .. شوف .. أكيد عدي عليك قبل كده اسم (الإسكندر الأكبر) .. الرجل ده أساساً من مقدونيا اللي هي شمال اليونان دلوقتي والرجل ده جيوشه قدرت تغزو العالم تقريباً ومن ضمن الدول اللي بقت تحت إيده كانت مصر .. لما (الإسكندر الأكبر) مات وهو بيحاول يحتل الهند سألوه وهو بيموت يا تري عايز مين يمسك وراك الإمبراطورية دي فكان رده وهو بيموت الأقوي فيكوا .. الكلمتين دول كانوا بداية حرب أهلية بين جنرالات (الإسكندر) إنتهت بإن كل واحد فيهم خد حتة بقت بتاعته بحيث مصر كانت من نصيب دراعه اليمين (بطليموس) .. الرجل ده بحكم إنه مش مصري فهو عشان يخلي المصريين يقبلوا يخلوه يحكمهم بقي بيشوف هم بيعملوا إيه ويعمل زيهم .. يلبسوا إيه ويلبس زيهم .. يعبدوا إيه ويعبد زيهم .. وأحفاده كملوا علي نفس السكة .. لما (بطليموس الخامس) جه قعد علي الكرسي وفي محاولة منه إنه يكرمش خمسين جنيه للمؤسسة الدينية في مصر عشان يضمن ولاءها ليه طلع فرمان سماه إعلان ممفيس Memphis Decree بيقول إن الكهنة المصريين من هنا ورايح مش مُطالبين إنهم يدفعوا ضرائب للحكومة ولا مُطالبين إنهم يعلنوا ولاءهم للفرعون شخصياً .. أنا شخصياً شايفها تنازلات ملهاش مبرر بس أكيد (بطليموس الخامس) كان شايفها إنه بيقدم السبت عشان يستني الاحد .. وجهات نظر مش حنختلف.
إعلان ممفيس ده كان حيتكتب علي لوح من الجرانيت ويتوزع علي كل معابد مصر بحيث حيتكتب ب3 لغات:
- أول لغة من فوق هي اللغة اليونانية بإعتبارها اللغة الرسمية للحكومة علي أساس إن البطالمة أصلهم يوناني مش مصريين ومبيتكلموش غير يوناني.
- ثاني لغة في النص هي اللغة الهيروغليفية ودي تبقي اللغة القديمة في مصر اللي محدش في البلد لسه بيتكلم بيها غير كهنة المعابد.
- ثالث لغة هي اللغة الديموطيقية ودي تبقي اللغة العامية بتاعة الناس العادية في الشارع اللي لا بيتكلموا هيروغليفي ولا يوناني.
رغم إن فعلياً حجر رشيد مش كامل وفيه حتت ناقصة منه إلا إن فك شفرته خلانا لأول مرة نفهم هو إيه اللي حصل في تاريخ الحضارة المصرية القديمة.
الحملة الفرنسية .. زي ما قال رؤوف خليف .. شنوهذااااااااع:
يوم 15 يوليو 1799 كان يوم عادي في حياة المصريين بس كان يوم مليان توتر بالنسبة لعساكر الحملة الفرنسية في مصر .. من حوالي سنة العساكر الفرنساويين نزلوا علي ساحل الإسكندرية وهم علي رأي (ويجز) محشيين طاقة وعندهم أمل إن مصر تبقي بوابة فرنسا إنها توصل للهند وتعكنن علي الإنجليز عيشتهم .. جري الشريط سنة وكان العساكر الفرنساويين في مصر إتحبسوا بعد ما أسطولهم غرق في أبوقير وبقوا مستنيين القوات الإنجليزية العثمانية المشتركة اللي حتنزل علي ساحل مصر ومحدش عارف فين عشان تخلص علي الوجود الفرنساوي في البلد .. من ضمن الإستعدادات اللي كان بيعملها العساكر الفرنساويين هي تحسين الدفاعات علي طول ساحل مصر علي البحر المتوسط ومن ضمن الدفاعات دي كانت حصن جوليان في مدينة رشيد اللي الفرنساويين كانوا مسميينها الوردة أو روزيتا بالفرنساوي .. اللي كان المسئول عن تحسين دفاعات الحصن مهندس عسكري فرنساوي اسمه (بيير فرانسوا بوشارد Pierre-Francois Bouchard) اللي فجأة سمع صوت العساكر وهم بينادوا عليه يجي بسرعة يبص علي حاجة .. وزي ما إحنا عارفين في الشغلانة بتاعتنا دي لما حد يجي عليك يقولك يا باشمهندس يا باشمهندس تعرف إن فيه مصيبة علي طول.
(نابليون بونابرت) لما جه مصر مجاش ومعاه عساكر بس .. هو جه ومعاه أسطول كامل من العلماء في كل التخصصات .. هو كان جاي مصر عشان يقعد فيها وده معناه إنه لازم يفهم مصر كويس .. يفهم مجتمعها .. يفهم طبيعتها المناخية .. يفهم الحيوانات والنباتات اللي عايشة فيها .. والأهم يفهم تاريخها .. عشان كده كانت التعليمات اللي بتوصل لأي عسكري فرنساوي لما تشوف حاجة إنت مش فاهمها إرفع إيدك وروح للقائد بتاعك وهو حيتصرف .. العساكر شافوا حجر رشيد وحاجة جواهم قالتلهم إن البتاعة دي مهمة .. لما (بيير فرانسوا بوشارد) شاف حجر رشيد من أول نظرة هو ميز إن مكتوب عليه ب3 لغات مختلفة .. صحيح هو مش فاهم أي لغة فيهم بس مش مهم .. المهم إن الحجر ده بيتحط تحت مظلة الإكتشافات الأثرية اللي بتتشال زي ما هي كده وبتروح لمقر علماء الحملة الفرنسية في مصر في القاهرة اللي بقي المجمع العلمي اللي في عابدين دلوقتي .. (بيير فرانسوا بوشارد) بنفسه ومعاه شوية عساكر نقلوا الحجر من رشيد للقاهرة عشان يتحط قدام علماء الحملة الفرنسية وعشان كمان (نابليون بونابرت) يشوفه قبل ليلة هروبه بره مصر بعد ما شبه إقتنع إن الحملة بتاعته فشلت ومعاه أهم سؤال إتسأل .. هو بالصلاة علي النبي حنعمل إيه بالبتاع ده؟
مبدأياً كده إحنا مش حنعرف ننقله بره مصر لإن زي ما قلت من شوية العساكر الفرنساويين محبوسين في مصر بعد إغراق أسطولهم .. طب دلوقتي لو مش عارفين ننقل الحجر كله لفرنسا فعلي الأقل ننقل الكتابات اللي عليه علي ورق و نبعته لفرنسا .. قالك جميل .. دلوقتي إحنا عارفين نقراً الجزء اليوناني من الحجر بس لا عارفين نقراً الجزء الهيروغليفي ولا الديموطيقي و محاولات كتابتهم علي ورق أثبتت فشلها .. جه حد إقترح طب ما نشفه .. ليه لا نكب دهان علي الحجر و نجيب ورقة كبيرة شوية نكبسها عليه و بعد كده نشيلها و الدهان لما ينشف حنلاقي الكلام باين علي الورقة .. الفكرة نجحت ونسخ من الكلام اللي علي الحجر إتنقلت لفرنسا بالبريد في الوقت اللي العساكر الفرنساويين قاعدين في مصر مستنيين يعرفوا مصيرهم اللي إتحدد سنة 1801 بالتوقيع علي إتفاقية استسلام الحملة الفرنسية علي مصر بقيادة الجنرال (فرانسوا مينو Francois Menou) للقوات البريطانية واللي كان من ضمن شروطها إن أي أثار لقتها الحملة الفرنسية في مصر حيتم إعتبارها غنيمة حرب وملكية خاصة للملك (جورج الثالث George III) ملك بريطانيا وخصوصاً حجر رشيد اللي الإنجليز كانوا فرحانين بنفسهم أوي إنهم لقوه فالعساكر دهنوا عليه من الجنب جملة إن الحجر ده لقاه العساكر الإنجليز في مصر سنة 1801 .. سنة 1802 لما الحجر وصل لندن الملك (جورج الثالث) قدمه كهدية للمتحف البريطاني وبنفس الدهان كتب علي الجنب الثاني من الحجر إنه هدية من الملك (جورج الثالث).
فك الشفرة .. (شامبليون) و جنون (عصام الشوالي):
المنطق المفروض إنه سهل .. لنفترض إن حجر رشيد ده كان مكتوب عليه 3 لغات اللي هم العربية والصينية والإنجليزية .. المفروض إنك عارف تقرأ العربي والإنجليزي بس ده مش معناه إن كل كلمة عربي مكتوبة علي الحجر حتقابلها نفس الكلمة بنفس المعني في اللغة الصينية .. الموضوع أصعب سيكا من كده لإن أي حد كان بيبدأ يشتغل علي فك طلاسم حجر رشيد بما فيهم العلماء العرب وقت العصر الذهبي للإسلام كان بيبدأ غلط لإنه كان بيعتمد علي معلومة متفهمش جابوها منين وهي إن اللغة الهيروغليفية بتتصنف علي إنها من اللغات Ideographic اللي ترجمتها هي الرسم الفكري بمعني إن اللغة هي عبارة عن سلسلة من الصور وكل صورة ليها معني وده كان مش صح أوي .. اللغة الهيروغليفية الصور اللي فيها صحيح أحيانا بيكون ليها معني كلمة بس أحيانا برده بتكون Phonetic يعني الصورة بتتنطق زي بالضبط لما أكتبلك بالعربي كلمة ااااااه فإنت لما بتيجي تقراها بتمد الألف شوية .. فين وفين سنة 1814 يعني بعد 15 سنة من إكتشاف حجر رشيد البشر بيحققوا أهم خطوة في رحلة فك طلاسم حجر رشيد لما عالم رياضيات إنجليزي اسمه (توماس يونج Thomas Young) كان شغال بالطريقة القديمة وهي إنه ماسك الكلام اللي مكتوب باللغة الديموطيقية بيحاول يفهمه كلمة كلمة لحد ما في يوم كان بيتغدي مع عالم لغويات واللي قاله فكرة خلت لمبة في دماغ (توماس يونج) تنور.
دلوقتي إنت لو بتكتب اسمك بالإنجليزي حتكتبه إزاي؟ .. شطور حتكتبه زي ما بتنطقه اللي هو بمعني أخر Phonetically يعني أنا مثلا حكتبه Ahmed Fouad .. ومش بس كده .. أنا لازم أميز اسمي عن باقي الكلام اللي مكتوب فزي ما بنعمل دلوقتي إننا بنحط اسامي البني أدمين بين قوسين .. فلو إنت رجل عايز تفك طلاسم اللغة الإنجليزية فإنت كل اللي مطلوب منك تدور بعنيك وسط الكلام علي الحروف المكتوبة بين قوسين زي كده (Ahmed Fouad) و حتبقي عارف إن أحمد هي هي Ahmed فدي تبقي أول الخط .. في اللغة الهيروغليفية اسامي الناس مش بتتحط بين قوسين إنما بتتحط في دايرة بتتسمي خرطوشة Cartouche وده خلاه يحقق أول إكتشاف بخصوص حجر رشيد إنه إتكتب في عهد الدولة البطلمية عشان لقي اسم (بطليموس الخامس) .. غير كده مفيش .. (توماس يونج) بحكم إنه أولاً و أخيراً بتاع حساب مش بتاع لغويات فده كان أخره وهنا حيجي دور اللي حيجيب لغز حجر رشيد في شوال .. (جين فرانسوا شامبليون Jean-Francois Champollion).
فيه كذا ميزة في (شامبليون) مكانوش في (توماس يونج) .. بسم الله الرحمن الرحيم كده هو كان بيعرف يتكلم اللغة الديموطيقية اللي بعد كده بقي اسمها اللغة القبطية وسبب ده إن سنة 1806 وقت ما (شامبليون) كان عنده 16 سنة فهو كتب رسالة بحثية Paper قدمها في أكاديمية جرينوبل Academei de Grenoble ودي موجودة في شرق فرنسا إن اللغة الديموطيقية اللي كانت اللغة بتاعة الناس العادية اللي عايشة في مصر وقت حكم البطالمة ما هي إلا النطق العامي للغة الهيروغليفية .. بمعني أخر .. زي ما اللغة الإيطالية اللي إنت بتتعلمها النهاردة ما هي إلا اللهجة العامية للغة اللاتينية فبرده اللغة القبطية هي النطق العامي للغة الهيروغليفية .. ثاني حاجة إن (شامبليون) كان حريقة لغات .. أبوه كان تاجر كتب بس كان خمورجي فاللي كان بيصرف عليه كان أخوه الكبير (جاك جوسيف Jacques-Joseph) اللي مكنش عنده مشكلة إنه يصرف علي أخوه يتعلم يوناني ولاتيني وقبطي وصيني وحتي اللغة الأمهرية اللي كانوا بيتكلموا بيها في الحبشة اللي هي أثيوبيا دلوقتي .. تالت حاجة إنه يمكن كان الوحيد اللي شايف حاجة كل الناس مش شايفاها إن اللغة الهيروغليفية Phonetic مش Ideographic يعني زيها زي اللغة العربية مثلاً كل حرف فيها بيتنطق بطريقة .. تالت حاجة ودي يمكن أهم نقطة إن حجر رشيد مكنش المرجع الوحيد اللي (شامبليون) شغال عليه .. ودي نقطة محتاجة تتشرح.
من أول الحملة الفرنسية وإنت طالع وثروات وتاريخ مصر بيتنهب كل يوم وبيتهرب علي جامعات ومتاحف الغرب .. يعني مثلاً .. سنة 1815 كان فيه رجل بريطاني معاه فلوس اسمه (وليام جون بانكس William John Bankes) جه يزور مصر ومن ضمن الحاجات اللي عجبته جداً كانت مسلة مكتوب عليها باللغتين الهيروغليفية واليونانية فهو حقاً وصدقاً ومش ببالغ كان شايف إن المسلة دي حيبقي شكلها حلو أوي في جنينة القصر بتاعه قام مأجر واحد طلياني اسمه (جيوفاني بيلزوني Giovanni Blezoni) شغال في السيرك عشان يلاقي طريقة يوصل بيها المسلة من القاهرة للندن وده يوريك أهم درس تتعلمه عن الأغنياء إنهم كائنات لا تطاق مهما كانت البلد أو الحقبة الزمنية اللي هم عايشين فيها .. المهم إن (وليام جون بانكس) بعت ورقة عليها نسخة من الكتابات الموجوة علي المسلة اللي هو سرقها ل(شامبليون) عشان قال يعني يساعده وبمجرد ما (شامبليون) شافها بلم .. في خرطوشة لقي جواها اسم الملكة (كليوباترا السابعة).
(شامبليون) من بعد ما (توماس يونج) إكتشف حكاية اسامي الملوك في خراطيش دي و هو بقي بيعمل لنفسه قاموس باسامي كل الملوك اللي محطوطين في خرطوشة باللغة الهيروغليفية بس مش عارف اساميهم .. لما وقعت في إيده الورقة بتاعة الكلام اللي علي المسلة و قارن اسم (كليوباترا) بالقاموس اللي هو عامله لقاها نفس الاسم و ده كان المفتاح .. حاكم حكام يبدأ يدور ورا اسمه حرف حرف و ده أثبتله إن فعلاً اللغة الهيروغليفية هي ميكس بين إنها لغة Phonetic و في نفس الوقت لغة Ideographic عشان سنة 1822 (شامبليون) زي ما هو كان عايز يجيب شفرة حجر رشيد في شوال .. يقال إنه لما إكتشف إنه فك الشفرة فعلاً راح جري علي مكتب أخوه عشان يصرخ في وشه أنا لقيتها أنا لقيتها و فجاة وقع من طوله مغمي عليه .. بعد كده (شامبليون) بدأ يشتغل علي إنه يحط الأبجدية الهيروغليفية إنه يحطلك كل حرف بيتكب إزاي و بيتنطق إزاي .. بمجرد ما الخطوة دي تمت علماء تانيين جم وراه كان سهل عليهم إنهم يترجموا النص الهيروغليفي كامل اللي علي حجر رشيد.
المصادر:
- فيديو بعنوان A Race to Ancient Secrets-Extra History و ده لينك الفيديو علي YouTube:
https://www.youtube.com/watch?v=orU-w2TXsBU - مقالة بعنوان How the Rosetta Stone unlocked the secrets of ancient civilizations نشرت في مجلة National Geographic و ده لينك المقالة الأصلية:
https://www.nationalgeographic.com/history/article/how-the-rosetta-stone-unlocked-the-secrets-of-ancient-civilizations - مقالة بعنوان Hieroglyphics were a mystery until this man solved the riddle of the Rosetta Stone نشرت في مجلة National Geographic وده لينك المقالة الأصلية:
https://www.nationalgeographic.com/history/history-magazine/article/hieroglyphics-were-a-mystery-until-he-solved-the-rosetta-stone
