إنت كمواطن غلبان مسحول في حياتك اليومية مش مطلوب منك إنك تبقي عارف الفرق بين إمكانيات الطيارة الرافال الفرنساوي و بين الطيارة F-16 Fighting Falcon الأمريكاني .. أو الفرق بين الدبابة M1A1 Abrams الأمرياني و T-90 الروسي .. ده طبيعي ومنطقي ومفهوم .. حضرتك بتبقي قاعد في شغلك في أمان الله بتسمع صوت طيارة معدية فوق دماغك فبتبقي عارف إن دي طيارة حربية .. طرازها إيه؟ مش قضيتك .. بتكون سايق أو راكب ميكروباص علي طريق سريع بتشوف طابور دبابات قدامك فبتبقي عارف إن دي دبابة بس موديل إيه ميخصكش .. بس الحد الأدني ده من المعلومات العامة عن التسليح مش بتلاقيه عند ناس كتير فيما يخص القطع البحرية .. يمكن أنا أظن إني لو مشيت في الشارع سألت الناس البسيطة هم يعرفوا إيه عن القطع البحرية فمش حلاقي الناس عارفه غير حاملة الطائرات و الغواصة لكن أي حاجة تانية بينهم محدش بيعرف يفرق بينهم .. محدش عارف أو فاهم الفرق بين المدمرة والبارجة والفرقاطة .. بنسمع أساميهم بس مش فاهمين الفرق بينهم وده اللي إحنا النهاردة عايزين نتكلم عنه .. تطلع إيه القطع البحرية دي؟ .. الموضوع ده في رأيي مهم لإن خلال السنين اللي فاتت أخيراً المؤسسة العسكرية المصرية بقت شايفة إن القوات البحرية تستحق يتبصلها بشكل أحسن من كده وبقي يتحط ليها ميزانية عشان تسد الفجوة الرهيبة اللي بينها وبين مش بس القوات البحرية الإسرائيلية مثلاً إنما حتي الفراغ الكبير أوي في الإمكانيات بين القوات البحرية المصرية وباقي الأفرع الرئيسية للقوات المسلحة بإن مصر بقت تتعاقد علي شراء فرقطات وحاملتي طائرات الميسترال ومن غير ما أطول أكتر من كده خلينا نخش مع بعص علي طول في الإجابة عن سؤال يا تري يا هل تري ما هي القطع البحرية اللي بتخدم مش بس في القوات البحرية المصرية إنما في العالم كله؟
حاملات الطائرات .. أهلا بيك في فرح العمدة:
دي السوبرستار .. نجم الشباك .. الناس كلها عارفاها ومحدش مشافهاش قبل كده في الأفلام أو نشرات الأخبار .. فيه منها نوعين يا إما بتشتغل بموتور ديزل زي اللي بتشوفه في أي ترلة ماشية في الشارع وده اللي ماشية بيه حاملة الطائرات الميسترال أو بتكون ماشية بمفاعل نووي زي كل حاملات الطائرات اللي في القوات البحرية الأميريكية .. المنطق وراء حاملة الطائرات Aircraft Carrier إن يبقي عندك مطار حربي عايم علي وش المياه وده معناه إن حاملة الطائرات عبارة عن سفينة شايلة الطيارات بالطيارين بالذخيرة بالبنزين بتاع الطيارات بقطع الغيار بالفنيين والمهندسين اللي بيصلحوا الطيارات بأكلهم وشربهم ولبسهم وسلاطاتهم وباباغنوجهم .. بمعني أخر إنت بتتكلم عن سفينة تقدر تشيل طاقم ما بين 4000-5000 بني أدم .. حاملة الطائرات بتاعة اليومين دول اللي إنت بتشوفها في القوات البحرية الأميريكية مثلاً بتقدر تنفذ 150 طلعة جوية في وقت واحد وليها القدرة علي إنها تضرب 700 هدف في وقت واحد .. دي أرقام قوات جوية كاملة لدول متقدرش تعملها .. في نفس الوقت بتتكلم عن سفينة مش بس بتشتغل كمطار إنما بتشتغل كقاعدة عسكرية متكاملة بتقدر تنفذ كل أنواع العمليات العسكرية اللي تتخيلها ومتتخيلهاش .. من الحرب الأليكترونية للبحث والإنقاذ والدفاع الجوي.
بس عشان حاملة الطائرات تشتغل هي مش بتمشي لوحدها .. إنت في الأفلام بتلاقيهم مصورين الحاملة ماشية لوحدها في البحر بس ده مش الحقيقة .. الحقيقة إن حاملة الطائرات عاملة زي لما تكون متجوز و مخلف و قررت تطلع رحلة تصيف في مطروح .. أكيد مش حتطلع لوحدك .. حتطلع معاك مراتك والأولاد وأكلكوا وشربكوا وهدومكوا ولعب الأولاد والبامبرز والأدوية وليلة كبيرة أوي سعادتك بتخلي مصاريف المصيف كابوس في دماغ أي رجل فاتح بيت .. الشلة اللي بتمشي مع حاملة الطائرات بتتسمي مجموعة قتال Strike Group واللي أنا شخصياً بحب أسميه فرح العمدة .. الفرح ده بيتكون من العمدة اللي هو حاملة الطائرات اللي شايلة 65-70 طيارة مقاتلة ومعاها بالميت خالص شوية سفن حنتكلم عنهم بالتفصيل كمان شوية بس هم بيكونوا علي الأقل واحدة من نوع من القطع البحرية بيسموها Cruiser أو طراد وسبب إنك في مصر مسمعتش عن النوع ده من القطع البحرية هو إن مصر معندهاش منها .. فرح العمدة بيكون فيه علي الأقل مدمرتين أو فرقاطتين .. وفوق ده كله بيكون فيه غواصات وسفن إمداد شايلة أكل وشرب وتسليح وذخيرة وقطع غيار.
الطرادات .. العو جه العو حضر:
في مراحل الإستعمار أيام ما كانت بريطانيا وفرنسا بيلعبوا مع بعض بنك الحظ بس بحق وحقيقي علي مين يحط إيده علي مصير دول أكتر في العالم كانت الطرادات أو Cruisers هي النسخة الفشيخة من حاملات الطائرات .. السفن دي كانت بتمشي في البحر تقول يا مياه إتهدي ما عليكي قدي .. سنة 1906 قائد القوات البحرية البريطانية الأدميرال سير (جون فيشر John Fisher) جاب صدمة نفسية لكل الأساطيل بتاعة الدول الأوروبية الإستعمارية لما بريطانيا بقي عندها السفينة الفشيخة دريدنوت HMS Dreadnought أول Cruiser تخش الخدمة واللي بمجرد ما بدأت تمشي في المياه بدأ معاه سباق تسلح بين القوي الإستعمارية في أوروبا يمكن كان هو واحد من أسباب إن الحرب العالمية الأولي قامت بس هي الفكرة في نقطة .. فكرة HMS Dreadnought إن (جون فيشر) كل اللي عمله في عيشته إنه جاب أجدعها سفينة حربية في الخدمة واللي كانت بتتصنف وقتها علي إنها بارجة Battleship قام مزود شوية في المدافع بتاعتها وحطلها شوية دروع إضافية بس ده خلاه يضحي شوية بالسرعة اللي تقدر السفينة دي تمشي بيها .. الناس بصت للسفينة الجديدة وهرشوا في شعرهم .. هي سفينة شبة Battleship .. تسليحها هو هو Battleship .. يبقي تتسمي Battlecruiser .. ده خلق مشكلة محدش عمل حسابه عليها هي إنك جبت سلاح جديد بتصميم جديد بس عشان هو شكله شبه القديم فتخيلت إنه مينفعش غير إنه يعمل نفس الحاجة اللي القديم كان بيعملها .. مش فاهم صح؟
(جون فيشر) كان فاهم اللي فيها .. هو كان عارف إن المركب الجديدة صحيح هي شبه Iron Man بس هي بطيئة .. ده معناه إنه محتاج يعمل نسخة تانية منها هو كان بيسمها Light Cruiser بحيث لو السفينة دي المدافع بتاعتها مش حتقدر تدمر الهدف يبقي يتركبلها موتور يخليها تجري بسرعة قبل ما حد يضربها .. طبعاً محدش سمع كلامه .. سنة 1916 خلال الحرب العالمية الأولي قامت معركة اتسمت معركة جوتلاند Battle of Jutland غرقت فيها 3 قطع بحرية من اللي وقتها زي ما قلتلك اتسموا Battlecruiser وفي الحرب العالمية الثانية غرقت أخر Battlecruiser تحت إيد سلاح البحرية البريطاني بعد ما إتضربت ب5 دانات بس من البارجة الألمانية القديمة بسمارك.
خلال الفترة من نهاية الحرب العالمية الأولي سنة 1918 لحد بداية الحرب العالمية الثانية سنة 1939 واللي الناس بتوع التاريخ بيحبوا يسموها مرحلة ما بين الحربين إتمضت معاهدتين الأولي بيسموها معاهدة القوي الخمسة Five Power Treaty إتمضت سنة 1922 والثانية اسمها معاهدة لندن البحرية London Naval Treaty إتضمت سنة 1930 قالوا إن الدول المنتصرة في الحرب العالمية الأولي حطوا سوا بينهم وبين بعض شوية قواعد بتحكم بناء Cruisers دي بناء علي فكرة إن زي ما قلتلك وقتها كان بيتبصلها علي إنها أكبر قطعة بحرية في أي أسطول فهم إتفقوا علي إن Cruisers دول حيتقسموا نصين:
- النص الأولاني هو ما يسمي الطرادات الخفيفة Light Cruisers ودي حتبقي سفينة متركب عليها مدافع مضادة للطيارات ومعاهم 12-15 مدفع عيار 6 بوصة اللي هم 150 مليمتر اللي هو علي سبيل التقريب نفس عيار مدافع الدبابات الإبرامز اللي بتخدم حالياً في سلاح المدرعات المصري يعني بتتكلم عن سفينة زي ما تقول كده مترصص علي سطحها 6 دبابات.
- النص الثاني هو ما يسمي الطرادات التقيلة Heavy Cruisers ودي برده حيبقي عليها مدافع مضادة للطيارات بس عليها 8-10 مدفع عيار 8 بوصة اللي هم 200 مليمتر فإنت لك أن تتخيل القدرة التدميرية لواحدة من دول حتبقي عاملة إزاي.
سواء النوع الخفيف أو التقيل إنت بناء علي معاهدة فرساي قصاد سفينة مينفعش بأي حال من الأحوال إن إزاحتها تزيد عن 10,000 طن .. يعني إيه إزاحتها دي؟ .. حاول تتخيل إن عندك بانيو في حمام بيتكوا وإنت مليته علي أخره وجيت حضرتك تنزل في البانيو .. إيه اللي حيحصل؟ .. حتلاقي منسوب المياه علي بحيث المياه نزلت بره البانيو علي أرض الحمام .. ليه ده حصل؟ .. عشان زي ما الأخ (أرشميدس) قال لما معاليك نزلت في البانيو فإنت شغلت حيز من الفراغ كان واخده شوية المياه اللي نزلوا علي أرض الحمام .. لو جيت جمعت شوية المياه اللي طلعوا بره البانيو ده وزنتهم حزر فزر حيطلعوا كام كيلوجرام؟ .. شطور حيطلعوا نفس وزنك .. فلما أجي أقولك إن سفينة إزاحتها 10,000 طن فده مقياس بيعبر عن وزنها فكل ما رقم الإزاحة ده كبر كل ما كان معناه إنك بتتكلم عن قطعة بحرية أكبر .. خلال الحرب العالمية الثانية كانت كل Cruiser بتمشي لوحدها في المياه بحيث أقصي سرعة ليها وقتها كانت 30 عقدة اللي هم 55 كيلومتر في الساعة .. بس ده كان زمان .. دلوقتي الوضع إتغير حبتين.
كلمة Cruiser دلوقتي مش معناها مركب عليها مدافع .. دلوقتي معناها مركب مترصص عليها صواريخ موجهة حجمها بيتراوح ما بين 7,000-10,000 طن وزي ما إنت شايف دي قطع بحرية مش أي حد يقدر يعملها وعشان كده قلتلك إن مصر مثلاً معندهاش النوع ده من السفن .. الأمريكان بيعتبروا Cruisers دول هم كلب البولدوج بتاع حراسة حاملة الطائرات وهي ماشية في Strike Group .. الروس مثلاً عشان معندهمش غير حاملة طائرات يتيمة مش شغالة فبالنسبة ليهم Cruiser هي أكبر قطعة بحرية عندهم.
المدمرات .. تسمع عن (محمد علي كلاي) الله يرحمه؟
في وقت ما الإستعمار طايح في العالم والخناقة بين القوي الإستعمارية الأوروبية بتحصل في كل حتة وكل دولة فرحانة بنفسها مع كل Cruiser تبنيها وتضيفها لأسطولها كان فيه مهندس إنجليزي اسمه (روبيرت وايتهيد Robert Whitehead) سنة 1866 كان شغال علي إفتكاسة حتضرب كرسي في الكلوب في كل المولد ده والإفتكاسة دي كانت الطوربيد Torpedo .. الفكرة إن Cruiser اللي ماشية في المياه بتضرب نار علي Cruiser زيها فعشان إنت كمهندس بحري تحمي Cruiser بتاعتك كل اللي عليك تعمله إنك تزود من طبقات الدروع الحديدية اللي بتحمي جسم السفينة من فوق لإن ده اللي السفن المعادية بتضربه .. اللي عمله (روبيرت وايتهيد) إنه جاب عبوة ناسفة ركبها علي صاروخ بيمشي تحت المياه تقدر تضربه من أي قارب صغيرة بحيث الصاروخ ده بيفرقع في Cruiser من الجزء المغمور تحت المياه اللي محدش من الجهابزة مهندسي السفن فكر إنه يحميه بحتة صاجة حتي .. ده معناه إن زي ما قلت قارب صغير متركب عليه طوربيد يقدر يغرق Cruiser متكلفة الشيء الفلاني ومنطقي يعني إنك مش حتسحب كل Cruisers بتاعتك اللي في الخدمة للموانيء عشان تزود ليها طبقة دروع في الجزء المغمور تحت المياه لإن دي أولاً تكلفة علي الفاضي وثانياً الله أعلم إيه اللي ممكن يحصل ليها بعد ما تنزلها المياه تاني لإن الدروع دي محدش عمل حسابه عليها لما السفن دي إتصممت وإتصنعت .. طب والحل؟
من هنا ظهر نوع جديد من القطع البحرية هدفها تدمير اللانشات أو القوارب اللي شايلة طوربيدات بحيث الاسم اللي إتعطي للنوع ده من القطع البحرية هو Torpedo Boat Destroyer .. مبدعين أوي في الأسامي ما شاء الله .. ده معناه إن بقي عندك نوع جديد من القطع البحرية هو أصغر بكتير من Cruisers بس في نفس الوقت أكبر بكتير من قوارب الطوربيد ويمكن أول قطعة بالحرية بالوصف ده تخش الخدمة كانت مدمرة قوارب الطوربيدات الإسبانية Destructor اللي دخلت الخدمة سنة 1887 .. بمعني أخر .. إنت بقي معاك كلب جيرمان شيبارد شغلته إنه يحمي Cruisers طول ما هي ماشية في المياه بحيث دلوقتي الوضع إتغير بحيث Cruisers مبقتش تمشي لوحدها في المياه وبقت محتاجة يبقي حوليها شوية Torpedo Boat Destroyers .. شوية وبدأت الغواصات تظهر وبقي دور Torpedo Boat Destroyers مش بس إنها تحمي Cruiser من قوارب الطوربيدات إنما لازم تحميها من الغواصات كمان فبقت مش بس تشيل طوربيدات إنما بقت تشيل قنابل أعماق Depth Charges .. بقي يتركب عليها رادار وسونار .. شوية والطيارات بقت بتشكل تهديد لCruisers فطبيعي إن كلب الجيرمان شيبارد اللي بيحميها يتركبله كمان مدافع مضادة للطيارات .. مع كل إضافة جديدة بتتحط إتغير اسم Torpedo Boat Destroyers وبقي مجرد Destroyer أو مدمرة وده الاسم اللي لزق فيها ولسه مكمل لحد دلوقتي.
بداية من بعد الحرب العالمية الثانية وكل شوية المدمرة تكبر .. شيلنا المدافع اللي بتتحط ليها وحطينا بدالها صواريخ كروز Cruise .. شوية و قلنا لا إحنا محتاجين نزود شوية كمان من عدد الصواريخ اللي المدمرة بتشيلهم .. بعد كده قلنا لا إحنا محتاجين نركب للمدمرات مواتير أقوي عشان تخليها تقدر تمشي في المياه بسرعات قريبة من سرعة Cruisers اللي هو حاجة قريبة من 30 عقدة بحرية أو 55.5 كيلومتر في الساعة .. الوضع دلوقتي إن الدول اللي عندها Cruisers بقت بتفكر جدياً تطلعها بره الخدمة وتعتمد إعتماد كلي علي المدمرات لإن الفروقات بينهم بقت صغيرة أوي والدول اللي عايزة يبقي عندها قوات بحرية محترمة بقت بتقول لنفسها بلاش يبقي التارجت بتاعنا نجيب Cruiser وبدل ما نصرف دم قلبنا علي سفينة واحدة خلينا نجيب مدمرتين.
الفرقاطات .. المدمرة بس معمولة في البيت:
شوف .. عشان تفهم يعني إيه فرقاطة Frigate فأنا عايزك تتخيل مدمرة بس صغيرة شوية .. الفرقاطات بتعمل كل حاجة بتقدر المدمرات تعملها بس مش أوي .. هي سريعة بس مش زي المدمرات .. بتقدر تشتغل في عمليات الدفاع الجوي ومطاردة الغواصات بس مش أوي .. أقرب مثال عليها هو إن المدمرة هي إنك تروح تاكل بيتزا في بابا جونز والفرقاطة لما مامتك تعملك البيتزا في البيت .. إذا كان Standard بتاع المدمرات هي إن الإزاحة بتاعتها أو وزنها يبقي حوالي 10,000 طن ففي المتوسط يعني الفرقاطات أخرها تبقي 3,000 طن .. سرعة الفرقاطة بتتراوح ما بين 27-30 عقدة يعني تقريباً أبطأ سيكا من المدمرات .. يمكن بسبب زي ما قلتلك الفروقات بين الفرقاطات والمدمرات طفيفة فكتير من القوات البحرية في العالم زي هولندا وفرنسا وألمانيا وإسبانيا لغوا اسم مدمرة ده خالص وبقت كلمة Frigate تمشي علي الفرقاطة والمدمرة.
علاقة الأمريكان بالفرقاطات غريبة شوية لإنهم بعد سنين من الإعتماد عليها في الحرب العالمية الثانية وفي الحرب الباردة طلع قرار سنة 2015 بخروج أخر فرقاطة من الخدمة وكانت من طراز أوليفر هازارد بيري كلاس Oliver Hazard Perry-Class اسمها يو إس إس سيمبسون USS Simpson علي أساس إن فيه حد فتي إن المستقبل هو ما يسمي Littoral Combat Ship أو LCS وده تصميم جديد لانج بفكر جديد يحل محل الفرقاطات .. بعد صرف مليارات إكتشفوا إن هبداية LCS دي لبستهم في الحيط وبكل أدب رجعت تاني المؤسسة العسكرية الأميريكية للإعتماد علي الفرقاطات ومضوا عقد مع شركة فينكانتييري Fincantieri الإيطالية عشان يصممولهم طراز جديد من الفرقاطات اسمه كونستيلشين كلاس Constellation-Class ودي كلمة معناها الكوكبة اللي هو تجمع النجوم في الفضاء والمفروض إن خلال السنين الجاية الطراز ده حيبدأ يخش الخدمة.
الكورفيت .. سرعة (محمد صلاح) و ترقيص (كفاراتسخيليا):
دي أكتر قطعة بحرية واخدة أكبر من حجمها والناس بتبالغ في قدراتها بشكل أنا أحياناً بستغربه .. فاهمه بس بستغربه .. يعني إنت بلد علي الله حكايتها عايزة تقوي من قواتك البحرية بس معكيش فلوس تجيبي لا مدمرة ولا فرقاطة فبتقرر تشتري كورفيت وبتخلي رجالتك علي السوشيال ميديا يبالغوا حبتين في قدراتها بس صدقني إنت كده بتحمل المركب دي فوق طاقتها وعشان كده خلينا نرصلك شوية حقايق خاصة بالنوع ده من القطع البحرية:
- مبدأياً كده الكورفيت هي أصغر من الفرقاطة لدرجة إن فيه ناس شايفة إن اسم كورفيت ده مستفز جداً ودحلاب كده متعرفش تمسكه فشايفين إن الاسم الأنسب ليها هو لانش صواريخ Missile Boat .. ده معناه إننا لو حنكمل في سكة تشبيهات الكلاب فالكورفيت ده كلب متشرس إنت بتطلقه علي هدف إنت عايز تدمره فإنت مش بتتكلم عن سفينة ليها قدرات دفاعية.
- الكورفيت مفيهاش منظومة دفاع جوي متكاملة فده معناه إن لو عندك حاملة طائرات زي الميسترال مينفعش تحميها بشوية كورفيتات يمشوا حوليها .. إنت كده معملتش حاجة لإن نقطة قوة الكورفيت إنها شايلة صواريخ مضادة للسفن وفي نفس الوقت هي صغيرة وسريعة فبيبقي صعب إنك تصطادها .. الكورفيت سريعة و دي نقطة قوتها .. مركب بتقدر تجري بسرعة 40 عقدة يعني 75 كيلومتر في الساعة .. دي مركب هجومية مش بترجع تدافع.
سفن العمليات البرمائية .. إختراع أمريكاني مش عند حد غيرهم:
ده نوع من السفن مش حتلاقيه عند ناس كتير .. سفينة العمليات البرمائية Amphibious Assault Ship هي عبارة عن حاملة طائرات صغيرة بس بتشيل طيارات هليكوبتر و دبابات و مدرعات و عساكر و مدفعية .. بإختصار هي تقدر تشيل جيش صغير عشان تنزله علي ساحل بلد معادية عشان ينفذوا عملية عسكرية بيشارك فيها فوق 1,800 عسكري و يمكن الأمريكان مثلاً عندهم النوع ده من السفن بيكون تحت تصرف قوات مشاة البحرية US Marines اللي هم أحد الأفرع الرئيسية للقوات المسلحة بتاعتهم.
الغواصات .. الصامت والقامط:
يمكن الغواصات وحاملات الطائرات هم أشهر الفطع البحرية اللي الناس كلها عارفاهم .. دي البتاعة اللي بتغطس تحت المياه .. الغواصات فيه منها 3 أنواع بناء علي هي ماشية بموتور عامل إزاي .. يا إما غواصة ماشية بموتور ديزل ومعاه بطاريات كهرباء .. يا إما غواصة ماشية بنظام جديد شوية اسمه Air-Independent Propulsion .. وطبعاً الغواصات النووية اللي مش موجودة غير عند أميركا وروسيا وبريطانيا وفرنسا والصين والهند .. كمان فيه ناس بتحب تقسم الغواصات علي حسب الحجم بس مشكلة التقسيمة دي إن بسم الله ما شاء الله إنت عندك غواصات وزنها بيبدأ ب150 طن لحد 48,000 طن فإنت ربنا معاك بقي في التقسيمة دي ويمكن عشان كده الأمريكان حلوا المشكلة دي إنهم قسموا الغواصات بتاعتهم ل3 أنواع:
- غواصات هجومية Attack Submarines ودي أصغر الغواصات اللي عندهم بس سريعة ومخصصة أكتر عشان يا تصطاد الغواصات المعادية يا تنفذ عمليات عسكرية واستطلاع.
- غواصات صواريخ كروز Cruise Missile Submarine ودي حرفياً منصة إطلاق صواريخ بس غاطسة تحت المياه فهي لا بتجري ورا حد ولا بتحس بيها غير بعد فوات الأوان.
- غواصات باليستية Ballistic Missile Submarine ودي هي هي غواصات صواريخ كروز بس بدل ما بتشيل صواريخ كروز بتشيل صواريخ باليستية عابرة للقارات.
المشكلة اللي حتواجه أي حد حابب يقرأ في الموضوع ده ويفهم إيه هي أنواع القطع البحرية إن كل بلد ماشية بدماغها وخليني أقولك إن الدنيا ساحت علي بعضها من أول الحرب العالمية الثانية وإنت طالع يعني مثلاً الإنجليز اللي رجعوا تاني اسامي زي فرقاطات وزي كورفيت بعد ما الأسامي دي كانت إختفت عشان يسموا بيها القطع البحرية بتاعتهم اللي شغالة في حتة مكافحة الغواصات .. الأمريكان مثلاً فضلوا حبة متلغبطين بين المدمرات والفرقاطات وملغبطين الناس كلها معاهم .. بس يمكن اللخبطة دي زادت أوي في عصر ظهور الصواريخ كسلاح أساسي للقطع الحربية بدل المدافع وعشان بس تفهم المشكلة أو اللخبطة دي ظهرت إزاي خليني أرصلك تسلسل الأحداث أو Timeline ورا بعض:
- من أول سنة 1949 أميركا بطلت تبني Cruisers بالمعني التقليدي اللي هو مركب كبيرة عليها مدافع فشيخة يمكن باستثناء مركب واحدة هي اللي إتبنت اسمها يو إس إس لونج بيتش USS Long Beach .. لما جت سنة 1970 كانت أغلب Cruisers اللي بتخدم في القوات البحرية الأميريكية من وقت الحرب العالمية الثانية كانت قربت تطلع معاش.
- في أوائل السبعينات الإتحاد السوفيتي متفهمش شربله كرتونة ريدبول عشان يبنوا كذا قطعة بحرية هم قالوا عليها Cruiser بس التسمية دي مكنتش صح لإن السفن السوفيتية دي كحجم وكإمكانيات هي أقرب للفرقاطات منها لCruisers بس الروس نشفوا دماغهم بحيث الوضع علي الأرض بقي إن الإتحاد السوفيتي بقي تحت إيده 19 سفينة بتتصنف إنها Cruiser قصاد 6 بس تحت إيد الأمريكان.
- سنة 1975 القوات البحرية الأميريكية لعبت الكراسي الموسيقية باسامي القطع البحرية بتاعتها .. أي فرقاطة Frigate تحت إيدهم إمكانياتها قريبة من إمكانيات السفن الروسية اللي الروس نشفوا دماغهم يسموها Cruiser فهم كمان سموها Cruiser .. التقسيمة الجديدة الأمريكاني دي خلت قدام الناس علي الورق عدد Cruisers اللي عندهم هو هو عدد Cruisers اللي عند الروس بس في نفس الوقت خلت التقسيمة الأمريكاني للقطع البحرية بتاعتهم هي هي التقسيمة بتاعة باقي الدول الأوروبية الأعضاء في حلف شمال الأطلنطي NATO.
- لسه الناس حتقول هيييه الدنيا وضحت في نفس السنة 1975 الأمريكان نزلوا قطعة بحرية سموها سبرونس كلاس Spruance-Class ليها نفس حجم Cruiser بس أنظمة الدفاع الجوي بتاعتها بعافية شوية فالأمريكان قالوا عليها مدمرة .. يا دي النيلة .. شوية و قاموا مزودين علي القطعة دي نظام إيجيس Aegis اللي حل مشكلة الدفاع الجوي قاموا بقدرة قادر مغيرين تصنيفها من مدمرة خلوه Cruiser .. قمة العته اقسم بالله.
- مش بس الأمريكان اللي عككاين .. السوفييت كان عندهم حاملة طائرات طراز كييف Kiev-Class بتشيل طيارات يعني الأعمي حيصنفها علي إنها حاملة طائرات بس هم صنفوها علي إنها Cruiser .. ليه؟ .. لمجرد إن يبقي من حقهم يخلوها تعدي من مضيقي البوسفور والدردنيل اللي تحت سيطرة تركيا وفق معاهدة مونتريكس اللي إتضمت سنة 1936 واللي بتسمح بأي سفينة حجمها أقل من 45,000 طن إنها تعدي ومتكونش متصنفة علي إنها حاملة طائرات .. حالة تانية لبلد قررت تلخبطنا كلنا في تسمية القطع البحرية لأسباب سياسية هي اليابن .. دستور اليابان اللي إتكتب بعد استسلامها في الحرب العالمية الثانية بيقول نصاً إن القوات البحرية بتاعتها أخرها يوم ما تتمعظم تبني مدمرات .. دلوقتي اليابان عملت 4 حاملات طائرات هليكوبتر شبه الميسترال بتقدر تشيل طيارات F-35B يعني دي وش حاملة طائرات بس هم مصنفينها علي إنها مدمرة.
المصادر:
- مقالة بعنوان Types of naval warships in 21st century and their functions نشرت في موقع Global Defense Insight و ده لينك المقالة الأصلية:
https://defensetalks.com/types-of-naval-warships-in-21st-century-and-their-functions/ - مقالة بعنوان The 7 types of modern warships explained نشرت في موقع Slash Gear و ده لينك المقالة الأصلية:
https://www.slashgear.com/1335354/types-of-military-war-ships-explained/ - مقالة بعنوان What do you call it? The politics and practicalities of warship classification نشرت في موقع Center of International Maritime Security و ده لينك المقالة الأصلية:
https://cimsec.org/what-do-you-call-it-the-politics-and-practicalities-of-warship-classification/
