لينك التسجيل الصوتي علي ساوند كلاود:
https://on.soundcloud.com/u9NuP70QFLJfZsUy8u
فيه حاجات معينة بتقع عينك عليها وأول حاجة بتيجي في دماغك هي أميركا .. عندك مثلاً لما تشوف علامة ماكدونالدز أو تشوف علامة دجاج كنتاكي أو تشوف الماركة بتاعة Apple .. من ضمن الحاجات اللي برده أول ما تشوفها بعنيك أول حاجة بتيجي في دماغك أميركا هي حاملة الطائرات .. موضوعنا اللي حنتكلم عنه النهاردة هو حاملة الطائرات Aircraft Carrier والحقيقة اللي حنتكلم عنه النهاردة ملوش علاقة بتسليحها ولا بأنواعها .. اللي حتكلم عنه النهاردة هو مستقبلها .. عشان أوضحلك أنا حتكلم عن إيه تخيل إن وزارة الدفاع الأمريكية أو زي ما بتتسمي هناك بنتاجون Pentagon عامله زي أبوك وأمك وحاملة الطائرات دي هي إنت أول ما خلصت ثانوية عامة وجت مرحلة التنسيق عشان تقدم علي كلية .. كلنا عدينا بالمرحلة دي في حياتنا إن أبوك مثلاً شايف إن مستقبلك حيبقي مضمون لو دخلت كلية هندسة بس مامتك شايفه حاجة تانية خالص وهي إن المستقبل في إدارة الأعمال وإنت في دماغك تصور ثالث خالص إنك عايز تبقي Photographer محترف .. أهو حاملة الطائرات هي كمان في المرحلة دي .. فيه خناقة كبيرة جوه وزارة الدفاع الأمريكية علي مستقبل حاملة الطائرات وخليني في الأول كده أفهمك هو مين واقف ضد مين؟
علي إيدك اليمين الناس اللي شايفة إن حاملة الطائرات هي Superman بتاع الترسانة العسكرية الأمريكية اللي محدش يقدر ييجي جنبه والناس دول يبقوا كبار قادة القوات البحرية الأمريكية .. دول لو حنكمل في التشبيه إنك بتقدم علي كلية عاملين زي الست والدتك بالضبط .. هم شايفين زي أي أم في الدنيا إن ابنها ده أحسن حد في الدنيا وإن ابنها ده متولدش ومش حيتولد حد زيه .. قادة القوات البحرية مؤمنين بقدرات حاملة الطائرات لدرجة إنهم كانوا بيزقوا جامد عشان البرلمان الأمريكي اللي بيتسمي الكونجرس Congress يوافق علي إنه يديهم فلوس يشتروا بيها حاملتي طائرات جداد لانج من طراز Gerald Ford-Class وطراز (جيرالد فورد) ده اللي اتسمي علي اسم رئيس أمريكي سابق تقدر تسميه الBMW بتاع حاملات الطائرات .. المهم إن قادة القوات البحرية كانوا عايزين ياخدوا 24 مليار دولار يدوها للشركة اللي بتصنع النوع ده من حاملات الطائرات واسمها هانتينجتون إينجالز إينداستريز Huntington Ingalls Industries تحت مسمي شوفي الصح إيه وأعمليه .. قادة القوات البحرية الأمريكية كانوا مبسوطين أوي من نفسهم عشان نفوذهم كان مسمع جامد جوه الكونجرس لإن فيه أعضاء كتير في البرلمان كانوا موافقين علي خطة الرئيس الأمريكي (دونالد ترامب Donald Trump) إن الأسطول البحري الأمريكي لازم يبقي فيه 12 حاملة طائرات و 355 قطعة بحرية .. مع العلم إن لحد الوقت اللي انت بتقرأ فيه المقالة دي الأسطول الأمريكي فيه 11 حاملة طائرات و 285 قطعة بحرية.
علي ايدك الشمال الناس اللي شايفة إن إذا كانت حاملة الطائرات هي Superman فالروس والصينيين بقي معاهم الكريبتونايت Kryptonite أو الحاجة اللي تقدر تهزم Superman وهي الصواريخ بعيدة المدي المتوجهة بالأقمار الصناعية .. هم بالضبط عاملين زي والدك شايفين إنك عيل متدلع متخيل إنك رجل بس الحقيقة إنك متقدرش تشيل مسئولية .. الكبير بتاع الناس دول كان وزير الدفاع الأمريكي (جيمس ماتيس James Mattis ) واللي حتي لما قدم استقالته ومشي وجه وراه واحد اسمه (باتريك شاناهان Patrick Shanahan) اللي هو كمان مشي بس هو كمان ماشي في نفس سكة (جيمس ماتيس) وشايف إن المستقبل مش لحاملات الطائرات إنما للغواصات و الصواريخ اللي بتطير بسرعات أعلي من سرعة الصوت أو Hypersonic والأمن الأليكتروني Cyber-Security والذكاء الصناعي AI .. تقدر تقول عليه وزير دفاع شاب فانكي من بتوع اليومين دول اللي كبروا علي ثورة الSmartphones ومحضروش أيام التليفون الأرضي الأسود أبو بكره ده.
الخناقة كانت كالأتي .. قادة القوات البحرية راسهم وألف سيف يشتروا حاملتين الطائرات ووزارة الدفاع حالفة مية يمين إن ده مش حيحصل .. فين وفين بعد خناق وعراك قعد شهور الطرفين إتفقوا علي الأتي .. القوات البحرية حتشتري حاملتين الطائرات اللي هي عايزاهم وحتموت عليهم بس في المقابل حيأجلوا عملية إعادة التفويل اللي بتتعمل لما حاملة الطائرات توصل لنص عمرها الإفتراضي لواحدة من حاملات الطائرات القديمة من طراز نيمتز Nimitz-Class والكلام كان علي حاملة الطائرات (هاري ترومان) USS Harry Truman اللي خدمت في حروب أميركا في العراق وأفغانستان وسوريا .. طبعاً فيه ناس دلوقتي بتهرش في شعرها بتحاول تفهم الألغاز اللي أنا قلتها من شوية دي فخليك معايا أفهمك واحدة واحدة.
أي حاملة طائرات في الدنيا بتتصمم علي إنها تقدر تشتغل 50 سنة بس عشان ده يحصل لازم لما يعدي علي حاملة الطائرات 25 سنة في الخدمة بيتعملها حاجة اسمها Midlife Refueling يعني تفويلة منتصف العمر إن حضرتك بتجيب حاملة الطائرات وبتغير الوقود النووي بتاعها كله بحيث إن العملية دي بتكلف فلوس كتير وبتاخد علي الأقل سنة كاملة شغل .. لو إنت قررت تأجل الخطوة دي كذا سنة فكده إنت بتخاطر إن المفاعل النووي بتاع حاملة الطائرات ممكن ميشتغلش لإن وقوده النووي بيخلص ولو ده حصل فإنت كأن عربيتك جابت وش سلندر .. بس علي عكس العربيات إنك ممكن تشتريلها موتور جديد فحاملات الطائرات مينفعش تعمل معاها كده وعشان كده فخطوة تأجيل الMidlife Refueling دي بتتوصف إنها زي ما تطلع حاملة الطائرات معاش مبكر.
معني إن وزارة الدفاع تقول للقوات البحرية إنهم حيأجلوا عملية الRefueling أو إعادة التفويل للمفاعل النووي بتاع أي حاملة طائرات كأنك بالضبط حتطلع حاملة الطائرات دي معاش مبكر بس الحقيقة مش دي المشكلة .. المشكلة إن لما حضرتك تطلع حاملة طائرات بره الخدمة دلوقتي فإنت حتخلي الأسطول الأمريكي من دلوقتي ولحد 2025 علي الأقل عايش علي 10 حاملات طائرات مش 11 .. زود علي كده إن القوات البحرية مش حتستلم حاملتي الطائرات الجداد إلا علي سنة 2027 أو 2030 ولإن عمر ما شركة بتسلم مشروع كبير زي حاملة طائرات في معاده فأكيد التسليمة حتتأخر عن كده.
اللي أنا شخصياً مكنتش قادر أفهمه هو الإجابه عن سؤال: ليه؟ .. ليه وزارة الدفاع تقول أنا حشتريلكوا حاملتين الطائرات اللي أنتوا عايزينهم بس تطلعوا واحدة قديمة بره الخدمة؟ .. فيه منكوا دماغه حتوديه إن أكيد الموضوع له علاقة بالفلوس خصوصاً لما تعرف إن قرار إن حاملة الطائرات USS Harry Truman تطلع معاش مبكر حيوفر علي وزارة الدفاع الأميريكية أكثر من 4 مليار دولار .. بس الحقيقة هو الموضوع ملوش علاقة بالفلوس قد ما له علاقة بإثبات وجهة نظر .. زي ما قلتلك وزارة الدفاع الأمريكية مش مقتنعه بإن الإجابة عن سؤال إيه هي الحاجة اللي حتخلي القوات المسلحة الأمريكية تسيطر علي العالم هو حاملة الطائرات .. هم شايفين إن لما تيجي سنة 2040 يعني بعد 20 سنة من دلوقتي حاملة الطائرات حتبقي زي التليفون الأرضي كده دلوقتي محدش بيستخدمه وكله ماسك موبايلات.
أظن السؤال دلوقتي هو طب إيه اللي حيحصل؟ .. عشان تفهم اللي حيحصل سنة 2030 خليني أحكيلك قصة حصلت فعلاً سنة 2014 والقصة دي إن وقتها وزارة الدفاع الأمريكية قالت إن إحنا لسه خارجين من أزمة مالية عالمية والبلد محتاجه تربط الحزام شوية علي بعزقة الفلوس ولإن وزارة الدفاع هي أكتر حد بيصرف فقالوا إن كل فرع من الأفرع الرئيسية للقوات المسلحة يقترح طريقة إنه يوفر بيها كام مليار دولار .. إقتراح القوات البحرية كان إنهم حيأجلوا الMidlife Refueling لحاملة طائرات قديمة شوية من طراز Nimitz-Class اسمها (جورج واشنطن) USS George Washington بحيث إن قرار زي ده هو زي ما وصفتلك بالضبط لما تقول أنا حطلع حاملة الطائرات دي معاش مبكر .. لما جم يحسبوا هم حيوفروا قد إيه؟ إكتشفوا إن لما حاملة الطائرات بالطيارات اللي عليها يطلعوا معاش مبكر فإنت كده حتوفر علي نفسك مصاريف 7 مليار دولار من سنة 2016 لحد سنة 2021 .. يا بلاش.
لسه الناس جوه وزارة الدفاع حيقولوا هييييييييييه اكتشفوا خازوق مستنيهم .. دلوقتي حاملة الطائرات دي كانت حيتعملها Midlife Refueling في شركة Huntington Ingalls Industries والشركة دي عينت ناس مخصوص عشان المشروع ده فلما القوات البحرية تلغي المشروع فكده الشركة حتمشي 1200 موظف .. طبعاً البرلمان لما عرف المعلومة دي قال لا خلاص متطلعوش حاملة الطائرات معاش مبكر وخلوها تعمل الMidlife Refueling عادي خالص عشان حرام نقطع عيش الناس .. هو مش حرام نقطع عيش الناس قد ما النائب البرلماني عن الولاية اللي فيها الشركة خاف يوافق علي قرار زي ده فالناس تغضب عليه ومتنتخبوش تاني .. ده معناه إيه؟ .. ده معناه إن الكونجرس حيرفض إن حاملة الطائرات USS Harry Truman تطلع معاش مبكر وحيوافق إن القوات البحرية تشتري حاملتي طائرات زيادة يعني كلام القوات البحرية حيمشي فوق دماغ وزارة الدفاع .. مش لسبب غير إن أعضاء البرلمان خايفين علي كراسيهم.
أيا كان اللي حيحصل فالخناقة دي عملت جو نفسنة جامد جوه المؤسسة العسكرية الأمريكية لإن إنت وصلت لمرحلة إن كلام وزير الدفاع مبقاش يتسمع ويمكن عشان كده (جيمس ماتيس ) خدها من قصيرها وقدم استقالته بدري لإنه محبش حد في سنه ومكانته يتحط في موقف بايخ زي ده .. وحاجة تانية تفهمها كويس أوي .. غالباً قرارات المؤسسة العسكرية الأمريكية عشان تفهمها حاول تفسرها من منظور الفلوس ومنظور الإنتخابات بتاعتهم .. زي ما انت شايف عشان نائب برلماني يفضل في كرسيه ممكن يلبس البلد كلها في الحيط.
المصدر:
- مقالة بعنوان Nothing Projects Power Like an Aircraft Carrier: Does the Pentagon Think Otherwise? .. نشرت في مجلة Foreign Policy الأمريكية وده لينك المقالة الأصلية:
https://foreignpolicy.com/2019/03/01/nothing-projects-power-like-an-aircraft-carrier-does-the-pentagon-think-otherwise-mattis-military-uss-truman/
