واحدة من القواعد الثابتة عن البني أدمين إن عمرنا من ساعة ما ربنا خلق سيدنا (أدم) لحد يوم القيامة عمرنا ما حنبطل نعمل 3 حاجات .. عمرنا ما حنبطل ناكل .. عمرنا ما حنبطل إفساد في الأرض .. و عمرنا ما حنبطل نلاقي طرق جديدة نقتل بيها بعض .. الحقيقة إن البني أدمين بيقضوا جزء محترم من عمرهم بيحاولوا يلاقوا طرق جديدة للقتل .. من السكينة للمسدس للمدفع الرشاش للقنبلة النووية .. كل فترة البشر يطلعوا بفكرة جديدة مطرقعة لقتل الروح اللي حرم الله عز و جل قتلها و الفترة اللي إحنا عايشين فيها دي مفيش موضة سيكسي أكتر من الإختراع اللي إسمه الصواريخ الهايبرسونيك أو Hypersonic Missiles .. عشان بس متتخيلش إن موضوع المقالة دي هو حاجة مكانها بس أفلام الخيال العلمي فعايز أقولك إن يوم 18 مارس 2022 سلاح الجو الروسي إستخدم صاروخ هايبرسونيك ضد هدف في الأراضي الأوكرانية ضمن الغزو الروسي لأوكرانيا فاللي عايز أقوله ليك إن الصواريخ الهايبرسونيك دي مش سلاح مستقبلي زي ما يكون طالع من فيلم من أفلام المخرج (جيمس كاميرون James Cameron) .. بالعكس .. دي تكنولوجيا قديمة و قديمة أوي كمان.
الهدف من المقالة دي الحقيقة إنك تبقي خارج و إنت عارف إجابة سؤالين:
- يعني إيه صاروخ هايبرسونيك؟ و يفرق إيه عن الصواريخ العادية؟
- تبقي فاهم هي الدنيا رايحة علي فين بالنسبة للتكنولوجيا دي؟ و خلال الكام سنة الجايين إزاي هي ممكن تغير شكل الحروب بين الدول؟
الأول خلينا نمسك إيدك براحة و نحاول نفهم هو يعني إيه هايبرسونيك يا سي دوني؟
لو أنا جيت قلتلك إن اللي قدامك ده يبقي صاروخ هايبرسونيك فعايزك تبقي عارف إن ده معناه إن الصاروخ ده بيعرف يعمل 3 حاجات:
- أول حاجة إنه سريع حبتين تلاتة .. من إسمه فهو صاروخ بيطير بسرعة تعتبر أضعاف سرعة الصوت.
- ثاني حاجة إنه صاروخ دحلاب كده متعرفش تمسكه .. ده صاروخ عنده القدرة إنه يغير من مساره و هو طاير أكنك بتطير طيارة بريموت كونترول.
- ثالث حاجة إنه صاروخ بيطير علي نفس الإرتفاعات بتاعة الطيارات العادية .. ده مش زي الصواريخ التقليدية أرض- أرض اللي بتطير علي إرتفاعات واطية ولا هو صاروخ عابر للقارات عشان يضرب هدف بيطلع بره الغلاف الجوي للارض أصلاً .. ده بيطير في النص اللي هو إمشي عدل يحتار عدوك فيك بالضبط.
خلينا نبدأ بأول نقطة وهي سرعة الصوت .. من ضمن المعلومات اللي بتغيب عن ناس كتير هي إن سرعة الصوت بتفرق علي حسب إنت إرتفاعك كام من علي سطح البحر .. يعني مثلاً لو أنا واقف عند سطح البحر فسرعة الصوت هي 1,225 كيلومتر في الساعة .. لو ركبت طيارة علي إرتفاع مثلاً 10,668 متر و ده الإرتفاع المتوسط اللي بتطير عليه الطيارات فسرعة الصوت حتبقي 1,067 كيلومتر في الساعة قصاد إن سرعة الطيارة نفسها في المتوسط بتكون 966 كيلومتر في الساعة .. حط ده علي جنب .. كلمة صاروخ هايبرسونيك معناه إن الصاروخ ده بالميت خالص بيطير بسرعة 5,633 كيلومتر في الساعة يعني 1.6 كيلومتر في الثانية .. إنت متخيل السرعة؟ .. بس في نفس الوقت عشان خاطري متتخيلش إن عشان الصواريخ الهايبرسونيك بتطير بسرعة فشيخة يبقي ده معناه بالضرورة إننا كبشر لسه مخترعينهم أول إمبارح .. بالعكس.
أول صاروخ هايبرسونيك البشر يخترعوه و يطيروه كان سنة 1962 يعني من أيام الست (أم كلثوم) الله يرحمها و ده حصل لما رائد الفضاء الأميريكي (جون جلين John Glenn) ركب مركبة فضاء خلته ياخدله لفة حول الكرة الأرضية بسرعة عدت سرعة الصوت بكتير .. بلاش دي .. لو إنت بتتفرج علي ماتشات كورة كتير فإنت أكيد سمعت عن حاجة الصواريخ العابرة للقارات .. الجملة دي بتتقال لما لاعيب يشوط كورة جامد من بره منطقة الجزاء و تلاقيها داخله الشبكة بتزغرط .. اللي معلق الكورة بيكون قصده عليها هي ما يسمي Intercontinental Ballistic Missiles و إختصاراً بيسموها ICBM و دي عبارة عن صواريخ بتقدر تشيل رؤوس نووية لمسافات بعيدة و عايزك تعرف إن كل الصواريخ العابرة للقارات اللي موجودة في السوق و اللي تحت إيد أي بلد عندها سلاح نووي هي كلها بلا إستثناء بتطير بسرعات أعلي بكتير من سرعة الصوت .. في المتوسط يعني سرعة الصاروخ العابر للقارات ممكن توصل 24,140 كيلومتر في الساعة أو 6.4 كيلومتر في الثانية .. خدت بالك من نقطة؟ .. الصواريخ العابرة للقارات فعلياً بتقر تطير بسرعة بتوصل خمس أضعاف الصواريخ الهايبرسونيك و تكنولوجيا الصواريخ العابرة للقارات دي من أيام الستينات و السبعينات .. فده بيحطك قدام سؤال مهم و هو إيه المميز يعني في الصواريخ الهايبرسونيك؟ .. طب ما هي مش صواريخ سريعة فشخ زي ما كنت متخيل لإن البشر عملوا فعلياً صواريخ أسرع منها بكتير .. يبقي إيه المميز في الصواريخ الهايبرسونيك؟
هنا يجي دور النقطة الثانية و الثالثة .. إنها دحلاب .. الصواريخ العابرة للقارات كلها بتطير بنفس الطريقة .. حضرتك من قبل ما الصاروخ يتحرك و إنت محددله هو حيضرب مين و يروح إزاي .. الصاروخ بينطلق و بيبدأ يعلي و يعلي و يعلي لحد ما يخرج بره الغلاف الجوي للارض و يبدأ يطير في الفضاء الخارجي .. أول ما يقرب من الهدف بتاعه بيبدأ ينزل تاني يخترق الغلاف الجوي للارض عشان ينزل فوق دماغ الهدف اللي إنت باعته ليه عشان يدمره .. الصواريخ الهايبرسونيك مش كده خالص .. دي صواريخ مش بتخترق الغلاف الجوي .. بتطير علي نفس الإرتفاعات العادية للطيارات المقاتلة .. صحيح مش بنفس سرعة طيران الصواريخ العابرة للقارات بس بتقدر تغير مسارها زي ما هي عايزه.
لو نزلت السوق تشتري صواريخ هايبرسونيك حتلاقي منهم 3 أنواع بس:
- النوع الأول بيسموه Aero-Ballistic و ده فكرته بمنتهي البساطة إنه بيركب علي الطيارة المقاتلة زيه زي أي صاروخ عادي .. اللي بيحصل إن لما الطيار بيتك علي زرار الإطلاق فالصاروخ بيترمي من الطيارة و بمجرد ما بيترمي بيشغل المحرك الصاروخي Rocket Engine بتاعه .. لما ده بيحصل فهو بيتحول لصاروخ عابر للقارات اللي هو بيطير لفوق يخترق الغلاف الجوي و ينزل فوق دماغ العدو .. من ضمن الصواريخ اللي زي ده صاروخ روسي إسمه كنزال Kinzhal و ده اللي الروس إستخدموه ضد الأوكرانيين في الغارة بتاعة يوم 18 مارس 2022 زي ما قلتلك في المقدمة .. أرجع و أقولك إن التكنولوجيا بتاعة النوع ده من الصواريخ الهايبرسونيك قديمة حبتين يعني مثلاً الروس عملوا صاروخ كنزال ده في الثمانينات وقت ما سوق الغناء في مصر بيسيطر عليه أسامي زي (حسام حسني) و (علي حميدة) و (فارس) .. طبعاً إنت مش عارف مين الناس دي.
- النوع الثاني بيسموه Glide Vehicle و ده فكرته إنك بتركبه علي صاروخ أرض- أرض عادي زيه زي الصواريخ العابرة للقارات و بمجرد ما يوصل للإرتفاع المطلوب بيمري المحرك الصاروخي ده و بيبدأ يطير زي الطيارة الشراعية .. صحيح مش سريع أوي بس بيقدر يناور بسهولة .. فيه دول كتير الحقيقة عندها صواريخ هايبرسونيك من النوع ده .. الصينيين عندهم Dongfeng-17 .. الروس عندهم Avangard .. الأمريكان عندهم Conventional Prompt Strike System .. عايز أقولك إن الصينيين و الروس سابقين الأمريكان بسنين ضوئية في النوع ده.
- النوع الثالث بيسموه Cruise Missiles أو صاروخ كروز هايبرسونيك و ده الحقيقة صاروخ جوكر .. ده تقدر تضربه من علي الأرض أو من سفينة أو من طيارة .. بمجرد ما بتطلقة فهو بيشغل محرك صاروخي عشان يوصل الصاروخ للسرعة المطلوبة و اللي بمجرد ما بيوصلها فالمحرك الصاروخي ده بيبطل يشتغل و يحل محله محرك تاني بيسموه سكرامجيت Scramjet عشان يحافظ علي السرعة اللي الصاروخ بيطير بيها .. في مارس 2020 الصينيين و الأمريكان عملوا تجارب ناجحة لصواريخ من النوع ده و علي سبيل إنك تبقي معانا في الصورة يعني فمحرك سكرامجيت ده هو اللي كان بيطير الطيارة Dark Star في فيلم Top Gun: Maverick في حالة إنك شفت الفيلم و اللي كان بيخلي الطيارة تطير بسرعة ماخ عشرة يعني عشر أضعاف سرعة الصوت.
نيجي بقي للسؤال الثاني: يا تري الصواريخ دي خطرة أوي يعني؟
مبدأياً الصواريخ دي مشكلتها إنك مش حتعرف توقعها بالتكنولوجيا المتاحة لينا دلوقتي .. بمعني .. المنطق بيقول إن صواريخ الهايبرسونيك دي بما إنها بتطير زي الطيارات يبقي أحسن سلاح ضدها هو أنظمة الدفاع الجوي زي S-400 الروسي أو حتي THAAD الأمريكاني بس الحقيقة ده مش صح .. أنظمة الدفاع الجوي إتصممت عشان توقع طيارات مش بتخترق سرعة الصوت إلا في أضيق الحدود فده بيحطك قصاد سؤال هو إزاي توقع صاروخ بيطير أسرع من أي صاروخ مضاد للطيارات عندك .. لا و كمان دحلاب كده بيعرف يغير مساره و هو طاير؟ .. حتي الروس أساتذة أنظمة الدفاع الجوي معندهمش إجابة للسؤال ده .. الأمريكان في محاولة ليهم للإجابة علي السؤال ده قالك طب ما ننشر في الجو شوية حساسات Sensors تقدر تلقت الصواريخ دي بس طبعاً ده حل مكلف فشخ و لسه قدامنا سنين لحد ما نوصل للتكنولوجيا اللي تخلينا نقدر نستفيد بيها و نطبقها
طب بص بقي للسيناريو ده .. إفرض لو حطيت رأس نووي علي الصاروخ الهايبرسونيك؟ .. تاني ده برده مش سيناريو من وحي خيال المؤلف لإن الروس بيقولوا إن عندهم القدرة دي فعلاً .. إنت وصلت لمرحلة إن بلد تقدر تضرب بلد تانية بصواريخ نووية قبل ما البلد التانية تلحق تقول أحيه .. بس يبقي التهديد الرئيسي للصواريخ دي مش إنك تحط عليها رؤوس نووية قد ما إنك تستخدمها عشان تضرب هدف حيوي .. لو دخلت حرب ضد إسرائيل مثلاً تستخدمها ضدك في إنها تضرب الكيان العسكري كله .. لو الصين دخلت حرب مع أميركا إنها تضرب حاملات الطائرات .. الصواريخ الهايبرسونيك صحيح لسه سلاح مكلف و غالي و مش أي بلد تقدر تعمله بس خليني أقولك إن ده السلاح اللي حيخليك فعلاً في أي لحظة تقول لعدوك كش ملك.
المصادر:
- مقالة بعنوان How hypersonic missiles work and the unique threats they pose-an aerospace engineer explains نشرت في مجلة The Conversation و ده لينك المقالة الأصلية:
https://theconversation.com/how-hypersonic-missiles-work-and-the-unique-threats-they-pose-an-aerospace-engineer-explains-180836
