تعديل إتعمل يوم 8 فبراير 2021 .. الإنتخابات الرئاسية الأفغانية إتعملت فعلاً في إبريل 2019 ونتيجتها أُعتمدت في سبتمبر بعد خناقة كبيرة علي فرز الأصوات و فاز بيها (أشرف غني أحمدزي).
تعديل إتعمل في 17 إبريل 2021 .. الرئيس الأميريكي الجديد (جو بايدن) أعلن إنسحاب كامل للقوات الأميريكية من أفغانستان بحيث أخر جندي أميريكي حيمشي من هناك يوم 11 سبتمبر 2021.
عدت 20 سنة علي حرب أفغانستان اللي بدأت بعد هجمات 11 سبتمبر 2001 .. خلال ال20 سنة دول إتلعب 5 بطولات كاس عالم و سلسلة Spiderman إتعملت و إتعادت مرتين و لسه الحرب دي مخلصتش .. المشكلة اللي انا شايفها إن الحرب دي أحسن أغنية توصفها بتاعة (عمرو دياب) .. أحبك أكرهك أسيبك أوعدك أعلق نفسي بيكي ولا أعمل فيكي إيه؟ .. تبص علي عدد القوات الأميريكية اللي في أفغانستان دلوقتي تلاقيهم يدوبك 14,000 وده عدد صغير أوي فتقول لنفسك يبقي أكيد الوضع في أفغانستان هادي .. تبدأ تفتح الجرايد هناك عشان تشوف هو فعلاً الوضع هادي ولا إيه؟ تلاقي الوضع زي الزفت وإن حركة طالبان تقريباً بقت بتسيطر علي أغلب أفغانستان تاني وإن الحكومة الأفغانية بقت عامله زي شخصية (عاطف) في فيلم الناظر صلاح الدين اللي جسدها (أحمد حلمي) .. تقول لنفسك يبقي أكيد اللإعلام الأمريكاني مهتم باللي بيحصل و بيقول يا جدعان مجهود سنين بيروح هدر تلاقي إن الأمريكان نفسهم منفضين لأفغانستان زي ما تكون هي الإيكس بتاعتهم اللي كل ما يجيبوا سيرتها يزعلوا .. فوق ده كله تبص علي الأرقام تلاقي إن أميركا خلال ال20 سنة اللي قضتها في أفغانستان عمرها ما رمت كمية قنابل و صواريخ عليها قد ما إترمي خلال الفترة اللي فاتت .. بناء علي أرقام قيادة القوات الجوية الأميريكية فهم رموا علي أفغانستان 5,213 قنبلة في الفترة من يناير لحد سبتمبر 2018 و ده رقم خزعبلي يعني بمعدل 19 قنبلة و صاروخ بيترموا يومياً فوق دماغ افغانستان .. حاول بس تستوعب الرقم ده قبل ما تكمل قراية.
اللي حتكلم عنه في المقالة دي هو إيه اللي بيحصل بالضبط في أفغانستان دلوقتي؟ و عشان أكون مركز في كلامي ححاول أجاوب علي 4 أسئلة اللي هم:
- هل فعلاً بالأرقام الوضع في أفغانستان أسوأ من أي وقت تاني عدي؟
- هم الأمريكان أو خليني أقول إدارة (دونالد ترامب Donald Trump) عندها خطة واضحة إزاي الحرب دي ممكن تخلص؟
- إيه السبب إن الحرب دي مكملة لحد دلوقتي؟
- هل في أمل إن إتفاق سلام يتمضي؟
خليني أبدأ معاك بالسؤال الأول .. هل الوضع في أفغانستان فعلاً سيء أوي كده حالياً؟
حرب أفغانستان دلوقتي بقت حرب إستنزاف و بقت إختبار مش لمدي قدرة القوات المسلحة الأميريكية قد ما بقت إختبار لصبرها .. الحرب دي زي ما قلتلك بقالها 17 سنة و لو بصيت علي خريطة أفغانستان دلوقتي حتكتشف إن حركة طالبان (اللي هم الناس الوحشين من وجهة نظر الأمريكان) بقوا مسيطرين علي مساحات في البلد أكتر من أي وقت تاني عدي قبل كده .. هجماتهم بقت أكبر و بمعدل أسرع .. زي ما قلتلك هي حرب إستنزاف لإن مثلاً يوم 10 أغسطس 2018 الناس بتوع طالبان قدروا يدخلوا مدينة إسمها غازني ودي مدينة أهميتها إنها علي الطريق اللي بيوصلك للعاصمة كابول .. صحيح بعدها بكام يوم القوات الأفغانية بمساعدة الطيران الأميريكي قدروا يطردوا طالبان من المدينة بس انت كمواطن أفغاني خلاص الرسالة وصلتك .. طالبان رجعت و تقدر تخش أي مدينة هي عايزاها و ولا الحكومة ولا الأمريكان حيحموك .. يوم 15 مايو 2018 الناس بتوع طالبان سيطروا علي محافظة فرح ودي محافظة بعيدة شوية غرب أفغانستان علي حدودها مع إيران .. تاني أرجع و أقولك إن صحيح بعدها بشوية الناس بتوع طالبان بيجبروا علي الإنسحاب بس بعد ما بيكونوا سرقوا كل السلاح اللي كان موجود في المدينة اللي دخلوها و اسمهم سمع في البلد كلها ودي مكاسب تخليك من وجهة نظرهم تطنش الخساير البشرية اللي انت بتتعرضلها .. بس اللي بيدفع ثمن حرب الإستنزاف دي هم الناس .. بناء علي تقديرات الأمم المتحدة فعدد المدنيين الأفغان اللي ماتوا في 2017 بس وصل 10,000 بني أدم و متوقع إن لما تقريرهم عن عدد القتلي في 2018 يطلع يكون الرقم أكبر.
ده حيوديني للسؤال اللي وراه .. هل الأمريكان فاهمين هم بيعملوا إيه؟
الفترة اللي كانت بيترمي فيها قنابل و صواريخ علي أفغانستان بمعدل شبه اللي بيحصل دلوقتي كانت سنة 2010 اللي كانت فعلاً سنة سودا في أفغانستان .. في السنة دي عدد القتلي من الأمريكان وصل 711 وعدد المدنيين الأفغان اللي ماتوا كان 1,271 و في السنة دي الأمريكان رموا 5,101 قنبلة و صاروخ .. مع نهاية فترة حكم (باراك أوباما Barack Obama) بدأت الدنيا تهدي شوية بس مش أوي .. سنة 2015 مثلاً الأمريكان رموا فوق أفغانستان 947 قنبلة و العدد ده زاد شوية سنة 2016 بقي 1,337 قنبلة .. انت مستوعب إحنا بنتكلم في معدل مبيعديش 4 قنابل يومياً؟ .. لما (دونالد ترامب) بقي رئيس جاب معاه إستراتيجية جديدة للحرب في أفغانستان بدأ تطبيقها من أغسطس 2017 و الإستراتيجية دي هي السبب في إن عدد القنابل اللي بتترمي فوق أفغانستان زاد للمعدل الرهيب ده .. الإستراتيجية الجديدة اللي الأمريكان بقوا ماشيين عليها في أفغانستان دلوقتي واللي هم بيسموها Fight to Win يعني الحرب بهدف النصر مبنية علي 4 حاجات:
- إحنا حنهري طالبان ضرب لحد ما يسلموا:
زمان كانت Rule of Engagement أو قاعدة الإشتباك اللي القوات الأميريكية بترجعلها في ضرب النار هو إنك متضربش إلا لما يتضرب عليك .. زمان مكنش ينفع إن طيار مقاتل يطير بطيارته فوق أفغانستان و يضرب هدف معين إلا لما الهدف ده يبقي معروف مين فيه؟ و يبقي شخص صدر قرار فعلاً بإغتياله أو إن الهدف ده فيه ناس معاهم سلاح ضربوا نار علي عساكر أمريكان علي الأرض .. لما جه كيس الشيتوس (ترامب) بقي هو الرئيس لغي القاعدة دي .. فيه ناس بتقول إن اللي فضل يزن فوق دماغ (ترامب) عشان يطبق الإستراتيجية الجديدة يبقي وزير دفاعه (جيم ماتيس Jim Mattis) واللي بالمناسبة قدم إستقالته ومشي خلاص و اللي كان شايف إن القوات الجوية مش بتشارك بكل إمكانياتها في الحرب بسبب قواعد الإشتباك دي .. زود علي كده إن اللي بقي بيرمي قنابل فوق أفغانستان مبقوش بس القوات الجوية الأميريكية إنما بقوا القوات الجوية الأفغانية كمان ودي ناس بتطلع طياراتها وهي محششة فطبيعي إن معدل أخطاءهم .. لا أخطاء إيه قول مصايبهم يبقي كتير .. الوضع في أفغانستان بقي زي الزفت لدرجة إن الأمم المتحدة قالت إن عدد القتلي من المدنيين في أفغانستان اللي ماتوا بسبب غارات جوية خلال 2018 هو أعلي معدل يتسجل من ساعة ما الأمم المتحده بقت بتعد العدد ده من القتلي من سنة 2009 .. انت أساساً متخيل إن الحرب الأميريكية في أفغانستان بدأت سنة 2001 وقعدنا لحد سنة 2009 محدش كان بيعمل أي إحصائيات لعدد القتلي من المدنيين اللي بيموتوا من غير وجه حق في الحرب دي؟
- إحنا حنخرب بيت طالبان و حنخليهم يفلسوا:
وده عن طريق إن الطيران الأميريكاني يبدأ يستهدف مزارع الأفيون اللي طالبان بتستخدمها عشان تجيب فلوس يصرفوا بيها علي نفسهم .. ده بيمشي مع إن المخابرات الأميريكية تبدأ تجري ورا الفلوس اللي بتخش لطالبان من بره.
- إحنا نتكلم مع الشيوخ بتوع القبائل عشان يطلعوا يقولوا للناس طالبان وحشة.
- إحنا نلوي دراع باكستان عشان أي حد من طالبان راح إستخبي عندهم يسلموه لينا.
بس طبعا كل ده بلح .. القوات الأميريكية كلها علي بعضها اللي أفغانستان زي ما قلت ميجوش 14,000 بني أدم ودول مش كفاية إنهم ينظموا المرور في مدينة زي القاهرة الكبري وده معناه إن الإستراتيجية الأميريكية رجعت تاني تعتمد علي القصف الجوي اللي و المصحف الشريف ما بيجيب أي نتيجة طالما انت معندكش قوات علي الأرض ففي الوقت اللي الأمريكان مسيطرين علي الجو كانت طالبان بتسيطر علي الأرض وبقوا بيوسعوا من نفوذهم و الأماكن اللي يقدروا يوصلوا ليها بهجماتهم ده غير إن عدد القتلي من المدنيين اللي عمال يموت بسبب القصف الأميريكي بقي صداع في راس الأمريكان نفسهم ومخلي شكلهم وحش مش بس قدام العالم إنما كمان قدام الأفغان نفسهم.
الأمريكان تخيلوا إنهم لما يضربوا مزارع الأفيون يبقي جبرت كده بس الوضع علي الأرض بيقول غير كده و إن الفلوس اللي في إيد طالبان بتزيد مش بتقل .. طب انت رحت كلمت شيوخ و قلتلهم يقولوا علي طالبان وحشة بس المؤتمرات و الإجتماعات اللي انت قعدت فيها مع شيوخ القبائل الأفغانية بسبب الوضع الأمني مقدرتش تعملها في أفغانستان وعملتها يا في السعودية يا في أندونيسيا اللي هو يا فرحتي طب و المواطن الأفغاني اللي انت أساساً مستهدفه عشان تقنعه بإن الشيوخ بيقولوله متقفش مع طالبان حيعرف إن فيه مؤتمر إتعمل في السعودية منين؟ ده غير إنك مجرد ما عملت المؤتمر ده بره أفغانستان فانت إديت طالبان حق إنهم يقولوا إن ده جزء من الحملة الأميريكية علي الإسلام .. حتي باكستان بقت فعلياً زي شخصية (عاطف) بس في مسرحية العيال كبرت المرة دي اللي جسدها الممثل (يونس شلبي) الله يرحمه .. باكستان بقي الأمريكان يقولوها سلمليلنا بتوع طالبان تقولهم حاضر بس مفيش حاجه بتحصل.
ا- محافظات بتتعرض لمعدل هجمات عالي أوي من طالبان بيوصل لهجمتين في الإسبوع ودول بيمثلوا 15% من محافظات أفغانستان.
2- محافظات بتتعرض لمعدل هجمات متوسط بيوصل 3 هجمات في الشهر ودول 20% من إجمالي محافظات البلد.
3- محافظات بتتعرض لمعدل هجمات قليل بيوصل هجمة واحدة كل 3 شهور ودول بيمثلوا 31% من إجمالي محافظات أفغانستان.
4-أخيراً المحافظات اللي متلونه باللون الرمادي دي المحافظات اللي تحت سيطرة كاملة للحكومة الأفغانية ودول حوالي 30% من مساحة أفغانستان و المحافظات اللي متلونه باللون النبيتي الغامق دي اللي تبقي تحت سيطرة كاملة لطالبان و نسبتهم 4% من إجمالي مساحه البلد.
ده حيوديني للسؤال الثالث .. هي بالصلاة علي النبي الحرب دي مكمله معانا لحد دلوقتي ليه؟ .. الحقيقة إن فيه 5 اسباب لإن الحرب دي مش عايزة تخلص:
- أول سبب هو المثل اللي بيقول العند يولد الكفر .. سواء الأمريكان أو طالبان عندهم درجة عند إن كل واحد عايز يكسر إرادة الثاني إن أحياناً الوضع بيوصل لمرحلة الجنون زي ما إحنا شايفين دلوقتي.
- ثاني سبب إن الأمريكان محتاسين حوسة ما يعلم بيها إلا ربنا من 2001 و وسط الحوسة دي الهبد بيزيد .. خلال ال20 سنة اللي فاتوا فيه الالاف من المقاتلين بتوع طالبان ماتوا ورغم كده طالبان مكملة زي ما يكونوا زومبي .. من 10 سنين كانت تقديرات الأمريكان إن عدد مقاتلي طالبان ميجوش 15,000 بس دلوقتي التقديرات بتقول إنهم 60,000.
- ثالث سبب هو إن طلع خازوق جديد اسمه ولاية خراسان اللي تبع داعش ودول ناس متفهمش هم مع مين؟ ولا في صف مين؟ بس كل فترة تلاقيهم فرقعوا قنبلة في سوق ولا في جامع وخلاص .. اللي هو القتل لمجرد القتل من غير أي هدف.
- رابع سبب هو الجشع لإن لما إتقالت فكرة إن يتعمل إتفاق سلام ينهي الحرب دي فبقي كل اللي يهم طالبان إنها تحقق أكبر كمية مكاسب علي الأرض عشان لما تقعد تتفاوض تقدر تلوي دراع الحكومة الأفغانيه براحتها .. صحيح في يوليو 2018 الأمريكان قعدوا مع بتوع طالبان في قطر و حيقعدوا مع بعض تاني بس كم الحاجات اللي متحلتش ومحتاجه تفاوض انت لا تتخيل كم تعقيدها.
- خامس سبب هو الأصابع الخارجية اللي هرت أفغانستان لعب سواء بقي كنت بتتكلم عن إيران أو روسيا أو باكستان .. أي حد عايز يضرب أميركا علي قفاها يروح أفغانستان يرمي لطالبان شوية فلوس و سلاح وهم حيقوموا بالباقي .. طبعا لو رحت سألت الإيرانيين أو الروس انتوا ليه بتعملوا كده؟ حيقولوك و المصحف ما انا دي اختي مني.
أخر سؤال محتاج أجاوب عليه هو هل فيه أمل إن إتفاق سلام يتمضي؟
عشان يبقي فيه سلام لازم يبقي عندك حاجتين: أولاً يبقي عندك قوات أمن تقدر تسيطر علي الأرض و تحافظ علي السلام ده .. ثانياً يبقي عندك عملية ديموقراطية و إنتخابات عشان تيجي حكومات منتخبة تطبق إتفاق السلام ده .. لو جيت تبص علي أفغانستان حتكتشف إن القوات الأفغانية طالع عين اللي جابوها ومش عارفة تنفذ مهمتها لأسباب كتير من ضعف التدريب لضعف التمويل لقلة عددهم للفساد ده غير ‘ن الحكومة الأفغانية نفسها عبارة عن ناس منفسنة من بعض ومش طايقين بعض و بالتالي مفيش أي شغل بيتعمل .. حتي الإنتخابات البرلمانية اللي كان المفروض تتعمل في 2016 و أجلوها بسبب سوء الوضع الأمني أخيراً حصلت في 20 أكتوبر 2018 وسط فضايح تزوير يمكن أسوأ من فضايح التزوير بتاعه دول أفريقيا وده عامل صداع في دماغ الأمريكان هو هل الإنتخابات الرئاسية حتتعمل فعلاً في معادها في إبريل 2019؟
المصادر:
مقالة بعنوان The U.S. never dropped as many bombs on Afghanistan as it did in 2018 .. أميركا عمرها ما رمت قنابل فوق أفغانستان بنفس المعدل بتاع سنة 2018 .. نشرت في مجلة Forbes وده لينك المقالة الأصلية:
https://www.forbes.com/sites/niallmccarthy/2018/11/13/the-u-s-never-dropped-as-many-bombs-on-afghanistan-as-it-did-in-2018-infographic/#386cc0802fae
مقالة بعنوان Why Afghanistan is more dangerous than ever .. ليه أفغانستان بقت أخطر من أي وقت عدي قبل كده؟ .. نشرت في موقع هيئة الإذاعة البريطانية BBC وده لينك المقالة الأصلية:
tps://www.bbc.com/news/world-asia-45507560
