الغارات الجوية مبتجبش نتيجة .. يا بهايم.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/uw2fxrzx0czp?utm_source=clipboard&utm_medium=text&utm_campaign=social_sharing

موضوعنا اللي حنتكلم عنه النهاردة هو القنبلة اللي قدامك في الصورة دي .. دي حضرتك قنبلة مش صاروخ و إسمها GBU-43/B و لإن اسمها شبه الأسامي بتاعة كارتات الفيجا اللي في الكومبيوتر فالإسم اللي هي مشهورة به هو Massive Ordnance Air Blast أو قنبلة الإنفجار الجوي الضخم و إختصاراً بيسموها MOAB بس الأمريكان أدوها اسم دلع تاني اللي هو أم القنابل Mother of All Bombs و اللي برده لو جبت الحروف الأولي من الجملة حتطلع MOAB .. القنبلة دي وزنها 9525 كيلوجرام و طولها 9 متر .. القنبلة دي بتقدر تشيل مواد متفجرة وزنها 5000 كيلوجرام .. القنبلة دي بلا منازع هي أقوي قنبلة غير نووية في الترسانة العسكرية الأميريكية .. القنبلة دي يوم 13 إبريل 2017 تم إسقاطها فوق أفغانستان عن طريق طيارة C-130 Hercules و تم توجيهها فوق هدف إتقال عليه إنه تابع لتنظيم داعش الإرهابي عن طريق GPS.

التصميم بتاع القنبلة دي بيخليها Airbust Weapon يعني قنبلة بتنفجر في الجو قبل ما تصطدم بسطح الأرض بحوالي 20 متر و الفكرة في كده إن النوع ده من القنابل علي عكس اللي بتنفجر لما تصطدم بسطح الأرض بيبقي ليها مدي تدميري كبير حوالي 1.5 كيلومتر .. و لو إنت كنت علي بعد 8 كيلومتر من مكان إنفجار القنبلة فموجة الإنفجار حتوقعك علي الأرض و حتخرملك طبلة ودنك .. القنبلة دي من أسلحة الدمار الشامل و المفروض إنها تستخدم في حالات الضرورة القصوي بس الأمريكان لسبب محدش فاهمه إختاروا يسقطوها فوق كهف مستخبي فيه عناصر من داعش و ده بيخلينا قدام سؤال غريب أوي: هو الأمريكان كانوا بيفكروا في إيه لما عملوا كده؟

أمريكا في حالة حرب في أفغانستان من سنة 2001 و إنتهت رسمياً في 2022 و الحرب دي بقت أطول حرب في تاريخ أميركا .. الحرب دي ملهاش نهاية و مش حتخلص حتي لو الأمريكان سحبوا قواتهم البرية و حتي الأفغان عارفين كده كويس لدرجة إن المواطن الأميريكي نفسه نسي إن بلده في حالة حرب في أفغانستان و يمكن ناس كتير جوه أميركا مفتكرتش إن بلدهم لسه في حالة حرب في أفغانستان إلا لما سمعت خبر تفجير القنبلة MOAB و حتي ساعتها الكلام في الإعلام الأميريكي بدل ما يبدأ يناقش هو إحنا بنعمل إيه في أفغانستان؟ و حنخرج منها إمتي؟ و إزاي؟ تلاقيهم مركزين أوي علي مدي عظمة الترسانة العسكرية الأميريكية و إن جيشهم هو أقوي جيش في العالم .. اللي حنحاول نتكلم عنه النهاردة هو الإجابة عن سؤالين في منتهي البساطة:

• هل الغارات الجوية بتجيب نتيجة؟ و هل الغارات الجوية إستراتيجية ناجحة إنك تكسب حرب؟
• طب لو الغارات الجوية مش بتجيب نتيجة أومال ليه إحنا لسه بنستخدمها؟

بالنسبة للسؤال الأول: هل الغارات الجوية بتجيب نتيجة؟

علي بلاطة و بمنتهي الصراحة لا .. الغارات الجوية مش بتجيب نتيجة و مش بتكسب حروب و أي حد يقولك عكس كده بيضحك علي نفسه .. أي حد درس عسكرية حيعرف إن من يوم 1 نوفمبر 1911 و ده اليوم اللي كان فيه طيار إيطالي إسمه (جيوليو جافوتي Giulio Gavotti) بيطير فوق العاصمة الليبية طرابلس و أحب أفكرك إن وقتها ليبيا كانت تحت الإحتلال الإيطالي شاف عدد من المسلحين ضمن المقاومة الليبية علي الأرض قام رامي عليهم 4 قنابل يدوية كانوا معاه و دي كانت أول مرة الغارات الجوية تستخدم في الحروب .. من اليوم ده و لحد دلوقتي فكرة الغارات الجوية ناس عسكريين شايفينها إنها أحسن إختراع بعد الكهرباء و ناس تانية بتقول إنها مهمة بس مش مهمة زي ما إحنا متخيلين.

فكر فيها كده .. الغارات الجوية بتوفرلك بديل مغري جداً في إنك مثلاً فيه مسلحين مسيطرين علي منطقة معينة في الصعيد فإنت لو مكان المؤسسة العسكرية ممكن تبعت قوات برية و مدرعات و تعرضهم لخسائر في الأرواح و المعدات ولا الأسهل إنك تجيب طيارة F-16 واحدة تضرب المنطقة من الجو؟ بالنسبة للعسكريين الغارات الجوية عامله زي العصاية السحرية بتاعة (هاري بوتر Harry Potter) اللي بتخليك تحافظ علي أرواح الجنود بتوعك و بتفتحلك الباب إنك تكسب الحرب .. بس تعالي نبص علي الواقع حتلاقي إن كل دي طموحات و أماني ملهاش أي معني.

فكرة الغارات الجوية بشكلها الحالي بدأت تظهر في الحرب العالمية الثانية و تلاقي إن أي محلل عسكري من اللي بيطلعوا في التليفيزيون يبررلك مثلاً الغارات الجوية اللي بتعملها القوات الجوية في شبه جزيرة سيناء بإن الأسلوب ده هو اللي خلي الحلفاء يكسبوا الحرب العالمية الثانية .. هو  بيقنع نفسه إنه بيستخدم نفس السلاح اللي هزم (أدولف هتلر) فهل إنت متوقع منه إنه يصدق إن السلاح ده مش حيجيب نتيجة قصاد داعش في سيناء مثلًا؟ .. بس اللي المحلل العسكري ده محتاج يفهمه إن (هتلر) خسر حرب عالمية .. دي حرب الدول اللي بتحارب فيها قررت بينها و بين نفسها إن محدش فيهم حيحاسب نفسه علي الضحايا المدنيين اللي بيموتوا .. ناس كتير بتقول علي الأمريكان إن إستخدامهم القنبلة الذرية في هيروشيما و ناجازاكي كان غير إنساني .. قال يعني إنك تدمر مدينة هيروشيما كلها بقنبلة واحدة يفرق عن إنك تبيد مدينة زي هامبورج أو دريسدن الألمانية بعد أسبوع كامل من القصف الجوي .. هيروشيما زيها زي دريسدن فيها مدنيين ماتوا بس مش حتفرق إذا كانوا ماتوا بقنبلة واحدة أو قنابل كتير .. ألمانيا لوحدها الأمريكان أسقطوا عليها مليون و نص طن من القنابل .. فيه صورة عندك لمدينة دريسدن الألمانية بعد ما إتدمرت من القصف الجوي و صورة حديثة ليها عشان بس تستوعب حجم الدمار اللي حصل.

السؤال المهم دلوقتي: هل القصف الجوي المستمر لدريسدن أو هامبورج أو حتي برلين و ملايين المدنيين اللي ماتوا هل ده هو اللي خلي أمريكا تجبر ألمانيا علي الإستسلام؟

فيه مؤرخ عسكري إسمه (روبيرت بايب Robert Pape) كتب كتاب إسمه Bombing to Win: Airpower and Coercion of War عرض فيه وجهة نظر مختلفة خالص عن اللي إنت متعود تسمعه .. الرجل ده بيقول إن اللي أجبر ألمانيا علي الإستسلام لا إرتفاع عدد القتلي من المدنيين ولا تدمير البنية التحتية الألمانية إنما اللي هزم ألمانيا فعلاً هو الزحف البري للجيشين الأميريكي و السوفيتي .. الرجل ده فعلياً قال إن الغارات الجوية مكنش ليها أي تأثير علي نتيجة الحرب العالمية الثانية .. سامع يا عم المحلل العسكري اللي بتطلع في التليفيزيون؟

الكتاب ده عمل ضجة كبيرة أجبرت القوات الجوية الأميريكية إنها تمول دراسة محترمة أوي عملتها مؤسسة RAND عشان يعرفوا هل فعلاً الغارات الجوية ملهاش أي تأثير في حسم الحروب؟ .. تلاقي إن التقرير فعلاً أكد إن الغارات الجوية علي المدن مفيش أي دليل بيقول إنها كانت من أسباب حسم الحرب.

الغارات الجوية بتعملك مشاكل أكتر ما بتحل و ده اللي وصله مؤرخ عسكري برده إسمه (إيان بوروما Ian Buruma) .. الرجل ده بيقول إن مشكلة الغارات الجوية إنها مبتجيبش نتيجة .. حتي أنصار إستخدام الغارات الجوية ممكن تلاقيهم يقولوا بس عندك مثلاً اللي حصل في مدينة روتردام الهولندية في الحرب العالمية الثانية و إن إزاي حكومة هولندا إستسلمت بعد ما القوات الجوية الألمانية أبادت من الوجود 25,000 منزل في غارة جبارة مخدتش أكتر من نص ساعة .. بس حتي اللي حصل في روتردام متقدرش تاخده كدليل لإن فعلياً حتي من قبل الغارة الألمانية علي المدينة كانت القوات البرية الهولندية إنهزمت فعلاً .. بس أنا عايزك تبص علي الأمثلة الفاشلة للغارات الجوية عشان تعرف قد إيه ده أسلوب فاشل مش بيجيب نتيجة:

الألمان كانوا متخيلين إنهم لما يفضلوا يقصفوا العاصمة البريطانية لندن ليل نهار فبكده عزيمة البريطانيين حتنهار و حيستسلموا بس ده محصلش .. الأمريكان كانوا فاكرين إنهم لما يعملوا غارات جوية كل يوم علي برلين و طوكيو في الحرب العالمية الثانية إن بكده الحرب حتخلص بس برده ده محلصش .. حتي في حرب فيتنام القوات الجوية الأميريكية عملت جرائم حرب في قصفها للعاصمة هانوي و برده الأمريكان خسروا حرب فيتنام .. إنت بتبقي متخيل إنك لما تضرب مدينة كل يوم فهي بكده حتستسلم بس إنت بتنسي إن الناس لما بتشوف الموت بعنيها كل يوم بتتجمع و بتلف حول القائد اللي ممكن يحميهم حتي لو القائد ده ديكتاتور مفتري و ظالم .. وبلاش ناخد الحرب العالمية الثانية علي طول كمثال .. تعالي ناخد حرب فيتنام:

الأخوة الأمريكان أسقطوا علي دول لاوس و كامبوديا و فيتنام ضعف كمية القنابل اللي أسقطوها خلال الحرب العالمية الثانية كلها و جاي تقولي إن إسقاط القنبلة النووية كان عمل غير إنساني .. الأمريكان أسقطوا قنابل خلال حرب فيتنام لدرجة إن ال Landscape بتاع فيتنام إتغير .. فيه كتاب شهير أوي إسمه Kill Anything that Moves كتبه مؤرخ إسمه (نيك تورس Nick Turse) و في الكتاب ده هو إتكلم مع عالم بيئي إسمه (أرثر ويستينج Arthur Westing) اللي زار فيتنام خلال الحرب و اللي قال إن عمره ما شاف قبل كده في حياته كم الحفر الناتجة عن إنفجار القنابل زي ما شافه في فيتنام لدرجة إن خلال الفترة من 1945 لحد سنة 1980 إجمالي مساحة الغابات في فيتنام قل بنسبة 50% و فيه صورة بالألوان لكم الحفر اللي ناتجة عن القصف الجوي الأميريكي لفيتنام .. فيه دولة صغيرة جنب فيتنام إسمها لاوس فيها أكثر من 78 مليون قنبلة أميريكية الصنع منفجرتش مترميين في الغابات .. رغم كل الموت و الدمار ده إلا إن أميركا خسرت حرب فيتنام .. تقوم إنت يا محلل عسكري طالعلي في قناة CBC تقولي إن الغارات الجوية اللي بتشنها القوات الجوية في سيناء حتقضي علي داعش .. يبقي إنت أكيد بتحلم أو بتتخيل حاجات مش موجودة في الواقع .. الأمريكان لما لقوا إن القصف الجوي في فيتنام مش جايب نتيجة حاولوا يبقوا مبدعين أو Creative في الأسلحة اللي بيستخدموها .. مرة يستخدموا النابالم اللي بعد كده بقي محرم دولياً .. مرة يستخدموا الفوسفور واللي برده بقي محرم دولياً .. و برده خسروا الحرب.

خلال السبعينات بدأت تظهر تكنولوجيا القنابل الذكية و القنابل الموجهة بالليزر و بالGPS و الفكرة كلها إنك تحاول تقلل عدد القتلي من المدنيين في الغارات الجوية أو اللي بيسموه Overkill أو القتل الزيادة عن اللزوم .. إنت لما بتسمع حد من وزارة الدفاع الأميريكية بيكلمك عن مفهوم Drone Wars أو حروب الطائرات بدون طيار بيحاول يوصلك إن دلوقتي إحنا عايشين في مرحلة إن اللي بيموت في الغارات الجوية هم الأشرار بس .. دايماً الكلام هو إن دلوقتي الأسلحة بقت متطورة و بقت علي درجة عالية أوي من الكفاءة .. بس الحقيقة إن كل الكلام ده هجص و فتي ملوش أي معني .. بص علي اللي بيحصل في سوريا و إنت تعرف إن الغارات الجوية مش بتحقق حاجة و كل اللي بتعمله إنها بتزود عدد الضحايا من المدنيين.

إذا كنت من الناس اللي بتهلل و تهيص لما تسمع خبر في اليوم السابع أو المصري اليوم عن غارة جوية إستهدفت بؤر تابعة لداعش في سيناء فأنا عايزك تفهم إنك مينفعش تفضل تقصف في الإرهاب لحد ما يموت .. الإرهاب مش صرصار حتفضل ترش عليه مبيد حشرات لحد ما يموت .. لما حضرتك بتطلع مقاتلة F-16 تضرب هدف ما في سيناء فانا عايزك تعرف إن اللي بيحصل إن المقاتلة دي غالباً بتستهدف بيت عايش فيه مدنيين و كلهم حيموتوا و إحتمال يموت معاهم إرهابي ولا إتنين .. بس لو ده كل اللي عندك فأحب أبشرك إن دي مش إستراتيجية تكسبك حرب ولا تقضيلك علي الإرهاب .. إنت لما بتعمل كده كل اللي بتنجح فيه إنك تخلق إرهاب زيادة.

نيجي بقي للسؤال الثالث: هو ليه إحنا لسه بنلجأ للغارات الجوية رغم إننا عارفين إنها مش بتجيب نتيجة؟

الفكرة هي خليط بين الرغبة في الإنتقام من الإرهابيين اللي بيقتلوا جنودنا و بين الرغبة في رفع الروح المعنوية للشارع و كمان للجنود .. حتلاقي إن دايماً يطلع خبر إن القوات الجوية شنت غارة جوية بعد ما يحصل هجوم إرهابي سواء الهجوم ده إستهدف جنودنا أو مدنيين زي تفجير في كنيسة مثلاً .. بس برده الغارات الجوية مش حل و مش بتجيب نتيجة و ياريت نفهم ده قبل ما نصحي في يوم نلاقي إننا خلقنا بإيدينا إرهابيين أكتر ما داعش جندت.

المصدر:

مقالة بعنوان Air Strikes Are Not An Effective Tactic of War, But We Keep Using Them Anyway نشرت في Website اسمه Timeline.com وده لينك المقالة الأصلية:
https://timeline.com/air-strikes-not-effective-140a5211a30c?gi=dbfe475412e8